三振出局

今日係觀塘有最後一場外圍賽，
開賽時間係三點，
咁我起身已經一點，
沖過涼換件衫已經要飛奔出去。

點解咁晚先起身呢？
話說昨日落 Bar 睇波，
成三點幾先走，
返到屋企上埋網，
上床訓覺都成五點，
所以……

今日同星期二比，
完全變左另一個人咁，
打唔出水準，
又勁犯錯。
結果分組賽三場輸晒，
提早出局。

夜晚出左佐敦食飯，
食完落去打機練兵。
都係打得好差，
或者呢 d 先係我真正既實力，
又或者係因為唔夠訓。
（真係識得找藉口）

十點幾，
同埋攪比賽個班去左茶餐廳睇波。
之前最低消費係五十，
點知今日加到六十八。

咁叫飲叫小食啦，
我地有七個人，
佢畀左三個叉、三個匙我地。
我同佢講話畀多幾隻叉我啦，
點知佢拿左一隻畀我……

睇完一點鬆 d，
唔知係咪因為飲左兩杯凍啡，
攪到四點半先訓著……