初戰失利

昨晚睇完戲，
返屋企拿手信，
之後去黃大仙。
當我關了鐵閘，
想鎖門時，
找不到鎖匙。
冇帶鎖匙冇乜野既，
最多返黎個時按門鈴。
之但係，
我發現條鎖匙插在木門上，
Well……

滯留左係門口十數分鐘，
終於等到人支援。
之後會合阿力，
去樂富。
一見到艾文，
我就即刻將佢既獨有手信：
超小型扭旦一個送畀佢。
餘下個 d，
去到佢屋企先畀佢啦。
手信只欠 Sunny 個份未畀佢，
找天直接上佢屋企放低先。
阿力同艾文個兩份冇時間性，
其實幾時畀都得，
其至過多三、四個月畀仲好。

反而 Sunny 個份有時間性，
萬一佢畢業我都未畀到佢，
咁就失去了個意義了。

Anyway，
去到 WTS，
就係同 WTS 聯盟對戰。
Jordan 聯盟既 Sunny 因事決席，
由我呢個啦啦隊補上，
結果當然一家輸三家。
如果我鋪鋪都安安份份，
應該有得贏，
我試過連續食五鋪自摸三番。

但係一立心不良做大牌，
就會出沖了。

打左八個鐘，
只係打左三個東……

夠 Bu

每次有人問我幾時見到影如，
一兩日來必見到佢。
今日同佢飲茶，
不過佢始終唔會當面叫我一聲「夠 BU」，
哇哇哇。

媽話佢試過拿我張相給佢睇，
問呢個係邊個，
影如試答「夠 BU」「夠 BU」。

但係我係佢面前指住自己問佢我係邊個，
佢又唔答我。
問佢邊個係「夠 BU」，
佢又識指住我。

Anyway，
飲茶中段落左尖沙咀，
放左支鏡畀個網友，
今後我又少支鏡用了，
><

再返到酒樓，
已經係成個鐘之後既事，
問下午有咩做，
又話去睇戲，
睇咩戲，
去邊度睇都拿唔到主意。

結果我自己一個去睇，
去左睇跟蹤。
成套戲原本都幾好，
不過個結局有 D 唔係咁好。
或者，
其實做完茶餐廳個幕完左佢會好 D，
個故事已經夠完整，
之後個 D 有 D 多餘。

冇最後個 Part 對個故事冇影響，
有左反而留下左不合邏輯既疑問。

題外話，
係電影中心睇戲係唔同 d 既，
我未試過完左場有作近廿個人睇埋字幕先走……

激死晒

仲以為請左個人會輕鬆 d，
結果都係唔得，
一樣要做咁多野。

話說叫靚仔執字粒，
咁個 Menu 就可以轉語言，
點之個靚仔就真係齋執字粒，
冇 download 落機睇。
結果我今晚試既時候，
發覺有幾句太長，
結果又攪左我個幾鐘，
激死我。

跟住仲攪野，
睇那個執左字粒既 File，
理論上，
每個字款都應該只出現一次，
點知，
有 d 我發現出現左三次，
仲要三個唔同大小、
唔同粗幼……

昨晚同班機友去食放題，
班友都係玩得好癲個類，
結果被人叫左十幾次請將音量收細
XDDDDDDDDDDDD

尋日出完篇 Blog，
夜晚就收到電話。
Well 係我想多左，
不過當我媽想既係一百步之遠，
我只不過係五十步姐，
唔係多丫。

但做唔到原來五十步都叫遠，
又或者，
我連十步都唔好想，
行完一步，
先再想下一步，
呢 d 係咪叫做見步行步？

新負擔

估唔到一時戲言，
有人竟然會當真。
話說早排同媽傾開計，
佢話某某 Auntie 賣左佢層樓，
現在搵緊樓云云。
咁我就話不如我地都換樓啦，
反正層樓都咁舊，
都就黎四十年。

今日收到媽電話，
佢話星期六有人黎睇樓。
Well，
工作效率咁快既？

今日上網搵過樓，
地點一定要佐敦區，
又要負擔得起既，
可供選擇的唔多，

如果真係成事的話，
負擔就重 lor。
基本上所有娛樂費要 Cut、
交通工具只可坐巴士、
食飯要頹。

睇過網頁，
買樓賣樓真係好煩，
又要律師，
又要裝修，
又要做按揭，
單單按揭，
都十幾種。
睇到我頭都大埋……

By the way，
總結今日，
收獲豐富。
包括兩通電話、
三封 SMS、
一條 Newsgroup 討論串、
一條討論區討論串。

意粉？飯？

昨日教完班，
落左荃灣食 Tea。
我 Order 既係焗豬扒飯，
我個 Friend Order 既係脆皮腸肉醬意粉。

咁個侍應畀餐具啦，
Order 焗豬扒飯既我，
得到既係一個叉同一個匙；
Order 脆皮腸肉醬意粉既 Friend 。
得到既係一個叉同一把刀。

難道脆皮腸要切，
豬扒唔駛切？

Anyway，
野食黎既時候，
佢都仲要問邊個食飯，
邊個食意粉。

難道，
有刀有叉食飯，
有叉有匙食意粉？

食完 Tea，
去觀塘睇戲王之王。
問左成個星期，
得一個話睇。
好喇，
買晒飛喇，
今日又有兩個話想睇。
我行多轉買多次冇問題，
（雖然新買個兩張要分開坐……）

到出發行去戲院，
又有一個話想睇。
去到售票處，
叫佢排隊買，
佢又話想想先。

我買飛，
二十分鐘來回，
仲可以去超市買咖啡豆。
佢買飛，
二十分鐘都未買到……

睇完套戲，
感覺係好舞台劇 Feel……

幫班

早兩日收到電話，
叫我今朝幫班，
通常呢 d 我都唔會 Say No 既。
咁佢話轉頭 Send information 黎，
點知到尋日都未收到。
打去問佢啦，
佢話未 Send，
一陣 Send。
結果係我今朝出門口都未有……

去到荃灣，
坐巴士上山，
見到港隊 d 人，
原來港隊今日有 Training，
地點仲同我地一樣 Tim。
唔駛問，
Course Leader 事前冇同總會溝通啦。

去到營地，
原來今日得兩個教練，
十個學員。
話九點半集合，
結果十點先齊人。

Anyway，
都要教架啦，
唔知係咪因為今日係假期，
但都要 d 學員一早上山呢，
學習氣氛唔係咁好。

另外，
少教練亦帶黎問題，
就係做唔切野。
兩個教練，
一人帶一組去行，
好彩都叫仲有個幫手，
但都係擺唔切 Points，
結果學員好多時間都係等，
冇野做既。

到真係出發玩 Course，
又有雷暴警告，
要腰斬……

兩個出去收 Points，
結果返黎發現收漏左五個，
要我出去走返轉……

做 Gym 奇聞

今朝一起身，
感到一股久違了的酸痛。
這股酸痛，
既熟識，
又渴望。
酸痛的起因，
係因為昨日做完 Gym，
唔係做過量，
做到受傷個種酸痛，
而係代表肌肉受到刺激個種。

昨日做 Gym，
做左三個部位，
分別係背肌、腹肌和三頭肌。
腹肌量少質少，
冇乜反應係意料中事。
背肌同三頭肌係強力訓練下，
都有酸痛既感覺，
Good！

講開做 Gym，
昨日係熱身區拉筋時，
隔離上緊 Boxing 堂，
單對單教授。

個學員打左十幾拳之後，
開始有少少喘氣。
教練同佢講：
「咁快喘氣？
咁你要練多 d 喇……」

攪笑既地方係，
個教練係喘住氣講既，
Well……

雖則我知道，
教那個唔一定叻個學那個，
就好像奧運短跑冠軍個教練應該跑唔贏個冠軍一樣，
不過當時那個情景，
實在令人發笑。

激死

激死晒喇，
激死晒喇。
呢排成日被人激死，
可想而知有幾慘。

今次激死我既係大同 Alex。
話說上個星期睇完戲，
就約今個星期睇戲兼做 GYM。
開頭話不如約星期日啦，
咁佢話星期日唔得。
Fine，
咁星期六啦咁，
反正我係假日閒人，
時間易就。

點知早兩日，
佢問係咪星期日睇戲做 Gym……

都未激死，
之前問佢睇乜，
佢話除了 F4 之外咩都得。
咁我睇下有咩「其他」睇啦，
佢早兩日就話，
不如睇 F4，
Well……

套戲比想像中好，
但唔算特別好咁。

睇完戲去做 Gym，
門口那個話有續約 Offer，
聽聽佢講乜，
原來又係 Pre-paid 一舊錢畀佢。

我話我對 Pre-paid 冇興趣，
佢都唔醒水介紹月費計劃，
一路係度講分期。
最後我話之佢，
一手搶返張會員證，
行上樓做 Gym。

Alex 事後同我講，
話見到個 Staff 雙眼狠厲地盯著我……

等

今日去個客到開會，
但老闆要先上深圳，
所以約左係灣仔碼頭的士站等。
係公司出發，
上左地鐵，
跟住收到電話，
同事話老闆打左返公司，
話最早都要遲半個鐘。

咁我點算好呢？
結果去左麥記食 Tea。

食完 Tea 行到去會展，
又收到老闆電話，
話剛剛先過關，
叫我找間野坐陣先。
我剛剛先坐完出黎咋 Wor。

結果去左打機。
打完機，
去到冇的士個的士站，
都要等多半個鐘先見到我老闆。

之後再坐車入去。

其實今次開會，
都係我受靶多，
鬼叫我對住個客咁鬼大脾氣咩。

Anyway，
結果個會都係廢話多。
如果唔洗開會，
等我有多 d 時間做，
效果會好好多。

坐車走既時，
老闆話要請個暑期工，
叫我找人。
咁我就打畀阿包，
叫佢 Send CV 畀我。

龜兔賽跑

話說烏龜和兔仔賽跑。
兔仔受外國訓練，
資優質優；
相反，
烏龜只係本地受填鴨式的訓練，
質責自然相差一段距離。

所以一開始比賽，
高下立見，
兔仔一路領先。

比賽去到一段時間，
兔仔事先張揚會加速，
不過未知潛力可以去到邊。
同一時間，
以為已經盡晒力既烏龜，
感覺到自己好像可以再快 d，
不過成日感覺錯誤既烏龜，
對加速一事有所保留。

後來，
烏龜真的可以再跑快 d，
速度大約是比以往快 10%。
滿心歡喜的烏龜，
一路跑一路跑，
但仍未見到兔仔的身影。

原來兔仔已經以 1.2 倍的速度拋離烏龜。
究竟烏龜可否再加速呢？
烏龜有沒有可能越過兔仔呢？
故事還未完待續。

但早幾日烏龜家族集體活動，
烏龜媽媽說：
「兔仔對我說說烏龜弟弟想兔仔回流賽跑……」

兔仔真的有對烏龜媽媽這樣說過嗎？
烏龜弟弟又真的有說過嗎？

人老了，
不記得了…

2007 日本之旅補完 2

果然係冇記性，
關於日本旅行既野，
依然有野漏左冇講。

話說有晚坐 JR 山手線，
可能係近放工時間，
架車好多人，
好迫。

想像下香港的地鐵。
都係迫，
但每個人都仲叫做有佢既空間。
但係同日本比，
簡直係小巫見大巫。

日本既迫，
比歡樂滿東華既廿幾人迫入架私家車更加迫。
歡樂滿東華個種，
係有 D 身處架車外面。
日本既迫，
係全部係晒架車人面。

基本上就係壓縮、壓縮再壓縮。
氣都險些兒呼吸唔到……

By the way，
曾經聽過人話日本人好守規矩，
如何如何。

親身見證完，
原來都係不外如是。

唔係話佢地好唔守規矩，
只係比起香港，
都係差冇幾姐……

一樣有人衝紅燈，
一樣有人排隊打尖，

有一樣日本有，
香港冇既係，
係日本食快餐，
食完會自己將盤、餐具同垃圾清理，
香港就好少人會咁做喇……

Ocean's Thirteen

因為表舅母嫁女，
所以一班親戚係廣州落左黎。
昨晚飲個時冇乜點傾計，
所以約左今朝飲早茶。

影如都有黎，
我仲抱左佢去玩幾次。
第一次係帶佢睇魚魚，
第二次係同佢玩過山車，
即係我抱住佢跑樓梯……

佢玩得好開心，
係咁笑，
我就跑得好疲倦喇……

下午約左 Alex 睇戲，
Ocean's Thirteen。
呢集係第三集，
第一集 Ocean's Eleven 係 2001 年上映，
我覺得好好睇。
片名的 Ocean 正正就是主角的名。

續集 Ocean's Twelve 係 2004 上映，
一樣係鬥智既故事，
不過比起第一集，
似乎有少少不及。

今集第三集，
一樣係鬥智。
不過，
我覺得比第二集仲兒戲……

第一集既時候，
十一個人既角色都好鮮明，
每人有唔同既任務。
但係第二同第三集，
有時我會攪亂左 A 同 B……

單身部落始終抽唔到時間去睇，
下一套去睇既，
應該不出「Fantastic 4 第二集」同「老港正傳」呢兩套。

下個星期，
仲有詹瑞文既「戲王之王」想睇。

表表妹結婚

今日又有得飲，
表舅母嫁女。
一行六人五點鐘係佐敦出發，
途中，
影如成日企起身，
被我地話左幾聲「No」之後，
就開始喊。

剛好今日約左阿包出黎交收，
交收既貨物當中，
有個麵包超人頭公仔，
我一拿出黎，
影如即刻笑返。

去到同表舅母、表妹、表妹夫影完相之後，
姐夫駕車將影如同工人送返屋企先，
咁我同媽冇野做，
就落左新城市行。

去 Starbucks 食左個 Tea，
之後媽去睇衫。
因為酒樓 d 冷氣太凍，
所以買左件衫穿。

當我係 CD 鋪買緊 DVD 時，
就收到電話催入席喇。

點解咁趕呢？
因為簽紙結婚儀式都係酒樓舉行既，
佢地請左個律師黎證婚。

儀式完畢，
上燒豬，
今次既背景音樂係：
「Congratulations, and celebration.........」

去親婚宴，
見到親戚，
都係會問我那一個問題，
答案亦都係：「邊有咁快丫……」

席間有玩新郎新娘遊戲，
雖然我坐正隔離，
我都係唔知佢地係度做乜架，
可能呢 D 又係代溝……

有朝一日，
我遲終都係唔想擺酒。
就算如願，
我想至少都要上廣州一次食親飯……

可唔可以用下個腦？

今日個客上到黎

事件 1

客：「我想由 A 改到 B」

我：「咁即係改返轉頭啦，當初你話由 B 改到 A」

客：「唔係，邊有咁講過？」

事件 2

客：「我想唔用方法 A，用方法 B」

我：「但係用方法 B 會咁咁咁 WOR」

客：「唔係呀，現家都唔會咁既」

我：「因為現家用緊方法 A Lor」

客：「唔係，我想唔用方法 A，用方法 B」

我：「但係用方法 B 會咁咁咁 WOR」

客：「唔係呀，現家都唔會咁既」

我：「因為現家用緊方法 A Lor」

客：「唔係，我想唔用方法 A，用方法 B」

請重覆以上對話十分鐘


事件 3

客：「做起 D 要幾耐？」

我：「一個星期丫」

客：「你上次又話好快既」

我：「如果唔駛做你其他 ABCEFGH 咪快 LOR，咁現家係咪唔做 ABCEFGH，單單做你個 D 丫？」

客：「唔係」

我：「咁就一個星期啦」

客：「你上次真係話好快架 WOR」

我： 「上次係話用方法 A，現在你要用方法 B」

其實，係咪冇帶腦那個係我呢？

Pirates of the Caribbean: At World's End

魔盜王終於播第三集，
理論上應該廿四號去睇，
不過個日有野做，
結果就今晚先去睇。

叫做不過不失啦，
有少少亂黎既感覺。
三集比較，
最喜歡既依然係第一集，
第三集唔算特別好，
但都叫值得入場睇既。
不過接近成三個鐘既片長，
感覺有 d 過長。

最尾個大決戰，
真係得啖笑。
海盜個邊我估最少都十艘船啦，
軍隊個邊都唔止呢個數。

加埋成起碼四五十艘船既戰鬥，
竟然一開波係 1 on 1，
到整個戰鬥完結，
參與戰事既只有三艘，
有一艘既任務只係被人炸……

其他個 d 船係度做咩呢？
贏個邊歡呼，
輸個邊撒退。

Well，
或者佢地其實只係想將傷亡減至最低……

套戲完左之後，
戲院九成人走左，
餘下既（包括我）坐低等到字幕完晒。

因為係字幕完晒之後，
其實仲有一段仔。
當然，
呢段仔其實唔睇損失都唔係好大既。

新相機

成日有人問我做邊行，
我覺得好難答。
難唔係難在答做邊行，
而係難在之後既後續問題。

造相機？
咩牌子？
咩型號？

遇到咁既情況，
通常我都係話我間公司係 Design House，
冇自己品牌，
d 相機賣去外國，
香港買唔到……

不過似乎日後可以就新既答案。

今日網上睇雜誌，
邊本唔講喇，
反正有將內容放上網既，
都唔係好多本。

睇到一度介紹 IT 產品，
一睇個 Heading，
咁熟口面既，
睇埋內文同圖。
果然，
呢部就係我有份整既個部。

第一次係雜誌見到有自己有份開發既產品，
個種感覺，
非筆墨所能形容。

唯一未中不足，
就係呢個產品唔係由我由零開發。
我只係接手將佢改良。

By the way
返左黎幾日，
都未得閒約幾兄弟出黎拿手信 tim。

2007 日本之旅補完及總結

十日既旅程終於完結，
有得食、
有得玩、
有得影相、
有得購物、
有得見面，
基本上一次過滿足晒我所有願望。

美中不足，
係我唔見左個電話。
正確 d 講，
係唔見左我媽個電話。

話說我自己個電話係 2G，
日本用唔到，
結果就借左我媽個電話去。
亦即係話，
我帶左兩個電話去。
點解要帶埋我原本個電話呢？
因為我原本個電話同時係 PDA。

故事發生係第四日遊完大涌谷返箱根湯本，
開 Locker 時，
我發覺唔見個電話。
我記得我之前個晚執行李時，
考慮過唔帶電話去箱根，
所以以為個電話仲係池袋個行李箱入面。
都去完箱根返到池袋，
係個行李箱中找唔到。

問過酒店、JR、小田急、甚至個朝買衫既鋪頭，
都係找唔到……

Anyway，
唔見到唔見左，
媽那個新電話我都畀左錢。

總結今次既行程，
令我愛上去日本旅行。
莫講話今次只係去東京，
富良野、大板、靜岡呢 d 通通未去，
單單東京既景點都未去晒。

好想出年再去，
但係，
出年係韓國又兩年一度既亞洲及太平洋區野外定向錦標賽，
呢個我又想去 wor，
真難決擇。

2007 日本之旅 Day 10 續

昨晚架飛機比原定時間早左半個鐘到，
即係我九點半落機，
就係因為早左到，
結果我就四點幾先睡……

講返機場返屋企先，
我坐巴士，
唔係 Axx 個 d，
而係 Exx 個 d，
因為我個行李箱屬於大個種，
冇可能托佢上上層行李架，
結果放下層行李架。

日本既車既行李架，
係個箱既一半位置有野欄住，
可能係一條桿（要拿行李時將桿推上），
又或者係一條繩。

香港巴士既行李架，
條桿係近輪既高度。
當司機賽車手上身，
架車一片灣，
我個行李箱就會飛出黎，
結果我成日要去執箱……

講返點解咁晚，
因為返到屋企早，
十點幾左右，
所以就拿埋 d 手信同代買品去機鋪找佢地，
早 d 收返 d 錢都好丫，
順道見識下日本高手有幾勁。

話說昨日係香港官方比賽決賽既日子，
係日本請黎幾個高手。

講開比賽，
第一次我一到附加賽，
第二同第三次我都唔得閒去睇。
第二次係某人返左黎，
我同左佢去香港博物館。
今次係去左旅行。

結果睇佢地打機睇到兩點幾先走……

2007 日本之旅 Day 10

終於到了旅程既最後一日，
應該話係最後半日，
因為只有上午有活動，
下午係機場，
坐黃昏機走。

上午去上野，
用左三個 Locker 裝晒我地 d 行裝，
跟住就去行喇。

我就梗係想去機鋪先啦，
但係某人話想去 OIOI。
找左好耐先找到，
不過未開門。
結果都係行下附近。
昨晚睇過旅遊書，
話上野有間賣軍用品既攤檔，
我找到，
發覺 D 野仲好抵，
可惜既係，
我個行李箱已經 Full 晒，
所以被迫唔買……

之後坐火車去機場，
因為我同佢係唔同 Terminal 既關係，
我落車先，
之後去 Check-in。
首先要排隊將 d 寄倉行李過機，
之後再排隊 Check-in，
有兩條隊，
一條係普通隊，
一條係 For 網上 Check-in 左既。
普通隊好長，
但效率好過網上隊好多……

之後見有 d 肚餓，
去食野，
被間有蛋包飯既餐廳吸引左入去，
雖然最後我都係食公司三文治……

回程都係坐國泰，
我最唔滿意既一程。
去日本個時都只係播錯片，
今次仲衰，
有畫冇聲，
結果我只係睇得半套。
聽某人講，
套戲既最精彩部份係前半個鐘。
而我，
係當套戲過左半個鐘後先有得睇、「聽」……

2007 日本之旅 Day 9

旅程既第九日，
倒數最後一日。
朝早去三鷹博物館，
三鷹博物館現場冇飛買，
一係日本某間便利店買，
一係就係香港買定。

香港買飛，
價錢貴一倍左右，
勝在冇限時限刻，
即係個日隨時入場都得。

日本先買飛既話，
雖然就便宜好多，
不過就限住某個 Time Slot 先入得去。

每人張飛都唔同樣，
我個張我睇極都唔知係邊套動畫，
某人話係移動城堡 wor。

入到場有一段動畫睇，
出面冇得睇，
亦都聽講話每日播兩套都唔同。
我地睇個套係關於龍貓，
其實應該話係關於貓巴士，
（定應該話係貓的士？XDDDD）

去到三鷹，
原本話唔知去邊度，
不過因為我要幫機友買野，
結果去多次秋葉原，
行左成個下午，
都係未買齊。
最後係新宿先入齊貨。

個班死仔，
我出發之前問有冇野要買，
又冇人出聲。
到我黎左日本喇，
去完第一次秋葉原，
就狂收到 Message 話要買乜買物……

2007 日本之旅 Day 8

人老左，
記憶真係差左。
寫到第八日，
先發覺第六日有野寫漏左，
好似，
真係好似咋下，
第六日有去過博物館。
應該叫做江戶東京博物館，
個博物館幾大，
好多野睇，
而且有好多模型睇。

Anyway，
旅程既第八日，
亦即係話旅程就黎遠，
又要分開一段長時間喇。

今日去遠 d，
去左橫濱一帶。

第一站係八景島。
八景島海洋樂園有機動遊戲例如跳樓機，
而我地既目標係去阿庫阿水族館（Aqua Museum），
d 魚好得意。
之後去露天大型劇場，
睇海豚、海豹表演。

有人拿佢部 DC 出黎拍片，
不過成日有人走黎走去，
結果佢 D 片好多人頭 XDDDDDDDD

下午去左 Outlets，
我又買左對鞋，
同一 d 手信。

夜晚去左港口未來 21，
去影那架帆船「日本丸」。
本來想去埋紅屋，
不過好似已經好夜，
所以都係附近行商場，
好似橫濱世界商品大廈（World Porters）
食埋野就返去喇。

2007 日本之旅 Day 7

旅程既第七日，
今朝好早起身，
為咩？
咪又係為左食 lor。

今朝一早去築地排隊食壽司，
排排下隊，
聽到 d 好熟悉既聲音，
原來係四人幫……
嗯，
其實係進化左去六人幫。
不論係四人定六人，
一樣係咁嘈。

Anyway，
等左大約半個鐘多 d，
終於到我地喇。
入面有三個師傅，
即整即食，
好好味。
個 Set 好貴，
差唔多三、四千 Yen 一位。
三、四千 Yen 既早餐，
真係第一次食。

食完去左銀座，
又見到 UNIQLO 既店，
又入左去行，
結果有人又大出血。

之後 Book 左去參觀皇宮，
參觀完之後去左六本木，
六本木有個建築展，
又有個瞭望台。
我地係個瞭望台等左好耐。
有太陽時影相，
夜景又影相。

之後去睇建築展，
我唔係呢個 Field，
所以基本上我係完全睇唔明。

2007 日本之旅 Day 6

今日首先去淺草，
睇淺草寺，
係淺草見到有「扭旦」，
當係要扭返個做手信畀 Edmond 啦，
係淺草寺又買左個手信畀細牛，
今次買既第二個，
第一個好似係原宿買。

之後去食天婦羅。
其實今次旅行主要係食，
所有去既地方都係為左食，
景點只係兩餐之間消磨時間用。

Anyway，
食完就去台場個邊，
先去汽車展館。
係邊個牌子既車呢？
邊記得 Wor。
當中有個考反應既遊戲，
比試結果，
當然係我贏啦。
不過都係唔及格，
做唔到 F-1 賽車手。

跟住參觀電視台，
夜晚食炸豬扒飯。

先後去 Sega 個唔知咩 Center 玩。
第一個玩既個 4D 影院，
Well，好悶好無聊。

之後玩兩個遊戲，
話就話兩個一齊玩，
結果都係得一個人控制先掂。

玩完第四個遊戲，
有人要休息，
結果我自己玩第五個遊戲。

第五個遊戲係田勁，
有一百米賽跑、百一米欄同跳遠。
男同女比賽係有讓分既，
即係可能女仔唔駛跑咁快，
遊戲既角色都可以好快。

結果一百米跑第二；
百一米欄第一，
總分反超前；
跳遠包尾。
結果總分排第二。

玩完，
休息一陣（好長既一陣），
就走喇。
唔係因為打烊，
係因為身子頂唔住。
如果得，
我仲有好多 Game 想玩架……

某人話：「唔知係咪老呢，玩到想嘔」

我話：「係年紀太大，我係玩到嘔左出黎……」

真失威……

2007 日本之旅 Day 5

今朝起身，
又去浸左一次溫泉，
之後就 Check-out 走。

今日行程係先去玻璃之森，
睇展覽。
唔知點解，
好多叫乜乜之森既展覽館，
昨日有雕刻之森，
今日有玻璃之森，
幾日後有三鷹之森。

睇完玻璃，
High Tea 完，
將行李放係玻璃之森既 Locker，
就行去小王子博物館。

之後返玻璃之森等巴士。
等左個幾鐘先有車，
但最大問題係，
我地上錯車，
去左唔知邊度。
好彩「唔知邊度」係我地去御典場架巴士既總站，
之後睇返時間表，
原來如果我地早 d 「上錯車」，
就唔駛等咁耐。
（唔係架架巴士都經玻璃之森既）

去到御典場 Outlet，
當然瘋狂購物啦，
買畀自己既，
買畀影如既，
買畀阿包既。

之後坐返巴士走。
返到酒店都好晚，
放低野就出去食晚餐。
日本其實都幾細，
係食野既地方，
我地見到一對係御典場巴士站見過既香港人。

Anyway，
食完野，
某人去網巴做功課，
我就去機鋪打機。
打到機鋪打烊，
某人都未黎，
結果係酒店大堂邊上網邊等……

2007 日本之旅 Day 4

今日係第四日，
住宿酒店由池袋轉至箱根，
即係溫泉酒店。

話說之前做資料搜集既時候，
係某討論區見到有人又係個日去，
好似係一行四人 tim。
點解咁留意呢，
因為那個人既 nickname，
令我誤會左係第二個，
Anyway，
坐小田急去箱根，
仲要係車頭位，
可以睇沿途風景。

去到箱根，
找個 Locker 放低行李，
然之後坐登山纜車上山。
架車好得意架，
香港坐既登山纜車，
係一個方向咁行。
呢架車，
係 Z 字形咁行，
即係架車有時行前，
有時行後，
好得意架。

之後轉吊車去大桶谷，
風景好靚。
山上天氣勁凍，
又唔夠衫穿，
結果係咁食熱野。

買完手信之後，
坐巴士去碼頭，
今次坐船。
d 風景又係超靚，
美中不足係睇唔到富士山。

落左海盜船，
坐高速巴士返箱根，
巴士司機手車真係好得。

返到箱根，
係 Locker 拿返 d 行李出黎，
再轉小 Van 去酒店。

今次 Book 既係日式房，
間房超大，
夠四個人住。
而且因為冇床，
所以地方顯得更大。
其實日式裝修都想得過架，
如果「朝床晚拆」唔厭麻煩的話。

換過浴衣和穿上外掛，
就去食豐富的晚餐。
少少題外話，
我竟然唔識繫腰帶……

前往食堂既時候，
見到四人幫 Check-in，
食完飯就去浸溫泉喇，
浸左大約半個鐘左右，
每個泉都試下咁，
就換衫出黎喇。

係大堂等人既事候，
見到四人幫出現，
好似小朋友咁鬥氣，
好攪笑。

等左大半個鐘，
都唔見人，
咁我就返房先。
一返到去，
就見到佢坐係房門口，
Well……

2007 日本之旅 Day 3

進入旅程的第三日，
今日既行程比較複雜，
因為係分道揚鑣既。

朝早去新宿，
因為明日去箱根，
所以某人就去小田急車站拿車票，
而我就去左 Sportland 呢間機鋪睇比賽。
呢段時間，
剛好係日本三國志大戰 2.1 全國大會店鋪預選期。
我就抽左今日去睇。

不過出師不利，
原來新宿既 Sportland 有兩間，
一間係本館，
另一間係中央口店。

比賽係本館攪，
但我就去左中央口店。
冇計，
個招牌實在太大，
我一出新宿車站就望到。
好彩憑我有限既日文，
都問到本館係邊。

如果同香港攪既比賽比較，
覺得香港有效率 d。
日本既係 32 人單淘汰，
香港既係 16 人隻淘汰。
計埋報到同抽籤，
香港既三小時內一定攪得完；
相反係日本，
我企左個半鐘，
都只係睇左三場對戰……

同香港既做法好唔同，
佢地係每間機鋪各自報名既，
而且報名係收埋後備，
即係 32 個正選，
然後 xx 個後備咁。

首先報到，
佢順次序叫名確定佢有到。
如果正選唔齊人，
就開始叫後備既人。

唔會話特登攪現場報名，
但我就見有人埋去問係咪仲有位。

之後第二輪叫名，
就係交錢、抽籤、同派紀念品。
香港既做法係，
報名時已收錢，
比賽完晒先派獎品。

另外抽籤有地方值得我地學習。
每個參賽者抽完之後，
工作人員 A 將 Number 寫落該參賽者的報名表上，
然後遞給工作人員 B。
工作人員 B 就可以慢慢將名炒上對戰表上。

同正式比賽，
香港係一號機對三號機，二號機對四號機；
日本則是一號機對二號機，三號對四號機。

香港係由大會安排邊個坐邊部機；
日本則係猜包剪搥決定。

香港既旁述，
係望住參賽者既 Screen 黎講，
所以有時會誤將參賽者既情報話畀對手知，
例如冇晒士氣喇，
伏兵撞伏兵（但其實係另一隻開伏）；
日本既旁述，
係望住大電視講既，
可能會好 d。

因為約左人既關係，
所以睇左三場就走，
約左人係 Tokyu Hands 等，
冇約實係邊層等，
只係叫佢繼續行，
我會找到去。

到我去到，
係八層既商場行左三轉都找唔到。
最後發覺，
原來佢係商場二樓既天橋出口等我，
而我係地下入口進入商場，
所以撞唔到。

因為咁樣浪費左個幾兩個鐘，
所以唔夠時間去自由之丘……

2007 日本之旅 Day 2

正式旅行既第一日。
我倆比較怪，
當大家旅行既時候都睡夠先去玩，
我地會五、六點就會起身出發……

今日第一個目的地係川越，
去到川越，
一路行一路覺得唔多妥，
香港出名節奏快架啦，
點解我地好似係行得最慢個兩個？

去到川越，
同行既人收獲最豐富，
買左大大量零食……

回程時，
當然順道到川越機鋪打兩鋪機啦。

下午既目的地係秋葉原，
找個 Locker 放底行裝，
之後就去左 Mos Burger 食 Lunch。
之後就行行行。
去左三間機鋪入貨，
買左兩本攻略書同大量 IC 卡。

夜晚去左月島，
食一文字燒，
好好食。
小鐵杓一啖一啖挖來吃。

點飲品既時候，
唔駛日文又唔飲酒既我（片假名好麻煩 ><），
錯點左杯雞尾酒飲，
結果表演左一幕極速面紅耳熱，
同行既人，
仲以為我飲醉了呢。

返到池袋，
有人去左 Internet Cafe 做功課，
我就留係酒店打機。
最後，
都係唔放心，
落左大堂等。

2007 日本之旅 Day 1

好耐冇寫日記了，
因為一來早排忙，
二來有一段時間唔係香港，
所以都冇乜點寫日記（懶就懶啦！）

我話唔係香港，
其實去左邊呢？
就係去左日本玩左十日。

我份人通常都預剽 d 時間好趕，
今朝坐早機，
媽媽同我講，
坐七點鐘架巴士去啦。
結果，
我七點先係屋企出門口，
去到巴士站，
目送巴士離開。

終於七點半上左巴士，
當我滿以為會遲既時候，
Well，
一切都好完美。

架巴士半個鐘都唔駛就到達機場，
去到櫃位，
發現國泰有個專 For Online Check-in 既 Counter，
隊都唔駛排就攪掂，
順利地上到飛機。
打開報娛樂版一睇，
張相咁熟口面既，
睇埋內文，
某某電視劇日前去某中學舉行宣傳活動，
Well……

飛機起飛喇，
我戴定 Headphone 較定台。
數十分鐘後，
點解人地有野睇，
我冇呢？

一睇個控制器，
原來我較左去 Audio Channel……
轉返 Video 後，
點解又唔係我想睇那個台既？

機上傳來廣播，
因為 System Error，
播放既電影同書上刊登既不同。
我想睇 Blood Diamond 呀……

反正都冇左頭半個鐘，
求其選左套港產片睇。
完左之後逐個台試下，
讓我係第二個台發現 Blood Diamond，
Well……

落機過關，
開行李被人 Check，
然後坐接駁巴士個 Terminal 1，
接埋某某。
（基於安全理由，此君身份需保持神秘，雖然大家都知係邊個）

之後買埋車飛出池袋。
去到月台，
我望完地下，
1, 2, 3 .....
係呢卡喇，
搵自己個位坐低。

架車開，
第一個站係 Terminal 2。
此時，
有人問我拿車票睇，
佢話我坐左佢個位，
我抬頭望一望電子顯示版，
點解呢卡係第四卡，
唔係第八卡架？

由第四卡行到第六卡都暢通，
第六卡同第七卡之間有道門鎖左。
結果我地企左大半程，
當我地以為要企到去東京既時候，
車長查飛時發現我們，
帶我地返去我個個卡。

歷盡千辛萬苦，
終於去到酒店。
間房比想像中細，
不過細又有咩所謂呢？
夠擺行李就得啦，
都係每晚係間房睡幾個小時。

夜晚去左食餃子，
試左好多間，
好食好多好飽。

個度有 d 印仔讓人印黎紀念。
見到有幾個香港人，
好似驚印唔切咁，
九秒九既速度走黎走去，
Well……

夜晚最後一個節目，
就係去機鋪喇，
Wakaka……

豬

今朝一早返到公司，
就收到三個電話。
三個電話都係來自同一個人，
我既老闆 B。
話說佢今朝上左廠，
想我 Send 最新版本既 Firmware 畀佢，
但係廠個 Firewall 太強大了，
將所有 .exe 尾既都 Block 晒，
Even 你 zip 左比佢，
佢個 Firewall 都 Check 到。
結果要找 Send 去第二 d Free Mail 到，
佢再 Download。

正確 d 講，
係 Send 去大陸 Engineer 既 Free Mail Account，
我老闆再 Download。

好似講左咁耐，
都未講個三個電話做乜。
個三個電話，
係我老闆打黎，
問我個 E-mail Address 係乜，
然之後佢將個 Free Mail Address send 去我 E-mail 到。

至於點解佢係電話問我 E-mail Address，
再將 Adress send 去我 E-mail 到；
而唔係直接係電話話我知個 E-mail Address 係乜，
就真係冇人知喇。

仲有一個耐人尋味既問題，
話說現家每人都有佢既直線電話。
我老闆今日個三個電話，
全部都唔係打去我直線電話，
有兩個係打去我同事再駁畀我，
有一個係打去我手提。
點解唔打去我直線，
又係冇人解得通既一個千古謎團。

話佢唔知電話號碼咩，
又唔係 Wor，
佢識得將自己個手提飛線落佢自己個直線架 Wor……

睇教班

昨日去左教班，
或者正確 d 講，
係去左睇教班。
呢兩個星期都有班，
今日係 Level 1，
下個星期係 Level 2。
同一班學員，
但唔同人教。
今日負責教既係一班實習既 Pre-Level 1 教練，
下個星期就由我地呢批 Level 1 教練接手。
所以今日去，
主要係睇下佢地有冇 d 乜野教漏左既，
提一提場咁。

算係幾輕鬆既工作，
因為我跟既那個實習教練，
同我同期出道，
經驗豐富，
只是略嫌講得深左少少。

Anyway，
輕輕鬆鬆就一個下午，
落左山，
去大快活食左個 Tea，
之後去一去荃灣然後返屋企。

講開食野，
最近病緊，
不過我一於少理，
煎炸熱氣冷飲照食照飲。
（真係唔健康……）
不過，
中午既時候，
我想食巴辣雞腿包，
因為要等，
結果我食左照燒雞扒包；
下午茶時，
我想食炸雞批，
但係賣晒，
結果我食左油雞批。

理髮

今日媽媽放假，
同左佢去飲茶，
同行既當然有影月同佢媽啦。
不過佢媽冇咁快得，
咁我就去左銀行入票先，
順手兌多十萬 Yen。
不過唔記得上總會拿埋 APOC 張津貼支票，
殘念……

離開銀行時，
收到電話，
電話既另一邊，
傳來一把好細聲好細聲既女聲，
內容係話影如剛剛訓著左，
所以要遲 D 先出到黎。
（咁應該估到係邊個打黎，同埋點解咁細聲啦？）

見仲有時間，
結果去左理髮。
上次去個間搬左，
其實都好近，
再去。

其實我好怕去剪頭髮，
因為一坐低，
就會有人埋黎問我：
「想點剪？」

我通常都唔識答，
試過有一次係大埔，
我話：「你話事啦…」
結果對方呆左一陣。

今次我都係求其講，
通常都係話短啦。
洗完頭返出黎，
個髮型師拿住本書就過黎，
指住其中一個髮型問我剪成咁好唔好。
Good！
咁先係服務家嘛。

成個理髮基本上我都好滿意，
隨了唔知點解剪剪下髮既時候，
我發覺有隻昆蟲係我身上面經過之外……

A 字膊

昨日除了運吉之外，
亦都認識到推卸責任既真義。
話說個 Project 都 Delay 左幾耐下，
咁第一個想卸膊既，
係對面公司既 Project Manager。
昨日問我：
「你覺得個 Project Delay，係你責任大 d 定我公司某某大 d？」

我當然耍耍太極先啦。
「兩方面都有影響既。」

「唔係 Wor，阿某某畀晒野你，我一路都以為係你做得慢咋 Wor。」

「梗係唔係啦，d 野 Keep 住係咁改，我早兩日先收到又要改 d 乜。」

「唔係定晒既咩？點解改我唔知架？」

邏輯題，
若佢唔知有改野，
全部係我問題，
點解佢第一個問題，
會問佢公司某某有責任呢？

最攪笑既係，
佢死心不熄責任不全在我，
十數分鐘後，
佢又問返第一個問題：
「你覺得個 Project Delay，係你責任大 d 定我公司某某大 d？」
當然得到既答案都係一樣既。

都未算，
開完會臨走時，
佢轉一轉再問：
「你覺得現家 Hardware 問題大 d，定 Software 問題大 d？」
（註：佢個邊某某負責 Design，即係佢已經關晒後門）

問左三個人，
包括我同埋佢公司另外兩個。
得到既答案大約相近，
都係兩邊都有問題，
但係 Software 大致 Under Control，
但 Hardware 方面比較擔心。

都問第四個人，
我老闆 B（即係今次負責 Hardware 那個），
佢斬釘截鐵咁答：
「Software……」
我差 d 笑出黎，
當個 Hardware 做到要求個 Software 幫手 Debug，
講緊既係找 Hardware 既 Bug，
當個 Software 因為要等 Hardware Ready 而 Delay，
原來問題既根源係 Software……

祖國一日遊

今朝六點幾就要起身，
九點幾就要上到羅湖。
之後坐成個鐘車去大陸間廠到開會。

勁白痴，
關了屋企大門之後，
打算打鎖匙出黎鎖門啦，
點知唔記得帶鎖匙。
即刻打畀媽，
佢呢個時候先剛在赤臘角上巴士，
起碼成個鐘先返到。
我又趕住返大陸既情形下，
遠水不能救近火……
咩都唔理喇，
大不了咪今晚係街等天光。

今日上到去，
開左成日會，
不過我需要參與既，
一個鐘都唔夠。
都唔知要我上去既原因。

Anyway，
結果七點幾先走得。
又坐成個鐘車返羅湖，
之後火車、巴士，
差唔多九點半先返到佐敦。

媽將條鎖匙掛左係大門入面，
用條繩吊，
（咁都得，真大膽）
好不容易找到條鎖匙開門，
（媽話掛左係最左，其實係中間……）

食完飯，
係梳化就訓著左了。
準時十二點醒左，
開左電腦上左一陣網，
之後再訓過，
一訓就訓到第二朝八點幾。

有口難言…

今晚約左 SOC 班食飯，
其實係有個歡送會，
我定向既恩師曾 Sir 不久就要過澳洲喇。
出席歡送會既，
大約有成二、三十人，
佔左間 Cafe 既一個大角落。
等齊人之後，
首先係食野，
Cafe 整左幾盤野食咁。

據稱，
Cafe 已經係預多左食物畀我地。
不過，
Well，
食完之後，
我絕對相信我仲可以食多兩餐。

之後玩有口難言。
細細個玩既有口難言，
係連講野都唔畀，
只可以做動作。
今次玩既有口難言，
係畀講野既，
但係就有 d Keywords 唔畀講。
例如估「青蛙」，
唔畀講「田雞」、「蛤蜊」等。

分左兩隊玩，
我個隊有孖寶係度，
贏對面成條街。
點勁法呢？
一接到張卡開始計時，
孖寶一號一望到張卡，
「嘩、嘩、嘩」咁係度叫左好耐，
跟住先畀貼示。
冇幾耐，
孖寶二號就即刻估到喇。
前後用左唔夠三十秒，
我都未 Get 到孖寶一號畀緊咩提示……

如果話佢兩個有「野」，
真係都有人信，
不過佢兩個都係男性………

日本人

昨日有人問我成日唔見影如，
影如會唔會唔認得個舅父。
今日就即刻見到影如喇，
仲同佢飲茶 Tim。
不過佢真係唔係好認得我 ><
個小妹妹愈黎愈重喇，
抱佢一陣已經好疲倦。

飲完茶，
落左紅磡，
因為今日初賽係紅磡舉行。
今日既初賽好特別，
因為有個日本人參加。

話說有個日本高手黎香港旅行，
呢幾日都有打 Online，
我星期三仲專程去紅磡拜會佢真人 Tim。
不過可惜既係我冇機會同佢對戰過，
殘念……

咁有人邀請佢今日參賽，
雖然規則寫參賽員者需持香港身份證，
但係其他十五個參賽者冇反對既情況下，
大會都讓佢參賽。

比賽結果，
日本高手未能取得冠軍，
於四強止步。

賽後，
我地大伙去了佐敦睇波，
由紅磡去佐敦，
可以坐巴士，
可以坐小巴。
有人話帶我地坐小巴，
但帶左我地去出旺角那個小巴站，
結果我地都係坐的士……

不過其實，
坐的士同坐小巴都係差唔多價錢姐。

儲

麥記又出左新野，
或者咁講，
係重新 Promo d 野，
就係麥樂雞既醬。
今次推廣既係亞洲風味醬，
有四款：
馬來沙嗲醬、
新加坡蜜糖芥末醬、
中式咕嚕醬，
和日式咖喱醬。

基於那個原因，
好自然，
我又半被迫半自願咁做左試味專員。
今次個 Task 比以往更加難。
以往我只係試完味，
然後 Report 好食、好好食定好鬼好食，
今次我仲要留 Sample。

之但係，
點樣留 Sample 呢？
每次得個一盒醬，
我冇理由食完，
然後用保鮮盒裝住剩下既醬架？

但係如果成盒醬原封不動咁留，
咁我點食 d 雞呢？

終於讓我發現左樣野，
原來現家麥樂雞餐，
係有 6 件裝餐，
同埋 9 件裝餐，
而 9 件裝餐係可以有兩盒醬。

亦即係話，
只要我食四次 9 件裝餐，
每次就只用其中一盒醬，
咁就可以儲齊四款醬。
不過兩個星期食四次麥樂雞，
真係有 d 熱氣。
仲要確保冇過期，
都有 d 難道。

「好人」

今日又有被拋棄既感覺，
好唔開心。
又或者，
我唔應該做所謂既「好人」……

講事講返係今日黃昏開始，
今晚有比賽，
地點係長沙灣，
我依然去做 Helper。
雖然叫做夜晚七點幾開始，
但對大部份工作人員黎講，
都係未食野既。

參賽者問題不大，
因為佢地可以趁未到佢地比賽既時間，
出去食完野返黎再打。
但對工作人員黎講，
因為 Keep 住有賽事，
唔行得開，
結果要等到十一點幾，
整個初賽完左先可以去食野。

好喇，
到比賽完左，
大伙去食飯之際，
發覺漏左幾個人。
咁有個所謂「好人」就話返去等埋佢地，
叫其他人拿位先。
「好人」問佢地去邊度食，
佢地話過對面，
好近而已。

到要等既人等到喇，
但十個人有九個話要趕尾班小巴返觀塘。
結果得返「好人」同另一個人，
但找極都找唔到「好近」個間野係邊。
打畀佢地，
原來佢地去左「旺角」食野。
咁因為餘下的一個人住附近，
所以唔去。
咁「好人」等左成半個鐘，
等咁耐，
為乜呢？

踢波

昨日打完比賽食完飯，
大隊去左石硤尾踢波。
開頭打中前場
後來打返後衛，
結果發生慘劇：


其實我唔想架，
我收左步架喇……

Anyway，
今次都係遊玩性質，
唔係 d 咩認真比賽，
所以都係嘻嘻哈哈笑一親。

都有幾多經典笑料。

例如 Matrix 射球，
請回想 Matrix 呢套片，
左右手平舉，
金雞獨立那個踢人動作，
套返落射波 wor。

另外有，
扭全場，
過埋龍，
跟住不屑入你，
掃把腳踢出界。
（事係臨尾個腳踢出界）

射完波，
即刻擰轉身走，
好似知道一定入咁。

仲有入場一分鐘唔夠，
即係唔夠氣要出場休息等等。

總之就係笑死冇命賠啦，
XDDDDDDDDDD

出戰

終於到自己比賽，
不過成績就……

今朝係觀塘金莎，
我都係做史記。
下午移師去觀塘廣場，
我今次大賽既第一次出場，
（是次大賽每人可出賽三次）

比賽之前，
想左好耐應該用邊副 Deck，
結果都係用順手那副。

抽籤唔算太好，
第一場對鑽石山高手，
結果好好彩地用左一分鐘唔夠就贏左，
呢場亦係我全日最滿意既一場。

之後狀態大插水。
第二場對熟人，
輸大意，
跌左落負方。
（是次比賽的初賽打雙淘汰賽）

第三場又係對熟人，
因為相剋既關係，
理論上冇得贏，
結果對面 Friend 底，
係最後一秒讓我反勝。

第四場對返觀塘高手，
開局領先，
結果愈打愈差，
被佢返勝。

最後排名係第 7-8 位，
算係有個交待，
好過上次小型賽連輸兩局出局。
不過對自己既表現，
好唔滿意……

日本上網

今日某人問我酒店那兒有冇電腦用，
我一路都以為有，
我上網一 Search，
原來真係冇。

我想我係記錯東橫 Inn，
因前一直都係打算訂呢間，
不過後黎改左訂第二間，
又冇再 Check 返呢 d 資料……

Anyway，
房內有 Wireless，
但係就冇 Public Computer。
酒店網頁話，
如果要上網，
可以去附近 Internet Cafe。
其實都有幾個解決辦法既，
一就係用我部 PDA Wireless 上網，
不過咁樣做其實都幾慢，
蝸牛咁既速度，
睇下氣接唔接受到啦。

方法二，
就係事主帶部 Notebook 去，
但事主話重，
唔想拿。

方法三，
就係我惜/買部 Notebook，
拿過去用。
不過同方法二一樣，
事主話重，
唔想我拿。

咁可能最後既解決方法就如酒店網頁所說，
去酒店附近的 Internet Cafe。

收費方面，
上網 Check 過，
大約 $20-$30 一個鐘，
唔算太費。

史官

之前講過話有個街機比賽，
今日就係第一同第二場初賽。
十一點係油麻地有第一場初賽，
四點係尖沙咀有第二場初賽。

話說早前日本有個邀請賽，
其中有一個參賽者第一場都未打就被人取消資格，
原因就係因為佢唔知醒。

昨日已經千叮萬囑班機友唔好遲到，
結果都係有個唔知醒，
打十幾個電話都嘈唔駛佢，
結果當然受盡責罵啦。

Anyway，
今場比賽我既角色唔係一個參賽者，
而係一個工作人員。
簡單 d 講，
其實係史官。
即係筆錄每一場比賽發生個咩事，
點解贏那個會贏，
輸那個會輸，
然後打返份 Report 畀大會。

其實，
由旁觀者既角度睇，
得著會更多。
或者，
呢 d 就係所謂既旁觀者清。

下午個比賽好攪笑，
發現到香港人真係乜都賭得一餐，
可以賭到爆幾多次計。
每爆一次就歡呼一次，
Well……

不過做史官都幾慘，
每場初賽成三十幾個對戰，
因為兩場兩場咁進行，
所以記錄左成十七、八個對戰，
之後仲要打埋字。

假設你一個對戰打百五字，
一次賽都成二千幾字，
分分鐘係我一個星期日記既總字數……

電話@日本

人係日本，
但有 Keep 住可以被聯繫到，
有幾個方法，
較方便既，
係用 Mobile，
用 Mobile 都有幾個方法。

http://www.smartone-vodafone.com/jsp/mobile/going_abroad/roaming/tchinese/jproaming.jsp
一係用網絡公司既漫遊。
不過日本既制式比較特別，
要 3G 先得。
因為我係 2G Plan，
要柤機租卡。
租機費每星期 HK$150，
手續費每次 HK$200。
唔計通話費，
已經要 HK$500。

http://www.japanphone-rental.com
呢間專租機，
有兩個 Plan。
如果用返香港電話號碼既飛線服務，
租機費大約要 HK$475，
如果用日本電話號碼，
租機費大約要 HK$505。
通話費 $6 蚊一分鐘。

http://www.softbank-rental.jp/inbound
呢個有得只租 SIM 卡，
105 YEN 一日，
或者租埋機，
咁就 250 YEN 一日。
以七算計，
即係總共 HK$73.5 或 HK$175。
算係最抵既一個選擇，
假如我唔駛致電返香港的話……
因為打返香港，
要成差不多 18 蚊一分鐘。
接電話免費，
但係因為飛線，
所以要計埋 IDD 個 Cost，

好似要 $3 一分鐘，
都係平過方法 A 同 B。

打埋呢鋪

今日原本打算落紅磡睇交流賽，
不過離開公司個時都成七點幾八點，
結果去搵觀塘班機友食飯，
食完都好夜，
所以冇去紅磡。

點解食到咁夜？
咪一個字：「等」 Lor。
話說有個人應該係屋企食左飯先出黎，
咁當大伙兒話去食飯既時候，
佢又話去。
但係當時佢仲打緊機，
話打埋呢鋪先。

有 d 話去拿位先，
咁冇理由全部行晒架麻，
咁我就留低等佢。
不過見佢輸左又唔忿氣，
又入錢再打過，
我就知道，
我中伏了……

結果食完咁夜，
留返係觀塘練兵算數。
近排狀態麻麻，
今日打左成廿鋪，
好似只係贏四五鋪，
咁既狀態，
點去打比賽呀？

Anyway，
比賽就報左，
五月一日下午係觀塘打，
希望到時可以 Tune 返好個人既狀態，
打返場好既比賽。

比賽我唔介意輸，
唔好打得難睇，
輸得難睇，
咁我就心滿意足了……

最期之榮光

早兩日某網頁突然宣佈話攪官方比賽，
雖然風吹左好幾個星期，
不過到佢真係宣佈那一刻，
頓時感到晴天霹靂。
初時甚至連初賽都唔想參加，
因為佢決賽日係 3/6，
沒估計錯誤的話，
打附加賽時，
我應該係上野 Shopping 緊，
打決賽時，
我應該係飛機上。
落機個刻，
應該冠軍出來了……

講開撞期，
大同個邊又話五月尾去幾日旅行，
即係五月二十四出發，五月二十七返黎。
又係撞期撞到七彩。

不過我咁想，
唔係冇機會畀過我旅行改期。
當初曾經都係二選一，
一係改遲一日，
一係改遲一個月。
結果我選左改遲一日，
我尊重我之前既選擇。
只係打比賽灰 d 姐，
贏左初賽都唔打得決賽。

講返個比賽，
有二十幾場初賽，
每場有限人數，
咁今日就係中央報名，
排隊交 Form，
再依選擇安排你打返場。

未交 Form 時，
覺得佢地好 Pro，
擺晒 Notebook，
開晒 EXCEL 咁。
不過到最後，
部 Notebook 原來係用黎擺既，
結果都係用人手……

竟然唔駛 OT？

今日收到電話：
「係邊呀？」
「打緊機……」
「唔駛 OT 咩？」
係 Wor，點解唔駛 OT 呢？

畀個客激死，
話說今朝打電話黎，
話部機有「新」問題，
叫我 Check Check 云云。
十二點再打黎，
話因為落緊 Line，
所以四點半前要有 Action Plan……

開頭話 10% 機有事，
問多兩問，
有事個 10% 機試多一百次都唔再有事……
亦即係話，
冇事個 90% 機可能只係咁好彩冇事，
遲 d 都可能有事。

其實呢個 Project 我地係接手攪既，
所以好想知係咪我攪到出事。
問多兩問，
佢話以前 D Code 都試過。
真係被佢激死，
四個幾都唔講有咁既暗病，
落緊 Line 先黎話我知係「新」問題……

開頭佢仲想叫我即刻上大陸廠 Tim Ar，
我推左話上唔上都一樣……

對個問題冇一個確實既解決方法，
只有一個猜想。
最大問題係，
因為 Hit Rate 低，
又唔確定有 d 機一定唔得，
我改左 Code 都唔能夠 Prove 到係咪真係 Solve 到。
Anyway，
我左畀佢知，
佢又受 Wor……

到期食品

有時真係畀我媽激死，
話說最近 7 仔出左 d 叮叮飯。
好多選擇，
有金針雲耳蒸雞、
牛肉餅等等。
價格相宜，
味道亦唔錯，
所以我媽大量入貨。

每次見到，
我都會盡快清左佢。
基本上可以的話，
我早午晚三餐都係食佢既，
原因唔係我鍾意食，
而係因為再唔食就浪費。
因為通常 d 叮叮飯，
都係差唔多到期，
甚或是已經過期……

好不容易我清晒之後，
媽又再入貨。
終於，
我忍唔住問媽：
「媽，你好鍾意食呢 d 飯咩？」

媽：「唔係呀，不過我見佢抵嘛……」

我：「但係過期架 wor……」

媽：「唔係呀……」

我：「呢度寫二零零七年四月十七日，今日十八號喇 wor……」

媽：「咁邊係過期呢？係昨日到期之嘛……」

結果，
我今朝早餐係那個上星期二到期的「未過期」叮叮飯……

好不幸地，
雪櫃中至少還有三盒……

極速傳說

昨晚收工三點幾四點，
本來打算坐小巴，
不過驚小巴會變亡命飛巴，
結果轉坐的士。
誰知上錯賊車，
上左架 86……

話說個司機係上左年紀既伯伯，
開頭都冇乜點，
但坐坐下發覺，
點解個心離一離既？
好似行得好快咁，
望一望個車速顯示器，
80？
仲一路一路向上升，
去到接近 100 ……

出機隧時，
呢架行到 80~100 既的士左手面，
出現一架電單車，
爬頭超越。
十數秒後，
連車尾燈都見唔到。

數學題：
如果的士行緊 100，
10 秒後連車尾燈都見唔到既電單車，
會係時速幾多呢？

去到佐敦，
前面有架「正常車速」既的士，
因為咁，
架「86」要收油。
而係呢個時候，
我聽到司機「吱」一聲……

當有位爬頭，
我又聽到畀油聲……

結果，
平時十五分鐘既車程，
今日十分鐘就攪掂……

榕樹澳 Wargame

到現時為止，
總共打左三次 Wargame。
三次都跟唔同人去，
第一次係大學同學蕃薯攪畀佢 d 同事玩，
我又跟埋去；
第二次係機友攪畀機友玩既；
第三次就係跟細牛佢喇。

今朝一個美麗既誤會，
攪到我遲大到兼食左一次半早餐。
話說我一路以為約係樓下食早餐，
食住等。
點知我臨出發既時候收到細牛電話，
話係茶餐廳對面等，
當時我好驚嚇咁問左句：
「對面？」
細牛答我：
「係呀，坐的士落去丫嘛。」
就係咁，
我以為佢地已經食完早餐，
拿拿臨係雪櫃拿碗米粉，
唔翻熱下將凍冰冰既米粉往口質……

今呢半個早餐，
攪到我話落樓落左成十分鐘……
點知，
去到前聯發麥記，
佢地又話食早餐……

今日打 Game，
租返黎個支係 M4A1，
我既候選 List 既其中一支，
不過真係幾重。
杜生話睇到我手震……

講起杜生，
我以前讀書個陣，
成日見到佢，
係一路都唔知佢叫乜名……

講返今日個 Game，
尾二個場打林，
我地係山上面攻落去。
原本打算一左一中間，
點知行下變左一齊行右，
仲繞到佢敵人背面 Tim，
不過係差 d 行到過隔離場……

其實我係知方向不對，
不過我自己都亂左方向，
只知方向不對，
不知正確方向係邊……

講返買槍，
其實係想過國貨，
因為真係平 d。
現在要再想下……

CD 包裝

昨晚去左買 CD 聽，
買左三隻：
張繼聰既 Kidult、
孫燕姿既逆光、
麥俊龍既 Chapel Of Dawn - Chapter One。

都係鍾意講包裝。
三隻都係長形既，
即係比 CD 盒長。
Kidult 基本上大約同 DVD 盒大細相約，
外面個層係一個套，
上下開口。
裝 CD 既係普通膠盒。

逆光基本上也是大約同 DVD 盒大細相約，
裝 CD 個底係膠，
面頭係紙，
好似書咁打開。
之後再包多層書柞上去。

至於 Chapel Of Dawn，
我會以麻煩黎形容。
長度比一般 DVD 盒長好多，
就算我平放，
都放唔人我個 CD 櫃。
為左將佢放入櫃，
結果我要拆掉其中一塊板……

最外層係一個好似百力茲咁既紙盒，
上部打開後，
就有膠 CD 盒同書仔。

返到屋企過 D 砍落 IPOD，
第一次試用 AAC Format，
d 人話 AAC 音質好過 MP3，
我係聽唔出既，
XDDDDDDDDDD

係拆層板安置新 CD 時，
我發覺半年前買個隻平井堅仲未轉 Format，
兩隻日文集錦碟既 MP3 File 都係就咁放左係「待處理」資料夾，
未打返 d 歌名資料落去……

逛街

因為壓力大既關係，
近排既空聞時間，
多數都會去左機鋪打機。
所謂既空聞時間，
其實即係中午唔食飯那一個鐘，
又或者 Dinna Break 那一個鐘多。
打既自然係打開既三國志大戰，
而且打得都幾狼下，
保守估計，
今個星期打機都打左千幾二千蚊。

平時打機，
我好多時都係面帶笑容，
享受當中既樂趣。
不過呢排完全唔係，
連班機友都同我講，
「打得歡容 d 啦，
拿埋口面做乜 Wor……」

今日中午，
出奇地冇去打機，
去左行業發。
業發係一座工廠大廈，
二期有好多開倉野買。
因為穿開對波鞋爛左，
所以上買對替換。

本來打算買對 Converse 高筒布鞋，
點知同個 Sales 講，
佢既答覆係：
「呢對最大六號……」
「呢對有八號半，拿畀你試下……」
「幫你 Check 下……唔好意思，呢對都係最大八號半咋……」

結果，
都係買唔成鞋……

我唔信買唔到，
聽日出旺角買，
要買一對出街鞋，
同一對打 Wargame Boot。

新 Office

搬左新 Office，
都未點仔形容過 Tim。
個單位係小小長方形，
窗口向西，
即係有西斜啦。
Partition 係兩邊，
左三右三。
左面最前係廁所，
廁所同第一個 Partition 之間有張長桌，
「預計」放微波爐，
現在係用黎放雜物……

左邊最後係 Server，
最西斜個位……
右邊最後係大班桌，
「理論上」係老闆 B 既工作桌。

咁現家既分佈係：
左一放雜物，
左二我坐，
左三係我同事。
右一係老闆 B ，
右二都係老闆 B ，
右三亦係老闆 B 。
那張傳說中的工作桌，
放緊雜物……

中間放左一列既矮櫃，
矮櫃上同矮櫃入面都係雜物。

成個 Office 最奇怪既地方，
係點解老闆 B 可以用到三個 Partition，
三張桌同兩部電腦？
（唔計那張傳說中的工作桌）

佢唔係就咁放野唔用 Wor，
佢三個 Partition 各有用途，
一個用黎 Check E-mail，
一個用黎攪零件，
仲有一個唔知用黎做乜，
但見佢成日坐落去……

我仲有一個疑問，
每個 Partition 都有一個電話插頭，
仲有專線電話號碼。
但佢三個 Partition 都冇駁電話，
成日走黎我地個位打電話……

準備

話說個客要做某一樣野，
咁一開始 Study 既時候，
已經同佢講得既機會率唔大，
但佢就叫我唔好講唔得，
結果就試呀試呀試，
攪到個 Project Delay 又 Delay。
係咁話做唔到佢想做既效果……

今日又黎睇 Demo，
仲帶左個新請既「Software Engineer」黎，
睇 Demo 之餘，
仲諸多問題，
攪到我好唔耐煩。

Well，
回答客人既查詢，
理應係我份內事。
不過唔該做左功課先問丫。

例如佢問我 1G Card 係唔同既 Quality 可以錄到幾長 Movie，
我係個幾兩個月之前，
已經 Send 左份 Report 出黎，
詳細列明唔同既 Setting，
25MB Memory 同 1G Memory 各可錄到幾長，
仲附上 Demo Movie，
佢地仲係跟據呢 d Data，
選擇咩 Quality 用咩 Setting。
雖則你係新黎既，
係咪應該內部溝通左先呢？
結果我好不客氣咁回應佢，
「我做左 Report，Send 左出黎喇 Wor。你自己睇返啦……」

之後佢問個 d 問題，
連佢同事，
即係唔熟 Engineering 既 Designer 都答到。

我日記既結論係：
攤大手板拿料好似容易，
但唔該做左功課先，
有 d 準備先問……

雪上加霜

呢排好 Down，
甚至係好 Depressed，
因為 Project 一拖再拖，
甚至好似做唔到咁，
係我能力所限？
定係其他原因呢？

今日直情係雪上加霜，
話說又夠鐘交 Demo。
每次到交 Demo，
件 Demo Unit 總是出亂子，
呢點都見慣不怪。
今次有過之而無不及，
出亂子既，
唔止係件 Demo Unit，
連電腦都神埋……

今朝返到公司，
一開機冇耐就 Reboot，
之後唔係 Reboot 就 Blue Screen，
找過 Anti Virus Check，
中左勁多 Virus，
Detect 到又清唔到。
到咁好彩有一次半次冇 Hang 機，
做做下野又十幾個 Error Message Pop 出黎，
結果我都係 Backup 晒 d Data，
之後係舊同事部機到做。
就係咁，
折騰左大半日，
Demo 唔駛講就做唔晒啦，
就算加班到兩點幾三點，
依然有段距離。

作為一個基督徒，
遇到困難，
好自然會祈禱求幫助。
我相信祂會幫我，
我相信祂會有最好既安排。
但係，
我真係唔知佢想我點……

提神方法

呢排好疲倦，
需要一些提神方法。
飲咖啡對我黎講已經冇乜用，
某人提議我真接食咖啡豆，
Well，
都可以考慮下既我估。

上網 Search，
找到其他方法，
不過都係唔知有冇放。

1. 食維他命B群
維他命B群是肝臟要代謝時的催化劑，
吃了維他命B等於加快肝臟運作，
更快產生活力；
至於提神飲料中的牛磺酸，
則是刺激腦下皮質的一種物質，
雖然也可提神，
不過若要長時間撐起精神，
直接服用維他命丸的效果比起二、三十塊錢的提神飲料好些。

2. 食深綠色蔬果
深綠色、深黃色蔬果讓人的抗氧化能力更強，
比較不容易累。

3. 「子午覺」
睡晚上十一點至凌晨一點以及中午十一點到下午一點。
因為中醫云：「子午之時，陰陽交接，極盛及衰」，
因為這兩個時間，
體內氣血陰陽極不平衡，
睡眠可避免氣血受損，
老年人還可以降低心腦血管病的發病率，
符合養生道理。

4. 綠茶一杯
茶含「茶鹼」，
會刺激腎上線素，
從而達到提神既目的。

5. 黑咖啡加可樂
咖啡因加上二氣化炭……

敗家仔

今日係一年一度既體育節接力賽，
原本打算重組當年 H16 Team，
結果都係唔成事，
今年拍阿斌同阿棟。
約左八點係荃灣等，
八點三打畀阿迪，
佢竟然仲係屋企，
佢話佢係第三棒，
唔駛咁早 Wor，
真係激死。

今年賽區係石龍拱，
一個由馬路行入去要好耐既賽區。
我地以「正常人」既步速，
都要行成個鐘先到。
當然啦，
以「正常人」既步速，
我已經行到死咁……

今次賽程唔係好長，
每棒只係 2.4 or 2.5KM，
我跑第一棒，
基本上冇犯大錯，
但係 D 小錯同埋唔夠體能損失既時間，
就令我用了二十六分鐘，
好似係尾唔知幾多隊返黎。

係我既隊友力挽狂瀾下，
竟然都仲有得爭獎牌。
可惜既係，
結果都係以一分鐘之差，
屈居第四。

上次 APOC 第十一，
今次第四，
兩次都係我拖累隊友，
感覺真不好受……




賽後，
返屋企沖過涼，
又要返公司搏殺……

小林尊

上個星期係清明，
結果今日先約齊成家去掃墓。
成家既意思，
係包埋家姐姐父一家。

昨晚收四、五點，
九點幾媽就叫醒我了。
但結果呢？
成點十二點幾先出發……

攪掂晒之後，
原本想返工，
但係家姐想我幫佢 Setup 個 IP Cam System，
結果就去左佢屋企先。
攪左幾個鐘都攪唔掂，
結果同組出旺電問。
答案係可以拿去代理叫佢攪。

去完旺電，
落機鋪打個轉，
之後打算返工。
點知收到細牛電話，
佢話佐敦小林尊表演 wor，
咁梗係連工都唔返，
即刻去會佢地啦。

去到駿發麥記，
其他三虎都到齊。
究竟小林尊表演乜呢？
話說艾文兄誇下海口話一次過食十個漢堡包，
我呢 d 做兄弟既當係出錢支持。
佢自資一杯中可樂，
我地三個就負責買漢堡包。

第一輪買四個先，
點知現貨得三個，
既然要整，
咁就不如買多兩個。
唔知個職員見到有人一次過買六個漢堡包有咩感想呢？

結果佢食到第六個就投降，
真係有 d 失望……

正毒男

係其他 Blog 抄過黎。

「毒男計分表」

以衣著，外表，異性及生活習慣分為4大類，
以底分1000分計，一項扣200。

扣得越多，中毒越深
1 常連續兩日著同一件衫
2 用國產mp3機
3 沒有大專或以上學歷
4 行路寒背/閃縮
5 不夠?獨自進入高級店舖
6 喜歡參加網聚
7 acg迷
8 身高不足1.6米
9 朋友間話題總圍繞電腦
10 認為金錢?在衣著上是浪費， 只買電腦用品
11 在網上對女網民?媚，但現實中郤不敢跟女性交往
12 常幻想有異性欣賞自己內在美
13 容易對一些交往較多的女性有好感
14 穿任何服裝都用同一個袋
15 怯於約會女性
16 帶殘舊水樽
17 穿又舊又殘的衣服上街
18 衣服多是母親或跟母親一起買
19 18前未拍過拖
20 絕大部份朋友都是網上認識
21 年年自己一個人過生日
22 失業或失學超過3個月
23 月薪少於6k

結果計一計，
我好似得 2, 3, 8, 16, 22, 23 呢六項唔中，
即係話我有負 2400 分！

2 用國產mp3機
我第一部係韓國品牌既 iRiver，
之後都係 Samsung。
現家用緊美國既 IPOD，
不過都係 Assembled in China……

3 沒有大專或以上學歷
我都算係一個有學歷既知識份子既。

8 身高不足1.6米
我都有報大數既 1.8米高既。

16 帶殘舊水樽
因為重，我好耐冇帶水出街喇，
除非去跑定向啦。

22 失業或失學超過3個月
如果唔計以前學年與學年既假期，
例如暑假咁，
我加埋都未試過失業、失學超過一個月。

23 月薪少於6k
以前做暑期工都唔止啦。

I Love My Blog

兩件事，
令我覺得我個 Blog 受到重視，
覺得欣慰。
我唔知我個 Blog 流量有幾多，
亦唔知我個 Blog 咩人睇，
睇完點解唔流個言等等。
唔睇可能係因為我成日寫埋 d 無無謂謂既野，
d 人可能覺得係垃圾。

但單單上面所講既兩件事，
已經給予我繼續寫既動力。

第一件就係我收到個 Message。
大意係：
「Every day I back to office, reading your blog is the first thing I need to do」
唔駛多講，
一句已經受晒。

第二件就係一個留言。
我 Post 左篇講買槍既，
即日就收到建議。
發留言既更係應該正讀緊 MBA，
好忙好忙既一個兄弟。

夫復何求？

---

前排好忙，
（其實現家都好忙）
莫講話唔得閒寫，
就算寫左都唔得閒 Post。
結果寫完之後，
Send 晒去畀我女友（我好似第一次咁樣稱呼佢），
由佢 Upload 上黎，
仲要幫我作埋標題。
真係要唔該晒佢。

而個堆標題，
除了相機個幾篇，
我將「上下上下上下」改返做「一二三四五六」之外，
其他應該原封不動。

至於 D 日記，
除左舊年十二月個十幾篇仲欠緊之外，
其他應該追晒……

---

講返槍既問題，
聽完意見，
目標都應該係 G36。
但係 G36C 同 G36K 又有乜分別？
邊支好 D？
G36 係咪得德軍用？
德軍用既手槍又係咩型號？

選槍

話說既然愛上了 Wargame，
當然想買支槍啦。
不過我起步較遲，
當人地可以十幾歲已經玩氣槍、電槍，
我就黎三十先黎入門……

十幾歲既時候我鍾意咩呢？
刀刀劍劍同魔法，
（因為玩 AD&D……）

Anyway，
話就話買槍，
不過又冇乜 Idea 買乜槍。
結果昨晚約左幾個 Friend 睇槍，
想買一長一短，
一電一氣。

短既好似支支差唔多，
睇中既有 COLT M1911A1（即係 .45）、
QSZ 92式（純粹支持祖國 XD）、
同埋 Glock 17。
即該都不出呢三支，
除非有更好選擇。

長既方面，
而我既性格，
其實應該打狙擊手位，
不過分分鐘悶死。
所以都係唔好買 Sniper Rifle 住。
暫時候選名單有：
Colt M4A1、
G36C、
MP5 SD6。
M14 同 AK 都應該唔會考慮。

至於幾時買，
買邊支，
係咪決定架……
可能等下次有 Game 先。

除了槍外，
仲要買眼罩、衫、鞋等等，
一闊三大……

旅行開支預算

今日一返到公司就激死左，
話說新既 LCD 屏唔著，
攪左成個星期都未得，
亦都被人煩足我一個星期。
記得 Day 1 我 Check既時候，
我就問佢，
會唔會 Clk 同 Data 調轉左呀，
佢話一定唔會，
核對過好多次。
結果唔駛我多講，
又被我估中左啦……

---

仲有六個星期就去旅行了。
準備工作亦七七八八。
機票換左，
酒店 Book 左，
去箱根既車票買左，
參觀皇宮都申請左。
久既只餘下買保險同埋兌換円。

今日就計下要帶幾多現金過去，
發覺原來唔覺唔覺，
呢次旅行都幾貴。
（好彩機票幾乎唔駛錢姐）

首先住宿，
27200+45800+19200 = 92200円，
交通同三餐約每人 10000円一日，
九日既係 90000円，
手信（閃卡同 ic 卡） 30000円。
自己購物唔知幾多等等。
結果要兌大約 15000 港幣左右，
好貴呀！

另外，
我終於 Search 到買咩衫，
原宿的 Uniqlo ，
HK$70-HK$100件T-Shirt，
d質地好過香港Uniqlo。

至於食物既手信（又或者自己食），
可以去上野(JR御徒町站)。

開口中

今日，
又要返工，
仲要上大陸。
朝早八點幾就畀個客打黎嘈醒，
問我地去到邊，
我都唔係上去……

其實今日有兩處地方要去，
第一係去個客廠，
不過因為只係同 Hardware 有關，
所以唔駛我上去。

下午就要上個供應商那兒，
因為有 d Function 用唔到，
要搵佢 Solve。

Anyway，
約四點半上水等，
執野走既時候，
發覺現家好麻煩。
首先我個位係廿五樓，
而廿五樓得一條鎖匙，
反而廿七樓既鎖匙就全世界都有。

返黎既時候，
我去開廿七樓既門拿鎖匙，
然後去開廿七樓既門。
走既時候，
我鎖完廿五樓既門，
要上廿七樓還鎖匙。
係鎖返廿七樓既時候，
我想，
如果拿漏野既話，
咪會好麻煩好豬 lor。

結果，
當我行到地鐵站既時候，
我就發覺我拿漏野了，
平時又唔見會開口中，
激死……

田夫仔打 Wargame

今朝又係晨咁早起身，
因為有戶外活動。
不過唔係野外定向，
而係去打 Wargame。

今次地點係田夫仔，
即係大棠再入。
架車一入大棠定向圖範圍內，
我就開始背圖，
邊到有小路上山，
邊度植物唔密等等。

終於到場地，
今日打 Game 既，
可以話識，
又可以話唔識。
大部份都係打三國識既機友，
然後係機友既 Friend 咁。

好大部份都係第一次打，
所以（包括我）都係雞手鴨腳。

初學者既毛病也可於我們身上看到。
例如第一場打遭遇戰，
一開始大家搵 Cover，
然後死都不動，
等人過黎被自己射，
Well……

最後兩場最好玩，
兩場都係人多對人少；
公司槍對私家槍；
冇乜經驗對有經驗。

我地先守，
守左都大半時間，
結果都係被人搶到旗。
有一段被兩三個圍，
佢地 d 子彈就好似落雨咁黎……

第二場換轉我地攻，
又係被屈機。
對面有兩三支狙擊槍，
射程大約係佢地既防守區至我地既起點，
ER……

Anyway，
雖然兩場都輸，
但好好玩。
我似乎愈來愈喜歡呢種運動。

又加班

四日復活節，
加上清明節，
好難得有連續五日既長假期。
不過對於我講，
有等於冇，
因為基本上都係要返工既，
真係慘……

比平時返工好既地方，
係可以名正而順咁遲返。
雖然我平時都係遲到多，
起碼現在遲到我唔會受良心責備。
（謎之聲：平時有嗎？）

Anyway，
雖則話可以遲 d 返，
但都十點零鐘就醒左。
人地早睡早起，
我就遲睡早起……

出旺角打左陣機發洩下之後，
就坐車返工。

返到去都係一路做做做，
五點幾左右，
出左去超級市場一轉，
買左 d 咖啡粉返黎。

始終，
冇杯咖啡飲下總係提唔起精神。
對於我黎講，
咖啡的精神作用，
遲乎大於實際作用。

而唔飲的話，
就好始總係欠些東西似的，
可能呢 d 就叫上癮啦。

有人話，
飲得咖啡多，
會有副作用，
例如心跳加快，
手震等。

我可以話飲好多，
每日一至五杯。
不過，
心跳秒秒都跳，
我點知有冇快到？
手震又唔覺有。

酒店

話說去日本旅行己經 Plan 左半年有多，
機票都已經換左，
不過酒店呢？
就遲遲都未 Book。
其實原因不外乎係懶。

早兩日，
總於的起心肝攪酒店既事。
首先攪東京既住宿，
係 Jalan.net、樂天呢 d 網頁訂酒店，
係會比直接同酒店訂便宜一點。
舉個例，
我今次住個間係，
入住三日的話，
直接酒店訂係 30000，
經 Jalan.net 訂的話係 27200，
節省三千。
好似唔係節省好多咁，
不過一日一千，
十日就一萬，
仲有得儲分 Tim。

不過有時都未必平好多，
好似箱根森咁。
直接訂係 19200，
經 Jalan.net 訂都成 18900，
結果呢個我直接訂。
（其實係我唔記得 Check Jalan.net）
事後 Check 返，
完來仲有 d 貴 d 既，
如果食海鮮餐，
要 21840；
食大田原產黑毛和牛扒（100g）既話，
要 23100。
麻煩有關人等覆一覆我需唔需要改。

錯有錯著，
被體驗到日本好好既服務。
話說係箱根森網頁訂完房，
佢 Send 左封日文既確認 E-mail 黎。
第二日，
收到另外一封確認 E-mail ，
呢封係英文既。
內文話因為我係外國人，
驚我睇唔明個封日文 E-mail，
所以 Send 封英文既黎。

「英文人」

今日去左幫手攪班，
青衣教人玩定向。
學員黎自兩間學校（一男校一女校），
大既係中四左右，
細既係中一、二。

教學內容，
又或者教既時候發生過咩事，
以前都講過好多次，
今次講下第二 d 野。

兩間都叫名校，
唔知名校學生係咪特別鍾意講英文呢？
佢地對話好多時都夾雜，
甚致係充滿英文。

我承認，
有 d 詞語用英文表達係方便 d。
所以我接受對話中，
有 d 英文單字。
又或者，
整句都係英文都得。

不過，
佢地 d 句子，
真係聽到我好唔舒服。

例如表達「這是一個蘋果。」
如果你話「呢個係蘋果。」、
又或者「呢個係 Apple」、
甚或是「This is a apple」，
都可以理解同接受。

但係佢地會講：
「This is a apple 『lor』」。
好地地，
加個廣東話助語記『lor』落去做乜？
攪到個句子中文唔似中文，
英文又唔似英文，
為乜？

搬竇

原本話下午 D 裝修工人先黎裝冷氣，
我有成個上午既時間可以執野同埋搬落樓下。
不過，
當我今朝返到公司既時候，
D 裝修工人已經開緊工。

結果就裙拉褲甩咁執野。
拿個袋，
執晒 D 野入去，
放上手推車。
推落樓下。

落到樓下，
又要將 D 野拆晒出黎。
執好個位，
都已經成點幾兩點。

食完飯返黎，
又要 Setup 返部電腦。
將 d 電線由桌上拉落桌下，
駁 Network 等等。
攪掂既時候，
都成五點幾六點。

個客又兩點幾打黎催，
又問我做乜唔覆佢 E-mail。
大佬呀，
我 Setup 好部電腦都成五點幾啦，
我點係五點幾之前 Send 到 E-mail 呀？
真係激死晒。

Anyway，
雖然好亂，
但總算有個工作間。
空間比以前樓上闊落少少，
不過放多左好多野：
兩個機箱（一部係舊同事既，我有時要用佢部腦 d 野）、
兩套 Keyboard 同 Mouse、
一個 Mon（兩部電腦 Share）、
一個電視機（某個 Project 用到）、
一個 Power Supply、
一 d Project 既硬件、
文件、
電話（我終於有直線電話 Number 喇，Wakaka）。

擺左咁多野，
究竟係多左空間定少左空間呢？
兩睇啦……

工作太多, 時間太少

好矛盾，
手頭上有好多野做，
但又唔係一個人做得晒，
經過上個星期既無間朝十朝四既工作時間，
一個 Porject 都未清好。
現家做緊既有三個 Project，
一個交貨日期 Delay 又 Delay；
一個已經落緊 Line，
不過都有 d Hang 機問題未解決；
仲有一個要趕係兩個星期後既展覽 Show 出黎，
但係仲未開始做。

都仲未計排緊隊個 d。

好 Tough，
又好 Depress。
不過我老毛病又發作，
就係集中力唔夠，
尤其是係距離 Deadline 仲有一段時間。

唔知有冇方法可以集中 d 呢？

其實有時唔知咁辛苦為乜，
有 Friend 話，
咁辛苦，
又唔係好 Pay，
找過份好個啦。

但係咁咪即係投降認輸？
唔得。

難得找到份咁挑戰性既工作。
講真，
如果找份安安定定朝九晚五既工，
我一定會悶死架！

我唔係一個安於本份既人，
一定要不停有新刺激，
先唔會覺得悶。
或者，
呢 d 叫犯賤……

Wii

正如 Lapson 所講，
任記係新一輪既遊戲機戰爭中，
真係贏返一仗。

N64 個時真係比唔上 PS2，
講畫面、好玩程度都係 PS2 贏。

到 Sony 出 PSP 手提機，
任記就出 NDS。
一個好成功既策略，
就係放棄同 Sony 鬥畫面，
改為出 d 遊戲性高，
簡單而玩既。
任天狗、應緩團、超執刀等，
好易就可以上手。

到新一輪既主機大戰，
任記既 WII 更進一步，
操控幾乎唔駛咁制。
相比於 PS3 成十幾個制係一個操控器上，
簡直係天壤之別。

PS3 既目標群，
應該係 Pro-Gamer，
佢地追求機能，
真實感等等。

WII 既目標群，
好明顯就係 D 初入門既。
我唔排除有有 Pro-Gamer 買 WII，
或者初入門買 PS3，
只係唔係目標群而已。

你話邊個群體大 D？
我就覺得係後姐。
來自美國既線人匯報，
New York 既反斗城日日排長龍，
要有籌先肯定買得到。
點解唔係住 NY 既線人咁清楚 NY 既情況呢？
咪因為佢都被吸引左去買 WII lor……

OT

今日係四月一日，
係一個舊同學既生日，
亦係一年一度既愚人節。
今日最大既說話，
咪就係星期日都要返公司加班。
一路做呀做呀做，
基本上都係行屍走肉，
結果六點幾落去行左轉，
去左百佳掃貨，
買晒 d 我最鍾意食既零食返黎，
有 72% 既朱古力、
有蕃茄味薯片、
有芝麻疏打餅、
有朱古力曲奇。
一路做野，
一路食野，
真係充實！

今日兩三點返到公司，
結果做到兩點幾先走，
同老闆去左食宵夜，
夜麻麻有小籠包食，
仲要配飲熱朱古力，
一路睇皇馬對切爾達，
呢個組合真係奇怪……

---

影如同佢父母遊完日本返黎，
今日見到佢，
已經曉自己行，
時間過得真係快……

去飲個時好攪笑，
畀條菜心佢食，
佢一隻腳放上張椅上，
一隻手拿住條菜黎咬。
一個大爺咁，
都唔知邊度學返黎……

annual dinner

今晚係 IEAA 既 Annual Dinna，
想左好耐究竟去唔去好。
記得舊年，
好似找左四五個同屆舊同學去，
今年佢又係找我找人，
不過呢排忙到人都癲，
所以將個責任過畀洛文。

點知洛文又冇找人 Wor，
正確 d 講，
係今日先打電話問人去唔去。
廿四小時通知都冇，
點去呀？

好彩我都找左艾力斯，
原本佢應承話黎，
不過早幾日已經估到佢甩底。

話說佢 Send 左個好吊詭既 Message 黎，
問我畀左錢未。
期實 Day 1 我問佢去唔去個時，
已經同佢講左 Walk-in 先畀錢。

所以佢咁問我，
一定有 d 野。
我係一個鍾意直接既人，
唔鍾意繞彎。
所以有咩就唔該真接同我講，
唔好繞圈子問問題。

我回佢亦好直接問佢係咪想唔黎，
結果佢既答案出人意表。
唔係話唔黎，
亦唔係話黎，
係繼續繞圈子……

講返個 Dinna，
當中有遊戲環節，
目的係帶起個氣氛。
可惜既係佢地準備不足，
亦都冇事前試玩過，
更加做唔到帶起氣氛，
有既只係冷場……

我可以忙嗎？

記得剛開始既時候，
（其實應為未開始）
有人問我會唔會介意佢好忙，
現家忙，
將來畢業仲忙。

估唔到現在風水輪流轉，
比較忙既似乎是我。
其實比起當年讀大學，
又或者讀 Master 既時候，
現在都唔算太忙。

我現在都係返十至四之嘛，
十點返工（通常都十點半先到公司），
四點放工（第二朝 Wor）。
返到屋企沖埋涼食 d 野，
都仲有四個鐘小睡片刻。

當年 FYP，
我應該係六點幾七點坐小巴返屋企，
兩點起身再返學。

但現家公司返屋企只要十數分鐘（的士），
以為中大返屋企都起碼半個鐘（忘命飛 Van），
可想而知，
現係幾咁幸福！
（有點自我安慰……）

又或者時機既問題，
呢一刻既我，
冇其他拍緊拖，
又或者已經成家立室的人咁多顧慮，
可以全力搏殺。
（當然，搏殺完之後有咩得著係後話……）

冇得成日見面、
有時差；
呢 D 其他人眼中既唔好處，
正正變成現在可以晚晚 OT 到四點而未收到怨言既原因。

其實應該到我問返你一句喇：
「你介意我咁忙嗎？」

做埋 Admin

連續升職兩日，
昨日升做搬運工人，
今日升做 Server Admin。
話說大單位有幾部 Server，
（都唔知要咁多個機做乜……）
有 d 要搬去舊細單位，
有 d 要搬去新細單位，
今晚就做呢個 Process。

食晚既時候，
老細買左個 Router，
咁幾部機搬去舊單位後，
要 Setup 啦。
原本 Set 左個 Router 做埋 DHCP 派 IP，
點知呢個 Process 應該 Server 機做。
結果，
部份機問 Router 拿 IP，
部份機問 Server 拿 IP。
經 Router 拿 IP 既上到網，
但 Access 唔到 Server；
經 Server 拿 IP 既 Access 到 Server ，
但上唔到網。

結果 Disable 左個 Router 既 DHCP 功能，
全部由 Server 派 IP，
結果就全部都 Access 到 Server，
再係 Server 送出去既 Information 內，
加入 Gateway 係 Router 既 IP，
咁就又可以上埋網。

之後到搬落新單位既機。
如果頭先既麻煩系數係 5 的話，
現家既麻煩系數係 50……

首先要拆晒 d 線，
四五十條線扎埋一齊，
仲要每 1cm 一條 Cable Tie，
拆都拆到手遠。
之後落到樓下，
又要將佢地安返上個機櫃，
又要駁返 UPS 同 Tape Backup Machine，
攪左一大輪，
終於攪掂晒……

「升職」

終於升左職喇，
今日由寫 Program，
升級做搬運工人……

話說已經租左那個細單位，
仲裝修緊 Tim。
咁要搬野落去，
全公司四個人，
兩個係老細，
一個行動唔方便，
咁搬運既重責，
自然落係我身上……
（不過其實老闆 A 都有做主力既）

一個搬運工人既工作看似簡單，
但都有唔少學問既。
首先係要將 D 碎件冇理由逐件逐件拿家嘛，
所以要將 d 野 Pack 埋一箱箱。
Pack 野都唔係亂 Pack 架 wor ，
要好好穴安排佢地既位置。

以書舉例，
打平放落去，
打橫放的話，
可能有 d 空隙放唔到野，
打直放又可能有 d 空隙。
究竟打直定打橫，
餘下既空隙會最少呢？

呢度講緊既，
只係二維既情況。
我地身處既地方，
係更複雜既三維空問，
所以要考慮既擺放方向，
又更加之多。

點先係最有效，
可能要用 Dynamic Programming 先 Solve 到。
Well，
我始終都係食 Programming 呢行飯。

要搬喇

話說公司有兩個單位，
全盛時期有作廿幾三人，
坐滿晒兩個單位之餘，
有 d 仲要坐到去工作枱。

不過現在，
在美其名的汰弱留強的制度下，
只餘下四大個人，
包括兩個老細。

其中三個係較細的那個單位工作，
另外老細 B 就自己一個係大單位工作。
不過，
老細 B 係可以用到四個位架…
佢自己有間房啦，
跟住一個位焊野，
一個位 Check E-mail，
一個位睇 Spec……

但係其實呢 d 全部都可以一個位做晒架 wor，
都唔知點解佢咁鍾意走黎走去……
結果打親內線畀佢，
都唔知打幾多號號碼好。
通常都係求其打一個，
響幾下收線，
只後等佢打返電話返黎……

咁大單位租約期滿，
要另尋新單位。
其實可以續租，
不過一黎租貴，
二黎大單位有好多浪費的地方。

原本想找兩個相連既細單位打通佢，
點知唔夠人快，
被人租左其中一個。

最後租左餘下的細單位，
連埋原本那個細單位，
總共有兩個。
原本那個係廿七樓，
新那個係廿五樓。

台灣交流戰

有時打機真係冇分國界，
早排有日本高手過黎香港。
今個 Weekend，
亦有兩個來自台灣的朋友到來。
呢幾日都有 d 交流戰，
不過佢地都係睇同拍片多，
落場好少。

昨日終於見到佢落場，
小弟有幸和佢打了一鋪，
結果輸了。
雖然睇得出，
佢地既技術仲未係好成熟。
不過跟據過往經驗，
台灣人進步得好快，
假以時日，
必定趕過我地。

講返少少有趣野，
話說來賓是台灣人，
我地自然用普通話同佢對答。
不過我地大部份人都係半桶水，
講 d 港式普通話。

其中有一個，
講得比較好既，
佢解釋話因為佢公事上要用到，
所以成日講。

咁我地稱之為商務普通話。

而有個醫學界人士亦唔執輸，
話佢個 d 係醫學普通話，
（當然大部份係港式發音啦）

到今日，
我先知道，
原來除了以地區黎分，
好似北京腔、上海腔之外，
仲可以工作性質黎分，
醫學腔、商務腔……

打籃球

今日收到好耐冇聯絡既王生電話，
話約食飯 Wor，
咁咪去 lor。
不過出席既，
唔係以前七愛既舊同學，
亦唔係踢開波個班，
而係另外一班。

話說 Billy Wong 今日砌新電腦，
搵埋 Hardaway 同肥豪去幫眼。
咁買完電腦要食飯，
就 Call 埋我地出黎喇。

去左女人街食日本野，
一間以鐵板燒為主既食店。
叫左兩個二人餐，
再加 d 少食、壽司咁。
款式係多呀，
不過量就比較少。
總係覺得有 d 唔夠飽咁。

對於某人黎講，
佢可能會鍾意食，
因為可以試多幾款唔同種類既。

食完飯，
Ewing 都黎埋，
想下場去邊好。
結果我地去左做 d 好健康既野，
就係去打籃球。
本來就剛剛好三打三，
但係阿王生又話聽日要上廠要走先，
結果得返二打三。

雖然好耐冇打，
好似都唔止一年喇。
但五個人打左成個鐘波，
出左一身汗，
感覺非常之好。
而且有少少回到中學時咁……

改機票

話說早排因為有人既 Meeting，
所以旅行要延遲一日出發。
因為我既唔係經 Agent，
亦唔係經旅行社訂機票，
而係經 Asiamiles 換機票，
所以改日期都要自己攪返。

訂機票既時候，
我可以係上網攪掂，
自己睇有咩機，
幾點起飛幾點到咁。

不過係網頁上，
我又唔發覺有得讓我選改日期 Wor。
咁我就 Send 左封 E-mail 去，
（其實係 Online 填 Form）
問佢如果我想改出發日期，
應該點做。

不過，
Send 左出去之後，
一日、兩日、三日，
直至一個星期過去，
都完全冇回音。

今朝突然收到個電話，
係 CX 訂位部打黎，
話收到我既要求，
「已經」幫我改遲左一日既同一班機，
收線之後會補返封新既 E-mail 畀我。

留意「已經」呢兩個字，
我好欣賞佢幫我改好晒機票。
不過，
某人既新到達時間延遲左兩個小時，
原本我想改下一班機既，
不過佢又「已經」幫我改左。
我又點好意思叫佢再改呢？

早左到都冇乜野既，
最多都係呆等兩個幾鐘，
希望 PSP 同 IPOD 夠電頂咁多個鐘啦。

相機六

昨日講完鏡，
今日講機。

E-410
E-400 既後繼機，
比 E-400 多左個 Live View 功能，
主打輕便同埋 Live View。
係宣傳品上，
亦喜見佢地終於識做野，
拿佢同埋他廠既入門機拍埋一比，
無論大小同重量都贏一條街。
當然，
如果你要比畫質，
各花入各眼。
但佢聲稱有新既 Image processing Engine，
質素進步左好多云云。
一直為人所不滿既連拍亦有改線，
以 3fps 既速度可以一次過拍 8 張，
算係咁啦。

E-510
E-500 既後繼機，
一部較進階既 DSLR。
賣點有 Image stabiliser。
（其他廠好似有左好耐）
同其他廠既 IS 唔同，
其他廠既 IS 做係支 Lens 度既，
（如果我冇理解錯的話）
但 E-510 係做係個 Body 度。
換句話說，
只要係用 E-510，
就用咩鏡都做到防手震既功能。

E-3
E1 三年零八個月後既後繼機，
但仍然係謎一樣既機。
當 E-410 同 E-510 都就出得既時候，
E-3 仍然係好少資料，
只知預定係年內發售。
密切留意呢部新相機。

相機五

Olympus 既 Fans 望穿秋水等既野，
終於願望成真。
係冇幾耐之前既 PIE2007，
O 記公佈左新既機同新既鏡。

O 記上一代旗艦機 E-1 出左都差唔多四年，
新既後繼旗艦機終於都有喇，
有傳聞佢叫 E-3。
話明旗艦機，
Config 當然有返咁上下啦。
不過一分錢一分貨，
價錢當然……

除左旗艦機，
仲會出多兩部機身，
一部係 E510，
一部係 E410。

仲有幾支新鏡。
配合新旗艦機，
其中三支配備超聲波馬達驅動系統。
最備受注目既，
可能係呢支：
ZUIKO DIGITAL ED 12-60mm (24-120mm) F2.8-4.0 SWD
高質素5倍光學變焦鏡頭，
屬 (High-Grade)的高質素系列鏡頭，
提供相等於35mm相機標準24mm廣角焦距與F2.8大光圈設計，
為攝影師提供日常常用的拍攝焦距。
一支已經可以代替以前兩支：
11-22mm 同 14-54mm 呢兩支。

另外一支 ZUIKO DIGITAL ED 50-200mm (100-400mm) F2.8-3.5 SWD，
係原 50-200mm 既進化版。

ZUIKO DIGITAL ED 14-35mm (28-70mm）F2.0 SWD
2.0 恆定光圈既Super High Grade（超高質素）鏡頭


ZUIKO DIGITAL ED 70-300mm (140-600mm) F4.0-5.6
一支超遠焦距變焦鏡。

仲有 ZUIKO DIGITAL 2.0x Teleconverter EC-20，
2倍遠攝增距鏡。

看來，
Olympus 今年好有野心。

相機四

好傷心，
辛辛苦苦打左大半篇日記，
突然一腳踢左落個電制到，
結果……

---

上回講到，
因為一件事，
我放左 E-300。
點解放機，
因為換機。
換部功能好 D，
又平 D 既機。

話說 Olympus 出左部 E-330，
有 Live-view，
呢個功能可以算係 DSLR 既一個大突破。
咁 O 記攪左過 Event，
畀 d人試用 E-330。

Event 過後，
就多左一批「唔係新機」。
呢批「唔係新機」，
其實又好新，
因為只係被人用過一個下午。
但又唔可以當新機賣，
結果就用左個唔錯既價錢放出黎。
不過好可惜，
當我發現既時候，
呢批機已經賣晒。

但係我又已經放左部 E-300，
好彩我最後都找到個人放 E-300。
一樣係一部「唔係新機」但又好新，
但來源唔同，
呢部機係抽獎禮物。

Anyway，
我總算由 E-300 既時代，
過渡到 E-330。

其實係 E-300 同 E-330 既中間，
O 記仲出左部 E-500，
不過唔係我杯茶。

相機三

相機既歷程上次講到 E-300，
今日繼續。

有一樣相機既配件叫直度。
一般影相的話，
水平係長過垂直既。
相機既快門亦多數放便你咁樣影。
但係有時你想轉九十度黎構圖，
咁你就要"咬"晒手咁去按快門。

直度呢樣野，
就解決左呢個問題。
佢係一件外加配件，
讓你在打直構圖既時候，
仲可以好似平時咁按快門。

不過，
加左直度之後既 E-300 更加重，
所以冇耐我就放返個直度出去。
日期係三月既一個星期六，
點解咁記得？
因為個日我約左個賣家係灣仔交收，
交收完之後，
我想日本文化協會拿成績表。

愈講愈遠。
Anyway，
賣左個直倒之後，
雖然冇咁方便，
但總算叫左輕左。

不過都仍然好重。
去旅行，
我拿既係一腳一機兩鏡一閃。
腳係金鐘 640、
機身係 E-300、
兩鏡係 11-22 同 50-200、
閃則係 FL-50。

後來因為一件事，
我放左 E-300，
係咩事呢？
以前日記有講過，
下期續。

「大」聚餐

今日偷懶，
正常收工時間收工，
出到旺角係七點半。
收到 Annie 電話，
話約左今晚食飯，
仲好齊人咁話。
見佢地係隔離食，
咪過去找佢地 lor。

我同門口個帶位講，
係咪有十多人既？
佢話冇，
結果我自己入去搵，
有六大個人 lor……

之後仲有十八合一同佢女朋友黎，
大家都係第一次佢女朋友，
問佢地點識，
佢地話行山識。

十分鐘後……
阿婷又問佢地點識……

Anyway，
食完之後去左 Cafe，
玩返 d 兒時遊戲，
好似波子棋，
Killer 咁。

講開 Killer，
都係人多好玩 d，
我地得九個人，
三、四 Round d 人就死晒喇……

最攪笑係 Annie，
次次死親都話佢佢男朋友殺佢，
又次次都中 Wor，
Wakaka……

我呢 d 與世無爭既，
多數都冇乜人殺，
玩咁耐被 Killer 殺左兩次，
兩次都係畀同屆舊同學（兩個唔同人）所殺，
好明顯係私人恩怨，
Wakakaka……

影相

好耐冇認認真真去影相，
今日同班影友去影相。
真係去拿部相機，
有晒目的咁專登去一個地方影相。

攝影的題材有好多，
有 d 人鍾意影女影人像，
有 d 人鍾意影風景，
有 d 人鍾意影花草蟲。
我呢？
影乜冇乜所謂，
我都係 Enjoy 影那個過程，
所以你可能見我影就影得多，
出相就少少咁，
其實係少到冇……

我 Enjoy 一個人無束縛咁去影，
我怕要人等我，
亦唔鍾意搶包山個種影法。

咩係搶包山呢，
就好似影會個 d 人像外影咁，
一個 Model，
六七個人六七部相機影。
構圖之餘，
仲要避開其他人既相機，
其他人既身體。

例如你辛辛苦苦找到個好位，
調較好晒光圈快門，
構埋圖 tim。
臨好快門個下，
你會見到隔離影友個頭入左鏡，
因為佢都找緊位……

講返影乜先，
今日去左沙螺灣打碟。
按左百多次快門，
影得清既都有既，
找日有時間 Post 返一兩張出黎先。

成績表

玩開個隻街機 Game，
最近引進左幾組新機，
不過就未有全國對戰。
多左批新手玩，
自然好應該有 d 老手指導下佢地，
今日我就去左荃灣一個新手會。
不過好失敗地，
我三戰三敗。

By the way，
我覺得今日唔算係成功，
浪費左班老手。
因為班新手得個睇字，
又唔問問題，
我覺得冇乜意思。

---

去荃灣之前，
過左灣仔。
每年既十二月，
係考日能試既日子；
翌年既三月，
就係拿成績表既日子。
上到去，
拿左個公文袋，
乘電梯既時候打開黎睇，
好似冇及格證書，
得張出席證書。

個心沉一沉，
一路行返地鐵站，
一路拿張分紙出黎睇。
滿分係 400 分，
我的得分係 246 分。
日能試三級既及格分數係 60%，
計一計又好似及格 Wor，
望清楚張「出席證書」，
原來真係「及格證書」。

不過咁既分數，
有 d 唔開心。
3 Parts，
生字同 Listening 都係唔及格，
係靠文法追返 d 分。
雖則個兩 Part 唔夠 60%，
都都成 5x%，
好似唔係相差好多。
但睇返深淺程度，
我覺得今年係比 Past Paper 淺。

要考二級試，
又或者話日文要再進步，
我想仲要花多 d 功夫打穩根機……
（講係年年咁講，做就……）

試機一日遊

今日又要上大陸，
去另一個客到，
間廠位於二線。
一早約係羅湖等，
亦即係一早要起身……

間廠幾大，
但愈大規模，
愈多規條。
淨係要拿張訪客證，
都要去 HR 填張 Form……

佢地每個位個 Partition 前都有張紙，
寫左佢地叫咩名同咩 Post，
大公司分工好仔細，
其中一個 Post 叫 Debugger……

中午去間廠飯堂食，
有高級職員飯堂，
環境幾好，
d 野食都 OK。

講返今日上去做乜，
話說佢地試到會 Hang 機，
但係我地試極都冇。
莫講話病個時我都未必醫到，
連病徵我都見唔到，
點醫。

結果上到去，
我依然試唔到。
叫佢跟足佢試到 Hang 機個方法試，
一樣係試唔到……
咁就浪費左一日……

因為懷疑係個別 Hardware 問題，
叫佢下次試多一兩部，
佢話佢今次有試兩部。
問佢一部係咁定兩部都係咁，
佢又話唔記得。
叫佢 Mark 返低一部叫 #1，
另一部叫 #2，
出事時 Mark 低埋邊部出事，
佢又話 d 機已經有編號，
結果都係溝通唔到……

相機二

前日講完玩相機既上集，
今日繼續講。

當你有要求時，
DC 仔就會開始滿足唔到你。

所謂既要求，
可以係質素；
可以係速度；
亦都可以係使用方法等等。

舉過例，
例如你要拍淺景深，
即係個 D Subject 清楚，
背景 Blur 晒個 d 呢，
DC 仔未必做到。

又或者你要一秒鐘影五六張相，
DC 仔未必幫到你。

又或者你要按快門後好快就影到相，
DC 仔都係未必幫到你。

又或者你要長短火，
又要影到好 Wide 既景，
又要影到天上既飛機，
DC 仔更加幫到你。

好自然，
你會想升級，
亦即係升級至單鏡反光相機。

當然，
DC 仔比起 DSLR 黎講，
仲係輕便得多。

用 Olumpus 既 DC，
轉 DSLR，
自然都係想 Olympus 先。

Olympus 第一部「可換鏡」既 DSLR，
係 E-1，
不過高檔野，
冇錢買。

後來出左部平民化 D 既 E-300，
即買。

其實用 Olympus 重有個原因，
就係因為少人用，
可以標奇立異，
Wahahaha……

E-300 跟機既係 14-45mm 鏡頭，
一般用都夠。
之後我買左支長火 50-200mm，
又入左支短火 11-22mm，
基本上都夠用，
不過缺點係，
真係好重！

又夠字數，
下次再續……

一語成籤

今日收到過唔係咁好既消息，
令我更加唔鍾意五月二十四日。

P.S. 以下內容純粹講笑，
當事人唔駛介意（唔係講你呀梁生！）

話說五月二十四日係中三、四已經關我事，
因為係個兄弟既生日。
記得以前我地四個，
當一個生日既時候，
其愈三個會夾錢買份禮物送畀佢。
學阿力家姐話齋，
其實係我地分期付款咁買左 D 自己平時唔捨得買既野。
換個角度睇即係，
只要你係其餘三個人生日時付出一份金錢（假設係一百元咁先算），
咁你生日個日就可以得到價值三份金錢（即係三百元）既物品。
我仲記得，
第一件送畀梁生既禮物係一件公牛隊籃球衣。

不過唔知係咪人黑既問題，
（我講緊梁生）
呢日都唔係幾利我。
早幾日先同佢講話我五月二十四日出發，
佢同我講：
「真係五月二十四日？想清楚好 Wor……」

點知今日就一語成籤。
今朝一起身，
就見到有個 MSN（定 ICQ？）有個留言，
叫我覆佢電話，
話有事同我商量。

差開少少，
麻煩下次商量 D 乜，
係個留言大約講少少。
因為見到 D 咁既留言，
真係有 D 驚架……

返返轉頭，
商量 D 乜呢？
結論就係，
我五月二十四日去唔成日本，
二十五日先可以出發，
滿意啦梁生？

講返正經，
點解要延期呢？
因為某人學校有個 Meeting，
關於佢要寫既畢業論文，
如果去唔到，
就要唔知幾多個月後先有。
而 Meeting 既日期，
剛剛就係某人原定出發個日，
（我都唔知二十三定二十四喇）

Anyway，
延期一日冇所謂，
反正都係玩少一日見少一日，
正如我以前所講，
當然係學業行先啦……

相機一

講完電腦，
今日講相機。
我唔算係一個攝影發燒友，
不過玩相機都玩左兩三年。
菲林機年代，
我都仲係用相機，
而唔係玩相機，
所以我未經歷過用紙筆抄低每張相既光圈快門既年代。

第一部買既相機，
係 Olympus 既 c-750。
用 Olympus 既原因，
係因為當時只有佢一部有 10X 變焦。
我當時上緊教練班，
要做教材，
有時上到山，
見到有好既材料，
但又未必行到過去，
咁有一部長 Zoom 既就可以 Zoom 埋去影。

10x Zoom 我都覺得唔夠，
再買左支 1.4x 既外接鏡，
即係做到 14 倍 Zoom 既效果。

冇記錯的話，
呢部機係 35mm 至 350mm 既。
有遠攝既優勢，
自然廣角會差少少。

結果我又買左支 0.7x 既外接鏡，
一機兩鏡，
結果我係好少用既。
用過去一次旅行，
影過煙花，
影過演唱會，
影過下教材咁。

基本上我都幾滿意呢部機，
除左佢用 xD 卡呢種唔 Common 既 Memory 卡之外，
同埋 d Noise 控制唔係好得之外……

砌機

舊電腦死下死下，
好多時行行下突然 Reboot，
而且多數發生在初開機個陣，
開順左好似又冇乜野。

冇時間去 Check 邊 Part 壞，
可能係底板、火牛，又或者 Ram。
一黎懶試，
二黎部機都好似已經幾年（幾多年就唔多記得）。
以電子零件壽命來說，
應該都差唔多架喇，
救完一樣，
另一樣又黎料，
所以決定砌部新機。

不過好多年冇留意呢方面既資料，
覺得自己好 Outdated。
d 咩 Dual Core 呀，
完全唔知咩黎。
Dual Channel 更加用都未用到。

用我有限既知識，
暫時決定咁。

CPU 用 AMD AM2 X2 4600，（因為未用過 AMD）
RAM 用 1G * 2 Dual Channel，
Harddisk 用 Seagate 300.0GB ST3300622AS SATA II/16MB HDD，
底板未想到，
DVD Writer 用 Pioneer DVR-212 18X SPM DVD Writer(SATA)，
Display 卡用行 PCI-E 既，
計埋機箱火牛，
希望 5~6K 內攪得掂。

不過先決條件，
係我有時間去，
同埋裝過晒 D Software……

不過呢排洗左好多錢，
都係時候節儉下。
睇下我忍到部電腦幾耐先，
呵呵呵……

睇戲

終於成功睇到戲，
話說下午返觀塘返工，
路過 APM，
見到套戲就開，
又有位 WOR，
咪即刻買飛入去 Lor。

套戲講真麻麻，
係純粹入去笑一餐。
同埋聽下李克勤唱歌咁，
完場個時，
播公主太子，
真係坐係到聽到唔捨得走。

最得既橋段我覺得係評論食物，
好似睇緊味吉陽一咁。
我想睇過呢套漫畫/動畫，
都會想像得到係點樣，
首先係大叫好美味呀，
跟住就會講點樣點樣好味，
好似點樣點樣咁，
仲要 Q 版埋咁。


不過當然，
如果你要追求深度，
追求劇情的話，
省回戲飛錢吧。

排隊買飛既時候，
睇到未來有好多戲想睇。
Mr Bean、忍者龜、Harry Potter、
蜘蛛俠、Transformer、Zodiac、
魔盜王等等，
不過唔知最後可以睇到幾多部呢？

講返轉頭，
可能係淡季，
呢一兩個星期真係冇咩戲想睇，
Even 就算係戰狼 300。

壞機

又開始脫期 tim，
要努力 d 追返先得。

我發覺 d 電子儀器唔鐘意我，
先有電腦成日冇程程 Reboot，
之後有 PSP 壞 Analog。
現在連 IPOD 都唔鍾意我……

話說今日原本打算出旺角睇早場，
行行下開部 IPOD 聽，
按極制都冇反應，
連 Keylock 個制都冇反應，
Disable 左個 Keylock，
佢 Screen 都係出 Keylock。

即刻轉頭返屋企查說明書，
睇下點樣 Reboot，
好彩 Reboot 左之後 Work 返，
至於之前點解 Hang 機，
就不得而知喇。

Anyways，
總之結果就睇唔成戲啦。
睇黎我同李克勤都係冇乜緣，
上年佢新戲上，
我剛好唔係香港。
今年新戲上，
又係冇得睇。

下午上左阿 Zooo 屋企玩，
我部機拿左去整，
好彩蕃茄有多一部機，
所以我都有得玩。
但阿 Zooo 就冇咁好彩喇。

佢部機個 Wifi 好似壞左，
連極線都連唔到我地，
結果佢就睇住我地玩，
仲要供應埋地方，
讓我地玩通頂……

笑料

今朝上大陸個客間廠開交接會，
笑料一大堆。
約八點半係羅湖某茶餐廳等。
有 d 八點九先到既，
都話要食埋個早餐……
係醒目既，
想食早餐就應該自動自覺早少少到啦，
真係畀佢玩死……

到開會喇，
原本話想上午開完，
下午可以返香港，
結果上午一半都講唔到。
點解攪咁耐呢？
咪就係在 d 細眉細眼支節位到浪費時間 lor。
唔係話支節位唔駛理，
不過有 d 野係少數人傾已經得，
唔駛大棚人聽你講廢話。
咩廢話容後再談。

個返 d 支節位，
其中一個係話錄影時間過短，
同佢地預想唔同。

但係，
From Day 1 已經話畀佢知個預想係冇可能實現，
但係佢照落 Spec，
照話畀個客知，
咁我幫你唔到架。

到廢話時間喇，
話說有 A, B, C 三個條件，
已知 A, B, C 三個同時去到 Maximum 係冇可能既事，
現在要 Find the optimum。
咁仲有個目標，
又或者一 d 限制。
既然 A, B, C 三個唔可能同時去到 Maximum，
咁總要有一個或要以既候件將就下。
問佢邊個重要 d，
「三個都仲要」
問佢點定 Constraint，
「A, B, C 三個同時去到 Maximum」
我唔知係我表達能力差定………

結果，
九點幾先落到香港……

加班之達人

感覺對艾力斯唔住 Tim，
話說好耐冇做 Gym，
有幾耐呢？
耐到記唔到了。
本來約星期一，
但係星期二要交個辦畀個客，
係有成品出黎之前，
我要 Stand-by 黎等，
結果我成十一點幾先走。
好彩我一早同艾力斯講叫佢唔好等我，
改期改到星期四。

今日中午，
艾力斯打黎問我係咪得，
我個時都仲可以答佢得
之但係，
跟住發覺有野趕，
唔一定趕得切去，
亦都唔知幾點去得到。
更重要既係，
明早八點半要去到羅湖，
今晚要早訓。
結果，
又一次延期。

至於延到幾時，
唔知，
可能遙遙無期。

最近做左加班之達人，
最慘既係，
唔係日日加班，
亦都唔肯定幾時要加班，
幾時唔駛。

但係肯定既係，
應該三個人做既野，
現家有一大個人做！
我只有一個希望，
五月廿四日之前，
清得幾多得幾多。

牛脾氣

遺傳自家父，
我有一股牛脾氣。
好聽 d 講，
可以話係有性格，
有藝術家的風範；
唔好聽講句，
又或者中肯 d 既評價，
亦都可以話係牛精。

不過，
我股脾氣，
發得大時，
來得快，
去得亦快。
好快就冇左件事。

試過當年做電腦學會會長，
有日中午開會，
我鎖左道門，
拍晒枱罵班幹事。
那個兇惡程度，
馬神話佢當時都敢插咀。

上一份工，
我都成日同 Hardware Engineer 罵戰，
當然對罵內容係公事啦。

由同事聽返黎，
連老闆 A 都覺得我有脾氣，
敢公然頂撞佢。

我都係據理力爭，
我唔會因為佢位高權重而買佢怕，
總之唔對就要講。
講返上次頂撞 D 乜，
話說講緊一個問題，
個 Process 有 Step 1 至 Step 10，
咁個客投訴 Step 1 效果唔夠好，
而 Step 2 至 Step 10 係唔錯。
咁針對內容，
梗係 Step 1 點樣改好 d，
而老闆 A 就不斷重覆話 Step 2 至 Step 10 點樣好 d。

Well，
我知 Step 2 至 Step 10 可以好 d，
但迫在眉睫既問題係 Step 1 嘛。
但老闆 A 就講極都唔明……

過冷河

同事終於離職了，
昨日係佢 Last Day。
今日之後，
得返我一個 Software Engineer，
亦即係話，
我要直接同老闆 B 交手。

老闆 B 負責 Hardware，
好多時 Shoot 唔到既 Bug，
就會要求我地 Software Team 協助。
據舊同事所講，
因為咁（成日幫老闆 B），
攪到佢（同事 B）成日做唔到野，
拖慢晒 d 進度。

應付佢，
我有少少心得，
就係凡事過一過冷河。

例如接到佢打黎既內線，
叫你過一過去幫手，
千祈唔好即刻過去。
等一等先，
之後過去時，
佢有 70% 機會話已經冇問題。
咁用既時間，
只係一來一回幾分鐘，
而唔係幫佢 Shoot Bug 咁幾十分鐘。

又或者佢同你講野時，
如果你好忙，
咁佢每講一句，
你隔一分鐘後先回應，
咁佢好快就會知你忙，
唔打擾你架喇……

總之每件事都係要過一過冷河，
等一等先，
就就唔會因為要協助佢，
而拖慢自己進度。

打牌冇態

唔經唔覺又三月，
不過十二月 d 日記仲未補返，
有拖冇欠啦。

---

昨晚定向活動之後，
上左阿力到。
我地四個都好耐冇聚埋一齊喇。

阿力個外甥女開始識講野，
佢媽媽問佢邊個叔叔（?!）最靚仔，
結果得獎者係牛叔，
文叔同旦叔名落孫山。

上去既活動，
唔係打機就係打牌，
（昨日唔記得睇 EXAM ><）

講起打牌，
今次真係冇狀態。
走雞打錯牌乜都有，
一開牌第一隻牌已經少相公都試過，
仲有一炮雙響……

不過講狀態，
牛叔仲差過我，
四圈牌出沖過兩鋪十三么，
遙遙領先。
埋單計數，
以往都係做掌上壓，
今次直情一筆勾消。

因為牛叔要做四百幾下，
旦叔要做三百幾下，
文叔都好似要做二百下，
就算將個數除四，
都係做死人。

結果力舅父就話今次由佢喇……

定向同樂日

今朝一早去左藍田公園，
上午有練習賽，
下午有同樂日。
上午個練習賽，
我以 Guest 既身份跑。
條 Course 唔係好長，
不過冇乜 Route Choice。
可以的話，
我都盡量走直線同入林，
少跑路。
奈何今日個地有 d 濕滑，
我個對又係平底鞋，
食唔實個地，
結果有 d 路段都係要跑返路。
時間係大約二十五分鐘，
比目標時間慢，
不過比真係比賽個班已經快一倍……

下午係同樂日，
有唔同既定向活動，
有混合式（先玩奪分式，再玩越野式）、
有星形定向、
有接力、仲有精確定向。

攪手原本以參加既多會係童軍級別，
但結果黎既多數係幼童軍級別，
換句話說，
d 活動對佢地黎講係過深既。

我負責既係混合式，
拍檔係曾 Sir。
基本上係輪流一人講解一次，
每次曾 Sir 講解，
我都好專心偷師，
活學活用。

少少題外話，
午飯時間同 d 童軍踢波，
我地領袖隊讓佢地一個，
四個打五個。
打左兩場，
第一場 2:0，
第二場 2:1。

第一場我開齋，
一個扭五個（我都扭得過，可想而知對面水準去到邊）。
尾場又係我埋齋，
中場一開波就射，
彈中守門員腳邊入。

輕巧與穩重

昨晚（定應該話係今朝？）收三點幾，
可以訓覺既時候都成五點，
結果訓吓醒吓，
正式訓醒都差唔多五點幾。

首先做左正經野先，
先過細牛家交收 MP3 機。
上到細牛家，
見佢仲做緊功課，
真係慘。

想當年我都試過，
呢個經驗永遠記得。
短期內可能會再讀返野，
不過應該唔會係 Workload 咁重既 Degree Course，
會偏向實用性 d 既，
例如水電工、電子，
甚或讀返日文。

之後出左旺角買 IPOD 配件，
行完星際，
冇咩收獲。
保護套唔合心水，
保護貼又唔多見到有。
唔通香港真係咁少人用大機？

我見外國就算部機大大部，
（當然唔係大得太誇張啦）
D 外國人都照用；
反而香港就咩都追求細、輕巧。

我相信 Shuffle、Mini、Nano 會多 d 人用，
因為呢 d 配件我都見唔少。
反而大 IPOD 既就比較少。

之後落左機鋪，
不過一鋪三國志都冇打，
係成班人打 MHP。
佢地仲攪笑到帶埋火牛，
插係機鋪 D 拖板叉住電玩……

連環開夜事件

今晚又要開夜，
係呢個客既問題定咩呢？
次次有同呢個客有關既事件，
可能係第二日 Demo，
交手辦 or 其他，
總要 OT，
仲要夜一夜個隻。
砌過三隻手辦比佢，
三次都要通頂。
星期二見佢地個 Marketing Director，
星期一又做到四點……

---

介紹左個舊同事黎見工，
結果係失敗左，
雙方都覺得唔係好適合。
仲係請唔到人的話，
始終有些擔心。
將此事交託畀神，
求神有個美好的安排，
幾乎一年一次既約定，
我唔想咁就失約……

---

早兩日講 IPOD 配件，
（其實咪又係今日打）
仲有個個漏左未講。
IPOD 有個 Mon，
容量又大，
如果可以睇到相機影既相，
應該好方便。
起碼唔駛被人投訊十世都冇相睇。

其實 IPOD 出左個 Camera Connector，
不過完完全全唔適合我用。

首先佢唔 Support 我部相機影出黎 Raw 檔，
再者佢唔係 Card Reader，
而係要用 USB 經相機抄相，
亦即係話，
抄緊相既時候影唔到相……

而且佢又冇得 Preview，
一定要抄晒落去先睇到。

如果佢出一個配件，
行到 USB Host，
可以係 Extern （Card Reader or Wallet）拿相，
仲可以逐張 Preview 左先決定抄唔抄，
又或者一次過抄，
咁就符合晒我要求，
即買！

零瑕疵

前日朝早見個客既 Marketing Director，
佢係外國人黎，
昨日飛返美國。
一早就要去尖東，
九點半要去到。
（平時呢個時候我都未出門口返工）

本來都唔係咩問題，
都係早返少少起身，
不過前題係我之前個晚早 d 訓。
結果我係六點半起身，
仲有時間落街食早餐。
不過就幾乎冇訓過。
我四點幾先返到屋企，
我五點先訓上床。

我唔係因為去左玩先咁夜返屋企，
而係之前個晚又要加班，
因為前日見過客不容有失，
所以要確保 Everything is Correct。

前日見個客時，
就係確保唔到。
原本以為衰緊，
感謝主，
竟然順順利利，
部機冇 Hang 過。
（係公司試時，Hang 到九彩）

個客仲好似幾滿意 Tim。
雖則過左第一關，
都仲有大把手尾跟，
睇黎都係有排忙的了……

件野其實仲有問題，
不過我想講既係，
呢件係 Developing Demo，
唔係一件 Ready for sell products，
要求零瑕疵，
簡直係痴人說夢。
尤肯最應該明白呢個道理既，
都明白。