The Island

今日又玩運吉團。
原本上牛寮做 Training，
結果因為雷暴取消。
最慘就係一路都話雷暴警告至到八點鐘。
（我地九點開始）
咁七點幾就打電話 d 學員 Confirm。
四個學員，
三個手提，
一個屋企電話。
屋企那個冇人聽，
我亦唔敢響咁耐。
（但結果佢有出現）

一個手提本人聽，
我交代晒 d 野。

一個「你所打既電話暫時未能接通」

一個屋企人聽，
竟然未訓醒，
仲要唔知有 Training！

我八點去到荃灣食緊早餐既時候，
先知雷暴警告延至十點，
結果就要取消。
咁我唯有拿拿聲打電話通知 d 人啦，
結果有一個打唔通，
（即係之前唯一一個打通那個）
其他人就全部黎晒大快活 =_=;;


食完早餐（其實得我同黃 Sir 兩個食），
有部份人返屋企，
而我地五個人就走左去睇 The Island。
去到戲院買飛，
坐既係第二行，
仲要係勁近個隻。
（有 d 戲院第一行同幕有段距離）

基本上係睇唔晒個 Screen 既。
一到動作場面，
對眼係 Focus 唔到，
眼花之餘，
仲要係有少少頭暈。
套戲仲要幾長，
有成兩個鐘多 d，
辛苦情況可想而知。

睇完戲，
陪阿棟去中興買跑鞋。
之後我要趕下場，
就坐地鐵返屋企先。

漫畫節

又到短週，
今朝落大雨，
但都出左銀行打簿，
為既就係遲 d 申請信用卡。

中午食完飯，
就過左會展。
原本係因為有 d friend 扮星戰人物，
過去影吓相既。
不過早去到，
咪入場睇吓先 lor。
（影 Cosplay 係唔駛買飛入場既）


不過入場直頭係拿苦黎辛。
勁多人勁迫，
行都行唔到乜滯。
本來都有 d 野想買，
但係行都行唔到入去。
有冇帶梯 wor，
唔可以企高黎影。
結果今日係第二次我影完相係想全部 Delete 唔要既。

今日帶左支 14-45 同 50-200mm 鏡頭。
大部份時間都係用 14-45，
只有影台上先有機會用 50-200。
不過我都係影左一次台上，
所以支重重既 Tele 鏡可以話係白拎。

至於個相機袋，
今次係 Mix & Match。
用平時用開那個大 d 既哥倫比亞背囊，
內裡放了相機袋個膽做保護。
不過個膽有少少軟，
有時係背囊內會變左形。
遲 d 可能試吓唔好一舊個放相機同鏡，
而試下機有細袋裝，
鏡頭有鏡頭袋裝，
然後一個個袋放入背囊，
唔知會唔會好 d。
又或者用 d 紙皮固定個膽試下。

講返 Starwars，
真係激死。
原本場館舞台三點九有 Game Girl 選舉影，
我都補左個好位。
不過佢地話四點半出面 Starwars 開始，
咁我拿拿聲離開會場。
點知佢地五點幾先到……

汗流挾背

今晚放工後去左青衣打籃球，
一個冇空調既室內場。
個球場係長發村，
其實好近青衣城，
之但係因為一黎落雨，
二黎全部人都唔識行去，
結果就坐的士喇。

一上車轉完第一個彎，
司機就指住前面話：
「呢度咪係 lor」
但係因為唔可以右轉，
所以要繞少少路，
不過都係冇跳錶。

不過最攪笑個司機話，
其實好近，
行去都得架，
不過講出黎又話驚被人告拒載……


講返個籃球場，
冇空轉既室內場，
係仲慘過打街場。
打街場都話有 d 風，
室內場係冇風既，
結果就好似焗桑拿咁，
勁熱。

好彩個更衣室都叫見得下人，
有冷熱水沖涼，
又清潔企理，
好過打開個街場多多聲。


沖涼有四格，
最攪笑係有人入左最尾個格之後，
先大叫冇得鎖。
之後說：
「呢格冇水既，
扭極個制都冇水出。」

而事實係，
轉自係調較冷熱，
個水制係按落去先有水出既……

又中伏

呢排食緊中藥，
但呢 d 中藥唔係以前三碗水煲成兩碗水個隻，
而係已經磨成粉，
用開水沖個隻。

咁一日一包粉分兩次食，
好多時我都帶埋返公司食。
昨日食完頭半，
放返落背囊。
夜晚返到屋企拿返出黎食既時候，
咦！
點解咁細包架？
唔通朝早開多左？

沖完涼，
始終覺得唔多正常。
打開個背囊伸隻手入去，
敝，成手粉。
拿拿聲拿晒 d 野出黎，
跟住成袋啦。
但係拿 d 隻出黎既時候又唔記得抹抹先，
結果攪到書枱都係。
攪呀抹呀，
整左粒幾鐘先叫做 OK。

d 粉細粒，
有時摸都摸唔到，
唯有靠個鼻黎聞，
聞到有味就再抹下。

今朝坐車返工，
上到車都仍然聞到個股味。
朝計衫褲係第二套，
袋又係第二個，
冇理由有味架。
原來係對 Headphone，
真係頭都大埋，
點清潔呢？

---

大同今次個飯聚，
看來不再是雷聲大，雨點小。
不過睇報名名單，
唔計我有成八個，
仲有 Dada、雯雯、Lapson 同輝輝味報名，
但係我 d 手信得返八份，
其中一個已經畀左，
餘下 11 個人，
點分八份呢？

唔通其中三個要畀 Lego？

祖國牌

媽媽今日返大陸玩，
我搭單睇下買唔買到個相機袋。
結果相機袋就買唔到，
買左部 MP3 機，
同 D 衫褲落黎。
最攪笑係，
Auntie 話上面冇相機袋賣架？
佢地都係落返香港買。
唔係掛，
我想買那個牌子係袓國架 wor……

講返部 MP3 機，
祖國牌，
但係外殼寫住 sony。
不足的地方係只係得 128mb，
入得 24 首歌（192 kbps）
個 radio 又有少少虧。

至於 d 褲褲，
又係冒牌。
我唔介意著祖國牌，
但就介意著冒牌，
尤其是串錯字既。

---

PCCW 個網都唔知點做野既，
我睇晒成個網，
都唔知打去美國一分鐘幾錢。
價目表話要 Fax 黎，
咁我冇 Fax 機點算？
Upload 埋上網都唔駛花好多功夫呀？
麻煩。

---

今晚跑步，
三十分鐘自由跑。
第一個圈輕鬆咁跑，
冇刻意追時間，
結果用左十分鐘。
第二個圈慢左四十秒，
第三個圈仲衰，
跑唔到咁。
結果三個圈加埋用左三十四分鐘，
比目標慢左兩分鐘。

置業

「休閒」了幾日，
總算想通了些東西。
雖則現在較自由，
但繼續「休閒」都不是辦法。
就算未爆鑊，
都應該盡力唔畀隻鑊爆。
應該集中精神作戰，
盡快了解件事。

---

夜晚同家姐、媽媽同一佔 Auntie 去食晚餐，
原本話食自助餐，
不過訂唔到位，
結果去左元氣食壽司，
三日內食第二次了。
因為有人唔食得生冷野，
自自然然會落入找我口中……

家姐叫左個溫泉蛋，
話用特別方法整，
拿上手係凍冰冰既。
一般半生熟蛋，
會係白熟黃唔熟，
温泉蛋剛剛相反，
黃熟白唔熟，
好得意，
攪到我好想去日本旅行。

一行四人（五人？）食左 $484
結帳既時候，
Waiter 黎數野，
我地極速將所有碟分好排好，
幾勁呀！

食野就梗係會談天啦，
其中一個話題就係媽媽想買手機，
我介紹左幾隻，
摩托羅拉 e680i，Sony Ericsson k750i 等，
媽竟然話買多部畀我，
真幸福。

講咁耐都未入正題，
到喇。
另一個話題係置業，
早幾日經過廣東道，
上左去睇樓八卦下。
媽媽今日又講起，
咁家姐就，
要買就買第一城啦。
第一城係指沙田第一城，
睇過報紙，
二手大約二百萬，
第一筆預三四十萬左右啦。
不過佢一講第一城，
我就想到好多攪笑野。

另一個 Suggestion，
就係叫我申請公屋、居屋。
不過我入息好似超左限額好多喇 wor。

家姐又叫我買藍籌，
例如匯豐，
話得閒買一手，
得閒買一手。
不過匯豐一手講緊既係五萬幾蚊，
邊有錢呀？

ARPG

最近買左個 ARPG，
叫天地之門（天地の門）。
ARPG 者，
Action Role Play Game 是也。
Role Play 即角色扮演，
觀其名而知其義，
即扮演一個角色去進行遊戲。
其實任何遊戲都是扮演，
例如踢足球的遊戲是扮演一個足球員，
空戰遊戲是扮演一個機師等。
那 RPG 又有甚麼特別呢？
RPG 中的扮演範圍會廣範得多，
而且你要完完全全代入去角色之中。
例如中學會考英文口試那個 Role Play，
你要代入角色，
才會懂得應該甚麼問題，
這點是其他遊戲不需要的。
代入也正正是 RPG 的精髓，
也正正是 RPG 好玩的地方。

出名的紙上 RPG，
有龍與地下城（D&D, Dungeons & Dragons），
靠主持（DM, Dungeon Master）口述故事內容，
靠想像去幻想畫面出來。

RPG 入了電子世界便多姿多采了，
但為電腦可以將華麗的畫面直接展現出來。
這類的 RPG 在戰鬥時會進入另一個畫面，
有一系列的指令讓你選擇，
例如攻擊、魔法、道具等。
可以是回合制的戰鬥，
也可以是近乎即時的。

至於 ARPG 的戰鬥便是另一回事了，
係戰鬥時會變為一個 Action Game 的形式，
控制著主角拿起武器戰鬥。

但在邏輯上，
有很多不合理的地方。
例如有無限的敵人，
殺了敵人後會得經驗值，
一定經驗值會昇等級，
加 HP（Hit Point）。
揮劍揮得多，
最多便是提高準成度，
提高威力等，
為何以提高耐打度？
怪哉怪哉。

最有趣的是，
入了城後，
除了在道具店購物外，
還可打破木箱、缸等拿取物品！
現實生活中，
你可否隨街打破木箱拿物品？
走進飯店打破缸拿物品？

不過這是遊戲，
又何需深究？
正如漫畫也有很多不會理的地方。
順手推介一本書：
「空想科學大作戰」
值得一看。

中伏

今朝又唔知醒，
唉……

之後同媽媽去左元氣食 susi，
唔係食左好多，
冇乜野想食。

再之後上左力王家，
首先係打機，
到人齊就開始打牌。
Total 五個人，
四個可以打錢，
一個唔打。
我梗係讓畀佢地打啦。
裝了杯可樂，
睇 Exam。
睇完 Exam，
將 d Exam 放回原位，
返黎之後，
發覺原本放係琴面杯可樂倒瀉左。
成琴都係，
攪到力王家姐係咁抹，
最慘我完全唔知咩事，
係咁被細牛同 Edmond 「賴」，
甚麼「煩到人又煩到自己」，
「下次唔好喇」……

---

六點左右離開，
返左屋企食飯。
夜晚冇去做 Gym，
睇香港先生選舉。
現場除左參選個幾個係男性之外，
由司儀、嘉賓到現場觀眾都係女性。
有兩個參賽者係咁谷肌肉，
好嘔 lor。

自自然然有肌肉線條，
Ok。
專登谷出黎，
Oh my god！
所以選男選女我都冇乜興趣睇……

---

上個月發生個一個笑話，
不過得我知，
現場其他人都唔知。

話說夜晚去食野，
「不如帶你去 China Town。
個度夜晚治安唔好，
我一個人唔敢去，
現家有兩個人就可以去喇。」

但係我將 China Town 聽左做沙灘，
心想：「沙灘夜晚有咩食呀？
唔係夜 ma ma 走去齋行沙灘唔食野呀？
我好肚餓 wor」

好彩冇講出口，
如果唔係就真係笑死人喇。

破裂

估唔到我同佢既關係，
維持左兩年半都要放棄。
兩年半前，
應該就係我就黎開始上日文課既時候。
那時我們出雙入對，
陪我上日文課，
陪我返工放工，
陪我做 Gym，
陪我去旅行，
陪我出 Trip……


當然，
其間都曾經出過大大少少既問題，
例如因為我唔少心照顧佢，
令到佢受到不必要的傷害。
但我都有設法補救，
亦都有買過 d 名牌畀佢。
奈何……


前日放工如常拿部 MP3 機出黎聽，
開機就已經出 "file check error"，
但仲聽到收音機。

夜晚再開佢又好似冇事喇 wor，
我仲 update 到 d 歌 tim。

昨日返工開機聽，
又出 "file check error"，
但仲聽到收音機。
返到公司再開，
點知連之前 Save 低既 Radio 頻道都冇埋。

睇黎都係時候換過部，
不過其實我部 Pocket PC 自從買左張 1GB Memory Card 之後，
都可以聽到 MP3，
係聽唔到收音機姐，
係咪真係有需要買呢？
而且之前行過，
都冇乜邊款合心水，
都係寫落待買 List，
唔急唔急。
唔知有冇信用卡優惠送 mp3 機做迎新禮品呢？

大殺三方

今晚出左去酒樓食飯。
講開請陪月，
媽媽話唔駛請，
有工人咪得 lor。
我話，
唔係架，
陪月係專業，
點同工人呢……
家姐就好奇怪，
點解細佬會識呢野，
雜誌有講家嘛。

又講係睇樓。
媽昨日唔知行邊度，
被人捉左上去睇示範單位，
二百尺百零萬，
（唔知有冇記錯，尺價四千鬆啦）
最正係冇房冇廳廁所冇門打通晒。
對我黎講簡直係 Dream House 呀！
我最鍾意簡簡單單，
千祈唔好裝修得太複雜。
最攪笑係，
媽話點招呼朋友上黎坐呀，
我答：「我都冇打算招呼朋友上黎坐」

---

臨食完，
細牛打畀我，
問出唔出黎飲野，
一於捨命陪君子啦。
會合阿力，
一齊行落去。

係 Pub 到，
終於解開謎團。
原來通風報信既係頌恩姐姐。
話說年幾兩年前，
Edmund 仲係教院做緊野，
頌恩打電話畀佢問野，
跟住唔知點解會講起我。
照計頌恩唔知我同 Edmund 熟，
Edmund 又唔知我識頌恩。
最攪笑係，
佢驚我唔想人知，
所以唔問返我，
只係同細牛講左。
而謎底解開之後，
佢地話：「咁你日記唔駛用某人啦」
呆晒啦，
我用某人係因為我想唔到用邊個 terms 稱呼佢，
唔通好似金魚同 alex d 日記咁骨痺咩，
用埋晒 D 咩「老婆仔」呀，「豬豬」呀咁，
好嘔姐。


之後興起上我屋企打麻雀。
大勝，
最後埋單，
佢地最少那個都要做 37 下（阿力）
一個 56（細牛）, 一個 63（Edmund）

最衰係佢地做緊既時候我要執返 d 野，
如果唔係實拿部相機影底呢個歷史時刻。

係咪何生呀？

中午收到媽媽個電話，
「喂，係咪何生呀？」
「喂，係咪何生呀？」
「喂，係咪何生呀？」
跟住收左線……

原來媽媽想打畀個經紀，
個經紀又係姓何。

---

夜晚係信和買左隻 Game，
天地之門，
Action RPG，
初試都幾好玩。
係信和地下開左間新機鋪，
竟然有紅白機同灰機賣！
而一樓，
仲開左間訂造西裝！

---

今晚係旺角做 Gym，
主力拉背。
唔知點解好多人，
等好耐。

1. Duak Axis pull down (鍛練背闊肌) 30lbs/12, 50lbs/12, 70lbs/12
2. V-Handle pull down (鍛練背闊肌) 70lbs/9, 70lbs/7
3. Dumbell pull over (鍛練背闊肌) 10lbs/10, 20lbs/10, 25lbs/10, 30lbs/9,
4. Under grip cable row (鍛練背闊肌) 55,45,35,25,20lbs/7 (Drop Set), 60,50,40,30,20lbs/7 (Drop Set)
5. One arm dumbell row (鍛練中背) 20lbs/7, 20lbs/7
6. Close grip upright row (鍛練上背) 20lbs/9, 30lbs/10, 30lbs/9
7. Dumbbell shrugs (鍛練上背) 20lbs/10, 25lbs/10, 30,25,20,15,12,10lbs/7 (Drop Set)
8. Hyperextension (鍛練下背) +10lbs/10, +10lbs/12
9 Triceps Press (鍛練三頭肌) 40lbs/10, 45lbs/10, 50lbs/8

做完 Gym，
返 Changing Room 換衫。
一開 Locker，
咦？
d 野唔係我既？
原來我開錯左隔離那個。
同一個牌子既鎖，
雖然 Size 唔同，
但竟然 Share 同一樣既鎖匙，
真係危險。

間竭跑

今晚練跑，
跑 X 特訓。
原本要求係跑到 300 步快就要開始減返，
結果我逞強上試 305 步快，
結果比原定限時用多左 10 分鐘。
四十分鐘既隔間竭跑，
成效有幾多呢？


之後係個地圖記憶練習。
練習既重點係學如何記低條路線，
應該睇 d 咩特徵。
但係好多人只係記條街名就算，
失卻了練習的意義。

---

開始超支了，
一個月的薪金已經用畢。
但今日仍然添至了一些裝備，
一對定向襪，
一對護脛。

---

原本天氣晴朗，
仲有 d 熱 tim。
點知夜晚氣溫下降，
食完晚飯。
打起雷來，
先是旱雷。
仲要係打得好近，
好似係係你面前打 tim。
之後下起大雨來。
雷暴警告、黃雨警告、酷熱天氣警告同時生效，
感覺有 d 怪呢！
幸好我有帶傘，
如果唔係實變落湯雞。

---

返到屋企，
多左四隻囡囡。
家姐日本買返黎既 Pinky 喔，
呵呵呵

背

今日放工又去學做 Gym，
今次係學拉背。
兩個鐘既課程，
都幾多動作要記。

1. Wide Grip Lat Pull Down
2. V-Handle Pull Down or Chin
3. Dumbbell Pull Over
4. Under Grip Bentover Row
5. Under Grip Cable Row
6. One Arm Dumbbell Row
7. Bentover Bent Arm Lateral Raises
8. Close Grip Upright Row
9. Dumbbell or Barbell Shrugs
10. Deadlift


上列既只係清單上有寫既動作，
仲有 d 清單上冇寫既都有講。
十幾個動作記入腦，
有 d 又似 wor，
真係仲慘過考試。

---

拿左 d 野返屋企做，
就係幫公司 d Product 影相喇。
不過屋企隨左部相機之外，
咩設備都冇。
冇 Background 啦（我用 A4 白紙咋）、
冇燈箱啦、
冇 Macro 鏡啦。
攪左一大輪，
影左十幾張。
結果冇心機攪，
選左兩張 Send 畀佢。
不過都過唔到自己個關。

---

今日又同個 Electronic Engineer 嘈，
事綠佢畀個 Peak Value, Bottom Value 同 Duty Cycle 我，
叫我計返個 Average Power 出黎。
但呢 d Value 全部 in Log Scale，
即係冇得計……

我話我唔識計，
叫佢畀條 Formula 我。
（由 Day 1 我已經 Request 呢樣野）
結果佢梗係畀唔到我啦，
叫我自己寫。
我只知 Garbage In Garbage Out，
Mission Impossible。

---

人地又開始忙了，
我又可以收聲。

消失的一小時

勁慘，
打篇日記打到餘下幾個字，
個 Software 炒左，
要打過。

---

今日放工約左 Alex 做 Gym，
不過佢要八點先出到黎，
我見「好似」有時間，
就睇返場戲先。

點解「好似」有時間呢？
套戲長一百零六分鐘，
七點二十分開場，
我竟然計錯左，
以為睇完會係八點十分。
結果當然睇完已經九點，
拿拿聲係大家樂食個晚餐，
就去做 Gym 喇。
旺角食 Dinna 仲便宜過觀塘食 Lunch，
係旺角物價便宜，
定觀塘物價貴呢？


講返套戲，
Fantasic Four，
大路英雄戲一套。
都係邪不能勝正，
有晒伏線拍續隻個隻。
唔算特別好睇。
仲有唔知點解，
有幾個 Close Up Shot，
畫面好多 Noise，
見到晒一粒粒。
我唔知係有心，
定係冇意喇。

做完 Gym，
本來想請 Alex 飲野賠罪，
不過佢有野做。
哈哈哈，
省回一筆。
今個月已經超支，
省得一筆得一筆。

---

戲院 -> 街 -> 大家樂 -> Gym -> 街 -> 屋企
時冷時熱。
一時係雪櫃，
一時係火鑪。
天文台話，
赤臘角最高有成攝氏三十七度幾。

---

今日做 Gym，
主要做膊同腳。

1. Overhead Shoulder Press
2. Incline one arm dumbbell lateral raises
3. Wide grip dumbbell/barbell upright row
4. Plate Loaded Squat Press
5. Leg Extension
6. Adduction
7. Calf Press

新翼

今朝返左崇拜。
斜路封左好耐，
平時係斜路旁新樓既樓梯上，
今日連個邊都唔行得，
結果再繞遠 d，
係新翼（即係以前沙地）上。
其實到現在我都唔知新翼係做乜，
當然新翼呢個名係我坐啦。
得三層，
地下一樓、地下二樓同地下三樓。

地下三樓連住操場，
地下一樓冇上過去，
地下二樓一出就係 G 座圖書館旁樓梯落那處。
沒有牆，得幾條柱，
完全唔知起黎做乜。

講返大門口，
由入大門口個刻開始，
每廿零三十步就有人同你講早晨，
攪到我都有 d 唔好意思。
今日係青少年事工主日，
所以都有好多青少年返。

崇拜既 Style 亦更年青化，
非常之唔慣。

崇拜之後有愛筵，
不過我份人極之怕同人交談，
所以都係唔參與。

明天係袁先生生日，
完左崇拜之後，
打畀佢打算找佢食飯啦，
點知冇人聽。
結果返左屋企。

睇完女排（中國對巴西），
同超級工商杯（香港對美國加州亞美體育會之後），
睡了個午睡。

原本 Plan 左執相同做 Gym，
結果兩樣都冇做……

---

夜晚睇電視，
睇到迪士尼個廣告好攪笑。
好多迪士尼人物駕車去香港迪士尼，
不過全部都係左軚車……

Diploma 到手

今日又係運吉旅行團。
朝早食完早餐，
十一點出門口，
要係十二點前趕返 UST。
落到樓唔記得帶電話，
又行返轉頭拿。
結果十一點二十分出到佐敦地鐵，
十一點四十分去到彩虹，
小巴十一點四十五分開車，
十一點五十五分到 UST 大閘，
十一點五十九分到 The Admissions, Registration and Records Office。

咁趕入 UST 做乜呢？
咪就係拿我個張 Diploma 同 Transcript lor。
拿完之後，
佢係我個張冇 Expired Date 既學生證上釘左個孔。

講返成績，
好似以前都講過，
不過不失啦，
Sem 2 炒左科吹水科，
得個 B+，
拉低晒個 Average。

離開 UST，
我可以去睇場戲，
又或者落又一城。
結果我選後者。
睇 Forum，
有人話見到 Log-on 有個袋，
幾 Fit 部 PSP。
落到佢睇，
我嫌佢唔個 Protection。
（話晒佢原本只係一個 Pen Case）

之後返一返屋企，
又再出去石硤尾踢波。
今日同 PSP 班人踢，
一來我少踢，
二來又冇乜點夾，
結果被人大炒……

有少少後悔去了踢波，
而冇去四虎聚。

攪笑來電

呢半個月收到 d 好攪笑既電話。
講英文既，
講得快我梗係唔知佢講乜啦。
最奇怪係佢講得出我英文名，
又係打去我公司 wor。
佢話佢係唔知乜乜 Consultant，
跟住又話唔知乜乜 Ney York。
仲話 Send d information 畀我，
我畀左個 E-Mail Address 佢，
不過佢 Send 左三次，
我三次都收唔到。

昨日又收到佢電話，
我叫佢唔好再打黎。
佢問係咪聽唔明佢講咩，
之後佢講咩我都係回應：「Yeah」
最後佢叫我去 English 101 Improve 下 d 英文。
最後個句，
仲聽到佢少少人為 Fade Out 既效果，
笑死我。

---

同事又改左個 Circuit，
問我係咪會試。
我話係，
之後問我點試。
我叫佢畀條 Formula 我，
佢話冇 Formula。
之後我問係咪唔駛計數，
讀到乜 Output d 乜，
佢又話唔係。
即係要計啦，
大佬你成鬼日改個 Input，
咁你都話我知點計個 Output 丫，
當我神仙咩。

---

之前 E-Banking 唔見左個 Password，
今日終於係分行拿了個新既。
Yeah

跳樓機

今日既日記，
首先 Qutote 單新聞。

美國佛羅里達州迪士尼世界的「靈異世界：恐怖高塔」（TheTwilightZoneTowerofTerror），
是一部跳樓升降機，
一名英國少女周二搭完跳樓升降機後，
心臟一度停跳，
送院後危殆。
香港迪士尼發言人證實，
本港迪士尼沒有類似的跳樓機機動遊戲。

呢個遊戲，
十九日之前我都玩過。
仲要係被人逼上去既。
話驚，
都真係幾驚。
但係咪完全玩唔到呢？
又唔係 wor。

不過 d 咁刺擊既野，
都係少玩為妙。
雖則幾年前 Check 心臟話乜事都冇，
不過冇啦啦畀醫生叫去 Check，
實有 d 野既，
Check 唔到姐。

不過，
其實我擔心最多既，
並不是自己的心臟。

---

夜晚去左摩士打波，
順手派下手信。
結果派左一隻龍蝦同七件 Lego。

---

上午收到老闆電話，
話有個新 Project，
下午開會傾傾。
結果等到七點，
收到佢內線 Call，
話個 Project 唔駛做。

---

開始想病，
今日全日都好口乾。
平均一個鐘去茶水間三次，
每次飲三杯水，
仲密過真係病個時食藥。

星期三練跑

今晚放工出左 SOC 練跑，
連 Michael 到黎埋跑，
愈黎愈多人。
不過因為今日全國賽隊要開會，
所以劉 Sir 同阿健都冇落黎跑。
頭盤係三十分鐘自由跑，
第一個圈因為要帶班新人熟習個圈，
所以跑得好慢，
係近乎 Jog 個隻，
都只係十二分半一個圈。
考試要四十分鐘三個圈，
其實真係唔係好難。
第二個圈用返自己速度，
十分十秒跑完，
第三個圈慢返少少，
跑到四份三時已經三十分鐘，
唯有 Short Cut 返上去。

不過有 d 好盡責跑足三個圈，
但係成三十四、三十五分鐘返黎。
我覺得咁樣訓練唔好。
話明三十分鐘自由跑，
就應該 Target 返可以係三十分鐘連續跑既速度，
目標係跑三個圈（5.4 km），
速度控制又會唔到，
兩種唔同訓練黎既。

之後有個 Star-O，
我 Shadow 其中一個學員，
仲有待磨練。
佢犯左一般人想犯既錯，
就係冇計劃。
除此之外，
路口冇做三個 S（Stop、Set Map、Select），
冇做搜集特徵。
所以中途幾次唔知自己去左邊。
四個 Loop 跟左佢三個，
之後因為時間夠，
所以唔可以繼續。
我收 Point，
收兩個 Loop 時間係七分幾，
有 d 慢。

夜晚食完飯夾錢個陣，
因為心急搶錢找續，
結果倒瀉水，
d 錢濕晒，
真輪盡。

電腦唔聽話

呢排 d 電腦唔知發乜神經。
一部就唔知中左毒定中左 Spyware，
用 ie 睇網頁既時候
有 d link 會被改左做第二廣告網，
去 yahoo 同 google 又會開個新 browser 去個 d 廣告網。
adaware 又用過，
anti-virus software 又用過，
都係解決唔到問題。

呢部都叫大約知咩事，
另一部仲衰。
有時開機上唔到網。
去「網路及換號連線」睇，
一個連線都唔見！
但係 Reboot 一次之後呢，
又出返晒黎 wor。
都唔知係咩問題。
有時部機個 Loading 去到 100%，
開「開始」->「程式集」都慢過龜咁。
究竟係時候升級 Hardware 丫，
個 Windows 夠鐘 Reinstall 丫，
定係個 Harddisk 就死呢？
百思不得其解。

---

今晚放左工去學 Free Weight，
今堂既主菜係膊，
仲要 Main Focus 係前膊。
學左五個動作，
1. Dumbbell/Barbell shoulder press
2. Incline one arm dumbbell lateral raises
3. Incline one arm dumbbell upright row
4. Wide grip dumbbell/barbell upright row
5. Dumbbell lateral raises

雖然做得好輕，
人地輕鬆做 20 磅，
我做 10 磅已經想死。
但係做完好滿足，
呵呵呵

態度問題

今日又激死左，
可能你地會覺得係雞毛蒜皮既事。
但對我黎講，
呢個係原則既問題，
態度既問題。

媽媽好多時唔問過我就拿我 d 野黎用，
有借有還，
Fine，
我當唔知。

但好多時係有去冇回。
咁你都同我講聲丫，
我唔問就當冇件事。
最激氣係道歉都冇句，
有專家話，
父母對子女最難講既就係「對唔住」 ，
唔道欺都語氣好 d 丫。
最叻就答：
「唔用都用左 lor，點丫？」
「都冇左 lor，點丫？」
「你都冇用架啦。」
「唔關我事，阿邊個邊個丟左之嘛。」

講到自己一 d 錯都冇。

講左咁耐，
其實今次又係一件咩呢。
一個 1.5L 既膠樽而已。
都係個句，
唔關件物品既價值事，
而係態度問題。

---

唔知係耐冇 login，
定係改左新 password 唔記得。
今日打算 Login E-Banking 找卡數，
竟然 Login 唔到，
試多幾次，
連個 Account 都 Lock 埋。
打去卡 Center，
叫佢補返個 Password 畀我，
要星期四、五先有。
但呢兩日要找卡數，
即係話要用古老方法：
係 Bank A 個 Saving 拿錢，
再拿去對面街 Bank B 交錢。

一如以往，
收線之後，
我就會記得返個 Password 係乜。
不過有得試。

---

公司個 Program 攪左好耐，
以為自己個 Program 出問題。
結果發現係 GIGO（Garbage In, Garbage Out），
唔關我事。

定向工作坊 - 路線設計

一文兩用，
今日日記部份內容會當 E-mail 寄返畀 Course Leader。

每年十月到翌年五月，
係定向賽季。
唔係要比賽，
就要教班，
好少可以返到崇拜。
但一到六月賽季完左，
我又可以返得密 d。

但今年到七月，
我都返得好疏。
今年賽季去到好後，
五月尾先係最後一場色級賽。
（以往四、五月很少比賽）
除了六月第一個星期返到崇拜外，
我一個星期日上堂，
兩個星期日唔係香港，
返到黎個星期日比賽，
今個星期日又要上堂。

六月尾返到香港時，
收到教會張生日卡，
大部份字句都係問仲乜咁耐都唔返……

講返今日個班：
定向工作坊 - 路線設計。
兩個導師，
九個學員。
Lecture 係青衣長康村，
一個唔算係差既地點。
下午實習係青衣山，
我覺得地點好有問題。
第一就係攀高，
一條定向 course 既攀高，
不應該多於路線長度既 6%。
但係青衣，
係好難 Set 到既。
更何況係初學 Set Course，
而條功課 Course 既對象係剛上完 Level 1 既初學者？

關於課程內容，
曾經提到，
控制點係 Leg 既起點同終點，
但係就沒有是到，
究竟係先定控制點，
再連埋佢。
定係先定條 Leg，
再 Mark 控制點。

其次關於時間控排，
四個半鐘，
要放兩條 Courses，
跑四條 Courses，
似乎係好艱難。
建議下次只分兩組會好 d。

另外選址，
其實定左起點、終點和 Star O 既大約位置先叫學員 Set Course 會好做 d。
因為如果一組起點係亭，
一組係半空礦地，
一組係青欣山山頂，
咁要一組試其他組既 Course 就會好困難。

遲大到

今朝死喇。
話說我訓覺會開住收音機，
一醒就聽到商台謝西嘉個節目。
佢個節目係九點先開始，
亦即係我已經遲到。
望一望個錶，
仲敝，
已經十點三。
拿拿臨傘都唔拿就出門口，
望望銀包，
得果九十蚊。
記得好似六十蚊就得，
不過都係唔放心，
冒雨跑出吳松街間銀行拿錢，
之後飛的返公司。
十點五十分返到公司，
老闆已經返到，
仲打緊內線畀我同事，
問有冇見過我，
會唔會攪錯長短週。
個電話都未講完，
就見到我返黎喇。

但係奇就奇在，
佢又冇捉我入房照肺，
又冇出 Warning Letter。
Anyway，
今日我點半左右肚餓得濟走左，
欠佢個兩粒鐘，
慢慢還啦。

---

黃昏去睇中醫時，
碰到細牛。
佢都去完美國返黎，
24 號出發，
玩左兩個星期有多，
我都好想玩咁耐。

日文高三班成績

今日放工落左日經，
Join 埋 Moly 上去拿卷同報下期。
WaKaKa，我鍾於送左第一份手信畀 Friend，
本來仲可以送多個，
呢單一陣再講。

落左卷，
89 分，
第二次高過 Moly。
錯既七八成係大意錯。
例如見到「昨日」但唔記得轉過去式，
答原因但唔記得用「因為」等等。
成績，
叫過得去啦，
不過都仲係擔心年尾考能力試會唔及格。
（舊年及格率係 50%）

之後返左屋企食飯，
食完之後出左旺角行，
之後去做 Gym。
一如所料，
最後 Alex 都係冇黎。
但係我都有帶份手信，
萬一佢真係出現，
都有得畀佢。

其實佢都有打過黎，
不過我做緊 Gym，
電話放左係 Locker。
有 d 人好鍾意一路做 Gym，
一路講電話，
我就唔得喇。

---

今日主要係拉背：

1. MTS High Row
2. MTS Row
3. Lat Pulldown
4. Underhand Seated Cable Row
5. Triceps Pushdown - Rope Attachment (三頭肌)
6. Hyperextensions (下背)

籃聚

夜晚去左打籃球，
又係通州街，
今個月第三次。

照舊約左七點半，
照舊有人遲到。

七點左右收到 Alex 電話，
又話聽日去做 Gym 喇 wor。
前日話去，
昨日話唔去，
今日又話去，
都唔知佢想點。
Anyway，
佢去唔去都好，
我都係去架喇。
聽日同 Moly 上完日經，
返屋企食完飯，
行一行先達，
之後就會去做 Gym。

今日打波好多人呀，
有成差不多十五人，
有男有女。
我呢 d 唔識打既，
梗係唔會同班競賽組打啦。
係另外一邊賽打，
有球衝搶籃板，
一野踩落人地隻腳到，
真係好唔好意思。

十一點打完波，
過返黃金個邊吹水食糖水，
十二點九先走，
返到至企都點幾了。

返到去，
冇左 d 狗吠聲，
因為隻狗狗已經畀左人養。
布丁黎左我屋企半年都唔夠，
咁快就要走……

2.4 測試

今個星期做了好多運動，
星期日跑城市定向比賽，
星期二打籃球，
星期三練跑。

黎緊星期四又打籃球，
星期五做 Gym，
星期六跑山。

一個星期七日，
其中六日做運動，
真係健康。

講返今晚先，
班同事去唱 K，
都有找埋我。
但一黎我唔係好鍾意唱 K，
二黎又要練跑，
所以結果都係婉拒左佢地。

七點鐘出到佐敦，
換完衫就落去。

今日係新既一期訓練計劃，
除了幾個返開既之外，
今期都有幾個新面孔。
四位新血，
其中三個唔係好跑得。

今期開始執正黎做，
要有一定出席率，
交足功課（訓練訓劃和紀綠），
考試及格（測試達標），
下一期先會再收。

今一係其中一項測試，
總共有兩項，
2.4km 和 5.4km，
每月都有一次，
總共三次機會。
今日係做 2.4km，
目標時間係 11分鐘，
及格時間係 14分鐘。

跑兩圈半，
第一個圈我故意墮後，
怕 d 新人唔記得個圈已跑錯，
結果真係有兩個唔記得轉彎。
我前後總共有四個人，
兩新兩舊，
速度就，
基本上比行係快少少既。

慢跑完第一個圈，
我用回正常速度跑。
結果以 12 分半完成。
十個人跑，
只五個達標，
睇黎仲要好好訓練。

之後係一個短途定向，
0.6km，
用左 5 分 17 秒，
有點兒慢，
狀態未達比賽水平。
而 d 新人既時間，
Well，都係唔好講喇。

翻版

道高一尺，
魔高一丈。
PSP 被破解係遲早既事，
近日已經有所謂 Loader，
可以 Load 到 PSP 既 Game。

其實 d Game 又唔係貴，
點解 d 人寧願玩翻版都唔玩正版呢？

當佢正版 $300 隻，
翻版 $30 隻。
用買一隻正版既錢，
可以買到 10 隻翻版，
好似好抵咁。
但係，
你又會用幾多時間去玩呢？

如果係正版，
你會比較有心機去煲。
但係如果係翻版，
好快就放埋一二邊。

同係付出 $300，
結果都係玩個一隻遊戲，
點解唔買質素有保障既正版呢？

所以我部 PSP，
暫時都冇打算過讓佢接觸翻版。

感情上亦都類似，
昨日有人問我點睇一夫多妻制，
我用上面個段答佢。

---

星期日跑比賽，
今晚又打籃球。
散晒……

---

估唔到英年早逝，
被人激死左。

牛角尖

件新產品，
本來應該一早出左。
上年十二月尾已經出左 Version 1，
後來將 7-Segment LED Display 轉做 LCD，
結果 delay 左三個月。

到四月，
收到 LCD 個 Sample，
我亦係同一個月改埋個 Program。
結果到左七月都未出到街。
咩原因呢？
咪就係個 Electronic Engineer 轉晒牛角尖 lor。

話過 circuit performance 唔夠完美，
係咁改改改，
個 Filter 有 Order 1 改到 Order 4，
都仲未滿意。
每我返到工問親佢，
個 Circuit 總係 update 左。

已經有少少走火入魔。
出遲半年，
就賺少半年錢，
而個問題係，
畀多半年你，
結果件 Product 又係賣咁多錢。
最重要既係，
老闆一早已經話冇問題，
仲改黎做乜？

---

放工走左去睇戲，
龍咁威 2。
幾好笑，
不過睇睇吓戲又有人有電話響。
對話仲好攪笑 tim，
第一句就話，
「我唔同你講住，睇緊戲，一陣打返畀你」
結果個電話講左五分鐘……

---

返左香港成個幾星期，
隨左公司盒餅，
一份手信都未派過。
手腳真係慢，
仲慢過執相。

城市綠定向

今朝又要比賽，
不過唔駛上山，
而係係市區玩既「城市綠定向」。

公開組一隊四個人，
我個隊亦然係個四個，
劉 Sir、阿健、阿高和我。
今次既對手比無國界定向更強，
其中包括有宿敵消防隊，
同埋其他定向人。

賽區包括四個地區：
觀塘、油尖旺、灣仔和中西區。

約了八點鐘係太子等，
然後一齊食早餐。
結果得我同劉 Sir 準時，
其他兩個都遲到。

去到起點，
先抽籤，
我地抽了支好籤，
第一區先去觀塘。

十點二十分，
幾乎係最後一隊出發。
一齊出發既，
仲有群仔個隊，
同埋二佬個隊。

一嗚笛，
我地由花墟跑出巴市站，
等了數分鐘，
已經由紅色小巴了。
十五分鐘就落到牛頭角，
跑去第一個 Check Point。
離開時見到有兩隊剛到，
即係話我地已經超越兩隊。
去到馬碲徑，
我將個大背囊交畀迪哥，
只係背返個水袋，
繼續去第二個 Check Point，
不過入錯門口，
咁又浪費了點時間。

去完第三個 Check Point，
打算係裕民坊坐 641 落灣仔，
點知假期唔開，
另一架巴士又剛剛走左，
坐地鐵去銅鑼灣，
一路跑落灣仔，
沿途去了三個 Check Points。
係灣仔坐巴市落西港城，
可惜遇正法輪功遊行，
警察係中環封路畀佢地過馬路。

落到上環，
又跑左三個 Check Points，
之後跑中環坐地鐵去尖沙咀。
跑去尖東，
再由尖東經佐敦跑落油麻地，
沿途去埋最尾五個 Check Points。
係油麻地坐地鐵返太子，
係太子跑返花墟。
尾段隻腳抽晒筋，
好不容易終於捱返終點。

賽會開頭話限時三個半鐘頭，
係冇可能去晒咁多個 Points 既，
結果我地只係用了兩個鐘頭四十一分鐘，
已經拿了滿分。
已拿到滿分既，
除了我地，
仲起碼有十隊。

最後成績公佈，
以兩分鐘險勝消防得冠軍。
計埋無國界，
消防輸左畀我地四次，
屈居左四次亞軍。


頒完獎，
食完午餐。
我又落返觀塘同迪哥踢波，
順手拿返個背囊。

一週年聚餐

今朝早上，
終於開始執相。
不過執得好慢。
執左一朝，
只係執左十五張相。
仲逗留係旅程的第二日早上，
攝於哈佛校園的相。

中午和媽媽去了飲茶，
飲茶之前，
先去買咖啡粉。
$36.6 的200g Mocha，
唔知好唔好飲呢？

飲成兩個幾三個鐘茶，
之後我落了旺角行街。
係家樂商場附近好塞人，
有班男人係咁影相，
原來有幾個著得好少布既 Model，
事後睇返報紙，
其中一個原來係王從希。
佢係邊個呢？
唔識。

沿菜街北行，
有幾堆 Model，
自然有幾堆人係度影相。
有用 DSLR 既，
有用 DC 仔既，
更有用手提電話影既。

係旺電幫我部 PSP 貼了張保護貼之後，
又要即刻趕返屋企。
換衫出席奧林派一週年聚餐。

係尖咀文化中心附近食泰式自助餐，
同上次係 Boston 食既差天共地。
呢度既食物款式，
只係有 Boston 既五份之一。
基本上出去三、四轉，
已經試晒所有野。

不過人頭費只係 $130，
總沒有可能要求好多，
不過都係好失望。

其中有個網友去完西藏旅行，
影左三千幾張相。
同我咁上下日子返到香港，
d 相已經沖晒好，
我真係慚愧。

七一

又到七一，
每年七一，
民陣總會攪遊行。
今年適逢特首換了人，
而且又沒有迫切議題，
人少了是可預料的。

前年七一，
廿三條立法，
五十萬人上街。
我約了一班大學同學，
一起參與其中。
上午踢完波，
下午去遊行。

上年七一，
班大同話唔去。
結果我自己一個去。
上午去完白石橋 Train 定向，
下午去遊行。

今年，
我也沒有去遊行了，
上午去了睇頭文字 D 早場。
下午留係屋企休息休息。

講返套戲，
OK 啦，
不過不失。
百零分鐘既電影，
要講既野有好多，
話晒漫畫都出左三十幾集。
講幾場賽車戲，
講吓減情線。
最美中不足就係拓海首戰唔夠震撼。

睇完戲，
返到屋企，
收到 Edmond 電話。
有得旅行浸溫泉，
真好。