放飛機

被人放一次飛機係慘既話，
連續被人放兩次飛機叫乜呢？

話說上個星期踢波，
大衛同學話有我同馬神，
點知馬神放飛機。
今個星期又係踢波，
仲要係馬神打電話黎約，
結果……

今次仲要連大衛同學都冇黎。
我唔知大衛同學係放飛機，
定係一早話唔黎。
因為負責約那個都放左飛機，
我跟本問唔到。

再攪笑 d 既係，
話我知馬神唔黎既，
唔係馬神本人，
亦唔係大衛同學，
而係一個唔識既人……

話說約兩點，
兩點半都唔齊兩隊，
之後有個人走黎問我：
「你係馬神個 Friend？
馬神唔黎你知架可？」

結果我就同班唔識既人踢左兩個鐘波……
個班唔識既人，
我係一個都叫唔出名既。
只係其中兩個，
上個星期同佢地踢過波……

---

昨日剪完髮，
今日染埋啡，
影如今日見到個啡色頭髮既舅父，
又認得我 wor，
被我抱冇扭計。

理髮

今朝去左理髮，
檔次提升。
以往去開 68，
今次呢間 168，
不過第一次 98。

貴既係唔同 d，
洗個頭都有心機過以前個 d，
剪前洗一次，
剪後洗一次。
剪後個次都要唔係齋沖水，
係真係洗多一次頭，
落晒洗頭水同護髮素，
仲有頭殼按摩 Tim。

剪亦都剪得好有心機，
不個 d 用個刨算數，
廿分鐘走得。
今次真係慢慢剪慢慢修，
起碼剪左四十五分鐘。

剪出黎都幾滿意，
睇黎理髮錢都係唔省得。

之後同影如飲茶，
同佢影左幾張相，
呵呵呵。

飲完茶，
同姐落旺角買 IP Cam，
我記得我上次問價，
每隻 $2250，
但係今日畀錢既時候，
每隻只係 $1980。

好似只係相差一個星期，
個價回咁多既？

買完趕頭趕命返屋企換衫，
去 SOC 既 APOC 慶功。
同制服，
成年幾冇穿了……

團戰 NDSL

觀塘班機友，
有時會約埋出黎聚聚，
唔一定係打機，
有時會去食野，
又或者上唔知邊個屋企玩。
今日又約左出黎，
十幾人去食魚蛋粉。

食完之後返機鋪打機。
不過，
唔係打街機，
而係打 NDS/NDSL。
首先係玩孖寶賽車，
都好耐冇玩過了。
我記得初初出個時已經買左返黎玩，
仲打爆晒 Tim。
記得初時買，
艾文話同佢連線打。
結果，
當我係佢屋企打過「一次」之後，
就冇再同佢打過了，
佢連 Game 都賣埋。
都係我唔好，
贏晒而打擊佢自信心。

其實 NDS 隻孖寶賽車幾易上手，
因為以前四虎個個星期都鍊 N64 既孖寶賽車，
試過玩通頂 Tim……

我地仲要玩最基本那個圈，
冇咩 Short Cut 捷徑，
所以都練到基本功。

至於同班觀友既賽果，
頭五場好似贏左三定四場，
長期排第一位。
之後借部機畀人玩，
開始跌，
到我接返手，
都冇乜心機打了……

A 定 B

個客 d 要求有時都幾過份，
明明講係 A，
交完貨之後話係 B，
話冇講過 A。
我之所以咁肯定係 A 唔係 B，
係因為當初開會傾既時候，
我係提議 A 既，
但被個客 Ban 左，
話要 B，
結果……
Well……

另一樣野，
就係話個效果唔係佢想要個種，
大佬呀，
Day 1 做 Demo 畀你睇個時已經係咁架啦，
你個時唔講唔啱，
到現在趕出貨先黎講……
由 Day 1 做 Demo 到現在，
足足兩個月時間……

再攪笑 d 既仲有：

「我想咁咁咁……」

「咁咁咁做唔到架 Wor……」

「你唔好咁快話唔得啦，試下先……」

「咁我試下先……」

「咁即係做唔做到？」

「我要試下先……」

「我知你要試，但我想知做唔做到……」

「我知做唔做到就唔駛試啦……（好似我一早話你知唔得）」

「咁你一陣試完，下午有 Demo 睇未呀？」

巧遇車神

個客話今朝一早黎睇 Demo，
約十點。
我準時十點返到公司，
（我有幾可準時呢？）

點知……
等到十一點個客先黎到，
十點黎唔到就唔好約十點啦……

結果一 Review 就睇到成兩點幾，
我個同事仲要趕去醫院探佢太太，
（佢太太剛剛昨日生左個仔）。
結果就我同事走先，
我殿後…

---

昨日坐的士入香港仔，
個司機真係好勁，
簡直要叫佢車神。
有部份路段，
雙手完完全全離開軚盤！

可能佢剛剛開工，
佢不斷將碎銀由散紙包，
搬往膠盒，
仲要分晒類，
一蚊放那格，
兩蚊放那格。
而搬既時候，
係左手持散紙包，
右手持碎銀，
冇手持軚盤。

大衛同學曾經話，
某人駕車好狼（定係其他形容詞）。
但始終一山還有一山高，
比起呢位的士司機，
真係小巫見大巫了…

行大運 2

咩叫一不離二，
今日完完全全體驗到。
昨日行完大運，
今日行得更遠。

今日去得更遠，
上深圳。

約左兩點，
十二點四十五分飯都未食就出發。
兩點去到，
個人未返，
Well……

之後見個 Engineer，
真係好佩服佢兩間公司。
最新 Version 係 42，
間廠用黎做 Mass Production 既係 28，
中間個十四個 Version 去左邊？

係間廠既 QA 冇做野，
定係做 Develope 間公司做改太多？

講要咩 Requirement 既時候，
係 Base on MP 個 Version，
不過睇完最新 Version d Code 之後，
發覺原來唔少都改動過。

不過間公司拿 MP Version 既 Code，
答案係冇；
問係拿 Program Log，
答案都係冇；

但係我就要負責執手尾，
真係玩死。

結果所謂既開會，
只係做 Q&A，
一小時都唔駛。
但車程來回係兩個幾三個鐘……

返到香港成五點幾，
見肚餓，
去麥記買個包食。
老闆話返公司先。

結果係我排左幾分鐘隊，
等左幾分鐘先拿到外賣，
但係我係比佢早到大堂……
佢會唔會跟蹤我睇下我有冇蛇王呢？

行大運

今日行大運，
先去紅磡開會，
之後仲要入香港仔。

老闆同我講，
我問去完紅磡仲要入香港仔？
老闆問我有野做唔得閒咩？

唔係得唔得閒既問題，
而係三點半先去紅磡開會。
四、五點先開完，
起碼六點先入到香港仔，
我冇所謂人地都要收工架？

結果當然一如所料，
開到七點都未傾完，
佢地 d 員工執晒野等走。

---

之前裝圍棋 Game，
因為係日版既關係，
所以裝左 Microsoft Applocale，
等中文 Windows 都 Display 到日文 Interface，
點知咁就中伏喇。

早兩日裝 Software，
個 Installer Shield 變晒怪獸文，
Create 埋 d 怪獸文 Directory。
最慘係 Create 左 d 怪獸文既 System Directory。
想 Rename 都 Rename 唔到。
好傷心。

係網上幾經辛苦，
終於找到個 Solution。
不過照住攪之後，
都只係 70% Work。
唔通真係要如 Alex 所講，
要 Delete 左個 Applocale 先得？

踢波

Stupid

好慘，
被人話 Stupid。
話說昨日同同事去 Cafe 食 Lunch，
叫左杯熱咖啡。
杯咖啡黎到既時候，
我張枱面冇糖，
只有凍咖啡用既糖漿。

最近既糖，
係隔離枱。
但係隔離枱有人坐緊，
仲談天談得興高采列。
我唔想伸手過去拿糖，
而打擾到佢地。

結果就落左少少糖漿。
係落既時候，
聽到隔離枱既一句：
「Stupid」

Well……

---

今日勁慘，
話說今日玩新電話，
唔鍾意佢輸入法 Default 係注音而唔係倉頡，
想改左佢。
學人改 Registry，
點知改衰左，
一開機就 Hang 機。

最後要 Hard Reset 部機。

裝過 d Software 唔緊要，
最慘係昨日攪成日既電話簿冇左。

希望，
希望星期一返公司部電腦找到 Backup 啦。

砌手辦

昨日因為買電話，
所以早走。
今日返到公司，
先知原來老闆 B 昨晚通頂。

話說個客又要手辦機，
得個四塊板 For development，
畀佢拿走三塊，
只餘下一塊研發，
一壞就唔駛做……

昨日佢地好似話砌砌下發覺唔見左粒制，
攪左好耐，
結果仲要未砌好。

今日個手辦師父再上黎攪，
作為 Firmwae 既代表留低做 Support。
其實係有 Bug 要 De，
而我同事又要趕去醫院（佢太太就生得），
所以就我留低喇。

跟據以往幾次砌手辦經驗，
砌親都係要通頂既，
所以今晚我都有咁既覺悟。
好彩既係，
今晚竟然係唔駛通頂。

九點幾就攪掂，
所謂攪掂既意思，
係砌埋左畀得個客，
但唔代表個產品係完成既。

例如個咪經個殼收到 Speaker 既聲，
結果做成 Echo。
解決方法係：
剪斷個 Speaker 條線，
等佢唔會 Wewe 聲……

我最後唔理佢地，
自己做 Code Improvment。

新電話入手

上個星期四，
打算去買電話，
點知佢話冇貨要訂。
應該星期一有，
咁我星期日就放左部 Pocket PC，
等用新機啦。

點知佢話咪有，
要今日先「知」。
留意個動詞，
係今日先「知」，
唔係今日「有」。

冇得用 Pocket PC 幾日，
結果今日忍唔到，
放工落去剷佢。

問佢有咪，
佢話船期延誤，
我就叫佢講唔等白色，
畀部黑色我 ，
好彩佢都肯畀我。

拿到返屋企，
係咁易試過下，
就叉電，
等聽朝用新電話。

講轉頭，
之前試電話，
佢冇 Sim 卡試，
（呢間咩公司？）
叫我用自己個張試。

咁我 d 電話號碼一路都係 Save 係電話，
冇 Save 係 Sim 卡，
咁我就問個 Sales 點抄 d 電話過去。
個 Sales 答我：
「唔得架 Wor，你要人手逐個逐個入返……」

多麼 Pro.
實情就梗係，
有 Software 做啦！

IP Cam

話說影如剛出世時，
我幫佢媽買左個 IP Cam，
等佢隨時可以上網睇到個女。
開頭個 Cam 係裝係我屋企，
之後再搬左去佢屋企。

上次上佢屋企做 Support 前，
曾經試過上 IP Cam 間公司個網頁，
睇下有冇新 Driver，
或者 d FAQ。

點知 Connet 極都話 Connet 唔到個 Server……

昨日收到影如阿媽電話，
話佢地新屋裝修緊，
想將 IP Cam 搬過去，
仲想裝係天花，
睇下可唔可以 Wireless，
兼且裝多一個 Tim。

今日放工出旺角問啦，
首先問下原本那個係咪有 Wireless Module，
點知個 Sales 覆我，
間店已經結業。
（唔怪之得上唔到佢公司個網）

鋪面安出黎個隻係散唔到既蟹貨，
（當日我買個時唔會已經……）

咁佢介紹另一隻畀我，
但係 d 少少既 Writtern 介紹都未有，
話好新 Wor，
Er………

Anyway，
總算問到個價，
買兩隻 Cam 價錢，
係細佢影如阿媽係出面搵人裝。
梗係啦，
個廉價「IT」人唔收人工家嘛……

再戰 MHP

今晚約左奧林派班人出黎打 MHP。
早半年，
我地個個星期都會約一、兩次，
一次打 MHP，
一次下圍棋。
後來一黎忙左，
二黎個 Game 要玩既又玩晒咁滯，
就冇乜再出黎。

以前會約係 CAFE，
今日約左係旺角中心 KFC。
去開個間 CAFE，
因為一黎燈光差，
D 燈閃閃閃，
坐得耐都壞眼，
佢竟然話整唔到！

二黎開始多多限制，
唔知最多要坐幾耐。
梗係啦，
班友叫個餐飲杯野就坐成日，
電費都蝕埋。

去 KFC，
起碼唔會趕你走。

因為加班既關係，
我去到佢地都差唔多食晒。
我叫左個新野，
甚麼專享晚餐。

兩件雞，
脆薯格，
仲有碗湯。
雞同薯格都係食開個 D，
碗湯就真係幾正。

個返個 Game，
太耐冇玩。
生疏晒。

下個月出二代，
已經訂左，
希望好玩啦。

東京交通

訂左電話，
原本話今日有貨，
打電話去問，
要延至星期四。
仲要唔係肯定星期四有貨，
而係星期四先知有冇貨，
有冇攪錯。
呢個肯定係蠢之五。

---

交功課先，
之前口試報告了，
現在補回 Report。

東京交通消費都幾高，
要達到省錢，
係一件幾艱鉅既任務。

東京既交通好發達，
而且花多眼亂。

單以鐵路來說，
已經有 JR、Metro、私營三種。

最方便當然係 d 一張飛任坐個 d 啦，
7-Day Pass 成萬幾拧，
除非去得遠，
否則唔化算。

例如 Tokyo Combination Ticket，
1580 拧一日，
任坐東京都內所有JR線、營團地鐵、都營地鐵、都電、都營巴士（雙層旅遊巴士除外）。
不過，
1580 拧一點都不便宜，
大約要坐五、六程才回本。

便宜一點的，
有單一鐵路既。
例如 JR One Day Ticket，
730 拧一日，
不過都大約要坐四、五程。
不過覆蓋範圍幾細，
起碼三鷹沒有包括在內。

最後一提既係日本既儲值票，
有兩種，
分喇叫 Passnet 同 Suica。
Suica 用於 JR 線、東京單軌車和臨海線，
Passnet 用於 JR 以外的線。
不過儲值票有折扣，
純粹方便而已。

竟然會執房

今朝返完崇拜，
就同左 阿婷、Annie 同 Murphy 去食午餐。
係 PC 附近原來有間食越南星馬野既餐廳，
平靚正。
下次等船長行完船返黎，
帶佢去食先。

今餐食左好多野，
焗青口、煙三文魚蒜蓉包、
咸魚炒時菜、生牛肉湯河、
一口粉卷、芋頭炒飯，
好飽好美味。

之後交收左部 Pocket PC，
部 Pockect PC 係一份聖誕禮物，
唔係好捨得賣走佢，
不過我係一個唔鍾意浪費既人，
如果要放件野係到唔用佢，
不如將佢賣畀有用既人。

之後去左打機，
不過因為好眼訓，
打左一陣就走左了。

返屋企途中，
行左幾個商場，
想買禮物，
不過都係冇咩心水，
實在太難選了。

返到屋企，
冇即刻訓。

結果執房。
個大紙箱面既垃圾清晒，
裡頭既漫畫成功移了去個膠箱內，
餘下既 AD&D 書，
要想辦法移去書架。

個碎紙機，
被我 Fill 滿左兩次，
我將 d 碎紙倒晒落膠袋預備丟棄。
媽媽放工返黎見到，
以為我買左好多食物返黎呢……

Rocky

今朝有久違了星期六一早起身，
出左去睇早場。
兩套戲選，
Rocky Balboa 或 DejaVu。
結果因為另一套開左場既關係，
睇左 Rocky。

史泰龍一出場，
啤酒肚個 D 現晒出黎。
唔好期望會打得好勁，
畢竟史泰龍年紀唔細，
反而呢套文戲較多。

最後場比場個結果都預左，
重點唔係 Rocky 贏家輸，
重點係佢實現左佢教個仔既野。

中段講佢重新訓練，
背景音樂播返個首家喻戶曉既主題曲，
頓時成個人都變得很熱血。

今集既金句，
好發人深醒。
Let me tell you something you already know.
The world ain't all sunshine and rainbows.
It is a very mean and nasty place and it will beat you to
your knees and keep you there permanently if you let it.
You, me, or nobody is gonna hit as hard as life.
But it ain't how hard you hit;
it's about how hard you can get hit, and keep moving forward.
How much you can take, and keep moving forward.
That's how winner's done.
Now, if you know what you're worth, then go out and get what you're worth.
But you gotta be willing to take the hit, and not pointing fingers
saying you ain't where you are because of him, or her, or anybody.
Cowards do that and that ain't you.
You're better than that!

而出奇地，
史泰龍今集咬字好清楚，
起碼我聽得到佢講乜。

謎一樣既新 Project

早幾日老闆 B 搵我傾，
話有個客有個 Product，
想改少少野，
問我難唔難。

我開頭以為係改 Default Setting，
咁老闆又話拿得到 Source Code，
基本上唔難改。

老闆 A 覺得冇理由咁簡單，
因為如此這般容易的話，
冇理由原本 Support 開的那間公司唔做，
要叫我地做。

咁我就問個邊拿左 Source Code 先啦，
發覺要改 Default Setting，
Code 都唔駛改，
較個 Jumper 就成了。

後來再同老闆 B 傾過，
原來佢地唔係想改 Default Setting，
而係想可以讓 User 改 Setting，
之後 Save 低，
下次開機 Load。

而呢樣野，
我睇完 Code 後發覺，
咪做左 Lor。
咁其實究竟個 Project 要做 D 乜？
真係一個謎。

---

觀塘聯賽再度展開，
今屆降到冠聯作賽。
第一日狀態不佳，
三戰二敗僅一勝。
贏個場唔係自己打得好，
係對面犯錯 Only。
爭標路途極之艱鉅……

一日四蠢

發覺自己好蠢，
仲要一件事四次蠢。

蠢之一：
唔識講價，
唔係冇做呢個動作，
係做左冇效果……
同一件貨物，
同一間店舖，
有人買可以用 $45xx，
我買就貴人起碼三百蚊……

蠢之二：
一般黎講，
如果 Trade-in 買野，
個回收價會高過齋賣，
我早兩日格過相差二百元。
今日去呢間店，
話佢公司暫時唔收我個型號。
結果就給出來既錢少左之餘，
收得返既錢又少左……

蠢之三：
同一個價錢，
有兩個 Packages，
一個係兩電 + 1G Memory Card，
另一個係一電 + 2G Memory Card。
第一個 Package 總值係高 d，
但結果我係選左第二個 Package。
原因係，
我唔想浪費。
因為 1G Card 應該唔夠我用，
如果我買多一張 2G Card，
咁咪浪費左張 1G Card？

蠢之四：
間鋪冇現貨而要訂，
我照落訂。
但其實原來有其他鋪有現貨，
仲要係價錢更抵……

Anyway，
錢就畀左，
希望快 d 有新玩具玩。

By the way，
原本打算賣晒電話同 Pocket PC 幫補下，
結果就：
Pocket PC 被人壓價之餘，
部電話被媽徵用了。
徵用既原因係：
想要多一部電話替換，
得閒換下第二部，
Well……

迪士尼生日會

話咁快又一年，
昨日係 Eunice（我都係昨晚先知佢個英文名） 生日。
咁佢、佢父母、婆、工人同我一行五人去左迪士尼食自助餐。
本來見咁遠唔想去，
六點鐘開始，
我六點半先放工，
入去起碼個半鐘頭（公共交通工具的話）。
不過講服左佢媽執車黎接我，
咁又一去冇妨。

夜晚執車入迪士尼，
幾有當年去美國迪士尼既 Feel。
話說當年去完迪士尼 Downtown，
駕車返酒店，
中途迷路，
四下無人咁搵路走。

今晚又係，
過完青馬大橋（唔知係唔係），
Miss 左轉入迪士尼個路口，
一路沿高速公路直入東涌/機場（唔知邊個），
一路四圍望有冇地方轉頭，
好彩找到。
轉返入迪士尼，
又要逐個路牌睇邊條分支路才對。
去到酒店個刻，
剛剛城堡放緊煙花。

係迪士尼食自助餐，
如果有小朋友同行的話有個好處，
就係周不時有卡通人物黎打招呼，
吸引左小朋友既注意力，
變左大人唔需要時常花精神同小朋友玩而食唔到野。

如果生日黎，
會有個生日蛋糕送，
我見 d 卡通人物好忙咁周圍砌蛋糕。

食物方面，
可能外國遊客多，
所以唔少中式食物，
包括燒味同點心！
而我最喜歡既，
係朱古力噴泉同白朱古力噴泉，
好味。

---

小計，
還餘下十四篇。

私家醫院

私家醫院個然係私家醫院，
收費真係好貴。
前晚陪媽媽入院，
去到醫院大堂，
咁似銀行櫃台既……
交低野，
等叫名，
之後姑娘帶上房……

題外話，
係屋企附近坐巴士去，
落車個站大約係醫院對面，
站名係「XXX 醫院」；
反返向係公司附近坐巴士去，
接近醫院落車，
反而站名唔係「XXX 醫院」，
真攪笑。

講返間醫院，
樣樣都計錢。
三等房四百二十元一晚，
窗口位再加三十元，
仲要畀按金七千。
冇病人服提供，
但有睡衣賣。
冇膳食提供，
但可叫飯盒。

今朝媽媽打畀我，
話唔夠錢係身找數，
住左兩日埋單計數係兩萬幾三萬！
貴唔之得要收七千元按金。
媽媽唔夠錢係身，
佢有信用卡係身，
但碌爆左，
結果要坐車返屋企拿另一張信用卡。

雖然唔係畀唔起，
但私家醫院，
少不免都係咪攪喇。

選電話

放完 Weekend 返工，
同事已經換左電話。
由 SE W唔知 700、800 定 900i，
換左部 PPC Phone，
HP 6828。
攪到我都身痕，
Trade 走部電話同 PPC 換返部。

其實 PPC Phone 又或者 Smart Phone 市面上都有好多款，
我班 PSP Friend 好多都用緊，
例如咩 O2, Atom 咁，
不過其實我一直都都幾抗拒，
因為始終覺得，
Multi-Function 既 Device，
壞一 Part 就兩個 Function 都冇得用。
不過舊年秋天，
某人買左部「Moto 明」之後，
我又覺得「好似真係幾方便」 Wor。

每次買野我都會做功課，
今次都唔例外，
暫時候選既有以下幾部。

1. Dopod 838Pro
現時機皇？
三頻雙制式 3.5G機。
黑色 176g 重，
Samsung 400MHz，
電係 1300mAh，
備用時間 220 小時。
65K 色既 2.8吋 TFT Mon，
200 萬 Cmos 鏡頭，
仲有一個 10 萬 Cmos 鏡頭，
內置立體聲 Speaker，
行 Micro SD，
有 Qwerty Keyboard。
06 年 09 月首賣，
現價約 $6000。

2. Softbank
838Pro 既水貨版，
平兩千元，
但又要解 Lock，
又要 Flash Rom，
加上新版好似仲未破到，
舊版就升緊價。
現價約 $4000。

3. Asus P835
三頻機。
白色、銀色 140g 重，
Intel XScale 520MHz，
電係 1300mAh，
備用時間 150 小時。
65K 色既 2.8吋 TFT Mon，
200 萬 Cmos AF 鏡頭，
支援 A2DP，
行 Mini SD，
仲有 GPS 功能。
06 年 12 月首賣，
現價約 $5000。

4. Asus P825
P835 既上一代機款，
四頻機。
銀色 160g 重，
Intel PXA272 416MHz，
電係 1300mAh，
備用時間 150 小時。
65K 色既 2.8吋 TFT Mon，
200 萬 Cmos AF 鏡頭，
支援 A2DP，
行 Mini SD。
06 年 06 月首賣，
現價約 $4000。

5. HP rw6828
四頻機。
銀色 140g 重，
Intel PXA270 416MHz，
電係 1530mAh，
備用時間 280 小時。
65K 色既 2.7吋 TFT Mon，
200 萬 Cmos 鏡頭，
行 Mini SD。
06 年 06 月首賣，
現價約 $4000。

暫時屬意 Asus P535

幫比賽

昨晚更加晚訓，
因為要睇星矢；
今朝更早起身，
因為要幫手攪比賽。
結果……
訓左四個鐘 Only……

本來約左七點半，
結果我八點先到。
佢叫我九點半前放好 Point，
結果我九點前已經攪掂，
仲去埋隔離區幫手 Tim。

總括黎講個比賽都順利既，
不過就浪費左少少。
只得二、三十人參加，
但放成廿四個 Points，
十幾個工作人員，
如果多 d 人玩，
會更加好……

---

夜晚食完飯，
送左媽媽入聖德肋撒醫院。
佢話見唔舒服，
覺得唔係好妥，
想去檢查下 Wor。

希望佢檢查完，
報告話冇事啦。
亦希望各位幫我代禱，
謝

---

追寫日記小結，
還欠二十七篇……

懶上山

昨晚好晚先訓，
今朝好早就起身，
約左人去佐敦拿物資。

話說明日有個小型定向比賽，
我應承左幫手安放控制點，
咁就拿定物資先。
原本叫我今日上去睇位落 Tape，
不過我一黎唔夠訓，
二黎上去好似白上咁。

呢度要解釋少少流程。
首先係 Course Setter set course，
然之後上山落 Tape，
之後係 Event Organizer / Controller 去 Check d Tape 有冇錯，
有分歧就再上多一次去睇。
比賽當日，
就將 d 控制點安放係 Tape 既位置。

現在既情況係，
有人（即係我）擺 Tape，
但可能冇人去 Check Tape，
再加上佢同我講，
呢度呢度唔駛落，
個度個度唔駛落，
結果係要落既可能只得一個。
Well，
我聽朝早 d 去度位好過。

---

訓完午睡，
出左去食飯同收師兄既炸彈，
悶足成晚。
食完飯之後佢地話下場，
都係唔好預我喇，
我早 d 返屋企好過……

不過其實結果我都係……
落左機鋪行一個圈……

觀塘聚餐

今日同觀塘班機友去左牛頭角大排檔聚餐，
雖然係打機識既，
不過佢地都幾熟絡，
之前仲有生日會，
又或者係慶祝聖誕。

席間談起其他地區既玩家 A，
談得興高采烈。
佢地話個邊記仇，
因為佢地曾經贏過 A 或者係 A 既朋友，
所以佢地周時受到不公平既對待。

其實 A 個邊我都熟，
個邊亦都話觀塘呢邊記仇，
小事放大云云。

其實兩邊都……
唔知係唔係誤會開始啦，
但係兩邊都冇去澄清誤會，
結果就愈描愈黑。

其實打機都係求開心姐，
以前 D 唔開心野，
發生左咪算 lor，
咪忘記佢 lor，
成日記住佢又為乜姐？

食完飯上左 VZ 打機，
個場好僻遠，
打完差 D 冇車走，
好彩我知邊度有小巴 ^_^

---

又話要追寫返 D 日記，
講完唔夠一日已經脫期，
黎緊仲要係星期六、日。
跟據往例，
脫期情況會更加嚴重，
請見諒……

Peak Season

早排忙過一輪，
以為忙完可以休息下，
點知原本，
現在先係惡夢既開始。

今日黃昏開會，
開場白都係：
「短短地開個會先……」

結果係……
約五點開會，
六點先開始，
八點幾先完。
兩個鐘既會都叫短短地，
咁長既會議點算？

單單寫低 d Projects 仲有咩要跟進，
都寫左三頁紙。
仲要得兩個人做，
隨時得返我一個，
因為另外個同事要放產假。

咁就敝家伙喇，
老闆話現在係 Peak Season，
係辛苦 d 架喇，
仲想我地積極考慮星期六都返工。
其實我想問既係，
幾時先唔係 Peak Season？
好似做左咁耐都未停過，
仲好似愈來愈忙！

究竟，
係真係有 Peak Season，
定係其實係 Peak Years。
留意，
個 Years 係有 "s" 既。

雖然係忙，
但係現在做緊既 Project，
係幾好玩既……

重寫日記

唔經唔覺，
原來成個幾兩個月冇寫日記。
昨晚被人催，
唯有復寫返。

原本打算有十一月二十三日開始，
一日寫幾篇黎追返 d 時間，
不過咁樣做，
咪會今日既日記就可能下幾個星期先寫，
可能會唔記得左發生咩事，
又有可能愈積愈多，
出年都未寫到。

有人提議我抹晒佢，
有二零零七年開始由頭黎過，
咁樣做都唔係好 Work，
因為唔多符合我既宗旨，
亦都有 d 虎頭蛇尾既感覺。

所以決定三線發展，
即係話，
今日既日記今日/翌日寫。
而同時再開一條戰線由十一月二十三日起追。
第三條戰線，
就係由昨日日記開始，
趁自己仲有 d 記憶，
寫返轉頭。

目標係每日寫五篇。
一篇係即日既，
兩篇係第二戰線既，
另兩篇係第三戰線既。

下限則係至少三篇，
每條戰線一篇。

希望係一月底前，
我可以將欠落既日記清還晒。

呢個可以算係我 07 年既第一個目標。

APOC 閉幕典禮

昨日除了比賽之外，
仲有閉幕禮及晚宴。
其實都幾趕，
三點幾頒獎，
之後食午飯。
坐車過東涌（其實我好似唔應該選呢條 Path），
轉地鐵返屋企。
沖完涼又要即刻出返太子去閉幕禮
去到剛剛七點，
典禮未開始。

一開始就有得上台影相，
話說佢頒紀念品畀工作人員，
我係其中一場既 EO（即係 In-charge），
自然有得上台拿啦。

08 年 APOC 會係南韓攪，
希望到時我拿到假去。
昨晚南韓既代表都有黎，
我仲問佢拿左三張圖，
比賽環境我覺得有 D 似香港。
不過，
地圖既質素有代改進，
好似冇跟 Standard 畫，
而且，
有 d 有標比例係幾多……

席間有抽獎，
其中一 d 獎品係現金購物卷、換領卷，
總之唔係實物啦。
但係 d 外國選手有些翌日離開香港，
有些甚至係即晚夜機走。
咁 d 卷得物冇所用。

有人提議用現金同佢換，
其中某君走黎搭咀，
叫邊個邊個拿錢出黎換返黎資助做遲下會員大會抽獎之用，
我就話不如你捐左你中個份禮物出黎啦，
佢即刻將張換領卷收起身後，
然後諸多藉口，
好攪笑……

APOC 中距離賽 - 標尾會

二零零七年一月一日，
新的一年有好的開始。

昨晚除夕有倒數，
相反，
仲好早訓左 Tim。
大約係黃昏六點開始訓到今朝五點。
早訓既原因，
除了因為之前個晚 OT 通頂冇訓之外，
亦都因為今日係 APOC（亞洲及太平洋區野外定錦標賽）既最後一日賽事。

比賽地點係大嶼山的東灣頭。
因為路途遙遠的關係，
今朝亦都要一早出門口，
趕乘七點船往梅窩。

雖然係屋企已經食左個早餐，
但落左船再食多個鳳爪骨飯，
呢個鳳爪骨飯，
絕對係全日既招點。

今日賽程其實好短，
得兩公里。
我比阿棟遲一分鐘出發，
但去到三號控制點已經見到佢背影，
六去七既時候過左佢，
但七去八係一段上山路段，
我只有看著佢遠去。
係我給予既壓力之下，
佢終於再犯錯……

結果我用了十九分鐘完成，
亦都完成了我賽前要做十分鐘一公里的目標。

返到賽事中心，
出左幾個既成績，
暫時第一既係中國選手，
只係用了十五分鐘；
暫時排第二既係阿斌，
比我快唔夠一分鐘，
同佢比較過分段時間，
頭六七個控制點我都領先，
輸既就正正係去八號個段上山大斜路，
輸得好唔忿氣……

成績目前排第三，
不過只係出左五份一人既成績，
第三隨時保唔住。

之後上左山幫手做野，
落返山既時候，
出左 Final Result，
我標返個尾會拿銅牌，
第四係阿棟。

零七年第一個比賽就拿獎，
絕對係一個好既開始，
亦都係一份最好既新年禮物。

講返個鳳爪骨飯，
當我知道我第三之後，
我就即刻串迪哥：
「全靠你話早餐要食飯，我先有第二咋！」
話說賴地硬王迪哥昨日長途賽中途放棄，
完成唔到，
佢既解釋係：
「因為早餐冇食飯……」

APOC 長途賽

今日係長途賽，
地點係大嶼山既黃公田。
話就話係長途賽，
長途指既只係高組別，
HE 既跑 10 公里，
H21A 既跑 7 公里，
我玩既 H21B 只係跑 3 公里，
比尋日既接力還要短。
究竟係接力太長，
定係長途賽太短？

昨日跑完接力，
我就返左公司 OT，
一路做到公朝五點幾，
先係公司飛的返屋企。
沖個涼，
換件衫，
就出發喇。

係中環坐七點船，
我坐地鐵去到香港站既時候，
已經接近七點，
結果就跑去六號碼頭。

上到船既唯一活動，
當然係訓覺啦。

今日比賽，
好快就跑完，
犯左一個好嚴重既錯失，
結果損失好多時間，
返到黎只有第十。

賽事定下既十五分鐘一公理既目標亦都差少少才達到。

係等其他人返黎既時候，
同班仔玩足球馬騮搶波。
有個仔係咪都做插花，
仲要係好刻意個隻，
笑死我。

玩定向我有一個原則，
就係唔放棄。
今日有個教練係仲未超時既情況之下放棄，
激死我，
最激氣既就係，
返到黎仲要多多藉口……

另外班仔又唔聽話，
尋日玩丟石仔整親人，
今日又被我見到佢地丟石仔，
即刻上前鬧佢地……

APOC 接力賽

今日係接力賽，
原本係最有信心既，
尤其是係低年齡組別個幾隊，
有機會爭獎牌，
不過……

今朝一早就去到賽事中心，
點知佢地要延遲一小時，
佢話個原因係交通問題。
不過，
個 Camp Site 係賽事中心附近，
步行都唔需二十分鐘，
咁究竟發生咩事呢？

唔通係係油麻地開過黎既大會旅遊巴 Delay 左？
但據我所知，
佢地係七點九集會，
八點開車，
斷估都唔會個幾兩個鐘都黎唔到，
更何況，
我地有 d 住香港個邊既都已經黎到。

現場所見，
似係未做好野多過大會交通安排 Delay，
希望唔好如傳聞所言，
因為工作人員等食早餐而 Delay 啦。

講返個賽事，
我覺得好「唔得」。
雖然賽事顧問睇過條 Cource 話冇問題，
但係我就唔完全同意。
舉個例，
我班十二歲組別既仔，
因為唔夠參賽單位既關係，
同十四歲組別合拼，
而佢地跑既 Course，
係同十六歲組別一模一樣！
越級挑戰冇問題，
不過條 Course 唔適合十二歲既小朋友跑。
長度 3 公里，
比佢地既長距離既長度 2 公里還要長！

比賽發生左唔少意外，
我想你地睇新聞都會睇到，
希望佢地快 d 康復。

跑完比賽，
即刻趕返觀塘返工，
又要做通頂 ><

至於成績？
排第十一，
輸我一個，
唉，好傷心……

元朗睇 Site

應承左做 Event Organizer 之後，
都未去過比賽場地。
今日就入去喇，
原本約一齊食午飯就十二點半，
唔食午飯就一點半。
當我坐緊西鐵入去時，
收到電話問我係邊，
我以為佢催我啦，
點知佢話冇人十二點半到，
叫我自己去食野先。

有冇攪錯，
早知我係屋企食左先啦。

終於一點半齊人，
坐車入大棠。
營地個負責人話要睇下我地條 Course，
又話呢個山坡唔跑得，
那個山坡唔跑得，
因為種左植物云云。
之後話介紹一條地圖都冇畫既 Path 畀我地，
點知條 Path 就得啖笑。
好斜難行不在講，
呢條「隱藏」 Path 既旁邊，
就係一條好好跑既石屎路……

睇完 Site，
出返元朗，
研究點樣出九龍。

以為坐小巴會快 d 啦，
點知佢等客等成半個鐘，
跟住又繞埋入唔知屯門家天水圍，
結果成兩個幾鐘先出到去。

已經比西鐵貴架啦，
以為佢快 d 點知仲慢，
點同人鬥呀。
論速度，
分分鐘小巴仲慢過巴士……

被人催

今日個客上黎睇 Demo，
以為得一個上黎，
結果黎左三個。
兩個係客，
一個係手辦師父。

兩個客，
其中一個係 Product Designer，
個 Product 係佢 Design 既，
佢上黎睇我們既 Demo，
跟住畀意見，
好正常既事。

另外一個係 Project Manager，
我真係唔知佢上黎做乜。
睇 Demo 佢又冇睇，
結果同個手辦師父兩個係我地會議室傾野。
我真係唔明，
佢地公司冇會議室咩？
點解係要我地公司會議室自己開會？

最攪笑既係，
佢地好似以為我地唔駛收工咁，
八點幾都仲係度傾，
我又冇理由賴低佢地係度走左架？
結果就無啦啦要 OT。

之後仲激死我，
佢問我 Software 進度點，
我答佢仲寫緊。
之後佢講左句：
「下？乜仲寫緊呀，寫左好耐喇 Wor……」

攪錯，
講到寫 Software 唔駛時間咁。
最過份既係，
佢負責那部份都未攪掂，
（實情仲要係未開始）
就走黎催我。
如果你做起左，
又或者有進度，
黎催我都順氣 d 丫，
敝在現在唔係 Lor……

DVD

好唔開心呀，
我鍾意睇戲，
更加鍾意入戲院睇戲。

係屋企睇，
不論係買碟、租碟定下載，
因為環境太舒服的關係，
好多時都會訓著。

係戲院睇，
除了唔易訓著之外，
螢幕之大，
音響之好，
亦係屋企或者流動產品畀唔到我既。

不過呢，
我愈黎愈唔想入戲院睇。
主要因為故事內容，
通常拍戲拍得長 d，
然後剪接成戲院版。

呢排 d 戲院版，
總係覺得好似有 d 唔完整咁。
最近睇報紙，
某某戲出 DVD，
內附刪剪片段。
睇完刪剪片段，
就會對故事更加理解，
亦都會解答某 D 問題云云。

咁即係點，
想我畀兩次錢？
好反感……

如果你話本身戲院版已經唔錯，
而 DVD 版係畀更多你，
我唔介意。
之但係戲院版唔得，
DVD 補完，
即係戲院版未盡力啦，
點可以咁架？

Signed 與 Unsigned

今日 De 左個 Bug，
好攪笑。
話說個 Program Loop 死左，
翻查原因，
發現死既地方係呢度：

For (i = 8; i > 0; i--)

用人類語言翻譯，
就係：

i 預設為 8，
當 i 呢個變數大於零時，
做以下既野兼將 i 減去 1。

i 呢個變數，
我 Set 左做 S8，
即係有正負數既 8-bit 長變數。

之後我改成咁：

For (i = 0; i < 8; i++)

結果冇事。
咁就奇喇，
除了這處，
就冇其他地方改動過 i，
點解會唔 Work 呢？
之後我將 i Set 做 S16，
即係有正負數既 16-bit 長變數。
再試多次第一句。

結果係……

冇事……

結論係，
粒 MCU 唔 Support S8，
但 Support S16！！
（但係 S8 呢樣野，係 Offical 都有用……）

忙到爆

今日學校派卷，
神龍見首不見尾既毛同學冇返。
收到份卷既一刻，
六十幾分，
七十分都唔夠。
都算 OK 丫，
以咁既溫書時間，
配以咁既分數。

其實睇返份卷，
仲可以拿多 d 分。
因為大意錯既都有幾多下，
反而完完全全唔識既唔算好多。

今日上左一堂足料既堂，
到十點夠鐘放學。
老師都未教晒，
係講講講。
如果，
如果堂堂都係咁就賺了……

---

踏入十一月，
開始忙忙。
公事上開始忙，
愈來接近個 Deadline，
個客又不斷咁推前個 Deadline。

係佢地口中，
咩都好易，
咩都好快攪掂，
咩都唔駛時間做咁。
咁叻就唔駛搵我地，
自己做晒佢啦……

私事上，
又要預備考試，
又要預備比賽。
結果……
日記唔得閒寫，
請見諒。
不過我我會每日寫低 Notes，
方便日後補日記時參考。

敬陪末席

旺角玩的那個打機聯賽，
輸了係要受罰的。
因為之前工作忙，
加上有時間都溫書既情況下，
被扣好多分，
所以今屆聯賽敬陪末席。
講真，
就算唔係扣左呢十八分，
我相信我都係包尾。

聯賽聚餐係燒野食，
去左美孚個頭燒，
出左地鐵站，
仲要行一段路先到。

到大家飲飽食醉。
就到餘興節目，
就係輸個三個表演（受罰）……

今次既表演節目係：
可樂送香蕉……
尾三那個食一條蕉加一罐可樂，
見佢食得好辛苦，
我不禁流下一滴汗。

其實我食蕉大既，
細細個已經好鍾意食蕉。
加上去定向比賽時，
蕉係一種幾好既食物，
所以食唔少蕉。

所以受罰前，
我曾經出 Post 話食蕉冇難度，
當時畀好多人話我看輕食蕉。

終於到我喇，
限時三分鐘，
食三條蕉加一罐可樂。
結果……

我好似唔駛兩分鐘就攪掂晒。
食完既感覺係：
d 蕉好生……

日本語能力試

今日考試，
試場係寶馬山某中學。
因為定向關係，
成日上寶馬山，
所以都幾熟路。
其實間學校都幾僻，
基本上得小巴可以係門口落，
坐巴士既落左車都要行一段路。

上年係九展大 Hall 考，
今年係學校，
自然係拆開晒一間間課室。
每間課室有一個監考一個助理。
個助理做野勁冇效率。
首先講派卷，
最有效率梗係派去每行頭一個，
之後傳落去。
驚你傳落去會偷睇到，
要親派去每個位，
都有幾個方法。
最佳方法就梗係一左一右咁派，
即係派畀第一行第一個，
第二行第一個，
第一行第二個，
如此類推。

冇咁好但都唔錯既，
可以先派第一行，
返轉頭時，
由最尾開始派第二行。

但係個助理選擇既，
係更冇效率個隻方法。
由頭順序先派第一行，
行返上最頭，
由頭順序先派第二行，
睇佢派卷，
差點訓著……

考完試，
坐小日條人龍長到……
粗略估計，
起碼十架小巴先到我。
結果都係用最原始既方法走，
就係步行落山喇……

最後衝刺

聽日就係考試喇，
上年參加四級試，
好好彩地及格。
今年就更進一步，
報考三級試。
不過兩年既心態唔同。

上年但求及格，
CEF 有得回水。
講開 CEF，
因為懶既關係，
都仲未寄 Form 返去，
好似一月二十六日就到期。
原果限期前未交 Form，
就 Cut Account，兼冇錢回……

今年冇左 CEF 呢個包袱，
純粹為左興趣，
同睇下自己程度去到邊。
結果就……
冇乜點溫。

上年起碼做左五年 Past Paper，
溫左 d 精讀。
今年就雖然都買左 Past Paper 同精讀，
不過就一年 Past Paper 都冇做。

或者咁講，
上年係以應付考試既方法去預備考試。
今年雖然都有去睇考試出題分佈，
但以穩固自己既智識為大前題。

短期效率黎講，
當然係上年個方法好 d 啦。
但今年個方法，
長遠會對我學日文之路會有幫助。

今日全日都係一路食住上個星期買既零食，
一路溫書。
又睇下唔係為考試而考試既我，
可以行到幾遠……

背景音樂

我記得我之前講過，
我住那座大廈的升降機，
是有背景音樂的。
不過 d 音樂，
係 d 陳年舊曲，
舊既程度，
係我媽都嫌佢舊。

最慘仲係，
升降機係冇得較靜音，
亦即係話，
我日日都要受佢折磨……

最近乘升降機，
發覺入耳的音樂順耳左，
唔係因為聽慣，
而係佢換左音樂。

唔再係舊歌，
亦唔係粵曲，
或者係流行曲，
我相信個 d 係兒歌。

可能係近聖誕既關係啦，
我聽到歌詞應該係有少少關於聖誕既，
甚至係有少少似詩歌 Tim。
點解講到咁唔肯定呢？
因為我其實聽唔清楚佢唱乜。

一黎係好細聲，
二黎 d 詞我係未聽過既。

Anyway，
換歌都係一件好事黎既，
雖然唔知佢唱乜，
但總算係入得順耳丫。
可能係 d 歌冇咁舊，
又或者係比以前細聲，
所以就算鍾意又好，
唔鍾意都好，
唔會太大反感。

休息

呢排 d 收工時間都幾極端，
昨晚收成兩點幾，
今日就七點未夠就走左。
無他既，
我相信我唔係鐵打，
點都要有休息。

休息，
唔係單單指訓覺個種，
有時去打下機，
或者四虎聚 Hea 下，
都係休息既一種。

有師弟同我講（其實係07年1月6日講既）
叫我唔好攪到自己咁忙，

其實我又覺得冇乜所謂，
人生幾十年好快過，
點解唔用盡佢呢？

至於所謂享受人生，
我也有，
每年我都會去旅行，
好似呢幾年既美國，
黎緊既日本，
出年既韓國等……

分別可能在於，
我因為個人情況比較特別，
所以拍拖可能壓縮成一兩個月，
享受人生可能又係壓縮成一兩個月。
餘下既時間，
自然寄情工作。

更何況，
雖然現在份工作唔算係 Dream Job，
都算係一份幾喜歡既工作，
放多少少時間，
放多少少心機，
不是幾好嗎？

手信

昨日返到佐敦，
七點鬆 d，
無謂咁早上去學校等，
返屋企溫一陣書先。
係屋企附近撞到剛剛去完美國旅行既細牛，
佢叫我上佢屋企拿手信，
係一件 T-恤。

佢話一件 T-恤做手信，
點都好過大虎 D 扭蛋手信咁冇誠意。

其實講開買手信，
又或者買野送畀人，
我都係唔係好掂。
比起大虎既扭蛋、鎖匙扣，
我既亦都唔好得好多。
人地話，
買手信或者買禮物送畀人，
應該考慮下每一個人適合 D 咩禮物，
「度身訂造」。
不過好多時，
我都係個個都送同一款禮物。

可能呢 D 就係所謂冇誠意啦，
我係成日想唔到送咩畀人。
好似四虎第一份台灣手信，
其實係某人有份出既主意。

到第二份同第三份美國手信，
係我自己選既，
到現在我都覺得好「行」。

或者呢 D 就係冇心思，
所以現凡過時過節，
要送禮物畀人我就頭痕。

黎緊三個月有四個節日、值得紀念既日子，
我想少極都要送最少一份掛，
我真係想唔到送咩好 ><
真係頭痛……

日文考試

今晚考日文，
一夠鐘就收工走。
其實唔係點溫過書，
一黎公司好忙，
二黎因為星期日考能力試既關係，
有時間都放晒落能力試先。

幸好既係，
校內試繼續畫公仔畫出腸既畀 Tips 方式，
咁真係要溫既時候，
都唔駛咁驚，
起碼可以靠 Short Term Memory。

不過始終 Short Term Memory 唔係咁可靠，
雖然份卷比我想像中淺，
但係唔識既都仍佔大部份，
希望及格啦。

今日考試，
神龍見首不見尾既毛同學自然會出現。
平時上完堂，
我都係同佢一齊行去荃灣小巴站，
佢上車然後我行返屋企，
今日就唔係喇。

話說落堂，
我同佢離開。
見到有個少女企係大廈門口，
一見到我地（其實係淨係見到毛同學）就笑。
講緊既笑，
唔係大笑個隻，
而係微笑。

然後毛同學就同我講：
「你返去先啦……」
（咁似被人遺棄既對話既？）

講到呢到，
聰明既你應該估到，
該位少女，
應該就係傳說中毛同學既女朋友喇。

Debug

有時真係被我同事激死，
有 d Programming 既基本知識，
講過好多次，
但係佢都係做錯…

話說今日幫佢 Debug，
一睇 d Code，
又係咁錯。
講緊既係 Pointer，
又係買左地，
唔起屋，
但係就係咁搬傢俱入去。
有時冇事，
有時就 Hang 機。

佢問我，
既然呢段有事既，
點解有時會冇事。
我只有答佢：
「好彩 lor」……

之後仲攪笑，
話說我寫好個 Library，
試好晒冇問題。
之後有 d 野加，
我叫佢跟跟。

之後佢同我講，
話唔得 Wor，
咁幫佢睇下啦，
因為我驚係我 d Code 唔得，
結果都係攪唔掂。
臨收工前，
佢話畀我知攪掂喇，
問佢點攪啦。

佢話佢用左佢 D Variables，
結果唔得；
現在用我之前 D Variables，
就攪掂喇，
咁你話，
係咪激死晒？

四片好過三片

現在用緊既剃鬚刀，
係大一暑假既時候買，
三層刀片，
好似好勁咁。

呢幾年出左好多新款，
甚至有用電既 tim，
留意我講緊既唔係電鬚刨，
而係用電既剃鬚刀。
廣告話用電既剃鬚刀剃得乾淨 d，
係唔係真話我唔知，
但兩大牌子都相繼出用電既剃鬚刀，
一試冇妨。

結果就去買左四片刀片那隻用電剃鬚刀，
我覺得，
四片刀片會剃得乾淨過三片刀片。
而且，
兩者價錢相若，
買四片感覺上抵 d。
XDDDDDDDD

之後去左 CitySuper 入貨，
買左咖啡豆、蝦條、墨西哥風味既粟米片，
不過可惜找唔到粟米片點個隻醬。

之後路經 KFC，
四點幾入去食 Lunch。
雖然好唔健康，
但我其實幾鍾意食炸雞。
係炸雞件同雞翼中間選擇，
結果選了炸雞件。

返到屋企，
發現今晚既餸係雞翼，
一日食晒我想食既野，
感謝主。

夜晚一路食零食一路溫書，
進度只是一般……

落水

因為就黎考試，
所以今日留起屋企溫書。
結果當然係訓到日上三竿個時先識起身啦，

不過一起身，
就收到一個電話，
因為呢個電話，
我落水了。

或者講清楚 d，
年尾有個大型定向賽事，
APOC（亞洲及太平洋區野外定向錦標賽），
一共五場賽事，
模擬賽、短途賽、三人接力賽、長途賽及中距離賽。

有比賽，
自然要有參賽者。
不過，
更仲要既係有人肯攪。

個電話就係打黎叫我幫手，
我就應承左做其中一場既 EO（Event Organizer），
即係一個賽事既負責人。

場比賽係平日舉行，
原本我已經請左假參加比賽。
結果，
現在請假就係負責攪比賽。

攪比賽有好多野做，
唔係咁易做既一件事。
有好多人成日發表偉論，
話呢個比賽攪得唔好，
應該點點點，
那個比賽又點點點。

有意見係好事，
可以有改進。
不過，
唔係咁多人肯背起攪比賽呢個責任。

一年有成十幾場比賽，
玩少一兩場，
幫手攪比賽唔係好過份姐？

錯要認，打要企定

街機那兒，
有些機友自發攪些聯賽，
最近發生左 d 事，
值得反思。

話說每個參賽者都要選副 Deck 參賽，
而每一副 Deck 都有一個特別既主題。
其中一個參賽者用既 Deck，
沒有違反規則，
但熟個 Game 既人都知道，
佢個副 Deck 根本虛有其名，
不是真係我地想要的那個主題。

有人提出呢個問題，
該人士強辯他用是一副名副其實的 Deck，
然後東扯西拼「辯論」一大輪，
甚麼沒有犯規云云，
到近日才承認是對賽例的「誤會」。

有趣的是，
佢搬出聖經的話語黎辯護，
可惜他曲解了內容。
他指出聖經說：
「論斷者眼中有樑木，
被論斷者眼中有刺，
樑木大過刺，
表示自己的過失比別人多或比別人大，
哪有資格批評論斷別人﹖
應該先省察自己的言行，
先除去自己的虧欠，
先洗自己的錯，
然後才可洗他人的錯。」

該段經文，
係勤勉人指出其他人的錯處時，
亦都要留意自己有冇犯錯。
並唔係因為人地既過錯大（樑木），
自己只有小過錯（刺）時，
不用改過。

人誰無過，
但重要的是知錯能改，
從失敗中學習。

當有人指出「問題」時，
第一件事要做的，
我想
不是說「自己沒有問題」；
不是說「我有問題，他也有問題，為何你只說我？」；
不是為「問題」掩飾、粉飾；
不是一開始就全身武裝準備「對抗外敵」；
而是
想想為何人會這樣說？（尤其是指出「問題」的不止一人）
真的是自己錯也好，是對方不著也好，
重要的，是解決其「問題」。

共勉之

日記與留言

早排細牛同我講，
話係我日記留言，
但冇 Show 出黎。

仲要係幾次都係咁，

我開頭都唔知咩事。
後來 Check 返 d Setting，
原來我 Enable 左個 Function，
就係所有留言都要我 Approve 左先 Post 出黎。

但係 d 留言又唔會 E-Mail 畀我，
未 Enable 呢個 Function前，
所有留言都會 E-Mail 個 Copy 畀我，
現在反而唔會。
結果，
積埋積埋好多留言。

回想返起當初點解用呢個 Function，
就係因為收到大量垃圾廣告留言，
不過原來呢個 Function 咁多副作用，
結果我都係 Disable 左佢。

其實 Disable 左都有一段時間，
不過唔得閒通知細牛。

今日發覺，
細牛已經識留言，
果然醒目呀！

亦因為呢個留言，
我發現左細牛日記最新既網址。
之前個幾個都冇再 Update，
我一度以為佢已經冇寫，
今日發覺，
原來我週不時都有寫，
只係……只係我唔知姐。
不過現在，
我又有得睇了。


哈哈哈

實力

我突然發覺自己好威，
籍籍無名的我，
竟然會有人掘角。
話說早兩日收到個舊大同既 Message，
問我做左五年既人工幾多所有。
我開頭以為係佢搵工。
其實我唔知市價，
就講左大約兩萬，
等公司還會云云。
之後我都冇左件事。

點知今晚就收到佢電話，
話佢公司請人，
問我有冇興趣做。
個邊出既人工，
仲要比我現在這份高百份之五十！

都曾經有少少心動，
如果早年幾，
即係我失業個排問我，
我會豪不考慮就應承。

不過，
我現在算係有份比較穩定既工作，
雖然人工冇個份咁高，
但總算搵到餐食。

更重要既係，
現在趕緊 Project，
仲係一個好既既 Project。
如果現在走，
就好似投降咁。

唔得，
我唔容許有咁既情況，
我一定要征服佢先。

當有一日老闆睇到我既成果，
加返工資畀我，
咁先係實力既証明。

大打擊

上個星期有返學，
雖然今個星期仍然趕緊 Project，
今個星期點都要返去。
出奇地，
最近經常出差往內地，
好久沒有返學既毛同學都有返黎。
屈指一算，
我都好似走左成個月堂。

不過今日簡直係大打擊呀，
話說我好乖咁做晒功課，
上堂時交畀老師。
點知佢同我講：
「做乜現在先交？
下個星期考試，
我現在即刻改完畀返你啦！」

簡直係晴天霹靂，
我一路以為係再下星期先考試，
誰不知下星期就係。
幾本上係冇時間溫既，
睇黎又要補考，
又或者索性唔鬼考。

呢頭能力試都未必攪得惦，
個頭學內試又黎，
唔知呢 d 係咪叫福無雙至，
禍不單行呢？

---

Anyway，
毛同學原來係香港只係 Stay 多一個月左右。
十二月尾一月頭，
就要飛去唔知上海定北京。
係個度做四個月野，
有人管，
做左管理層，
希望佢前程錦繡啦。

麥記記

今日中午食麥記，
食黑椒漢堡餐。
我其實一路都唔知黑椒漢堡係有餐既，
因為我睇過幾張 Posters，
都只係話單買包幾錢幾錢。

好多時我地去食野，
總會有一個人擺位先。
今日坐我隔離那個，
一個人擺左四個位。

有單人問佢坐唔坐得，
佢話有人。
結果……
當單人食完，
甚至我們食完，
擺位的朋友都係未到既。

其實，
讓人用先唔係更好咩？

上星期三見完客，
食埋麥當奴先返公司。
間麥當奴幾細間，
亦即係話唔會整定好多野食。
好處係 d 食物即整，
壞處係要等。

話說我地叫左三個餐，
三包薯條都係要等。
我地三個人坐係當眼地方等左半個鐘都冇薯條，
當我再去 Counter 問時，
佢地有人問：
「乜真係欠個客三包薯條架？」

原來就係佢曾經想還，
不過遍尋不獲（即係係咁易望唔到）

數分鐘後，
先還兩包，
仲有一包後補。

再數分鐘後，
還最後那包，

又再數分鐘後，
又拿一包黎。
佢地點溝通架？

昏迷

今日係訓覺天。
昨晚打完交流戰，
三十幾人一齊去食宵夜，
一路傾計傾到四點幾。
我步行回到家已經五點幾，
洗澡（我訓覺前會洗澡真係奇聞）後，
六點幾先訓落床。

第一次恢復知覺，
係十二點幾。

第二次恢復知覺，
係五點幾，
食完午餐（？！），
又再訓過。

第三次醒，
已經係九點幾。
起身食晚飯，
睇左一個鐘電視，
又再訓過。

再醒，
已經係星期一朝六點幾。

屈指一算，
訓左成廿一、二個鐘。
不過，
仍然覺得好眼訓。

可能之前透支太多，
今次只係還左息 Only。

做好自己

上個星期幫總會攪既比賽，
早兩日已經有支票預備了，
今朝上大球場拿。
總共三張，
一張係我既津貼，
一張係其他工作人員既津貼，
仲有一張係開公數既物資。
真係高效率，
相比起我，
舊年既津貼我都未放晒…

之後落左銅鑼灣（機鋪），
再過灣仔（機鋪），
都係找唔到人對戰。
之後就過返海去旺角（機鋪）。

今晚十點約左旺角另一機鋪既人交流，
十點打到兩點。
結果係我個邊贏多少少。
個人戰績方面，
四戰三勝一負。

其中一場私人恩怨，
（對中學師弟）
都順利勝出。

其實交流戰，
重要既唔係勝負，
而係賽後既討論同檢討。
透過檢討，
大家都有所進步。

做得好既，
下次繼續。
做得唔好既，
下次改進。

記得我初學定向，
教練同我講：
「唔需要睇勝負咁重，
只要你完成比賽，
做好自己，
勝利自然會來。」

冇態

始終都係冇乜狀態，
不論係工作，
還是係玩。
個人好似好累好累咁，
提不起勁似的。

係因為唔夠訓？
定係因為生命缺少左 d 野？
幾條死線愈來愈近，
但態度係：
係咩？到喇，由佢啦……

點樣可以改變？
點樣可以改善？
我唔知。

但我知道，
憑我一己之力唔會成功。

但我相信，
只要交託給神，
祂必會引領我行該行的路。

當將你的事交託耶和華，
並倚靠他，他就必成全。（詩 37：5）

主領我到青草地，
安歇在溪水旁，
黃昏時主與我一路同行，
牧場上主的羊都得滿足，
心快暢，
我是主的羊。

青草地，(死蔭幽谷)
溪水旁，(高山峻嶺)
黃昏時，有主與我同行。
(黃昏時，有主與我同行。)
黑暗夜，(死蔭幽谷)
路崎嶇，(高山峻嶺)
每一步，跟隨主行。(每一步跟隨主行。)

都係自己黎啦

今日畀個同事激死。
話說用緊粒 MCU 有個 Internal 既 Audio CoDec，
但係只係 Support Mono Sound。
個客要求 Stereo，
咁所以要加隻 External Audio Codec。

我地個 Hardware Designer 既 Design，
係用 External 做 Input，
Internal 做 Output。
問題係，
究竟 Internal 同 External 可唔可以共存？

昨日開緊會既時候，
打電話返公司叫個同事試，
回覆係：唔得。
當 Enable 左個 External Codec 之後，
Internal 那個會冇晒聲。

老闆叫我自己試多次，
今朝返到公司即刻試。
一試就發覺就算 Enable 左 External Audio Codec，
個 Internal 都有聲出。

咁點解同事話唔得呢？
原來佢 Enable External 既同時，
Disable 左個 Internal，
咁點會有聲？

咁我再叫佢試 Enable 晒兩個 Codec，
個 External Audio Codec Input 會唔會有問題啦。
佢回覆話用到冇問題。
當我同老闆報喜之後，
再去 Double Check，
發覺：
原來所謂既冇問題，
係 Input 經 External Audio Codec 直接去 Ouput 時有正常聲，
即係話唔經 MCU 既時候就冇問題。

但係我地個 Application 係要用 Mcu 錄低 d 聲，
結果就沙沙聲……

開會

今日下午去左開會，
入香港仔。
老闆話兩點要入到去，
所以十二點左右要出發。
結果十二點幾一點先出發，
仲要去食埋飯 Tim。
一行三人坐地鐵過北角，
再轉的士，
結果準時兩點入到去。

今日既會議簡直係浪費時間。
話就話夾野，
但係對面就咩 Input 都冇。
Design 未有，
Drawing 未有，
Program Flow 都未有，
但係就催我地交貨，
乜都未有，
點交呀？

最攪笑係 d Idea，
又要價錢平，
但係又要點點點。
話人地部手提電話都做到，
點解佢地呢部做唔到。

但係人地部手提電話講緊既係賣三四千元，
佢件 Product 打算賣幾百元……

結果個會就開到六點幾七點，
食埋野，
返到公司都成八點幾。

唔知點解，
個客好鍾意睇 Demo，
下星期五要睇一次，
月尾又要睇一次。

我都唔知邊度畀咁多 Demo 佢睇，
點樣變 d Code 出黎。
我 Demo 遲左兩個星期畀佢睇，
個 Program Flow 佢遲左三個星期都未畀我……

懶

昨日被人投訴。
咪又係那個客 lor，
話說應承左個客有 Demo，
結果我星期六、日開盡 Turbo 都攪唔掂，
（當然星期日個 Event 用左我唔少時間）

結果個客直接向我老闆告我一狀。
唔知好彩定唔好彩，
老闆冇點罵我。

向好處想，
就係老闆都支持我。
但向壞處想，
就係老闆連罵我都覺得浪費氣力。
Anyway，
呢件 Product 既 Features，
So far 係市面上其他機都好似未見過。
出得到，
應該都好震撼，
雖則佢只係一件 For Kids 既玩具。

結果繼續做、做、做。
今日收工時間係九點，
因為收九點既關係，
所以冇去上當。

正確 d 黎講，
應該係話因為唔想去上堂，
所以收工收九點。

至於點解唔想返學，
主要就係因為未做功課。
其實做功課唔難，
坐車由觀塘返佐敦既時間，
已經夠晒用。

不過點解都唔返學呢，
一個字：「懶」。

簡簡單單已經解釋晒所有野。

浪子歸家

呢一兩日睇大虎個 Blog 發現左樣野，
就係佢浪子歸家。
呢兩日既 Blog，
佢引左 d 基督教詩歌。
細味佢內文，
似乎佢重新信主。

想當年，
係大虎帶我返教會，
後來當我習慣了返教會，
就到佢失去了踪影。

或者我唔係一個好的見證，
我亦沒刻意去向班兄弟傳福音，
所以咁多年內，
其他三兄弟都冇信主。
今日見到大虎信主，
好開心。

我想起一段好有名既聖經比喻，
路加福音第十五章：浪子的比喻。
（這亦是為甚麼文首我用「浪子歸家」）

然而，
信神並不是只是口說「主呀主呀」，
而是需要身體力行。
不單要做一個活的見證，
還應該多靈修、
祈禱和多返教會。

希伯來書十章 24 至 25 節提到：
「又要彼此相顧，激發愛心，
勉勵行善。你們不可停止聚會，
好像那些停止慣了的人，倒要彼此勸勉，
既知道那日子臨近，就更當如此。」

身體力行呢點，
亦係我做得不足的地方。

共勉之。

鑊

終於到左比賽當日，
今日既鑊比想像中還要多。
首先係貨 Van 司機唔知醒，
遲左成半個鐘。

跟住工作人員嚴重不足。
之前老師話我知既係四十人，
朝早學生話我知既係三十人，
最後出席既係十幾人……
好彩我另外找左幾個可以以一當三既熟手黎姐，
如果唔係咪中晒伏？

擺 Point 那兒又有鑊，
擺晒 / 未擺晒 Points 又冇通知，
攪到我逐個打電話問，
到比賽開始左十幾分鐘，
其中一個先話我知佢仲有四個未擺。
理論上，
佢地擺完應該做巡邏，
不過佢地有部份十分忙碌既關係，
有 d 預先同我講會早走。
不過走都出句聲丫，
攪到我搵人去 Check Points 既時候，
打畀佢，佢竟然係屋企……

跟住又話起點攪唔掂，
要我現場班人去幫手。
有 d 好 Helpful，
未到佢出發，
我一叫佢就去幫手；
另外一 d 就……
仲要係識左成十年既……

最激氣係等佢地執野，
四點未夠就完既比賽，
佢地執到七點都未攪掂。
我都好耐未試過咁勞氣罵人，
激鬼死。
結果我運返 d 物資返總會同 SOC，
再返公司已經九點，
加班到一點幾都未攪掂明日 Demo d 野……

補牙

又開始出牙血，
所以今早去左睇牙醫。
其實應該早 d 睇，
不過行事曆排得密密麻麻，
係今朝先算得閒少少。
不過講緊既得閒，
都係我遲返公司半個鐘換返黎既。

洗牙，
好痛。
不過更痛既還在後頭。
牙醫話我有隻大牙蛀左個小孔，
要補牙。

補牙唔係就咁填返個孔。
首先係鑽深 D，
除掉蛀壞左既部份。
牙齒最表面的是堅硬的琺瑯質，
冇神經同血管。
但入一層的象牙質係活的組織，
一鑽入去，
好痛呀！

埋單計數，
洗牙、補牙再加埋藥，
咁又冇左成千元。

---

下午培正有兩個學生去點聽日既物資，
打畀我話冇借到手推車。
個邊既答覆話我太遲講，
唔夠時間借。
不過我好似兩個星期前就話借，
咁叫唔夠時間。

好彩我住得近 SOC，
即刻打畀阿健睇下佢係邊。
約左佢夜晚十點返去借三架摺得埋既車仔，
總算解了燃眉之急，
不過原來三架車仔加起來都好重，
我拿到返屋企已經汗流浹背…

Meemory Overflow

早兩日個客又打黎催 Demo，
係都要我畀個期佢。
想畀耐 d，
但係咪開口已經被佢封後門，
叫我唔好講咁長，
例如 20 號係冇可能。
結果，
被迫話下星期一有 Demo……

係咁被佢催，
但係佢欠我 d 野又未畀我，
例如 d Graphics 啦，
甚至乎連個 Processing Flow 都未畀我。
按呢個制會出 d 咩畫面，
之後做 d 咩 Features 都唔知，
點做？

淨係做晒 Core 算數？
唔合理唔合理。

Any，
冇 Flow 都要做住 Core 先，
結果今晚做到成點幾……

---

攪左幾日既 Bug，
今日 Solve到。

事緣其中一個 Array 太大，
要係個 Heap 度 Direct 拿一段 Memory 黎用。
咁每一格係一個佔 3 Bytes 既 Structure，
個 Array 有 256 格。
咁我拿 Memory 拿 256 * 3 好合理姐，
但係就係咁 Hang 機，
話 Memory Overflow。

後來發覺，
原來個 3-Byte Structure，
個 System 用 4-Byte 去儲。
結果當我想 Access 較後既 Data 既時候，
Memory Overflow。

激死

大嶼山宿營

今晚要開會，
唔係公司既會，
而係集訓計劃個邊。
主要都係會報下 D 進度，
班仔女既表現咁。

有一樣野都幾擔心，
因為有兩場係大嶼山舉行。
但係班仔，
尤其是係最細個幾個，
即係十至十二歲個班，
大部份住係北區。
由北區到中環再坐船入大嶼山，
至少都要三個小時，
還未計交通延誤呢！

假設 First Start 係 09:30，
即係話佢地要五點幾六點起身，
之後仲舟車勞動，
實影響表現啦。

現在計劃係大嶼山宿營，
但係就要自費。
至於教練，
唔一定要入去，
但係就要睇返有幾多個仔，
按比例咁。

我希望班仔會入去，
不過我自己就唔係咁想。
雖則唔係話住得好近，
但都唔算好遠。

要自費宿營，
我不如係屋企訓好過，
而且又唔駛驚訓唔慣張陌生床。

Anyway，
係咪需要入去宿營，
睇下班仔點決定啦。

人手不足

我發覺我好勁呀，
應該返工返十點。
結果十點的時候，
我仲係自己張床上面，
剛剛睜開眼睛。

結果就梗係飛的返去啦，
趕極都要十點四十五分先返到去……

星期日就係比賽喇，
人手好似唔係好足夠。
原本打算我每個崗位找一個熟既做 Leader，
然後再由培正班學生做副手。
不過，
當我開始打電話 Confirm 集合時間的時候，
又多幾個話唔得。

一個屋企有事，
可能要遲黎，
Worst Case 係黎唔到，
明日覆實我。

兩個話唔可以留咁耐，
可能要早走。
咁又係既，
朝八晚六係長 d 架喇。

一個話個日有 d 國內嘉賓黎，
中間要落返山帶佢地……

總會今日話我知，
冇 Book 貨 Van，
即係要自己 Book。
好彩有想熟既，
如果唔係都唔知點算……

工作人員買少見少，
物資又好似唔足。
情況惡劣成咁，
都唔知個日會唔會有更大鑊。

考試

考試一步一步迫近，
但準備度十分不足，
最後結果可想而知。
最近收到考試通知書，
像提醒我般：
「死線黎喇！」

舊年考同一個試，
當然唔同 Level，
係下午攪，
地點係九龍灣。
所以可以訓足先出發。

今年升左一個 Level，
地點被派去寶馬山培僑，
考試時間仲要晨早開始。
真係陰公，
我最怕既係，
我會唔知知醒……

話說年年十二月第一個星期都係童軍錦標賽，
上年撞正考試。
雖則比賽係上午，
考試係下午。
但都費時咁趕，
所以就冇去幫手。

今年亦都係撞考試，
比賽地點仲要係冇雷公咁遠既北潭凹，
即係話，
想都唔駛想。
雖則我應該帶隊，
唯有將三個仔交畀他教練照顧。

今晚上堂，
一舊雲咁。
出奇地，
竟然 Listenling 聽得明，
答對一半以上。
奇蹟…奇蹟！

撐

今日睇兄弟個 Blog，
睇到佢好似好灰咁。
話咩咩佢既生活起左變化，
是好是壞都唔知，
仲問班兄弟撐唔撐佢。
原本睇完 Blog，
好想即刻覆佢話一定撐。
不過又好驚自己會錯意，
其實原來佢唔係問緊我咁。

思前想後，
十二個小時之後，
我決定都係覆佢。

原本打算係自己日記度寫算數。
費時真係會錯意時瘀爆。
但係想想下，
有乜好驚姐？

結果都照樣出 Post。

---

其實睇佢個 Blog，
都畀自己好大既反思。
佢飄蕩左咁耐，
總算找到發展既方向。
縱然有變化，
但起碼意識到有變化。

反觀我呢？
找到了自己的路了嗎？
R&D 的滿足感真的滿足到了我麼？
我在找尋的，
又是其麼？

腦海想起的，
是一首詩歌。

從前流浪飄泊，遠境似迷茫，心中空虛孤單，徬徨與不安，
就在那天相遇，我一生的主，以愛引領我路，為我導航。

過去嚐盡風浪，滿心淒愴，今天祂必拯救，替我擔當，
前途重現希望，永不再徬徨，主恩天天伴隨，領身心開朗。

我已找得盼望，神賜美好生命，救主存在我心裡，
歡欣透心窩，因祂捨生救贖，除去痛苦失望，
我心為願永跟隨，一生棄罪網。

機友百態

今日本來好開心咁訓緊覺，
結果就畀 d 家務噪音嘈醒。
個 Parttime 工人黎到，
又洗衣機聲，
又吸塵機聲，
好吵好吵。
嘈醒左，
但係又訓唔返。
迫放無奈要出街避一避。
結果一路行到出旺角避一避。

碰到班機友，
夜晚一齊食飯。
同佢地食飯，
通常都好夜。
原因冇他既，
掛住打機唔食飯 Lor。

通常都係八點半有人叫食飯，
叫到九點半先所有人收手。
今次係九點半都未收晒手，
結果食住等。
食住等既結果係幾乎食晒都未黎。

呢個都未經典。
有個仲誇張。
基本上掛住講，
所有人食晒喇，
佢碗飯都未食到一半。

結果咪又係全世界等佢一個 Lor，
真係激死。

---

參加左個旺角聯賽，
原本以為會包尾的。
頭兩個星期完之後還是位於下遊，
結果係埋單時上到第六。

第二季聯賽仲難打，
係訓練和爭勝兩者中，
我結果選了訓練，
當是一個挑戰吧！

死亡筆記 2

今朝去了睇死亡筆記 2，
因為難既關係，
原本打算去旺角睇，
結果行到一半，
途經電影中心，
就買飛入場了。

上集講到夜神月入調查總部，
究竟係基拉贏定調查總部贏呢？
今集會有答案，
而且據聞會同漫畫版有出入，
所以充滿期待。

結局係……屈機，
唔可以話唔合理，
都算講得通，
個人覺得亦算合理。

今集既特色係，
「黑」同埋「長腿」。
劇中主要女角，
大部份都係短裙 Show 長腿。

而所有擁有死亡筆記既人，
亦主部轉晒穿黑色主色既服裝。

整體來說，
改編得幾好，
將漫畫版枝節既野刪除合併。
故事算幾流暢。

睇完之後，
上左 D Forum/Newsgroup 睇影評。
溫馨小提示：
如果你未睇套戲，
而又打算去睇，
千祈唔好上呢 d 地方睇影評，
因為好多時有人會爆劇情同結局。
有 d 更會係標題打出黎，
避都避唔到。

有 d 人話套戲差，
有 d 乜乜講唔通咁，
有 d 乜乜又冇交待過。
其實，好多係戲中都有交待過，
難道佢地有 Filter 過濾晒？

李克勤演奏廳 II

望穿秋水，
終於等到克勤出新碟。
我中午第一時間去買，
轉埋 MP3 放落機到係咁煲。

上年克勤隻碟「演奏廳」大賣，
今年食髓知味，
同一 Formula，
就係歌手同樂手同步現場錄音。

「演奏廳」係慈雲山一間小學錄，
今次更移師韓國，
請來當地樂手參與。

我唔係 d 咩樂評人，
音色是否剔透澄明，
唱腔如何如何，
我一概唔識分。
就個人觀感黎講，
我覺得好聽。

今次呢隻碟，
都係以抒情歌為主。
第一 Plug《天水．圍城》，
第二 Plug《公主太子》，

都幾好聽，
我仲用左《天水．圍城》做電話鈴聲。
不過一如以往，
最喜歡既，
都係個 d 冇 Plug 既。

今次我比較喜歡《九龍皇后》，
一首較輕快既歌。
另外值得一聽既還有《一場兄弟》，
以及重新錄製既舊歌《仍是老地方》。

唔知，
下年仲會唔會有「李克勤演奏廳 III」？
充滿期待。

攪比賽

原以為今日上死亡筆記，
預定時間去睇。
點知原來聽日先上，
白行了一趟。

多出黎既時間，
結果又係攪定向。
因再下個星期就係喇，
好多野都好趕好趕。

d Courses 趕住出菲林印圖，
趕住定工作人員名單，
趕住定物資表，
趕住做賽員通知書。

講開賽員通知書，
好攪笑。
話說我原本 Base on 上年同一地點攪個場比賽既黎改，
咁 Poon Sir 就 Send 左份另一地點比賽既畀我，
話叫我改返 d 紅字既地方就得。
咁我一睇，
真係得啖笑。
基本上份野有一半既內容（唔止 Poon Sir 原先 Mark 左紅色），
新個份都係唔用得既。
不論係時間地點、
交通安排、
賽事中心位置、
出發程序等等，
全部都要改。

結果，
我都係用返自己整緊個份算數。

原本以為佢都係轉做 Html 放上網，
咁就自作聰明整埋 Html 畀佢。
點知份通知書個邊有 d 錯既資料，
而總會又冇 Edit Html 既 Tools，
唔通叫佢開 Notepad 改 咩？
結果彈回頭攪，
之後又 Send 返畀佢，
來來回回……

國貨？好野黎架

原來祖國既產品，
唔一定比外國既差。
就以 DVD 機黎講，
步步高唔差得過 LG，
其實我覺得好過 Tim。

點解咁講呢？
話說公司有個 Product，
要拿 DVD 機既 Output 做 Input。

起初用不知名 DVD 機，
之後睇返 Result，
好差好差。

早一陣子轉左部 LG 既，
Improve 左，
但係都唔係好得。
起初以為係自己 d code 既問題，
又或者係未 Tune 好 d Hardware。

今日換左部步步高試，
當堂好左好多。
唔係部 DVD 機攪到我繞左咁多個圈呀？

Anyway，
始終個 Project 仲未做起，
仲有好多地方要執。

---

早幾日去完香港仔，
之後係香港仔中心搵野食。
發現左佢 D 街道名好得意，
有好多都係中國地方名：
洛陽街、西安街、湖北街、
湖南街、成都街、南寧街。

有時原來多 D 留意身邊微小既事物，
都會發現好多有趣既地方。

有伴

日文好似餘下三數堂，
亦既係話，
我既日本語學習旅程暫告一段落。
暫停上學既原因，
除了因為可以省回少少錢；
係忙碌既日子 Free 返一日出黎；
第時旅行唔晒夾日子夾得咁辛苦外，
最主要原因係毛理同學唔得閒學。

回想返開始讀日文，
好似係大學畢業冇幾耐既事。
屈指一算，
大大話話都有成三幾年。
初初係三人行，
除了我同毛理之外，
仲有王生。

好快就得返我同毛理喇。
以我呢個咁三分鐘熱度既人，
竟然我以 Keep 住讀足三數年日文，
簡直係史上最大奇蹟。

不過其實點解可以讀到咁耐，
好大原因係有伴。

好似之前讀普通話咁，
有伴既，
我可以讀到兩期。
個伴一唔得閒，
我就斷了。

今次日文都係，
Moly 唔得閒繼續讀，
所以我都停一停。

做 Gym 個度又係，
我一個人去做，
十隻手指數得晒，
有伴又唔到。

同樣既事情，
亦都可以 Apply 落練跑…

再探香港仔

上回提要，
因為太夜既關係，
所以上次去香港仔未行晒就走左。
所以要係今日補去，
今日得閒去既原因，
係因為今天是重陽節，
但又唔駛去掃墓。

原本（沒錯，又係原本）打算六點半出門口既，
結果九點幾先起身，
食埋早餐成十點幾先出門口，
十二點先到香港仔。

話說等車個時，
架巴士迫滿晒人，
就係因為今日重陽，
而架巴士係經某某墳場。

上次行半張圖，
行左四個幾五個鐘。
今次唔知點解，
好快就攪掂，
兩個鐘已經落得山，
早知就早兩日行埋佢啦。

講返件趣事先，
話說個山有個段 U 形既路。
當我沿路向其中一個未端行時，
迎面有一個跑緊步既人，
之後又撞見一個行山既外國人。

三十分鐘之後，
佢地又再次先後咁係另一端碰到我，
唔知會唔會嚇親佢地呢？

神奇既移形換影，
說穿了其實得簡單，
就是有一條不明顯小徑，
連接 U 形既兩端。
正常人當然會行康莊大道，
係我呢 D 先回抄小路 Short Cut 而已。

阿鋒結婚

今日又有同學結婚喇，
今次係阿鋒。
因為我下午有 Event 既關係，
所以我好晚先去到。

次次飲宴張帖都係寫八點入席，
但次次都係遲。
今晚既八點，
我地仲影緊相。
我地成班中學舊同學影，
而呢個時候，
朱熹先姍姍來遲。
今晚做司儀既至煒開咪說：
「xxx 同學，請到台前影相……」

同枱十二個人，
有老西三人眾：馬神、天榮、江生；
有毛理、Sam、兩位黃/王生；
懸疑、Fox、Joseph；
同埋一幅慈父樣既金魚。

成晚我都冇入酒，
係臨散席被迫灌左兩大杯紅酒。
江生直情傻左咁，
係咁拿酒黎，
大大話話成四五支。
結果成枱落晒水，
起碼一人飲左一杯。

婚宴之後，
佢地再去飲，
我呢 d 梗係歸家啦，
因聽朝要上山。

題外話，
話說婚宴中有個 Game，
係賓客寫 d 肉麻金句，
然後阿鋒選最好三段。

我地枱有慈父操刀，
見佢手起筆落，
寫唔停手，
真係勁！

執相

原本打算今朝六點起身，
早早入香港仔落 Tape。
不過呢，
我起身都已經十點，
食埋早餐出門口，
都成十一、二點。
坐巴士直去香港仔郊野公園，
係門口附近落車，
一開波就上山。

行左兩粒幾三粒鐘，
都未行到一半，
所以決定都係行一半先，
星期一再黎過。

結果行左五粒鐘，
六點先落山。

---

夜晚同家人食飯，
影如都有出黎。
不過好慘，
佢今次理都有理過我，
哇哇哇 ><

---

聽晚阿鋒婚宴，
大衛同學都會出席。
之前佢問我拿相，
我睇過，
都成百幾二百 MB，
不如燒 CD-R 佢啦。

不過畀咩 Files 佢呢，
原汁原味既 Raw Data 唔少得。
但係如果佢冇睇 Raw 既 Software 咁點算呢？
咁我就 Convert 埋 JPEG 畀佢。
佢又可能會晒相 wor，
咁我又整埋沖晒 4R 相既 Ratio。

都整開 lor，
唔差在執埋啦。
結果一攪就攪到四點，
整左 2GB 野出黎，
由燒 CD-R 變成燒 DVD+R。

哼哼哼

今晚有套電視劇好攪笑，
係無記既「樓住有情人」。
話說有一幕，
場地係電視中，
人物有兩個：
小朋友與吳啟華。

小：哼
吳：哼哼
小：哼哼哼
吳：哼哼哼哼
小：哼哼哼哼哼
吳：哼哼哼哼哼哼
小：哼哼哼哼哼哼哼
吳：哼哼哼哼哼哼哼哼

我睇完第一個感覺係：
d 橋段咁熟既？

將段戲話畀某人知，
佢既想法同我一樣……

---

一個月前，
係澳門買左包薑糖返黎。
最近開左黎食。

食食下，
發覺有 d 怪。
唔係味道怪，
（我媽話太辣）
而係包裝怪。

話說有一粒，
包裝袋內只有「半」粒。
另一粒仲奇，
只有一個密封既包裝袋，
裡面空空如也，
粒糖呢？

臥虎

香港 d 戲，
通常係星期四上，
今晚我選擇左去睇戲 Relax 下。
今日新上既有幾套，
結果我選左港產片「臥虎」。
其他幾套戲，
「妄想」、「死亡魔法」我驚會嚇死，
「地海傳說」就更加冇乜興趣……
似乎係選無可選，
不過其實我又幾 Buy 呢種題材。

講返套戲，
我覺得有 d 雷聲大雨點小。
開頭係威係勢話有成千個臥底，
結果出場既都唔知有冇五個……

有 d 地方有冇交帶，
例如有一幕話找邊個邊個做証人，
結果呢？
之後就冇再提。

套劇都有 d 笑位既，
d 笑位有 d 都同其他港產片有關。

例如一開頭有人問：
「如果冇甚麼甚麼，邊個肯做臥底呀？」
跟住就有人答：
「梁朝偉 lor」（無間道劇情）

又有一幕，
個黑幫人話：
「信唔信我找日約你去釣魚，然後用石頭打死你丫喇…」（黑社會劇情）

但總括而言，
若果讓我再選，
我唔會睇呢套……

期待下星期上映既死亡筆記下半部。
上半部有些少失望，
希望下半部會有突破啦。

獨挑大樑

今日又要見客，
唔係星期一那個，
係另一個 Project 另一個客。
約左四點，
不過例遲地四點九先齊人。
佢地個邊陣容頂盛，
有成五個人。
我個邊呢，
有我一大個。

因為老闆忙緊第二 d 野，
結果就得返我一個撐大局。

原本，係原本，
要 Demo 畀佢地睇，
但梗係做唔起啦！

時間愈黎愈緊迫，
下次開會日期係兩個星期後。
佢地要睇既係接近 100% 既 Demo，
究竟，
我可以做到幾多呢？

---

聽收音機，
講點先係一對戀人。
佢地話，

如果有開心事第一時間同你分享，
但係激心事唔會，
咁唔應該係一對戀人；

如果有激心事第一時間同你分享，
但係開心事唔會，
咁亦都唔應該係一對戀人。

戀人係，
無論有開心定激心，
第一個想分享既，
都係對方。

---

今日細牛牛一，
祝佢生日快樂先。
雖則我遲左成個星期先 Post Blog。

滿足

做 R&D 係一個大起大落既行業，
講緊既，
唔係佢既前景又或者人工，
而係講緊佢地既心境。

呢一刻，
可能因為做唔到而好 Depress，
好心灰意冷，
好想死。

但當成功個一刻，
甚或者可能只係向前行左少少的第一步，
個種感覺可能已經係一百八十度既轉變。
個種滿足感，
非筆墨所能形容。

最緊做緊 d Editing 既野，
因為用緊粒 Chips 冇 Support 呢 d 野既 API，
結果要打茅波，
自己當個 File 係 Binary Data 咁讀入黎，
自己 Decode，
自己 Modify，
再 Encode 返，
Save 做新既 File。

攪左成個星期都唔 Work，
昨日終於略有小成，
不過都仲有 d 野要解決。
因為昨日下午要開會既關係，
結果自動 OT 執埋 D 手尾。
攪到十點幾，
終於見到曙光。

我份工人工唔高，
起碼買唔到樓，
養唔起人。

但係，
完成 Task 個一刻既滿足感，
卻非錢可以買到既。

開會

今朝原本約左十點見客，
但當我九點十返到公司，
同事話老闆打過黎，
話改左下午三點。
點解老闆唔直接打畀我，
而要打返公司留言？
真古怪……

但係要預備個 Demo Unit 攪左好耐，
最後發現係個火牛燒左，
要買第二個用。
兩點先去食 Lunch。

兩點幾執好晒野打算出發，
老闆又話突然有急單，
要 Pack 好 d 貨出先。
結果三點半都未出發，
去到已經四點幾。

去到 Setup 好之後，
佢拿左隻 DVD 碟黎試機。
一看之下，
發覺係克勤祖兒既拉闊。

後來要搬去第二間房，
漏左隻 DVD 冇拿，
個客拿第二隻 DVD 黎試。
一看之下，
發覺係克勤演唱會。

呢個客真識貨，
識得拿李克勤既碟黎做試機碟 XDDDDDDDDD

個會一開就開左兩個鐘。
原本我地個邊做 Slave，
佢地做晒 User Interface。
但佢地又冇 Real Time Clock；
呢樣又話 Display 唔到；
個樣又話 Display 唔到……
結果個 User Interface 都係我地做返，
搵笨……

練習賽

今朝有個練習賽，
又係冇我份跑，
今次亦都係帶隊教練。
我好似半年冇跑過定向，
半年冇跑過步了。

原本，
我應該七點半去幫手搬野。
結果，
我七點半起身……

去到青衣，
食完早餐，
社區中心都未開門讓我地入。

原來係 Book 場那個 Book 錯左，
應該 Book 青衣「長亨」村社區會堂，
但係就 Book 左青衣村社區會堂。

唯有臨時轉地方，
兵分幾路。
有 d 帶頭帶 d 賽員去新既賽事中心，
有 d 壓尾改返 d 往賽事中心既指示。

好彩都順利舉行。

係比賽期間，
收到個唔係幾理想既消息。
就係有一個應承左我兩個星期後幫手擺 Point 既人，
話我知佢個日唔得。
死火，
原本已經唔夠人，
現家就更加捉襟見肘……

---

下午上左阿力度，
繼續打我地既佐敦麻雀。
結果今次輸左二百下啞鈴，
係唔得閒去做 Gym 既情況下，
（但係唔明點解有人話我肌肉結實左）
都叫係一種訓練。

亦都打左三場 Wining，
一勝一負一和。
分別係負人、和神同埋大勝沙加。
大勝個場係因為我隊波屈，
Full Team 既紐卡素，
舒利亞、奧雲、戴亞、盧基、柏加、安利，
鑽石般既陣容，
單單舒利亞都屈幾球，
可惜現既紐卡素……

放·逐

今朝去左睇早場，
杜 Sir 既新片，
「放﹒逐」。

之前睇預告片，
我既第一反應係，
「乜槍火重拍咩？」

及後有人話我知，
呢套係續集（當然事實上唔係啦）
好期待睇呢套戲。

對比槍火，
呢套冇咁剛陽味，
起碼呢套有兩個女角。

不過，
我始終比較喜歡槍火。
尤記得槍火開首商場槍戰個段，
五個人互相補位，
好有默契。

今集就睇唔到呢 d 野。

其中有一段，
更加有辯駁既內容。

話說黃秋生正面被人連開五、六槍，
一 d 事都冇。
話佢穿左避彈衣所以冇事，
但係鏡頭所見，
佢件恤衫冇扣晒鈕，
亦都清楚見到皮膚。
咁件避彈衣去左邊？
定係開槍那個眼界好準，
兩米唔夠既距離可以冇一槍中？
定還是用左空心彈？

值得一提既係，
開頭字幕話「特別演出：任賢齊」
佢出場方式亦幾特別。

甩難

早幾個月，
有人搵我做兄弟團，
甚至係伴郎 Tim。
除了係早幾個月食一次飯之外，
其實我地五六年冇聯絡過。

所以點解佢會找我做兄弟呢？
真係百思不得其解。
Sam 知道之後，
第一句都係問我我：
「乜你地有聯絡開咩？」

唔止有冇聯絡既問題，
我其實連佢近況，
職業係乜都係一無所之既。

更奇既係，
自個次食飯之後，
呢三個幾四個月，
我都都係冇聯絡既。

亦即係話，
籌備成點，
有咩要幫手，
我都係唔知既。

而係今日，
我終於收到佢電話，
亦都帶黎「好」消息。
就係佢兄弟團會換人，
換返佢同屆 d 人，
亦即係話，
唔駛我做。

係萬幾樣野等住我做既時候，
收到一個「唔駛我做」既消息，
唔係「好」消息仲會係咩？

我比較有興趣想知既係，
新既班底會有 d 咩人？

一行轉背就……

今晚又有得見影如，
原因係又要去佢屋企整電腦。
唔知係咪詛咒呢，
每次我整電腦，
我係度個時總冇問題，
我一行轉背呢，
就即刻出問題。

大虎個單係例外，
因為佢黑氣更大，
我係佢屋企個時都係唔得既。

今日帶埋我屋企隻 Router 去，
亦即係話，
將之前我屋企 Work 左個幾兩個月既 Equipments，
整套（除了我部電腦）搬左去。

結果呢？
電腦順利地 Connect 到個 Router，
上到網。
用 Intranet 個 IP，
亦都 Access 到個 IP Cam。
之不過，
用 Internet Loop back返黎睇個 IP Cam，
就好慢好慢……

原因係咩？
想極都想唔到。
不過慢還慢，
始終都叫係 Work 丫。
咁就收工走人。

後記
五日後，
收到家姐個電話。
話經 Router 上唔到網，
而直插 Modem 係冇事既。

換句話說，
好快我又可以見到影如了。

Programmer's sense

2006-10-26：
忙足一個星期，
終於可以偷少少時間還返一兩篇日記。

話說呢排忙緊兩個 Projects，
其中一個有 Part 係 Video Recording。
先不談錄出黎既 Quality，
因為未錄已經唔得。

問題係，
平時 Preview，
同錄既 Preview 既 Quality 已經唔同。
呢個係唔合理既，
結果係咁 Serach Document。

初步估計，
係平時既時候個畫面縮細左再放返大，
所以先起晒格仔。

終於，
畀我找到一個參數，
Set 完之後，
攪掂。

仲有插曲，
當 Report 畀老細時，
佢話：「一早話左係咁啦……」
無言

---

話說有個電子相架，
聲稱可以 Play MJPG 既 File。
試過 Play Canon 相機錄出黎既，
冇問題。
但係 Play 我地相機錄出黎既，
就唔得……

直覺話畀我聽，
係個電子相架做錯野。
我用 Hex Editor 開晒兩個 MJPG 黎睇，
發現其中一個 Tag 兩個 Files 係有出入既。
一個係用大階「MOVI」，
一個係用細階「movi」。

我將佢地大細階調轉之後，
原本得既 Canon 變成唔得，
原本唔得既就反而 Play。

憑 Programmer 既直覺又解決一個問題。

夠禮貌嗎？

今晚上堂，
學意見既表達。

呢種語言真係好麻煩。
正面意見有一種文法，
負面意見又另一種文法。

你贊成佢意見咩？
一種文法。
唔贊成佢意見咩，
又一種文法。
就算你係少少同意，
少少唔同意，
都有另一種文法你用……

同一個意思，
都可以以三、五、七種文法，
而分別係，
禮貌程度唔同……

老師上星期去左台灣旅行，
帶左 d 手信畀我地。
（其實我係從 d 手信估佢係去左台灣）

係一 Pack 芝麻糖，
中場小休既時候分黎食。
因為有好多塊（每塊都好細塊），
所以餘下好多。

老師要我地帶返屋企，
冇人自願。
結果老師點左一個人，
同佢猜包剪搥。
如果學生猜輸了，
該學生就要帶手信走。
結果老師猜輸了，
咁佢就即刻點下一個，
務求有學生猜輸為止。

結果，
一男同學和一女同學成為「受害者」。

多條戰線

我呢個「唔上進」既人真係喜愛自找苦吃，
接近年尾，
又係時候虐待自己。

今年戰線數目係……五

首先玩樂方面，
三國志大戰打緊兩個聯賽，
一個係觀塘區既，
一個係旺角區既。

日文十二月三日要考三級能力試，
早幾堂老師話用四個月準備都只係剛剛夠，
現在只得個半月……
本身底子又唔好，
要花唔少時間去追……

十一月頭有個定向比賽要負責攪，
早一、兩年，
要做既野唔算太多；
今年，
因為原本負責那個人個人唔得閒，
結果我一個人要訂兩個 Post，
而進度……係零既……
更諷刺既係，
呢兩個 Post，
基本上係一個監察另一個，
現在係齊齊蛇王。

十二月尾一月初，
香港會再次攪亞太區大型定向賽。
十年前，
我只係負責參賽；
今年我除了係一個賽員之外，
仲會以一個教練既身份參加。
不過我連練跑既時間都欠缺……

仲有工作上既挑戰，
兩個好緊迫同難既 Projects。

安慰自己，
唯有講句：
能者多勞……

有 d 野

今日返完崇拜之後，
去左睇另一套戲： Waters。
睇預告同廣告，
以為係一套笑片，
故懷著輕鬆既心情入場。

不過入到場，
就發覺被騙了。
呢套好明顯係一套勵志片，
日本既勵志片，
成日有 d 唔合理既事。

呢套戲個結果，
比起昨日個套，
其至黑拳，
更加出人意表，
一個反高潮既結局。

睇完戲，
上左阿力屋企，
細牛係內地落返黎之後，
都 Join 埋我地。

大虎問左我一個問題：
「你女朋友返左黎呀？」

咁我答完佢之後，
自然問佢點解咁問啦。
佢話：
「細牛話你個 Blog 近排有 d 野 Wor」

有 d 野？
有 d 乜野？
我反覆睇過幾次，
（謎之聲：邊有睇過？）
都係睇唔出有 d 乜野。

所以，
麻煩有關人等答一答我究竟有 d 乜野？
謝……

休息日

今日變左休息日，
原本打算根據起身既時間，
決定究竟入香港仔睇 Site 好，
定係睇早場好。

結果，
我係訓到五點。
留意既係，
唔係早上五點，
係下午五點。
呢個亦都係點解我稱今日為休息日既原因。

之後姐夫打黎，
話佢地係旺角，
咁我出去 Join 埋佢地食 Dinna。
抱住影如成個鐘，
佢都冇喊呢！
呵呵呵……

夜晚去左食百人一朱，
好似好少野選咁，
不過都幾好味。

食完一個人去左睇戲。
Lucky Number Slevin，
呢套戲有好多好戲之人，
Bruce Willis、Morgan Freeman 等等。
開頭個大半都好好，
有 D 懸疑。

不過，
到最後個結局穿左之後，
不禁嘆一句：「唔係掛，咁無厘頭？」
雖然首尾呼應，
不過好有虎頭蛇尾既感覺。

睇呢套戲，
好大程度因為有 Bruce Willis，
當年佢做既 DIE HARD 系列，
簡真係正呀。

雙黑色星期五

今日係黑色星期五，
早兩日老闆問我，
今日可唔可以遲 d 走，
有客四點半上黎開會。
其實，
我可以 Say No 咩？

不過當開緊會既時候，
我發覺老闆之後有第二個 Meeting，
自己都趕住走。
咁預早叫我 OT 做乜？
結果我都係 OT 到平時咁上下時間收工。

今日某 H 又有絕妙對答。

話說某個 Project 要同第二間廠合作。
各自有自己既底板，
咁要飛線連接。
對方打電話黎，
話要我地 d 接口既 Pin Name，
以方便畫圖等。

H 竟然打黎問我。
（謎之聲：H 既野你問個 S 既？）

仲要問到九唔搭八，
佢問我 Software Control 那個 Port d Pin Names 係乜。
（謎之聲：人地都唔係只要那個 Port，仲有其他的）

又問我 Spec. 有冇 Define。
（謎之聲：你唔識自己開份 Spec 黎睇？）

真係被佢激死……

新 Project 愈黎愈難，
愈黎愈有挑戰性。
好！
我鍾意。
不過，
真係好難呢！

弄孫為樂

今晚有人生日請飲。
媽媽話我知係 Auntie 生日，
點知我去到，
恭喜完 Auntie 之後，
先知原來係 Uncle 生日……

外甥女影如都有出席，
而媽媽整晚都弄孫為樂。
要留意既係，
樂既係我媽。
影如係咪樂呢？
我唔知。
我只係覺得，
佢好似一隻公隻咁，
被人左舞右舞，
係舞動個舞，
亦係跳舞個舞。

今晚有兩圍，
我個圍有十二個人。
包括影如，
幫手照顧影如既工人，
半枱掛住唱 K 既 Aunties，
仲要有一、兩個多數時間係出面揀歌，
仲有又係揀歌既姐夫。

結果會正常食野既人，
一隻手都數得晒，
亦因為咁，
後果可容易預計到。

就係打包打包再打包喇……

基本上，
整晚我都係好眼訓，
又唔走得。
借著一個機會，
就係影如要走喇，
我咁我梗係幫手拿野落樓下啦，
落左去，
就梗係順手返埋屋企啦。

訓練犬隻導師

又有一位朋友開始佢自己既事業了，
想起呢位友人，
讀完文學，
結果走左去教狗。
剛剛係澳洲讀完 Courses，
拿左若干 Cert 返黎，
現在仲開始自己出黎攪生意 Tim。

話時話，
如果你地有狗想找人教，
可以聯絡我，
我睇下有冇辦法拿個折扣返黎。
不過冇折扣都已經好抵喇，
上門教狗，
仲教埋主人 Tim……

點解講起佢呢？
除了因為佢係死黨之外，
昨日我去左佢屋企。
去做乜？
咪又係整電腦 Lor。

佢話想 Notebook 同 Desktop 一齊上網 Wor，
又唔識 Set。
攪左成粒鐘，
Wired Network 冇問題。

但部 Notebook 就唔可以 Wireless 上網。
咁係 Notebook 問題定 Router 問題呢？
好彩我隨身裝備夠，
拿部 Pocket PC 試，
上到 Wireless Wor，
即係 Notebook 問題啦。
Notebook 我唔識整，
叫佢打去 Asus 個 Helpdesk 問，
攪掂。

佢仲教我整土耳其式咖啡，
但係太麻煩了，
我都係用法式沖壓算數。

おたく

教開那個老師今日請左假，
今日有個代課老師。
照往例，
因為「殘業」既關係，
今晚都係遲到。
入到課室，
椅都未坐暖，
老師就問我有咩「質問」。
老實講，
我個時仲遊緊雲，
都未 Tune 好個日文台，
想好耐都想唔到問乜好。
我唔知班同學問左 d 乜，
但相信大路野實問晒。
結果，
我想左好耐都冇出聲，
老師就話，
留返黎「宿題」啦。

今日教發表意見既文法，
講到「銜宅族（おたく）」。
問我有咩意見，
我話佢地 Cosplay 個時好可愛。

落堂之後，
老師好認真咁問我：
玄也你係咪銜宅族？

當我話唔係個時，
老師好似如釋重負咁講一聲：
太好了。

其實之前我話佢地可愛，
係在我那有限「言葉」的字庫中既結果……

不過講真，
銜宅族真係咁可怕咩？
以前銜宅族的確係貶義，
但目前已普遍為各界人士使用而趨於中性，
其中也有以自己身為御宅族為傲的人。

而且作為一個喜歡攝影的人，
銜宅族係一個幾好既主體。

三單婚事

昨晚去左一個網友既婚宴，
廿圍酒，
我地佔左兩圍，
幾勁呀。

不過因為有兩圍，
所以我地係最嘈個班。
每碟菜黎，
我地一喊「飲杯！」
聲威震天！

個婚宴有 d 好特別既野，
第一係唔會有小禮物收，
改為新朗數捐 $10 Per Head 畀奧比斯。
第二係糖水唔係蓮子白合紅豆沙，
而係楊枝甘露。

今晚團照，
睇下我地幾人才仔仔？


今晚則約左舊同學們食飯，
如果唔係因為阿峰結婚派帖，
我同佢地都未必有得見。

畢左業咁多年，
大家都有各自既發展。
最似老闆樣既既 Moly，
發福既 Joseph，
有車階級阿狗，
仲讀緊書既 Sam 等等。

---

今日八到 d 野，
又或者話乜都八唔到。
因為乜都八唔到，
所以得到一個結論。
解釋左點解某人既兄弟團會係咁樣形成，
包括我，
但唔包括昔日好熟個三個人。

香港歷史博物館

因為 Weekly Pass 既關係，
今朝又去博物館，
今次去歷史博物館。
個館好大，
總共七個展區，
由史前一路去到回歸，
當然主線係集中係香港同內地啦。

展區係多，
結果好似迷官咁，
路口仲有路牌指示你邊個方向係邊個展區，
仲有建議路線 Tim。

當中有唔少片睇，
不過佢分左粵語、國語同英語三個版本，
輪流播放，
如果 Miss 左，
可能要等半個鐘先再播返呢個語言。

去個外國甚或澳門既博物館，
佢地有 d 好似 Walkman 既野。
Speaker 可能播緊廣東話，
Headpone 就可以依據遊客既選舉而播佢既母語。
唔知點解，
香港既博物館唔會咁做呢？

行到十二點幾，
都只係行左地庫四個展區。
飲完茶返黎，
漁人放棄左佢個建築講座，
行埋愈下二樓個三個展區。

其中一個展區講教育，
好自然我地會找關於 PC 既野。
哈哈，
又被我地找到 Wor，
有手冊、校刊等等。

行到五點，
終於要離開了。
今次一別，
唔知幾時先會再見呢？

遊科學館

今朝一早去左科學館，
中學之後，
好似都冇去個科學館。
最後一次去，
冇記錯係中六去聯校科學展擺 Booth，
當時既 Topic 係電子野外定向，
時至今日，
電子控制卡已經廣泛用於定向比賽了。

今次去參觀，
買左張 Weekly Pass，
除了可以入科學館外，
仲可以入科學館個特別展覽、
香港歷史博物館、
太空館等。

今期個特別展覽，
係關於基因革命。
老實講，
我講得好差，
因為太多字，
塊塊展版都係二百幾字。
睇咁多字，
我不如買本書睇好過啦。

中午過左海睇男人之虎，
呢套舞台劇好多粗俗用語，
其中有段甚至係連爆粗口 Tim。
雖然係咁，
但係好好睇。
詹瑞文真係扮邊個似個，
笑位不絕。
不過比起萬世歌王，
我都係鍾意萬世歌王多 d。

夜晚去左睇黑拳，
好大部份都係 Sell 吳京打打打。
個結果好驚喜，
特然間扭一扭，
出個咁既結果，
真係估佢唔到。

大菜糕

中秋節正日，
難得地有得放早，
四點就走得了。
有人話要買裝 CD 既野，
咁就出左旺角。

唔知係咪大家都放早呢？
好塞車，
尤其是係德福對出個段……

買完之後落佐敦食野。
行花園街去太子坐車，
途經一間賣咖哩魚旦既鋪頭。
有一條排到要轉彎入橫巷既人龍，
真係咁好食？
因時間關係，
有試到。

落到佐敦，
咪住先，
佐敦都有商務，
要買既野佐敦都有，
點解咁豬要先出旺角？

更豬既係，
我地發覺專登落佐敦食野個間野，
因為中秋關係，
提早休息……

結果，
去左對面食壽司。
唔係話唔好食既，
不過元氣會好食 d 既。

坐迴轉壽司枱，
開頭冇乜野食，
以為因為客少關係。
到坐滿，
一樣係咁……

攪笑係其中一碟三文魚壽司，
上面有一塊半透明既野，
賣貴三蚊。
以為係 d 咩咁特別啦，
咬落口，
大菜糕？

無間道風雲

原來，
好多野都係我想多左，
想得遠左。
原來，
有人對我既印像係咁壞。
Well，
說話既藝術我仲未到家……
簡簡單單一個陳述，
接著一個問題，
最後一個答案，
我都可以令到人有誤會……

---

今晚去左睇無間道風雲，
故事地點發生在波士頓。
雖則我唔係住係波士頓，
但因為曾經去過波士頓旅行兩次，
看見當中的場景，
有部份似曾相識，
幾有親切感。

故事改騙自香港版既無間道，
兩個版本各有其值得欣賞的地方。
不過呢，
無間道風雲就好多粗口，
一句入面有成四五次 F Words，
F 頭 F 尾……

可能係先入為主既關係，
兩套畀我揀，
我會覺得港版好睇 d。

呢個版本美中不足既地方，
可能在於字幕。
中文字幕好刻意咁係配合香港人既用語，
不過成也此，敗也此。
好處係易有共鳴，
不過有時亦都譯到東不成，西不就。

尤其是有 d 關於美國文化既笑位，
譯完之後總是有點點怪。

註冊

打開那個遊戲，
Upgrade 左新 Version 之後差唔多三個月。
有某網站攪左個比賽，
我都有報名，
參加左今日舉行既最得一場初賽。

比賽前已經知有咩對手，
對部份有實力人仕用咩牌組心裡有數，
亦都想定對策既方法。
唔知好彩定唔好彩，
避開左大部份。
但係亦都打唔出一半既水準，
首兩場全敗出局……

---

經過左上星期六舊同學既婚禮之後，
充分感受到攪婚禮係好辛苦既事。
所以如果情況許可的話，
我係唔會攪婚禮。

就咁去註冊署簽個字就算。
所以如果有朝一日，
你地發現我結左婚，
但係又冇請你飲的話，
唔駛驚恐，
亦都唔駛疑慮我地既友情有幾深，
因為我好大可能係真係冇擺酒。

不過，
唔擺酒可能都係癡人說夢。
因為涉案既五位人士，
雖然有四個同意唔擺，
不過只要第五個擰頭，
我點不孝都唔會逆佢意既……

或者，
最後既策略，
會係只擺酒請親戚同「佢」既朋友。
所以，
有緣讀到呢篇 Bolg 既朋友，
多數都冇機會飲我個餐了。

不過我唔介意照收人情，
預早畀都冇問題。

「接」

昨晚冇訓，
仲要激死左。
話說昨晚食完飯，
先送姐同影如返屋企，
再之後送漁人返屋企。

返到我自己屋企個時，
差唔多兩點。
之後就收到電話，
媽媽話佢手指被熱水燙傷。

冇大礙，
但係佢阿 Head 話一定要送去急症室，
仲要屋企人黎接。

咁我即刻飛的士去啦。
去到佢都仲未到，
等左十幾分鐘，
先見十字車黎。

都唔知係好彩定唔好彩，
傷勢非常輕微，
亦即係非緊急 Case。

瑪嘉列醫院急症室既估計等候時間係 300 分鐘，
亦即係 5 個鐘。
結果都要等 3 個鐘先有得睇。

媽媽係穿住制服送黎醫院，
銀包、個人物品等仲係公司。
打電話返公司，
公司話會派車黎接佢返去拿。

不過，
係淨係接我媽媽，
我係冇份坐既。

結果我自己坐的士返屋企。
六點先返到去。

咪住先，
公司話一定要屋企人黎接，
現家我接左 d 乜返屋企？
激死……

忙碌的一天之香港一日遊

今日好忙，
首先一早入元朗。
六點起身，
八點入到去。

擺完 points，
d 學員陸續黎到，
開始 Training。
不過，
我三個學員都要上 Course，
所以請假。
咁，
我咁早入黎做乜？

十一點我就走喇，
因為仲要入香港仔。
係元朗坐巴士過海去銅鑼灣，
再轉小巴入香港仔。
食埋飯先入去，
兩點先上到山。

其實今次去香港仔，
係睇下邊 d 路行得，
邊 d 唔行得。
結果發現，
好多非路既地方都係唔通既，
結果，
又係水塘盃？

之後又要趕返出九龍，
食完 Tea，
返屋企沖過涼就出去食飯。

媽叫我唔好遲到，
因為佢九點半要返工。

結果係……
佢九點先到……

一如以往，
都係食淨好多野。
點解，
唔何以點少 d？

旅行

今日去左旅行，
今朝一早去左中港城食早餐，
之後一行三人坐船去澳門。

原本我媽媽都去，
不過佢一黎要早返香港（佢返通宵更），
二黎佢對博物館冇乜興趣。

係船上，
有人暈船唔舒服，
落左船之後，
休息左好耐先行得。

去到澳門第一件事，
就係去交收鏡頭。
買左支 ZD35 F3.5 微距鏡，
支鏡好抵用，
雖然成像唔係頂級（我邊識分），
但可以用黎影近野，
又可以當標準定焦鏡，
一物二用。

之後就坐車去官也街個頭，
睇原住民住屋博物館館。
唔知點解，
不論同行既係同大學同學、同事，
我次次黎都會去呢度。

原本打住食豬扒包，
但因為太早既關係（豬扒包要三點先有），
結果去左食牛尾湯通粉。

之後去左大三巴同澳門博物館，
再去葡萄酒博物館同賽車博物館。
之後去左金莎賭場「瀏覽」，
最後係漁人碼頭食晚飯。

九點半坐船返香港，
食左唔少野，
睇左唔少野，
好開心 ^_^