大倒退

今晚返學，
本身已經差，
個幾兩個禮拜冇掂，
差上加差。
再加上冇做功課，
都冇返學，
點知有咩功課 wor。
結果對答案時，
被老師問到口啞啞。

最後一節，
玩遊戲 Bingo。
每人有一張紙，
分左 25 格，
每格有一條問題。
咁我地就要問同學，
如果佢個答案係 Yes 既，
就叫佢寫個名落去。
結果大部份人都係得 13 ~14 個名，
最多那個都只係得 15 個名。

原本打算畀手信毛理同學，
誰不知佢冇返。
不過其實就算佢有返，
我都冇得畀佢，
因為我今朝出門口唔記得帶。

---

係美國個時收到艾文既 SMS，
話有急事，
叫我返香港即刻找佢。
我見係急事，
當晚（香港時間早上）就打個長途電話畀佢，
點知佢話唔方便講住，
叫我返香港先找佢。
玩咩，
等得既就唔叫急啦。

今日返到香港，
一落機開手機已經收到艾文 SMS，
叫我打畀佢。
朝早五點幾，
點打呀。
結果佢六點幾打畀我，
終於知道咩事，
由於關於其他人既關係，
唔方便係度講。

可以講既係，
件急事已經由急變成唔急。