有……有……有人影係出面呀！

今日係每年一次既大日子，
有人問我做乜唔拿日假，
咁既然拿左假都冇地方去，
唔通去打一日機咩。

結果就梗係返工啦，
放左工去打機。
打打下艾文打電話黎，
話上阿力度睇波。
都好 wor，
我世界盃都冇乜點睇過，
難得今日早放工，
去睇波都好，
順手仲可以派手信。

晚飯同艾文食，
去左樓下間日本料理，
個定食幾抵食，
又刺身，又湯，
又有紅豆雪樣，
加一之後都係五十五元，
仲要好好味。

之後拉隊上阿力屋企，
上到去第一件事係派手信，
之後就係打四圈。
每逢我地四個聚埋，
總會打返四圈。

執完位坐低，
艾文驚訝地指住窗外說：
「點解出面有人影？」

我地其餘三個望一望出面，
然後阿力冷靜地說：
「我阿媽係出面掠緊衫……」

當堂笑到我同細牛肚都痛埋。
估唔到艾文可以傻到咁，
哈哈哈