遲大到

今日遲大到 tim，
仲要遲幾次。

話說早上約左十點睇醫生，
不過因為夜訓既關係，
（我返到屋企都已經四點……）
起身都已經九點半。

所以打電話去改左做十一點。
睇完醫生，
落左尖東食下午茶自助餐。

好趕好趕咁落到尖東，
兩點半去到。
遠遠咁望，
好似開始左。
點知埋到去，
個侍應同我地講，
下午茶三點半先開始，
現在係午餐時段執拾中……

咁就唯有週圍行，
去左買羽絨褸。
呵呵，
現在有褸十月去旅行，
或者冬天去美國。

食完自助餐之後，
大約五點半。
見未收招換咒，
經過理髮店，
就入去剪髮。

佢話等一陣，
但唔駛等好耐。

洗完頭之後，
收到電話。
咁我以為好快剪完，
咪約半個鐘後 lor……

結果我等左兩個半鐘……
攪到有人等左我兩個鐘，
真係極之唔好意思。

之前以為要做雷霆救兵，
所以冇賣定飛睇戲。
結果就行 LCX 同 Pageone，
買左好多雜誌。

有人因為企係 HMV 等左我兩個鐘，
攪到腳痛同抽筋。
但係又除夕封晒路 wor，
要行多半個鐘先有巴士坐。

破紀錄

今晚又破紀錄，
老闆上左大陸開會，
我就留係香港趕 Project。
因為就快出 Show，
（應該係下星期三上機）
所以要趕。

其實我個 Part 大致完成（應該），
但係同事個邊未攪掂，
我唯有幫幫佢手一齊 Debug。
唔覺唔覺就攪到十點幾，
開始覺得肚餓，
就 Clear 埋公司餘下的兩個碗麵。

之後差唔多大致完成，
老闆亦係呢個時間返到。
傾左一陣，
佢話過左年會開始請返多 d 人，
Software 起碼請一個，
仲叫我地同時一切 in，
睇下同新人夾唔夾 wor。
仲話今次請人會謹慎 d，
請 d 真係做野既人返黎，
唔會只係為左儲夠 Head Count。
ER……
聽住先啦。

另一個今日上左大陸既同事之後都趕埋落黎，
仲帶埋 D 樣版機落黎，
即係又有野做啦。

離開公司時，
已經點幾兩點了……

---

唔覺意打電話嘈醒左人 tim，
真係唔好意思。
不過我收線之後，
另一個人又打畀佢。
收到既消息係，
唔駛做「雷霆救兵」。

想走？冇咁易……

今日好唔舒服，
所以七點幾八點就收工。
臨走前，
被老闆照左陣肺。
話新年前（即係幾日後）要攪掂晒所有野，
必要時（即係一定要）星期六都要返。
現在等收尾數，
係時候搏……

Well，
我都知道，
今日既休息，
等於明天既辛勞。

臨訓前，
收到一個久違了既電話。
傾了三十八分零七秒，
感覺良好。

---

今日生果日報新一則

常用電腦皮膚易過敏

中央社報道，
長期在電腦前伏案工作，
不僅易腰痠背痛，
還得留意可能引發「電腦族皮膚症候群」。
有皮膚科醫生指出，
常接觸電腦周邊用品，
易引起過敏性濕疹和急性皮膚炎，
長期固定姿勢更會令手部缺氧，
建議最好每三十分鐘動一動。

台灣書田診所皮膚科主治醫生鄭惠文說，
每天長時間使用電腦，
姿勢不良不僅會腰痠背痛、肩頸僵硬；
而接觸電腦周邊用品，
更會引起刺激性、過敏性手部濕疹和急性皮膚炎，
若手部皮膚長期受到壓迫，
還會導致局部缺氧及血管擴張，
而這些症候都通稱為電腦族皮膚症候群。

點解 Quote 出黎？
因為我最近個身好痕 lor。

Harry Potter

今日一個人去欣賞電影。
去之前，
去左麥記試佢個板燒雞腿包。
咬落去感覺良好，
口感一流。
啖啖肉汁，
不過亦都好油。

最怪係個包既有燒烤醬，
也有沙津醬。

今日睇既係 Harry Potter，
入場既時候，
由我行入個位，
到我坐低，
都被隔離位望實。
我開頭怕坐錯，
但 Double Check 過冇錯。
咁唔通係識既？
望落又有 d 似舊同學（崔同學同朱同學）。
結果原來係想同我調位，
因為我買那個位剛剛係佢地四個 Friend 既中間。

講返套戲，
唔錯。
不過接近三個鐘都講唔晒小說所有既野，
變左有部支節好雞肋。
之後個兩集小說仲長，
唔知佢拍成點？
有 d 期待。

---

有人漏左份聖誕禮物唔記得帶返香港，
話請我食餐勁既補數。

今晚去 OperRice Search 酒池肉林既食評，
（有人話想去呢間）

點知睇完戲返屋企，
就收到 ICQ Message，
同一個網頁，
講緊同一間食店……

入屯門

估唔到咁快就到假期尾，
今日同大人入左黃金海岸行。
今朝大人去旺角睇中醫，
本來打算係旺角坐車入屯門，
不過大人睇完醫生返左屋企食藥，
咁就係佐敦坐小巴啦。
呢程小巴就抵 lor，
十六元既價錢，
過山車般既享受。

入到黃金海岸，
行左一陣，
去左「金」海豚廣場。
吹下海風，
打幵機。
就坐返車出旺角。

呢程車比入黎個程仲抵，
兩個人包車出返黎。

---

下年有舊同學結婚，
得悉有人停工停學幫佢做伴娘。
真係夠朋友。

我係度諗，
當有一日我出事時，
會唔會有 d 咁既死黨彈出黎幫我呢？

---

早兩日有個大同約我睇 Harry Potter，
本來話個晚話我知幾時睇。
結果昨晚問佢先定星期三。
今朝打黎話想改今晚，
我話約左屋企人做節，
佢先話係星期三睇。
但係要改係觀塘睇，
咁我梗係叫佢買飛。
結果呢，
無尾飛鉈。
唔問佢都唔話想改 31 號。

Well，
我決定明日自己去睇。

i.2000 Gathering

今晚約左大同食飯，
中午食完飯我就出尖咀打機。
打到五點幾就飛奔去戲院，
睇情癲大聖。
原本可以早 d，
不過臨尾有人挑機，
打埋先走得，
不單幸運地贏左佢，
仲抽中張閃 Tim。

睇完戲，
就會合 i.2000 打邊爐。
今次有十個人去，
打完佢地落 Pub，
咁我借口送 Bonnie 返屋企，
可以走人。

阿梁話有睇我 Blog，
其實我都有睇你個 Blog wor，
你話想跑山嘛，
玩野外定向啦！

---

廿四號篇日記都唔記得講，
廿四號我去左求婚，
仲成功埋 tim。
不過，
新郎不是我，
新娘都不是 Bonnie。

其實係有個 Friend 求婚，
我去幫手送花而已。

話說鋪排左女主角沿途有十二個人送花，
呢十二個人分成三 Teams，
我係 C Team 隊長，
負責守尾門。

點知，
狀況出現。（嘩！好台灣式既用語呀）
女主角改變路線，
我地即刻走位。
結果十二支花只係送左六支，
不過 C Team 全隊四支都送晒，
C Team 隊長真係領導英明呀。（嘔）

漏單

今年幾個大日子都係主日，
聖誕係啦，
元旦係啦，
甚至年初一都係。

今日係主日，
當然要返崇拜啦。
本來想找埋大人返崇拜，
不過大人話要睇醫生，
所以我都冇問佢。
不過我今日少有地準時返到，
呵呵。

培浸每年一般有兩次浸禮，
一次係聖誕主日，
一次係復活節主日。
今日都有浸禮，
有十位新葡。
因為有浸禮，
所以今日遲左放，
會合埋剛剛被人 Sell 樓盤既闊太，
就去左行朗豪坊。

之後食野，
順手送左個兩份禮物畀佢。
一份係早兩日買既 Twins CD，
另一份係上個星期買既 Fujifilm F11 數碼相機。

五點幾去睇如果愛。
睇完去食日本野。
勁攪笑，
叫野食漏單就見得多，
埋單都漏單就第一次見。
話說我話埋單，
咁個 Waiter 就講喇：
「經理，九號埋。」
（唔通得經理先可以掂錢？）

等左兩個字，
見其他遲過我地叫埋單既都埋左單，
唯有叫多次，
不過收錢既唔係經理。
咁之前「經理，九號埋。」，
呢句又點解呢？

埋完單，
趕落中環睇 MK 表演，
落到去，
仲要排隊入去。
結果遲左半個鐘，
不過都聽到佢唱兩、三首歌。
完左之後，
同 MK 傾兩句，
仲見到 MK 另一半 tim，
今次都叫做意外收獲。

「平安」夜

平安夜，
對我黎講同平日冇乜分別。
要迫要盛，
我昨日已經同 SOC 班 Friend 行完，
我考完 First Aid 去油麻地 Join 佢地，
之後食煲仔飯，
食完會合埋簡小姐，
就一行四人行落尖咀。
行完 Sogo，
行星光大道，
係 Cafe 飲完咖啡就散喇。

今日都係無無聊聊咁過，
訓醒都成十二點，
食完飯就出去打機。
不過個 Game 依然咁多人玩，
等左幾個鐘先到我。

係等既時候，
收到老闆既電話，
話部機有乜乜既問題。
我知係好急，
但係我冇機係手，
D code 又冇，
點幫你 Debug 呢？

玩左一百蚊左右，
中左張金閃張角，
稱號升埋霸王，
就撒退了。

本來今日約左媽媽食聖誕大餐，
不過我早一個星期叫佢訂位，
訂足一個星期都冇訂。
加上又炒埋架，
事緣佢上個個星期丟左我個有紀念價值既紙盒，
其實係好少事，
不過我唔滿意佢講大話，
死都話冇丟，
拆穿左就賴第二個。

丟左咪話丟左 lor，
做咩要講大話。
一開始就話打電話問過晒我，
所以乜都冇丟。
之後我出後樓梯找，
又講第二個大話，
話放係我櫃頂。
我櫃頂根本就乜都冇。
跟住就賴係姐夫丟既。

喂，
唔係你丟，
你畀錯 Information，
係咪都好應該道歉呀，
佢就一個乜都唔關佢事既樣。

今日打機打到咁夜，
飯都唔食，
某程度上都係唔想見到佢。
一陣求求其其找間食就算，
又唔知幾點食，
你唔係叫我廿四小時 Standby 等你呀。
原本打算收到電話都去食既，
不過佢一路都冇話我知幾點食，
又冇電話打黎，
既然咁冇責任心，
唔食算數。

考試

今日大人返黎，
不過我唔得閒接機，
原因係我今晚要考試。
唔知點解，
大人返親黎個晚，
我都係要考試既，
今晚就要考 First-Aid。

不過好奇怪，
大人四點落機，
不過佢細佬四點幾仲係屋企。
攪到大人出到黎好惶恐，
行李又唔見晒，
接機既人又一個都見唔到。

行李唔見晒，
係因為 d 行李上唔切飛機，
要下班機先到。
咁就滯留係機場幾個鐘，
真係慘。

講返自己，
五點鐘就係公司走，
即刻走去買今日新出既 Twins CD 首批限量版。
限量版既意思，
我做係有限度大大量生產……

之後就落灣仔找 Moly 拿功課，
然後行上奧運大樓考試。

行到上去，
剛剛遲左少少。
今日考試分三 Part：
筆試 - 四選一選擇題，
三十題中要答對十八題，
我選冇問題掛，
除了數字題冇背到，
（即係問人呼出既空氣有幾多 % 氧個 d）
可能錯之外，
其他都應該答對既。

之後包紮，
紮兩個傷處。
首先係手肘出血，
跟住係大腿骨折。
都冇問題既。

最後考成人 CPR。
九點就考完試走得喇。

做冬

今日冬至，
但屋企約唔到時間做冬，
約左廿七號。

結果過左海同 Auntie 葉外家食飯。
十三個人，
係酒樓食飯，
叫左個全包宴。
但上菜既次序真係笑死人。

一黎就燒鵝，
之後雞同時蔬。
下一味就伊麵同炒飯。

鬧完之後，
先上返翅，魚。
然後乳豬全體得半隻。
又鬧完之後再上，
基本上都係個碟，
但將半個豬頭換返一個。
真係笑死。

---

大衛同學話想去旅行，
一係去英國，
一係去美國。
如果係美國，
就會係東岸。
如果係東岸，
就會係 Boston。
問我有冇興趣，
有 d 興趣架，
不過我年中先去完，
出年中下旬佢又有要事係香港。

人地唔係 Boston，
咁我過去做乜？
探 Anna 咩。

---

明天，
期待。

都話唔熟 lor

今日個頭好痛，
所以冇乜 OT 就返屋企休息。
返到屋企食飯，
真係激死。

食蒸水蛋，
但係好似未熟 wor。
「唔係呀，
太太睇過話熟架喇。」

熟？
唔係掛，
水汪汪，
仲倒倒得出水，
不單止一夾就散，
係未夾都散，
一放筷子埋去已經散……

叫佢蒸多陣，
五分鐘唔夠就拿返出黎。
係咪熟就咪熟啦。
係都要話叫我試下。
結果我食左一啖咁大把啦。

仲話今日公司派人黎教佢煮，
唉，
咪又係煮成咁既款……

早兩日食 d 唔熟既雞，
薯仔炆雞，
整左薯仔炒雞。

呢排冇乜事都係唔返屋企食飯安全 d。

---

今晚收到一封信，
係 d 保險推銷信。
不過個間野點解會有我名同地址呢？

睇一睇邊個寄黎，
我就知咩事了。
原來係抄同學錄，
署名兩個都係中學同學，
仲要係唔熟個隻……

走堂

今日開例會，
班 Hardware 一個都唔係度，
一個請假，
一個上左大陸。
結果講既就大部份都係 Firmware 野。

一路死做爛做都冇結果，
做到八點幾好似好 d，
不過攪埋 d 手尾，
又趕唔切返學了。

不過我功課又未做，
默書又未溫，
返唔到學都係一係好事。
（其實係咪故意走堂呢？）

講返日文班，
因為舊那個老師返左日本，
新班換左個新老師 -- 小西老師。
佢講野時，
動作好誇張，
亦因為咁，
我地更加容易明白佢講緊乜。

第一堂通常都有指定動作。
就係自我介紹。
講自己個名（玄也），
興趣（踢波）、放假做乜（踢波），
最鍾意日本 d 乜野（漫畫），
最鍾既動物（貓）。

當然，
我既自我介紹加了適當既修飾，
並用上我曉既日文詞語啦。

---

失去聯絡兩日，
有 d 擔心 Tim。

埋身肉搏

Project 接近埋尾。
換句話說，
又係趕 Project 既時候。
由零開始行第一步係難，
但行最後一步到終點更加難。

Auto Focus 去到最後一個階段，
老闆話有好大 Improvement。
但係我角度，
有咩？
唔覺 wor，
咪又係咁差……

尋日老闆去見客，
拿晒 D 機去，
亦即係話，
我冇晒機做 Development。

老闆打左幾次電話返黎，
呢樣呢樣唔得 wor，
個樣個樣同我試下丫，
AF 個度仲可以點改？

但係我手頭一部機都冇，
耍我咩，
點同你試？
點同你改？

Anyway，
六點九我都收工。
老實講，
今日再磨落去，
都係冇結果架啦。
留返 D 精力聽日搏殺過。

---

唔醒起，
原來美國係用兩腳插頭，
同香港唔同。
差 D 注成大錯 tim……

完作任務

今日走三場，
第一場係崇拜。
因為一早要起身崇拜既關係，
昨晚有我對愛隊紐卡素既比賽直播，
我都冇得睇……><

雖然早睡，
不過去到禮拜堂都遲到。
（真係一個壞習慣）
我去到既時候，
詩歌都已經唱完，
講者正在講道。

十二點完左崇拜，
我又要急急腳走。
因為下午要係青衣幫班。
一點四十五分集合，
好彩我都仲有時間食埋個 Lunch。
今日小班教學，
一個教練都只係教四個人。
好順利咁教完 Map Walk，
之後玩圖例接力卡，
之後跑模擬賽，
就收工啦。

之後就坐巴士落旺角，
首先去信和，
之後過星際，
然後百老匯，
逛先達，
仲行晒成棟新之城。

最後回星際買。
Well，
雖然唔係一件 Perfect 既產品，
但都應該 Fit 到大部份既 Requirement 既。
返到屋企，
都成九點幾，
但係電視又冇野睇，
食完飯就訓覺了。

買雜誌

每日都有新雜誌出，
就算同類型既，
都有幾本。
百花齊放，
都可以算係幾好既現像。

我其實冇買雜誌既習慣，
可能冇咁既耐性坐定定睇。
睇一兩頁可能就唔睇，
咁就浪費左一本雜誌。

不過有時，
見到封面既標題，
都會有衝動買返黎睇。
昨日就買左本喇。

呢期既封面寫既係：
「拍片 DC 日攝夜影大競賽」

被呢個標題吸引，
完全因為呢期搜集緊 DC 仔既資料。

叉開少少話題，
早前睇電影電車男。
因為愛馬仕最買一部手提電腦，
所以電車男就周圍幫佢搜集資料。
睇到呢段我好感動，
想效法。

剛好最近有人想買 DC，
咁我梗係自告奮勇找資料。
暫時我定既準則係：
1. 一部數碼相機（廢話）
2. 可以拍 Video
3. 影相質素高
4. 容易操作
5. 傻瓜機得黎，又有得做高階些少既設定以備不時之需
6. 叉滿電可以用得耐
4. video 拍幾分鐘就可以，
不過當然愈長愈好。
理論上應該 MPEG4 先做到我要求。

經過一輪既努力，
我發覺……
冇野係完美既，
部部機梗有 d 缺憾……
接落黎，
就要睇我點取捨……

講返轉頭，
買左個本雜誌，
d Information 對我係……冇用既

咁客氣？

有個中學同學真係好客氣，
Send ICQ Message 問我可唔可以將一個 pdf 變做 Word Format，
d 字可以Copy。
那個 File 是日文來的，
需要 Copy 出來翻譯。

咁因為我屋企先有 Tools，
就話夜晚返到屋企先幫佢。
點知佢就話唔駛麻煩我，
其實點會麻煩丫，
舉手之勞之嘛。
甚至我對住個 File 打多一次畀佢，
都唔係好複雜既事。
不過，
佢係唔駛你幫既，
你都幫唔到。

---

係金魚個日記，
見到有個朱古力跟出生日期既關係

朱古力︰熱品脫（Hot Noggin）
成份︰濃厚朱古力奶加植物油
特性︰樂天知命
生日占卜︰你熱愛生命，時常充滿盼望，
無論生活環境多麼惡劣，面對多大的難題，
你都有一顆熾熱的心，盡自己的能力，
幫助社會，幫助別人。
你有敏銳的觸覺，情緒容易受環境的影響產生波動，
無論如何，你渴望得到溫馨的愛情，
在彼此凝望的眼神裡，得到恬靜和安忍。
朱古力蜜語︰讓世上每人都可以享受自由。

之後又做左個生理測驗，
http://www.quizgalaxy.com/quiz.php?id=55

我的人生比重:
love, career, family 各佔 22.2%
health, fun 各佔 16.7%
money 佔 0%

因為我唔易嬲，
又容易開心返，
結果又唔可以扮嬲，
又唔可以扮唔開心…… ><

承諾

昨日 Mission 失敗，
今日繼續，
今日換既係 12000 分一張，
位置較後既飛。
一樣九點開始打，
我仲找埋媽媽幫手打，
一路都係打唔通。
今日唔駛開會，
所以可以盡量 Keep 住打電話。

由九點打到兩點，
足足五個鐘，
鍾於打到昨日個 Status，
「對唔住，
呢家線路好繁忙，
請等一等……」

今次死都等埋落去，
等左幾分鐘，
就叫我入 Credit Card No，
同埋 ID Card No，
入完之後傳來既係：
「對唔住，
今次優惠已經完滿結束……」

Well………

好唔開心………
唔開心唔係因為冇得睇，
（我舊年都冇得睇啦）
唔開心係因為我應承左而做唔到。
對現唔到承諾，
係最唔開心既事……

---

昨日開會，
話星期五要上大陸，
昨晚 Check 一 Check 本回鄉證，
咦？過左期既？
即刻上網 Check 一 Check，
快證最快都話要五個工作天，
即係……
上唔到，
咁係好彩定唔好彩。

1832233

「1832233」，
一個某信用卡既優惠熱線，
一個我每年總會打一次既熱線，
一個每年到十二月尾某一日就會 Jam 到痴晒線既熱線。
今年今日（二零零五年十二月十四日），
就係換領叱吒頒獎禮門卷既日子，
用 20000 分，
就可以換一張飛。
我上個月月結單 Show 既只係得 37xxx 分，
為左可以今日換飛，
我呢一個禮拜專登碌多二千幾蚊。

優惠熱線由上午九點至下午九點服務，
我八點五十五分已經開始打電話。
用我既 V3 打，
一時「線路繁忙」，
一時「通話失敗」，
一時「do……do……do」，
我唔知呢四個有咩分別，
不過肯定既係，
上述三個情況都係話我知，
電話打唔通……

由係屋企打電話開始，
到坐巴士返工，
都返到公司，
我不斷又不斷既 Redial。
結果都一樣，
打到我手提電話冇電，
轉用公司有線電話打，
十點幾通過一次，
但轉來既係：
「對唔住，
呢家線路好繁忙，
請等一等……」

我等左好耐，
等到我夠鐘開會，
都未等到。
開完會出黎，
去食飯，
都一路 Keep 住打，
連女朋友都用長途電話幫手打。
佢有一次打得通呀，
不過係佢入完 Credit Card No，
同埋 ID Card No 之後，
傳來既係：
「對唔住，
今次優惠已經完滿結束……」
Well……

想你所想

想你所想，
係好多公司既口號，
政府都好似用過。
不過今日我發覺，
原來我都得架 Wor。

話說愁緊聖誕禮物，
原本打住 Tiffany，
不過星期六係 Sogo 行左成個鐘都選唔到。
咁就唯有想過第二樣。

心目中都有幾個 Plan 既，
今日上網搜集資料，
找到一樣，
完全符合要求。
最重要係：
想你所想。
呵呵呵

---

尋晚有個 Friend 打黎問我平安夜有冇節目，
那個 Friend 即係早排話有 Party 那個。
佢現在又唔去那個 Party 了，
話太貴 wor，
咁又係既，
係咁加價。

Anyway，
本來話入南丫島燒野食，
不過屋主話唔得。
咁唯有想過第二樣，
不過到收線時，
都係未有決定。

不過昨晚我都未知有冇空，
只係憑經驗估計我會冇街去。
不過今日 Confirm 左，
我係冇街去既……

進展

今日再次返工，
繼續去 Solve Auto Focus 既問題。
其實做呢樣野好煩，
因為部機我唔可以完全 control。
首先就係 os 同我隔左一層 layer，
寫呢曾 layer 既公司 shield 左好多野，
好處係我做少好多，
例如我唔駛處理 Save Jpeg 呀，
又或者由 Sensor Get Data。

不過都有唔好處，
就係萬一 Middle Layer 佢寫得唔好既話，
我要補鑊就辛苦了。
好可惜既係，
呢個已經唔係「萬一」既問題，
而係切切實實我現要處理既野。

另一方面，
控制 Motor 都唔係我做，
而係透過另一粒 Controller。
不過個 Command Set 總係欠 d 野，
一個 Command 係叫佢移動個 Motor，
另一個 Command 係叫佢 Reset，
但係就冇叫佢唔移動既 Command。

可能你會話，
你唔 Send Command 過去咪得 lor。
不過攪笑既係，
唔 Send Command，
個 State Machine 唔識改，
即係會 Wait forever………

Anyway，
今日收到個新 Controller program，
終於有呢個 Command。
成個 System 頓時 Improve 左好多。

順手幫個同事手 Debug，
佢攪左成日都攪唔掂，
我埋機十分鐘就找到原因了……

白石橋教班

今日又要教班，
一個係白石橋既 Lv2 班。
原本唔係我教既，
呢個班係 Lv 1+2，
有個教 Lv1 既教練唔得閒，
所以先找我代堂。

今日有兩個上車地點，
一係九龍塘，
一係荃灣。
我就梗係選九龍塘啦，
去到「理想酒店」附近，
嘩！好多旅遊巴，
我一路行到街尾先找到架車。

係找車既時候，
我仲撞到個 Friend Tim，
佢今日要帶 d 乜乜親子旅遊。

Anyway，
坐旅遊巴去到川龍，
就分組教學喇。
今日有三個學員沒有到，
全部都係我個組，
所以我個組得五個人，
小班教學，
呵呵呵。

今日係附近有個超長途賽（>10km），
我因為要教班，
所以冇得參加。
不過下午有個模擬賽畀學員（~2km），
我又玩下，
順手收 Points。
最快個學員跑二十分鐘，
我跑十五分幾鐘。
原本可以再快 d，
不過我要確保所有學員安全到達，
所以當我追到最後那位學員之後，
我就要等埋佢喇……

我想去盡既話，
可以十三分鐘左右啦。

Olympus E-maging School

今日下午去左攝影班，
一個由 Olympus 攪畀新手既班。
兩點開始登記，
兩點半開始上堂，
不過我兩點九先去到。
不過好彩頭段都唔係主菜，
頭段都係介紹下部新機，
一部入門既 DSLR - E-500。
E-500 有 D 幾好既 Features，
甚至比我用緊個部 E-300 好，
當然啦，
冇 Improve 又點會出新機？


之後就到主菜，
教影相。
不過話佢係教影相，
其實係教你點用部 E-500。
雖然部 E-500 同 E-300 點都有 D 分別，
不過都讓我更加了解我部相機。

首先講曝光，
最好玩就係測光多左兩個模式，
一個係高光調整，
另一個係暗位調整。
可以專登整光 D 相或相反。
當然，
你自行調較光圈快門，
或者加減 EV 都做到呢個效果，
不過有呢兩個模式就方便 D。

跟住講白平衡，
讓我知道原來冷色會另到個 MODEL Cool D，
相反張相就會開心 D。

仲有講光圈同快門、
淺景深、安全快門、
構圖（黃金分割同留白）。

原本話四點半完，
結果都講到五點。
今次仲有個 Welcome Gift，
有特惠價購買鏡頭，
不過，
個特惠價仲貴過街買……

充電

身體開始發出警號，
再唔處理又會爆煲。
不過現實上又好似唔容許我咁做，
真係兩難。

---

一個 Underground 既日記，
老友又道出出現問現。
唔知幾時召集令出現，
不過我相信當召集令出現，
我地幾個會隨時出現。

---

昨晚做到十二點半，
今日八點就想走。
不過我一拿袋想走，
老闆就叫住我，
話現在埋尾階段，
可能有需要捱一捱，
可能要 OT。

不過結果我都冇 OT，
照走可也，
因為我真的很累，
需要充充電。

充電既方法，
除左訓覺呢個生理上既充電方法之外，
仲有心理上既方法。

冇錯，
就係去左打機喇。
等左大約半個幾鐘先輪到我，
打左五鋪，
打到九點半就畀下一手，
抽左五張卡，
兩銀兩黑一白，
收獲都唔錯丫。

破紀錄

炒呀，炒呀，炒呀，
想買個 d 野係咁炒起左，
咁貴唔抵買呀。

想買兩樣，
一樣係克勤隻新碟，
炒高左成倍，
由 $89 炒到 $169。

另一樣係 PSP 既 Monster Hunter Portable，
都差不多炒高五成，
由 $259 炒到 $399……

---

今日克勤演唱會開買，
不過唔同 Twins 演唱會，
克勤個得心應手演唱會係冇網上購票既，
要親身去買。
觀塘又冇城市電腦售票處，
好彩 Alex 係上環返工，
又近售票處，
可以幫我買，
我順手約埋佢去睇啦。

原本我想睇頭場或尾場，
不過唔知會唔會加場，
加幾多次場。
頭場係年廿九唱到年初一，
大時大節，
Alex 都唔得架啦。
唯有退而求次睇第二場喇。

不過 Alex 想睇 $200 wor，
結果我出 $600。
個位 ok 啦，
我信 Alex 既選擇。

---

今晚終於破左紀錄。
係公司十二點半先走。

首先係老闆既 E-mail：
You may need to put in overtime or working at home if necessary,
we have to get this out of the way asap.

不過就算唔係收到呢封 e-mail，
我都係咁夜走，
原因係唔忿氣做唔到。

話說要做實驗 Get Data，
做極都做完。
唔係完全做唔到，
只係 Get 完返黎既既 Data 係錯既。
結果就做完又做，
走個時都係……做唔到 ><

仲要找唔到返佐敦既小巴，
要坐旺角小巴，
上床訓覺既時候係……四點。

---

夜晚同 Alex 食飯勁攪笑，
去 Food Court 食，
我叫左個餐，
餐就梗係有野飲架啦。
咁佢話我飲咩，
我咪話可樂 lor，
唔通話唔駛喇唔該咁？

不過結果係，
佢收我十蚊可樂錢？
我當然追返個十蚊啦。

不過講返轉頭，
係咪有咩我會錯意呢？

寫過吧啦

今日老闆去左見客，
係冇皇管既情況，
我今日當然準時離開啦。
不過準時極，
過到奧運大樓都要遲到，
即係話，
考試個日唔請假的話，
九成都趕唔切考筆試。
今日個堂因為原本個阿 Sir 唔得閒，
所以黎左個 Miss 代課，
今日主要係講重點。
重點姐，
即係拿住份試卷黎講……

之後示範包紮，
點樣可以包好 d。

不過今日都有個壞消息。
我考試個 Partner 整親右腳腳踝，
打晒石膏。
如果當日我咁好彩抽到紮右腳既話……

---

係我 Level 唔夠，
定係上手真係寫得差呢？
我幫手 De UI 既 bug，
結果個 Function 我係有頭寫過。

原本寫法係，
有兩個 Variables，
一個係儲現在係第幾頁 (Y)，
另一個儲現在係呢頁既第幾個 Item (X)。

咁每次一動，
首先就 Update X，
之後睇下 X 係味太大或太細，
需唔需要改 Y，
改 Y 個時又要睇下會唔會太大或太細。
總之有成十個八個 Cases 咁。

結果我就用一個 Variable 儲現在係第幾個 Item (Z)。
X = Z % ItemPerPage;
Y = Z / ItemPerPage;

將百幾二百行既 Code 縮到得七十行左右。

其實原本都唔想攪佢，
不過因為要加野，
有 d options 要 Gray 左佢，
咁 Gray 左就自然唔係 User Select 到，
即係動既時候要 Skip 左佢。
咁舊方法點改先做到呢？
我唔識……

講返個 UI，
D Code 真係複雜到暈，
連埋 Header 檔，
Total 有 24 個 Files。
Trace 都 Trace 到我死咁滯，
d Pointers 飛黎飛去飛到人都癲……

First Priority

嘩好凍呀，
有乜理由咁凍架？
昨日已經開始凍，
不過我都仲係短袖加褸。
今日就要長袖加褸，
仲要凍到入心入肺。

---

估唔到個建議都未 Suggest，
就被人 Ban 左。
好 Hurt 呀，
弱小心靈嚴重受創。
哼哼哼哼哼哼哼哼哼哼哼哼哼哼哼哼哼哼哼哼

（講得再誇 d 丫笨）

---

今日開例會，
因為另外那個 Software Engineer 病假，
所以我頂晒 Present。
其實我做既同佢做既，
好大程度係冇關係，
好彩昨日都有問過下佢攪成點，
如果唔係真係口啞啞。

不過勁攪笑。
「呢樣野好重要，
今個禮拜做唔做得起？
First priority。」

「呢樣野今個禮拜 first priority 攪左先。」

「呢樣野今個禮拜做左佢。
First priority。」

如是者，
我手頭上有十樣八樣 First Priority 既野。
究竟邊樣先係 First Priority 呢？

沉默是金？

逢星期一，
我就好似追連續劇咁，
去睇人地日記。

Sorry，
可能我唔應該有咁既心態，
不過人地日記劇情峰迴路轉。
兩小口子一時一時糖黏豆，
一時水拌油。
究竟今個星期係糖黏豆？
定係水拌油呢？

上個星期好似又發生左狀況，
係咩原因我唔知。

你當我八掛又好，
真係關心朋友又好，
總之我就好想知。

其實有 d 咩解決唔到呢？
有時三口六面講清楚就得，
不過有時就唔講好過講。
唔係話有咩唔講得，
既然講左會令到情況惡化，
點解仲要 Take 呢個 Risk 呢？
唔一定因為件事本身，
可能因為你表達得唔好，
亦有可能佢了解錯左，
而令到情況惡化。

以前，
我都以為咩都應該攤開黎講，
不過我漸漸發覺，
有時沉默的確是金……

當然沉默唔代表件事唔存在，
不過有時解決事情，
係可以係 Background Mode 做既。

希望佢兩個快 d 冇事啦，
不過以我多月睇佢日記既經驗，
好快冇事既。

讀書千日 決戰今天

正所謂養兵千日，
用在一朝。
我就讀書千日，
決戰今天。

讀左兩年幾日文，
今年第一次考能力試。
能力試分四級，
最低係四級，
最高係一級。
我梗係一步一步黎，
考左四級先啦，
更何況呢個係用黎 Claim 返 CEF 既，
更加不容有失。

四級既考試係下午開始，
聽講有唔止一個試場，
我就係半主場九展考。
點解話係半主場呢，
因為我大大話話係度返左成年工，
係試場個位，
演唱會又睇過，
展覽又睇過，
交通亦都睇過。

兩點開始入試場，
我點九就到，
做最後衝刺，
溫多次生字。

開頭以為得自己一個考，
點知都撞到兩個跑定向既女仔。
入到 Hall A 試場，
搵極都搵唔到自己個位，
原來自己係 Hall B 考……

個主考講野好有趣。
「現在仲未開考，
好去定洗手間先喇，
因為一開始左，
你就唔可以離開喇，
除非你選擇放棄考試。」

「現在距開考仲有兩分鐘，
如果你要去洗手間，
我諗你要飛奔去喇。」

「考試完結，辛苦晒大家。」

最後沖刺

因為明天要考試，
所以今日都係以溫書為主。
上午首先去銀行入票出糧，
之後去睇醫生，
係等既時候，
做返一兩年 past paper，
不過成績都唔係好好，
卷一同卷三都只係僅僅及格。
原本打算呢兩份高分 d，
拉返卷二份 Listening，
不過乎現在要靠 Listening 食糊。

似乎唔係一個健康既現象，
不過得返一日，
都冇辦法，
唯有盡一盡人事。

之後去左飲茶，
飲完茶就返屋企操 Listening。
做左兩年，
零四年個份，
做完之後，
三份卷加埋二百四十分，
僅僅及格。

或者講講計分方法，
卷一滿分一百分，
卷二滿分一百分，
卷三滿分二百分。
總分四百分，
六成（即係二百四十分）及格。

雖然零四及格，
但零三做完之後唔及格 ><。
攪到有 D 驚唔及格。
不過諗返自己讀到三級，
欄船都有三斤釘，
會唔會係自己多疑呢？

Anyway，
將 d 生字整埋 MP3，
等明日坐車個時都可以溫下，
就早早上床訓覺了。

禮物

繼續講十二月既事，
十二月要送禮物，
又要頭痛買 d 咩好。
我係個種要想買咩就頭痛既人，
唔係選來選去都唔知買乜，
就係選完人地未必鍾意。

就好似以前細個讀書咁，
聖誕要交換禮物，
我年年都好似買唔到份好禮物咁，
好似拿份 Cheap 禮物，
換份好禮物返去咁。
結果中一開始，
我同班主任講我唔會參與交換禮物環節。

同出左黎做野，
公司又有交換禮物。
為免重蹈覆轍，
我搵舊同學幫我選。

其實賺左，
我開頭話佢幫我買，
我請佢食飯，
不過到最後都唔駛我請，
呵呵。

講返轉頭，
因為佢幫我買既關係，
我認識到原來又一城有間 Logon。（真係大鄉里）
不過之後個兩年，
公司交換禮物，
我都係去 Logon 買，
都係買返同一類，
即係杯連杯蓋……

---

話咁快，
初級普通話上完了。
今日最後一堂，
老師一開始問我地假期有咩做，
新年有咩願望。
我既答案係睡覺同冇願望。
唔係想求求其其答，
不過我真係冇諗過。

完堂前既聽歌寫歌詞，
我終於答對全部了！
（其實係 99% 才對，有一題寫漏了個「的」字）

十二月

話咁快又到左十二月。
十二月既考試有兩個，
要教既班有兩個，
比賽零個。
但係十二月一日最重要既，
有係有得出糧。（如果老闆返黎既話）
上一次出糧只係出十日，
今次係新工第一個 Full 既糧。

期實每既出糧都係一個肯定，
肯定你係做到野既。
因為如果你係做唔到野，
好快就會收唔到糧喇。

今個月仲有一日值得紀念同感恩。
講既唔係聖誕節，
當然聖誕節係一個應該紀念同感恩既日子，
但聖誕節係全人類普天同慶既。
我講呢個特別的日子，
係只係 For 我一個既。

要記住聖誕之前兩日，
即係二十三日。
呢個係一個好重要既日子，
夜晚我要考 First Aid。
不過要紀念既，
唔係考 First Aid，
而係考試之前既三個鐘。

有個好有趣既統計，
每次船長歸航，
我都係要考試既……
而船長出航，
我都係要比賽既……
不過今年少比賽，
所以第二項唔中，
但第一項仍然中。

個日下午我應該會請假，
不過仲諗諗緊去唔去碼頭好。

考試七點正準時開始，
我公司六點半放工，
一定趕唔切，
既然拿假，
倒不如去碼頭一次，
看住艘船舶岸，
了左件心事
然後再去考試。
都未嘗唔係一個好提議。

CPR

First Aid 個度要八成出席率先可以考試，
雖然我好想走多堂黎溫日文，
不過我走堂 Quota 用晒，
結果都要上 First Aid。
今日係教 BB 既 CPR，
同埋練返成人既 CPR。
其實 BB 既同大人既有 D 似，
但又唔係全部相同。

成人既係口對口既人工呼吸。
但 BB 個嘴細，
所以係口對口鼻既人工呼吸。

按壓成人既係用雙手，
按壓 BB 既係用兩隻手指。

成人既比例係十五比二，
即係按壓十五下，
吹氣兩下。
嬰兒既比例係五比一，
即係按壓五下，
吹氣一下。

不過兩者都有相似既地方既，
一開始都係確定現場環境是否安全，
檢查清醒程度，
叫人報警，
暢通氣道，
檢查呼吸，
冇既就送兩下，
檢查脈搏，
之後就開始喇。

---

今日開左個特別會議，
話 D 機成日 Hang，
要找出個問題所在。
攪左成日，
結果係兩部機其中一粒 Chip 唔同……

又過一關

好忙好忙，
點解咁忙？
但又忙得咁開心？

---

今晚返日文，
係公司走個時都已經差不多八點，
入到課室八點半。
老師如常授課，
同學仔如果抄 Notes。
個課室好平靜，
唔通係暴風雨前夕？

上到九點，
老師派卷，
我知死刑到。
一接到份卷，
一睇……

嘩！
不得了，
歷史性新低，
但又夠及格。

剛剛好五十一分，
不過唔知係咪老師有意係短文畀多兩分我先及格。
Anyway，
過左海就神仙，
唔理得咁多。

Break 完繼續上堂。
老師問我幾點起身？
我話九點，
全場嘩然。
老師再問一起身做咩？
我話食早飯，
全場再嘩然。

點解？
點解一起身唔可以食早飯先，
食完先流洗沖涼？
點解一定要去左洗手間先？

Boston 再遇

今日收到一個邀請，
有位舊同學將會過 Boston 讀書，
咁係佢走之前（好似係一月頭），
會開一個 Concert。

本來都好想去，
當係捧場又好，
Relax 下又好。
不過，
佢個 Concert 係下個星期三，
我要上 First Aid。
其實之前幾次，
都係星期三，
唔係上堂，
就要練跑。
始終都去唔到。


話分兩頭，
佢係我第二個中學同學過 Boston 讀書。
佢兩個仲要同個幾年班，
應該都好熟，
梗係互相照應好啦。
以我樂於助人既性格（嘔），
分別聯絡佢地，
話佢知有另外一個都係 Boston 讀書，
跟住就等佢地慢慢溝通溝通。

不過又幾橋，
佢兩個都係一月頭離開香港。
更橋既係，
佢兩個間學校應該係相鄰。

---

今晚走堂去左打籃球（罪過罪過），
因為個舊同事 Book 左場，
但唔夠人。
（不過結果係有成廿個人）

被人大炒，
好唔開心 ><

初戰

今日又有得跑定向，
色級賽既第二場‧
不過因為第一場我幫手攪，
所以呢場先係我第一場跑既色色級。
因為同學界一齊攪，
所以都出得幾晚下。
十一點五十幾分先出發，
呢個時間其實幾麻煩，
一早起左身，
返崇拜又好似唔係幾夠時間，
十點半開始，
詩都未唱完就走。

結果我選擇左去打機，
八點半去到機鋪，
未開晒門，
閘落左大大半。
咁介起門口等啦，
一開閘入去，
咦？咁多人打緊機既？


Anyway，
十一點到離開機鋪，
行去歐化個邊坐 215x。
係車上埋換埋我件青蛙戰衣，
一落車就係公園門口，
一路行入去賽事中心，
都見到有賽員比賽中，
對尾 Point 個 Flow 都有一定預測。

去到賽事中心，
拿了號碼布，
換埋對釘鞋，
就行上起點，
一路都以為會遲到，
點知剛剛好。

今次條 Course 長 5 公里唔夠，
冠軍跑一個鐘，
我用九十分鐘。
以我幾個月冇操既體能，
同埋有傷在身，
結果可以接受。

---

隻腳好痛 ><
話說上個星期踢波，
被人踩左一腳，
成個仆係到，
弄損了膝蓋。
本來都結了召，
不過昨日係屋企撞到書抬，
成塊召起左，
d 血係咁流。
隻腳伸直同屈都痛痛 ><

行大運

時間過得係快，
估唔到咁有一年喇。
聽日就係一周年，
不過唔係一個值得慶祝既日子。

---

今日又要行大運。
晨早就同媽媽拿部 DVD 錄影機去整。
部機上次修理係十一月頭既事，
一個月都唔夠，
又炒。
媽媽就緊係話要見負責人出黎，
大省特省啦。
結果，
佢地話換個新形號畀我地。


之後就落尖沙咀，
拜一拜先父。
所謂拜，
都係係咁易上注香而已。

之後落佐敦睇中醫，
因為我冇帶信用卡既關係，
所以下午先去畀錢。

睇完醫生，
就返屋企拿卡，
再去飲茶。
飲完茶，
行左一陣，
就返屋企先。
（咁頭先專登返屋企拿卡做乜？）

再出去既時候碰到細牛，
佢話去影相 WOR。
畢業真開心。
碌完卡，
又返屋企了。

破紀錄

自從六月去完旅行返黎，
個 BeJeweled 個最高分紀錄被人破左之後，
我就不停咁挑戰。
雖則人地只係用左一個星期時間就破左我舊紀綠，
但係佢係幾乎成日不停咁玩，
我只係得閒玩一兩鋪，
拉返黎計，
差唔多掛。

我現在既分已經突破左三百萬分，
係 3176750 分。
比舊紀錄 2884000 分高左達三十萬。
呵呵呵

---

夜晚上普通話，
終於教到兒化音喇。
呢堂亦都係普通話初班既尾二個堂，
上埋下個星期就完喇。

唔講唔覺，
原來日文同普通話係同一個星期完。
日文就隔一個星期可以上新班，
（如果考試及格的話……）
普通話就好似一月。

落堂之前，
照例係聽歌寫歌詞。
我亦照舊錯一個。
今次衰錯左係「秘密」呢個詞語手上，
我幾時先可以滿分呢？

上完堂，
去左公和堂食晚餐。
本來想叫送食飯，
點知個廚師剛剛走左，
結果要食碟頭飯。
我叫左「神秘豬頸肉飯」，
呢個飯最神秘既地方，
就係我食晒都發覺唔到邊度神秘……

三個 Tasks

今朝返到公司，
開始著手 KO 手頭上既 Tasks。
做到十二點，
攪掂兩個，
拿過去畀兩個同事試。
結果一個過 Test，
一個炒左。

炒既原因係畀佢 d Variable 名騙左，
「bAVI」我以為係一個 Boolean 既 Variable，
裝住係咪錄緊 AVI。
點之原來係裝住係咪可以錄 AVI。
叫「bEnableAVI」咪好 lor。

最攪笑我問個同事，
點知部機現在係相機 Mode 定 Movie Mode，
佢叫我 Check 下 d IO Pin Return，
那個仲要係轉制，
唔係 Check 一條咁少，
係 Check 四條。

要知係咩 Mode，
應該個 Firmware 成日都要 Check，
下下都 Check IO Pin 咪好費時失事？

結果我看一似 d code，
終於畀我找到個 Variable。

上午 Fail 那個 Task，
一定要攪掂先可以做下一個。
而下一個係手頭上最重要那個。
而 Fail 那個，
其實係 Modify Battery Checking。
如果攪佢唔掂，
我唔可以拿部機出機試。
原本想係日頭拿部機試，
即係我要係五點前攪掂佢，
可惜最後都要六點先攪掂。

結果重要那個 Task 要係室內做 Test。
原本以為要做到十一點，
不過九點半就收得工。
其實八點半就執得野走，
不過老闆又問下進度，
傾傾下就九點幾了。

---

艾文，
幾時拿桃公主隻 Game？
我爆埋二周目喇。

忙忙忙

手頭上幾個 Tasks，
有一路做開既，
有同事攪唔掂我幫手跟既，
有同同事夾既。
樣樣都趕，
樣樣都話重要，
做得邊樣先？

真係忙到抽筋呀，
不過做自己喜歡既事，
忙 d 都覺得好玩。
不過 Side Effect 就係唔夠時間溫書。
十二月四日考公開試，
仲有十日左右，
但係要溫接近廿四課書，
仲要做 Past Paper，
即係平均一日要溫四課書。
但係夜晚仲要上 First Aid 同普查話，
嘩！好忙呀，
嘩！好充實呀，
嘩！好爽呀。
（嘩！係咪變態架？）

---

今晚要上 First Aid，
加上要還袍，（今晚係 Dead Line）
所以要趕住走。

Send 過 E-mail report progress 之後，
就趕頭趕命走。
落到天后，
找左好耐先找到間洗衣店，
還完袍，
就拿拿聲走上奧運大樓上堂，
不過都試左成個鐘。

Miss 左既係理論，
之後睇返書都得。
（如果我會睇既話）

之後教包紮，
幾個骨折既包法。

返到屋企，
覆左老闆 C 既 e-mail，
訓上床都已經兩點了。

失信心

好灰呀，
咩自信心都冇晒。
話說今晚考日文，
基本上都冇乜點溫，
係盡量死記答案。
一入到場就考 Listenling 先，
基本上冇一題聽到。
人地話，
Listening 要聽 Keywords 先。
但我聽到既全部唔係 Keywords，
咁既狀態，
下個星期點去考能力試呀？

之後考 Written Test，
受 Listening 影響，
好多野都一時記唔起。
（可能係溫得唔熟）

有題九分既作短文，
我預先作定，
但入到場又一時醒唔起 d 生字點串。
其實篇文好簡單，
講下現家份工，
點解做呢份工。
不過 d 「Firmware」呀、
「Engineer」呀、「Programming」呀我就唔記得點串。
總之份卷就考得勁差啦。

交左卷之後，
聽多次 Listening 對答案。
結果一如所料，
全軍覆沒。

Overall （Listening + Written）有三十分都還得神落。
不過及格係五十分 Wor，
（能力試仲要六十分 Tim）
最衰佢仲改左例，
唔及格唔可以升班，
咁我唔通要留班？
唔制 ><

---

買左 Twins 演唱會飛。
剛剛發現一樣野，
Twins 開演唱會既頻率，
竟然同船長架船回港既頻率一樣！

怒喝

聽日朝公司要開例會，
老闆叫我地要 Well Prepare，
咁就要整理。
今日老闆 A 有個新 Algorithm，
問我聽日開會有野睇未，
結果我就開 Turbo 砌埋佢，
七點前又攪掂，
呵。

---

聽晚要考日文，
所以今晚冇上 First Aid，
返左屋企溫書。
當我食完飯，
準備溫書之際，
工人話要執我間房。
我笑笑口叫佢唔駛執，
佢就唔理繼續執。

睇住佢攪亂晒我書櫃 d 排名，
將我 d 富紀念會值既物品
（如第一次出 Business Trip 拿返黎既外國報紙）
當垃圾咁丟，
我就忍無可忍。

開頭我好聲好氣同佢講唔駛執，
佢理都唔理。
真係唔發火當我病貓，
我大大聲喝佢。
喝到第三次，
佢終於放棄離開我房。

不過就難為我要將間房還原。
咁又浪費左我成個鐘。
結果得返好少時間溫書，
溫左一陣，
覺得好眼訓，
就去訓覺了。

浪費時間

攪一場定向比賽，
事前有好多功夫要做。
單單講 Field，
都有唔少。
首先 Course Setter 要上山視察環境，
然後 Set Courses，
再上山落 Tapes（做記號）。
跟住另一個人（通常係 Controller）上山 Check 有冇錯。
有時驚條 Course Set 太長或太淺，
會找人去試跑。
而試跑呢樣野，
係應該係落 Tapes 同 Check Tapes 之後。


今日我負責去試跑，
原本約我下午上去，
不過想想下，
會唔會天黑都未落到山，
咁就改左十一點半。

其實個朝先 Check Tapes，
其實 Overlap 都唔係大問題，
但為可以 Assume 佢大部份都放對既。

我同阿棟十二點半開始試跑。
去到一號 Point，
d 草密到入唔到，
二號 Point 又係咁。
去到三號 Point，
今次入到喇，
不過唔見條 Tape。
爬返出大路，
收到阿棟電話，
話佢個邊都係咁，
唔係密到入唔到，
就係去到唔見 Tapes。
咁我就話我去多一個睇下，
結果當然都係找唔到。

之後我地會合，
再去多兩個 Points，
都係咁。

打電話畀 Controller，
原來有 D Points 改左，
而且佢現在落緊 Tapes。
（請留意今日應該係 Controller 黎 Check Tapes）

結果就浪費晒我 d 時間，
上山做左 d 有意義既事。

---

看左一個舊同學的日記，
了解多左他同他的她既事。
因為日記其中一件事情，
我倆意見有分歧。
不過基於我倆性格都係咁硬頸既關係，
我們講完各自既輪點就算，
冇想講講服對方。

他倆既故事，
好似曾相識。
一個識電腦既男仔，
一個唔識電腦既女仔。
男仔出身平常，
係香港讀書。
女仔家境較男仔富裕，
係外國讀書。
女仔心臟有 d 毛病……
（同時醒起一個兩年前既承諾，唔知當事人仲記唔記得）

悠閒的一天

唔駛返工既星期六，
可以無牽掛既大訓特訓。
原本打算睇殺破狼早場，
不過訓醒都十二點，
唔駛睇。

下午出左去行，
經過百老匯戲院，
入去望望。
結果都係就唔到時間睇。
不過我覺原來殺破狼係三級片，
唔通因為太暴力？
太血腥？

嗯嗯，
登時唔係咁想睇 tim。

返左屋企一陣，
又同媽媽出去超級市場買野，
買左四包米！
（唔知要食到幾時呢？）
仲有其他野。


返到屋企一陣，
又出去打邊爐。
間野手腳好慢，
落左 Order 半個鐘，
都未有湯底黎。
叫佢拿 d 紙巾畀我地抹手，
就拿到我走都未有。

仲有 d 激氣事，
媽媽唔係食咁多，
但就係咁加落個煲到，
跟住就梗硬逼人地要，
人地食唔切唔要就作人地不對。
有冇攪錯！

仲攪笑就係媽媽話條魚幾乎佢食晒，
攪到佢食唔到其他野。
但係好似係佢自己係咁食魚，
唔落其他野食 lor。

Mission Completed Again

上手攪到頭都大埋既野，
我一個星期左右就差不多 KO 左佢。
雖然唔係 Prefect Version，
但起碼有 Improvement。
接下來既野，
係同另一個同事夾一夾，
將 d Program 砌埋佢。

之後，
就繼續攪呢個唔係完美既 Version，
攪得再好 d。

---

開始準入考試倒數了，
頭關仲有幾日，
尾關仲有兩個星期左右，
係時候收拾心情備戰了。

---

今晚原本要上普通話，
不過因為 First Aid 都改左今日，
結果就棄普通話，
取 First Aid。
因為公司野攪晚左，
我比平時晚走，
換句話說比平時晚到。
上左三個星期堂，
我未試過有一堂可以準時。
冇法啦，
佢七點開始上堂，
我六點半先 Office Hour 完。
走得黎通常都成六點九，
七點半去到已經很好了。

上完堂，
行落灣仔坐船過海，
見到有到身穿黃色 T-恤，
上面寫有麥當當字樣既，
唔知係咩事呢？

「先生你好」

「先生你好」
「先生早晨」
「先生食飯喇」

變左人地口中既「先生」，
有 d 唔係好慣 tim。
昨晚放工一返到屋企，
就有個人走埋黎執住我隻手，
叫聲「先生你好」。
之後左一句「先生」，
右一句「先生」……

---

直情上晒癮，
今晚又去左打三國誌大戰。
幾乎同昨日一樣，
三個 Friend 輪打一部機，

昨日貼左個規矩出黎，
話每人只限打兩鋪。
今日再去，
已經唔見左呢句。

所以同其他機鋪一樣，
檯面一條條五蚊銀。

---

上個星期日個比賽又有鑊爆，
不過到現在我都未知咩事。
負責成績那個打去留言信箱只係叫我覆電話畀佢，
又唔講咩事。

留言信箱唔係咁用架，
「我電話係 XXXX-XXXX，請覆。」
我有來電顯示就已經知啦，
駛鬼你講。

應該留低咩事丫麻，
我覆前又可以做定功課先。

吳軍之始動

俗語說：
「若要人似我，除非兩個我」
呢樣野真，
Even 有好多野相似，
總會有不同處。

我倆性格有 d 接近，
一樣係咁唔輸得；
一樣係咁硬頸；
一樣係有兩個面孔；
一樣……

但亦一樣有南轅北轍既野，
例如偶像；
例如嗜好；
例如際遇；
例如……

不過有時，
要互相補足先成事既。

---

終於開始再浦機鋪既生涯，
今晚開始玩三國誌大戰。
九點玩到十二點半，
洗左一百元。
當然唔係玩足三個鐘，
跟下機，
又睇下人玩咁。

有 d 地方，
有 d 人一坐落去就打幾百蚊先起身。
呢度有個規矩，
就係每人限打兩鋪，
之後要起身再排過隊。
咁做幾好丫，
起碼人人有得玩。

今日玩左四鋪，
上晒癮。
要儲卡，
砌勁 Deck。

聖誕派對

今晚上日文，
走個時 Send 左個 Email 畀老闆 C Report，
點知一下唔醒起 cc 埋老闆 A。
夜晚上完堂十一點返到屋企，
開左部電腦。
就收到老闆 A 追 Status 既 Email。
好彩老闆 C check 廿分鐘後就覆我 Email，
仲 cc 埋畀老闆 A。

---

夜晚收到個 Friend 電話，
話 12 月 24 號晚有個 Party，
問我去唔去。
平安夜我冇節目，
本來都想佢玩下。
問過佢係 Cafe 包場攪，
唔係 Ball、唔係 Bar，
都幾心思思。
不過佢講完個 Selling Point 之後，
我就想打退堂鼓。

開頭問佢有咩人去，
去話 Friends，Friends 既 Friends 咁。
不過最後佢補左句，
已經有十個女仔話去。
咁好明顯醉翁之意不在酒啦，
真係去一班人玩既，
又何需咁 Highlight 呢句呢？

一黎我又冇咁既需要，
二黎佢收三百蚊又好似有 d 貴。
所以我都係想唔去，
留返係屋企好過。

---

街機出左隻新 Game，
本來我都戒左機鋪打機，
要堡既機都唔點玩。

不過佢真係好吸引，
Card Game 黎，
仲要係三國時代做主題（個名叫三國誌大戰），
不過成十五蚊鋪又好似貴左 d。
容乜易燒晒 d 錢？

後遺症

又到星期一，
工作週期之始。
不過昨日體力嚴重透支，
成朝都冇神冇氣。

夜晚上 First-Aid，
遞高集腳畀個 Friend 紮腳踝出血，
紮紮下我腳抽筋 Tim，
痛到我丫……

---

昨日個比賽仲未 Close 得 File，
今日總會打黎話有 D 對講機唔見，
問有冇 d 仲係我度。
我梗係叫佢找返 Organizer 啦，
點知係 Organizer 叫佢打畀我。
嘩！又關我事呀……

---

早兩日個日記有新朋友仔留言，
睇內容就一早知邊個，
不過睇名又估唔到。
都係求證下先。

---

無無聊聊睇人地 d 日記，
係 Solomon 那個發現左個 Rate my life 既 QUIZ。
我又走佢做下，
D 英文好深要查字典。
Result 出黎又好似幾高分咁 Wor。

This Is My Life, Rated
Life:	7.5
Mind:	7.1
Body:	8.6
Spirit:	6.5
Friends/Family:	5
Love:	7.7
Finance:	7.1
Take the Rate My Life Quiz

一鑊泡

今日輪到攪定向比賽，
第二年幫培正手做 Course Setter。
因為培正 Technical 既人唔夠，
結果山上幫手放 Points 既人都係我找既班子。
七點鐘係寶馬山集合，
原本想係天后買早餐，
不過大家樂未開，
麥記都未開，
最後係廿四小時營業既點心王買。

上到去，
按排左放 Points 個四位手足出去之後，
我就可以食早餐同等。
之後就忙忙忙，
不斷遊走於終點、Event Center 同起點幫手。
仲辛苦個跑比賽。
朝七晚六，
工時仲耐過返工。

講返個比賽，
真係激死我。
首先係愈做愈多野，
原本係一場學界比賽，
後來變成兩場學界同一日攪，
之後仲加多場色級比賽 Tim，
三合一既比賽，
出發時間係朝早九點半出到下午兩點。
有人話有冇攪錯，
出到兩點咁晚。
不過排出發時間唔係咁易，
成九百幾人近一千人參加。
當然可以同一時間出多幾個，
不過都要考慮做唔做得切，
今次我開五條 Lines（一條 For Late Start），
起終點都做到亂晒龍。
可想而知如果我開盡八條 Lines會有幾亂。


之後就輪到 d 電腦唔聽話，
開頭話三部電腦，
一部負責一個比賽。
結果呢，
用得既得一部……

再黎就係起點，
舊年話我指示得唔清楚，
個起點起得唔好。
今年我畫埋平面圖，
都可以將個起點放錯地方。
不過唔怪得起點個負責人，
因為佢都係被賽事負責人點左姐。

其實成個比賽都亂，
賽事中心、起點同終點都亂，
因為有經驗既人唔夠，
蛇都死啦。

起點冇數出發人數，
終點又收漏野，
成績處理又一鑊泡。
不過要讚讚負責成績既陸先生，
係冇資源既情況之下都仲維持到正常程序。

最激氣係山上面班工作人員，
七點鐘就係上面做野，
起碼四點半先有機會落山（事實上要再晚 d tim）
佢竟然唔安排 Lunch 畀佢地，

唔覺唔覺到四點幾，
仲有幾個未返，
我即刻換衫打算上去找啦。
佢竟然同我講話唔駛咁急。
冇野呀？
仲唔上去等天黑先上呀？

到五點半，
仲有一個冇消息，
拿拿臨上山。
今晚應該六點左右天黑，
仲要冇咩月光，
其實我們自己都有 d 危險。
好彩出發途中，
其中一個仲留係山既兄弟報告話找到佢，
咁都冇咁驚。

Programming 比賽

一個 Weekend，
兩個比賽。
先黎星期六既 OI 初賽，
再黎星期日既定向比賽。
兩個比賽我都冇得參加，
要做工作人員。

唔參加得 OI，
因為我超晒齡。
OI 係中學生既比賽，
我呢 D 老餅，
當然冇得參加比賽啦。

以往我都可以幫下手出題目，
不過江山代有人才出。
我都開始跟唔上進度了。

讀 Undergrad 時，
都有 ACM 比賽（大學生既 Programming 比賽），
Keep 住有 Training 都還好 d。

入到社會做野之後，
雖然我都仲係寫 Program 為生，
但係工作上既 Programming，
同比賽既 Programming 係兩碼子既事。

比賽常用既甚麼 BFS、DFS、DP 等等，
工作需要用到既次數近乎零。
比賽可能只係幾個鐘寫幾百行 Code，
但工作上既可能係要做成個月，
寫近萬行 Code。

比賽既 Test Input 係 Bounded，
但係工作既 Programe 既 Unlimited 既。

比賽之後，
我們會改卷，
之後一齊去飲茶。
我發覺我同新生代既 Trainers 開始有代溝。
佢地入到 U，
好多時都可以去外國玩地區性既 ACM 比賽，
我那個年代邊有丫。

我記得我畢業之後，
Department 先開始贊助我 d 師弟去地區性既 ACM 比賽。
我在學個三年，
玩香港 Local 既 ACM，
一年第二，
一年第一。（雖則我唔係直接參與）
有成績出先得到贊助。

可惜，
我個系既 ACM Team 開始青黃不接。
聽我師弟（都係 HKOI Trainer）講，
可能下年開始唔再有贊助了。

班新生代係食飯時係咁講 ACM 既野，
我又點插到嘴丫。

---

夜晚去睇「猛龍」，
本來想睇「狙殺狗仔隊」。
不過得旺角有（我個時係尖沙咀）。

睇完套戲，
好似睇緊日本英雄特攝片咁。
五個一隊既 Team。
最慘係 5 vs 5，
再加埋其他人，
主線都成 10 幾 20 人，
攪到我都亂晒，
究竟呢個叫咩名？
係美國國際刑警定韓國國際刑警呢？
那個又叫咩名？
……

做到野架

又一個星期，
接續昨日既工作，
今日繼續攪 Auto Focus。
依據加拿大老闆 C 既 Suggestions 去改個 Program，
不過好似仲衰 d 咁。
我唯有自己 Chase Code 啦，
三個 .C 既 Files，
每個都三千幾行。
一日之內要了解近萬行既 Codes，
然之後睇返邊度飛去邊度，
有咩 Parameters Pass 左入黎、Pass 左出去。
仲要係 Multi-Thread Programming，
真係好難。
但你唔好睇少我，
我強項係 Problem Solving，
包括 Debuging。
我就係攪得掂。
我找得出點解改完之後會仲衰左，
原來係 Update 唔到 Stata Machine。
找得到問題所在，
下一步就係解決佢。
雖則放工都 Solve 唔晒，
但起碼我踢到個 State Machine 識行識走。

雖然都仲有少少問題，
不過都叫有進展。
Send 左個 E-mail 畀老闆 C，
睇下佢有咩 Feed back。
當然，
我唔係單問佢拿料，
我自己都有做到功課。

---

中午約左舊公司舊同事食午飯。
去到第一句就問我穿得咁輕鬆，
舊公司要恤衫西褲，
現在我可以 T-恤運動褲。

佢地仲話我看似開心左，
可能因為呢份工好過舊個份啦，
又或者係蜜月期未過，
又或者係呢份真係興趣。

---

呢個世界真係細，
今日老闆見既那個客，
竟然係我網友。

自食其力

新工雖然可以返晚點，
不過都有個唔好處，
就係遲出門口就新仙難救。
以往坐的士，
十五分鐘就返到去。
今日遲左出門口，
（其實又係出左門口驚冇鎖門而返轉頭）
坐的士，
成半個鐘先返到去。

記得我早兩日講過，
話老闆想改革。
我入職之前，
公司有兩個 Firmware Engineer，
一早收到風其中一個遞左信。

今早收到大衛同學既 Message，
話個個老闆講「改革」都係得個講字。
點之呢頭收完，
個頭就開始地震。
餘下那個 Firmware Engineer 都炒埋。

原本我已經做晒今個 Week 既野，
結果因為咁樣，
我要跟埋佢既野，
擔子又重了。

等到八、九點，
老闆先有時間同我傾待接手既野，
結果做到成十二點先走。
（破左我係舊公司既紀錄 ><）

要接手既野都幾複雜同難，
可以被我問既人又冇乜。
（Assume 答我那個識答）

換句話說，
幾乎要靠自己，
（好似做 FYP 咁）
不過有難度，
我喜歡。

---

有人陪我睇 903 頒獎禮同 Twins 演唱會，
想起都開心 ^_^

過版

昨日對我黎講係一個大日子，
就係我 Master 既 畢業禮。
雖然張證書同 Transcript 一早拿左，
今日都只係一個儀式，
但感覺上就好似去到人生既新一頁。
不過都有遺憾，
有就係有兩個人參加唔到我畢業禮。
一個係好遠好遠忙緊佢既學業，
另一個係去得更遠既爸爸。
將心彼己，
我打算四年後要去美國一次。

講返畢業禮，
中大同科大都幾唔同，
中大係一日過所有系科一齊畢業，
而且係一日行上次畢業禮。
上午係全校一齊既學院畢業，
下午係分四書院既書院畢業。

至於科大，
則分三日下午。
今日係工學院，
明日同後日係其他學院。

飛就每人得兩張，
所以都唔可以請好多人黎。
原本想叫 Edmond 幫我帶媽媽去科大，
不過黎到佢又冇飛入場，
所以都係我自己帶返。
家姐姐父黎到之後都唔夠飛，
結果家姐入場，
姐父走。

被張通告騙左，
又話唔好有 Personal Belongings，
冇地方寄存。
（結果係有既）

結果我好重既手提袋，
（有部單鏡反光數碼相機係入面）
同我同學個背囊，
就畀左我媽同大肚既家姐拿。
知道有寄存，
我一定唔會咁做。

兩個鐘既典禮，
除兩段講話（校長同畢業生代表），
就係每個人走台一次，
恭一個恭，
落返台，
等宣佈正式獲 Degree，
戴四方帽，
下一批。

等待係最辛苦既，
等左個幾鐘先到我上台……


完左之後，
影下相，
就歸家了。

Working Plan

老闆 A 上個星期五同我傾完之後，
叫我下星期二（即今日）交個 Working Plan 畀佢，
但係昨日又追我交。
其實一早打起左，
不過我公司電腦冇 e-mail account，
唯有返到屋企先 Send。
今朝八點一起身就 Send，
Send 完先整早餐食。

點知下午，
老闆 B 就問我幾時有功課交，
咪 Send Working Plan 出黎 Lor，
冇 Direct Send 畀你之嘛，
駛唔駛追得咁緊。

事後想返，
可能係佢下午見到我講私人電話，
我呢頭一收線，
個頭內線就響喇。

---

夜晚日文班，
仲有三堂就校內試，
仲有一個月就公開試。
話就話要溫書，
不過無從入手。

唔知係因為去完旅行返黎，
日文放底左三個月；
定係升左班，
個 Gap 大左好多，
好似落後左好多咁。

好似今日做 Listening 練習咁，
有一半聽唔到佢講乜。


不過要抽時間溫書，
又談可容易？
星期一、三上 First Aid，
星期二上日文，
星期五上普通話，
星期六、日要攪定向。

就算星期四好似冇乜野做，
但係要 OT……

話一就一

有樣野唔記得講，
發生係上星期六晚。
話說我將地圖交既賽事 Controller，
（簡單 d 講就當係我上司啦）

佢問我 d 野畀左佢，
有冇留底。
我話冇所謂，
必要時咪係公司 Print 過 lor。
跟住佢就話：
「乜你咁大年紀架喇？」

要返工姐，
有幾大年紀呀？
又唔係退休……

---

夜晚去上 First Aid，
一個星期上兩晚。
七點係奧運大樓上，
但係我今晚七點先係觀塘上到車，
去到已經七點四了……

同幾年前上紅十字會個 Course 一樣（今次係聖約翰攪既），
三個鐘既 Couse，
同半係講理論，
後半係教包紮。

包紮都講得幾快，
以往第一堂都係教兩個：
大手掛同三角手掛。
今堂就教埋包頭。

其實我考左牌，
不過夠期 Review。
上一個 Full Day Review Course 加考試就得，
不過今次個 Full Course 仲便宜過 Review Course。
上完一堂個感覺係：
上次 d 野仲未忘記晒。


上完堂，
坐車去到西隧口就落車，
然後步行返屋企。

我份人話一就一，
縱然明知佢地三個唔會真係係西隧口等我，
我講得出就做得到。

有冇地址？

相比於昨日，
今日比較悶，
而且好激氣。

原本夜晚打算出去買耳筒和睇戲，
叫埋媽媽。
咁佢話佢探完 Uncle 先，
跟住坐車落去睇戲。
問我幾點開場，
我答佢七點二十分。

但探到咁上下，
Uncle 有其他親戚到，
沒有咁快走得住。
唔睇咪唔睇 lor，
冇乜所謂。
咁媽媽話落去買飛先。
落到去剛剛七點二十分，
媽媽話睇下幾點開場先。
（咪一早話左開七點二十分 lor）

之後仲攪笑，
打電話畀 Auntie，
話套戲開七點二十分，
問佢趕唔趕到落黎。
（嘩！龍珠既瞬間轉移咩？
話到就到）

之後我話過朗豪坊睇睇會唔會八點有啦。
行到去，
收到媽媽電話。
話 Auntie 個親戚想同我地一齊食飯 Wor。

「邊度食？」

「XXX 大酒樓。」（留意係叫唔出個名架）

「係邊？」

「附近。」

「地址呢？」

「彌敦道。」

「彌敦道好長 wor，畀個地址黎。」

「都話附近 lor。」

「……」

食完飯，
結果都有睇戲。
睇黑俠梭羅。
唔知係咪要求高左呢，
我就覺得唔係幾好睇喇。

新機落地

相比昨日，
昨日係沉悶既一日，
今日係多采多姿既 Weekend。

---

七點幾就出發上寶馬山，
打算改返 d Tape 既 No，
不過去到先發覺：
一、冇帶剪刀；
二、冇帶新舊 No 對照表。

結果係咁易遊一個圈就落山。

---

中午約左舊同事食飯，
生還者（轉左同老闆另一公司）似乎有很多怨言，
做得好唔開心咁。
我係咪應該慶幸沉船沉得快？

---

之後遊旺角買 MP3 機。
原本睇左 iRiver 既 T10 同 T30，
我仲找到一間買 T30 比較便直。
可惜兩隻都冇 1GB 既存貨。
結果買左 Samsung YP-T6Z


十八個月分期，
每個月都只係八十三個二毫二。
而且滿足晒我三個要求：
1. 用筆芯電
2. 1 GB
3. 有 FM

返到屋企，
拿拿聲執好 d MP3 Files，
總共過左二百首落去。
有人問我聽唔聽得晒，
我一日聽唔晒，
但唔駛愁就新碟時洗邊隻碟。
以往要過歌，
就要煩唔要邊首歌黎空返 d 位，
「呢首好似係新既，
個首都好似剛剛抄落去冇耐。」

---

夜晚 PSP Group 有聚會，
有版友生日。
去旺角一間 Cafe 玩，
十點半玩到三點。

新挑戰

下午同老闆開會，
有三個 Tasks 安排我做。
好似很難的，
但愈難的野我愈有興趣去排戰。
當然，
幾時放棄係另一個話題。

老闆話現在既工作風氣唔係好好，
佢想改革。
我係一個開始，
佢仍然會 Keep 住請人。
Anyway，
佢好似好睇重我，
有 D 壓力 Tim。

這邊廂我工作好似好順利，
那邊廂艾文都找到新工。
恭喜恭喜。
雖然我唔係做左好多野，
但總算有份鋪橋搭路。

---

夜晚上普通話，
今堂教變調，
其實都唔係好難既，
不過要記 lor。
聽歌填歌詞就係王菲的紅豆，
一如以往，
都係對唔晒既。
係人地勁？
定係我弱呢？
我相信係後者。

---

細牛買左盒大富翁，
今日相約四虎玩。
可惜我要上堂，
未刻出席。

原本尋求上完堂出席既可能性，
不過一黎我聽朝要早起，
二黎艾文有下場會早走。
睇黎要下次先有得玩喇。

鎖匙

昨日被老闆罵我返得遲，
佢話十點係最後返工時間，
唔係十點係正常返工時間，
然後再正負半個鐘。
即係以後要早返少少返，
不過對我起身時間冇影響，
因為我都係七點起身。

---

原本今日去做 Gym，
不過大頭蝦唔記得帶鎖匙，
要返左屋企先。
咁返到屋企食完飯，
Alex 又冇打畀我 wor，
咁就直情偷懶唔去。

講返鎖匙，
其實都唔係完全唔記得既，
只係我拿唔到鎖匙咁解。
當我關了木門，
想拿鎖匙出黎鎖鐵閘既時候，
我先發覺我條鎖匙仲係廳。
不過，
木門已經鎖埋了。

我成日都話，
如果放條木門鎖匙係鞋櫃，
咁就唔會有咁既情況發生。
次次我都係關了木門，
準備鎖鐵閘時就會發現冇帶鎖匙，
如果有條木門鎖匙係鞋櫃，
咁我就可以開返木門入去會鎖匙，
係咪好提議呢？

---

終左新工第一份糧，
不過點解係支票黎既？
好麻煩喔。

不思議

有時 d 不思議事件，
只係 d 人未找到原因，
有時知道左原因，
就會覺得好攪笑。

例如我有個 Friend，
屋企部電視成日無端端開左，
有時又會睇睇下自己轉台。
你地估下咩原因？

原來係隔離屋用同一個牌子電視機，
兩個單位又好近，
窗口對窗口，
電視放係窗口隔離。
咁遙控器 d signal……

---

有件事好奇怪。
咁你 Login 一個 Ftp，
一個 Login 一個 Connection，
一 Logout 減返一個 Connection 好正常丫。
奇就奇在唔係咁樣。

我部電腦唔係長開，
有 d 有人要 Upload d files 上黎，
我會開住部機。
係公司 Remote 睇下 Connection 完未。
有一次，
開左部機三日，
都未 Upload 完。
Upload 咩 Upload 咁耐呀？
問佢啦，
佢又話第一日已經 Upload 完。
但係我電腦睇，
仍然係見到兩個 Connection 冇走。

以後我發現，
每一次佢 Login，
係會 Create 三個 Connections，
而 Logout，
只會減返一個 Connection。

但係，
如果佢 Login -> Logout -> 再 Login -> 又 Logout，
咁會有幾多個 Connections 呢？
係「兩個」。
條數點計？
我未想到。

入局 -- 上力

終於唔係只睇 Documents 了，
有 d 實物玩下。
不過呢度講緊既唔係真正一部相機，
而係一 d Circuit Board。
可以畀我打下 Command，
改下 White Balance，
幾好玩丫。

---

夜晚上日文，
雖然入課室之前好眼訓，
但係出奇地，
入到去又自我感覺良好。
唔通呢 d 就係因為興趣？

唔能夠完全聽明晒老師講乜，
但都唔會好似早幾堂咁一句都收唔到。
係咪叫有進步呢？
定係今日 d 內容其實係淺 d 呢？

22 號就考校內試，
12 月 4 號就論到能力試，
希望兩者都及格啦。
不過以現在既狀態，
仲有 d 難度。

---

落堂後同毛理去食雲吞麵，
傾開中學同學。
又講埋中學，
又講埋以前讀書 d 野。

學校個童軍山；
小學既運動會；
跑沙圈；
有圍板既足球場；
體育堂踢踢下波要停低等過馬路（打籃球既同學）等等。

---

昨晚做完 Gym，
今朝胸肌同三頭肌都有 d 酸，
唔錯唔錯，
有效用。

做返 Gym

夜晚同 Alex 去左做 Gym，
因為呢份工收工收得晚，
我費時要 Alex 等咁耐，
所以都有要出街食既覺悟。
不過言談間，
Alex 好似好唔想我去咁，
咁我唯有扮到屋企有晒飯咁。
咁又係既，
冇理由做電燈膽嘛。
八點幾先返到屋企，
煮得飯食完黎都九點，
但係我約左九點 wor。
Anyway，
最後遲左十五分鐘。
都好耐冇做 Gym，
要重拾個種感覺。
今日主要做 Chest 同 Triceps，
做左大約五個動作左右啦。
做既重量比以前輕左好多，
不過做 Gym 唔係求下數多，
亦都唔係求舉到好鬼重，
而係重質。
每一下都係用到你想 Train 個舊肌肉，
做對個動作，
下下做到應就 OK 喇。

沖完涼之後，
我坐係出便等 Alex。
碰到以前個教練 Dicky，
佢話我瘦左 wor。
我覺得佢講得不對，
我充其量係殘左，
肚朒都仲係大大舊，
早上個星期睇醫生時磅重，
我仲重左好多 tim。

之後去左飲野，
不過因為太倦，
心不在焉，
冇乜點講野……

青衣又教班

今日又要上山教班，
地點係熱門既青衣，
上午九點開始。
三個教練，
一人教四個學員。
個半鐘既 Map Walk，
今次試左新野，
其實上次都有用，
不過今次再改良下。
其實就係畀多 d 練習佢地，
例如去到空曠地，
叫佢地找下個山窩係邊。
頭個段其實齋行十分鐘就得，
我可以同佢地玩成九個字。
之後去到 Base，
同佢地玩完圖例接力卡，
就模擬跑。
我今次站崗係山頂，
感覺上呢班好過上次教個班，
起碼黎到我個度時，
大部份都識轉彎，
我要指正既唔多。

今日好順利，
十二點零鐘就可以收隊。
收到難既車馬費，
其實原本冇諗過有，
（一般童軍班都不設車馬費）
現在當係一個幫補啦。

今完飯就返屋企，
等睇波（場波打夜晚十二點 =_=;）

---

睇 Newsgroup，
見到個溝通方法，
攪到我心思思，
又想試下。
不過呢樣野我未試過，
雖則大約相似既都做過，
以我既漏氣情度，
唔知又要攪幾耐呢？

一球成名

今日又黎香港一日遊。
同媽食完午餐後，
就坐巴士入機場。
會合袁生之後，
就坐巴士去東涌碼頭，
再轉船過屯門。
去到屯門，
坐的士過大興村。
其實入屯門做乜呢？
咪就係袁生去睇鐵打 Lor，
找埋我陪佢去。

四點半入到去，
攪左半個鐘，
又拔罐、又火燒、
又用鐵打酒。

之後坐巴士出返旺角，
去左朗豪坊睇戲。
現在好抵睇呀，
$30 加一個麥提莎吉包就可以買到一張戲飛。
七仔現在 $11 兩包，
總支出就係 $71，
買到總值 $120 既兩張戲飛。

講返睇咩戲，
就係 Goal!。
唔知係咪興三部曲？
繼無間道、魔戒、星戰前傳後，
呢套都係三部曲。
第一集係講主角係紐卡素發跡，
第二集講佢轉投皇馬打歐聯，
第三集就係講世界杯喇。

呢套戲有唔少球星客串，
比賽場面有部份係真實比賽剪接落去，
有部份就係補拍。
世事唔會完美既，
係拍得好睇，
不過劇情都有犯駁位。

一路都講主角係右腳既，
最後一球罰球，
卻係用左腳射入既。
冇計啦，
要找射世界波罰球既片段，
紐卡素得左腳仔羅拔姐。

出外靠朋友

今朝一早就返培正，
唔知現在 d 人係咪唔鍾意覆電郵，
Send 左咁多次野畀佢，
一次都冇覆。
大佬，
得同唔得都出句聲丫。
結果今日上堂之前返去找佢，
總算夾左 d，
不過睇個勢，
今次都係燙手山芋多架喇。


夜晚上普通話，
今日都係教輕聲，
唔知係咪因為唔夠訓呢？
今日冇乜狀態。
拼音轉中文字拼到一句，
但聽歌詞就錯到七彩。
希望好快可以上返力。

---

今乎成日都有貴人相助，
打過咁多份工，
連埋暑期工，
除左一份機電工程署係自己找既之外，
其他都係人地介紹，
攀關係找返黎。

升中五第一份暑期工，
係一間專賣教科書既書店做，
店長係街坊黎。
會考後 PizzaHut 份暑期工，
係馬神做緊介紹既。
Year 1 份暑期工，
係阿力媽介紹既。
Year 2 份係自己找既。
Year 3 畢業後做三年個份，
係以前個 Tutor 入左去做之後找我既。
最新呢份，
都係大同介紹既。

係咪我既能力到於此呢？
但換個角度想，
冇料既，
又點會有人賞識，
肯介紹呢？

931

今日老闆 Assign 左第一個 Task 畀我，
而 931 係我黎緊個 Project 既代號。
叫做 931 係因為個 Product 既 Model Number 係 931，
而我既 Task 就係 Tune 個 5M CCD，
即係調較佢 ae 同 awb 既 Parameters。
AE 即係 Auto Exposure，
講緊既係部相機既暴光，
盡量用盡個 Dynamic Range，
影出黎既相唔會太光或者太暗，
太光或者太暗就會損失光部或者暗部既 Details。

AWB 即係 Auto White Balance，
其實就係講緊白色係唔同既光源下，
Sensor 會睇到唔同既顏色，
White Balabce 就係將佢變返白色。
人眼既構造其實好厲害，
由自動變焦，
自動爆光，
仲有自動白平衡。

即係話一件白色既物件，
例如係太陽光下，
會被「睇」到藍左，
係室內，
會被「睇」到紅左。
人眼識自動補正，
但係機器就唔識喇。
最慘就係唔同 model 既 sensor，
佢既 Characteristic 都唔同，
所以就要 Tune 喇。

我未想到點用機器 Tune，
可以做既就係用人眼 Tune。
即係以唔同 Setting 影好多幅相，
再比較邊幅好 d。
佢地以前既做法係，
用一個 Setting 影一張相，
睇過唔好，
就轉 Setting 再 Compile 過。
我現在想一次過用唔同 Setting 影幾張相，
咁應該會有效左。

咁做呢樣之前，
我想我會寫 d tools 幫手，
不過現在未有頭緒。

睇佢地 d code，
有時好攪笑。

例如佢地會：

for (i 由 1 至 3)
如果 i = 1 就咁咁咁
如果 i = 2 就咁咁咁
如果 i = 3 就咁咁咁

笑死

熱愛超頻

個 icq nickname 又過左期，
都係時候換過第二個名。

我記得我第一個 ICQ 用既 Nickname，
係在 AD&D 本 Monster Manual 找既，
叫 Sylph，
即係風之精靈西爾芙。
後來改左做文仙尼亞，
即係 Manslayer，
又係 AD&D 既 Monster 名。
再之後就用炒炒，
之後係唔大改既情況之下，
係前面加個四字詞語，
即係「XXXX的炒炒」。
剛剛用緊那個，
係「又要倒數的炒炒」，
咁倒數完，
自然要改啦。

我改既方針，
係含蓄得黎又表達到意思，
應該明既人會明，
唔應該明既人最好唔好明。

最近講開「超頻」，
本來想用「最愛超頻的炒炒」，
不過好似誇張左，
所以最後都係用「熱愛超頻的炒炒」。
呢個 ICQ Nickname 都會用一排。

係一個 Computer Dictiony 既網頁咁樣解釋超頻（Overclock）：
To run a microprocessor faster than the speed for which it has been tested and approved. Overclocking is a popular technique for eking out a little more performance from a system. Overclocking does come with some risks, however, such as over-heating, so you should become familiar with all the pros and cons before you attempt it.
Overclocking is sometimes called speed margining.

換而言之，
係增加左 Performance，
但損失左 Stability。
或者可以咁講：
水能載舟，亦能覆舟。

Master of ........

今日繼續睇 Documents 同 Codes，
中午時份，
我見隔離房同事冇過黎叫我食飯，
就打畀 Edmond，
點知佢已經訂左飯。
咁我就自己去搵飯食，
結果畀我找到燒臘鋪十二蚊單拼十四蚊雙拼。
雖然行就行遠 d，
不過省成半飯錢 Wor。

六點幾，
老闆捉左我開會，
解釋下一部相機 Hardware 睇有邊幾 Part，
Software 又有 d 乜，
行緊既 OS 係乜，
Chips 係乜，
有咩 API 咁。

畀左幾個範疇叫我睇通佢，
包括 Memory/IO map、
File System、
Built-in Test Routine、
I43 API 和 Driver。

佢話呢幾 Parts 都係現在公司 d Engineers 弱的地方，
睇黎我都幾有發展既機會。

七點八離開公司，
趕返佐敦上堂。

---

上個星期走堂，
再上個星期放紅日
三個星期沒有掂日文，
結果就係更加唔知佢做乜。
唔知係咪老師佢攪亂左，
以為我走左兩堂，
問我做咩事唔返。
本來我想答「約束」，
最後都係話有「仕事」算數。

落堂之後，
佢驚我跟唔上，
問我係咪「大丈夫」，
有問題既話就問。
不過我差係失放得少時間姐，
其實冇付出，
收獲又點會豐富丫？

我立志要放返多 d 時間落去日文同普通話到。

新開始

終於返新工了，
新工有樣好，
就係彈性上班時間，
十點前返到就得。
不過同樣相對的，
放工亦都係自由放工，
自由者，
你做得晒野就可隨時放工。
不過，
做 R&D 又點會有做晒野既一日？

應該十點返到去，
不過遲左出門口，
一出到上海街見到小巴就上。
去到觀塘小巴總站都已經十點，
行到過去就遲十五分鐘。

返到去，
老闆（亦即係我直屬上司）已經返左。
我睇完份約，
簽完名之後，
就開始要睇 Documents 喇。

係我睇 Documents 既同時，
老闆係會議室見客，
而呢個客就係我大同 d 人。

講返新公司先。
兩間 Rooms，
我工作個間有老闆同一個負責畫 PCB 既人，
其他 Engineers 同老闆 B 就係另一間 Room。
同十二點半，
有個 Engineer 過黎叫埋我一齊去食飯。
不過我返黎之後，
先知道原來老闆本來想找埋我同大同 Fai 去食飯……

今日有同事請飲既關係，
大部份人六點幾就走晒。
我七點半都撒退，
係商場逛左一陣。
八點左右會合剛放工既 Edmond，
一齊去食飯。

食完飯，
我就冇事返屋企，
Edmond 就又呵又嘔。
係因為我健壯，佢身子弱丫，
定係佢之前之後亂食其他野，
我就唔知喇。

青衣教班

今朝返崇拜，
返完崇拜就趕落青衣喇。
原本個 Plan 好完美：
先坐 42A 去長亨村，
係大快活食過午飯，
之後再行上長宏村。

不過世事又點會咁完美？
係巴士站等左半個鐘都冇車，
之後就算即刻有車黎都冇時間食野。
唯有即刻轉坐地鐵去青衣城，
係 KFC 買過餐，
再坐巴士直上長宏村，
係十數分鐘車程內食晒個餐。
兩點準時到達。

佢地有打畀我問我到未，
不過我個時左手拿住個包，
右手拿住杯汽水，
仲邊有手聽電話？

今日青衣都幾多人，
有我們童軍個班差唔多三十人，
又有總會個國泰班三十人。

一路帶 Map Walk，
我叫佢地找某個特徵，
去到見到第二組已經介左係到，
咁仲點找？
實見到啦。

之後模擬賽，
我負責站崗。
叫住 d 學員睇清楚地圖先好行，
但係都冇人理我……><
個個都係咁衝落山，
明明係上山架麻。

返到屋企成六點幾，
原本約左 OMUser 班人慶祝其中一個友生日，
去打邊鑪。
不過一黎好累，
二黎媽媽煎左牛扒，
三黎有紐卡素直播，
所以結果都冇去。

日本祭

就黎要返工既星期六同平時有咩唔同呢？
其實係冇既。

今年係香港和日本既文化交流年，
今個 Weekend 維園有個日本祭，
我當然想去趁熱鬧啦。
OMUser 個邊又有人話去，
結果我就帶埋我部就黎封塵既 E-300 出去曬曬陽光。

臨到天后，
發覺自己相機帶左，
鏡頭帶左，
清潔用品帶左，
但係就唔記得帶 Memory Card。
好彩有人有多一張可以借畀我，
如果唔係就慘了。

中午去天后一間茶餐廳到死，
原來兩點至三點係騙財時段。
去到睇餐牌，
問佢有冇套餐，
「冇 wor，下午茶三點先有。」
問佢有冇午餐，
「午餐兩點收左。」
死未？

食完個 Lunch，
坐到三點半都入維園。
場地幾大，
通道闊落。
不過我唔係咁有興趣，
唔係賣食野就係派旅遊資料。
我知日本個 d 都係咁，
不過人地個灘位個個都好有特色好美麗，
佢個 d 就係帆布。

表演個台又起得低，
莫講話影相難影，
下半個畫面都係人頭；
小朋友要睇都難啦。

六點幾我就撒退了。

夜晚去買左個背囊，
因為買兩個有八折，
媽媽選了個證件袋。
叫佢選色個時又唔肯選，
真係麻煩。

這是香港人

下午返左培正教班，
其實都唔係教既，
只係返去講返今次 PCOI d 題目點做。
之前冇乜準備功夫做過，
只係翻睇佢地交個 d code，
唔睇尤自可，
一睇就覺得……
都係無謂提，
佢地想拿返我畢業之後就失去既學校冠軍，
我睇條路就好長喇。

早幾年人腳較佳，
加上我有系統既訓練，
最盡都係第三。
以呢年既人腳，
我又冇乜幫忙，
是王是寇，
就要睇佢地自我推動力有幾大了。

夜晚返普通話，
開始似返 d 香港人既班了。
第一就係多人走堂，
第一堂差 d 冇位坐，
今堂平均每人可以佔兩個座位；
就算有返學，
都係遲到既人佔大多數。
夠晒鐘上堂，
準時到既學生只有個位數。
最後就係電話響，
唔知係咪淨係香港人係咁呢，
睇戲、上堂、醫院等永遠唔會熄電話，
你唔熄電話，
都起碼轉做震機丫。
冇 d 公德心，
都唔知佢知唔知會阻到人。
響都不特止，
仲要傾埋電話。
掩耳盜鈴盤同對方講：
「我上緊堂，遲點覆你。」
聲浪大約係電話聽得唔清楚，
現場聽得好清楚個隻。
結果重複講幾次……


落堂前繼續聽歌詞，
一如以往，
都係錯一個 ><

Election

八日睇第三部戲。
香港多數係星期四上新戲，
我記得以前睇過點解星期四，
不過已經唔係好記得點解。

今日睇戲，
我預計兩點場應該好少人，
因為在學既未放學，
返工既未放工。
而且又係三級片，
十八歲以下既唔入得。
不過今次出奇地多人，
坐滿半間戲院左右啦。

開場前有段小插曲，
我係戲院門口見到一個舊同學，
我放左佢好耐，
佢都知我望佢，
不過佢冇同我打招呼，
我又唔係咁肯定，
因為佢係隔離班既，
雖然預科一齊上電腦，
不過同佢唔係太熟。

講返套戲，
杜琪峰既「黑社會」，
英文名係 Election。
故事講既係黑社會選話事人，
身為香港人，
我覺得故事中既社團好有香港既影子，
套電影好似講緊香港選特首咁，
好有共鳴。

呢套戲好多演員，
難得既係可以描繪出大部份角色既性格。
有忠於規條既、
有忠於領袖既、
有火爆衝動既、
有冷靜陰險既等等。

完場時，
我照舊安坐位中睇埋字出 Credit，
咁樣做既原來唔止我一個，
都有成五、六人。

下一套想睇既，
應該輪到係紐卡素取景既「Goal!」了。

扮豬食老虎？

艾文逢星期三休息，
中午同艾文去左黃金，
去睇 NDS d 翻版料。
行左一個圈既結果係：
佢部機係玩唔到翻版既。
之後同去佢鴨寮街找豆腐花食，
佢鋪頭名又唔記得，
街名又唔記得，
自自然然找唔到啦。

鏡頭一轉，
我地已經落左旺角。
去買 NDS Games，
結果兩個人買左兩個 Games，
玩完交換玩。
艾文既係 Jump Super Star，
一個 Design Fir 漫畫 Fans 既 Game。
我玩先既係「公主救孖寶」，
好似以前 Mario 既 Game。

自紅白機以來，
大部份既孖寶 Game，
都係公主被捉，
Mario 同 Lucio 去救佢。
今次就黎個反客為主，
被捉既係 Mario 兄弟，
去救佢地既係公主。

唔好睇公主好似好文弱咁，
佢仲好打過 Mario 兄弟。
Mario 兄弟最多都係踩敵人，
食花時可以放波，
食星時無敵狀態。

公主就不假外求，
唔需要食菇、食花、食星，
一把傘已經可以擘、浮係水上、
出埋氣功斬同「食」怪物。
仲有喜怒哀樂四種狀態，
可以飛、可以全身著火、
可以淋花、同埋補 HP。

玩呢個 Game 就會想，
點解公主咁打得都仲需要人救？
扮豬食老虎？

之後去睇世紀大騙兔，
一套冇真人，
全部係呢膠既卡通，
唔錯。
不過我鍾意放映之前個套短片多 d，
荒失失奇兵既「外傳」？

呼吸

老友感情有困擾，
出召集令。
結果四虎，
一個因為未放工黎唔到，
一個走中文堂，
一個走日文堂，
一個走德文堂，
齊集 Full Cup （艾文浦點）吹水。

佢話感情有 d 淡，
一個星期見零至一次（多過我啦），
唔需要日日電話（多過我啦），
同 Friend 出街唔駛拿行街紙（好正常姐）。
係美國 LD 完返黎唔夠半個月，
好似同未 LD 之前有 D 分別，
好正常姐。
始終需要時間習慣吓。
不過問完佢個問題先激死我，
「你有冇同佢傾過？」
「未」
咁擔心 D 乜鬼野姐？

吹完水，
無無聊聊拿起副象棋黎捉。
我雖然係做過棋藝會會長，
但係一棋藝會唔係象棋藝會，
二我一路都唔識捉象棋。
被細牛夾艾文殺過我滿地屍骸。

之後轉玩台灣盲棋，
玩細牛既規則，
自然又係我輸了。

再轉玩新遊戲，
一種好考智慧既 Game，
好難玩，
不過好好玩。

之後由油麻地行到返佐敦，
艾文仲跟埋我返屋企，
劫去左我三十三本 One Piece 漫畫。
其實我一早話借畀佢既，
不過估唔到佢一次過拿晒三十本姐。

Good Take

今日又有工見，
失業之後見既第二份工。
份工係 FaiFai 介紹既，
一間造數碼相機既公司。
地址係觀塘，
我準時三點去到，
係會議室坐左十五分鐘見我個人先到。
同以前見工唔同，
唔係我自我介紹先，
而係佢先介紹佢公司。
跟住都有問我 d Technical 既野，
例如部相機既構造呀咁。
佢講到明，
現家聘用既可能唔係識好多，
但係佢希望遲 D 會變 Expert，
唔係樣樣精，
但起碼要精一樣。
佢唔想請 d 騙飯食既，
份工好辛苦，
現在做緊個班有 d 都頂唔順。
最緊要捱得，
同埋有持久力。

呢份工福利冇前個份咁好，
工作時數亦都較以前長。
佢地行彈性上班時間，
但係要十點前返到。
收工時間唔記得問，
但就話預左要 OT。
星期六駛唔駛返，
同埋係咪長短週都唔知。

唯一知既就係，
下星期一要返工……

見工見左成個幾鐘，
原本佢都係話未決定。
話要同 Partner 商量下先。
同我講叫我如果下次黎帶埋 Cert 黎畀佢影印。
咁我同佢講話我現在有，
咁佢就拿去影印。
影完返黎就話介紹埋佢 Partner 我識，
之後就約幾時返工喇。

---

勁攪笑，
六月遠遊時，
係美國買左對波鞋畀媽鎷。
點知返到黎發覺唔合穿。
好彩美國物好有保障，
唔知幾多日之內可以拿返去換。
咁我就 Through HK Post 寄返去，
但係成個星期都未收到，
咁就 Send E-mail 去問啦，
但一直都冇消息。


上個星期一，
我收到封 HK Post 既信，
話仲未有 Conclusive answer yet。
佢叫我 Check 清楚地址有冇錯，
佢地再聯絡美國有關方面。

不過個郵包係我 Send enquiry 之後個日已經收到，
對鞋亦都換埋寄到返黎，
HK Post d 工作效率真係高喇。

十月練習賽

打完篇日記，
未 Save 就 Hang 機，
激死。

---

終於都到了練習賽的日子，
原本約七點十五分，
不過我七點十分先到茶餐廳。

本來得我一個人食，
不過有一個 Helper（Fanny）找唔到路上去，
因為仲早既關係，
客 Lift 鎖晒，
就黎埋茶餐廳找我。
狼吞虎嚥食完個早餐之後，
就返總會喇。
我地要坐貨 Lift 上去。
將 d 物資運落停車場，
坐貨 Van 過寶馬山。

有個簡單既簡報之後，
就開始做野喇。
今日既難道深左少少，
完成率比較低。
有唔少人放棄，
有 d 仲迷路去左大潭郊野公園，
我要找人去接佢地返黎。

個比賽唔算好成功，
仲有唔少蝦碌 Tim，
不過總算冇咩意外，
安安全全完作所有野。

---

今朝 Fanny 話佢公司請人，
問我有冇興趣。
佢公司係上司公司，
做幼兒教育既野，
要請識電腦既人人做 cs，
解答客戶使用上既疑難。
不過人工得八千，
要考慮下。

萬事俱備

中午被媽媽叫左出去飲茶。
其實一早起左身，
行出廳都幾次，
不過媽媽見我唔到。
仲以為我未起身，
所以出門口個時冇叫我，
咁都得……

不過同親佢去食野都

飲完茶又返左總會，
飲埋餘下既圖。
我亦順手攪埋明天試跑既圖。
攪到六點幾，
阿健話要影引 Master Map，
同佢一齊落去，
打算影完印我返屋企睇波。
落到去，
點知間野 Close左。

好彩旺角應該冇咁早 Close，
阿健話返會執埋 d 手尾先去影印。
明日比賽 d 野都攪到八八九九。
入好晒一箱箱，
等待比賽既來臨。

---

昨晚返完普通話，
又 E-mail 左份求職信出去。
呢份係 Faifai 上個星期食飯介紹既。
估唔到個邊咁夜都覆 E-mail，
仲約好左星期一 15:00 見工。
又係 15:00，
點解兩份都係約 15:00 呢？
15:00 有咩特別呢？
真係唔明。

希望呢份見得成啦，
因為間公司做既野我都好有興趣架。

造 MP3 機既工程師 -- 失敗

今日下午又有 Interview，
係星期三朝約既。
地點係清水灣，
舊電視城 Shaw House。
簡單 d 講，
即係科大隔離。

間公司同科大都有 d 關係，
係幾個 Prof. 開既。
設計 MP3 機既，
現家請 Firmware Engineer。
由佐敦入去，
最快亦係最貴既方法係地鐵入彩虹，
再轉小巴。

不過去到彩虹，
小巴站咁多人既？
仲要冇小巴係度，
遠遠望到架巴走埋，
灰……

結果都係坐 91 號入去。
約三點，
但我兩點半已經入到去。
上到去見工，
坐左一陣，
入會議室。

十五分鐘後……

走得，
睇黎都係唔成事多架喇。

坐小巴出觀塘，
再轉小巴返屋企。
全個見工用左廿六蚊，
三個幾四個鐘，
但 Interview 既時間只有十五分鐘……

夜晚上普通話，
臨下課又有聽歌詞遊戲玩。
今次係梁靜茹既勇氣：

＊終於作了這個決定　別人怎麼說我不理
只要你也一樣的肯定
我願意天涯海角都隨你去
我知道一切不容易
我的心一直溫習說服自己
最怕你忽然說要放棄

＃愛真的需要勇氣　來面對流言蜚語
只要你一個眼神肯定　我的愛就有意義
我們都需要勇氣　去相信會在一起
人潮擁擠我能感覺你　放在我手心裡
你的真心

重唱　＊,＃

如果我的堅強任性　會不小心傷害了你
你能不能溫柔提醒　我雖然心太急
更害怕錯過你

重唱　＃


都係錯一個…… ><

好多野做

失了業接近兩個星期，
同時亦都懶了打日記。
以前最多落後一兩日，
現在就落後一兩個星期。
昨日先被人「埋怨」做乜 Update 得咁慢。
哈哈，
其實唔應該用「埋怨」，
不過我中文底子差，
想唔到用咩動詞，
是旦啦。


中午返左培正一趟。
返去主要有三個目的，
第一係找 Poon Sir ，
下可唔可以傾下 d courses；
第二係找朱東，
睇下佢係 Fourm 所講既重排戰力係咩意思；
最後係找 MK，
問佢拿星期日會黎 Service 既童軍名單。
結果第一項，
返到去找唔到 Poon Sir；
第二項，
同朱東溝通完畢；
第三項，
CMB 畀左六個人名我，
不過 MK 話有十二張回條。

去中旅社那邊，
取回訂左既獎牌。
之後下午返左總會。
星期日比賽 d 圖預備好，
不過要等阿健 Double Check 一次，
之後我就幫佢入膠袋。

d 圖我望過一次，
其實唔係好得，
好多地方都偏移了。
我原本找了人手圈圖，
不過有人話用機整好 d wor，
結果………

電車男

今日原本冇野做，
不過艾文出開黎尖咀，
賣二手漫畫。
約我下午去睇戲，
一套日本片，
叫電車男。

電車係日文係解火車，
故事係根據一個御宅族既青年，
係 BBS post 既上的一大堆文章和他網友們的回答而成。

可能我有學日文，
睇呢套戲我好入神，
嘗試去聽佢 d 日文對白，
雖然唔係 100% 聽得明，
但都有 d 明架。
尤其是當中既敬語，
呢 d 係中文翻譯表達唔到既。

不過呢，
艾文好似唔係咁欣賞呢套戲。
艾力斯係佢日記都係話唔好睇，
唔知係咪經歷唔同呢，
我覺得好好睇。

---

睇戲之前，
同艾文去左美都 Tea。
「美都」即係劇集「廟街孖兄弟」中既「麗都」，
都好耐歷史喇。

艾文同我講左佢既創業大計，
係 Yahoo 攪拍賣，
賣 d 人地冇既野，
意念雖好，
不過………

隨左傾生意經，
亦都玩「應援」 Link Play，
結果當然我大勝啦，
出返昨日啖氣，
哼！

慘敗

今日係重陽節，
原本以為唔駛拜山，
約左四虎下午，
昨晚可以玩夜 d，
訓飽個上午。
點知昨晚媽媽話要拜山 wor，
遷就媽媽返通宵間放工時間，
約八點幾荃灣等。

結果就又幾乎冇訓。
原本都可以拜完山返黎訓返幾粒鐘既，
不過返生左 d 事，
結果訓唔晒。

話說媽媽上樓梯，
突然跌到，
撞到眼蓋。
好彩冇咩出血。

但係唔放心，
點都同佢睇醫生先。
睇完食埋早餐，
返到屋企成十二點。
艾文又打黎話食午餐，
結果訓都冇訓又出返去。


中午買左張 Memory Stick，
一盒熱血躲避球 / 熱血籃球既 GBA 帶。
之後上左阿力到。
艾文今日發左神經，
由頭贏到尾，
仲贏到開巷。

頭四圈贏，
我做左六十幾下。
食完飯再戰四圈，
又係佢贏。
又輸左六十幾下。
鋪鋪都正花趕糊，
邊有得打……

奮戰勝利十一人

夜晚約左 OMUser 班人去 Cafe 打機，
今次地點係好景一間叫「水瓶座」既 Cafe。
約九點半，
我九點就到左，
係好景行左一陣。
九點半上到去，
原來有人己經黎左，
仲要係七點黎到食埋晚飯 Tim，
早知就早 d 上去啦。

唔過 Cafe 個邊都要十點先畀到房我地。
有人帶左 PS2，
可以駁投影機。
不過唔夠拖板，
好彩我有帶。
冇分插同唔夠手制，
即刻落樓下買。

佢地打 Winning，
仲話打 1 on 1 杯賽。
我又參加，
用 AC 米蘭。

打第三場。
十二點左右，
有人話要買 Memory Card，
咁我就陪佢一齊去買，
幾乎行晒成個旺角，
原來有 d 鋪頭係未 Close 既，
不過個價好貴。
最攪笑係佢話見過便利店有，
結果我地係行埋便利店找。

返到去，
剛剛到我打。
對巴塞，
我大勝 4:0，
四虎既特訓唔係白費既。
之後四強對皇馬，
打成零比零，
射十二碼贏。
最後決賽對車仔，
又係零比零，
不過今次射十二碼輸……

打完呢場，
都成兩點幾，
Cafe 都夠鐘打烊了。
我地成晚都好嘈，
唔知會唔會嘈到其他顧客呢？

幫比賽

昨晚本來想玩夜 d 既，
不過呢今朝應9左阿立幫手攪荃灣區定向練習賽，
所以昨晚要早走。
早極都係講緊十二點幾，
行到返屋企成一點。
執埋背囊，
上得床訓覺都三點幾四點。
今朝七點半入到西頁，
六點幾就起身。
之後飛小巴入西貢。
我係西貢買左個麥記，
會合佢地。

點知佢地食緊早餐，
仲係開公數 Tim……

入到西貢，
我同阿健首先放 Points，
之後做賽道，
比賽完左之後，
阿立叫我地唔好收 Points人住。
話有可能做死因研究，
點知冇一個小朋友想上返去。

之後我、阿高同阿健就拿拿聲用極速收晒 d Points，
之後返西貢市享受一頓豐富發財宴。

---

夜晚約左 Alex 睇戲，
套戲叫 Transporter 2。
話明第二集，
即係有第一集啦。
但係第一集講咩，
我完全冇印像，
事後上網查返，
知道係 2002 年上，
仲有舒琪做既 Tim。
唔好講第一集喇，
不如講返第二集，
其實都冇乜好講，
因為唔覺得好睇。
隨左有 d 動作場面，
有飛車，
有武打（中國人做武指）外，
故事內容……都係放棄知吧啦……

大難不死

今朝又要上山喇，
同時為兩個比賽睇 Site。
上午九點幾，
我先上總會交 First Aid Course 既 Form。
（佢地未開工，我入落信箱）
之後我就落返天后，
會合阿健上寶馬山。

今次個入山地點同上次唔同，
上次係東面入山，
今次係西面人山。
先去比賽 2 個起點睇吓，
敝！浸晒，
即係做唔到起點啦。
唯有將個起點改。
不過一改就麻煩喇，
d Course 有 d 都要大改。

結果只係行左半張圖，
就已經三點幾要落山喇。
仲有幾個 Points，
留返下星期日先睇。

---

夜晚約左 i.2000 食飯，
今次出席既有 Roger、Dada、Alex、
Manman、C、Lapson、蕃薯、煇、Calvin。
係尖沙咀美麗華食泰國菜。

走既時候，
被 Dada 發現左 Alex 個女朋友都係同一地點食。
其實冇人認得 Maggie，
（我認得既，不過我行前面，又冇周圍望）
有人以為掩飾得好好，
點知就被 Dada 發現左那個不自然既眼神。

之後就去左尖東 Pub，
賴米加入。
除左大話骰，Big 2 之外，
仲話左 d 好益智既遊戲，
例如「日落西山」同「預備起機」，
玩到十二點我就走喇。
佢地繼續。

---

今日經歷過兩次死亡威脅，
第一次係山，
滑腳跌倒，
一條樹枝插向頸，
好彩枝樹枝斷左。
如果粗 d 既話……

第二次係行去尖東個時，
差 d 被車撞到。
好彩我彈後避開左，
但講緊個距離係幾厘米……

亂入

比賽個度，
要寄 d 信比賽員，
信封入面包括賽員須知、
號碼布和 Control Card。
昨日已經入左大半，
今日返去繼續入。

有幾樣野要首先處理，
昨日入入吓發覺多左一張號碼布，
又有一封係欠一張號碼布，
咁好大機會係入錯左啦！
拆開幾封信之後，
終於攪掂。

之後阿健同阿高入埋最後個組，
我就攪第二個比賽 d 野。
入入吓，
又出問題喇。
原來佢地號碼布還號碼布 Sort，
信封有信封貼地址，
Control Card 又有 Control Card一叠。
但係三樣野 d order 係唔同既，
入個陣又冇核對 Wor，
咁咪錯晒 Lor。

---

今日有工見，
Agent 介紹既，
四點半係尖沙咀。
個 Title 係 Sales Consultant，
地點係保誠大樓。
說穿了咪又係賣保險。

艾文知道之後第一句就係話我唔適合做，
想想下，
又好似幾有道理 wor。

Anyeay，
我都換晒衫，
四點已經去到尖沙咀。
但結果都係有見到。
我都仲係想做 Programmer 多過做保險，
我仲未想轉行住。

感恩

有 d 野，
有人睇會覺得只係巧合，
但係一個基督徒既眼中，
就會覺得要感恩。

話說部電視昨日睇睇下突然熄左，
咁就打去叫人黎整啦，
約左今日下午二至四。
但原本今日 Plan 左係上山睇 Site 既，
不過因為阿健一黎未攪掂 d Courses，
二黎佢又要見工，
結果臨時取消左。

中午同媽媽同兩個 Aunties 去旺角小肥羊飲茶。
飲完之後，
我去左買 NDS Game，
隻 Game 叫 「應援團」，
係玩打拍子既，
我估船長會鍾意玩。
原本仲想買多隻，
結果都係玩完一隻先買第二隻。

之後一路行返屋企，
途經上海街。
又心思思想買埋個手力磨石機，
結果又係冇買。

返到屋企冇耐，
修理師父就黎喇。
幫佢手幫部電腦上飯枱，
之後就等佢整呀整。
最後換左一個零件，
睇編號我估係一粒電容。
零件費 $15，
檢查費 $200，
修理費 $200，
總數 $415。
銀包剛剛夠，
如果唔係唔駛上山，
我唔會 ATM 提款；
如果買多左野，
我又唔夠錢畀。

凡事感恩。

NDS 入手

繼 PSP 之後，
又一部手提遊戲機入手。
今次係 Nintendo 既 NDS，
全寫好似係 Nintendo Dual Screen。
顧名思義，
佢有兩個 Screen。
上 Screen 係普通 Screen，
下 Screen 係 Touch Screen，
再加埋平時 d buttons，
仲有 Mic 咁，
變化就會好大。


講返部機點黎先，
其實己經有一部機，
本來都唔想買第二部。
不過之前 No.1 Club 個邊寄張 Form 叫我申請信用卡，
仲可以八折兼分期買 NDS，
好似幾抵咁，
咪買埋 Lor。


收到封換領信都成半個月，
都未去拿機。
原因係之前有個 Friend 又係去拿機，
不過冇晒貨，
話有再通知佢。

前排艾文買左部 NDS，
問我幾時買，
咁今日就心血來潮打去問下，
有 wor，
咁咪即刻去換 lor。

六點幾去到換領中心，
幾多人呀。
好彩個 Friend 上次黎過換唔到，
職員叫佢下次黎可以唔駛排隊，
所以我可以拉車邊合理打尖。
換完過旺電貼保護貼，
間野好好生意，
攪左我成個幾鐘。
返到九龍公園成八點半，
淨係玩到個超短途定向。

講返係旺電，
等緊貼保護貼時，
有兩個人入黎買電腦。
吹開水，
佢話想買部 PSP，
問佢想玩咩 Game 啦，
佢話冇。
咁買黎做乜呢？
佢話：
「你唔覺得好型既咩？」

………

搶手貨？

我咁大個仔都咪試過成為搶手貨架，
Jobsdb 個度勁多公司 Request 我 resume。
不過睇真 d，
全部都係保險公司……
有冇機會真係成為搶手貨呢？

---

計計埋埋，
申請左既信用卡都有成三張。
今日又偷到一封邀請信，
係 Asia Miles 寄黎，
又係叫我申請信用卡，
仲要係金卡 Tim。

不過咁，
莫講話我有份工既時候，
年薪都未必附合金卡既要求。
更何況我現家冇工做？

想我申請？
咪玩啦！

---

夜晚上堂。
冇乜點溫書，
只係臨上堂之前溫左陣，
默既時候都係唔識既多。
加上有少少唔舒服，
所以都係冇乜狀態。

兩個星期冇返既 Moly 今日上返堂，
點解兩個星期缺課呢？
原來就係去左考試。
Moly 呢行，
又係要考 N 咁多個試先拿到牌，
真係辛苦晒 Lor。

損手爛腳

因為 16 號有個比要攪
地點係港島個邊既寶馬山。
所以今日一早要上山落 TAPE，
即係做定一 D 既記號。
之前應承左阿邦幫佢上總會拿 Cert，
所以早少少上左奧運大樓（即係以前體育大樓）。
我九點半上到去，
有職員係到，
後來先發覺……原來辦工時間係十點開始！
真係唔好意思。


之後上山，
係天后坐小巴上去。
我以為 d 路好簡單，
所以短褲冇袖上陣。
點知見阿健換晒 Full Gear，
咁我都知敝家伙架喇。
果然，
唔密既林都唔入，
結果週身掛彩。
三點幾落山既時候，
已經左手一條 15 cm 既血痕，
右小腿又有一條 15 cm 左右既血痕。

---

之後係銅鑼灣仙跡岩食 Lunch，
再出旺角做比賽獎獎牌。
勁攪笑，
我都佢講個牌既比賽日期寫 10 月 16 日。
之後我問佢幾時有得拿，
佢話係 10 月17 日！

---

之後返培正拿 PCOI 既碟返屋企改，
見到 Poon Sir，
自然問我拿 Courses。

見到修修，
佢同個男學生傾緊計。
個學生一見到我，
就叫我幫手勸阿 Sir，
唔好迫佢。
迫 d 咩，
就係修修叫個學生參加啦啦隊。
我就答，
應該參加啦，
唔知會唔會激死個學生呢？

衝擊第三

今日係一年一度白理義錦標賽的日子，
因為只有會際獎項，
所以亦係各屬會既牙較戰。
比賽以兩個人為一隊，
玩奪分式定向，
每個會計最高分個五隊。
今年我地既目標係第三，
雖然仲未算 Full Team，
但總算精銳盡出。


結果雖然有幾隊失手，
但都得了個第三。
我既拍擋係久休復出既曾 Sir，
兩個穩陣派組成既一隊，
自自然然唔會搏分，
唔會超時。
個別名次方面，
我個隊排第十六，
同屬會中的第二高分。
算係不過不失啦。

---

去完中興買完野之後，
約左 Alex 去睇戲。
其實呢排都冇咩戲好睇，
結果去睇左套最唔想睇既戲，
咪就係個套神話 LOR。
其實套戲就冇乜野既，
不過係個主角衰 d，
尤其是佢 d 言論。
上個星期講話咩香港人唔團結，
唔去睇佢套戲，
我登時火都黎埋。

不過 Alex 話睇呢套。
（其實係其他戲佢可以搵第二個去睇）
Well，都可以去睇下既。

睇完之後既結論係，
又係一貫公式，
唔知打黎做乜，
係都要拳來腳往，
無聊！

短毛

十月一日，
新的一個月，
新的開始。

下午過了 SOC，
會合 Dicky 同阿棟入十月練習賽的資料。
賽員 d 名真係奇奇怪怪，
我唔係取笑佢地個名，
只係佢地寫落張 Form 寫到奇奇怪怪。
結果入到五點左右就入晒 d 資料喇。

之後返到屋企，
見到媽媽正想出街。
原來佢想去探 Uncle，
叫埋我去，
我梗係一齊去啦。
一行三人（仲有 Auntie）一齊上 QE。
探完 Uncle，
就落返佐敦意粉屋食 Dinna。

食完之後，
就過左隔離剪頭髮。
由長毛炒變成短毛炒，
幫我洗頭同剪後衝走頭髮那兩個人既服務態度相差好遠。

第一個好有禮貌，
會問水溫適合與否，
力度適合與否等

第二個就一於好少理，
拿拿臨攪掂收工。

再之後落左廟街，
買左個袋仔畀個電話。

本來今晚 Omuser 又約出去打 PSP，
不過因為我聽朝要跑比賽，
所以都冇去到。
十點左右返到屋企，
執完行裝就訓了。

Last Day

經過左三年零四個月，
終於要走了。
今日中午同幾個較傾得埋既同事
去左飲茶。
係放 Lunch 之前，
交還左張開門卡。
被做了 E-mail Forwarding，
以後寄去我公司 Acount 既 E-mail，
就會全部 Forward 晒去畀老闆，
包括大量 Junk mail，
同各大網上 Forum 既 Digest E-mail。
同一時間亦收到一張支票，
包括最後一個月既薪金，
年假補水，
和遺散費。
不過遺散費會係 MPF 僱主供款中扣返。

兩年前公司轉過一次名，
當時係不帶年資轉職既，
所以今次計遺散費，
只係計我 2.08 年既年資。
但係佢扣 MPF，
竟然想扣三年！
呢樣野我梗係唔肯過佢啦！

---

夜晚上普通話，
老師又病，
結果又換一個代課老師。
上三堂，
三堂個老師都唔同。
今次呢個阿 Sir，
講好多廣東話，
d 聲母韻母佢都會畀 d 廣東音，英文幫我地記。
例如 ia「吔」、ie「yeah」、iao「yao」等。
有個坐最前既阿叔好攪笑，
成日讀錯。
咁識就唔駛學啦，
讀錯有咩奇？
但係佢就呢頭講完個頭即錯。

（以下對話全部用廣東音寫）
「"消" 既廣東音點讀？」
「消」
「"休" 既普通話音點讀？」
「筲」
「"消" 既廣東音 = "休" 既普通話音。"休" 既普通話音點讀？」
「筲」
「"消" 既廣東音點讀？」
「消」
「"消" 既廣東音 = "休" 既普通話音。"休" 既普通話音點讀？」
「筲」

你話係笑死丫？

---

上完堂，
去左 Join Omuser 班人。
電話中佢地叫我先上太子一間 Cafe，
上到去，
佢地一個都唔見。
見到 Sandy，
佢又係被佢地點左上黎。
之後同佢兩個就係太子找佢地落腳間茶餐廳。
等佢地食完野，
再轉地方去菜街一間 Cafe，
最後玩到點幾兩點。
我地去玩咩呢？
就係 PSP 喇。
下半場十個人有成八部 PSP。
（上半場仲多呀！）

和民

公司有好多野要拿返屋企，
今日拿個箱運了一半返屋企。
成個箱都係書，
好貴重。
夜晚約左人係九龍地鐵站交收一條二手 Ram，
抬住個重箱，
由炮台街行到去九龍站。

十一點幾試條 Ram，
攪極都攪唔掂。
原本用緊 samung chips 512mb ddr 333
買左條 samung chips 512mb ddr 400
單插 either one 都冇問題
一齊插就入唔到 window
數 ram 數對
之後就 hang 左機喇……

---

今晚約左兩個大同食飯，
其怪既人數（3），
其怪既組合（嬲）。
問極發起人（輝），
佢都唔講點解。

Anyway，
去左尖咀和民食。
d 野幾好食，
埋單每人 $65，
都唔算貴。
起碼抵過上次係沙田食，
上次直情食唔飽。

之後去食雪樣，
點解唔係和民食呢？
當我地走左先發覺有得食。
去到星巴克，
發覺冇雪榚，
結果去左……麥當當。

地圖記憶

今晚放左工之後，
坐小巴出佐敦。
返到會，
首先同輝哥傾傾練習賽 d 事項，
之後再數下有幾多人參加。
單人組好似得三十人左右，
唔係好多。
攪掂晒攪比賽 d 野，
就落九公園 Join 返習訓隊班人。

今日係 5.4km 測試，
我落到去既時候，
佢地已經熱晒身。
既然我未熱身，
負責計時那個助教又準備緊之後既訓練，
唯有由我計時啦。

之後 Train Map Memory，
其實 Map Memory 唔係練記憶力，
而係練圖對地。
即係先讀圖，
然後幻想返實景應該係點樣。

12 個 Points，
每三個 Points 有一張圖睇。
即係話，
在起點個張圖，
只係 Show 左頭三個 Points 係邊，
去到三號 Point，
就有另一張地圖 Show 之後三個 Points 係邊，
六號 Point 同九號 Point 有另外兩張圖。

我係最後一個出，
第二個 Point 就過左阿健，
不過之後拉唔開距離，
結果只係早佢半分鐘到返終點，
佢早我一分鐘出發，
即係我贏分半鐘啦。
成條 Course 跑左十三分幾，
有 d 慢 tim，
狀態應該十分鐘以內。
而且有到去到實地同腦海既幻想有 d 唔同，
結果有 d 猶疑。

---

Sudoku 係一個訓練邏輯思維既遊遊，
玩左個多兩個星期，
最快都只係 4 分 36 秒，
有 d 慢 tim。
想推戰下既，
可以去呢度：
Sudoku

出題目

昨日個 ToDo List，
成功 KO 左 7 樣，
都算係咁啦。

夜晚返日文，
繼續不在狀態，
完全唔知做乜。
教到第二課，
今課講敬語。
老師叫我讀句子，
我竟然聽唔到「讀」呢個動詞，
以為問我「點解呢句不對」，
勁瘀皮……

---

十月個比賽 d 野都做得七七八八，
但總係覺得有 d 野漏左，
希望可以盡快找到出黎啦。

---

出題目真係唔係人人可以，
如果唔熟既話，
可能出得太深或者太淺。
星期五 PCOI d 題目已經 Ready，
不過 d 深淺程度好要再調較下。
望住 d 題目，
好似一年淺過一年，
但係佢地好似仍然做唔掂。

早一兩年我覺得 d 題目好淺，
就算拿到滿分，
出到 HKOI 都唔擔保可以有金獎。
但係大部份人都好似好低分，
真係出得太深？
今年出得更加淺，
不過都係驚佢地做唔掂……

被狠狠地耍了

星期日返崇拜個禮拜堂，
同屋企相距話近唔近，
話遠又唔係好遠。
齋行就廿零三十分鐘左右，
地鐵就兩個站加十數分鐘步行。
坐巴士呢？
五、六個站左右，
但就幾乎到門口。
一般我都係步行多，
但有時都會坐巴士。
昨日朝係茶餐廳食完早餐，
見橫風橫雨，
我就等巴士啦。
崇拜十點半開始，
我十點開始等車，
點都到喇掛。
8 號車班次都係二十分鐘一班姐，
點知……
一等就等左半個幾鐘都未有車。

我就行出彌敦道，
出到彌敦道，
就多架 7 號車坐。
亦都一如以往，
我一行到出彌敦道，
8 號車就黎喇，
擺明玩我。

---

今年定向比賽比較疏，
睇黎我可以玩吓 d 長跑比賽，
以往撞晒 d 定向比賽，
今年冇藉口了……

---

今日既 To Do List
1. 背 25 個日文漢字和假名
2. 做日文功課
3. 問獎牌價錢，仲要貨比三家
4. 改寫賽員通知書
5. 為定向比賽 Set Courses
6. 寄求職信
7. 出 PCOI 題目
8. 出 HKOI 題目
9. 打呢篇日記

真係一日四十八個鐘都唔夠用啦陰公。

唔怕生壞命，最怕改壞名

今日原來要上山跑比賽，
結果三號風球掛左成日，
比賽自然要延期。

咁朝早有咩做呢？
梗係返崇拜啦！

崇拜之後，
行左陣電腦商場，
我買左個 Gel Wrist Pad 畀自己。
不過最重要既係幫阿 B 套系統打打價。
Pansonic 個隻要成 1680 一隻，
仲要唔係最新形號。
找到另外一隻，
叫 Seteye IP Control Cam 2，
連 Homeplug 3 個，
Router 1 個，
佢報價 $3000 有找。

不過我掛住攪阿 B d 野，
竟然唔記得問獎牌價，
真失敗。

---

中國人話：
「唔怕生壞命，最怕改壞名」
古人真係有智慧

在英國《泰晤士報教育專刊》網站的教師聊天室，
老師們羅列了一連串會令他們聯想到「搗蛋鬼」或「令人高興」等感覺的學生名字
叫 Poppys 的學生予人過度活躍的感覺；
Kayleighs 是討厭鬼；
至於 Kyle、Liam、Wayne、Charmaine 和 Charlie 都像是會給老師找麻煩的名字。
有老師寫道：
「我看一遍新生名單，
會自然地勾出我認為會難應付的那些學生名字。
我的命中率高達75％……。」
網站指出，
讓老師產生負面印象的名字，
包括那些帶有連接號的名字，
像 Bobbi-Jo；
另有串法異常的名字，
如 Kloe 或 K'tee。
使老師聯想到愉快開朗孩子的名字，
有 Kate、Gregory、Alice 和 Joseph等。

三號風球

培正定向會十一月攪比賽，
我幫佢地 Set Course。
因為個比賽就黎到，
所以今日原本上山睇地形。
（十月十六日我就 Event Organizer 都仲有好多野未攪呀陰公）

因為我仲要去總會幫人拿 Cert，
所以約左阿棟同 Julie 十點天后等。
阿棟就話個日係幫手姐，
Julie 上去又仲乜呢？
難解。

本來今日要返培正教班，
結果都返唔到。
尋晚講左成晚將會掛三號風球，
結果到今朝都冇掛。
尋晚同阿棟約定，
如果八點都冇掛就照上。
結果八點冇掛，
但阿棟都打黎話擔心將會掛。
佢話打個電話畀 Julie 問吓佢點，
點知 Julie 佢仲未起身。

結果都係決定唔上住。
呢頭收線，
個頭天文台就掛三號風球喇。
不過成朝都好似冇打風咁，
又冇落雨又冇唔大風，
係天氣涼返少少姐。

十一月個比賽，
既要 Set Course，
又要睇 Site，
又要上山落 Tape。
十月個比賽仲多野做，
又要造獎牌，
又要寫賽員通知書，
仲有好多濕碎野做，
十月唔使做，
都唔知好事定壞事。

---

呢個世界真係細，
原來我中學同學今年入職教個間學校，
同我大同個男朋友係同一間！

普通話

夜晚上普通話，
上次個先生病左，
有個代課先生，
今日佢返黎教，
係個女既。
因為有 d 同學仔唔知上次那個是代課先生，
入到黎以為去錯地方。

工聯會既 Course 平就係平，
不過就人太多。
成四十個人一班，
一人個兩句都落堂咁淨。

你姓咩呀？
屋企有咩人？
鍾意飲咩？

咁就輪左三個圈喇。

教多幾個聲母 g k h、
幾個韻母 ai ei ao ou an ang en eng ong。
之後就播 CD，
聽住 CD 跟住讀。
（CD 我地都有……）

最後都算就 d 新意，
播歌做聽解，
佢派左歌詞畀我地，
但係有 d 詞語係抽起左，
我地要填返 d 詞落去。

九個空格，
我既命中率係近乎 100%。
而係有一個答案係「藍天」，
但我明明聽到三個音，
結果格梗填「藍天空」。
之後我上網 Check 返歌詞，
真係就咁「藍天」。
我反覆聽多幾次，
第三個音係好似「呀~~」咁。
唔記得講首歌 tim，
係林曉培的「心動」。

新任務

新人物係咪有名字之前，
暫且叫叫阿 B 先。
阿 B 阿媽想隨時見到阿 B，
但冇理由帶埋佢返工架嘛，
事實上亦唔容許佢咁做。
所以佢就交左一個任務畀我，
就係係阿 B 間房裝支 Cam。
但係阿 B 間房同我間房中間隔了條大走廊，
如果用 USB Cam，
似乎條 USB 線拉唔到咁遠。

而且用 USB Cam，
我部腦又要裝 Software，
又要長開唔熄。
咁唯有用 IP Cam 啦，
IP Cam 內置伺服器，
咁用電腦 Connect 佢，
就可以睇到畫面，
甚至可以 Control 到支 Cam Zoom in/Zoom out，
做埋 panning 都得 tim。

要將部 IP Cam 駁上網，
又有兩個方法，
一係就買支 Wireless IP Cam，
我房就裝個 Wireless Router；
一係就買支 Wire IP Cam，
都係我房裝個 Router。
唔想拉線既，
可以用 Homeplug，
即係經電線傳訊號。
佢阿 B 房牆角個電制度裝個 Converter，
將 IP Cam 經 Network Cable 駁過去‧
係我房裝另一個 Converter，
經 Network Cable 駁過去 Router。
不過唔知造價幾多呢。
阿 B 阿媽明晚返黎食飯，
問吓佢想點先。

---

屋企有「哈根載斯」既雪榚月餅，
所謂既月餅，
只係月餅形狀既大大舊朱古力雪榚而已。

真人 Show

大學同學套畫劇好戲連場，
自從佢轉了地步放片之後，
總算每日都有新劇情。
最新劇情講到：

奸角再次出場，
一段三角關係，
演變成四角關係，
男女主角更一度懷疑兩名奸角已經聯手。

自己一個追劇集睇，
茶餘飯後冇得討論係好辛苦既。
既然係咁，
我梗係要找返個人傾下啦。
環顧我身邊既人，
會追呢套劇集，
而又同我一樣更八既就只有船長喇。
佢既結論好精彩，
大約意思如下：

「多角關係係當佢地得閒先至會有，
如果佢地有船長咁忙，
再多幾隻角都未必發現到，
因為訓都唔夠時間訓。」

補充一下船長既狀況，
現在佢係日頭做野，
夜晚讀書。
再加埋做功課同溫書，
有幾多得閒時間可想而知。

Anyway，
希望大同呢套電視劇快 d 大結局啦，
最好就 Happy Ending。

---

今晚 SOC 練跑，
頭盤係衝山跑。
最快個轉係 8 秒 8，
最慢係十秒幾。
Recover 得好慢，
個頭幾次因缺氧而頭痛。

之後係奪分式，
跟返星期日比賽咁分組，
我同曾 Sir 450 分中拿了 340 分，
五隊中排第三。

最後係搶分式收 Point，
十個人三十個 Points，
鬥快收三個返黎。
跑得最快那個，
尾二才返，
因為有好幾個 Points 都被人截糊。
結果我最快，
兩分半就收了三個返黎。

「通」唔起

老了，
真的老了。
細牛都黎到過 334，
我因為星期六朝要返工，
只係黎左個 34，
今朝返工都吃不消，
又開始作病。

以前讀 U，
點通都冇問題。
記得趕 FYP 個排，
連續廿個 10 （通到第二朝 10 點）都冇問題。
現在？
肯定唔得啦！
係年紀大左？
定係習慣左灰姑娘既時間呢？

---

今日中午老闆請食自助餐，
返去 HITEC 食。
HITEC 即係九龍灣展貿，
公司舊址。
自助午餐，
都好耐冇試過，
對上一次，
講緊既應該係 99 年係土耳其比賽個時。

呢度自助餐都幾豐富，
有沙津、有冷盤、有湯、有熱食、有點心、
有淥麵、仲有廚師切羊脾！
甜品又豐富 wor，
仲之就又好味，
食得又滿足啦。
結果食到三點，
之後坐老闆車返公司，
呵呵呵。

---

夜晚上日文，
完全不在狀態。

体の気分が悪いので、精神を集中して授業を受けることができない。

盡興

今日又見到四虎喇。
訓到十二點幾起身，
一開電腦就收到艾文 ICQ Message 招集，
話兩點出到黎 wor。

點半同細牛食完午飯，
趁佢地未到，
踢住 Winning 先。
AC 米蘭（我）對巴塞（細牛），
先入一球既情況之下，
被細牛追平，
結果射十二碼輸。

踢到半場，
力王都到，
第二場就對力王。
國米（我）對唔記得（力王），
又係先入一球之後被人追返。
「兩點幾」到既艾文代阿力射十二碼，
結果我又輸多次。

艾文唔敢同我單挑多場，
話要打牌。
結果我呢啖冤氣就發洩晒落佢身上。
原本佢地三個都要做成百下，
不過最後兩鋪，
細牛一鋪乘五既自摸，
力王一鋪乘三既自摸，
結果就，
哈哈哈！

之後合作打 Winning，
細牛做左新一代國（角）王，
三次中角，
反而艾文零角度射門就中內柱入，
激死細牛。

之後去力王屋企食飯，
食完打牌，
今次有新玩法，
不過呢個玩法隨機指數太高了，
冇咁好玩。
結果我要做 56 下掌上壓。

導航

下午紐版約左人鬥波，
約點半係地鐵站等，
我準時到，
等到四十五分都唔見人。
結果自己去球場。
等到兩點幾，
終於開到波。

我地先開紀錄，
之後被人返超前。
之後我休息夠再落場，
打前鋒入兩粒。
最後比數係贏 8 比 4 。

對面 d 龍門好矛。
一球佢成個人撞埋黎，
波佢又掂唔到，
我就硬食佢一野。

又有一球另一個龍門訓落黎，
又係波都掂唔到，
我就收晒步，
但係都被佢撞底，
膝頭瘀晒，
勁痛。

---

夜晚去艾文家打邊爐，
第一次見艾文女友阿 Mo。
食完之後，
細牛車阿 Mo 返屋企，
我同康哥又趁熱鬧一齊去。
細牛唔熟火炭 d 路，
導航既責任當然落在我呢個專業人士身上。
順利完成任務。

去到火炭，
本來應該直行，
艾文就口快快話要轉左。
本來只要轉一次彎，
結果就要轉三次……

之後打牌，
輸左 126 下掌上壓。
佢地猛話叫我放棄，
哼！
我一定做晒先走。

結果又三點幾先返屋企。

BBQ

今日放左工去洗牙，
洗返牙之後，
今次係第一次冇蛀牙。
半個鐘就攪掂晒，
雖然仲有少少出血，
但都已經好左好多。

之後出左旺角 Cafe，
人地玩大富翁、UNO、撲克牌，
我地就 Link Play PSP，
打 Winning、打 Tennis。
我打 Winning 個時，
仲引左老闆過黎睇。

見到 d 後生仔（？！）玩大富翁玩得好開心，
我驚覺我好似好耐冇玩呢 d，
係我冇左童真？
定係我真係老左呢？


夜晚入左天水圍燒野食。
八個人去，
人頭費 $50 。
食物有雞翼、丸、腸、牛扒、金沙骨和尤魚等，
仲有兩支汽水同三支水。
野食就食唔晒，
（佢地就拿左返去煮宵夜）
野飲就要再加。

燒完野食之後，
我地去左其中個屋企繼續玩。
佢地劈酒，
我就同另外一個打 PSP。
同點零鐘，
我同打 PSP 那個坐 N 車走先，
劈酒個班就玩通頂。

上到巴士，
我部 PSP 已經玩到冇電，
但好彩我有帶電箱，
繼續打。

去到美孚總站落車，
再轉小巴返屋企。
返到去，
三點幾了。

找工

終於開學喇，
今晚又要上堂，
今次輪到學普通話。
八點半係工聯會上堂，
上到十點。
有冇用呢？
見仁見智啦。
我起碼學左我個名點讀、
八個聲母、
七個韻母，
同埋四聲。
咁就一堂喇。

---

原來見工係好快既，
一封自薦信，
換黎一個 Interview。
個 Interview 歷時七分鐘，
咁就見成返工喇。
三個月試用期，
六千人工，
試用期後人工 Double。

不過，
見工那個唔係我。

---

同事又有 Interview，
今次係科技園，
仲要做 15 min 既英文測驗。
間公司都有請唔少人，
有兩個 Post 我都有興趣。
一份係 System Design Engineer，
一份係 Software Engineer。

前者係
Design system software / firmware / driver for development platforms, products and applications
Develop multimedia systems for mobile communication and consumer electronics, including embedded systems
Perform system (digital / logic / analog) design simulation, verification, and documentation Shift duty may be required
Write necessary programs or scripts to enhance work efficiency
Conduct research on multimedia technology and system integration
Provide application and system support

後者係
Define, implement and maintain device drivers for new hardware
Test programs and develop application software

聽講幾好 Pay。

浪費

又到中秋，
又係做節既時候，
今年中秋做節就係今日食飯，
地點係長沙灣廣場。

今朝我問媽拿地址既時候……

「地址呢？」

「你係荔枝角地鐵站 A 出口咁樣咁樣行…」

「地址呢？」

「你係荔枝角地鐵站 A 出口咁樣咁樣行…」

「………」

夜晚去到酒樓仲攪笑，
話說媽之前去過食，
叫左一碟雞、一碟鵝。
食食吓有個侍應走埋黎，
話唔可以用兩個優惠，
又要雞又要鵝，
拿走了佢地碟鵝。

咁呢件事呢，
我係酒樓由坐低到點菜半個鐘左右唔夠既時間中，
聽左十次有多。

結局佢地點菜繼續保持叫到食唔晒既傳統。
淨返 d 餸拿盒裝返屋企好正常。
媽媽話唔好浪費嘛。
但係，
唔叫咁多咪得 lor。
媽媽話請人食飯點可以唔夠食呢？
（有三個 Aunties 一齊食）

之但係，
唔係淨少少 wor，
打包返屋企都有三大盒，
係三大盒！
成隻鵝冇乜點食過咁淨，
驚唔夠食，
都唔係咁點菜架。

---

當係大人忙既時候，
我唯一可以做既，
就係肅靜。

接力奪分式定向訓練訓

今晚個訓練係我負責，
但我竟然成袋圖漏了係屋企。
原本打算中午 Lunch Break 時圈圖，
結果都圈唔到。
好彩 SOC 個網上有 Low Resolution 既圖，
咁我都可以 Set 左 Points 先，
最多夜晚返到去先圈圖。

七點左右返到去，
以為會有十二三人啦，
點知計埋我先得八個人。
原本打算三個人一隊可以分幾隊，
結果四個人一隊分兩隊。


係佢地落左去做體能訓練既同時，
我係咁圈圖，
之後即刻衝落去放 Points。
總共 Set 左二十個 Points，
用左大約十八分鐘放晒，
剛剛趕得切係佢地跑完之前放晒 Points。

四個人一隊跑四條 Legs。
四條 Legs 分別是：
短（拿十四個 Points）；
中（拿十五個 Points）；
長（拿十九個 Points）；
好長（拿晒二十個 Points）；

我跑中 Legs，
第三個出，
去到八點五十五分，
我知道玩大左喇，
因為我地第二個都未返，
個 Training Overtime。
結果趕收工，
要 Mass Start。
我用左八分鐘打左十五個 Points，
原本可以快 d 既，
因為有度太夜鎖左門，
有兩個 Points 我打唔到，
要繞路打另外兩個 Points 補返。

勝利十一

失驚無神個同事同我講話個 Program 有 Bug，
嚇得我丫，
嗱嗱聲去 Debug，
結果發現又錯 d 低 B 野。
話說為左 Safty d，
我加左句 「如果真係乜乜乜，就……」，
點之我打左 「如果真係唔係乜乜乜，就……」，
結果當然大炒啦。
不過奇怪係點解之前個幾兩個月都冇人發覺既？

---

萬眾期待（好似誇張左）
PSP 既 Winning 終於出左。
不過我今日要上堂，
唔可以放工即時去買。
但係聽日要練跑，
後日要做節，
星期五要上普通話。
即係唔駛買姐。

結果上完日文都係忍唔住，
十點幾都要衝落旺角。
首先去信和，
敝，
唔記得拿錢。
上返上面 ATM，
拿完再過先達。
一間已經由 $319 加到 $350，
好彩都仲有一間賣 $319，
拿拿聲畀錢就走喇。
（原來最平係 $299 tim）

返到屋企試玩，
好正。
要同家用機比，
機能本身已經冇得比，
但作為一個手提 Game，
已經好高分。
不過始終同我 Expect 有段距離。

二手版亦有人即刻放，
最低去到 $250，
早知忍忍手啦。

---

係旺角行返屋企既途中，
整程都同大虎係電話吹水。
佢自薦去做獸醫助理，
今日打黎叫佢星期五 In，
希望佢成功啦。

星巴克

四虎有其中三隻都找緊工，
艾文今日去見星巴克，
咁橋我今日都上過星巴克網頁。
原本我唔係睇請唔請人，
只係搵咖啡豆資料時去到。
不過既然瀏覽開，
順手睇埋請唔請人。
艾文話佢好似要請好多人，
問我會唔會去 In。

其實做沖咖啡我都好有興趣，
不過有兩個心理關口要過。
第一係要忍受人工扣近半，
雖則佢話升得快，
不過唔知要幾耐。

第二係可能你阿 Head 會細你好多。
佢入職要求好簡單，
會考英文及格。
試想想，
中五畢業入去做，
做五、六年自然點都升下，
而你現在先入去做 Junior，
所以你阿 Head 隨時細你好多。

Anyway，
再想想啦。

---

細牛日記話，
被人話佢冇心裝載，
因為佢答唔出幾時返黎。

敝，
我都答唔出 Tim，
莫講話幾時畢業返黎，
幾時 可以/會 請假返黎我都唔知。
如果細牛叫冇心裝載，
咁我叫咩呢？

咩 wor，
唔知就答唔出架啦，
好出奇咩？

Level 2 定向班

今日要教班，
一個 Level 2 既定向班。
八點九集合，
我八點八先到青衣，
因為太肚餓既關係，
都要食埋個早餐先。
結果遲了少少。

今日個山好多人，
單單我地個班，
都有五個教練，
仲有三個見習一級教練做 Attachment，
十六個學員。

仲有 Tommy 佢地有個教導組班，
女童軍有個比賽，
下午仲有阿健、Julie 佢地班見習準一級教練既專章班。
總之就好多人啦。

首先帶 Map Walk，
我帶一組，
而有個見習既跟我，
係青衣行個半鐘。
其實係青衣教 Level 2 既 Course 係幾難既，
因為好似 Aiming Off 呀呢 d 冇乜地方做到。
Anyway，
總算將我想講既講晒，
甚至連少少 Level 3 既野都講埋。
唔知佢地吸收到幾多呢？

之後有三個小活動，
Control Description 接力卡、Star O 同埋指南針導向，
加深佢地既記憶。

之後食午飯，
大家落返長亨村商場快餐店。
下午有個 Line O，
有個模擬賽，
最後有檢討，
之後解散。

雖然唔係比賽，
但都好疲倦、好疲倦、好疲倦。

OI 班

今朝返左培正講 OI，
今日既題目係 Dynamic Programming。
開頭打算講七題，
後來發覺一個上午講七題好似太多，
結果打 Notes 個時只預備了四題。
到今朝講既時候，
只係講左一題。

足足一個上午，
Code 得起一題既都唔夠一半人，
點出去同人砌呢？

結果下午開多堂特別堂，
講多一題。
黎既得返四個，
其中兩個已經畢左業。
其他個 d，
已經跟唔上了。

兩點開始，
三點半我就要過圖書館開會。
好彩到夠時間我 Code 得起。

去圖書館開咩會呢？
咪就係 OI Meeting lor。
今年既老師換了培正既馬 Sir，
所以開會地點係培正個圖書館。

見返好多舊老友，
包括 96 年我既隊友 Henry，
99 年既隊友 Unu，
今年返來幫手，讀緊 Cert Ed. 既 YanOnSheung 等等。

一開就開到差不多六點。

---

因為有個特別堂和開會，
結果我帶晒衫都去唔到做 Gym。
開完會之後，
沿上海街行返屋企。
因為天開始黑，
唔少店鋪都已經關門。

幸好，
我都可以找到我想買既野，
一個手動磨豆器，
細既 $ 168，
大既 $ 255，
等我下次買佢返黎，
咁以後沖咖啡就可以直接買豆了。

咖啡

曾經以為咖啡係好傷身體的東西，
一度想完全戒晒。
不過睇完以下報道之後，
睇黎可以繼續飲。
呵呵呵

2005年9月8日蘋果日報
摘文者：樊浚賢（英國註冊營養師）

專家之言：咖啡有益有害富爭議

美國一項最新研究發現，
咖啡內含有的大量抗氧化物，
對預防某些癌症有一定幫助。
過去一直有許多科學家堅持飲咖啡有害健康，
甚至肯定其與心血管病變存有一定關連。
可是，近年有愈來愈多研究對這個推論提出質疑；
皆因過去這些研究當中，
一般飲咖啡的研究對象多數也是吸煙的，
而當扣除吸煙這因素後，
飲咖啡與心臟病有關的現象便不再明顯。

含抗氧化物稱可防癌
咖啡的抗氧化物主要是多酚類（Polyphenols）及阿魏酸（Ferulicacid），
能抗衰老及防止壞膽固醇被氧化。
日本國家癌症中心的一項長期研究更指出，
每天飲一至兩杯咖啡的人，
其肝癌罹患率竟然比不飲的人低一半。
話雖如此，這些存在於咖啡豆中的多酚類，
跟茶葉中的一樣，
經烘製後是會大量流失。
幸好現今科學家已研究出一種可避免多酚類流失的烘製咖啡豆方法，
惟有期望它日後能普及起來。
雖然咖啡因能引致血壓上升，
但對正常人的影響不大。
除此之外，由於咖啡因的利尿作用會增加鈣質從尿液排泄，
所以喜歡飲咖啡的你更要注意自己的鈣質攝取量，
以免對骨質造成負面影響。

影響鈣質攝取量要注意
這項研究同時指出，
要攝取這樣大量的抗氧化物，
便需要像美國人般每天平均飲一點六杯咖啡才可。
其實，只要平日多吃蔬果，
攝取足夠的維他命ACE，
亦能有同樣的抗氧化功效。

動態規劃

星期六的訓練將談及動態規劃（Dynamic Programming, DP），
因為要預備講義的關係，
所以今日比較懶，
用講議來當今天的日記。

所謂動態規劃，
並不是一種算法，
而是一種解決問題的技巧。
它可以明顯地降低一些算法（當然不是全部）的執行時間，
而代價就是使用多些記憶體。

動態規劃其實是以「空間換取時間」，
藉著記下曾運算的結果，
減少重覆運算的次數，
從而增加程式的效率。

一般來說，
要使用 DP，
要符合兩個條件。
1. Optimal sub-structure：
子問題的最佳答案一定是組成原問題最佳答案的原素。
2. Overlapping sub-problems
要有重複計算的子問題。

這兩個條件，
前者確保 DP 找出來的答案的真確性，
後者確保了有用 DP 的需要。

常見的 DP 題目包括：
1.矩陣乘法（Matrix Chain Multiplication, MCM）
2.最長公共子字串（Longest Common Subsequence, LCS）
3.編輯距離（Edit Distance）
4.最長遞增/減子數列（Longest Inc/Dec-reasing Subsequence, LIS/LDS）


矩陣乘法（Matrix Chain Multiplication, MCM）

跟據矩陣的乘法結合律（Associativity of Multiplication），
三個距陣 A(10*100)、B(100*5) 和 C(5*50)，
A(BC) = (AB)C
先算那個乘法，
雖然不影響答案，
卻會影響效率。

前者做的乘數運算為 100 * 5 * 50 + 10 * 100 * 50 = 75000 次，
後者做的乘數運算為 10 * 100 * 5 + 10 * 5 * 50 = 7500次。
可見後者比前者少 10 陪的運算。

現在給你一串的矩陣，
採取那種組合次取可做最少的乘數運算？

假設有 n 個矩陣，
A[i, j] (i <= j) 代表把第 i 個矩陣至第 j 個矩陣相乘後的矩陣。
A[i, j] 可以由 A[i, k] 和 A[k+1, j] (i <= k < j) 相乘而得到，
總共有 j-i 種分拆法。 (k = i, i + 1, ..., j - 1)

假設 R[i] 代表距陣 i 有多少行，
C[j] 代表距陣 i 有多少列，
A[i, k] 和 A[k+1, j] 相乘所需的乘數運算將會是：
R[i] * C[k] * C[j]。

設 O[i, j] 為組成 A[i, j] 所需的最少乘數運算，
O[1, n] 將會是我們要找的答案。

問題是：
如何找出 O[1, n]？

因為 A[i, j] 由 A[i, k] 和 A[k+1, j] 相乘得來，
所以

O[i, j] = 0, if i = j
        = min {O[i, k] + O[k+1, j] + R[i] * C[k] * C[j]} i <= k < j, if i < j

練習：
348 Optimal Array Multiplication Sequence


最長公共子字串（Longest Common Subsequence, LCS）

假設有兩個字串，
A G C T A T A C G A T G A C T
G T C A G T A T A G T C A T A T G
這兩個字串的最長公共部份是：
G C T A T A G A T A T

我們試試這樣排

A G   C     T A T A C G     A T G A C T
  G T C A G T A T A   G T C A T   A   T G

假設輸入的兩個字串為 X 和 Y。
檢查 X 和 Y 兩個字串的第一個字符，
有兩個可能性：
1. 若他們相同，
那最長公共部份必包含此字符，
由字串去取最頭的字符得 X' 和 Y'，
X 和 Y 的最長公共部份長度會是 X' 和 Y' 的最長公共部份長度 + 1；

2. 若不相同，
X 和 Y' 的最長公共部份長度，
或是 X' 和 Y 的最長公共部份長度將會是我們要找的答案。

練習：
10066 The Twin Towers


編輯距離（Edit Distance）

假設有有兩個字串 X 和 Y，
透過刪減字符、增加字符和/或轉換字符，
將 X 變成 Y。

假設 d(X, Y) 為字串 X 和 Y 的最短距離，
我們可得：

d("", "") = 0
d("", s) = d(s, "") = 字串 s 的長度
d(s1 + c1, s2 + c2)
= min{ d(s1, s2) + if (c1 == c2) then 0 else 1,
       d(s1 + c1, s2) + 1,
       d(s1, s2+c2) + 1
     }

首兩條式很明顯，
比較難理解的可能是最尾那條。
在最尾那條式，
兩個字串均不是空字串，
考慮這兩字串最尾的字符 c1 和 c2。
如 c1 = c2，
不需要做任何變化，
所以最短距離 = d(s1, s2)；
如他們不相同，
可以轉換 c1 變成 c2，
最短距離 = d(s1, s2) + 1；
或可以刪除 c1，
最短距離 = d(s1, s2 + c2) + 1；
增加 c2 在第一個字串的尾，
最短距離 = d(s1 + c1, s2) + 1；


練習：
164 String Computer


最長遞增/減子數列（Longest Inc/Dec-reasing Subsequence, LIS/LDS）

在一串數列中，
尋找一條最長上升/下降數列。

設 L[i] 為至數列第 i 個數為止，
最長上升/下降數列長度。
V[i] 為數列第 i 個數的值。
L[i] = max{1, L[j] + 1 if V[i] >/< V[j]}, 1 <= j < i

練習：
10131 Is Bigger Smarter

另外有一個較有效的算法（O(n log k)）。
參考資料
設有一個已排列的陣列 A
A[i] 代表如果有一長度為 i 的 遞增/減子數列時，
最後一個（即係第 i 個）的值。
每輸入一個數，
就用 binary search 尋找他的最後位置是甚麼。

Pseudocode：

A[0] := -1
A[1] := Inf
K := 0
While there are elements left
      Read in the next element X
      Find L such that A[L] <= X < A[L+1]
      A[L+1] := X
      If L+1 > K
         K := K + 1
         A[K+1] := Inf
Output K

練習：
481 What Goes Up

屬會訓練

今晚個 SOC Training，
我負責帶。
首先係一個 2.4Km 既測試，
中位數係 9 分頭，
算唔錯。
唔計兩個 Miss，
好耐冇跑最近先出返黎既曾 Sir，
同埋因為要做 Personal Coach 實習先出黎既東南，
大部份人都可以係十分鐘之內完成。

今次係今期最後一次 2.4Km 測試，
下期希望將合格線再推前，
希望大家都仍然達標啦。

之後做 Circuit Training，
3 * 3，
每轉有六個動作。
做完之後，
大家散晒咁滯。

下期開始，
會由兩個考緊 Level 2 既教練帶返，
咁我呢 d 蝦兵蟹將可以慢慢淡出，
專心做訓練。
（雖則我做教練個時都好似冇乜負出過。）

---

真係好熱，
我講部電腦。
雖則都仲行得走得，
但放隻手埋去係感覺到熱既。
純田為隻牛熱？
定因為冇係 CPU 落散熱膏？
好耐冇吸麈？
D IDE 線、電線冇執好？

嗯嗯，
找日執執佢先。

OT

判刑書出左之後，
唔少人問我打算點？
係 wor，
我想點呢？

嘗試去搵工，
瀏覽 JobsDB，
不過又冇心水。

係我要求高嗎？
係，我要求高。
我想要有咁上下 Pay，
但係又唔想咁多 OT。
工作辛苦、OT 我唔介意，
不過 OT 講緊既係間唔中一日半日。
如果 Offical Office Hour 係到六點，
但晚晚其實都要做到十點既，
代表 d 乜呢？
一係個員工冇盡力，
一係唔夠人手。

可惜既係，
好多老闆以為，
兩個人做十二個鐘，
可以頂得到三個人做八個鐘，
咁洗乜請多一個人呢？
用到 d 員工咁盡，
對公司、員工真的有益嗎？

---

真係激鬼死我，
話說十二月個考試有網上報名，
報左之後三日內要交錢。
點知 Moly 報左冇交錢。
上個星期問佢，
佢話親身去多一次報名。
五號係 Deadline，
咁我中午已經打電話畀佢，
點知佢又唔聽我電話。
頭先上堂問佢，
佢竟然冇報到，
激死我。