足球聯誼

氣溫今天又凍返。
近排真係多病痛，
除了長命咳，
右腳腳腕十二月廿七日扭親到現在仲有少少痛，
攪到我踢兩次波都要紮住上陣。
昨日朝又肚痛，
攪到我返崇拜行到一半都要返轉頭。
其實肚痛都唔係昨日開始架喇，
正確黎講應該係前晚開始，
唔知係咪因為食左壽司，
定係飲左阿媽 d 唔知咩水出事。
今朝返工都仲有少少痛。

昨日踢又整親隻腳，
又係右腳。
話說有球個波我通左火車坑渠，
點知就畀佢踢到脛骨，
當堂痛到企都企唔穩。
馬神個班冇人性又唔肯換我。
結果我守籠都要扶住籠門框。


好彩後尾都仲叫跑得吓，
不過有球小腿撞走左個波之後，
又再痛過，
不過都係小痛姐，
但就現在都仲痛緊。

講開昨日踢波，
本來同大衛、火車一陣（咁就唔會發生意外），
但係迦南話累要休息，
結果我代佢，
同肥宇、阿鋒、至偉和展閔一隊，
我仲入左三球呢！
第一球單刀左腳射遠柱死角，
第二球係自己後場笠射，
守門員托入（個籠門框膊頭咁高到啦）。
第三球右腳怒射。
本來仲有幾個 Chance，
不過把握唔到，
例如有球踩定黎射，
但拿得盡得滯……


連續兩日唔知醒，
唔知係咪同身體差左有關呢？