窮人

縱然好想騰飛，
奈何羽翼未長齊，
要展翅高飛又談何容易？

有秘書既好處是，
有咩疑難雜症，
她好快為你找到答案。

好似今日咁，
秘書小姐打電話黎，
好快就幫我計到每月要畀幾多錢，
亦都好快打沉左我。

Anyway，
翻查紀錄，
原來都未必冇可能。
記得初初出黎做野，
每日只係洗 $50 唔夠：
$5.5 一程巴士，
來回 $11，
$30 的午飯。

後來帶飯返工，
連飯錢都省回。
對比現在的我，
我預多三倍的預算，
都可以超晒支。
Well，
或者都可以檢討下。

講返轉頭，
如果真係做返個貧窮人，
洗返貧窮人可以洗既錢，
供樓都唔係話冇可能既事。

今日再計條數，
來回車錢同樣係 $11，
午飯錢行十五分鐘有 $14 單拼，
$16 雙拼飯（加左價，貴左 $2）。
即係 $25 一日，
一個月 $800。
簡直係挑戰人類極限……

出埃及記

今晚去睇左套戲，
出埃及記。
片名有宗教色彩，
但係唔係同基督教有關既。

未上之前，
呢套戲已經引起話題，
例如套戲好多操口，
又有性愛場面。
如果係以前，
肯定係三級片，
不過呢套只係 2B 級。

有人話進步左，
但我擔心既係，
會唔會從此冇左準則。
由另一批人審，
又會係另一個評級？

Anyway，
呢部戲既風格係慢。
快慢呢家野人人喜好唔同，
有人會覺得佢拖戲，
有人會覺得剛剛好。

內容方面，
我隔離個 Friend 全程笑唔停，
仲要係笑得好激動 Tim。
因為佢見到好熟識既人和事。

「呢個問話方式咪好似邊個邊個 lor」

「阿邊個邊個唱 K 都係咁既樣，一模一樣」

開頭我都唔係好覺，
被佢講一講，
有時我都笑左出黎。
坐我地前後個 D，
可能會被我地嚇親，
覺得我地痴線。

至於 Ending，
我覺得剛剛好，
有時有 d 野唔駛畫公仔畫出腸既。
（雖然呢套戲都講得好白）

睇返網上 Forum，
似乎有唔少人都覺得，
仲係唔夠白……

失敗

開始有 d 迷茫，
有 d 失落。
早排係咁踩，
係咁開通趕貨，
到頭來……

Project A，
有個 Bug 攪左好耐，
最後原來係 Chips 間廠既 Library 問題。

另一個 Problem，
都係 Project A 既，
不致於 Hang 機，
結果發現，
Hardware Design 問題……

Project B，
要為新 Hardware 寫 Driver，
原本係手板眼見功夫，
但 Download 親落去都 Hang 機。
攪左幾日，
最後發覺係畫 Circuit 圖時調轉了兩條線。

到唔 Hang 機喇，
出黎既圖像又好似爆晒光咁，
Even 我係蓋住個鏡頭，
又話者 Program set 佢既曝光時間係 0。
唔忿氣攪唔到，
星期日返左公司攪。
結果發現唔係 Software 問題，
係幾條線焊接得唔好，
Flow 起左，
d Signal 變左 Unknown。

佢攪完一大輪畀返塊板我，
大部份既顏色好似正常，
但間唔中都係曝光。
老闆問我係咪 Gamma 錯、Mapping 錯，
最後又發現，
之前未焊好既線，
有一、兩條都仍然未焊好。

Well……

唔好講咁多野，隊左碗飯先

今晚有得飲，
係個攝影 Forum 既朋友結婚。
擺酒地點係灣仔合和中心。
既然係攝影 Forum 既人結婚，
當日影相拍 Video 既都係自己人，
去到都見到大把相機。

Anyway，
重點係敬酒。
今次有兩輪敬酒，
第一輪係連埋親屬，
公式化既敬「茶」，
第二輪係一對新人同班兄弟團真既敬「酒」。

一對新人我地都識，
不過我地既目標唔係對新人，
而係兄弟團中的一員（當然都係識架啦）。

當兩位先鋒各向佢隊了兩杯紅酒之後，
第三人同佢隊啤酒。
有飲酒知識既人都應該會知，
溝酒係最易出事既。
當然我地唔會放過佢啦，
令佢陣亡最後個 Hit，
係我出手既。
不過我係一個唔飲酒既人，
所以我唔隊佢酒，
係隊佢飯。

話說佢飲到咁上下，
同我講：
「咁耐我都未見過炒炒飲酒……」
（註：由於有 d 係以玄也呢個名認識我既人，
我有必要解釋一下。
大部份認識我既人，
都係叫我阿炒既）

隔左一陣，
佢又講：
「咁耐我都未見過炒炒食飯……」

就係咁，
我盛滿兩碗飯，
KO 左佢……

食完碗飯，
佢開始出黯然逍魂掌：


再補充少少，
上次攝影 Forum 既婚禮，
佢係賓客，
結果隊到任何食得飲得既野佢都拿黎隊，
包括：橙、紅豆沙、榚點等等。

令到上次個主人家好唔滿意，
因為佢冇份玩。
今次個追殺令，
就係佢下既……

你個樣似讀得書 Wor

尋日同班機友食飯，
講開教師，
話邊個邊個睇唔出係教書既。
跟住就話睇樣睇唔睇得出邊個讀得書，
有人就話：
「玄也睇個樣就知讀得書啦！」
跟住問我會考成績云云。

其實我成績算過得去啦，
比上不足，
比下有餘咁。

不過如果睇我個樣就斷定我係讀得書既人，
咁大家就要跌眼鏡喇。
因為我係一個唔讀書既人，
XDDDDDDDD

只係靠貼題目同打天才波過關，
所以嚴格來說，
雖然我學歷唔低，
我唔係一個讀得書既人。

夜晚收到個訴苦電話，
老實說，
我唔係呢行，
畀唔到 d 咩意見你。
不過從性格分析，
亦可能係一件好事。
以你唔服輸、
唔鍾意被人睇死既性格，
我相信你既反彈力會更加大。
加油喔！

最近 d CD 鍾意出第二版，
第三版，
每版加一兩首歌，
真係好乞人憎。
Anyway，
睇左范曉萱新專輯其中兩首 MV，
感覺係：
Not my cup of tea

討厭既 CD 包裝

今日又買左新 CD 聽，
繼續批評包裝。

今日買四隻 CD，
何韻詩既 What Really Matters、
張敬軒既酷愛、
楊丞琳既任意門、
古巨基既 Moments。

四隻當中，
最唔鍾意古巨基個隻。
個人偏好問題，
我喜愛簡約既包裝。
最好係 CD 盒裝既設計，
退而求其次，
DVD 盒裝既設計都還算可以。

古巨基個隻本來係 DVD 盒 Size，
不過佢既歌詞，
印成好似機票咁，
咁機票係長過 DVD 盒，
結果就係突左 D 野出黎。

不過佢影咁多相，
印成一本護照咁，
都好得。

其次唔鍾意既，
係張敬軒隻酷愛。
拆包裝拿隻 CD 出黎既時候，
就好似以前收個 D 十萬幾個包裝，
整蠱人個 D 禮物咁。
或者我講我點樣拿出黎就明。

拆膠袋，
揭開左邊，
揭開右邊，
移個盒出黎，
揭開左邊，
揭開右邊，
拿隻 CD 出黎。

相對呢兩隻，
DVD 盒 Size 既任意門，
同 CD 盒 Size 既 What Really Matters，
感覺好好多。

講開 CD，
好多時現在都好似賣大包咁，
仲有隻 MV 既 DVD 跟。
不過呢 D DVD，
我會睇既少之又少，
如果佢可以出過 CD Only 既 Version 就好喇……

體能

做左一日既運動，
感覺係好累，
同埋自己真係老喇。

下午去左黃大仙打左三個鐘籃球，
有全場五打五既，
亦有半場三打三。
基本上係行兩行已經冇氣，
都莫講話跑。
以咁既體能去玩定向比賽，
簡直係唔及格。
不過口講話要操返體能，
講就講左幾年，
但係做就……
體能不升反跌……

夜晚去左觀塘踢三個鐘波，
一樣係唔夠氣，
跑上跑落一次，
就已經莫氣……

講開體能，
開始擔心出年個亞太賽。

差開少少講，
自從唔係單身之後，
去多左旅行。
以前可以五年都未必有一次，
現在就可能一年總有一次。

今年暑假去左日本。
出年去邊好呢？

某人話就我，
出年去韓國。
就我既原因，
係出年七月係韓國有亞洲及太平洋區野外定向錦標賽，
咁我去比賽之餘，
仲可以順道旅遊。

不過以咁既體能，
莫講話爭獎牌，
我驚完成唔到。

細個個時，
條 Course 比較短，
我都仲可以用技術填補體能既差距。
隨著賽程愈黎愈長，
對手技術水平愈來愈高，
基本上係冇得爭。
舊年個亞太賽，
都係因為賽程比一般短，
先可以係短途賽搏大霧拿個季軍。
出年個比賽如果都係咁既體能……

新負擔

忽然間，
身份唔同左，
責任多左，
負擔大左。

首先係冇啦啦有人叫我做「大佬」，
法律同名義上，
我都應該冇咁快做佢「大佬」。
不過既然佢叫得我做「大佬」，
咁我當然要照顧下呢個「好細佬」啦。
第一件事佢叫我幫佢做既，
就係幫佢睇下「英雄傳說VI：空之軌跡SC」出左未。
咩係 SC 呢？
攪左好耐終於明，
原來係指 Second Chapter……

另外一個責任，
就係要儲錢，
要儲錢買樓。
嚴格黎講，
係儲錢供樓。
因為層樓唔係我畀首期，
但係要我供。
不過係咪真係搬/買，
都係未定既，
因為要睇下放唔放到住緊個層先。

雖則未定，
但係若果真係成事，
地點都定左。
如無意外都應該係大角咀，
原因係 Auntie 葉都搬左去個度。

另外一個責任，
就係工作上。
早幾日開會，
公司有五、六個 Projects，
全部都係十月底前起貨。
我公司好公平，
d Projects 會平均分畀每一個 Software Engineer，
而我公司，
有一大個 Software Engineer……