喂喂喂，搵邊位？

話說前日個工作坊，
可以帶自己機去。
咁主辦單位星期五就打電話通知參加者，
我收到個電話，
（我當時唔知係佢地打黎……）
個電話冇來電顯示既。

「唔該阿 EGG 丫。」
（我係 Forum 既 Login Name 係 eggho）

我：「你係邊位？」

「唔該阿 EGG 丫。」

我：「咩事？」

「唔該阿 EGG 丫。」

我：「咩事？」

「原來你係阿 EGG。」

我：「咩事？」

「唔該阿 EGG 丫。」

結果我就收線喇。
現在回想，
我既應對有冇出問題呢？
點解好似溝通唔到咁既？

---

今日十二點收工，
之後去打機，
打到兩點，
唔中閃。

工作都係未完成，
棘手地方好多。

第 49 屆體育節野外定向接力賽

今日要比賽，
體育節既接力賽。
今年既拍檔係阿棟同阿健。

阿棟第一棒，
阿健第二棒，
我守尾門。

今年既協辦屬會唔知係咪經驗唔夠，
有好多需要改善既地方。
首先係賽事中心太細，
本來個空地唔細，
不過佢拿晒黎做接棒區和終點。
結果就冇位畀賽員。

其次係條 Course 唔係好得。
牛寮其實有唔少好玩既地方，
不過我個條 Course 基本上冇任何 Route Choice。
大路之王，
離開條路打 Point，
繼續大路之王。

第一棒阿棟返黎暫列第四（但阿棟係跑最短條 Route），
到阿健返黎，
跌到落第七（阿健跑第二短條 Route）。
到我出發，
首先要花分幾兩分鐘找張圖係邊，
完全冇指示……

之後一睇，
以為有兩條路選（繞大大圈既唔計喇），
不過較好個條要穿過人群，
正如我之前所講，
賽員可用面積太少，
導致賽員積聚，
要穿過佢地，
時間上會打折扣。
所以我選了條上多少少山既。

成條 Course 冇咩大錯，
冇需要 Relocation，
跑得幾順。
結果用了約 60 分鐘完成 3.7km 賽事，
以一個半年冇練過砲既人黎講，
算係唔錯，
不過如果可以做到 50 分鐘會更加好。

我地今次呢隊，
一個剛剛收工，
一夜冇訓。
另一個（即係我）前晚做通頂，
唔知會排第幾呢？

E-300 vs E-330

一夜冇訓，
早上訓唔夠兩個鐘，
就去左掃墓。
中午去左「Live View 新體驗 – Olympus E-330 DSLR」工作坊，
係逸東酒店舉行，
咁近，梗係去一去啦。
其實呢個工作坊都係 Sell 野多，
係咁 Sell 佢 d 優點。
去次前，
其實都有 d 心動，
我亦都試放我部 E-300，
補返三兩千入呢部機。

點解我想入部 E-330 呢？

第一、佢有 LCD 取景。
以往既 DSLR，
太多用 View Finder 取景。
單用 View Finder 既唔好處，
就係局限左個視點。
例如我五尺十一吋高既，
咁我影出黎既相就只會係五尺十一吋高既視點，
隨非我蹲下來或者爬梯先可以轉到視點。
有個 LCD 取景，
改變視點就方便好多。

第二、佢既 Noise 控制好過我部 E-300。
換句話說，
IQ 應該會好 D。

第三、測光改善左。
比 E-300 （其實 E-500 已經有）多左兩個 Mode，
Hi-key 同 Low-key。
詳情就唔多講喇。

第四、微距 Mode。
可以放大十倍黎做 MF，
好方便。

但係，
去完個工作坊後，
我打消了念頭。

第一、個多角度 LCD只係得上（90度）下（45度）調較，
有得左右調較會好好多。

第二、個色 D Tone 有 d 怪，
好啞色，
冇左 Olympus 鮮色既特色。

第三、個 AWB 聽講改善左，
原來都係唔係好得既。

第四、用個 LCD 取景，
Shutter Lag 極嚴重。

第五、冇直倒、冇快門線（雖則我少用）。

第六、Setting 麻煩。
唔夠 User Friendly，
咁好多下先 Set 到一樣野。

E-330 雖然係一部好機，
但係要我放部 E-300，
再補晒四千蚊黎買，
唔係咁化算。

救火

今晚又要開夜，
原本係做份內事。
Tune 個 Device，
唔知點解做唔到。
某 d 情況得，
另一個情況就唔得；
到那個情況攪掂，
就輪到原本個情況唔得。

但係結果都冇時間做。
原因係另一個同事做唔掂佢個 d，
我要幫佢。

我做唔夠十分鐘份內事，
內線電話就響一次，
我又要過去幫佢睇一睇。

結果幫佢攪個 d Bugs，
自己部機未 Tune 好。
最慘既係，
佢個邊都係攪唔掂，
兩頭唔到岸。

有人會話，
攪掂自己 d 野先丫嘛。
但係我又覺得，
兩樣都係公司野，
老闆遲早都叫我幫手救火。
（事實上佢都有講過）

連續返左二十一個鐘頭工，
到第二朝六點半先收工。
以往既我，
會等小巴、巴士返屋企。
今次我係一出公司大廈門口，
已經揚手，
截了架的士。
可想而知，
我係有幾疲倦。
六十幾元，
換黎既係十分鐘返到屋企，
值唔值就見仁見智了。

圍繞食

今日中午去左九龍灣食飯，
因為大虎係沙田出左黎。
上個星期先話大虎唔會出黎同我地食，
今個星期佢就出左黎喇。
去左德福二期四樓間和民，
想唔到食咩，
求求其其叫左個雞扒定食，
味道一般啦，
三十零四十蚊一個餐，
算係咁啦。

---

夜晚又出左 Cafe，
個度 d 人已經開始認得我。
以前去到，
總會問我幾多位。
近排去到，
我唔駛出聲，
佢已經識話我知，
我班 Friends 係樓上。

今次去，
好似換左大部份人。
上幾次去，
真係激死。

Order d 野食，
個幾鐘都冇黎，
原來漏左單。

之後都只係黎左三份之二，
原來再漏單。

今次呢，
服務好似好左，
成三個人一齊拿食物上黎。
叫佢落單呢，
即叫即黎。

冇得訓

昨晚三點先放工返到屋企，
食埋飯，
沖埋涼，
五點先訓。

今朝十點大陸個邊已經打電話過黎。
被佢嘈醒左，
又訓唔返。

十二點輪到老闆打黎，
兩點到同事甲，
完全有機會訓。

四點落去食午餐（定係下午茶？）
食完返黎打陣機。

六點幾食晚飯，
食完 Set Network。
首先裝個 Router，
個 Router support PPPoE，
但係唔知點解，
Connect 唔到。

再 Check 返，
原來個 ID 入錯左。
Set 好個 Router，
到 Set 個 IP Cam。
Turn on 左，
但係點解個 Cam 唔動既？

撞鬼 Lor，
冇啦啦貼張貼紙係度 Warn 我做乜？
Warn 我唔好開左機人力動過鏡頭，
好彩個 Motor 有燒到。

跟住試下 Remote Connect 個 Cam 黎睇。
Private IP Connect 到，
出公海用 Public IP Connect 唔到。
IMS Block 左 Port 80，
咁我轉左做 3000，
Router 都 Forward 左個 Port，
都係唔得，
應該係時得時唔得，
真係玩死。
攪完，
又三點了。

---

問左大衛同學，
玩激流佢冇問題。

又過版

今晚日文考試，
雖則貼士（定應該話係題目）一早已經公佈，
但都好驚唔識，
因為真係冇咩時間溫。

其實今堂係尾二個堂。
考完試，
老師就講下一期係 d 乜。
下期係三級能力試對策班，
但係有 d 人舊年考三級能力試之前就讀左。

而跳一期既話，
新班六月先有，
亦即係下一期完之後。

咁點算呢，
老師就話，
你地係屋企畀 d 心機自修。

---

上完堂，
又返左公司做野。
十點幾老闆打畀我，
問我係咪返，
唔係既話佢就走，
個時我剛剛去到公司樓下，
結果佢冇得走。

攪到一點，
終於又過一關。

一真以來，
個 Dynamic Range 都好似唔足數咁，
原來個 Gamma Table 將 12-bit 既 Data，
只用頭 1024 個 Entry。
大過 1024 既，
就會 Set 晒做 1020。

即係只用左四份一既 Data，
咁個 Range 當然唔足啦。

咁我將 12-bit Map 去 12-bit，
又係唔 Work。
結果發現，
原本粒 Processor Support 10-bit Only……

智能身份證

原來打一日 Wargame 既運動量都幾驚人，
今朝起身，
成身都好累。
夜晚放工，
有 OT 就走左，
因為明天要考試，
要溫書。

返到屋企，
家姐同姐夫都黎左。

因為家姐同姐夫返工，
影如日頭會黎我屋企，
夜晚先湊走。

四個人食飯，
但都食淨好多。
本來明日想唔帶飯，
不過唔帶既話，
食一個星期都未必食得晒，
所以結果都係帶。

---

「香港智能身份證換領計劃」終於到第十八階段 ，
轉載自 http://www.smartid.gov.hk/tc/replace/index.html 的資料。
於1980年、1981年或1982年出生的香港身份證持有人，
換證日期為 2006年3月27日 (星期一)至 2006年5月27日 (星期六) 。

若不在指明限期內換領新證，
就可能會觸犯法例。
在每個指定組別的換證期限屆滿後，
有關組別的市民應已全部換領新身份證，
屆時，他們所持的舊款身份證便會宣布作廢。
有關詳情會另行公布。

凡由於身不在香港而未能在指明限期內換領新身份證的人士，
應在返港後 30 日內，
前往任何一間智能身份證中心辦理手續。
他們毋須於限期前趕回香港換證。

除現有身份證及換證所需的文件外，
申請人須攜同可證明於換證期限內不在香港的證明文件。

大棠打 Wargame

元朗大棠，
跑定向跑得多，
今次去唔係跑定向，
而係打 Wargame。

一開始打車太陣。
對面係一隊人全部識既，
我呢邊就雜亂成軍，
我識既一隻手數得晒。

攪到幾乎各自為戰。
分左三組人，
一組左，一組右、一組中間。
但組與組之間冇 Cover，
組內有溝通。

一開波冇耐，
左翼全軍覆沒，
之後輪到中間。
最後得返包括我在內既右翼苦苦支撐，
最後當然……

打左兩三場，
之後換場，
一個市集咁既地方。
我守中間，
開住槍衝上去。
最後都係輸……

臨食飯，
打左場 CQB。
三個人一組，
終於叫有返 D 合作，
一個睇前，
一個睇後，
一個移動。

食飽飯，
繼續玩。
開始有返 D Team Work，
雖則都係輸多贏少，
到四點半就撒退了。

改完又改

我我討厭即興，
我喜歡計劃。
先不談計劃了，
是否按照實行的問題。
我很怕失預算，
最近就被媽鎷激死。

本來約左上星期六去拜山，
咁我訓醒已經聽到佢約打麻雀了。
之後約今日，
不過佢上星期日又失驚無神話個日去，
最後去唔成。

咁早兩日佢又話影如冇人睇住，
星期六唔去住，
改星期三啦。

今日又話影如返左屋企，
所以又話下午去。
我一早約晒人，
咁當然又去唔成啦。

夜晚又話明日去，
明日我又係約左人……

如果冇約實，
有時突然興之所致，
都還可接受。
但現在唔係呢個情況 wor，
係一早約實左日子 wor。

咁定左係那個日子就那個日子啦，
又唔係有咩特別原因，
鍾意就話改期。

原本日子既約會我推晒就佢，
佢又話唔去。
唔係原本個日我約晒人，
佢又話要去。
真係畀佢玩死。

夜鬼

早幾日同 Moly 傾開，
我們都老了，
捱唔到夜。
以前讀書時，
每日兩三點都唔係咩問題。
現在？
十二點訓都夜喇。
呢排我都平均踩到三、四點。
昨晚五點先訓。

有時想做 d 收工早 d 訓。
不過矛盾既係，
我夜晚既戰鬥力係高 d 既。
近排幾個 Problems，
我都係夜晚先 Solve 到，
日頭反而傻下傻下。

其實會唔會係因為日頭未訓醒所以先……

---

係 Software Engineer's 既 Point of View，
一樣既 Input，
一樣既 Conditions，
應該會出一樣既 Output。

今日收到上面 QA 封 E-mail，
話二百部機，
幾多幾多部黑屏，
幾多幾多部按某個制會 Hang 機。

催促我們盡快解決，
睇完真係火都黎。

好明顯就係佢地問題啦。
唔係 Production Line 裝配出問題，
就係買返黎 d 料出問題。

班國產 Engineer，
有鑊就卸落黎，
有冇攪錯。

激死

今日都係有一半人係國內救火。
我留守大本營，
收到唔少電話。


「點樣 Check 呢個 While Loop行幾耐？」

我：「你 Print 個 Time Before 同 After 咪得 lor，
By the way，佢每次都 Sleep 10ms，
行五次咪大約 50ms lor」

「係咩？有 Sleep 咩？」

大佬，你睇過 D Code 未？

---

「麻煩你幫我預備個 Firmware，
用黎 Check Battery。」

「你剛剛 Send 畀我那個冇 Info. Display wor，
幫我 Check Check。」

點解有個 Software Engineer 係你隔離唔叫佢做，
要叫個冇機係手試 Program 既我做呢？
你隔離那個有機係手試，
我就夠 Dry Run。

---

半夜十二點。

我：「現在咩環境？」

「將 D Database 寫落 Flash 時 Hang 機。」

我：「會唔會 Flash 死左？
又會唔會 Flash Size 唔夠？
有冇試過用個細 d 既 Database 試下？」

「未 Wor」

其實你試過 d 乜？

雖然激死既事唔少，
但當個仔排除萬難出世時，
滿足感都幾大架。

空城計

中午約左孤軍作戰既 101 空降師食飯。
原本係約星期二既，
不過星期二本來有例會既，
所以延期至今日。
但係，
因為公司有一半人上左國內救火，
所以例會取消左（都冇人開會）。

今仲擺埋空城計 tim。
三個上左國內，
一個請左半日假帶個女覆診，
老闆出去見客，
得返我一個係到，
一 d 人氣都冇。

十二點半，
過 APM 找定位啦。
細牛原本預計四十分到，
話到左打畀我，
但係我等到五十分都未收到電話。

有位喇，
一坐低就打畀細牛，
話佢知已經有位。

點知佢個回覆係佢係 Food Court 買埋野食 tim，
我拿拿聲走人，
好彩未落 Order 姐。

食緊野，
隔離個桌唱生日歌，
同一時間，
我對面個位女士（唔識既）電話響。

假設音量有 1 到 10，
正常音量係 5，
唱生日歌既音量係 2，
講電話既音量係 9。
形成一個好大既對比，
一個好有趣既環境。

訓唔到

我近排發覺，
呢度已經比 ICQ 更有效率。
Send ICQ Messages，
幾日都未有回覆；
但係寫係呢度，
第二日就有回覆。

所以我決定借呢度問一個問題：
阿黃先生，
你唔畀你 Account No 我，
我又點入到錢畀你？
當然，
你要請我坐飛機，
我絕對唔介意。
呵呵呵

---

前日收十二點半，
昨日原本都以為要做到咁上下時間。
好似上星期咁，
上完堂要返返工。

不過，
下午突然有突破性既進展。
（天才即係天才）
變左唔駛點 OT，
可以早 D 收工，
難得既準時上堂。

不過，
之前枕住十二點幾一點收工，
三點幾先訓，
結果今晚雖然上完堂十點半返到屋企，
但係都要三點先訓得著。

慘慘慘

我想調較返正常既作息時間 ><

激流？

船長難得 Weekend 得閒，
打左個電話畀我。
佢打畀我既時間，
係我返到公司有耐。

講真，
佢好少係呢個時間打畀我。
唔係返緊學呢，
就係做緊 Project。

呢個時間特然話打畀我，
真係有 d 擔心同驚。
好彩唔係咩危險事，
只係佢八到 d 野同我分享姐。

傾傾下電話，
老闆冇啦啦殺入黎，
所以唯有一路扮做野，
一路聽電話。

---

Henry （有冇串錯？）話想玩激流，
（後按：果然串錯，全名係 Henrietta Maria Apiyo Oyula，簡稱 Henri）
提議找個 Weekend 北上一個州玩。
船長話去，
Anna 話要睇價錢，
大衛未覆。

US$70
70美元, 包:

‧ Slide and personal video presentation of each day’s adventures shot and edited by our in-house video kayakers
‧ Full use of our facilities at The Forks Resort Center: brewpub, restaurant, game room, hot tub, swimming pool, fitness room, paddle tennis court, volleyball, basketball, sit-on-top kayaks
‧ Noon-time riverside cookout prepared by your guide: choose from grilled steak, teriyaki chicken, salmon steak or veggie burger all cooked over a hardwood fire, accompanied by stir fried rice, salad and homemade dessert
‧ Professional Registered Maine Guide in each raft
‧ State of the art self-bailing rafts, life jacket, paddle, helmet
‧ Shuttle bus transportation to and from the river

好似幾抵玩。

閒日

今日訓到四點，
本來好以再訓耐 d ，
不過媽媽十五分鐘一個 Call，
唔醒都唔得啦。

不經不覺，
今日係三月最後一個 Weekend，
我 d 電影贈卷三十一號到期，
所以決定一支公出去睇戲。

本來想睇 Inside man，
不過趕到出旺角，
剛剛開左場，
唯有睇「得閒飲茶」。

買完飛想食 d 野，
點知上一層間 Cafe 執左。
唯有上 Food court 求其咬 d 野，
打陣 PSP，
夠鐘入場。

套戲基本上唔錯，
但有 d 地方摸不著頭腦。
例如劉德華唱歌個段，
真係唔係好明。
兩個主角唔係咩大卡士，
不過 d 綠葉就做足本分有突，
冇佢地套戲會差好遠。

睇完戲出黎，
醒起「影如」下個禮拜黎住，
去旺電睇下 D IP Cam。

唔識揀，
原本睇左 Pansonic 部有 Optical Zoom 既 Cam，
不過好似唔見有貨，
唯有退而求其次。

不過又唔知好唔好用，
真係膽搏膽。

101 空降師的教路

聽日既野戰因為天雨關係，
改左下星期。
不過今日約左四虎，
見到 101 空降師，
有呢位大師父係度，
當然向佢請教下。

個場佢打過，
特點係……臭。

入返正題，
有三個戰區，
名唔鬼記得喇，
101 空降師師父，
見到你就話返我知啦。

第一個場（鐵筒？）

有一棵樹係中間靠左位置。
如果係左邊出發，
可選擇攻。
如果係右邊出發，
因冇 COVER，
所以應該守。

攻既話，
兩翼推進。
即係銀河英雄傳說既兩頭蛇陣。

第二個場（Office？）

中間一堆野，
旁邊有個貨櫃，
貨櫃旁有條直路。
根據大師父既貼士，
向右轉係唔順手既。
所以企係直路上，
如果貨櫃係你既右手邊，
你應該守。
相反貨櫃係你既左手邊，
攻過去啦。

第三個場

用車胎堆了個城堡咁既野，
攻方好，
守方好，
正門都係死路，
繞過去打後門啦。

住宿問題

近排做左傳聲筒，
因為我乜都冇所謂既關係，
所有錢銀既野，
我都交畀大衛決定，
而資料搜集員又只會將 d 資料 Pass 畀我。
咁我就要將資料 Pass 畀大衛，
將大衛既決定 Pass 返畀船長。

其實對我黎講，
錢唔係一個問題。
求其得啦。
最緊要洗得值，
同埋唔會太過 over。

呢兩日，
船長幫我問左住宿既資料，
Range from 80 to 200 左右。
我將 d 住宿資料 Pass 畀大衛，
大衛就問返我，
有冇民宿住。
其實都應該一早估到，
咁多地方唔揀，
係要揀呢度，
梗有 d 原因既。

不過我又唔想煩到人，
所以開頭係打算住酒店算。
不過既然大衛有咁既疑問，
我都應該盡盡人事。

本來好想叫大衛自己問，
但係我作為一個中間人既角色，
又或者係我身份既問題，
呢 d 野係得我問既姐。

不過咪想到點問，
呢排佢又忙到九彩，
都係遲一排先算，
反正都唔急，
我又唔信去到先找會找唔到。

唔搏等幾時？

早兩日開會，
老闆話：
「你兩個星期做得起，
我請食飯，
聽者有份。」

因為咁，
我再次入魔，
繼前晚收一點半，
今晚再收一點半。
不過可惜既係，
仲未做起。

覺得有 d 地方唔多託，
有 d 地方鑽錯牛角尖，
不過係找唔到錯係邊。

九點幾，
我落去食晚餐，
老闆又話去，
結果一齊去左麥記食。

傾左一陣，
講左 d 未來大方向。
佢話我同輝輝（大同）都好搏，
問我地係咪同學之間最搏個幾個。

梗係唔係啦，
搏過我既大有人在，
隨手都舉到幾個，
Roger、Lapson、輝等等。
咁易舉例，
因為我係最懶最唔搏那幾個之一。

記得有個大同，
Year 2 時以 Lab 為家，
除了食飯（Lab 唔畀食野）都係 Lab，
連訓覺都係 Lab。
7 * 24 係 Lab 做 Porjects，
幾時去 Lab 都見到佢，
呢 d 先叫做搏，
值得我學習。

投降輸一半

昨日細牛打電話黎，
話佢轉左九龍灣返工，
午餐要孤軍作戰，
想約我食 Lunch。

不過一個九龍灣，
一個觀塘，
都幾遠下。
好彩我食飯時間較彈性，
細牛又有成個半鐘食，
而就 d。

不過當我問佢幾時開始返新工，
佢反問返我冇睇佢個 Blog 咩。
我的確個幾兩個星期冇睇 Blog，
連金魚那個都唔得閒睇。
不過我記憶所及，
佢好似講過遞左信，
有講幾時返新工咩？
冇咩印象。

今日到我找佢，
因為班大學同學約 Sunday 打 Wargame，
自攜裝備節省百幾。
咁有個住得咁近既 Friend 打開，
又有高級 Equipments，
冇理由唔問佢借架。

佢問左我邊到打之後，
話那兒好臭 Wor，
仲話佢 Bolg 有寫。
我有印象佢有講過，
因為蕃薯問我打唔打 Wargame 時，
我對個地點名都似曾相識。
不過細牛對個地方既評語，
都係冇印象。

因為咁，
我由頭讀多次佢個 Blog，
唔係好仔細咁睇，
不過我掃左兩次之後，
死火，
找唔到個兩偏 Blog。

可唔可以投降輸一半，
你話我知係邊日得唔得？

2530

今日收工收 25:30，
做到 19:30，
個 Hardware 有 d 問題，
畀左老闆攪，
我去上堂先。
上完堂，
22:30 返到公司，
部機放左係我桌面，
但係個 Shutter 唔 Work。
都好既，
我可以專心攪 Preview Mode。

一路試，
一路睇 Spec，
明白左多 d 野。
例如點解有數碼相機有 ISO64，
原來 ISO64 即係 -2dB，
而個 CCD 既 Gain，
最細就係 -2dB。

做到 25:30，
眼訓，
返屋企先。
返到屋企 27:00，
打陣機 Relax 下，
28:00 訓覺。

---

上日文堂個時，
Moly 同我講，
話唔記得畀手信我。
都係遲左一個月姐，
但係 d 食物仲食唔食得我就唔知喇。

---

又有個同事話要結婚，
換句話說，
公司大部份人（除了我之外），
都已經 / 即將結婚。
同事問我，
幾時到我，
講笑咩。

大排檔

今晚偷走出黎，
應該說是較準時收工。
出左深水步，
約左班 Friend 食大排檔。
佢地約係石硤美地鐵站等，
約七點鐘，
我當係到唔切啦。
我成七點半先到
去到打畀佢地，
等佢地較我點行。
不過行錯晒方向，
繞了勁遠。
應該沿南昌街行，
我行左大坑西街。
差 d 落左太子，
好彩中五份暑期工成日黎派傳單，
所以識得停。

差唔多到既時候，
咦？呢條咪大埔道？
早講丫，
我可以坐小巴直到……

其實話佢係大排檔，
又唔係真真正正既大排檔。
只係個鋪位，
有 d 桌椅放出街。

佢地本來想食蠔餅，
點知只有蠔仔煎蛋，
勁失望。

食完飯，
行左陣黃金，
之後又食糖水。

我叫左個芒果琉璃，
d 琉璃好爽口，
不過要咬好耐。
廿蚊一蜿，
算幾抵食。

今次經 LA

又係 Update 旅行資訊既時間。
原本打算坐 UA，
夠晒平，
不過我地既回程時間夾唔到平飛。
如果係都要坐 UA，
就要成萬元（未計稅）。

結果大衛同學提議坐國泰，
國泰八千元左右（連稅）就得。
不過時間就一般。

香港中午一點鬆 D 起飛，
係 LA 機場等九個鐘先轉機，
我地呢 D 外國人，
入美國既 First Stop 要多 d 時間係好正常，
不過九個鐘又耐 d。

回程就六號朝五點先到，
返屋企放低行李就可以返工。

我鍾意經 NY，
不過個 Agent 話夾唔到。
就算有，
大衛同學都唔想。

去個程時間係好好，
不過大衛同學話回程太早，
佢唔想咁早起身。

咁又係既，
我上次都係因為想用盡 d 時間先選佢姐。

其實畀晒決定權大衛同學都有個好處，
因為畀我實攪好耐。
上年我就係呢樣唔滿意，
個樣唔滿意，
結果攪左成個幾月先訂到機票。
現在起碼將個時間減少一半，
未嘗唔係一件好事。

係打緊呢篇日記既同時，
我醒起，
我地仲未處理住宿既問題 wor。

周年晚宴

今朝去拿特區護照，
網上預約十一點。
十一點去到，
交完 Form，
問佢要等幾耐先見官，
佢話半個鐘冇走雞。
咁我開個半個鐘既 MHP Quest 黎玩，
打到就完，
到我見喇。

攪掂晒畀埋錢，
十二點左右，
而新護照四月十一日有得拿。

之後過海，
約左買家交收個三件配件，
我同佢地冇緣，
希望新主人會對佢地好啦。

之後去拿埋成績表，
日本語能力試四級及格，
呵呵呵。
不過分數得 272，
有 d 底，
有 d 唔開心。

夜晚去左 IEAA 個校友週年聚餐。
我覺得作為對個場合既尊重，
恤衫西褲係當然既選擇，
最好就當然打返條 Tie。
就算唔咁樣，
都有領恤丫。

可能我呢個想法過時啦，
Formal Dressing 既一半都冇，
阿梁甚至問我，
駛唔駛呀？

Anyway，
席間有 d 好攪笑既野，
就係佢地播片。
咁個度有兩個 System，
一個係播碟，
係幾部電視出，
另一個係投影機駁電腦。

咁佢地就做人肉同步，
結果當然成日唔同步啦。

我唔明，
冇理由碟機冇 External Input/Ouput，
咁有同一個 Source 播（電腦好、碟機好），
咁咪同步 Lor……

圍棋

原本今日約左舊同事打波，
七點半落到球場，
一個人都唔見。
打電話畀威廉，
佢話阿傑唔得閒，
Elton 又話唔得，
所以取消左。
取消唔係問題，
取消都通知聲丫。
我帶晒衫褲鞋，
一個人係球場等……

既然得閒，
就出左旺角捉圍棋喇。
今日影會班 Friend 係旺角 Cafe 捉圍棋，
我去湊熱鬧。

中三開始身為棋藝會會長，
對所有棋當然都有一定知識，
捉得唔叻，
都總算識捉。
中國象棋、國際象棋、日本將棋、
A&A、AD&D、英倫海峽、Risk、
星空奇遇記等等。

至於圍棋，
基本知識都有既，
咩叫氣、咩叫真眼假眼、
圍地、征子等，
都知既。

但係 d 咩棋形呀，
下定邊度要接邊度呀，
就梗係唔知啦。

今日總算再學過。
對左三個人，
頭兩個都贏，
跟住對 Hkzooo，
慘輸三個回合，
我下次一定贏佢。
哼

我的攝影器材

我由細到大用既相機，
都係借家姐既。
第一次借，
係小學畢業營。
係某朝既早餐時間，
跌了落地，
自此入電位要貼膠紙。

之後有部 APS 傻瓜機，
我去泰國、土耳其比賽都係用佢。

大學畢業時，
借既係 Sony 大大部唔知咩形號。

i.2000 出去玩時，
見 Dada, Calvin, 輝等拿出數碼相機，
總會羨慕不已。
到出左黎做野，
終於有屬於自己既相機。

該年近聖誕，
一黎就去旅行，
二黎要影相做習作（野外定向一級教練班），
所以買左部有 10倍光學變焦既 Olympus c750。

一年之後，
都係聖誕，
我買了我既 DSLR - Olympus E300。
之後買左唔少配件，
代用電啦、
直倒啦、
手帶等等。

到今日，
器材再有變化。
唔係再添置，
而係賣出直倒、代用電及手帶。

個手帶我好鍾意，
穿隻手入去好有安全感，
唔驚跌機。
不過用手帶就一定要加直倒先夠扣。
但係個直倒就 Function Limited，
得個快門制，
光圈快門全部冇得較。

去個兩次 Trip 既經驗係，
相機加直倒真係好重。
個直倒有用都話，
不過 Limited 既就真係咪攪。
如其留係防潮櫃封塵，
不如賣畀有心人啦。

就係咁，
配件就一次過少左三年喇……

旅行資料備忘

做定功課先：

交通資料

以下網站, 左手邊, 睇NYC Transit o既pull down meun

紐約交通圖

波士頓交通資料

華盛頓交通資料

穿州過省的長途車，
自遊行一大首選。

請注意，
Boston、Washington、New York 呢三個地方o既車票，
成日都有特價。
所以除左查正價票之外，
請留意網頁上的小廣告，
不妨多按多看。

「穿州過省除左巴士之外，
都可以坐火車。
個人認為，
巴士座位比較舒服。
不過若覺得大學時代，
未做過backpack 族，
嘗試坐火車歐遊的感覺，
這也可作補償參考..........」
船長說。

通訊資料
漫遊 SMS，
Sent 就 @HK$3.83 ~ @HK$5.xx 一個，
Receive 就免費。
通話，
大約 HK$10 一分鐘。

至於買當地儲值卡，
第一次收費唔肯定，
SMS 係 @US$0.05美元一個 Sent or Receive，
International SMS 就係 @US$0.2 Sent, @US$0.05 Receive，
仲可以打埋 IDD，
斷分鐘計錢。

初步計算，
似乎儲值卡抵 d，
不過要等價錢 Confirm。

---

覆返老師個留言先，
新 No 係 3G 六個月試用，
舊 No 仍然會 Keep 住先。

放水

今晚上日文堂，
老師畀考試貼士，
畀得好過份，
淨係溫貼士，
應該都有七、八十分。

唔應該話係貼士，
應該話係題目……

生字考十個，
以往係話第幾課考幾多個，
最盡都係畀二、三十個考十個。
今次係只畀十個，
邊個係漢字轉拼音，
邊個係拼音轉漢字都講埋。

文法出咩，
短答問乜，
全部講晒。

咁仲邊係考試 wor……

老師以為下個星期係考試，
叫我地加油。
但係仲有成三堂要上 Wor……

---

一段電話對答。

「你會唔會……」

「冇時間」

「唔會阻你好耐……」

「冇時間」

「真係唔會阻你好耐……」

就緊睇好似係 Sales Call 客咁，
其實係媽媽叫我落街食野……

3G 優先試

出左新電話，
仲有新電話 no。
第一次有 6 字頭既電話 no，
想知既就問我啦。

夜晚八點去拿機開台，
上到二十樓，
比想像中少人。
基本上唔駛排隊，
埋到 Counter，
填問卷，
之後佢就講解喇。

不過 d 收費都幾貴，
International SMS $5 一個（我現在用緊個台係 @$2），
跨網 SMS @$0.8（我現在用緊個台係 @$0.5）。

問佢 Download Data 幾多錢，
佢答唔知幾多 KB，
作為一個電腦人，
好自然會問佢：
「大 B 定細 b？」
佢想左一想，
問返我問咩。
我唯有改少少再問：
「Byte 定 bit？」
佢答：
「K……………………Byte」

其實部機開黎冇乜用，
因我都好少用電話上網 Download，
尤其是斷流量既計費。

可能因為未有 killer application，
3G 講既係高傳送速度，
但係係手機睇電影，
個 Mon 咁細，
邊有樂趣？

如果可以結合電腦，
又或者比 SMS, MMS 更進一步既 VMS，
會唔會有用 D 呢？

又可能，
找的唔係 killer application，
而係 killer application set 呢？

咦？
做乜係咁搬我篇畢業論文 d 論點出黎？

婚宴

今晚有個舊同事結婚，
請左我去。
飲宴地點係「假期酒店」，
環景唔錯，
不過食物同服務就……

先講食物質素，
普通酒樓水準都唔及。
再講服務，
唔知負責我個圍個侍應唔掂，
定係 Average 唔得。
首先係佢個樣唔得，
未訓醒咁，
精神 d 先得架嘛。

係酒樓飲到酒店飲有個分別，
就係酒店通常會分晒一店店，
一人一店咁。
不過我個圍個侍應就……

第一次，
十二個人佢分左十一碟……

第二次，
分蝦球，
十一碟有兩個，
最後一碟得一個……

到分翅同糖水，
有幾碗就滿到就黎瀉，
有幾碗就大半碗都冇……

分飯同麵，
分剩左 d 都唔分埋佢，
又或者留低，
浪費晒 d 食物。

最攪笑係佢分食物個方法。
d 碗、碟就貼住個轉盤圓周，
食物就距圓心半徑一半既距離，
結果佢次次分到一半時，
要申盡晒手先分到，
仲要我地幫手轉盤……

Anyway，
今日係人地大喜日子，
擺左接近四十圍，
冇玩新郎新娘環節，
係新郎上台唱左支歌。

如果彈銀充裕，
似乎都攪得過，
叫做可以滿足媽媽既要求。

換機深思

呢頭話要早起身買禮卷，
個頭又打機打到三點，
結果……
醒個時已經一點……

下午去左 Cafe，
同班 Friend 玩 MHP。
由兩三點玩到七八點，
之後我行左陣星際。
去左睇相機，
淨 Body 賣六千。

不過今日同人傾過，
部新機唔係比我現在個部好好多。
其實性能差不多，
相片質素可能 Improve 左，
不過佢比我現在呢部更入門級。

有 LCD Preview，
對玩開 DC 既人黎講，
較易上手。
我試過有次借部相機畀 Friend 玩，
佢問我點解 LCD 冇野睇。
有 LCD Preview，
尤其是個 LCD 有得較角度，
有第二個好處，
就係高（例如人群中）、低（例如影花蟲）抄時，
有得 Preview，
唔駛估估下。

不過有利有敝，
就係佢 d 快門、光圈係觀景器係冇數字睇，
要睇返 LCD 先有，
咁好麻煩姐。
就係呢個缺點，
攪到我想打退堂鼓。

不過高階既 e-3，
又未有咁快出，
保守估計都要第二季尾，
第三季頭。

換機

唔好好節制，
錢真係會愈洗愈多。
今日和同事食飯，
唔知講開咩，
佢話佢都想玩下 DSLR，
我就口痕話讓我部 E300 畀佢。
如果成交既話，
我就要賣新 Body。

我附出既包括，
E300 Body、
ZD 14-45 F3.5-5.6 2（呢支鏡我冇乜機會用）、
直度（一個冇 function 既直度，話佢係電箱仲貼切）、
兩舊副廠電、
手帶（新機用唔到 ><）。

我貼多二千蚊左右，
就有個新 Body 喇。

不過呢，
我其實未決定既。

	E300	E550	E330
儲存媒體	CF	CF, xD	CD, xD
有效像素	800 萬	800 萬	750 萬
影像感應器	4/3型全幅度CCD	4/3型全幅度CCD	Live MOS 影像感應器
LCD	1.8 寸HyperCrystal	2.5寸HyperCrystal	2.5寸HyperCrystal，可調整上下顯示角度
連環快拍	2.5/S	2.5/S	3/S
尺吋	146.5 mm x 85 mm x 64 mm	129.5 x 94.5 x 66 mm	140 x 87 x 72 mm
重量	580g	435g	550g
其他特點		高光/暗位重點測光模式	高光/暗位重點測光模式、LCD 取景

---

下個星期六係舊生會周年晚宴，
試過聯絡佢地，
不過似乎反應不熱烈，
唔通去唔成？

---

星期日去飲。
原本叫左同事個女友幫我買禮卷，
不過佢唔記得左，
睇黎要聽朝早 d 起身去買。
不過要我早起身，
又談何容易？

唔講點知？

陰公，
真係有錢賺都唔得閒收呀。
上次 Poon Sir 張票未收，
早兩日 MK Sir 又話有張票畀我，
我都未得閒返去拿，
仲有 OA 既教練津貼未拿，
我甚至連今個月份糧張票都未得閒入，
真係慘。

---

調較緊自動曝光，
條數計極都錯，
快門時間係一既負四十七次方秒，
邊有可能？

後來發現有 d Info 我係唔知既。
我一路以為，
個 OS return 返黎一個單位，
就等於一級光度。
點知，
原來只係等於八份一級光度。
呢個 Info 係同事今日話我知，
但係我手上所有 Documents 都冇寫……
真係畀佢玩死，
浪費左我成個星期。

條公式有 Log，
代返八份一落去，
d 數字正常好多……

---

點會加左價架？
上幾個星期問都係三千八，
今日問已經四千六，
康泰仲貴，
一萬七百先買到……

Planning

老細昨日開會話請假要早 D 請，
咁我昨晚 Check 過有幾年假後，
今日就入紙申請喇。
老闆話大致冇問題，
前提係，
到時 d 野冇乜問題，
就可以放喇。
應該可以成行，
希望到時我同事頂得住啦。

其實早兩個月申請都唔係好早姐，
我試過早半年請假 Tim。
其實 Plan 就一早 Plan 左，
點解唔做 d 入紙拿假呢？

拿假冇問題，
可以正式訂機票喇。
Send 左 E-mail 拿 Quotation，
但 Feedback 返黎個價貴左八百元。

又有 d 狀況發生，
原來大衛同學本 Passport 過左期，
佢要申請護照。
不過佢持葡國護照，
原本唔駛簽證，
不過如果現在申請特區護照既話，
就要申請簽證喇。
聽講領事館個 Killer 去左，
我想佢都應該申請到既。

---

失去左聯絡半個星期，
連預約左既電話都收唔到。
有 d 擔心，
想 Send SMS，
不過攪好耐都 Send 唔到。
Send 就 Send 左十幾封出去，
不過好似一封都去唔到。
有時間要問下 CS 先。

例會

每逢星期二既早上十點三十分，
都係開例會既時間。
但因為老闆遲返既關係，
好多時都要 Delay 一個鐘。
咁一開通常都開到一兩點。
今日，
Delay 得仲緊要。
因為一黎要出糧，
我地公司係出支票既，
咁老細之前過左美國，
星期一先返黎。
但係我星期一又上左國內 wor，
結果就今日先出。

二黎老細又有 E-Mail 要覆，
所以遲遲都開唔到會。
等到十二點半，
我見都有乜跡象開會，
就出左去食飯了。

到下午，
都係唔多覺佢得閒開會。
到四點左右，
終於開始開會。
原本話要做個 Test Program，
我望一望隻錶，
五點姐，
今日都起到啦。

點知，
一開就開到七點半，
結果都要明天先交到貨。

開會既時候，
睇返個 Job List，
嘩！
有冇咁長、咁多呀？

有排做了，
公司人少真係慘，
下下要硬食。

工幹

今日又要返國內做野，
事緣上星期五，
個內個客既 QA Dept Send E-mail 黎嘈，
話有好多時都 Hang 機。
但係我地係香港又試唔到 wor，
叫佢地每次都詳細少少講做過 d 乜後 Hang 機，
佢地又唔理。

老闆大發雷霆，
係美國打長途電話返黎剷。
結果，
今日就同個同事上去 Debug。

星期五 Send 左個新 Version 畀佢地，
叫佢地星期六試完畀個 Report 我地，
結果等到星期日晚都收唔到。

戰戰兢兢咁上去，
好驚有咩大鑊野要有排攪。
都有心理準備要做過夜。
點知上到去，
「冇 Hang 機喇…」

Well……

幫佢地 Tune Image Quality，
真係畀佢地激死。

張相，
佢地想塊面光 d，
但又唔想背景爆。
想塊面紅潤 d，
但又要唔影響到其他色。

係可以就咁改既，
我地影背光相就唔駛加閃光燈補光啦。
當然，
Photoshop 個 Highlight/Shadow 都做到，
你可以點解我地部機做唔到？
我可以答你，
我唔識 d 咁深既 Algorithm。

食白果

最後一場聯賽，
白石橋舉行。

我既出發時間係十一點十八分，
所以可以晚 d 先出門口。
連媽媽都問：
「你唔係比賽咩？仲唔出門口？」

今日賽程長 7.1 公里，
攀高 450 米。
起點去一號，
有三個選擇，
1. 全程跑大路。但距離較長；
2. 先跑一段大路，然後斜上入 Point。距離最短，但入林時間多。
3. 比 2 跑多一點大路，然後直上入 Point。

我選 2，
不過似乎 3 應該更好。

一號去二號，
平 Control，
好順，
不過找唔到個 Point。
（最後賽會話放錯 Point ><）

幾經辛苦，
終於找到個 Point，
繼續玩落去，
大錯唔多，
幾順。
十三去十四，
兩個選擇，
繞路或剷林，
我選剷林，
結果困在河谷，
又浪費了三十分鐘。

返到賽事中心，
得知條 Course 取消左。
即係今個賽季白做。
一場冇報（當天要考日文），
一場 DISQ，
一場 Cancel，
得零分。

---

Dada 約食飯，
結果有成十一人出席。
賴米成功轉工，
現在係 SA。
一班大同，
大部份都已經高薪厚職了。

一品鍋

原本今朝去拿特區護照 Form，
因為媽媽昨日幫我拿左，
所以今日可以訓晚 d。
不過都唔可以咁晚，
因為要去兩轉銀行。
首先要去富邦入錢落支票戶口，
之後再去東亞找卡數。
我成日唔記得找東亞卡數，
今次被佢罰左百幾蚊。

同媽媽食完午餐之後，
去左睇戲。

本來想睇 Firewall，
不過剛剛開左場，
唯有退而求其次，
睇天生一對。

比相像中好，
不過不失啦。

睇完戲就上堂，
上完普通話堂，
就去左食火鍋。
一班 PSP Group 既網友，
自然一坐埋就打機，
基本上，
打機既時間係多過食野既時間。
當一大班人一齊食火鍋，
好自然就變左食一品鍋。
亦因為咁，
所以基本上我地可以專心打機，
水滾就食，
食完自然有人落野。

食完十幾廿個人落 Pub，
食完蛋糕（其實今日係生日派對），
十二點唔夠我就要撒退。
因為聽朝要上山比賽。
今晚滴酒不沾，
唔錯唔錯。

光圈與快門

因為工作，
上網搜集資料，
順手 Post 埋係度。

光圈
光圈控制每一單位時間可以通過鏡頭的光的多少。
光圈愈大進光愈多，
反之亦然。

光圈一般以 F.No 表示，
常見的有 F1.0, F1.4, F2.0, F2.8 等。
光圈每相差一級，
數字相差 1.4 倍。
正確點來說，
是「開方 2」倍。
數字愈小，
代表光圈愈大。

原來 F.No 代表一個比例，
就是光圈直徑和焦距的比例。
舉例說，
光圈直徑為 50mm 而焦距為 50mm 的鏡頭比例為 1:1，
我們稱這為 F1。

直徑 50mm 的光圈面積約為 1963 平方微米（pi * r * r = 3.14 * 25 *25） ，
若我們想將進光量減少一半，
應將面積減為 981.5，
即圓直徑減為 35.355。
新的比例為 1:1.4 (F1.4)


快門
快門比較簡單，
即控制爆光時間。
快門愈快進光量愈快，
反之亦然。

常見快門（單位為秒）包括 1, 1/2, 1/4, 1/8, 1/25 等。


曝光值
這更簡單。
曝光值 (Exposure Value, EV) = 光圈值（AV） + 速度值（TV）
AV = 2 * Log(base 2) F.No
TV = -Log(base 2) Shutter Time

如果我想要 EV 16 的相片，
若定光圈為 F16，
快門則應為 1/250 秒。

苦定快門為 1/8000 秒，
則光圈應為 F2.6。

Reference:
Photographic Theory by Terry Blackburn
簡易攝影教學 by HkZOOO

繼續計劃

繼續講下旅行。
其實主要因為有 d info 係公司部機，
想返到屋企都睇到姐。

講返日子，
可調動既日期唔多，
媽媽話佢六月十一想擺壽宴，
換句話說，
我十日前要返黎。
大衛同學話佢 d 年假，
冇十日都有八日，
即係話，
關鍵又係我度。

咁去到 Boston 有咩做呢？
有人話一日行得晒，
而據當地人士消息透露，
只行市中心，
一兩日就攪掂晒。
如果去埋效區，
咁就要四、五日，
因為仲有交通時間。

大衛同學曾經提過租車既野。
一星期連保費及稅款，
一共由一千七百港元起。
如果單日計，
一共三百幾港元起。

至於住宿，
平均一百至二百幾美元一晚，
如果肯花時間開車，
住郊區就可以較平，
大概70美元一晚。

Boston 雖然棒球興 d，
但都有隊 NBA 隊，
一般季後賽，
票價由10美元至750美元。
Semifinal 同 Final 會唔止呢個價，
但要睇下 Boston Celtics入唔入到季後賽。
佢現在東岸排第十，
後後第八既 Milwaukee 九場，
機會似乎……

至於機票，
網上 Check，
國泰要近萬一張飛。
今日去 Agent 問過，
聯合有推廣，
三月十七日前出飛，
只需三千八百港元，
計埋稅同燃油附加費，
五千左右啦。

任務失敗

日記補完計劃都差不多寫完，
還欠二月十八、十九兩日。
兩日都係跑定向，
兩日都係失望既表現，
所以都係唔係好想寫，
先欠後補。

---

個份「神兵利器」終於到達。
不過，
三件配件。
一件（信）平安（我估）到達；
一件（信封）滿身傷痕；
一件（禮物）失蹤。

原本以為，
細細件，
寄空郵得啦，
省回幾百蚊，
點知因小失大……

以後都係事冇大小寄 Speedpost，
又或者幫襯個 Friend 間速遞公司。

既然份禮物唔見左，
點都要補返既。
等我再買過，
五月親身拿過去啦。

---

d 錢好似同我作對咁，
呢排要係咁破財。
月中既婚宴啦，
再買禮物啦，
連 PSP 都係咁出新 Games，
一隻 Eyeshield21，
一隻筋肉人，
一隻大航海時代，
我都好想買。
不過買左，
又玩唔玩得晒呢？

電話預約

昨日朝既一通電話，
預約左今日要講電話。
不過呢，
我記錯左個預約時間，
晨早六點鐘就起身等。
結果……
到七點半，
又上返床訓一陣。
結果，
今日係僅有既準時返工，
十點正返到公司開門。

到十二點四，
終於收到電話。
當時，
我剛想從辦公室離開，
到 APM 食 Lunch。

因為驚係電梯會收得唔清楚，
所以由廿七樓行落黎。
行廿五層樓梯都唔係好耐姐，
都係三兩分鐘既事，
都未講完一個電話。

---

今日上網 Check 過價錢，
西北航空係有四千蚊既機票，
不過睇返 d 航程，
真係人都癲呀，
轉兩程飛機，
蝕時間都有排蝕。

至於國泰，
時間好好多，
經 New York，
轉機時間相差兩個小時，
唔駛好似上次咁係候機室打三、四個鐘 PSP。
不過價錢就貴少少，
要成萬蚊。
而呢個係航空公司報價，
經 Agent 買應該會便宜少少。

Anyway，
我比較希望 25/5 朝出發
5/6 回程。
因為我得七日大假拿，
而 weekday 出發可以平 d。

角力

今日幾續同做 Hardware 那個人角力。
話說個 Product 可以分作三 Parts，
一 Part 係 Hardware，
一 Part 係主 CU 既 Firmware，
一 Part 係另一隻 Controler Farmware，
咁我負責既係 CU 既 Firmware。

理論上，
應該粒 IC 會畀個 Pluse 出黎，
Trigger 個 Controler 做一 d 動作。
現在個問題係，
個 Signal 一直都係 High，
咁自然談不上有個 Pluse。

以前得 A 機可以著到，
咁冇得試，
佢自然賴我個 Firmware 有 Bug。
好喇到 B 機都著到，
個 Pluse 有係度，
唔係 Always High，
咁好明顯係 A 機有 D 野 Short 左。
佢竟然話唔係，
話係 Controller 個 Program 有問題，
仲話要做 d test。

我理論好簡單，
如果硬件一樣，
同一樣既 Conditions/Input，
用同一個 Software/Firmware，
得出黎既 Results/Output 一定一樣，
除非個 Program 係用 Random。

現在好明顯就係 Hardware 既問題啦。
最攪笑係，
我 Program 完，
試左有畫面，
拿過去畀佢 Test，
係佢面前撻著左冇問題。
返到埋位一陣，
佢話個 LCD d 色錯晒，
叫我 Check Check 個 Program。
冇野呀？
又入我數？
最後佢發現駁去個 LCD 條 Cable 可能有條線斷左，
仲要 Warn 我叫我下次用得小心 d。
好似係佢玩斷……

如果佢係同我一樣咁高咁大，
我一定剷到佢上天。
可惜既係，
佢把口大過我把口，
因為佢係老細之一……

玩通頂

昨晚又通頂，
上兩次通頂係因為工作，
今次唔係喇，
係因為玩。

話說 MHP 那個 Game，
我地好多時都約出黎玩，
一般都係去旺角既 Cafe。
由晚上七點玩到十二點，
食埋晚餐，
消費約為每人五十蚊。
十蚊一個鐘，
都幾抵玩。

咁昨晚有個 Friend 話佢屋企得，
咁我地就轉移陣地，
去左佢屋企玩。

有四個由中午一點已經係 Cafe 打，
我上完堂，
黃昏去 Join 佢地，
有兩個唔得閒走先。
到八點半屋主於工，
我地就坐小巴落葵興。
食過晚飯，
我地就開始開戰喇。
到左一點幾，
仲有一個人黎，
我地順手 Break 一 Break，
落去買野飲。

之後返黎繼續打。
打到七點幾，
落去食早餐，
之後返屋企。

返到屋企，
沖埋個涼就訓覺。
咁今日好順理成章，
全日大覺訓。

代溝

今日上左牛寮教班，
班學生係來自觀塘一間中學既學生，
中幾就唔知喇。
佢有兩個集合地點，
一個係觀塘，
佢地間學校，
坐旅遊巴上山。
另一個自然就係係山上面等。
因為我唔清楚間學校係邊，
所以我就選擇直接上山。

佢再三叮囑我唔好遲到，
所以我好早就出門口喇。

約九點正係山等，
我八點半就到左，
但係架旅遊巴就九點半先到。

今日個山都有幾多人，
由我地個班啦，
仲有另一個班，
再加埋 Squard Training。
仲有 d 露營人士，
同埋 d 不知名既定向活動者。

唔知係咪我要求高，
現在 d 童軍營真輕便，
可以就緊一個斜袋。
d 竹呀、營呀 d 重野，
就由間客貨車載上黎。
而我見 d 童軍做紮作，
成個幾鐘都起唔到個營……

最唔順眼就係佢地圍營區，
營區仲包埋個公家垃圾桶，
咁 d 人想丟垃圾咁點呢？
行入你營區？

講返教個班學生，
有部份都係童軍，
不過紀律就……
開始覺得有代溝……

你錯定我錯

簡直浪費時間。

話說做緊個 Project，
兩部機，
一部著到機（A 機），
一部著唔到機（B 機），
或者正確 d 講，
係一著就 Hang 機。

From day 1，
我已經話係 Hardware 問題多過 Software 問題，
不過 Hardware 那個人話唔關事，
要我 Software 攪。
鬼叫人地係老闆，
我口細冇野講，
唯有係我做。

兩部機其實有少少分別，
B 機係確我 Firmware 開機個時出個 Pluse 去 Reset 個 Controler，
A 機係由 Hardware 去 Reset。
佢成日 challenge 我話係個 Scope 到睇唔到過 Pluse，
Always 係 High。

攪左一個月之後，
最後發覺係條 pin short 左落 Power Supply 到……
簡直係浪費我時間。

好喇，
到 B 機著得到喇，
但係一開機就 Display 正在開機中。
我又攪左一大輪，
結果就係……

個開關制 Short 左去個轉盤制到，
咁個 Firmware 一 check 個轉盤制，
On/Off 那度就收到 Signal，
跟住就關機喇……

結果兩個唔關我事既 Hardware 問題，
浪費左我成個月……

舊同事

今晚約左班舊同事食飯，
如本係約上個星期既，
不過因為其中一個唔得，
所以改左今個星期。
約出黎既目的，
除了係聚舊之外，
仲係因為其中一個結婚派帖。

約左七點係旺角朗豪坊等，
不過因為公司臨時有鑊，
所以我成七點半先係公司走。
落到去都成八點，
不過我竟然唔係最遲。

今日九個人，
有四個（包括我）已經冇係該公司做，
一個係 Parttime，
另外四個仲做緊。

不過似乎，
情況每況愈下，
愈來愈多怨言。

離開左，
聽返以前 d 事都幾攪笑。
估唔到以前 d 同事咁八卦，
一時傳呢個追那個，
一時又傳那個送花畀呢個。
最攪笑係，
佢地話我以前係公司好靜，
甚至有時唔知我有冇返工。
沉靜都有沉靜既好處既，
起碼與世無爭。

原來我舊同事都有玩 MHP，
同佢 Link Play 左幾鋪。
飲完第二 Round，
大約十一點半，
就散了。
下次見面，
應該係十二號晚飲個時了。

危險駕駛

今日又要上大陸，
夜晚坐車落黎，
原本去黃崗。
點知架車行到布吉左右壞左，
結果我地要落車再找的士。
好彩係行城市路，
唔係 D 叫天不應叫地不聞既高速路。

等左一陣就有的士，
不過係泥猛的，
即係計人頭收錢那種。
架的士原本已有兩個乘客，
再要迫多三個落去，
我要縮埋先坐到，
落車個刻係勁腳痹。

而呢架的士就係去羅湖既，
咁我地就係羅湖過關。
過香港個邊好攪笑，
佢既編排係咁既。
左邊係有關員，
中間係 e 道，
而最右邊又係有關員。
唔知點解，（最少我今年過兩次都係咁）
右邊係有人排既，
所以我過完仲快過行 e 道個位同事。

講起的士，
上次坐個架就攪笑。
個司機好趕時間，
逢車過車不特止，
連紅燈都唔想等。
咁佢又唔係衝燈，
而係先轉右，
跟住 U-Turn，
之後再轉右。

話說呢度有 d 路口，
右轉唔駛睇燈，
係左轉同直行先要，
所以就有 d 咁既駕車路徑，
我坐係架車到就真係呆晒。

支票

有三張支票，
都係「以前」做落既一 d 活動既津貼。
一張係上年十月攪比賽，
我作為活動負責人，
預先墊支左 d 錢，
早兩日先收返張支票。（以下簡稱支票 A）

另一張係上年十一月攪比賽，
我同埋其他山上工作人員既津貼，
早兩日都仲未收到張支票。（以下簡稱支票 B）

最後一張係今年二月幫手攪比賽，
我個人既津貼，
早兩日已經收到張支票。（以下簡稱支票 C）

今日拿去銀行，
同利是錢一齊入，
最細銀碼那張支票 C，
順利入左。

支票 B 未收到，
冇得入。

想講既係支票 A，
我真係唔知寫支票那個識唔識寫支票，
定係細個讀書冇教過中國大寫數字。

話說張支票銀碼係 $916.9，
咁佢寫：「九百一十六點九元」
真係要叫晒救命。
第一，
冇理由用「點」，
應該用「元、角」；
第二，
用中文應該用大寫。

所以正確寫法係：
「玖佰壹拾陸元玖角」

結果呢張票梗係入唔到啦。

冇記性

人老左，
記性差左。
之前有兩個星期既日記落後，
一路打兩個星期前既野，
有 d 吃力。
唔好話兩星期前，
幾日前既都唔係好記得。

話說我有記低消費既習慣，
但因為懶既關係，
好多時都只係幾日埋數一次。
今日埋數，
銀包有咁多咁多錢，
點解個 Record 多左錢既，
我邊度洗左未記賬呢？
結果咁就攪左我個幾兩個鐘。

---

中午約左嘉賢食 Lunch，
嘉賢係我一個大學同學。
今次約我既原因係，
嗯嗯，
佢入左 PRUDENTIAL 做。

---

夜晚約左 Omuser 打籃球。
同一時間，
PSP Group 個邊又約出黎食飯，
順便交收頭文字 D 同 2G MSD 卡。
我約左 Omuser 個邊先，
在情在理，
我都應該去 Omuser 個邊。
不過我又好想玩頭文字 D wor。
其實都幾矛盾，
我唔識駕駛，
未玩過街機頭文字 D，
點解會想玩呢？
奇怪奇怪。

投降

今日真係玩野外定向喇，
係大帽山扶輪公園。
新賽區新圖，
賽程長 6.6 公里，
攀升 500 米。

今日天氣凍，
有雨有霧。

一出發，
已經錯左九十度。
之後一號 Point 已經追到上一分鐘個參賽者。
不過之後上山，
被佢放甩。
沿住大斜路係咁上，
之後又畀我追得返。

玩到咁上下，
我迎面碰到班行山人士，
咦？咁熟口面既，
原來係童軍兄弟。
要解釋下佢地做緊乜，
因為都佔幾重戲份。

佢地行緊山，
由大帽山行落荃錦坳，
一路落山。

玩左一半，
要換圖，
我又要上山。
我再次迎面碰到班童軍兄弟。

繼續玩，
我又落返山，
又再次上山。
第三次迎面碰到班童軍兄弟，
亦即係我已繞左三個圈。

玩到三十三號 Points，
望一望錶，
已經超時，
淨返三個 Points，
又要再上山，
我體能應該負荷唔到，
所以棄權了。

---

夜晚去 Auntie Yip 個壽宴，
媽媽又話要攪，
六月十一日，
仲命令我唔可以離開香港。
（舊年我唔係香港）

嶺南之風練習賽

今個賽季最後一場練習賽，
今日係美孚舉行。
嚴格黎講，
呢個唔係一個野外定向比賽，
因為舉行既地點係公園。

個公園話大唔大，
話細唔細，
不過睇過賽程，
都大約估到佢要跑幾個圈。

呢個黃昏定向賽，
（其實未到黃昏已經完左）
我成四點先到賽事中心，
換過跑衫就準備出發。

因為明天仲有一場聯賽，
預料今日既主要對手都應該會留力，
所以今日係搏獎既好時機。

一開波幾個 Points 都幾順，
一到 Long Leg 就出事。
唔係迷失，
又或者走錯，
而係體能出事，
我根本跑不動。

唔 Fit 就係唔 Fit，
跑兩步（冇計多）就開始氣喘。
結果後半段大部份都係走。

去到尾二個 Point 已經被人追到，
打算拿返個尾彩，
爆埋尾段，
點知就畀佢個冇畫出黎既高度差騙了，
白白走了冤枉路。

最後衝線，
二十六分三十四秒得第三，
比第一慢三分半鐘……

出發

有人出發去墨西哥了，
不過遺憾既係，
寄去既裝備仲未收到，
船長少左件神兵利器用了。（再誇 D 丫笨）
希望今次「出海」，
佢可以順順利利啦。

---

夜晚又出左 Cafe 打機，
現在一般都一個星期出黎打一次。
我地係一個影相 Forum 識，
估唔到約出黎打機，
仲密過出黎影相。

有個人好慘，
帶左部機出黎，
但係唔記得帶 Game，
結果就睇住我地打，
佢就冇得玩。

又有一個人，
佢個 Save 壞左，
結果要由頭打過。

今日幫好多 Friend 升級。
話說升級，
要打「四本之角」，
即係打兩隻雙角龍。

打左四次，
幫左四個 Friends 升，
簡直係對我既特訓。
現家打佢已經好順手，
誘敵->
伏擊->
猛攻->
剿滅->
過關。

炒

個工人，
今日終於被家姐炒左。
原本打算一個月後，
等新那個黎左先炒。
點知，
今日已經頂唔順要炒。

基本上，
佢係完全唔及格。
唔係話佢唔做野，
想反佢好勤力，
但係佢係唔適當時間做唔適當既野，
又或者愈幫愈忙個下敝呢。

舉兩個例，
朝早六、七點仲好夢正甜個時，
佢拿開部勁嘈既吸塵機吸塵。
到你起身趕返工，
你總會發覺佢係度洗緊廁所；

發生個一件好危險既事。
話說佢係姐家幫手湊 BB，
除左佢之外，
仲有個「陪月」係度幫手。
咁 BB 肚餓喊，
陪月就去開奶，
叫工人睇住個 BB。
點知個工人唔理個 BB，
走左去打掃！
好彩冇發生意外……

不過點解家姐唔忍埋呢個月呢，
就係因為工人整爛左姐個女將沖涼床，
所以就要即炒喇。

不過呢，
炒左佢仲麻煩，
因為姐要打鑼咁找個新既黎，
而最快，
都要下個月先到。

考慮

講返個旅行 Planning。

在我而言，
我希望五月頭去，
因為五月一日係勞動節，
五月五日係佛誕，
兩日公眾假期，
亦意味著我可以請少兩日假，
即係一樣用咁多年假，
可以去多兩日，
其至四日。
（如果駁得到多一個 Weekend）

不過，
五月頭正正係個邊考試期，
去到都冇人招呼我地。
所以可能係五月尾先過去。
好彩五月尾都有個端午節。

再黎就係機票問題。
固然機票愈平愈好，
不過我又喜歡坐國泰。
一黎可以儲飛行里數，
二黎國泰 d Service 都唔錯，
d 膳食又適合亞洲人口味，
好懷念上次食既那個鮑魚雞粥早餐。

不過價錢就當然會貴少少，
不過唔係高峰期，
應該都唔會貴太多既。

再黎就係住宿問題，
可以住係人地屋企當然最好啦，
起碼可以節省唔少錢，
不過機會又未必會咁大。
呢個都係遲 d 定行程先想。

大衛同學問安娜同學可唔可以帶佢去玩，
不過人地都係黎左幾個月，
係咪應該找個黎左年幾兩年，
仲有親戚住係度既船長帶我地去玩好 d 呢？
不過船長又要返工 wor，
實習計得一個鐘得一個鐘，
個人而言，
我又唔係咁想佢請假 wor，
尤其是，
佢可能遲 d 會兩個幾三個月冇得實習。

抓緊機會

今晚上日文堂，
我覺得自己今晚好叻，
做聽解個時聽得到講緊 d 乜，
可能今日比較淺啦，
講病。
咳呀、流鼻水呀、嘔呀等等。

到講文化，
大致都明佢講乜。
到派功課時，
我仲可以拿拿聲做晒佢，
因為我知道，
如果唔做，
等到返屋企我就唔會做了……

---

大衛同學五月想去旅行，
問我去唔去。
其實呢個消息，
我之前已經由好間接既渠道知道，
我話需要一 d 時間考慮。

我有時會係一個有計劃既人，
所以我想拿多 d Informations。
不過唔知係我 Network 有問題，
d Messages send 唔到出去，
定係大衛好忙，
唔記得覆我。

Anyway，
其實我都猶疑去唔去好，
會唔會浪費錢，
浪費時間。
不過經過短時間考慮之後，
我都係決定去。

錢洗左可以再搵過，
但機會走左，
可能再 Catch 唔返。

交功課

連續兩日假期都要返工，
目的就係要趕個 Demo Unit 畀人睇。
今日就有間廠既人，
由日本飛過黎。

雖然唔係 Perfect Version，
總算叫做有野畀佢地睇。
佢地一行七、八個人，
其中兩個係來自香港分部既香港人，
其餘既都係日本人。
好快就 Split 開兩 Groups 討論，
老細同 Marketing 個班傾，
我就同 Engine 個班傾。

其實人地有晒 Documents 畀我地，
一般我都傾向自己睇 Documents，
消化左，
真係唔識先問。

記得我初入黎時，
有人質疑我究竟有冇做野，
入左黎個幾兩個星期都冇問過佢地野。
結果事實證明，
我用一個月做起左佢地兩個月都做唔到既野。

今次其實都係，
我好想係佢地面前畀 Results 佢地睇，
而唔係做左一半而請教佢地。
好彩客觀事實都唔係我能力弱，
而係我拿住份嚴重 Outdate 既 Doucment 黎做 Development，
d Data 錯既，
自然做唔到啦……

題外話，
見人地 d Engine 拿部 Notebook 出黎，
細細部好輕便。
我地公司個部，
本來係 Desktop Replacement Type 既，
但就拿黎公幹用，
重到死……

偷雞不著蝕把米了

因為趕 Project 既關係，
今日又返工。
星期日都要返工，
係一 d 人眼中好似好慘咁，
不過我又好 Enjory wor。
其實最主要係我唔忿氣做唔到。
中午同媽媽飲完茶，
就坐車返工。
返到去，
繼續埋頭苦幹，
不過都係冇乜起色。
做到七八點，
個頭開始有 d 痛，
就坐車返屋企了。
遺憾既係，
都係解決唔到個問題…… ><

返到屋企，
飯都冇食就訓覺了。

---

早幾個月，
訂左條 UltraII MSD 2G。
以為好抵，
千二蚊就得。
不過就等左成半年都未有貨。

終於收到 E-Mail 話有貨，
不過我已經唔需要呢張 Memory Card，
因為我已經轉返玩正版了。

想話二手放出去啦，
而同一時間，
腦場都返左貨，
個價仲平過我訂那個價 tim。
即係話，
我想放都放唔到出去，
今次真係偷雞不著蝕把米了……

擺滿月

今朝返左工，
因為今晚影如擺滿月酒既關係，
所以穿了恤衫西褲。
唔知係咪老細以為我一陣見工，
問左我幾次係咪打算係度長做。

之後落左酒樓坐，
到咁上下，
就去上普通話喇。
上完普通話返黎，
原本打算請四虎黎，
咁佢地可以打麻雀，
點知一個要返工，
八點先到，
另外兩個又好遲先黎。
媽媽係都要我坐落去打麻雀，
我都唔賭錢既 ><
佢地又打得大 wor。

結果打完四圈幾，
贏左六百七。

食完飯，
姐夫去拿車，
我同家姐係樓下等。
堂姐夫架車經過，
堂姐夫個名就聽過唔少次，
不過真人就第一次見。
今晚都只係得堂姐黎飲，
堂姐夫只係黎接佢。

可能做電視係忙 d 啦，
不過估唔到我真係有個明星親戚，
仲有真人對話 Tim。

理論上，
我仲係好細個。
不過，
已經有一班小朋友叫我阿叔同舅父，
叫到老晒 Tim ><

加薪

部 MP3 機竟然壞左，
一開機，
Load 左一陣就 Reset。
我開頭以為係電既問題，
點知換過電都係咁，
唯有拿去整。

我以為旺角只係 Showroom，
整機要去葵涌。
好彩上網望一望姐，
原來旺角都有得整。
落到旺角，
等左十五分鐘先到我。

以為要收機，
唔知幾時先可以畀返我。
點知佢可以即刻畀返我，
佢話我 d 歌既 Format 可能有問題，
幫我 Upgrade 左個 Firmware 就攪掂。
不過裡面原本 D 歌就冇晒，
其實都冇所謂，
聽完李克勤演唱會，
我都想將部 MP3 機入滿李克勤。

---

今日畀老闆召左入房，
原來我已經做左三個月，
過左試用期。
加左我人工，
其實應該話到返我見工時個要求。
不過人望高處，
我梗係想再加多 d 啦，
所以要更加努力。

能夠找到一份工，
自己做得開心，
（起碼未生厭）
又可以搵到兩餐，
算係咁啦。

高價有因

今日又要上大陸個 Vendor 到，
係去火車站之前，
首先要去郵局寄野。
佢話七至十日之後先到，
不過船長十七號要出海，
時間好趕，
唔知寄唔寄得切呢。

郵局個職員問我寄唔寄掛號。
如果寄掛號，
就要簽收。
咁我就想喇，
如果咁唔好彩船長出左海，
份禮物先到，
咁咪冇人簽收？
咁咪會打回頭？

結局我就選擇唔寄掛號。
畀船長知道之後，
就開始對我訓話喇……

佢話佢交咁貴管理費既原因，
就係有咁好既服務。
簽收有樓下個看更簽，
之後佢放係大樓個郵件室，
住客 24小時隨時可以去簽收云云。

好彩我係用 ICQ，
佢話上次佢係電話用左一個小時教導佢媽媽……

---

上去 Vendor 到，
有四個問題要解決。
結果離開既時候，
只係攪掂兩個。
部相機開親都 Hang 機，
我一路以為係 Driver 問題，
點知原來係上手寫既 Code 既問題。

佢用左一大堆 #ifdef 去做 Setting，
但係就冇一個 Defaut Value，
結果我們用一個新既 Hardware，
咁就冇 Set 到 Value，
導致 Division by Zero。
我咁都發現唔到，
真失敗。

燒鬚

係數字上，
有人又大我一年，
（其實係前日既事）
唔知佢有咩感想呢？
本來想送份生日禮物畀佢，
不過我又以為個樣野未出，
所以未買。

但係其實我早個幾月都見到有，
不過個時 D 人話應該未出架 Wor，
我以為係假既，
所以冇買到。
之但係今日想網頁睇下幾時出啦，
點知就發覺，
原來出左個幾月，
真係失策。

講緊既，
其實係 Olympus High Speed 1G XD Memory Card。
因為有人部新相機（Fuji F11）用緊張 128MB既，
我驚佢唔夠用，
尤其是佢月中要到墨西哥考察，
所以就想買張 1G 既過佢。

其實 1G 出左好耐，
不個係 Type M，
即係 Normal Speed。
咁既然係買，
當係買好 d 架啦。

同事知道左我想買，
打畀佢舊同事，
幫我拿左個員工價。
咁落到旺角，
先行一行旺電，
係二樓轉角見到一間有 Last 一張，
不過冇標價錢。
問下啦，
點知仲平過員工價，
即刻畀錢買。

同化

上兩個星期提到，
溫左既默書，
上完大陸落返黎唔記得晒。
今日派卷，
果然，
零蛋。
真係灰到爆……

之後上堂都好似雲遊太虛咁。

係喇，
今堂老師仲派左利是 tim，
其實係日經既利是，
即係 $50 優惠卷，
報讀課程可獲 $50 減免。
好過冇。

---

早幾日聽 芝See菇Bi，
講開男女朋友同化問題。
佢話個女朋友跟男朋友多，
就會學埋佢 D 習慣。

佢地舉左個例子好攪笑。
話說個男仔，
D 垃圾時常通屋掉，
咁個女仔開頭都有幫手執，
久而久之，
個女仔都通屋掉。
咁阿芝就話喇，
要改女方既習慣，
首先你要以身作則，
垃圾唔好通屋掉。
咁到個女仔學左你唔通屋掉，
會執好既時候。
你就可以恢復返通屋掉，
而個女仔就會幫你執。
到個女仔又通屋掉時，
你又要再以身作則喇……

笑死…

開工大吉

終於到年初四，
開工大吉。
比起舊公司，
呢間人數少左，
得邊六個；
結左婚既人亦少左，
只有三個。

咁斷估應該有四封利是，
三封 From 同事 and 老闆，
一封開工利是。

點知……
兩個老闆都唔派利是，
真係灰……

講返工作，
終於由 CMOS 過度去 CCD。
不過始終落後 Market 一段距離。
人地出到十倍變焦鏡，
我地自動對焦定焦鏡都未出。

老闆講到雄心壯志，
我最怕有頭威冇尾陣，
一陣講多過做就……

其實僱主僱員關係就好似一個 Positive Feedback Loop，
你好時我好。
辛苦捱件產品出黎，
老闆又識做既，
加人工又好，
放花紅又好，
甚至乎放你幾日假都好，
員工有貢獻之餘，
又得到佢既利益，
老闆又賺到錢，
雙贏局面。

最怕是旦一邊唔畀 Input，
咁就失衡了……

Master Game

今朝又去搵外快，
其實唔應該咁講，
應該話我去幫手才對，
個 d 係車馬費姐。
今日係先進定向賽，
先進者，
其實即係三十五歲先玩得既比賽。
地點係幾熟既寶馬山。
我今日工作冇上兩次咁重，
只係負責守 Points 同收 Points。
剛開始比賽時，
係起點幫下手咁。

咁係起點期間，
都見到 d 熟口熟面既。
其中都撞到我 d 學生，
即係以前教康文署定向班 d 學生，
佢地都奇怪我點解係度。

基本上大部份人一出發都行對方向，
只有一個一出發就向西北跑，
咁起點基本上已經係地圖最西北，
再跑就 Out Map。
咁我追上去啦，
結果發現，
佢連指南針邊隻色係北都攪錯……

個比賽幾順利，
十二點半我就開始收 Points，
收收下 Incharge 那個 Call 黎，
話佢找左人黎幫手收，
叫我等埋佢地。
個時，
十七個我負責既 Points 我收左十一個，
等左成十幾廿分鐘先見到佢地。
唔係等佢地既話，
我起碼收多三個 Points 啦。

Anyway，
好順利收埋 Points 就收工喇。

迫爆迪迪尼

迪士尼樂園之前測試時，
未試過多人得滯唔畀人入。
估唔到早幾日因為園內太多人，
要關大門唔再畀人入。

我以前成日想，
如果真係太多人會點？
唔再賣飛 lor。

其實，
點都會有個容量上限。
咁控制賣飛既數量，
咪可以控第入園的人數 lor。

不過攪笑既係，
今日就係有好多手持「有效」門票既人不得其門而入。
咁就奇怪喇，
如果知道就黎滿人，
應該唔再賣飛才是，
為何還會有咁多入唔到場既飛呢？

原因就係迪士尼有 d 叫做半年有效期既票，
咁就有班自遊行既遊人，
手持呢種票。

失策既地方係，
呢 d 長時間有效票，
應該係只賣畀本地人先發揮到最大既效用。
因為訪港旅客，
佢既留港時間基本上係 Fix 既，
係個日去迪士尼就係個日。
只有本地人先會無啦啦身痕去藥園，
冇一個 Fix 既行程。

另一方面，
不得其門而人既遊客又好攪笑，
佢地竟然攀過欄杆入去，
好似當 d 保安唔存在咁。
結果係點？
當然係被人「的」返出來啦。

春田花花

今晚約左 OMUser 班 Friend 出 Cafe 打 PSP，
冇錯，
又係打 MHP。
不過佢地都係買左唔太耐，
冇早兩日個班 Level 差咁遠。
約左七點係旺角，
見早，
就去睇返場戲。
今日睇既係「春田花花同學會」，
係電影中心睇。
一路排隊既時候，
發覺新春加左價（打工仔都返工，仲新春……）
仲要信用卡優惠都冇埋。
到我個時，
求其拿張信用卡買飛。
點知佢就好努力咁幫我 Check 我張信用卡有冇 Discount，
Check 唔到就問我有冇第二張信用卡，
估唔到服務態度又幾好 Wor。

入到場睇戲，
原本對卡通 Cross Over 真人好有期望，
不過睇完好失望。
我想佢個 Message 係做社會棟樑唔一定要係醫生律師，
斬叉燒、其至避風塘駁船既船長都可以各司其職，
但係你做既工作，
唔一定係你既心目中既理想工作，
但一樣有佢既功能。

但係佢就拍得好亂，
飛黎飛去，
一時講下呢 d，
一時講下個 d……
總之就好亂啦。


睇完戲，
去到 Cafe，
好好玩。
有一個仲玩到唔捨得走，
十二點佢已經叫走，
點知 Last 一 Round 完又一 Round，
Last 左三 Round，
點幾先有得走。

大掃除

冇假放個時就想放假，
有假放個時就悶。
今日成日係屋企，
一步都冇出過街。

今日都做左幾多野，
係年初四做年廿八應該做既野，
就係大掃除喇。

執左個幾兩個鐘房，
（我想完成左 5% 左右啦）
我左個 Scanner，
將張書桌還原，
執左 d 紙箱，
又將個電腦機箱放返好。
將個結他同腳架拿出黎，
移個防潮箱過去，
空返一個間隙出黎，
個床個抽屜就可以開返喇。

之後將 d 相過晒落新那個 Harddisk，
見舊 Harddisk 一個 Partition 都好似唔係好夠位裝晒 d 歌，
（我現在係分左三個 Partitions）
就將 d 歌搬埋去新 Harddisk。

1394 果然名不虛傳，
過資料真係好快。
過完之後，
執執個 Harddisk，
現在個 Harddisk 鬆動好多。

夜晚開始玩昨日隻 Wireless Adaptor，
攪左個幾鐘，
終於可以 XLink 上網同人玩。
結果……
又打到三四點。

買左隻 MHP 之後，
我冇一晚係早過四點訓，
試過六點先訓先，
好沉迷呀，
點算好呢？

做獵人

今日初四，
好多人都要開工，
但係我就唔駛返工，
仲放緊假。
不過亦因為好多人返工，
所以我係屋企好悶。
昨晚打 MHP(Monster Hunter Portable)打到三四點，
今朝訓繼續打。
之後落深水步 Join 返 d friends。

昨日佢地「帶」我去買 Game，
今日就「帶」我去買 Wireless Adatpor。
有呢隻 Wireless Adaptor，
就可以上網同其他人連線玩 PSP，
而用個 Software 就叫做 Xlink。

呢隻野做可以做埋 AP(Accress Point)，
咁我 d Pocket PC 呀，
PSP 呀就可透過佢上網睇網頁喇。

不過呢隻野好好賣，
好多地方都斷貨。
好好彩找到一個地方有，
原價 285，
我地一次過掃四條（最後有一個縮沙，實買四條），
就收我地 275。
不過其實都係貴，
之前賣 235 咋。

之後落左旺角 Cafe 打機，
（咁點解唔係旺電買既？）
其中一個 Friend 個老婆都有黎。
Well，
成晚黑口黑面，
我仲坐佢斜對面，
我覺得有股黑氣 Lor。

講返打機，
佢地個個都打得好勁，
我就初玩，
所以佢地就連線玩，
我就單機玩。

Monster Hunter Portable

初三赤口，
約左班 Friend 去紅磡機鋪打機。
點解去紅磡呢？
因為有呢隻 GAME 既地方唔多。
而紅磡有之餘，
又唔駛等太耐，
有 D 要等成半日甚至更多，
真係痴線。

Anyway，
我九點左右去到，
班 Friends 中既第一個到，
不過機鋪都已經好多人。

打到七點左右，
坐車落旺角，
有 Friend 想買新出個部 PPC 電話 O2 Atom。
d 幾合一既 Device 我唔係咁鍾意，
好處係一部機有幾個 Functions，
唔駛帶咁多野出街。
但唔好處都係呢樣，
如果其中一 Part 壞左，
咁就幾個 Functions 都用唔到，
又或者如果其中一個 Feature Outdate，
咁又要換過部新機……

之後行 Game Shop，
好好眼咁畀佢地見到隻二手 Monster Hunter Portable。
呢隻 Game 十二月出，
不過我因為要考試，
所以冇買住；
到我考完試，
佢又冇晒貨；
到佢有貨，
佢又炒鬼左。

近排佢又價格回落，
不過我知道，
呢隻 Game 我買左會好沉迷，
所以遲遲唔買住。
結果都難逃一劫，
畀四名大漢夾左去買 Game。
好，
返屋企煲 Game。

虎聚

今日去左大姊家拜年，
之後坐車去沙田。
先飛 Van 仔去沙田火車站，
再轉巴士落威爾斯，
之後行去多石村（有冇記錯村名？）。
約左四虎同康哥 BBQ，
去到見到好多人，
因為艾文女友同艾文個妹 D Friends 都黎左。
各適其適，
有 d 打牌，
有 d 打機。
我同艾文單挑打 NDS 既孖寶賽車，
唔駛多講，
當然係我贏成條街啦。

其實放假前，
而有人想買我隻孖寶賽車，
仲要唔駛蝕（我 $180 入，$180 放），
為左要贏艾文，
我先唔放住。
應援團又大勝，
孖寶賽車又大勝。
呵呵呵……


之後細牛黎到，
仲帶左副大富翁黎。
之後就轉玩大富翁喇，
細牛做銀行，
阿力冇玩，
總其六個參賽者。
好難玩，
跟本玩唔到。
梁氏三人連成一線，
圍內係咁換。
我不單做唔到對我有利既交易，
其至想蝕讓，
目的只係唔畀艾文獨大都唔成功。
好彩係未輸既情況之下，
夠鐘 BBQ 而中止遊戲。

燒完野食，
繼續打牌。
我同康哥夾，
一人一鋪。
係我唔駛打時，
就幫艾文隻孖寶賽車過關。

李克勤得心應手演唱會

大年初一，
恭喜發財。
恭祝各位心想事作，
萬事勝意，
財源廣進。
（雖則打呢篇日記個時連新十五都過埋）


今日我期待了很久，
因為今日有李克勤演唱會睇。
大同 Alex 好抵，
付出 $200 就有 $400 既飛，
我就相反喇，
付出 $600 先有 $400 既飛…

原本約左 Alex 係尖東等，
點知我行緊出去個時，
佢剛好係佐敦，
咁就叫佢等埋我先。

會合佢，
佢話佢食左下午茶，
唔肚餓……

行到恆豐，
Alex 問我打算今日影幾多相。
我就醒起，
原來我冇帶 Memory Card。
結果又要行返屋企一趟。

坐車上火車站，
先係 Starbuck 飲左杯棉花糖咖啡，
食左件餅。
杯咖啡一般啦，
都係鍾意飲 Mocha 多 d。

今晚場演唱會都幾多嘉賓，
有汪明荃、郭晉安、梁榮忠、花生（佢隻狗）、歡歡、球球和陳慧琳。
最攪笑陳慧琳，
唱完一首歌，
行左會場半個圈，
未收晒利是，
叫克勤唱住先，
唔駛理佢，
佢會收埋 d 利是……

佢亦都請黎4位華人音樂大師黃蒙拉、霍世潔、譚寶碩、龍向榮。
（亦既係佢「演奏廳」隻碟演奏的四位）
龍向榮博士真係好勁，
一張麻雀檯，
一幅麻雀，
都可以伴奏一首砍。

不過其實睇演唱會，
我寧可冇嘉賓，
聽主角唱多幾首歌，
唱 d 蒼海遺珠仲好。
奈何呢個係香港演唱會的特色，
冇嘉賓反而 d 觀眾唔鍾意……

睇戲

今日年廿九，
明天就是初一了。
原本團年飯是昨晚食既，
不過因為大姊未出院既關係，
改左今日。

今朝一早去醫院接大姊同影如出院，
順道落大埔大姊家。
今日亦都證明左我係記路既天才，
媽媽去過咁多次都唔認得路，
我只係去過一次之嘛，
已經可以帶路，
呵呵呵。

夜晚食完飯，
去埋洗手間先走。
媽媽唔識路，
咁我帶佢去啦。
咁我入男廁，
媽媽竟然跟住我入……

---

食完晚飯，
坐車落旺角睇戲。
一支公睇「最愛女人購物狂」，
呢 d 戲，
講真真係好難找到人陪我睇。

呢套戲都叫 OK，
當然你如果要求佢有反思性既 Message 既話，
佢未必做到。

不過一元睇場戲，
（信用卡優惠），
仲送爆谷汽水，
抵到攔啦。
算係補償到我換唔到頒獎禮啦。

---

下午佢地幫影如沖涼，
係咁話我係時候學定……

終於購物

今日只係返半晝，
中午同同事去食私房菜。
三道小菜，
白飯同湯任裝，
仲有一杯餐飲。
三十幾蚊一個人，
勁抵。

間野係工廠區，
因今日太多人，
結果我地要坐係走廊，
此為美中不足之處。

---

原本係月頭出糧，
但因為六號先返工既關係，
今日出埋糧。
既然有錢，
而又需要添置一些電腦器材，
所以落左黃金一行。

格完價，
結果買左一個 19" LCD (Samsung 930BF)、
一個 250GB Harddisk (Western Digital)、
一張 1394 Card (Magic Pro)、
一個 Extern Harddisk Case Combo (Rock)。
接近四千。
個 19" LCD 周圍都冇貨，
好彩畀我找到一檔有。
其實係已經留左畀個客，
不過個 Sales 話下午有貨返，
所以可以畀左呢部我先。
返到屋企，
試左雙 Mon，
好爽。
不過個舊 Mon 係壞既，
成日花畫面，
所以都要丟棄。

---

夜晚買左 d 染髮用品，
染左一頭啡髮。

初九啟市

唔知係咪飲茶飲上癮，
老細冇啦啦話今日去飲茶，
我想當係團年飯掛。
去金龍船訂位，
話要兩點後先有位。
反正有個同事上午請假，
所以我地就兩點去飲茶喇。

一路飲飲食食，
一路談天說地。

就黎放農曆新年，
我地最關心既就係初幾返工。
係飲飽食醉之際，
有同事問老細，
老細就話初四啦。
都正常既，
單放紅日。

不過其中一個老細幾信風水，
我地叫佢不如打畀師父問下。
開頭佢唔願打，
仲問返我地如果師父話初二，
我地係咪會返云云。
不過結果佢都有打。

風水既野，
我一路都覺得係統計學，
但係一路都唔係好信。
今日發覺信風水都有佢既好處，
就係今年可以初九先開工，
呵呵呵……
有個信風水既老細有時都唔錯。

夜晚收工，
原本想落黃金一轉，
不過一黎夜，
二黎又有 d 眼訓，
明日又只係訓半日。
所以決定都係聽日先去掃貨。

再北上

昨日北上完，
今日都要北上。
不過今次係去過 Vendor 處。
朝早要返公司先，
十一點左右先出發。
（都唔知返去做乜…）

係 APM 地下坐黃崗巴。
去到計程車站，
基本上黃崗同羅糊一樣，
大家都唔係點排隊既。
乘客故然唔排隊，
司機都唔係點排隊。
呢 D 意識真係要教育一下，
不過我想都要好耐時間。

係 Vendor 既半日時間，
Solve 左唔少問題，
不過都仍然有 d 地方未攪得掂。
之後坐地鐵返羅糊。
好攪笑，
地鐵站既一邊，
好多人買飛，
排晒長龍；
而另一邊，
水盡鵝飛……

夜晚出左去跑步，
原來我對上一次跑，
已經係十月既事……
今次時間唔係好多，
訓練都好輕微。
首先係跑一次大圈，
等個新人記下條路。
之後玩圖，
我 Shadow 個新人。
Demo 既時候要做得好誇張。
「我 Plan 既呢條路線，
向西行，第二個路口轉右向北，
三支燈柱之後再轉右向東……」

「咦？第二個路口有得向右轉 Wor，
做 3S，Stop，Set Map，Select 先……」

「咦？有第一支燈柱、第二支、第三支。
真係有三支燈炷 Wor，冇行錯路……」

之後 Join 左 PSP Group 既團年飯。
佢地個個 Link Play MHP，
我就拿部 NDS 出黎打孖寶賽車。
之後玩左陣大老二，
十二點左右就散了。

北上公幹

今日要上橫崗，
約左個同事十點係大學站等，
結果大家都係十點半到，
哈哈哈。

上到羅湖，
過完香港個邊，
係大陸個邊就要填 Form 做自助過關。
要 Record 個 Face，
都左右手既手指模。
我估排左半個鐘左右啦。
攪笑係左面個行有位女士，
攪極都 Record 唔到手指模。
個關員叫佢抹乾 d 隻手，
佢又唔肯，
話已經好乾。
其實再抹都唔係好浪費時間姐。
結果關員叫佢下次再攪過，
個女士就大喊：
「又要再排個隊呀？」

早知今日，
何必當初呢？

過左關，
坐計程車去。
去到剛剛係 Lunch Time，
食完飯就開工。

今次主要係 Debug。
負責 QA 個班真係勁，
佢地試到晒出黎既 Bug，
我地跟足佢按都試唔到。

做到六點左右收工，
坐兩程計程車到黃崗，
之後坐旅遊巴直出佐敦。
剛剛趕得切上堂。
不過原本溫既書唔記得晒，
咁默書………

串錯名

唔經唔覺，
過左試用期了。
呢幾日老細畀左份 MPF 表我填，
而佢終於發現，
佢幫我開那個 E-mail Account 係串錯字既。

我現在個 Account 係 stzho@，
佢當時話拿我 Initial 同姓黎做 Account 名。
Ho 係我個姓，
S 係我洋名第一個字母，
咁 TZ 即係應該代表我中文名個兩個字，
不過……

雖然老闆發覺佢串錯字，
不過冇理由現在先改返正架，
唯有用落去啦。
其實我又唔係好介意，
都係個 Address 姐，
聯絡到我就得啦。

---

快證即係快證，
可能就過年，
所以更加快，
今日已經有得拿。
換句話說，
即係我要開始北上做野了。

---

今日中午同同事去左 APM 食日式免題。
抵就幾抵喇，
不過冇咩野食。

最攪笑係，
我地一齊出去拿野食，
個侍應以為我地走左，
清晒我地張桌（因為入場先畀錢）

06' 無國界野外定向比賽

又到一年一度既無國界野外定向比賽，
今年是第五屆，
亦是我第四年參加。
第一年冇參加，
係因為上左廣州玩穗港盃。
之後個三年都有玩，
參加男子高級四人組，
四年（連埋今年）都係個三個拍檔，
都係那個隊名：青蛙堆堆。

叫青蛙堆堆，
係因為我地套定向衫係鮮綠色，
成隻青蛙係山週圍跳。
（完全唔合我性格……）

之前個三年，
都贏消防拿冠軍。
想贏第四年就難 d 喇，
因為有 d 港隊人仕，
睇唔過眼我地連贏三年，
組隊黎挑戰。
講牌面，
我地輸九條街，
叫做盡下人事啦。

結果，
連第二都補唔住，
輸埋畀消防得第三。
事後檢討，
拿唔到第一好正常，
隊港隊用既時間少過我地，
但係打晒滿分，
我地差成百分。
不過僅輸畀消防 10 分就有故講下，
故然我體力唔夠係主因，
不過如果唔係頭段要擘草穿林，
損失時間之餘，
我體力會唔會下降得咁快？

事緣有個 Point，
要先入白林，
經崖壁上山咀，
當我找到崖壁想上時，
佢地話未到要繼續入。
結果……

Well，
我雖然體力有乜，
但我對睇圖認路都仲叫有心得既。

不過最頂癮既係，
帶頭快跑那個，
成日話佢係前面跑，
冇睇圖，
唔知幾時停。
（謎之聲：咁你攪乜係前面快放？）

三年前組隊，
講明贏輸都只係組四年。
成績其實都唔錯，
三年冠軍一年季軍。
下年（如果仲有的話），
我應該會用第二個身份參加。
可能組第二隊，
又或者做工作人員。

---

炒炒按於二零零六年二月五日清晨：
日記記落後左兩個星期，
估唔到會畀人催。
不過，
我仲領先緊半年有多 wor……

新裝備

今日都幾忙碌，
係公司通完頂，
去左飲早茶，
之後去左睇中醫。
拿拿臨落銅鑼灣上 OA ，
交聯賽報名表、
拿 First Aid Cert、
收教練津貼。
之後一路行落灣仔，
經過銀行入埋張表。

返到屋企坐一陣，
又要出尖沙咀上普通話。
今日個老師勁呃鐘 lor，
講課文都唔知有冇半個鐘。
係咁係白板寫節日名，
花名咁，
都唔知佢想點。

上完堂，
過左隔離天祥，
買左個度左好耐既相機袋。
Tamrac 既 Pro 5



大約可以放到一機三鏡一閃。
其實我上次去旅行那個，
都係咁上下容量（細少少啦）。
不過呢個袋最大既好處係：
可以唔拆支長鐘直接放入袋，
咁就好方便我唔駛下下要拆鐘先入到袋。

以前個袋唔好處就係呢度，
用親機都要先上鏡，
影完又要拆返先放到入袋。
而且呢個袋仲好平好抵用 tim。

不過唔好處就係，
冇得換帶，
同埋變唔到做背包。

又通頂

今晚冇返屋企，
係公司做通頂。
昨日早收工去打波，
其實都預左今晚會做得夜 d，
不過係冇想過會咁夜姐。

做到八、九點，
老闆話食晚餐，
四個人，
叫左一個二人餐？！
咁又點會夠飽丫……


一路做呀做，
試呀試。
都三點幾，
開始有 d 同事頂唔順，
轉數慢左。
我呢 d 捱慣既梗係冇問題啦。

之後仲打埋長途電話過加拿大，
搵多個腦一齊想。
不過都係唔明衰乜。

理論上，
Read 返黎既 Data 應該係 Bell Shape，
但唔知點解，
有時會係 U Shape，
咁自然會計錯數啦。

好彩今次部機夠快，
可以 Take 兩次 Samples 做 Average。
結果可以係七點前做起左個見得下人既 Demo Unit。

當然啦，
見得下人姐，
仲有大把空間要 Improve 呀。

之後就大隊去飲早茶，
飲完早茶就散了……

搶錢……

昨日買完鞋，
今日去試用。
原本打算唔打架，
我衫都冇帶返黎。
不過佢地話唔夠人打，
我唔黎得返五個人，
所以我最後都去。

就算我有帶衫，
直接係公司去，
都會遲，
更何況要返一返屋企先呢？

返到屋企，
工人問都冇問過我食唔食晚餐，
就拿拿聲叮晒 d 食物。
見到我拿晒袋準備再出門口先識問，
唉……

落到街決定錯誤，
我以為小巴最快，
點知佢先去紅磡，
經九龍城去黃大仙，
最後先到樂富。
結果我九點半先到……

---

回鄉証過左期，
結果昨日早上一早排隊拿籌。
比想像中快，
我九點去到，
十點已經攪掂晒返公司。

不過張証就好搶錢。
申請費 $360，
快証加收 $200，
影印四張，
每張 $2。
總數就畀左 $568……

Nike Air Jordan 10 Retro

一路都想買對籃球鞋打波，
不過一路都選唔到。
唔係個款唔鍾意，
就係價錢貴，
亦都怕買錯唔適合既鞋。
上網問下提議，
有人話不如今晚出黎睇，
結果我就出左去買鞋。

四個人（包括我），
不過其實只有我一個想買。
係旺角波鞋街行下行。
其實間間來來去去都係得個幾款，
自己屬意深色，
不過深色既都唔係咁合心水。

結果睇中左兩對，
兩對都係白紅色。
一對係 Nike Air Jordan 10 Retro




另一對都係 Nike
但我係網上面係找唔到佢 d 圖。
總之鞋舌上有隻狗頭咁。

不過最攪笑係，
d 鋪頭有第一對，
就冇第二對；
有第二對，
就冇第一對。
想試晒兩對都唔得……

好不容易，
終於找到一間有晒兩對，
試完之後，
買左 Air Jordan。

之後佢食野，
Vanvan 講左兩間店名，
係旺角讀書既我，
竟然聽都未聽過……

食野食左兩個幾鐘，
傾左好多相機野。
（唔記得講，佢地係 Omuser.com 既網友）

在「唔記得要買甚麼」之前，應該點做？

今晚上日文，
因為之前太忙既關係，
所以都冇時間溫書。
放左工去到，
佢地都默完書準備教書。
有結果我就唔駛默，
都好，
因為我都冇溫到。

臨到新年，
今日派左一張卡，
叫大家寫新年願望上去。
嗯，
寫咩好呢？

一於就咁啦：
10分以内に2.4 キロメートルの競走を完成するように

跟住教文法，
勁攪笑。
佢問唔記得要買 d 乜野之前要做 d 乜。

我話係唔記得之前要買左佢。
跟住佢好愕然，
佢話如果你有事做，
唔得閒買呢？

咁我就話寫低佢。
點知都係錯，
佢話要寫低 memo……

今日教左幾個副詞，
意思同以前學過既差不多，
但係又有少少分別。
小西老師花左好多時間解釋，
但係我都唔係十分明。
以前初班，
用個本書既出版社有出另一本講書入面既文法，
仲要係中文既 tim。

但係現在呢本書，
莫講話中文，
連用日文寫既都冇，
唔識都唔知點算。
灰……

二手

今日約左三個人係旺角，
交收一些二手物品。
我以為自己好醒，
約晒三個係同一地點。
但原來人地都係咁，
一個我見佢成張賣野 List，
一個係交收完之後，
我打電話搵下個時，
佢又打電話找下個。

不過好攪笑，
有一個約左佢七點半，
之前個晚佢 send e-mail 黎話「七點」未必趕得到，
話會遲少少，
但我係約七點半……

今晚我六點半就收到佢電話，
佢話到左！
我真係約七點半……

---

今日老細又催我申請回鄉證，
回鄉證張證件相要白底或粉紅底，
但我 d 相係藍底……

護照我又就黎到期，
咁 d 相影完可以做埋特區護照。
但特區護照要求既係藍底或粉紅底，
即係要影粉紅底啦。
（其實點解唔可以統一 d？）

中午食完飯，
落街望下，
竟然找唔到地方影證件相。

最過份既係，
我問住我公司附近既艾力斯，
佢竟然答唔知！
Er………

又教班

今日要教班，
Lv2 既班。
以往總會既 Lv2 班，
一般都係會白石橋攪。
但因為遲 d 會有場聯賽係白石橋攪，
所以白石橋封左場，
唔攪得定向活動，
所以改左係附近既牛寮。

八點三係九龍塘開出旅遊巴，
（一般 d 班都係要自己坐車去，
今次真係好。）

去到牛寮，
首先帶 Map Walk，
之後玩 Compass Steering。
稍稍休息之後，
佢地食野，
我心痕走去試跑 Star O。
班學員問我：
「你返唔返得切黎帶我地架？」

三分鐘之後，
我已經跑完返黎喇……

四條 Courses，
我帶佢地玩其中一條，
之後就放佢地玩，
我跟係其中幾個後面。

玩完 Star O 之後。
係正式既模擬賽。
我最尾幾個 Points，
一路數住有幾多學員經過。
數到廿一時，
見到包尾那個教練，
佢收左其中一個 Point，
仲話呢個已經係最後一個。
但我收到既訊息明明係有廿四個（後來知係廿五個 tim），
我數錯都冇理由差咁多，
跑返轉頭，
果然後面仲有三個學員……

教完班，
坐返旅遊巴落山，
係荃灣逛左一會兒。
就坐車返觀塘，
返公司繼續加班……

普通話中班

今日星期六，
訓到十一點先起身。
見到 HKZooo online，
約佢交收做 ME-1。
ME-1 係咩呢，
Olympus ME-1 Eyecup Magnifier 係一個 accessory for 佢既 DSLR。
佢將 Viewfinder 見到既野，
放大 1.2 倍。
換句話說，
會易左睇佢係未 in Focus。

約左佢係我公司樓下間印尼食店個處，
順便吹吹水。
咦？
應該唔駛返工架，
點解約係公司個頭呢？
咪就係要加班 lor。

攪到五點都未攪掂，
但係我又要趕住走 wor。
趕住去邊呢？
要出返尖沙咀上普通話中班。
今日係第二堂，
第一堂因係「Last Day」既關係，
我走左堂。
五點四上堂，
我五點二先係公司走，
行去麗港城坐 219x 落去，
只用十分鐘落到紅磡蕪湖街，
但再用多十分鐘先轉到去尖沙咀，
當然遲到啦！

中班同初班唔同，
教既風格都唔同。
以後冇得聽歌估歌詞了，
老師又唔會叫每個人獨立讀一次，
有冇讀錯真係唔知。

上完堂，
又佢探阿 B，
阿 B改左名叫趙影如。
剛好今日有相機係手，
隨手影左幾張相。

七年之癢

7 這個數字好其怪，
有人視之為一個關口。
有個詞語「七年之癢」，
意思是說許多事情發展到第七年，
就會不以人的意志出現一些問題。
這個詞語尤其多用於感情上。

七年，
時間不短，
為何還會出現問題呢？
有問題的話，
不是頭幾年應該已經出現，
應該已經解決，
又或者應該已經放棄嗎？

可能是因為久了，
蜜月期過了，
彼此太熟悉了。
以前需要掩飾的缺點，
又或者理念上的不同，
已經暴露出來。
蜜月期時，
或者會容忍，
但蜜月期過後，
長期積累的矛盾慢慢凸顯︳
可能就會一發不可收拾。

雖然我距離這關口還有一大段路，
但近日既一些消息勾起了我對這個問題既思考。
首先是老友，
再來是一對藝人分手，
再加上今日係一個特別的日子。
希望我會過得到這關。

---

放工去探姐同阿 B，
阿 B 好可愛喔。
今日冇拿相機，
明天拿相機影佢先。

做運動

大陸間廠個老闆 Delay 左個行程，
結果可以多幾日做野。
昨日講那個問題，
落係我手上，
要 Solve 就梗係輕而易舉啦。
不過問題係寫 Controller 那個唔係跟 Spec，
結果都係未攪掂。
要等寫 Controller 那個 Send 個新 Code 過黎。

---

夜晚打波，
之前去麥記食野。
唔明 d 人點解唔想定食乜，
排到去 Counter 先拿張 Menu 慢慢想。
幾分鐘過後，
收銀那個就叫佢地（其實係一班小妹妹）企埋一邊慢慢想，
問後面那個（即係我）食 d 乜。

我今次再食板燒雞腿包餐，
收銀個人要托高個盤（高過班小妹妹）先畀到我，
我拿住一轉身，
成包薯條就飛左出黎，
好慘哦！
不過好彩佢都畀過第二包我。

食完去打波，
本來艾力斯都話黎，
不過佢公司有 Project 趕，
黎唔到。
加上有人冇帶衫，
有人甩底。
結果得六個人打。
可能見我打得差，
後來仲有其他人跟隊。

原來我兩個幾月冇正式做過運動。
今日走兩步已經氣喘……
要練返氣先得。

補鑊

以為會冇咁忙，
今晚可以出去跑步啦，
點知都係唔得。
老闆話大陸間廠個老闆今晚會飛去北京，
所以要預備好個 Sample 畀佢。
不過做極都做唔完。
最攪笑係冇人跟 Spec 做野，
做 Cal. 既，
唔係跟 Spec Cal.；
寫 Controller 既，
又係唔係跟 Spec 做；
其至個 Vendor，
都唔係跟 Spec 做。

我係跟 Spec 做，
不過份 Spec 係 Outdate 既。
即係所有野都係 Out Sync. 既，
又點會做得掂？

個客投訴影 d 影唔清楚，
即係 Focus 錯啦，
老闆問我點解現在先發覺。
Well，
我 Handle 呢個 Project 既第一天，
係佢話我知影相既 Focus 係攪掂晒冇問題，
我要做既只係 Video Mode 既 Focusing。
咁我又未去到 Final Checking 既階段，
又點會無啦啦走去 Check 下應該冇問題既部份？

經過我掃一次 d Code 之後，
我發覺 d Data 都係 Out Sync 既。

個 Program 其實係咁既，
個 Controller 移動完支 Lens 之後，
個 Firmware 就會睇下呢刻個 Image 夠唔夠清，
再 Report 畀個 Controller 知。

問題就係，
舊 Code 唔係等 Controller request 先 Get Data，
而係不斷 Get Data，
睇下 Controller 有冇 request 而決定 Report 定 Discard。
結果就有可能 Controller Request Time t 既 Data，
Firmware 就 Send 左 Time t-1 既 Data 過去。

唉，
都唔知邊鬼個 Design 既……

「遲」「早」

有人嫌「早」，
想「遲」 d。
但其實我係想「早」既，
亦都好恨快 d。
不過，
現實似乎唔容許我有呢個選擇，
結果都係「3、5、7」。

---

今日做左窮光蛋炒炒，
事緣今朝拿張卡去提款，
部機話張卡失效。
拿去銀行攪，
佢話磁帶失效，
新卡要五個工作天後先有。
而我身上，
只有十三個一既現金，
同一張得返個幾既八達通……

好彩既係，
今朝帶左飯，
張八達通夠我返屋企。

---

估唔到補完後仲要補完。

上星期五中同食飯，
返屋企時記下同班中同既名。
三十個人，
Always 忘記兩個。
第二日，
終於醒起，
第一個係勇姐，
第二個係王馨平。

就黎到我換身份證，
Newsgroup 有網友 Post 左個時間表出黎。
網友唔信我未換，
話我點睇都似 7 中既人。
亦即係話，
一個三十歲既，
配一個十五歲既……

日記補完

幾日既日記都好似打漏左 d 野，
今日黎過補完。


星期日送機，
迦南走黎拍一拍我膊頭，
說一句：「叻仔丫！」
冇啦啦叻乜野仔？
問佢又唔講。


都係星期日送機，
Anna （唔係中同那個）問我工作上既野，
包括忙唔忙呀，
人工幾多咁。
我知無不言，言無不盡，
不敢有一絲隱瞞。


今日老左一個 Grade，
做左人舅父。


今日第一次學人玩 SMS Chat。
以往都係一封起兩封止，
今次起碼五封。
全程英文，
我發覺我部手機好難用，
SMS 好似打唔到「New Line」

---

真係慘，
有人 Miss 左班飛機。
三個人滯留係芝加哥，
第二日中午先有機。
有人叫細佬 Send 個 E-mail 畀媽，
結果十二個鐘之後，
封 E-mail 仲未打……

一年之計在於春

今日去送機，
Anna 果然係同一班機既，
都幾多人黎送佢。
仲見到好耐冇見既 Sam Sir。
五點半要過海關，
不過最後一張相影左好多張都未係最後一張，
始終第一次出國讀書係唔同 d 既。

---

牛哥係佢日記 Post 左今年目標，
提醒我原來又一年，
都係時候定今年目標：

1. 讀書
繼續讀兩個語言，
年尾考三級能力試。
仲要學整蛋糕。

2. 旅行
今年要去一次旅行，
可能係英國，
可能係美國。
人數未定，
可能兩個、三個、
四個甚至五個。

3. 儲錢
年底要廿五萬資產，
十二萬係流動資金。

4. 健康
九月前減十磅。
荳荳拜拜。

5. 戒口
成功戒食牛、蛋、海鮮。

6. 運動
一個星期最少三次，
跑步好打波好。
仲要 Keep 返住做 Gym

7. 攝影
加快執相速度。

1234567
多勞多得

---

得到 Auntie Yip 拔刀相助，
終於完成任務。
「被」可以冇，
「大食」都可以冇，
改成可以求其食一餐。
免去「大食」，
除了某人唔駛換衫換得咁辛苦之外，
亦都唔駛玩「遊戲」
呵呵呵

酒池肉林

今朝一早佢去送細佬機，
之後係佐敦會合我。
落左旺角 Gamezone。
打左陣機，
估唔到佢會陪我落機鋪，
仲打埋一份。（怪哉怪哉）

中午去左魚米家食 Lunch，
之後去買腳架畀佢部新 DC。
坐車落銅鑼灣 Sogo Shopping，
佢買左冷帽、耳環、飯壺，
我買磨豆機、咖啡豆。

Tea 完之後行落天后，
今日個傻婆請我食私房菜，
間野叫酒池肉林，
好好食喔，
不過價錢都好貴。

去到樓下，
打電話叫佢開門，
死喇，
電話幾多號呢？
試左好多個，
終於打通。

頭盤我係焗蠔，
佢係三文魚。

最攪笑係個湯，
從外觀睇，
無論係裝湯個碗、
個湯匙、
個湯面個層、
都係一杯咖啡咁。

我 Main Course 係羊架，
好好味。

甜品係心朱古力心太軟布甸加雪榚。
心太軟布甸，
即係切開中間有熱騰騰既朱古力。
除了甜左少少之外，
都好好食。

不過咁 Formal 既 Dinna，
都係唔係咁適合我地。

聚舊

Anna 星期日走，
今晚一班同學同去食飯。
出席既有十五人，
係銅鑼灣食飯，
約係皇室堡等。
但係食飯既地點，
卻係利園二期既虞家媽媽。

D 食物名好攪笑，
虞家媽媽 XXX、
黃家媽媽 XXX、
虞家爸爸 XXX、
康家爸爸 XXX……

價錢幾可觀，
不過味道就只係一般而已。

完左之後，
去左登龍街一間 Pub 飲野。
第一次飲芝華士，
唔好飲既……

Kinger 問左個數學 IQ 題，
就係用 5 個 5，
加減乘除之後得 24。

答案係：
(5 * 5 * 5 - 5) / 5 = 24
(5 - 5 / 5 / 5) * 5 = 24

不過我現場都係想唔到既。
十一點半灰姑娘要趕返屋企，
但係睇佢地個勢，
有排都未走，
唯有請大衛同學幫我畀左先。

---

有人問點解佢同我冇乜點傾計。
我兩個要傾既話，
幾時都傾得啦。
咁大班同學咁耐冇見，
梗係同佢地傾先啦。

好麻煩？？

友人個友人個女朋友個阿媽
（真複雜既關係）
同個女講：
「唔好成日麻煩佢啦……咁咁咁。」

其實有幾麻煩呢？
可能出開街帶埋紙巾；
可能出完夜街送埋返屋企；
帶個眼鏡盒袋人幅眼鏡；
可能借屋企少少地方出黎放下野，
呢 d 係舉手之勞，
甚至可能係理所當然既事。


唔知係咪物以類聚，
友人個友人個女朋友都係好客氣，
甚至係客氣得過份。
打電話畀男朋友，
第一句會係：
「Sorry 呀，撞住你返工。」


就算有求於你既 Cold Call Sales 都唔會咁客氣啦。
唔單止咁，
友人個友人個女朋友 d 朋友，
一樣係咁客氣。
詳情我都唔係咁清楚，
大部份都只係道聽途說聽返黎。

---

老闆 B 去左 Las Vegas 出 Trip，
近乎冇皇管，
可以準時收工。

不過我竟然唔記得入票，
仲未出到糧 ><

好眼訓，
十點半就訓覺了。
結果等 Bedtime story 等到十二點……

演唱會

通完頂既結果，
係可以今日早 d 走。
因為今晚買左飛睇演唱會，
所以返到屋企訓。
訓到四點半，
起身沖涼出門口。

去到地鐵站，
唔見人。
電話又打唔通，
咁就行去恆豐嘗試找，
行左五層都唔見。
落返地鐵站過裕華，
就係地鐵站見到佢，
咦？
頭先眼大睇過龍？

今早做 d 乜好呢？
去左意粉屋食晚餐，
叫既係下午茶餐。

食完，
行落尖東，
食左 d 意大利雪榚，
好味。

演唱會八點十五分開始，
係 Twins 既一時無兩演唱會。

嗯，
都 OK 好睇。

其中有一段「打」既表演，
有人話好好睇，
我就覺得一般喇，
姐手姐腳，
出拳出腳一 d 力都冇……

今日既位置唔係好好，
好多時出黎都係影背脊。
支 Lens 又好似影得唔夠遠。

有人問我點解我影 d 相可以近佢既咁多。
佢個部係 Fujifulm F11，
600 萬像素 DC，
等效焦長最長為 108mm。
我個部係 Olympus E-300，
800 萬像素 DSLR，
支鏡既等效焦長最長為 400mm。

我仲打算買多支 ec-14 鏡加落去，
焦長可乘多 1.4 倍，
不過缺點係光圈細左，
同埋易左手震。

希望月尾場李克勤演唱會個位好 d 啦，
唔駛成日影后（後）……

睇完演唱會坐車走，
有人話獅隧九車相撞，
所以大塞車。
唔係丫，
都幾暢通 bor。

紀錄連破

曾經有人講過：
「紀錄係要黎破既」

我今日又破紀錄，
兩點先係公司走。

「車，上個星期五都差唔多兩點啦」

請留意，
我係中午兩點走。
Newsgroup 有人問我，
「你又話好忙既？點解可以返半日就走得？」

但其實我係返左日半走得，
唔係半日。

話說老闆聽日飛，
今日又要畀部 Sample 個客。
咁就要趕工趕工趕工。

上面又 Send 左五部機落黎。
咁就要做埋 Test 同 Upgrade Firmware。
試極個 Performance 都唔得。
後尾 Check 下，
8051 佢又係 downlod 左舊 code，
Firmware 佢又係 downlod 左舊 code，
咁梗係唔得啦。

不過就算用左新 Code，
Performance 都係唔得。
結果就要留低 Debug 同試機。

八點半我出返佐敦上堂，
食完飯十二點返公司繼續做。
點幾時，
個同事話佢攪掂晒 d 野走得，
（結果當然未啦，佢都冇試晒 d Features Work 唔 Work）

Anyway，
得我一個留係度通頂。
試試試，
做做做。
最後有製成品，
不過在我而言，
仲有很大既進步空間……

放飛機

真係好鬼憎冇責任感既人，
己所不慾，勿施於人。
所以我都盡量唔會咁。

昨日唱緊 K，
收到大衛同學既電話，
話佢地踢完波食飯，
問我去唔去，
仲問我做乜唔去踢波。
咁我梗係呆晒啦，
都冇人通知過我。

咁我聽到個邊有人大大聲話一早通知左我。
咁大隻死貓，
我返到屋企梗係即刻 Check ICQ History 啦。
聲大大個位王生，
我最後一次收佢 Message，
係十月問我拿 E-mail address。
約開人既肥宇，
我最後一次收佢 Message，
係十二月十日問我十八日踢唔踢波。

我就真係唔知邊個幾時係咩地方用過咩方法問過我知有波踢。

呢樣都未算激氣。
最激氣係話約我今晚食飯，
問佢時間地點呢，
就話聽日電話聯絡。

結果今日我就成個下午係紅磡等電話，
兼且順手打機（或者你可以調返轉講）。
等到六點幾七點都冇電話，
就返一返屋企先。

以為自己記錯日子，
可能佢地尋日講既係下星期食飯。
碰巧見到大衛同學 Online，
就 Send message 同佢啦，
結果佢先話：
「王生話取消左」

Well……

唱 K

一月一日星期日，
返完崇拜之後（今日係元旦主日）
返到屋企，
問媽媽去唔去食午飯。
佢話好呀：「等我廿分鐘。」

結果……
我等左一個鐘都未出到門口。
辛辛苦苦落到樓下，
仲要等 Auntie Yip，
結果由我返屋企計，
個半鐘都未過到第一條馬路。

但係我又約左人 wor，
結果都係冇同佢食午餐。
出到旺角，
行左潮流特區（？！），
之後行旺電，
再之後信和。

五點半去左創興唱卡拉 OK（？！），
講真，
我好少唱 K。
因為一黎我唱得唔好聽，
二黎我把聲入左咪出返黎係好怪好難聽。
所以免得過都唔去唱 K，
Even 去左，
都唔會拿咪唱歌。

不過今日得兩個人去唱 K，
（唔好週圍同人講呀）
焗住要拿咪唱歌。

唱完 K，
就去左睇戲。
睇「情義我心知」，
OK 好睇啦。

睇完戲，
就坐巴士走。
有人表演企係度訓覺，
我又驚佢跌 wor，
結果就前後左右護住佢。

基本上，
除左佢垂直座落佢我末必豆得住之外（只豆住雙手）
佢向邊個方向跌都唔會有事。
人肉護墊，
勁呀！