炒

個工人，
今日終於被家姐炒左。
原本打算一個月後，
等新那個黎左先炒。
點知，
今日已經頂唔順要炒。

基本上，
佢係完全唔及格。
唔係話佢唔做野，
想反佢好勤力，
但係佢係唔適當時間做唔適當既野，
又或者愈幫愈忙個下敝呢。

舉兩個例，
朝早六、七點仲好夢正甜個時，
佢拿開部勁嘈既吸塵機吸塵。
到你起身趕返工，
你總會發覺佢係度洗緊廁所；

發生個一件好危險既事。
話說佢係姐家幫手湊 BB，
除左佢之外，
仲有個「陪月」係度幫手。
咁 BB 肚餓喊，
陪月就去開奶，
叫工人睇住個 BB。
點知個工人唔理個 BB，
走左去打掃！
好彩冇發生意外……

不過點解家姐唔忍埋呢個月呢，
就係因為工人整爛左姐個女將沖涼床，
所以就要即炒喇。

不過呢，
炒左佢仲麻煩，
因為姐要打鑼咁找個新既黎，
而最快，
都要下個月先到。

考慮

講返個旅行 Planning。

在我而言，
我希望五月頭去，
因為五月一日係勞動節，
五月五日係佛誕，
兩日公眾假期，
亦意味著我可以請少兩日假，
即係一樣用咁多年假，
可以去多兩日，
其至四日。
（如果駁得到多一個 Weekend）

不過，
五月頭正正係個邊考試期，
去到都冇人招呼我地。
所以可能係五月尾先過去。
好彩五月尾都有個端午節。

再黎就係機票問題。
固然機票愈平愈好，
不過我又喜歡坐國泰。
一黎可以儲飛行里數，
二黎國泰 d Service 都唔錯，
d 膳食又適合亞洲人口味，
好懷念上次食既那個鮑魚雞粥早餐。

不過價錢就當然會貴少少，
不過唔係高峰期，
應該都唔會貴太多既。

再黎就係住宿問題，
可以住係人地屋企當然最好啦，
起碼可以節省唔少錢，
不過機會又未必會咁大。
呢個都係遲 d 定行程先想。

大衛同學問安娜同學可唔可以帶佢去玩，
不過人地都係黎左幾個月，
係咪應該找個黎左年幾兩年，
仲有親戚住係度既船長帶我地去玩好 d 呢？
不過船長又要返工 wor，
實習計得一個鐘得一個鐘，
個人而言，
我又唔係咁想佢請假 wor，
尤其是，
佢可能遲 d 會兩個幾三個月冇得實習。

抓緊機會

今晚上日文堂，
我覺得自己今晚好叻，
做聽解個時聽得到講緊 d 乜，
可能今日比較淺啦，
講病。
咳呀、流鼻水呀、嘔呀等等。

到講文化，
大致都明佢講乜。
到派功課時，
我仲可以拿拿聲做晒佢，
因為我知道，
如果唔做，
等到返屋企我就唔會做了……

---

大衛同學五月想去旅行，
問我去唔去。
其實呢個消息，
我之前已經由好間接既渠道知道，
我話需要一 d 時間考慮。

我有時會係一個有計劃既人，
所以我想拿多 d Informations。
不過唔知係我 Network 有問題，
d Messages send 唔到出去，
定係大衛好忙，
唔記得覆我。

Anyway，
其實我都猶疑去唔去好，
會唔會浪費錢，
浪費時間。
不過經過短時間考慮之後，
我都係決定去。

錢洗左可以再搵過，
但機會走左，
可能再 Catch 唔返。

交功課

連續兩日假期都要返工，
目的就係要趕個 Demo Unit 畀人睇。
今日就有間廠既人，
由日本飛過黎。

雖然唔係 Perfect Version，
總算叫做有野畀佢地睇。
佢地一行七、八個人，
其中兩個係來自香港分部既香港人，
其餘既都係日本人。
好快就 Split 開兩 Groups 討論，
老細同 Marketing 個班傾，
我就同 Engine 個班傾。

其實人地有晒 Documents 畀我地，
一般我都傾向自己睇 Documents，
消化左，
真係唔識先問。

記得我初入黎時，
有人質疑我究竟有冇做野，
入左黎個幾兩個星期都冇問過佢地野。
結果事實證明，
我用一個月做起左佢地兩個月都做唔到既野。

今次其實都係，
我好想係佢地面前畀 Results 佢地睇，
而唔係做左一半而請教佢地。
好彩客觀事實都唔係我能力弱，
而係我拿住份嚴重 Outdate 既 Doucment 黎做 Development，
d Data 錯既，
自然做唔到啦……

題外話，
見人地 d Engine 拿部 Notebook 出黎，
細細部好輕便。
我地公司個部，
本來係 Desktop Replacement Type 既，
但就拿黎公幹用，
重到死……

偷雞不著蝕把米了

因為趕 Project 既關係，
今日又返工。
星期日都要返工，
係一 d 人眼中好似好慘咁，
不過我又好 Enjory wor。
其實最主要係我唔忿氣做唔到。
中午同媽媽飲完茶，
就坐車返工。
返到去，
繼續埋頭苦幹，
不過都係冇乜起色。
做到七八點，
個頭開始有 d 痛，
就坐車返屋企了。
遺憾既係，
都係解決唔到個問題…… ><

返到屋企，
飯都冇食就訓覺了。

---

早幾個月，
訂左條 UltraII MSD 2G。
以為好抵，
千二蚊就得。
不過就等左成半年都未有貨。

終於收到 E-Mail 話有貨，
不過我已經唔需要呢張 Memory Card，
因為我已經轉返玩正版了。

想話二手放出去啦，
而同一時間，
腦場都返左貨，
個價仲平過我訂那個價 tim。
即係話，
我想放都放唔到出去，
今次真係偷雞不著蝕把米了……

擺滿月

今朝返左工，
因為今晚影如擺滿月酒既關係，
所以穿了恤衫西褲。
唔知係咪老細以為我一陣見工，
問左我幾次係咪打算係度長做。

之後落左酒樓坐，
到咁上下，
就去上普通話喇。
上完普通話返黎，
原本打算請四虎黎，
咁佢地可以打麻雀，
點知一個要返工，
八點先到，
另外兩個又好遲先黎。
媽媽係都要我坐落去打麻雀，
我都唔賭錢既 ><
佢地又打得大 wor。

結果打完四圈幾，
贏左六百七。

食完飯，
姐夫去拿車，
我同家姐係樓下等。
堂姐夫架車經過，
堂姐夫個名就聽過唔少次，
不過真人就第一次見。
今晚都只係得堂姐黎飲，
堂姐夫只係黎接佢。

可能做電視係忙 d 啦，
不過估唔到我真係有個明星親戚，
仲有真人對話 Tim。

理論上，
我仲係好細個。
不過，
已經有一班小朋友叫我阿叔同舅父，
叫到老晒 Tim ><

加薪

部 MP3 機竟然壞左，
一開機，
Load 左一陣就 Reset。
我開頭以為係電既問題，
點知換過電都係咁，
唯有拿去整。

我以為旺角只係 Showroom，
整機要去葵涌。
好彩上網望一望姐，
原來旺角都有得整。
落到旺角，
等左十五分鐘先到我。

以為要收機，
唔知幾時先可以畀返我。
點知佢可以即刻畀返我，
佢話我 d 歌既 Format 可能有問題，
幫我 Upgrade 左個 Firmware 就攪掂。
不過裡面原本 D 歌就冇晒，
其實都冇所謂，
聽完李克勤演唱會，
我都想將部 MP3 機入滿李克勤。

---

今日畀老闆召左入房，
原來我已經做左三個月，
過左試用期。
加左我人工，
其實應該話到返我見工時個要求。
不過人望高處，
我梗係想再加多 d 啦，
所以要更加努力。

能夠找到一份工，
自己做得開心，
（起碼未生厭）
又可以搵到兩餐，
算係咁啦。

高價有因

今日又要上大陸個 Vendor 到，
係去火車站之前，
首先要去郵局寄野。
佢話七至十日之後先到，
不過船長十七號要出海，
時間好趕，
唔知寄唔寄得切呢。

郵局個職員問我寄唔寄掛號。
如果寄掛號，
就要簽收。
咁我就想喇，
如果咁唔好彩船長出左海，
份禮物先到，
咁咪冇人簽收？
咁咪會打回頭？

結局我就選擇唔寄掛號。
畀船長知道之後，
就開始對我訓話喇……

佢話佢交咁貴管理費既原因，
就係有咁好既服務。
簽收有樓下個看更簽，
之後佢放係大樓個郵件室，
住客 24小時隨時可以去簽收云云。

好彩我係用 ICQ，
佢話上次佢係電話用左一個小時教導佢媽媽……

---

上去 Vendor 到，
有四個問題要解決。
結果離開既時候，
只係攪掂兩個。
部相機開親都 Hang 機，
我一路以為係 Driver 問題，
點知原來係上手寫既 Code 既問題。

佢用左一大堆 #ifdef 去做 Setting，
但係就冇一個 Defaut Value，
結果我們用一個新既 Hardware，
咁就冇 Set 到 Value，
導致 Division by Zero。
我咁都發現唔到，
真失敗。

燒鬚

係數字上，
有人又大我一年，
（其實係前日既事）
唔知佢有咩感想呢？
本來想送份生日禮物畀佢，
不過我又以為個樣野未出，
所以未買。

但係其實我早個幾月都見到有，
不過個時 D 人話應該未出架 Wor，
我以為係假既，
所以冇買到。
之但係今日想網頁睇下幾時出啦，
點知就發覺，
原來出左個幾月，
真係失策。

講緊既，
其實係 Olympus High Speed 1G XD Memory Card。
因為有人部新相機（Fuji F11）用緊張 128MB既，
我驚佢唔夠用，
尤其是佢月中要到墨西哥考察，
所以就想買張 1G 既過佢。

其實 1G 出左好耐，
不個係 Type M，
即係 Normal Speed。
咁既然係買，
當係買好 d 架啦。

同事知道左我想買，
打畀佢舊同事，
幫我拿左個員工價。
咁落到旺角，
先行一行旺電，
係二樓轉角見到一間有 Last 一張，
不過冇標價錢。
問下啦，
點知仲平過員工價，
即刻畀錢買。

同化

上兩個星期提到，
溫左既默書，
上完大陸落返黎唔記得晒。
今日派卷，
果然，
零蛋。
真係灰到爆……

之後上堂都好似雲遊太虛咁。

係喇，
今堂老師仲派左利是 tim，
其實係日經既利是，
即係 $50 優惠卷，
報讀課程可獲 $50 減免。
好過冇。

---

早幾日聽 芝See菇Bi，
講開男女朋友同化問題。
佢話個女朋友跟男朋友多，
就會學埋佢 D 習慣。

佢地舉左個例子好攪笑。
話說個男仔，
D 垃圾時常通屋掉，
咁個女仔開頭都有幫手執，
久而久之，
個女仔都通屋掉。
咁阿芝就話喇，
要改女方既習慣，
首先你要以身作則，
垃圾唔好通屋掉。
咁到個女仔學左你唔通屋掉，
會執好既時候。
你就可以恢復返通屋掉，
而個女仔就會幫你執。
到個女仔又通屋掉時，
你又要再以身作則喇……

笑死…

開工大吉

終於到年初四，
開工大吉。
比起舊公司，
呢間人數少左，
得邊六個；
結左婚既人亦少左，
只有三個。

咁斷估應該有四封利是，
三封 From 同事 and 老闆，
一封開工利是。

點知……
兩個老闆都唔派利是，
真係灰……

講返工作，
終於由 CMOS 過度去 CCD。
不過始終落後 Market 一段距離。
人地出到十倍變焦鏡，
我地自動對焦定焦鏡都未出。

老闆講到雄心壯志，
我最怕有頭威冇尾陣，
一陣講多過做就……

其實僱主僱員關係就好似一個 Positive Feedback Loop，
你好時我好。
辛苦捱件產品出黎，
老闆又識做既，
加人工又好，
放花紅又好，
甚至乎放你幾日假都好，
員工有貢獻之餘，
又得到佢既利益，
老闆又賺到錢，
雙贏局面。

最怕是旦一邊唔畀 Input，
咁就失衡了……

Master Game

今朝又去搵外快，
其實唔應該咁講，
應該話我去幫手才對，
個 d 係車馬費姐。
今日係先進定向賽，
先進者，
其實即係三十五歲先玩得既比賽。
地點係幾熟既寶馬山。
我今日工作冇上兩次咁重，
只係負責守 Points 同收 Points。
剛開始比賽時，
係起點幫下手咁。

咁係起點期間，
都見到 d 熟口熟面既。
其中都撞到我 d 學生，
即係以前教康文署定向班 d 學生，
佢地都奇怪我點解係度。

基本上大部份人一出發都行對方向，
只有一個一出發就向西北跑，
咁起點基本上已經係地圖最西北，
再跑就 Out Map。
咁我追上去啦，
結果發現，
佢連指南針邊隻色係北都攪錯……

個比賽幾順利，
十二點半我就開始收 Points，
收收下 Incharge 那個 Call 黎，
話佢找左人黎幫手收，
叫我等埋佢地。
個時，
十七個我負責既 Points 我收左十一個，
等左成十幾廿分鐘先見到佢地。
唔係等佢地既話，
我起碼收多三個 Points 啦。

Anyway，
好順利收埋 Points 就收工喇。

迫爆迪迪尼

迪士尼樂園之前測試時，
未試過多人得滯唔畀人入。
估唔到早幾日因為園內太多人，
要關大門唔再畀人入。

我以前成日想，
如果真係太多人會點？
唔再賣飛 lor。

其實，
點都會有個容量上限。
咁控制賣飛既數量，
咪可以控第入園的人數 lor。

不過攪笑既係，
今日就係有好多手持「有效」門票既人不得其門而入。
咁就奇怪喇，
如果知道就黎滿人，
應該唔再賣飛才是，
為何還會有咁多入唔到場既飛呢？

原因就係迪士尼有 d 叫做半年有效期既票，
咁就有班自遊行既遊人，
手持呢種票。

失策既地方係，
呢 d 長時間有效票，
應該係只賣畀本地人先發揮到最大既效用。
因為訪港旅客，
佢既留港時間基本上係 Fix 既，
係個日去迪士尼就係個日。
只有本地人先會無啦啦身痕去藥園，
冇一個 Fix 既行程。

另一方面，
不得其門而人既遊客又好攪笑，
佢地竟然攀過欄杆入去，
好似當 d 保安唔存在咁。
結果係點？
當然係被人「的」返出來啦。

春田花花

今晚約左 OMUser 班 Friend 出 Cafe 打 PSP，
冇錯，
又係打 MHP。
不過佢地都係買左唔太耐，
冇早兩日個班 Level 差咁遠。
約左七點係旺角，
見早，
就去睇返場戲。
今日睇既係「春田花花同學會」，
係電影中心睇。
一路排隊既時候，
發覺新春加左價（打工仔都返工，仲新春……）
仲要信用卡優惠都冇埋。
到我個時，
求其拿張信用卡買飛。
點知佢就好努力咁幫我 Check 我張信用卡有冇 Discount，
Check 唔到就問我有冇第二張信用卡，
估唔到服務態度又幾好 Wor。

入到場睇戲，
原本對卡通 Cross Over 真人好有期望，
不過睇完好失望。
我想佢個 Message 係做社會棟樑唔一定要係醫生律師，
斬叉燒、其至避風塘駁船既船長都可以各司其職，
但係你做既工作，
唔一定係你既心目中既理想工作，
但一樣有佢既功能。

但係佢就拍得好亂，
飛黎飛去，
一時講下呢 d，
一時講下個 d……
總之就好亂啦。


睇完戲，
去到 Cafe，
好好玩。
有一個仲玩到唔捨得走，
十二點佢已經叫走，
點知 Last 一 Round 完又一 Round，
Last 左三 Round，
點幾先有得走。

大掃除

冇假放個時就想放假，
有假放個時就悶。
今日成日係屋企，
一步都冇出過街。

今日都做左幾多野，
係年初四做年廿八應該做既野，
就係大掃除喇。

執左個幾兩個鐘房，
（我想完成左 5% 左右啦）
我左個 Scanner，
將張書桌還原，
執左 d 紙箱，
又將個電腦機箱放返好。
將個結他同腳架拿出黎，
移個防潮箱過去，
空返一個間隙出黎，
個床個抽屜就可以開返喇。

之後將 d 相過晒落新那個 Harddisk，
見舊 Harddisk 一個 Partition 都好似唔係好夠位裝晒 d 歌，
（我現在係分左三個 Partitions）
就將 d 歌搬埋去新 Harddisk。

1394 果然名不虛傳，
過資料真係好快。
過完之後，
執執個 Harddisk，
現在個 Harddisk 鬆動好多。

夜晚開始玩昨日隻 Wireless Adaptor，
攪左個幾鐘，
終於可以 XLink 上網同人玩。
結果……
又打到三四點。

買左隻 MHP 之後，
我冇一晚係早過四點訓，
試過六點先訓先，
好沉迷呀，
點算好呢？

做獵人

今日初四，
好多人都要開工，
但係我就唔駛返工，
仲放緊假。
不過亦因為好多人返工，
所以我係屋企好悶。
昨晚打 MHP(Monster Hunter Portable)打到三四點，
今朝訓繼續打。
之後落深水步 Join 返 d friends。

昨日佢地「帶」我去買 Game，
今日就「帶」我去買 Wireless Adatpor。
有呢隻 Wireless Adaptor，
就可以上網同其他人連線玩 PSP，
而用個 Software 就叫做 Xlink。

呢隻野做可以做埋 AP(Accress Point)，
咁我 d Pocket PC 呀，
PSP 呀就可透過佢上網睇網頁喇。

不過呢隻野好好賣，
好多地方都斷貨。
好好彩找到一個地方有，
原價 285，
我地一次過掃四條（最後有一個縮沙，實買四條），
就收我地 275。
不過其實都係貴，
之前賣 235 咋。

之後落左旺角 Cafe 打機，
（咁點解唔係旺電買既？）
其中一個 Friend 個老婆都有黎。
Well，
成晚黑口黑面，
我仲坐佢斜對面，
我覺得有股黑氣 Lor。

講返打機，
佢地個個都打得好勁，
我就初玩，
所以佢地就連線玩，
我就單機玩。

Monster Hunter Portable

初三赤口，
約左班 Friend 去紅磡機鋪打機。
點解去紅磡呢？
因為有呢隻 GAME 既地方唔多。
而紅磡有之餘，
又唔駛等太耐，
有 D 要等成半日甚至更多，
真係痴線。

Anyway，
我九點左右去到，
班 Friends 中既第一個到，
不過機鋪都已經好多人。

打到七點左右，
坐車落旺角，
有 Friend 想買新出個部 PPC 電話 O2 Atom。
d 幾合一既 Device 我唔係咁鍾意，
好處係一部機有幾個 Functions，
唔駛帶咁多野出街。
但唔好處都係呢樣，
如果其中一 Part 壞左，
咁就幾個 Functions 都用唔到，
又或者如果其中一個 Feature Outdate，
咁又要換過部新機……

之後行 Game Shop，
好好眼咁畀佢地見到隻二手 Monster Hunter Portable。
呢隻 Game 十二月出，
不過我因為要考試，
所以冇買住；
到我考完試，
佢又冇晒貨；
到佢有貨，
佢又炒鬼左。

近排佢又價格回落，
不過我知道，
呢隻 Game 我買左會好沉迷，
所以遲遲唔買住。
結果都難逃一劫，
畀四名大漢夾左去買 Game。
好，
返屋企煲 Game。

虎聚

今日去左大姊家拜年，
之後坐車去沙田。
先飛 Van 仔去沙田火車站，
再轉巴士落威爾斯，
之後行去多石村（有冇記錯村名？）。
約左四虎同康哥 BBQ，
去到見到好多人，
因為艾文女友同艾文個妹 D Friends 都黎左。
各適其適，
有 d 打牌，
有 d 打機。
我同艾文單挑打 NDS 既孖寶賽車，
唔駛多講，
當然係我贏成條街啦。

其實放假前，
而有人想買我隻孖寶賽車，
仲要唔駛蝕（我 $180 入，$180 放），
為左要贏艾文，
我先唔放住。
應援團又大勝，
孖寶賽車又大勝。
呵呵呵……


之後細牛黎到，
仲帶左副大富翁黎。
之後就轉玩大富翁喇，
細牛做銀行，
阿力冇玩，
總其六個參賽者。
好難玩，
跟本玩唔到。
梁氏三人連成一線，
圍內係咁換。
我不單做唔到對我有利既交易，
其至想蝕讓，
目的只係唔畀艾文獨大都唔成功。
好彩係未輸既情況之下，
夠鐘 BBQ 而中止遊戲。

燒完野食，
繼續打牌。
我同康哥夾，
一人一鋪。
係我唔駛打時，
就幫艾文隻孖寶賽車過關。

李克勤得心應手演唱會

大年初一，
恭喜發財。
恭祝各位心想事作，
萬事勝意，
財源廣進。
（雖則打呢篇日記個時連新十五都過埋）


今日我期待了很久，
因為今日有李克勤演唱會睇。
大同 Alex 好抵，
付出 $200 就有 $400 既飛，
我就相反喇，
付出 $600 先有 $400 既飛…

原本約左 Alex 係尖東等，
點知我行緊出去個時，
佢剛好係佐敦，
咁就叫佢等埋我先。

會合佢，
佢話佢食左下午茶，
唔肚餓……

行到恆豐，
Alex 問我打算今日影幾多相。
我就醒起，
原來我冇帶 Memory Card。
結果又要行返屋企一趟。

坐車上火車站，
先係 Starbuck 飲左杯棉花糖咖啡，
食左件餅。
杯咖啡一般啦，
都係鍾意飲 Mocha 多 d。

今晚場演唱會都幾多嘉賓，
有汪明荃、郭晉安、梁榮忠、花生（佢隻狗）、歡歡、球球和陳慧琳。
最攪笑陳慧琳，
唱完一首歌，
行左會場半個圈，
未收晒利是，
叫克勤唱住先，
唔駛理佢，
佢會收埋 d 利是……

佢亦都請黎4位華人音樂大師黃蒙拉、霍世潔、譚寶碩、龍向榮。
（亦既係佢「演奏廳」隻碟演奏的四位）
龍向榮博士真係好勁，
一張麻雀檯，
一幅麻雀，
都可以伴奏一首砍。

不過其實睇演唱會，
我寧可冇嘉賓，
聽主角唱多幾首歌，
唱 d 蒼海遺珠仲好。
奈何呢個係香港演唱會的特色，
冇嘉賓反而 d 觀眾唔鍾意……

睇戲

今日年廿九，
明天就是初一了。
原本團年飯是昨晚食既，
不過因為大姊未出院既關係，
改左今日。

今朝一早去醫院接大姊同影如出院，
順道落大埔大姊家。
今日亦都證明左我係記路既天才，
媽媽去過咁多次都唔認得路，
我只係去過一次之嘛，
已經可以帶路，
呵呵呵。

夜晚食完飯，
去埋洗手間先走。
媽媽唔識路，
咁我帶佢去啦。
咁我入男廁，
媽媽竟然跟住我入……

---

食完晚飯，
坐車落旺角睇戲。
一支公睇「最愛女人購物狂」，
呢 d 戲，
講真真係好難找到人陪我睇。

呢套戲都叫 OK，
當然你如果要求佢有反思性既 Message 既話，
佢未必做到。

不過一元睇場戲，
（信用卡優惠），
仲送爆谷汽水，
抵到攔啦。
算係補償到我換唔到頒獎禮啦。

---

下午佢地幫影如沖涼，
係咁話我係時候學定……

終於購物

今日只係返半晝，
中午同同事去食私房菜。
三道小菜，
白飯同湯任裝，
仲有一杯餐飲。
三十幾蚊一個人，
勁抵。

間野係工廠區，
因今日太多人，
結果我地要坐係走廊，
此為美中不足之處。

---

原本係月頭出糧，
但因為六號先返工既關係，
今日出埋糧。
既然有錢，
而又需要添置一些電腦器材，
所以落左黃金一行。

格完價，
結果買左一個 19" LCD (Samsung 930BF)、
一個 250GB Harddisk (Western Digital)、
一張 1394 Card (Magic Pro)、
一個 Extern Harddisk Case Combo (Rock)。
接近四千。
個 19" LCD 周圍都冇貨，
好彩畀我找到一檔有。
其實係已經留左畀個客，
不過個 Sales 話下午有貨返，
所以可以畀左呢部我先。
返到屋企，
試左雙 Mon，
好爽。
不過個舊 Mon 係壞既，
成日花畫面，
所以都要丟棄。

---

夜晚買左 d 染髮用品，
染左一頭啡髮。

初九啟市

唔知係咪飲茶飲上癮，
老細冇啦啦話今日去飲茶，
我想當係團年飯掛。
去金龍船訂位，
話要兩點後先有位。
反正有個同事上午請假，
所以我地就兩點去飲茶喇。

一路飲飲食食，
一路談天說地。

就黎放農曆新年，
我地最關心既就係初幾返工。
係飲飽食醉之際，
有同事問老細，
老細就話初四啦。
都正常既，
單放紅日。

不過其中一個老細幾信風水，
我地叫佢不如打畀師父問下。
開頭佢唔願打，
仲問返我地如果師父話初二，
我地係咪會返云云。
不過結果佢都有打。

風水既野，
我一路都覺得係統計學，
但係一路都唔係好信。
今日發覺信風水都有佢既好處，
就係今年可以初九先開工，
呵呵呵……
有個信風水既老細有時都唔錯。

夜晚收工，
原本想落黃金一轉，
不過一黎夜，
二黎又有 d 眼訓，
明日又只係訓半日。
所以決定都係聽日先去掃貨。

再北上

昨日北上完，
今日都要北上。
不過今次係去過 Vendor 處。
朝早要返公司先，
十一點左右先出發。
（都唔知返去做乜…）

係 APM 地下坐黃崗巴。
去到計程車站，
基本上黃崗同羅糊一樣，
大家都唔係點排隊既。
乘客故然唔排隊，
司機都唔係點排隊。
呢 D 意識真係要教育一下，
不過我想都要好耐時間。

係 Vendor 既半日時間，
Solve 左唔少問題，
不過都仍然有 d 地方未攪得掂。
之後坐地鐵返羅糊。
好攪笑，
地鐵站既一邊，
好多人買飛，
排晒長龍；
而另一邊，
水盡鵝飛……

夜晚出左去跑步，
原來我對上一次跑，
已經係十月既事……
今次時間唔係好多，
訓練都好輕微。
首先係跑一次大圈，
等個新人記下條路。
之後玩圖，
我 Shadow 個新人。
Demo 既時候要做得好誇張。
「我 Plan 既呢條路線，
向西行，第二個路口轉右向北，
三支燈柱之後再轉右向東……」

「咦？第二個路口有得向右轉 Wor，
做 3S，Stop，Set Map，Select 先……」

「咦？有第一支燈柱、第二支、第三支。
真係有三支燈炷 Wor，冇行錯路……」

之後 Join 左 PSP Group 既團年飯。
佢地個個 Link Play MHP，
我就拿部 NDS 出黎打孖寶賽車。
之後玩左陣大老二，
十二點左右就散了。

北上公幹

今日要上橫崗，
約左個同事十點係大學站等，
結果大家都係十點半到，
哈哈哈。

上到羅湖，
過完香港個邊，
係大陸個邊就要填 Form 做自助過關。
要 Record 個 Face，
都左右手既手指模。
我估排左半個鐘左右啦。
攪笑係左面個行有位女士，
攪極都 Record 唔到手指模。
個關員叫佢抹乾 d 隻手，
佢又唔肯，
話已經好乾。
其實再抹都唔係好浪費時間姐。
結果關員叫佢下次再攪過，
個女士就大喊：
「又要再排個隊呀？」

早知今日，
何必當初呢？

過左關，
坐計程車去。
去到剛剛係 Lunch Time，
食完飯就開工。

今次主要係 Debug。
負責 QA 個班真係勁，
佢地試到晒出黎既 Bug，
我地跟足佢按都試唔到。

做到六點左右收工，
坐兩程計程車到黃崗，
之後坐旅遊巴直出佐敦。
剛剛趕得切上堂。
不過原本溫既書唔記得晒，
咁默書………

串錯名

唔經唔覺，
過左試用期了。
呢幾日老細畀左份 MPF 表我填，
而佢終於發現，
佢幫我開那個 E-mail Account 係串錯字既。

我現在個 Account 係 stzho@，
佢當時話拿我 Initial 同姓黎做 Account 名。
Ho 係我個姓，
S 係我洋名第一個字母，
咁 TZ 即係應該代表我中文名個兩個字，
不過……

雖然老闆發覺佢串錯字，
不過冇理由現在先改返正架，
唯有用落去啦。
其實我又唔係好介意，
都係個 Address 姐，
聯絡到我就得啦。

---

快證即係快證，
可能就過年，
所以更加快，
今日已經有得拿。
換句話說，
即係我要開始北上做野了。

---

今日中午同同事去左 APM 食日式免題。
抵就幾抵喇，
不過冇咩野食。

最攪笑係，
我地一齊出去拿野食，
個侍應以為我地走左，
清晒我地張桌（因為入場先畀錢）

06' 無國界野外定向比賽

又到一年一度既無國界野外定向比賽，
今年是第五屆，
亦是我第四年參加。
第一年冇參加，
係因為上左廣州玩穗港盃。
之後個三年都有玩，
參加男子高級四人組，
四年（連埋今年）都係個三個拍檔，
都係那個隊名：青蛙堆堆。

叫青蛙堆堆，
係因為我地套定向衫係鮮綠色，
成隻青蛙係山週圍跳。
（完全唔合我性格……）

之前個三年，
都贏消防拿冠軍。
想贏第四年就難 d 喇，
因為有 d 港隊人仕，
睇唔過眼我地連贏三年，
組隊黎挑戰。
講牌面，
我地輸九條街，
叫做盡下人事啦。

結果，
連第二都補唔住，
輸埋畀消防得第三。
事後檢討，
拿唔到第一好正常，
隊港隊用既時間少過我地，
但係打晒滿分，
我地差成百分。
不過僅輸畀消防 10 分就有故講下，
故然我體力唔夠係主因，
不過如果唔係頭段要擘草穿林，
損失時間之餘，
我體力會唔會下降得咁快？

事緣有個 Point，
要先入白林，
經崖壁上山咀，
當我找到崖壁想上時，
佢地話未到要繼續入。
結果……

Well，
我雖然體力有乜，
但我對睇圖認路都仲叫有心得既。

不過最頂癮既係，
帶頭快跑那個，
成日話佢係前面跑，
冇睇圖，
唔知幾時停。
（謎之聲：咁你攪乜係前面快放？）

三年前組隊，
講明贏輸都只係組四年。
成績其實都唔錯，
三年冠軍一年季軍。
下年（如果仲有的話），
我應該會用第二個身份參加。
可能組第二隊，
又或者做工作人員。

---

炒炒按於二零零六年二月五日清晨：
日記記落後左兩個星期，
估唔到會畀人催。
不過，
我仲領先緊半年有多 wor……

新裝備

今日都幾忙碌，
係公司通完頂，
去左飲早茶，
之後去左睇中醫。
拿拿臨落銅鑼灣上 OA ，
交聯賽報名表、
拿 First Aid Cert、
收教練津貼。
之後一路行落灣仔，
經過銀行入埋張表。

返到屋企坐一陣，
又要出尖沙咀上普通話。
今日個老師勁呃鐘 lor，
講課文都唔知有冇半個鐘。
係咁係白板寫節日名，
花名咁，
都唔知佢想點。

上完堂，
過左隔離天祥，
買左個度左好耐既相機袋。
Tamrac 既 Pro 5



大約可以放到一機三鏡一閃。
其實我上次去旅行那個，
都係咁上下容量（細少少啦）。
不過呢個袋最大既好處係：
可以唔拆支長鐘直接放入袋，
咁就好方便我唔駛下下要拆鐘先入到袋。

以前個袋唔好處就係呢度，
用親機都要先上鏡，
影完又要拆返先放到入袋。
而且呢個袋仲好平好抵用 tim。

不過唔好處就係，
冇得換帶，
同埋變唔到做背包。

又通頂

今晚冇返屋企，
係公司做通頂。
昨日早收工去打波，
其實都預左今晚會做得夜 d，
不過係冇想過會咁夜姐。

做到八、九點，
老闆話食晚餐，
四個人，
叫左一個二人餐？！
咁又點會夠飽丫……


一路做呀做，
試呀試。
都三點幾，
開始有 d 同事頂唔順，
轉數慢左。
我呢 d 捱慣既梗係冇問題啦。

之後仲打埋長途電話過加拿大，
搵多個腦一齊想。
不過都係唔明衰乜。

理論上，
Read 返黎既 Data 應該係 Bell Shape，
但唔知點解，
有時會係 U Shape，
咁自然會計錯數啦。

好彩今次部機夠快，
可以 Take 兩次 Samples 做 Average。
結果可以係七點前做起左個見得下人既 Demo Unit。

當然啦，
見得下人姐，
仲有大把空間要 Improve 呀。

之後就大隊去飲早茶，
飲完早茶就散了……

搶錢……

昨日買完鞋，
今日去試用。
原本打算唔打架，
我衫都冇帶返黎。
不過佢地話唔夠人打，
我唔黎得返五個人，
所以我最後都去。

就算我有帶衫，
直接係公司去，
都會遲，
更何況要返一返屋企先呢？

返到屋企，
工人問都冇問過我食唔食晚餐，
就拿拿聲叮晒 d 食物。
見到我拿晒袋準備再出門口先識問，
唉……

落到街決定錯誤，
我以為小巴最快，
點知佢先去紅磡，
經九龍城去黃大仙，
最後先到樂富。
結果我九點半先到……

---

回鄉証過左期，
結果昨日早上一早排隊拿籌。
比想像中快，
我九點去到，
十點已經攪掂晒返公司。

不過張証就好搶錢。
申請費 $360，
快証加收 $200，
影印四張，
每張 $2。
總數就畀左 $568……

Nike Air Jordan 10 Retro

一路都想買對籃球鞋打波，
不過一路都選唔到。
唔係個款唔鍾意，
就係價錢貴，
亦都怕買錯唔適合既鞋。
上網問下提議，
有人話不如今晚出黎睇，
結果我就出左去買鞋。

四個人（包括我），
不過其實只有我一個想買。
係旺角波鞋街行下行。
其實間間來來去去都係得個幾款，
自己屬意深色，
不過深色既都唔係咁合心水。

結果睇中左兩對，
兩對都係白紅色。
一對係 Nike Air Jordan 10 Retro




另一對都係 Nike
但我係網上面係找唔到佢 d 圖。
總之鞋舌上有隻狗頭咁。

不過最攪笑係，
d 鋪頭有第一對，
就冇第二對；
有第二對，
就冇第一對。
想試晒兩對都唔得……

好不容易，
終於找到一間有晒兩對，
試完之後，
買左 Air Jordan。

之後佢食野，
Vanvan 講左兩間店名，
係旺角讀書既我，
竟然聽都未聽過……

食野食左兩個幾鐘，
傾左好多相機野。
（唔記得講，佢地係 Omuser.com 既網友）

在「唔記得要買甚麼」之前，應該點做？

今晚上日文，
因為之前太忙既關係，
所以都冇時間溫書。
放左工去到，
佢地都默完書準備教書。
有結果我就唔駛默，
都好，
因為我都冇溫到。

臨到新年，
今日派左一張卡，
叫大家寫新年願望上去。
嗯，
寫咩好呢？

一於就咁啦：
10分以内に2.4 キロメートルの競走を完成するように

跟住教文法，
勁攪笑。
佢問唔記得要買 d 乜野之前要做 d 乜。

我話係唔記得之前要買左佢。
跟住佢好愕然，
佢話如果你有事做，
唔得閒買呢？

咁我就話寫低佢。
點知都係錯，
佢話要寫低 memo……

今日教左幾個副詞，
意思同以前學過既差不多，
但係又有少少分別。
小西老師花左好多時間解釋，
但係我都唔係十分明。
以前初班，
用個本書既出版社有出另一本講書入面既文法，
仲要係中文既 tim。

但係現在呢本書，
莫講話中文，
連用日文寫既都冇，
唔識都唔知點算。
灰……

二手

今日約左三個人係旺角，
交收一些二手物品。
我以為自己好醒，
約晒三個係同一地點。
但原來人地都係咁，
一個我見佢成張賣野 List，
一個係交收完之後，
我打電話搵下個時，
佢又打電話找下個。

不過好攪笑，
有一個約左佢七點半，
之前個晚佢 send e-mail 黎話「七點」未必趕得到，
話會遲少少，
但我係約七點半……

今晚我六點半就收到佢電話，
佢話到左！
我真係約七點半……

---

今日老細又催我申請回鄉證，
回鄉證張證件相要白底或粉紅底，
但我 d 相係藍底……

護照我又就黎到期，
咁 d 相影完可以做埋特區護照。
但特區護照要求既係藍底或粉紅底，
即係要影粉紅底啦。
（其實點解唔可以統一 d？）

中午食完飯，
落街望下，
竟然找唔到地方影證件相。

最過份既係，
我問住我公司附近既艾力斯，
佢竟然答唔知！
Er………

又教班

今日要教班，
Lv2 既班。
以往總會既 Lv2 班，
一般都係會白石橋攪。
但因為遲 d 會有場聯賽係白石橋攪，
所以白石橋封左場，
唔攪得定向活動，
所以改左係附近既牛寮。

八點三係九龍塘開出旅遊巴，
（一般 d 班都係要自己坐車去，
今次真係好。）

去到牛寮，
首先帶 Map Walk，
之後玩 Compass Steering。
稍稍休息之後，
佢地食野，
我心痕走去試跑 Star O。
班學員問我：
「你返唔返得切黎帶我地架？」

三分鐘之後，
我已經跑完返黎喇……

四條 Courses，
我帶佢地玩其中一條，
之後就放佢地玩，
我跟係其中幾個後面。

玩完 Star O 之後。
係正式既模擬賽。
我最尾幾個 Points，
一路數住有幾多學員經過。
數到廿一時，
見到包尾那個教練，
佢收左其中一個 Point，
仲話呢個已經係最後一個。
但我收到既訊息明明係有廿四個（後來知係廿五個 tim），
我數錯都冇理由差咁多，
跑返轉頭，
果然後面仲有三個學員……

教完班，
坐返旅遊巴落山，
係荃灣逛左一會兒。
就坐車返觀塘，
返公司繼續加班……

普通話中班

今日星期六，
訓到十一點先起身。
見到 HKZooo online，
約佢交收做 ME-1。
ME-1 係咩呢，
Olympus ME-1 Eyecup Magnifier 係一個 accessory for 佢既 DSLR。
佢將 Viewfinder 見到既野，
放大 1.2 倍。
換句話說，
會易左睇佢係未 in Focus。

約左佢係我公司樓下間印尼食店個處，
順便吹吹水。
咦？
應該唔駛返工架，
點解約係公司個頭呢？
咪就係要加班 lor。

攪到五點都未攪掂，
但係我又要趕住走 wor。
趕住去邊呢？
要出返尖沙咀上普通話中班。
今日係第二堂，
第一堂因係「Last Day」既關係，
我走左堂。
五點四上堂，
我五點二先係公司走，
行去麗港城坐 219x 落去，
只用十分鐘落到紅磡蕪湖街，
但再用多十分鐘先轉到去尖沙咀，
當然遲到啦！

中班同初班唔同，
教既風格都唔同。
以後冇得聽歌估歌詞了，
老師又唔會叫每個人獨立讀一次，
有冇讀錯真係唔知。

上完堂，
又佢探阿 B，
阿 B改左名叫趙影如。
剛好今日有相機係手，
隨手影左幾張相。

七年之癢

7 這個數字好其怪，
有人視之為一個關口。
有個詞語「七年之癢」，
意思是說許多事情發展到第七年，
就會不以人的意志出現一些問題。
這個詞語尤其多用於感情上。

七年，
時間不短，
為何還會出現問題呢？
有問題的話，
不是頭幾年應該已經出現，
應該已經解決，
又或者應該已經放棄嗎？

可能是因為久了，
蜜月期過了，
彼此太熟悉了。
以前需要掩飾的缺點，
又或者理念上的不同，
已經暴露出來。
蜜月期時，
或者會容忍，
但蜜月期過後，
長期積累的矛盾慢慢凸顯︳
可能就會一發不可收拾。

雖然我距離這關口還有一大段路，
但近日既一些消息勾起了我對這個問題既思考。
首先是老友，
再來是一對藝人分手，
再加上今日係一個特別的日子。
希望我會過得到這關。

---

放工去探姐同阿 B，
阿 B 好可愛喔。
今日冇拿相機，
明天拿相機影佢先。

做運動

大陸間廠個老闆 Delay 左個行程，
結果可以多幾日做野。
昨日講那個問題，
落係我手上，
要 Solve 就梗係輕而易舉啦。
不過問題係寫 Controller 那個唔係跟 Spec，
結果都係未攪掂。
要等寫 Controller 那個 Send 個新 Code 過黎。

---

夜晚打波，
之前去麥記食野。
唔明 d 人點解唔想定食乜，
排到去 Counter 先拿張 Menu 慢慢想。
幾分鐘過後，
收銀那個就叫佢地（其實係一班小妹妹）企埋一邊慢慢想，
問後面那個（即係我）食 d 乜。

我今次再食板燒雞腿包餐，
收銀個人要托高個盤（高過班小妹妹）先畀到我，
我拿住一轉身，
成包薯條就飛左出黎，
好慘哦！
不過好彩佢都畀過第二包我。

食完去打波，
本來艾力斯都話黎，
不過佢公司有 Project 趕，
黎唔到。
加上有人冇帶衫，
有人甩底。
結果得六個人打。
可能見我打得差，
後來仲有其他人跟隊。

原來我兩個幾月冇正式做過運動。
今日走兩步已經氣喘……
要練返氣先得。

補鑊

以為會冇咁忙，
今晚可以出去跑步啦，
點知都係唔得。
老闆話大陸間廠個老闆今晚會飛去北京，
所以要預備好個 Sample 畀佢。
不過做極都做唔完。
最攪笑係冇人跟 Spec 做野，
做 Cal. 既，
唔係跟 Spec Cal.；
寫 Controller 既，
又係唔係跟 Spec 做；
其至個 Vendor，
都唔係跟 Spec 做。

我係跟 Spec 做，
不過份 Spec 係 Outdate 既。
即係所有野都係 Out Sync. 既，
又點會做得掂？

個客投訴影 d 影唔清楚，
即係 Focus 錯啦，
老闆問我點解現在先發覺。
Well，
我 Handle 呢個 Project 既第一天，
係佢話我知影相既 Focus 係攪掂晒冇問題，
我要做既只係 Video Mode 既 Focusing。
咁我又未去到 Final Checking 既階段，
又點會無啦啦走去 Check 下應該冇問題既部份？

經過我掃一次 d Code 之後，
我發覺 d Data 都係 Out Sync 既。

個 Program 其實係咁既，
個 Controller 移動完支 Lens 之後，
個 Firmware 就會睇下呢刻個 Image 夠唔夠清，
再 Report 畀個 Controller 知。

問題就係，
舊 Code 唔係等 Controller request 先 Get Data，
而係不斷 Get Data，
睇下 Controller 有冇 request 而決定 Report 定 Discard。
結果就有可能 Controller Request Time t 既 Data，
Firmware 就 Send 左 Time t-1 既 Data 過去。

唉，
都唔知邊鬼個 Design 既……

「遲」「早」

有人嫌「早」，
想「遲」 d。
但其實我係想「早」既，
亦都好恨快 d。
不過，
現實似乎唔容許我有呢個選擇，
結果都係「3、5、7」。

---

今日做左窮光蛋炒炒，
事緣今朝拿張卡去提款，
部機話張卡失效。
拿去銀行攪，
佢話磁帶失效，
新卡要五個工作天後先有。
而我身上，
只有十三個一既現金，
同一張得返個幾既八達通……

好彩既係，
今朝帶左飯，
張八達通夠我返屋企。

---

估唔到補完後仲要補完。

上星期五中同食飯，
返屋企時記下同班中同既名。
三十個人，
Always 忘記兩個。
第二日，
終於醒起，
第一個係勇姐，
第二個係王馨平。

就黎到我換身份證，
Newsgroup 有網友 Post 左個時間表出黎。
網友唔信我未換，
話我點睇都似 7 中既人。
亦即係話，
一個三十歲既，
配一個十五歲既……

日記補完

幾日既日記都好似打漏左 d 野，
今日黎過補完。


星期日送機，
迦南走黎拍一拍我膊頭，
說一句：「叻仔丫！」
冇啦啦叻乜野仔？
問佢又唔講。


都係星期日送機，
Anna （唔係中同那個）問我工作上既野，
包括忙唔忙呀，
人工幾多咁。
我知無不言，言無不盡，
不敢有一絲隱瞞。


今日老左一個 Grade，
做左人舅父。


今日第一次學人玩 SMS Chat。
以往都係一封起兩封止，
今次起碼五封。
全程英文，
我發覺我部手機好難用，
SMS 好似打唔到「New Line」

---

真係慘，
有人 Miss 左班飛機。
三個人滯留係芝加哥，
第二日中午先有機。
有人叫細佬 Send 個 E-mail 畀媽，
結果十二個鐘之後，
封 E-mail 仲未打……

一年之計在於春

今日去送機，
Anna 果然係同一班機既，
都幾多人黎送佢。
仲見到好耐冇見既 Sam Sir。
五點半要過海關，
不過最後一張相影左好多張都未係最後一張，
始終第一次出國讀書係唔同 d 既。

---

牛哥係佢日記 Post 左今年目標，
提醒我原來又一年，
都係時候定今年目標：

1. 讀書
繼續讀兩個語言，
年尾考三級能力試。
仲要學整蛋糕。

2. 旅行
今年要去一次旅行，
可能係英國，
可能係美國。
人數未定，
可能兩個、三個、
四個甚至五個。

3. 儲錢
年底要廿五萬資產，
十二萬係流動資金。

4. 健康
九月前減十磅。
荳荳拜拜。

5. 戒口
成功戒食牛、蛋、海鮮。

6. 運動
一個星期最少三次，
跑步好打波好。
仲要 Keep 返住做 Gym

7. 攝影
加快執相速度。

1234567
多勞多得

---

得到 Auntie Yip 拔刀相助，
終於完成任務。
「被」可以冇，
「大食」都可以冇，
改成可以求其食一餐。
免去「大食」，
除了某人唔駛換衫換得咁辛苦之外，
亦都唔駛玩「遊戲」
呵呵呵

酒池肉林

今朝一早佢去送細佬機，
之後係佐敦會合我。
落左旺角 Gamezone。
打左陣機，
估唔到佢會陪我落機鋪，
仲打埋一份。（怪哉怪哉）

中午去左魚米家食 Lunch，
之後去買腳架畀佢部新 DC。
坐車落銅鑼灣 Sogo Shopping，
佢買左冷帽、耳環、飯壺，
我買磨豆機、咖啡豆。

Tea 完之後行落天后，
今日個傻婆請我食私房菜，
間野叫酒池肉林，
好好食喔，
不過價錢都好貴。

去到樓下，
打電話叫佢開門，
死喇，
電話幾多號呢？
試左好多個，
終於打通。

頭盤我係焗蠔，
佢係三文魚。

最攪笑係個湯，
從外觀睇，
無論係裝湯個碗、
個湯匙、
個湯面個層、
都係一杯咖啡咁。

我 Main Course 係羊架，
好好味。

甜品係心朱古力心太軟布甸加雪榚。
心太軟布甸，
即係切開中間有熱騰騰既朱古力。
除了甜左少少之外，
都好好食。

不過咁 Formal 既 Dinna，
都係唔係咁適合我地。

聚舊

Anna 星期日走，
今晚一班同學同去食飯。
出席既有十五人，
係銅鑼灣食飯，
約係皇室堡等。
但係食飯既地點，
卻係利園二期既虞家媽媽。

D 食物名好攪笑，
虞家媽媽 XXX、
黃家媽媽 XXX、
虞家爸爸 XXX、
康家爸爸 XXX……

價錢幾可觀，
不過味道就只係一般而已。

完左之後，
去左登龍街一間 Pub 飲野。
第一次飲芝華士，
唔好飲既……

Kinger 問左個數學 IQ 題，
就係用 5 個 5，
加減乘除之後得 24。

答案係：
(5 * 5 * 5 - 5) / 5 = 24
(5 - 5 / 5 / 5) * 5 = 24

不過我現場都係想唔到既。
十一點半灰姑娘要趕返屋企，
但係睇佢地個勢，
有排都未走，
唯有請大衛同學幫我畀左先。

---

有人問點解佢同我冇乜點傾計。
我兩個要傾既話，
幾時都傾得啦。
咁大班同學咁耐冇見，
梗係同佢地傾先啦。

好麻煩？？

友人個友人個女朋友個阿媽
（真複雜既關係）
同個女講：
「唔好成日麻煩佢啦……咁咁咁。」

其實有幾麻煩呢？
可能出開街帶埋紙巾；
可能出完夜街送埋返屋企；
帶個眼鏡盒袋人幅眼鏡；
可能借屋企少少地方出黎放下野，
呢 d 係舉手之勞，
甚至可能係理所當然既事。


唔知係咪物以類聚，
友人個友人個女朋友都係好客氣，
甚至係客氣得過份。
打電話畀男朋友，
第一句會係：
「Sorry 呀，撞住你返工。」


就算有求於你既 Cold Call Sales 都唔會咁客氣啦。
唔單止咁，
友人個友人個女朋友 d 朋友，
一樣係咁客氣。
詳情我都唔係咁清楚，
大部份都只係道聽途說聽返黎。

---

老闆 B 去左 Las Vegas 出 Trip，
近乎冇皇管，
可以準時收工。

不過我竟然唔記得入票，
仲未出到糧 ><

好眼訓，
十點半就訓覺了。
結果等 Bedtime story 等到十二點……

演唱會

通完頂既結果，
係可以今日早 d 走。
因為今晚買左飛睇演唱會，
所以返到屋企訓。
訓到四點半，
起身沖涼出門口。

去到地鐵站，
唔見人。
電話又打唔通，
咁就行去恆豐嘗試找，
行左五層都唔見。
落返地鐵站過裕華，
就係地鐵站見到佢，
咦？
頭先眼大睇過龍？

今早做 d 乜好呢？
去左意粉屋食晚餐，
叫既係下午茶餐。

食完，
行落尖東，
食左 d 意大利雪榚，
好味。

演唱會八點十五分開始，
係 Twins 既一時無兩演唱會。

嗯，
都 OK 好睇。

其中有一段「打」既表演，
有人話好好睇，
我就覺得一般喇，
姐手姐腳，
出拳出腳一 d 力都冇……

今日既位置唔係好好，
好多時出黎都係影背脊。
支 Lens 又好似影得唔夠遠。

有人問我點解我影 d 相可以近佢既咁多。
佢個部係 Fujifulm F11，
600 萬像素 DC，
等效焦長最長為 108mm。
我個部係 Olympus E-300，
800 萬像素 DSLR，
支鏡既等效焦長最長為 400mm。

我仲打算買多支 ec-14 鏡加落去，
焦長可乘多 1.4 倍，
不過缺點係光圈細左，
同埋易左手震。

希望月尾場李克勤演唱會個位好 d 啦，
唔駛成日影后（後）……

睇完演唱會坐車走，
有人話獅隧九車相撞，
所以大塞車。
唔係丫，
都幾暢通 bor。

紀錄連破

曾經有人講過：
「紀錄係要黎破既」

我今日又破紀錄，
兩點先係公司走。

「車，上個星期五都差唔多兩點啦」

請留意，
我係中午兩點走。
Newsgroup 有人問我，
「你又話好忙既？點解可以返半日就走得？」

但其實我係返左日半走得，
唔係半日。

話說老闆聽日飛，
今日又要畀部 Sample 個客。
咁就要趕工趕工趕工。

上面又 Send 左五部機落黎。
咁就要做埋 Test 同 Upgrade Firmware。
試極個 Performance 都唔得。
後尾 Check 下，
8051 佢又係 downlod 左舊 code，
Firmware 佢又係 downlod 左舊 code，
咁梗係唔得啦。

不過就算用左新 Code，
Performance 都係唔得。
結果就要留低 Debug 同試機。

八點半我出返佐敦上堂，
食完飯十二點返公司繼續做。
點幾時，
個同事話佢攪掂晒 d 野走得，
（結果當然未啦，佢都冇試晒 d Features Work 唔 Work）

Anyway，
得我一個留係度通頂。
試試試，
做做做。
最後有製成品，
不過在我而言，
仲有很大既進步空間……

放飛機

真係好鬼憎冇責任感既人，
己所不慾，勿施於人。
所以我都盡量唔會咁。

昨日唱緊 K，
收到大衛同學既電話，
話佢地踢完波食飯，
問我去唔去，
仲問我做乜唔去踢波。
咁我梗係呆晒啦，
都冇人通知過我。

咁我聽到個邊有人大大聲話一早通知左我。
咁大隻死貓，
我返到屋企梗係即刻 Check ICQ History 啦。
聲大大個位王生，
我最後一次收佢 Message，
係十月問我拿 E-mail address。
約開人既肥宇，
我最後一次收佢 Message，
係十二月十日問我十八日踢唔踢波。

我就真係唔知邊個幾時係咩地方用過咩方法問過我知有波踢。

呢樣都未算激氣。
最激氣係話約我今晚食飯，
問佢時間地點呢，
就話聽日電話聯絡。

結果今日我就成個下午係紅磡等電話，
兼且順手打機（或者你可以調返轉講）。
等到六點幾七點都冇電話，
就返一返屋企先。

以為自己記錯日子，
可能佢地尋日講既係下星期食飯。
碰巧見到大衛同學 Online，
就 Send message 同佢啦，
結果佢先話：
「王生話取消左」

Well……

唱 K

一月一日星期日，
返完崇拜之後（今日係元旦主日）
返到屋企，
問媽媽去唔去食午飯。
佢話好呀：「等我廿分鐘。」

結果……
我等左一個鐘都未出到門口。
辛辛苦苦落到樓下，
仲要等 Auntie Yip，
結果由我返屋企計，
個半鐘都未過到第一條馬路。

但係我又約左人 wor，
結果都係冇同佢食午餐。
出到旺角，
行左潮流特區（？！），
之後行旺電，
再之後信和。

五點半去左創興唱卡拉 OK（？！），
講真，
我好少唱 K。
因為一黎我唱得唔好聽，
二黎我把聲入左咪出返黎係好怪好難聽。
所以免得過都唔去唱 K，
Even 去左，
都唔會拿咪唱歌。

不過今日得兩個人去唱 K，
（唔好週圍同人講呀）
焗住要拿咪唱歌。

唱完 K，
就去左睇戲。
睇「情義我心知」，
OK 好睇啦。

睇完戲，
就坐巴士走。
有人表演企係度訓覺，
我又驚佢跌 wor，
結果就前後左右護住佢。

基本上，
除左佢垂直座落佢我末必豆得住之外（只豆住雙手）
佢向邊個方向跌都唔會有事。
人肉護墊，
勁呀！

遲大到

今日遲大到 tim，
仲要遲幾次。

話說早上約左十點睇醫生，
不過因為夜訓既關係，
（我返到屋企都已經四點……）
起身都已經九點半。

所以打電話去改左做十一點。
睇完醫生，
落左尖東食下午茶自助餐。

好趕好趕咁落到尖東，
兩點半去到。
遠遠咁望，
好似開始左。
點知埋到去，
個侍應同我地講，
下午茶三點半先開始，
現在係午餐時段執拾中……

咁就唯有週圍行，
去左買羽絨褸。
呵呵，
現在有褸十月去旅行，
或者冬天去美國。

食完自助餐之後，
大約五點半。
見未收招換咒，
經過理髮店，
就入去剪髮。

佢話等一陣，
但唔駛等好耐。

洗完頭之後，
收到電話。
咁我以為好快剪完，
咪約半個鐘後 lor……

結果我等左兩個半鐘……
攪到有人等左我兩個鐘，
真係極之唔好意思。

之前以為要做雷霆救兵，
所以冇賣定飛睇戲。
結果就行 LCX 同 Pageone，
買左好多雜誌。

有人因為企係 HMV 等左我兩個鐘，
攪到腳痛同抽筋。
但係又除夕封晒路 wor，
要行多半個鐘先有巴士坐。

破紀錄

今晚又破紀錄，
老闆上左大陸開會，
我就留係香港趕 Project。
因為就快出 Show，
（應該係下星期三上機）
所以要趕。

其實我個 Part 大致完成（應該），
但係同事個邊未攪掂，
我唯有幫幫佢手一齊 Debug。
唔覺唔覺就攪到十點幾，
開始覺得肚餓，
就 Clear 埋公司餘下的兩個碗麵。

之後差唔多大致完成，
老闆亦係呢個時間返到。
傾左一陣，
佢話過左年會開始請返多 d 人，
Software 起碼請一個，
仲叫我地同時一切 in，
睇下同新人夾唔夾 wor。
仲話今次請人會謹慎 d，
請 d 真係做野既人返黎，
唔會只係為左儲夠 Head Count。
ER……
聽住先啦。

另一個今日上左大陸既同事之後都趕埋落黎，
仲帶埋 D 樣版機落黎，
即係又有野做啦。

離開公司時，
已經點幾兩點了……

---

唔覺意打電話嘈醒左人 tim，
真係唔好意思。
不過我收線之後，
另一個人又打畀佢。
收到既消息係，
唔駛做「雷霆救兵」。

想走？冇咁易……

今日好唔舒服，
所以七點幾八點就收工。
臨走前，
被老闆照左陣肺。
話新年前（即係幾日後）要攪掂晒所有野，
必要時（即係一定要）星期六都要返。
現在等收尾數，
係時候搏……

Well，
我都知道，
今日既休息，
等於明天既辛勞。

臨訓前，
收到一個久違了既電話。
傾了三十八分零七秒，
感覺良好。

---

今日生果日報新一則

常用電腦皮膚易過敏

中央社報道，
長期在電腦前伏案工作，
不僅易腰痠背痛，
還得留意可能引發「電腦族皮膚症候群」。
有皮膚科醫生指出，
常接觸電腦周邊用品，
易引起過敏性濕疹和急性皮膚炎，
長期固定姿勢更會令手部缺氧，
建議最好每三十分鐘動一動。

台灣書田診所皮膚科主治醫生鄭惠文說，
每天長時間使用電腦，
姿勢不良不僅會腰痠背痛、肩頸僵硬；
而接觸電腦周邊用品，
更會引起刺激性、過敏性手部濕疹和急性皮膚炎，
若手部皮膚長期受到壓迫，
還會導致局部缺氧及血管擴張，
而這些症候都通稱為電腦族皮膚症候群。

點解 Quote 出黎？
因為我最近個身好痕 lor。

Harry Potter

今日一個人去欣賞電影。
去之前，
去左麥記試佢個板燒雞腿包。
咬落去感覺良好，
口感一流。
啖啖肉汁，
不過亦都好油。

最怪係個包既有燒烤醬，
也有沙津醬。

今日睇既係 Harry Potter，
入場既時候，
由我行入個位，
到我坐低，
都被隔離位望實。
我開頭怕坐錯，
但 Double Check 過冇錯。
咁唔通係識既？
望落又有 d 似舊同學（崔同學同朱同學）。
結果原來係想同我調位，
因為我買那個位剛剛係佢地四個 Friend 既中間。

講返套戲，
唔錯。
不過接近三個鐘都講唔晒小說所有既野，
變左有部支節好雞肋。
之後個兩集小說仲長，
唔知佢拍成點？
有 d 期待。

---

有人漏左份聖誕禮物唔記得帶返香港，
話請我食餐勁既補數。

今晚去 OperRice Search 酒池肉林既食評，
（有人話想去呢間）

點知睇完戲返屋企，
就收到 ICQ Message，
同一個網頁，
講緊同一間食店……

入屯門

估唔到咁快就到假期尾，
今日同大人入左黃金海岸行。
今朝大人去旺角睇中醫，
本來打算係旺角坐車入屯門，
不過大人睇完醫生返左屋企食藥，
咁就係佐敦坐小巴啦。
呢程小巴就抵 lor，
十六元既價錢，
過山車般既享受。

入到黃金海岸，
行左一陣，
去左「金」海豚廣場。
吹下海風，
打幵機。
就坐返車出旺角。

呢程車比入黎個程仲抵，
兩個人包車出返黎。

---

下年有舊同學結婚，
得悉有人停工停學幫佢做伴娘。
真係夠朋友。

我係度諗，
當有一日我出事時，
會唔會有 d 咁既死黨彈出黎幫我呢？

---

早兩日有個大同約我睇 Harry Potter，
本來話個晚話我知幾時睇。
結果昨晚問佢先定星期三。
今朝打黎話想改今晚，
我話約左屋企人做節，
佢先話係星期三睇。
但係要改係觀塘睇，
咁我梗係叫佢買飛。
結果呢，
無尾飛鉈。
唔問佢都唔話想改 31 號。

Well，
我決定明日自己去睇。

i.2000 Gathering

今晚約左大同食飯，
中午食完飯我就出尖咀打機。
打到五點幾就飛奔去戲院，
睇情癲大聖。
原本可以早 d，
不過臨尾有人挑機，
打埋先走得，
不單幸運地贏左佢，
仲抽中張閃 Tim。

睇完戲，
就會合 i.2000 打邊爐。
今次有十個人去，
打完佢地落 Pub，
咁我借口送 Bonnie 返屋企，
可以走人。

阿梁話有睇我 Blog，
其實我都有睇你個 Blog wor，
你話想跑山嘛，
玩野外定向啦！

---

廿四號篇日記都唔記得講，
廿四號我去左求婚，
仲成功埋 tim。
不過，
新郎不是我，
新娘都不是 Bonnie。

其實係有個 Friend 求婚，
我去幫手送花而已。

話說鋪排左女主角沿途有十二個人送花，
呢十二個人分成三 Teams，
我係 C Team 隊長，
負責守尾門。

點知，
狀況出現。（嘩！好台灣式既用語呀）
女主角改變路線，
我地即刻走位。
結果十二支花只係送左六支，
不過 C Team 全隊四支都送晒，
C Team 隊長真係領導英明呀。（嘔）

漏單

今年幾個大日子都係主日，
聖誕係啦，
元旦係啦，
甚至年初一都係。

今日係主日，
當然要返崇拜啦。
本來想找埋大人返崇拜，
不過大人話要睇醫生，
所以我都冇問佢。
不過我今日少有地準時返到，
呵呵。

培浸每年一般有兩次浸禮，
一次係聖誕主日，
一次係復活節主日。
今日都有浸禮，
有十位新葡。
因為有浸禮，
所以今日遲左放，
會合埋剛剛被人 Sell 樓盤既闊太，
就去左行朗豪坊。

之後食野，
順手送左個兩份禮物畀佢。
一份係早兩日買既 Twins CD，
另一份係上個星期買既 Fujifilm F11 數碼相機。

五點幾去睇如果愛。
睇完去食日本野。
勁攪笑，
叫野食漏單就見得多，
埋單都漏單就第一次見。
話說我話埋單，
咁個 Waiter 就講喇：
「經理，九號埋。」
（唔通得經理先可以掂錢？）

等左兩個字，
見其他遲過我地叫埋單既都埋左單，
唯有叫多次，
不過收錢既唔係經理。
咁之前「經理，九號埋。」，
呢句又點解呢？

埋完單，
趕落中環睇 MK 表演，
落到去，
仲要排隊入去。
結果遲左半個鐘，
不過都聽到佢唱兩、三首歌。
完左之後，
同 MK 傾兩句，
仲見到 MK 另一半 tim，
今次都叫做意外收獲。

「平安」夜

平安夜，
對我黎講同平日冇乜分別。
要迫要盛，
我昨日已經同 SOC 班 Friend 行完，
我考完 First Aid 去油麻地 Join 佢地，
之後食煲仔飯，
食完會合埋簡小姐，
就一行四人行落尖咀。
行完 Sogo，
行星光大道，
係 Cafe 飲完咖啡就散喇。

今日都係無無聊聊咁過，
訓醒都成十二點，
食完飯就出去打機。
不過個 Game 依然咁多人玩，
等左幾個鐘先到我。

係等既時候，
收到老闆既電話，
話部機有乜乜既問題。
我知係好急，
但係我冇機係手，
D code 又冇，
點幫你 Debug 呢？

玩左一百蚊左右，
中左張金閃張角，
稱號升埋霸王，
就撒退了。

本來今日約左媽媽食聖誕大餐，
不過我早一個星期叫佢訂位，
訂足一個星期都冇訂。
加上又炒埋架，
事緣佢上個個星期丟左我個有紀念價值既紙盒，
其實係好少事，
不過我唔滿意佢講大話，
死都話冇丟，
拆穿左就賴第二個。

丟左咪話丟左 lor，
做咩要講大話。
一開始就話打電話問過晒我，
所以乜都冇丟。
之後我出後樓梯找，
又講第二個大話，
話放係我櫃頂。
我櫃頂根本就乜都冇。
跟住就賴係姐夫丟既。

喂，
唔係你丟，
你畀錯 Information，
係咪都好應該道歉呀，
佢就一個乜都唔關佢事既樣。

今日打機打到咁夜，
飯都唔食，
某程度上都係唔想見到佢。
一陣求求其其找間食就算，
又唔知幾點食，
你唔係叫我廿四小時 Standby 等你呀。
原本打算收到電話都去食既，
不過佢一路都冇話我知幾點食，
又冇電話打黎，
既然咁冇責任心，
唔食算數。

考試

今日大人返黎，
不過我唔得閒接機，
原因係我今晚要考試。
唔知點解，
大人返親黎個晚，
我都係要考試既，
今晚就要考 First-Aid。

不過好奇怪，
大人四點落機，
不過佢細佬四點幾仲係屋企。
攪到大人出到黎好惶恐，
行李又唔見晒，
接機既人又一個都見唔到。

行李唔見晒，
係因為 d 行李上唔切飛機，
要下班機先到。
咁就滯留係機場幾個鐘，
真係慘。

講返自己，
五點鐘就係公司走，
即刻走去買今日新出既 Twins CD 首批限量版。
限量版既意思，
我做係有限度大大量生產……

之後就落灣仔找 Moly 拿功課，
然後行上奧運大樓考試。

行到上去，
剛剛遲左少少。
今日考試分三 Part：
筆試 - 四選一選擇題，
三十題中要答對十八題，
我選冇問題掛，
除了數字題冇背到，
（即係問人呼出既空氣有幾多 % 氧個 d）
可能錯之外，
其他都應該答對既。

之後包紮，
紮兩個傷處。
首先係手肘出血，
跟住係大腿骨折。
都冇問題既。

最後考成人 CPR。
九點就考完試走得喇。

做冬

今日冬至，
但屋企約唔到時間做冬，
約左廿七號。

結果過左海同 Auntie 葉外家食飯。
十三個人，
係酒樓食飯，
叫左個全包宴。
但上菜既次序真係笑死人。

一黎就燒鵝，
之後雞同時蔬。
下一味就伊麵同炒飯。

鬧完之後，
先上返翅，魚。
然後乳豬全體得半隻。
又鬧完之後再上，
基本上都係個碟，
但將半個豬頭換返一個。
真係笑死。

---

大衛同學話想去旅行，
一係去英國，
一係去美國。
如果係美國，
就會係東岸。
如果係東岸，
就會係 Boston。
問我有冇興趣，
有 d 興趣架，
不過我年中先去完，
出年中下旬佢又有要事係香港。

人地唔係 Boston，
咁我過去做乜？
探 Anna 咩。

---

明天，
期待。

都話唔熟 lor

今日個頭好痛，
所以冇乜 OT 就返屋企休息。
返到屋企食飯，
真係激死。

食蒸水蛋，
但係好似未熟 wor。
「唔係呀，
太太睇過話熟架喇。」

熟？
唔係掛，
水汪汪，
仲倒倒得出水，
不單止一夾就散，
係未夾都散，
一放筷子埋去已經散……

叫佢蒸多陣，
五分鐘唔夠就拿返出黎。
係咪熟就咪熟啦。
係都要話叫我試下。
結果我食左一啖咁大把啦。

仲話今日公司派人黎教佢煮，
唉，
咪又係煮成咁既款……

早兩日食 d 唔熟既雞，
薯仔炆雞，
整左薯仔炒雞。

呢排冇乜事都係唔返屋企食飯安全 d。

---

今晚收到一封信，
係 d 保險推銷信。
不過個間野點解會有我名同地址呢？

睇一睇邊個寄黎，
我就知咩事了。
原來係抄同學錄，
署名兩個都係中學同學，
仲要係唔熟個隻……

走堂

今日開例會，
班 Hardware 一個都唔係度，
一個請假，
一個上左大陸。
結果講既就大部份都係 Firmware 野。

一路死做爛做都冇結果，
做到八點幾好似好 d，
不過攪埋 d 手尾，
又趕唔切返學了。

不過我功課又未做，
默書又未溫，
返唔到學都係一係好事。
（其實係咪故意走堂呢？）

講返日文班，
因為舊那個老師返左日本，
新班換左個新老師 -- 小西老師。
佢講野時，
動作好誇張，
亦因為咁，
我地更加容易明白佢講緊乜。

第一堂通常都有指定動作。
就係自我介紹。
講自己個名（玄也），
興趣（踢波）、放假做乜（踢波），
最鍾意日本 d 乜野（漫畫），
最鍾既動物（貓）。

當然，
我既自我介紹加了適當既修飾，
並用上我曉既日文詞語啦。

---

失去聯絡兩日，
有 d 擔心 Tim。

埋身肉搏

Project 接近埋尾。
換句話說，
又係趕 Project 既時候。
由零開始行第一步係難，
但行最後一步到終點更加難。

Auto Focus 去到最後一個階段，
老闆話有好大 Improvement。
但係我角度，
有咩？
唔覺 wor，
咪又係咁差……

尋日老闆去見客，
拿晒 D 機去，
亦即係話，
我冇晒機做 Development。

老闆打左幾次電話返黎，
呢樣呢樣唔得 wor，
個樣個樣同我試下丫，
AF 個度仲可以點改？

但係我手頭一部機都冇，
耍我咩，
點同你試？
點同你改？

Anyway，
六點九我都收工。
老實講，
今日再磨落去，
都係冇結果架啦。
留返 D 精力聽日搏殺過。

---

唔醒起，
原來美國係用兩腳插頭，
同香港唔同。
差 D 注成大錯 tim……

完作任務

今日走三場，
第一場係崇拜。
因為一早要起身崇拜既關係，
昨晚有我對愛隊紐卡素既比賽直播，
我都冇得睇……><

雖然早睡，
不過去到禮拜堂都遲到。
（真係一個壞習慣）
我去到既時候，
詩歌都已經唱完，
講者正在講道。

十二點完左崇拜，
我又要急急腳走。
因為下午要係青衣幫班。
一點四十五分集合，
好彩我都仲有時間食埋個 Lunch。
今日小班教學，
一個教練都只係教四個人。
好順利咁教完 Map Walk，
之後玩圖例接力卡，
之後跑模擬賽，
就收工啦。

之後就坐巴士落旺角，
首先去信和，
之後過星際，
然後百老匯，
逛先達，
仲行晒成棟新之城。

最後回星際買。
Well，
雖然唔係一件 Perfect 既產品，
但都應該 Fit 到大部份既 Requirement 既。
返到屋企，
都成九點幾，
但係電視又冇野睇，
食完飯就訓覺了。

買雜誌

每日都有新雜誌出，
就算同類型既，
都有幾本。
百花齊放，
都可以算係幾好既現像。

我其實冇買雜誌既習慣，
可能冇咁既耐性坐定定睇。
睇一兩頁可能就唔睇，
咁就浪費左一本雜誌。

不過有時，
見到封面既標題，
都會有衝動買返黎睇。
昨日就買左本喇。

呢期既封面寫既係：
「拍片 DC 日攝夜影大競賽」

被呢個標題吸引，
完全因為呢期搜集緊 DC 仔既資料。

叉開少少話題，
早前睇電影電車男。
因為愛馬仕最買一部手提電腦，
所以電車男就周圍幫佢搜集資料。
睇到呢段我好感動，
想效法。

剛好最近有人想買 DC，
咁我梗係自告奮勇找資料。
暫時我定既準則係：
1. 一部數碼相機（廢話）
2. 可以拍 Video
3. 影相質素高
4. 容易操作
5. 傻瓜機得黎，又有得做高階些少既設定以備不時之需
6. 叉滿電可以用得耐
4. video 拍幾分鐘就可以，
不過當然愈長愈好。
理論上應該 MPEG4 先做到我要求。

經過一輪既努力，
我發覺……
冇野係完美既，
部部機梗有 d 缺憾……
接落黎，
就要睇我點取捨……

講返轉頭，
買左個本雜誌，
d Information 對我係……冇用既

咁客氣？

有個中學同學真係好客氣，
Send ICQ Message 問我可唔可以將一個 pdf 變做 Word Format，
d 字可以Copy。
那個 File 是日文來的，
需要 Copy 出來翻譯。

咁因為我屋企先有 Tools，
就話夜晚返到屋企先幫佢。
點知佢就話唔駛麻煩我，
其實點會麻煩丫，
舉手之勞之嘛。
甚至我對住個 File 打多一次畀佢，
都唔係好複雜既事。
不過，
佢係唔駛你幫既，
你都幫唔到。

---

係金魚個日記，
見到有個朱古力跟出生日期既關係

朱古力︰熱品脫（Hot Noggin）
成份︰濃厚朱古力奶加植物油
特性︰樂天知命
生日占卜︰你熱愛生命，時常充滿盼望，
無論生活環境多麼惡劣，面對多大的難題，
你都有一顆熾熱的心，盡自己的能力，
幫助社會，幫助別人。
你有敏銳的觸覺，情緒容易受環境的影響產生波動，
無論如何，你渴望得到溫馨的愛情，
在彼此凝望的眼神裡，得到恬靜和安忍。
朱古力蜜語︰讓世上每人都可以享受自由。

之後又做左個生理測驗，
http://www.quizgalaxy.com/quiz.php?id=55

我的人生比重:
love, career, family 各佔 22.2%
health, fun 各佔 16.7%
money 佔 0%

因為我唔易嬲，
又容易開心返，
結果又唔可以扮嬲，
又唔可以扮唔開心…… ><

承諾

昨日 Mission 失敗，
今日繼續，
今日換既係 12000 分一張，
位置較後既飛。
一樣九點開始打，
我仲找埋媽媽幫手打，
一路都係打唔通。
今日唔駛開會，
所以可以盡量 Keep 住打電話。

由九點打到兩點，
足足五個鐘，
鍾於打到昨日個 Status，
「對唔住，
呢家線路好繁忙，
請等一等……」

今次死都等埋落去，
等左幾分鐘，
就叫我入 Credit Card No，
同埋 ID Card No，
入完之後傳來既係：
「對唔住，
今次優惠已經完滿結束……」

Well………

好唔開心………
唔開心唔係因為冇得睇，
（我舊年都冇得睇啦）
唔開心係因為我應承左而做唔到。
對現唔到承諾，
係最唔開心既事……

---

昨日開會，
話星期五要上大陸，
昨晚 Check 一 Check 本回鄉證，
咦？過左期既？
即刻上網 Check 一 Check，
快證最快都話要五個工作天，
即係……
上唔到，
咁係好彩定唔好彩。

1832233

「1832233」，
一個某信用卡既優惠熱線，
一個我每年總會打一次既熱線，
一個每年到十二月尾某一日就會 Jam 到痴晒線既熱線。
今年今日（二零零五年十二月十四日），
就係換領叱吒頒獎禮門卷既日子，
用 20000 分，
就可以換一張飛。
我上個月月結單 Show 既只係得 37xxx 分，
為左可以今日換飛，
我呢一個禮拜專登碌多二千幾蚊。

優惠熱線由上午九點至下午九點服務，
我八點五十五分已經開始打電話。
用我既 V3 打，
一時「線路繁忙」，
一時「通話失敗」，
一時「do……do……do」，
我唔知呢四個有咩分別，
不過肯定既係，
上述三個情況都係話我知，
電話打唔通……

由係屋企打電話開始，
到坐巴士返工，
都返到公司，
我不斷又不斷既 Redial。
結果都一樣，
打到我手提電話冇電，
轉用公司有線電話打，
十點幾通過一次，
但轉來既係：
「對唔住，
呢家線路好繁忙，
請等一等……」

我等左好耐，
等到我夠鐘開會，
都未等到。
開完會出黎，
去食飯，
都一路 Keep 住打，
連女朋友都用長途電話幫手打。
佢有一次打得通呀，
不過係佢入完 Credit Card No，
同埋 ID Card No 之後，
傳來既係：
「對唔住，
今次優惠已經完滿結束……」
Well……

想你所想

想你所想，
係好多公司既口號，
政府都好似用過。
不過今日我發覺，
原來我都得架 Wor。

話說愁緊聖誕禮物，
原本打住 Tiffany，
不過星期六係 Sogo 行左成個鐘都選唔到。
咁就唯有想過第二樣。

心目中都有幾個 Plan 既，
今日上網搜集資料，
找到一樣，
完全符合要求。
最重要係：
想你所想。
呵呵呵

---

尋晚有個 Friend 打黎問我平安夜有冇節目，
那個 Friend 即係早排話有 Party 那個。
佢現在又唔去那個 Party 了，
話太貴 wor，
咁又係既，
係咁加價。

Anyway，
本來話入南丫島燒野食，
不過屋主話唔得。
咁唯有想過第二樣，
不過到收線時，
都係未有決定。

不過昨晚我都未知有冇空，
只係憑經驗估計我會冇街去。
不過今日 Confirm 左，
我係冇街去既……

進展

今日再次返工，
繼續去 Solve Auto Focus 既問題。
其實做呢樣野好煩，
因為部機我唔可以完全 control。
首先就係 os 同我隔左一層 layer，
寫呢曾 layer 既公司 shield 左好多野，
好處係我做少好多，
例如我唔駛處理 Save Jpeg 呀，
又或者由 Sensor Get Data。

不過都有唔好處，
就係萬一 Middle Layer 佢寫得唔好既話，
我要補鑊就辛苦了。
好可惜既係，
呢個已經唔係「萬一」既問題，
而係切切實實我現要處理既野。

另一方面，
控制 Motor 都唔係我做，
而係透過另一粒 Controller。
不過個 Command Set 總係欠 d 野，
一個 Command 係叫佢移動個 Motor，
另一個 Command 係叫佢 Reset，
但係就冇叫佢唔移動既 Command。

可能你會話，
你唔 Send Command 過去咪得 lor。
不過攪笑既係，
唔 Send Command，
個 State Machine 唔識改，
即係會 Wait forever………

Anyway，
今日收到個新 Controller program，
終於有呢個 Command。
成個 System 頓時 Improve 左好多。

順手幫個同事手 Debug，
佢攪左成日都攪唔掂，
我埋機十分鐘就找到原因了……

白石橋教班

今日又要教班，
一個係白石橋既 Lv2 班。
原本唔係我教既，
呢個班係 Lv 1+2，
有個教 Lv1 既教練唔得閒，
所以先找我代堂。

今日有兩個上車地點，
一係九龍塘，
一係荃灣。
我就梗係選九龍塘啦，
去到「理想酒店」附近，
嘩！好多旅遊巴，
我一路行到街尾先找到架車。

係找車既時候，
我仲撞到個 Friend Tim，
佢今日要帶 d 乜乜親子旅遊。

Anyway，
坐旅遊巴去到川龍，
就分組教學喇。
今日有三個學員沒有到，
全部都係我個組，
所以我個組得五個人，
小班教學，
呵呵呵。

今日係附近有個超長途賽（>10km），
我因為要教班，
所以冇得參加。
不過下午有個模擬賽畀學員（~2km），
我又玩下，
順手收 Points。
最快個學員跑二十分鐘，
我跑十五分幾鐘。
原本可以再快 d，
不過我要確保所有學員安全到達，
所以當我追到最後那位學員之後，
我就要等埋佢喇……

我想去盡既話，
可以十三分鐘左右啦。

Olympus E-maging School

今日下午去左攝影班，
一個由 Olympus 攪畀新手既班。
兩點開始登記，
兩點半開始上堂，
不過我兩點九先去到。
不過好彩頭段都唔係主菜，
頭段都係介紹下部新機，
一部入門既 DSLR - E-500。
E-500 有 D 幾好既 Features，
甚至比我用緊個部 E-300 好，
當然啦，
冇 Improve 又點會出新機？


之後就到主菜，
教影相。
不過話佢係教影相，
其實係教你點用部 E-500。
雖然部 E-500 同 E-300 點都有 D 分別，
不過都讓我更加了解我部相機。

首先講曝光，
最好玩就係測光多左兩個模式，
一個係高光調整，
另一個係暗位調整。
可以專登整光 D 相或相反。
當然，
你自行調較光圈快門，
或者加減 EV 都做到呢個效果，
不過有呢兩個模式就方便 D。

跟住講白平衡，
讓我知道原來冷色會另到個 MODEL Cool D，
相反張相就會開心 D。

仲有講光圈同快門、
淺景深、安全快門、
構圖（黃金分割同留白）。

原本話四點半完，
結果都講到五點。
今次仲有個 Welcome Gift，
有特惠價購買鏡頭，
不過，
個特惠價仲貴過街買……

充電

身體開始發出警號，
再唔處理又會爆煲。
不過現實上又好似唔容許我咁做，
真係兩難。

---

一個 Underground 既日記，
老友又道出出現問現。
唔知幾時召集令出現，
不過我相信當召集令出現，
我地幾個會隨時出現。

---

昨晚做到十二點半，
今日八點就想走。
不過我一拿袋想走，
老闆就叫住我，
話現在埋尾階段，
可能有需要捱一捱，
可能要 OT。

不過結果我都冇 OT，
照走可也，
因為我真的很累，
需要充充電。

充電既方法，
除左訓覺呢個生理上既充電方法之外，
仲有心理上既方法。

冇錯，
就係去左打機喇。
等左大約半個幾鐘先輪到我，
打左五鋪，
打到九點半就畀下一手，
抽左五張卡，
兩銀兩黑一白，
收獲都唔錯丫。

破紀錄

炒呀，炒呀，炒呀，
想買個 d 野係咁炒起左，
咁貴唔抵買呀。

想買兩樣，
一樣係克勤隻新碟，
炒高左成倍，
由 $89 炒到 $169。

另一樣係 PSP 既 Monster Hunter Portable，
都差不多炒高五成，
由 $259 炒到 $399……

---

今日克勤演唱會開買，
不過唔同 Twins 演唱會，
克勤個得心應手演唱會係冇網上購票既，
要親身去買。
觀塘又冇城市電腦售票處，
好彩 Alex 係上環返工，
又近售票處，
可以幫我買，
我順手約埋佢去睇啦。

原本我想睇頭場或尾場，
不過唔知會唔會加場，
加幾多次場。
頭場係年廿九唱到年初一，
大時大節，
Alex 都唔得架啦。
唯有退而求次睇第二場喇。

不過 Alex 想睇 $200 wor，
結果我出 $600。
個位 ok 啦，
我信 Alex 既選擇。

---

今晚終於破左紀錄。
係公司十二點半先走。

首先係老闆既 E-mail：
You may need to put in overtime or working at home if necessary,
we have to get this out of the way asap.

不過就算唔係收到呢封 e-mail，
我都係咁夜走，
原因係唔忿氣做唔到。

話說要做實驗 Get Data，
做極都做完。
唔係完全做唔到，
只係 Get 完返黎既既 Data 係錯既。
結果就做完又做，
走個時都係……做唔到 ><

仲要找唔到返佐敦既小巴，
要坐旺角小巴，
上床訓覺既時候係……四點。

---

夜晚同 Alex 食飯勁攪笑，
去 Food Court 食，
我叫左個餐，
餐就梗係有野飲架啦。
咁佢話我飲咩，
我咪話可樂 lor，
唔通話唔駛喇唔該咁？

不過結果係，
佢收我十蚊可樂錢？
我當然追返個十蚊啦。

不過講返轉頭，
係咪有咩我會錯意呢？

寫過吧啦

今日老闆去左見客，
係冇皇管既情況，
我今日當然準時離開啦。
不過準時極，
過到奧運大樓都要遲到，
即係話，
考試個日唔請假的話，
九成都趕唔切考筆試。
今日個堂因為原本個阿 Sir 唔得閒，
所以黎左個 Miss 代課，
今日主要係講重點。
重點姐，
即係拿住份試卷黎講……

之後示範包紮，
點樣可以包好 d。

不過今日都有個壞消息。
我考試個 Partner 整親右腳腳踝，
打晒石膏。
如果當日我咁好彩抽到紮右腳既話……

---

係我 Level 唔夠，
定係上手真係寫得差呢？
我幫手 De UI 既 bug，
結果個 Function 我係有頭寫過。

原本寫法係，
有兩個 Variables，
一個係儲現在係第幾頁 (Y)，
另一個儲現在係呢頁既第幾個 Item (X)。

咁每次一動，
首先就 Update X，
之後睇下 X 係味太大或太細，
需唔需要改 Y，
改 Y 個時又要睇下會唔會太大或太細。
總之有成十個八個 Cases 咁。

結果我就用一個 Variable 儲現在係第幾個 Item (Z)。
X = Z % ItemPerPage;
Y = Z / ItemPerPage;

將百幾二百行既 Code 縮到得七十行左右。

其實原本都唔想攪佢，
不過因為要加野，
有 d options 要 Gray 左佢，
咁 Gray 左就自然唔係 User Select 到，
即係動既時候要 Skip 左佢。
咁舊方法點改先做到呢？
我唔識……

講返個 UI，
D Code 真係複雜到暈，
連埋 Header 檔，
Total 有 24 個 Files。
Trace 都 Trace 到我死咁滯，
d Pointers 飛黎飛去飛到人都癲……

First Priority

嘩好凍呀，
有乜理由咁凍架？
昨日已經開始凍，
不過我都仲係短袖加褸。
今日就要長袖加褸，
仲要凍到入心入肺。

---

估唔到個建議都未 Suggest，
就被人 Ban 左。
好 Hurt 呀，
弱小心靈嚴重受創。
哼哼哼哼哼哼哼哼哼哼哼哼哼哼哼哼哼哼哼哼

（講得再誇 d 丫笨）

---

今日開例會，
因為另外那個 Software Engineer 病假，
所以我頂晒 Present。
其實我做既同佢做既，
好大程度係冇關係，
好彩昨日都有問過下佢攪成點，
如果唔係真係口啞啞。

不過勁攪笑。
「呢樣野好重要，
今個禮拜做唔做得起？
First priority。」

「呢樣野今個禮拜 first priority 攪左先。」

「呢樣野今個禮拜做左佢。
First priority。」

如是者，
我手頭上有十樣八樣 First Priority 既野。
究竟邊樣先係 First Priority 呢？

沉默是金？

逢星期一，
我就好似追連續劇咁，
去睇人地日記。

Sorry，
可能我唔應該有咁既心態，
不過人地日記劇情峰迴路轉。
兩小口子一時一時糖黏豆，
一時水拌油。
究竟今個星期係糖黏豆？
定係水拌油呢？

上個星期好似又發生左狀況，
係咩原因我唔知。

你當我八掛又好，
真係關心朋友又好，
總之我就好想知。

其實有 d 咩解決唔到呢？
有時三口六面講清楚就得，
不過有時就唔講好過講。
唔係話有咩唔講得，
既然講左會令到情況惡化，
點解仲要 Take 呢個 Risk 呢？
唔一定因為件事本身，
可能因為你表達得唔好，
亦有可能佢了解錯左，
而令到情況惡化。

以前，
我都以為咩都應該攤開黎講，
不過我漸漸發覺，
有時沉默的確是金……

當然沉默唔代表件事唔存在，
不過有時解決事情，
係可以係 Background Mode 做既。

希望佢兩個快 d 冇事啦，
不過以我多月睇佢日記既經驗，
好快冇事既。

讀書千日 決戰今天

正所謂養兵千日，
用在一朝。
我就讀書千日，
決戰今天。

讀左兩年幾日文，
今年第一次考能力試。
能力試分四級，
最低係四級，
最高係一級。
我梗係一步一步黎，
考左四級先啦，
更何況呢個係用黎 Claim 返 CEF 既，
更加不容有失。

四級既考試係下午開始，
聽講有唔止一個試場，
我就係半主場九展考。
點解話係半主場呢，
因為我大大話話係度返左成年工，
係試場個位，
演唱會又睇過，
展覽又睇過，
交通亦都睇過。

兩點開始入試場，
我點九就到，
做最後衝刺，
溫多次生字。

開頭以為得自己一個考，
點知都撞到兩個跑定向既女仔。
入到 Hall A 試場，
搵極都搵唔到自己個位，
原來自己係 Hall B 考……

個主考講野好有趣。
「現在仲未開考，
好去定洗手間先喇，
因為一開始左，
你就唔可以離開喇，
除非你選擇放棄考試。」

「現在距開考仲有兩分鐘，
如果你要去洗手間，
我諗你要飛奔去喇。」

「考試完結，辛苦晒大家。」

最後沖刺

因為明天要考試，
所以今日都係以溫書為主。
上午首先去銀行入票出糧，
之後去睇醫生，
係等既時候，
做返一兩年 past paper，
不過成績都唔係好好，
卷一同卷三都只係僅僅及格。
原本打算呢兩份高分 d，
拉返卷二份 Listening，
不過乎現在要靠 Listening 食糊。

似乎唔係一個健康既現象，
不過得返一日，
都冇辦法，
唯有盡一盡人事。

之後去左飲茶，
飲完茶就返屋企操 Listening。
做左兩年，
零四年個份，
做完之後，
三份卷加埋二百四十分，
僅僅及格。

或者講講計分方法，
卷一滿分一百分，
卷二滿分一百分，
卷三滿分二百分。
總分四百分，
六成（即係二百四十分）及格。

雖然零四及格，
但零三做完之後唔及格 ><。
攪到有 D 驚唔及格。
不過諗返自己讀到三級，
欄船都有三斤釘，
會唔會係自己多疑呢？

Anyway，
將 d 生字整埋 MP3，
等明日坐車個時都可以溫下，
就早早上床訓覺了。

禮物

繼續講十二月既事，
十二月要送禮物，
又要頭痛買 d 咩好。
我係個種要想買咩就頭痛既人，
唔係選來選去都唔知買乜，
就係選完人地未必鍾意。

就好似以前細個讀書咁，
聖誕要交換禮物，
我年年都好似買唔到份好禮物咁，
好似拿份 Cheap 禮物，
換份好禮物返去咁。
結果中一開始，
我同班主任講我唔會參與交換禮物環節。

同出左黎做野，
公司又有交換禮物。
為免重蹈覆轍，
我搵舊同學幫我選。

其實賺左，
我開頭話佢幫我買，
我請佢食飯，
不過到最後都唔駛我請，
呵呵。

講返轉頭，
因為佢幫我買既關係，
我認識到原來又一城有間 Logon。（真係大鄉里）
不過之後個兩年，
公司交換禮物，
我都係去 Logon 買，
都係買返同一類，
即係杯連杯蓋……

---

話咁快，
初級普通話上完了。
今日最後一堂，
老師一開始問我地假期有咩做，
新年有咩願望。
我既答案係睡覺同冇願望。
唔係想求求其其答，
不過我真係冇諗過。

完堂前既聽歌寫歌詞，
我終於答對全部了！
（其實係 99% 才對，有一題寫漏了個「的」字）

十二月

話咁快又到左十二月。
十二月既考試有兩個，
要教既班有兩個，
比賽零個。
但係十二月一日最重要既，
有係有得出糧。（如果老闆返黎既話）
上一次出糧只係出十日，
今次係新工第一個 Full 既糧。

期實每既出糧都係一個肯定，
肯定你係做到野既。
因為如果你係做唔到野，
好快就會收唔到糧喇。

今個月仲有一日值得紀念同感恩。
講既唔係聖誕節，
當然聖誕節係一個應該紀念同感恩既日子，
但聖誕節係全人類普天同慶既。
我講呢個特別的日子，
係只係 For 我一個既。

要記住聖誕之前兩日，
即係二十三日。
呢個係一個好重要既日子，
夜晚我要考 First Aid。
不過要紀念既，
唔係考 First Aid，
而係考試之前既三個鐘。

有個好有趣既統計，
每次船長歸航，
我都係要考試既……
而船長出航，
我都係要比賽既……
不過今年少比賽，
所以第二項唔中，
但第一項仍然中。

個日下午我應該會請假，
不過仲諗諗緊去唔去碼頭好。

考試七點正準時開始，
我公司六點半放工，
一定趕唔切，
既然拿假，
倒不如去碼頭一次，
看住艘船舶岸，
了左件心事
然後再去考試。
都未嘗唔係一個好提議。

CPR

First Aid 個度要八成出席率先可以考試，
雖然我好想走多堂黎溫日文，
不過我走堂 Quota 用晒，
結果都要上 First Aid。
今日係教 BB 既 CPR，
同埋練返成人既 CPR。
其實 BB 既同大人既有 D 似，
但又唔係全部相同。

成人既係口對口既人工呼吸。
但 BB 個嘴細，
所以係口對口鼻既人工呼吸。

按壓成人既係用雙手，
按壓 BB 既係用兩隻手指。

成人既比例係十五比二，
即係按壓十五下，
吹氣兩下。
嬰兒既比例係五比一，
即係按壓五下，
吹氣一下。

不過兩者都有相似既地方既，
一開始都係確定現場環境是否安全，
檢查清醒程度，
叫人報警，
暢通氣道，
檢查呼吸，
冇既就送兩下，
檢查脈搏，
之後就開始喇。

---

今日開左個特別會議，
話 D 機成日 Hang，
要找出個問題所在。
攪左成日，
結果係兩部機其中一粒 Chip 唔同……

又過一關

好忙好忙，
點解咁忙？
但又忙得咁開心？

---

今晚返日文，
係公司走個時都已經差不多八點，
入到課室八點半。
老師如常授課，
同學仔如果抄 Notes。
個課室好平靜，
唔通係暴風雨前夕？

上到九點，
老師派卷，
我知死刑到。
一接到份卷，
一睇……

嘩！
不得了，
歷史性新低，
但又夠及格。

剛剛好五十一分，
不過唔知係咪老師有意係短文畀多兩分我先及格。
Anyway，
過左海就神仙，
唔理得咁多。

Break 完繼續上堂。
老師問我幾點起身？
我話九點，
全場嘩然。
老師再問一起身做咩？
我話食早飯，
全場再嘩然。

點解？
點解一起身唔可以食早飯先，
食完先流洗沖涼？
點解一定要去左洗手間先？

Boston 再遇

今日收到一個邀請，
有位舊同學將會過 Boston 讀書，
咁係佢走之前（好似係一月頭），
會開一個 Concert。

本來都好想去，
當係捧場又好，
Relax 下又好。
不過，
佢個 Concert 係下個星期三，
我要上 First Aid。
其實之前幾次，
都係星期三，
唔係上堂，
就要練跑。
始終都去唔到。


話分兩頭，
佢係我第二個中學同學過 Boston 讀書。
佢兩個仲要同個幾年班，
應該都好熟，
梗係互相照應好啦。
以我樂於助人既性格（嘔），
分別聯絡佢地，
話佢知有另外一個都係 Boston 讀書，
跟住就等佢地慢慢溝通溝通。

不過又幾橋，
佢兩個都係一月頭離開香港。
更橋既係，
佢兩個間學校應該係相鄰。

---

今晚走堂去左打籃球（罪過罪過），
因為個舊同事 Book 左場，
但唔夠人。
（不過結果係有成廿個人）

被人大炒，
好唔開心 ><

初戰

今日又有得跑定向，
色級賽既第二場‧
不過因為第一場我幫手攪，
所以呢場先係我第一場跑既色色級。
因為同學界一齊攪，
所以都出得幾晚下。
十一點五十幾分先出發，
呢個時間其實幾麻煩，
一早起左身，
返崇拜又好似唔係幾夠時間，
十點半開始，
詩都未唱完就走。

結果我選擇左去打機，
八點半去到機鋪，
未開晒門，
閘落左大大半。
咁介起門口等啦，
一開閘入去，
咦？咁多人打緊機既？


Anyway，
十一點到離開機鋪，
行去歐化個邊坐 215x。
係車上埋換埋我件青蛙戰衣，
一落車就係公園門口，
一路行入去賽事中心，
都見到有賽員比賽中，
對尾 Point 個 Flow 都有一定預測。

去到賽事中心，
拿了號碼布，
換埋對釘鞋，
就行上起點，
一路都以為會遲到，
點知剛剛好。

今次條 Course 長 5 公里唔夠，
冠軍跑一個鐘，
我用九十分鐘。
以我幾個月冇操既體能，
同埋有傷在身，
結果可以接受。

---

隻腳好痛 ><
話說上個星期踢波，
被人踩左一腳，
成個仆係到，
弄損了膝蓋。
本來都結了召，
不過昨日係屋企撞到書抬，
成塊召起左，
d 血係咁流。
隻腳伸直同屈都痛痛 ><

行大運

時間過得係快，
估唔到咁有一年喇。
聽日就係一周年，
不過唔係一個值得慶祝既日子。

---

今日又要行大運。
晨早就同媽媽拿部 DVD 錄影機去整。
部機上次修理係十一月頭既事，
一個月都唔夠，
又炒。
媽媽就緊係話要見負責人出黎，
大省特省啦。
結果，
佢地話換個新形號畀我地。


之後就落尖沙咀，
拜一拜先父。
所謂拜，
都係係咁易上注香而已。

之後落佐敦睇中醫，
因為我冇帶信用卡既關係，
所以下午先去畀錢。

睇完醫生，
就返屋企拿卡，
再去飲茶。
飲完茶，
行左一陣，
就返屋企先。
（咁頭先專登返屋企拿卡做乜？）

再出去既時候碰到細牛，
佢話去影相 WOR。
畢業真開心。
碌完卡，
又返屋企了。

破紀錄

自從六月去完旅行返黎，
個 BeJeweled 個最高分紀錄被人破左之後，
我就不停咁挑戰。
雖則人地只係用左一個星期時間就破左我舊紀綠，
但係佢係幾乎成日不停咁玩，
我只係得閒玩一兩鋪，
拉返黎計，
差唔多掛。

我現在既分已經突破左三百萬分，
係 3176750 分。
比舊紀錄 2884000 分高左達三十萬。
呵呵呵

---

夜晚上普通話，
終於教到兒化音喇。
呢堂亦都係普通話初班既尾二個堂，
上埋下個星期就完喇。

唔講唔覺，
原來日文同普通話係同一個星期完。
日文就隔一個星期可以上新班，
（如果考試及格的話……）
普通話就好似一月。

落堂之前，
照例係聽歌寫歌詞。
我亦照舊錯一個。
今次衰錯左係「秘密」呢個詞語手上，
我幾時先可以滿分呢？

上完堂，
去左公和堂食晚餐。
本來想叫送食飯，
點知個廚師剛剛走左，
結果要食碟頭飯。
我叫左「神秘豬頸肉飯」，
呢個飯最神秘既地方，
就係我食晒都發覺唔到邊度神秘……

三個 Tasks

今朝返到公司，
開始著手 KO 手頭上既 Tasks。
做到十二點，
攪掂兩個，
拿過去畀兩個同事試。
結果一個過 Test，
一個炒左。

炒既原因係畀佢 d Variable 名騙左，
「bAVI」我以為係一個 Boolean 既 Variable，
裝住係咪錄緊 AVI。
點之原來係裝住係咪可以錄 AVI。
叫「bEnableAVI」咪好 lor。

最攪笑我問個同事，
點知部機現在係相機 Mode 定 Movie Mode，
佢叫我 Check 下 d IO Pin Return，
那個仲要係轉制，
唔係 Check 一條咁少，
係 Check 四條。

要知係咩 Mode，
應該個 Firmware 成日都要 Check，
下下都 Check IO Pin 咪好費時失事？

結果我看一似 d code，
終於畀我找到個 Variable。

上午 Fail 那個 Task，
一定要攪掂先可以做下一個。
而下一個係手頭上最重要那個。
而 Fail 那個，
其實係 Modify Battery Checking。
如果攪佢唔掂，
我唔可以拿部機出機試。
原本想係日頭拿部機試，
即係我要係五點前攪掂佢，
可惜最後都要六點先攪掂。

結果重要那個 Task 要係室內做 Test。
原本以為要做到十一點，
不過九點半就收得工。
其實八點半就執得野走，
不過老闆又問下進度，
傾傾下就九點幾了。

---

艾文，
幾時拿桃公主隻 Game？
我爆埋二周目喇。

忙忙忙

手頭上幾個 Tasks，
有一路做開既，
有同事攪唔掂我幫手跟既，
有同同事夾既。
樣樣都趕，
樣樣都話重要，
做得邊樣先？

真係忙到抽筋呀，
不過做自己喜歡既事，
忙 d 都覺得好玩。
不過 Side Effect 就係唔夠時間溫書。
十二月四日考公開試，
仲有十日左右，
但係要溫接近廿四課書，
仲要做 Past Paper，
即係平均一日要溫四課書。
但係夜晚仲要上 First Aid 同普查話，
嘩！好忙呀，
嘩！好充實呀，
嘩！好爽呀。
（嘩！係咪變態架？）

---

今晚要上 First Aid，
加上要還袍，（今晚係 Dead Line）
所以要趕住走。

Send 過 E-mail report progress 之後，
就趕頭趕命走。
落到天后，
找左好耐先找到間洗衣店，
還完袍，
就拿拿聲走上奧運大樓上堂，
不過都試左成個鐘。

Miss 左既係理論，
之後睇返書都得。
（如果我會睇既話）

之後教包紮，
幾個骨折既包法。

返到屋企，
覆左老闆 C 既 e-mail，
訓上床都已經兩點了。

失信心

好灰呀，
咩自信心都冇晒。
話說今晚考日文，
基本上都冇乜點溫，
係盡量死記答案。
一入到場就考 Listenling 先，
基本上冇一題聽到。
人地話，
Listening 要聽 Keywords 先。
但我聽到既全部唔係 Keywords，
咁既狀態，
下個星期點去考能力試呀？

之後考 Written Test，
受 Listening 影響，
好多野都一時記唔起。
（可能係溫得唔熟）

有題九分既作短文，
我預先作定，
但入到場又一時醒唔起 d 生字點串。
其實篇文好簡單，
講下現家份工，
點解做呢份工。
不過 d 「Firmware」呀、
「Engineer」呀、「Programming」呀我就唔記得點串。
總之份卷就考得勁差啦。

交左卷之後，
聽多次 Listening 對答案。
結果一如所料，
全軍覆沒。

Overall （Listening + Written）有三十分都還得神落。
不過及格係五十分 Wor，
（能力試仲要六十分 Tim）
最衰佢仲改左例，
唔及格唔可以升班，
咁我唔通要留班？
唔制 ><

---

買左 Twins 演唱會飛。
剛剛發現一樣野，
Twins 開演唱會既頻率，
竟然同船長架船回港既頻率一樣！

怒喝

聽日朝公司要開例會，
老闆叫我地要 Well Prepare，
咁就要整理。
今日老闆 A 有個新 Algorithm，
問我聽日開會有野睇未，
結果我就開 Turbo 砌埋佢，
七點前又攪掂，
呵。

---

聽晚要考日文，
所以今晚冇上 First Aid，
返左屋企溫書。
當我食完飯，
準備溫書之際，
工人話要執我間房。
我笑笑口叫佢唔駛執，
佢就唔理繼續執。

睇住佢攪亂晒我書櫃 d 排名，
將我 d 富紀念會值既物品
（如第一次出 Business Trip 拿返黎既外國報紙）
當垃圾咁丟，
我就忍無可忍。

開頭我好聲好氣同佢講唔駛執，
佢理都唔理。
真係唔發火當我病貓，
我大大聲喝佢。
喝到第三次，
佢終於放棄離開我房。

不過就難為我要將間房還原。
咁又浪費左我成個鐘。
結果得返好少時間溫書，
溫左一陣，
覺得好眼訓，
就去訓覺了。

浪費時間

攪一場定向比賽，
事前有好多功夫要做。
單單講 Field，
都有唔少。
首先 Course Setter 要上山視察環境，
然後 Set Courses，
再上山落 Tapes（做記號）。
跟住另一個人（通常係 Controller）上山 Check 有冇錯。
有時驚條 Course Set 太長或太淺，
會找人去試跑。
而試跑呢樣野，
係應該係落 Tapes 同 Check Tapes 之後。


今日我負責去試跑，
原本約我下午上去，
不過想想下，
會唔會天黑都未落到山，
咁就改左十一點半。

其實個朝先 Check Tapes，
其實 Overlap 都唔係大問題，
但為可以 Assume 佢大部份都放對既。

我同阿棟十二點半開始試跑。
去到一號 Point，
d 草密到入唔到，
二號 Point 又係咁。
去到三號 Point，
今次入到喇，
不過唔見條 Tape。
爬返出大路，
收到阿棟電話，
話佢個邊都係咁，
唔係密到入唔到，
就係去到唔見 Tapes。
咁我就話我去多一個睇下，
結果當然都係找唔到。

之後我地會合，
再去多兩個 Points，
都係咁。

打電話畀 Controller，
原來有 D Points 改左，
而且佢現在落緊 Tapes。
（請留意今日應該係 Controller 黎 Check Tapes）

結果就浪費晒我 d 時間，
上山做左 d 有意義既事。

---

看左一個舊同學的日記，
了解多左他同他的她既事。
因為日記其中一件事情，
我倆意見有分歧。
不過基於我倆性格都係咁硬頸既關係，
我們講完各自既輪點就算，
冇想講講服對方。

他倆既故事，
好似曾相識。
一個識電腦既男仔，
一個唔識電腦既女仔。
男仔出身平常，
係香港讀書。
女仔家境較男仔富裕，
係外國讀書。
女仔心臟有 d 毛病……
（同時醒起一個兩年前既承諾，唔知當事人仲記唔記得）

悠閒的一天

唔駛返工既星期六，
可以無牽掛既大訓特訓。
原本打算睇殺破狼早場，
不過訓醒都十二點，
唔駛睇。

下午出左去行，
經過百老匯戲院，
入去望望。
結果都係就唔到時間睇。
不過我覺原來殺破狼係三級片，
唔通因為太暴力？
太血腥？

嗯嗯，
登時唔係咁想睇 tim。

返左屋企一陣，
又同媽媽出去超級市場買野，
買左四包米！
（唔知要食到幾時呢？）
仲有其他野。


返到屋企一陣，
又出去打邊爐。
間野手腳好慢，
落左 Order 半個鐘，
都未有湯底黎。
叫佢拿 d 紙巾畀我地抹手，
就拿到我走都未有。

仲有 d 激氣事，
媽媽唔係食咁多，
但就係咁加落個煲到，
跟住就梗硬逼人地要，
人地食唔切唔要就作人地不對。
有冇攪錯！

仲攪笑就係媽媽話條魚幾乎佢食晒，
攪到佢食唔到其他野。
但係好似係佢自己係咁食魚，
唔落其他野食 lor。

Mission Completed Again

上手攪到頭都大埋既野，
我一個星期左右就差不多 KO 左佢。
雖然唔係 Prefect Version，
但起碼有 Improvement。
接下來既野，
係同另一個同事夾一夾，
將 d Program 砌埋佢。

之後，
就繼續攪呢個唔係完美既 Version，
攪得再好 d。

---

開始準入考試倒數了，
頭關仲有幾日，
尾關仲有兩個星期左右，
係時候收拾心情備戰了。

---

今晚原本要上普通話，
不過因為 First Aid 都改左今日，
結果就棄普通話，
取 First Aid。
因為公司野攪晚左，
我比平時晚走，
換句話說比平時晚到。
上左三個星期堂，
我未試過有一堂可以準時。
冇法啦，
佢七點開始上堂，
我六點半先 Office Hour 完。
走得黎通常都成六點九，
七點半去到已經很好了。

上完堂，
行落灣仔坐船過海，
見到有到身穿黃色 T-恤，
上面寫有麥當當字樣既，
唔知係咩事呢？

「先生你好」

「先生你好」
「先生早晨」
「先生食飯喇」

變左人地口中既「先生」，
有 d 唔係好慣 tim。
昨晚放工一返到屋企，
就有個人走埋黎執住我隻手，
叫聲「先生你好」。
之後左一句「先生」，
右一句「先生」……

---

直情上晒癮，
今晚又去左打三國誌大戰。
幾乎同昨日一樣，
三個 Friend 輪打一部機，

昨日貼左個規矩出黎，
話每人只限打兩鋪。
今日再去，
已經唔見左呢句。

所以同其他機鋪一樣，
檯面一條條五蚊銀。

---

上個星期日個比賽又有鑊爆，
不過到現在我都未知咩事。
負責成績那個打去留言信箱只係叫我覆電話畀佢，
又唔講咩事。

留言信箱唔係咁用架，
「我電話係 XXXX-XXXX，請覆。」
我有來電顯示就已經知啦，
駛鬼你講。

應該留低咩事丫麻，
我覆前又可以做定功課先。

吳軍之始動

俗語說：
「若要人似我，除非兩個我」
呢樣野真，
Even 有好多野相似，
總會有不同處。

我倆性格有 d 接近，
一樣係咁唔輸得；
一樣係咁硬頸；
一樣係有兩個面孔；
一樣……

但亦一樣有南轅北轍既野，
例如偶像；
例如嗜好；
例如際遇；
例如……

不過有時，
要互相補足先成事既。

---

終於開始再浦機鋪既生涯，
今晚開始玩三國誌大戰。
九點玩到十二點半，
洗左一百元。
當然唔係玩足三個鐘，
跟下機，
又睇下人玩咁。

有 d 地方，
有 d 人一坐落去就打幾百蚊先起身。
呢度有個規矩，
就係每人限打兩鋪，
之後要起身再排過隊。
咁做幾好丫，
起碼人人有得玩。

今日玩左四鋪，
上晒癮。
要儲卡，
砌勁 Deck。

聖誕派對

今晚上日文，
走個時 Send 左個 Email 畀老闆 C Report，
點知一下唔醒起 cc 埋老闆 A。
夜晚上完堂十一點返到屋企，
開左部電腦。
就收到老闆 A 追 Status 既 Email。
好彩老闆 C check 廿分鐘後就覆我 Email，
仲 cc 埋畀老闆 A。

---

夜晚收到個 Friend 電話，
話 12 月 24 號晚有個 Party，
問我去唔去。
平安夜我冇節目，
本來都想佢玩下。
問過佢係 Cafe 包場攪，
唔係 Ball、唔係 Bar，
都幾心思思。
不過佢講完個 Selling Point 之後，
我就想打退堂鼓。

開頭問佢有咩人去，
去話 Friends，Friends 既 Friends 咁。
不過最後佢補左句，
已經有十個女仔話去。
咁好明顯醉翁之意不在酒啦，
真係去一班人玩既，
又何需咁 Highlight 呢句呢？

一黎我又冇咁既需要，
二黎佢收三百蚊又好似有 d 貴。
所以我都係想唔去，
留返係屋企好過。

---

街機出左隻新 Game，
本來我都戒左機鋪打機，
要堡既機都唔點玩。

不過佢真係好吸引，
Card Game 黎，
仲要係三國時代做主題（個名叫三國誌大戰），
不過成十五蚊鋪又好似貴左 d。
容乜易燒晒 d 錢？

後遺症

又到星期一，
工作週期之始。
不過昨日體力嚴重透支，
成朝都冇神冇氣。

夜晚上 First-Aid，
遞高集腳畀個 Friend 紮腳踝出血，
紮紮下我腳抽筋 Tim，
痛到我丫……

---

昨日個比賽仲未 Close 得 File，
今日總會打黎話有 D 對講機唔見，
問有冇 d 仲係我度。
我梗係叫佢找返 Organizer 啦，
點知係 Organizer 叫佢打畀我。
嘩！又關我事呀……

---

早兩日個日記有新朋友仔留言，
睇內容就一早知邊個，
不過睇名又估唔到。
都係求證下先。

---

無無聊聊睇人地 d 日記，
係 Solomon 那個發現左個 Rate my life 既 QUIZ。
我又走佢做下，
D 英文好深要查字典。
Result 出黎又好似幾高分咁 Wor。

This Is My Life, Rated
Life:	7.5
Mind:	7.1
Body:	8.6
Spirit:	6.5
Friends/Family:	5
Love:	7.7
Finance:	7.1
Take the Rate My Life Quiz

一鑊泡

今日輪到攪定向比賽，
第二年幫培正手做 Course Setter。
因為培正 Technical 既人唔夠，
結果山上幫手放 Points 既人都係我找既班子。
七點鐘係寶馬山集合，
原本想係天后買早餐，
不過大家樂未開，
麥記都未開，
最後係廿四小時營業既點心王買。

上到去，
按排左放 Points 個四位手足出去之後，
我就可以食早餐同等。
之後就忙忙忙，
不斷遊走於終點、Event Center 同起點幫手。
仲辛苦個跑比賽。
朝七晚六，
工時仲耐過返工。

講返個比賽，
真係激死我。
首先係愈做愈多野，
原本係一場學界比賽，
後來變成兩場學界同一日攪，
之後仲加多場色級比賽 Tim，
三合一既比賽，
出發時間係朝早九點半出到下午兩點。
有人話有冇攪錯，
出到兩點咁晚。
不過排出發時間唔係咁易，
成九百幾人近一千人參加。
當然可以同一時間出多幾個，
不過都要考慮做唔做得切，
今次我開五條 Lines（一條 For Late Start），
起終點都做到亂晒龍。
可想而知如果我開盡八條 Lines會有幾亂。


之後就輪到 d 電腦唔聽話，
開頭話三部電腦，
一部負責一個比賽。
結果呢，
用得既得一部……

再黎就係起點，
舊年話我指示得唔清楚，
個起點起得唔好。
今年我畫埋平面圖，
都可以將個起點放錯地方。
不過唔怪得起點個負責人，
因為佢都係被賽事負責人點左姐。

其實成個比賽都亂，
賽事中心、起點同終點都亂，
因為有經驗既人唔夠，
蛇都死啦。

起點冇數出發人數，
終點又收漏野，
成績處理又一鑊泡。
不過要讚讚負責成績既陸先生，
係冇資源既情況之下都仲維持到正常程序。

最激氣係山上面班工作人員，
七點鐘就係上面做野，
起碼四點半先有機會落山（事實上要再晚 d tim）
佢竟然唔安排 Lunch 畀佢地，

唔覺唔覺到四點幾，
仲有幾個未返，
我即刻換衫打算上去找啦。
佢竟然同我講話唔駛咁急。
冇野呀？
仲唔上去等天黑先上呀？

到五點半，
仲有一個冇消息，
拿拿臨上山。
今晚應該六點左右天黑，
仲要冇咩月光，
其實我們自己都有 d 危險。
好彩出發途中，
其中一個仲留係山既兄弟報告話找到佢，
咁都冇咁驚。

Programming 比賽

一個 Weekend，
兩個比賽。
先黎星期六既 OI 初賽，
再黎星期日既定向比賽。
兩個比賽我都冇得參加，
要做工作人員。

唔參加得 OI，
因為我超晒齡。
OI 係中學生既比賽，
我呢 D 老餅，
當然冇得參加比賽啦。

以往我都可以幫下手出題目，
不過江山代有人才出。
我都開始跟唔上進度了。

讀 Undergrad 時，
都有 ACM 比賽（大學生既 Programming 比賽），
Keep 住有 Training 都還好 d。

入到社會做野之後，
雖然我都仲係寫 Program 為生，
但係工作上既 Programming，
同比賽既 Programming 係兩碼子既事。

比賽常用既甚麼 BFS、DFS、DP 等等，
工作需要用到既次數近乎零。
比賽可能只係幾個鐘寫幾百行 Code，
但工作上既可能係要做成個月，
寫近萬行 Code。

比賽既 Test Input 係 Bounded，
但係工作既 Programe 既 Unlimited 既。

比賽之後，
我們會改卷，
之後一齊去飲茶。
我發覺我同新生代既 Trainers 開始有代溝。
佢地入到 U，
好多時都可以去外國玩地區性既 ACM 比賽，
我那個年代邊有丫。

我記得我畢業之後，
Department 先開始贊助我 d 師弟去地區性既 ACM 比賽。
我在學個三年，
玩香港 Local 既 ACM，
一年第二，
一年第一。（雖則我唔係直接參與）
有成績出先得到贊助。

可惜，
我個系既 ACM Team 開始青黃不接。
聽我師弟（都係 HKOI Trainer）講，
可能下年開始唔再有贊助了。

班新生代係食飯時係咁講 ACM 既野，
我又點插到嘴丫。

---

夜晚去睇「猛龍」，
本來想睇「狙殺狗仔隊」。
不過得旺角有（我個時係尖沙咀）。

睇完套戲，
好似睇緊日本英雄特攝片咁。
五個一隊既 Team。
最慘係 5 vs 5，
再加埋其他人，
主線都成 10 幾 20 人，
攪到我都亂晒，
究竟呢個叫咩名？
係美國國際刑警定韓國國際刑警呢？
那個又叫咩名？
……

做到野架

又一個星期，
接續昨日既工作，
今日繼續攪 Auto Focus。
依據加拿大老闆 C 既 Suggestions 去改個 Program，
不過好似仲衰 d 咁。
我唯有自己 Chase Code 啦，
三個 .C 既 Files，
每個都三千幾行。
一日之內要了解近萬行既 Codes，
然之後睇返邊度飛去邊度，
有咩 Parameters Pass 左入黎、Pass 左出去。
仲要係 Multi-Thread Programming，
真係好難。
但你唔好睇少我，
我強項係 Problem Solving，
包括 Debuging。
我就係攪得掂。
我找得出點解改完之後會仲衰左，
原來係 Update 唔到 Stata Machine。
找得到問題所在，
下一步就係解決佢。
雖則放工都 Solve 唔晒，
但起碼我踢到個 State Machine 識行識走。

雖然都仲有少少問題，
不過都叫有進展。
Send 左個 E-mail 畀老闆 C，
睇下佢有咩 Feed back。
當然，
我唔係單問佢拿料，
我自己都有做到功課。

---

中午約左舊公司舊同事食午飯。
去到第一句就問我穿得咁輕鬆，
舊公司要恤衫西褲，
現在我可以 T-恤運動褲。

佢地仲話我看似開心左，
可能因為呢份工好過舊個份啦，
又或者係蜜月期未過，
又或者係呢份真係興趣。

---

呢個世界真係細，
今日老闆見既那個客，
竟然係我網友。

自食其力

新工雖然可以返晚點，
不過都有個唔好處，
就係遲出門口就新仙難救。
以往坐的士，
十五分鐘就返到去。
今日遲左出門口，
（其實又係出左門口驚冇鎖門而返轉頭）
坐的士，
成半個鐘先返到去。

記得我早兩日講過，
話老闆想改革。
我入職之前，
公司有兩個 Firmware Engineer，
一早收到風其中一個遞左信。

今早收到大衛同學既 Message，
話個個老闆講「改革」都係得個講字。
點之呢頭收完，
個頭就開始地震。
餘下那個 Firmware Engineer 都炒埋。

原本我已經做晒今個 Week 既野，
結果因為咁樣，
我要跟埋佢既野，
擔子又重了。

等到八、九點，
老闆先有時間同我傾待接手既野，
結果做到成十二點先走。
（破左我係舊公司既紀錄 ><）

要接手既野都幾複雜同難，
可以被我問既人又冇乜。
（Assume 答我那個識答）

換句話說，
幾乎要靠自己，
（好似做 FYP 咁）
不過有難度，
我喜歡。

---

有人陪我睇 903 頒獎禮同 Twins 演唱會，
想起都開心 ^_^

過版

昨日對我黎講係一個大日子，
就係我 Master 既 畢業禮。
雖然張證書同 Transcript 一早拿左，
今日都只係一個儀式，
但感覺上就好似去到人生既新一頁。
不過都有遺憾，
有就係有兩個人參加唔到我畢業禮。
一個係好遠好遠忙緊佢既學業，
另一個係去得更遠既爸爸。
將心彼己，
我打算四年後要去美國一次。

講返畢業禮，
中大同科大都幾唔同，
中大係一日過所有系科一齊畢業，
而且係一日行上次畢業禮。
上午係全校一齊既學院畢業，
下午係分四書院既書院畢業。

至於科大，
則分三日下午。
今日係工學院，
明日同後日係其他學院。

飛就每人得兩張，
所以都唔可以請好多人黎。
原本想叫 Edmond 幫我帶媽媽去科大，
不過黎到佢又冇飛入場，
所以都係我自己帶返。
家姐姐父黎到之後都唔夠飛，
結果家姐入場，
姐父走。

被張通告騙左，
又話唔好有 Personal Belongings，
冇地方寄存。
（結果係有既）

結果我好重既手提袋，
（有部單鏡反光數碼相機係入面）
同我同學個背囊，
就畀左我媽同大肚既家姐拿。
知道有寄存，
我一定唔會咁做。

兩個鐘既典禮，
除兩段講話（校長同畢業生代表），
就係每個人走台一次，
恭一個恭，
落返台，
等宣佈正式獲 Degree，
戴四方帽，
下一批。

等待係最辛苦既，
等左個幾鐘先到我上台……


完左之後，
影下相，
就歸家了。