遲大到

今朝死喇。
話說我訓覺會開住收音機，
一醒就聽到商台謝西嘉個節目。
佢個節目係九點先開始，
亦即係我已經遲到。
望一望個錶，
仲敝，
已經十點三。
拿拿臨傘都唔拿就出門口，
望望銀包，
得果九十蚊。
記得好似六十蚊就得，
不過都係唔放心，
冒雨跑出吳松街間銀行拿錢，
之後飛的返公司。
十點五十分返到公司，
老闆已經返到，
仲打緊內線畀我同事，
問有冇見過我，
會唔會攪錯長短週。
個電話都未講完，
就見到我返黎喇。

但係奇就奇在，
佢又冇捉我入房照肺，
又冇出 Warning Letter。
Anyway，
今日我點半左右肚餓得濟走左，
欠佢個兩粒鐘，
慢慢還啦。

---

黃昏去睇中醫時，
碰到細牛。
佢都去完美國返黎，
24 號出發，
玩左兩個星期有多，
我都好想玩咁耐。

日文高三班成績

今日放工落左日經，
Join 埋 Moly 上去拿卷同報下期。
WaKaKa，我鍾於送左第一份手信畀 Friend，
本來仲可以送多個，
呢單一陣再講。

落左卷，
89 分，
第二次高過 Moly。
錯既七八成係大意錯。
例如見到「昨日」但唔記得轉過去式，
答原因但唔記得用「因為」等等。
成績，
叫過得去啦，
不過都仲係擔心年尾考能力試會唔及格。
（舊年及格率係 50%）

之後返左屋企食飯，
食完之後出左旺角行，
之後去做 Gym。
一如所料，
最後 Alex 都係冇黎。
但係我都有帶份手信，
萬一佢真係出現，
都有得畀佢。

其實佢都有打過黎，
不過我做緊 Gym，
電話放左係 Locker。
有 d 人好鍾意一路做 Gym，
一路講電話，
我就唔得喇。

---

今日主要係拉背：

1. MTS High Row
2. MTS Row
3. Lat Pulldown
4. Underhand Seated Cable Row
5. Triceps Pushdown - Rope Attachment (三頭肌)
6. Hyperextensions (下背)

籃聚

夜晚去左打籃球，
又係通州街，
今個月第三次。

照舊約左七點半，
照舊有人遲到。

七點左右收到 Alex 電話，
又話聽日去做 Gym 喇 wor。
前日話去，
昨日話唔去，
今日又話去，
都唔知佢想點。
Anyway，
佢去唔去都好，
我都係去架喇。
聽日同 Moly 上完日經，
返屋企食完飯，
行一行先達，
之後就會去做 Gym。

今日打波好多人呀，
有成差不多十五人，
有男有女。
我呢 d 唔識打既，
梗係唔會同班競賽組打啦。
係另外一邊賽打，
有球衝搶籃板，
一野踩落人地隻腳到，
真係好唔好意思。

十一點打完波，
過返黃金個邊吹水食糖水，
十二點九先走，
返到至企都點幾了。

返到去，
冇左 d 狗吠聲，
因為隻狗狗已經畀左人養。
布丁黎左我屋企半年都唔夠，
咁快就要走……

2.4 測試

今個星期做了好多運動，
星期日跑城市定向比賽，
星期二打籃球，
星期三練跑。

黎緊星期四又打籃球，
星期五做 Gym，
星期六跑山。

一個星期七日，
其中六日做運動，
真係健康。

講返今晚先，
班同事去唱 K，
都有找埋我。
但一黎我唔係好鍾意唱 K，
二黎又要練跑，
所以結果都係婉拒左佢地。

七點鐘出到佐敦，
換完衫就落去。

今日係新既一期訓練計劃，
除了幾個返開既之外，
今期都有幾個新面孔。
四位新血，
其中三個唔係好跑得。

今期開始執正黎做，
要有一定出席率，
交足功課（訓練訓劃和紀綠），
考試及格（測試達標），
下一期先會再收。

今一係其中一項測試，
總共有兩項，
2.4km 和 5.4km，
每月都有一次，
總共三次機會。
今日係做 2.4km，
目標時間係 11分鐘，
及格時間係 14分鐘。

跑兩圈半，
第一個圈我故意墮後，
怕 d 新人唔記得個圈已跑錯，
結果真係有兩個唔記得轉彎。
我前後總共有四個人，
兩新兩舊，
速度就，
基本上比行係快少少既。

慢跑完第一個圈，
我用回正常速度跑。
結果以 12 分半完成。
十個人跑，
只五個達標，
睇黎仲要好好訓練。

之後係一個短途定向，
0.6km，
用左 5 分 17 秒，
有點兒慢，
狀態未達比賽水平。
而 d 新人既時間，
Well，都係唔好講喇。

翻版

道高一尺，
魔高一丈。
PSP 被破解係遲早既事，
近日已經有所謂 Loader，
可以 Load 到 PSP 既 Game。

其實 d Game 又唔係貴，
點解 d 人寧願玩翻版都唔玩正版呢？

當佢正版 $300 隻，
翻版 $30 隻。
用買一隻正版既錢，
可以買到 10 隻翻版，
好似好抵咁。
但係，
你又會用幾多時間去玩呢？

如果係正版，
你會比較有心機去煲。
但係如果係翻版，
好快就放埋一二邊。

同係付出 $300，
結果都係玩個一隻遊戲，
點解唔買質素有保障既正版呢？

所以我部 PSP，
暫時都冇打算過讓佢接觸翻版。

感情上亦都類似，
昨日有人問我點睇一夫多妻制，
我用上面個段答佢。

---

星期日跑比賽，
今晚又打籃球。
散晒……

---

估唔到英年早逝，
被人激死左。

牛角尖

件新產品，
本來應該一早出左。
上年十二月尾已經出左 Version 1，
後來將 7-Segment LED Display 轉做 LCD，
結果 delay 左三個月。

到四月，
收到 LCD 個 Sample，
我亦係同一個月改埋個 Program。
結果到左七月都未出到街。
咩原因呢？
咪就係個 Electronic Engineer 轉晒牛角尖 lor。

話過 circuit performance 唔夠完美，
係咁改改改，
個 Filter 有 Order 1 改到 Order 4，
都仲未滿意。
每我返到工問親佢，
個 Circuit 總係 update 左。

已經有少少走火入魔。
出遲半年，
就賺少半年錢，
而個問題係，
畀多半年你，
結果件 Product 又係賣咁多錢。
最重要既係，
老闆一早已經話冇問題，
仲改黎做乜？

---

放工走左去睇戲，
龍咁威 2。
幾好笑，
不過睇睇吓戲又有人有電話響。
對話仲好攪笑 tim，
第一句就話，
「我唔同你講住，睇緊戲，一陣打返畀你」
結果個電話講左五分鐘……

---

返左香港成個幾星期，
隨左公司盒餅，
一份手信都未派過。
手腳真係慢，
仲慢過執相。

城市綠定向

今朝又要比賽，
不過唔駛上山，
而係係市區玩既「城市綠定向」。

公開組一隊四個人，
我個隊亦然係個四個，
劉 Sir、阿健、阿高和我。
今次既對手比無國界定向更強，
其中包括有宿敵消防隊，
同埋其他定向人。

賽區包括四個地區：
觀塘、油尖旺、灣仔和中西區。

約了八點鐘係太子等，
然後一齊食早餐。
結果得我同劉 Sir 準時，
其他兩個都遲到。

去到起點，
先抽籤，
我地抽了支好籤，
第一區先去觀塘。

十點二十分，
幾乎係最後一隊出發。
一齊出發既，
仲有群仔個隊，
同埋二佬個隊。

一嗚笛，
我地由花墟跑出巴市站，
等了數分鐘，
已經由紅色小巴了。
十五分鐘就落到牛頭角，
跑去第一個 Check Point。
離開時見到有兩隊剛到，
即係話我地已經超越兩隊。
去到馬碲徑，
我將個大背囊交畀迪哥，
只係背返個水袋，
繼續去第二個 Check Point，
不過入錯門口，
咁又浪費了點時間。

去完第三個 Check Point，
打算係裕民坊坐 641 落灣仔，
點知假期唔開，
另一架巴士又剛剛走左，
坐地鐵去銅鑼灣，
一路跑落灣仔，
沿途去了三個 Check Points。
係灣仔坐巴市落西港城，
可惜遇正法輪功遊行，
警察係中環封路畀佢地過馬路。

落到上環，
又跑左三個 Check Points，
之後跑中環坐地鐵去尖沙咀。
跑去尖東，
再由尖東經佐敦跑落油麻地，
沿途去埋最尾五個 Check Points。
係油麻地坐地鐵返太子，
係太子跑返花墟。
尾段隻腳抽晒筋，
好不容易終於捱返終點。

賽會開頭話限時三個半鐘頭，
係冇可能去晒咁多個 Points 既，
結果我地只係用了兩個鐘頭四十一分鐘，
已經拿了滿分。
已拿到滿分既，
除了我地，
仲起碼有十隊。

最後成績公佈，
以兩分鐘險勝消防得冠軍。
計埋無國界，
消防輸左畀我地四次，
屈居左四次亞軍。


頒完獎，
食完午餐。
我又落返觀塘同迪哥踢波，
順手拿返個背囊。

一週年聚餐

今朝早上，
終於開始執相。
不過執得好慢。
執左一朝，
只係執左十五張相。
仲逗留係旅程的第二日早上，
攝於哈佛校園的相。

中午和媽媽去了飲茶，
飲茶之前，
先去買咖啡粉。
$36.6 的200g Mocha，
唔知好唔好飲呢？

飲成兩個幾三個鐘茶，
之後我落了旺角行街。
係家樂商場附近好塞人，
有班男人係咁影相，
原來有幾個著得好少布既 Model，
事後睇返報紙，
其中一個原來係王從希。
佢係邊個呢？
唔識。

沿菜街北行，
有幾堆 Model，
自然有幾堆人係度影相。
有用 DSLR 既，
有用 DC 仔既，
更有用手提電話影既。

係旺電幫我部 PSP 貼了張保護貼之後，
又要即刻趕返屋企。
換衫出席奧林派一週年聚餐。

係尖咀文化中心附近食泰式自助餐，
同上次係 Boston 食既差天共地。
呢度既食物款式，
只係有 Boston 既五份之一。
基本上出去三、四轉，
已經試晒所有野。

不過人頭費只係 $130，
總沒有可能要求好多，
不過都係好失望。

其中有個網友去完西藏旅行，
影左三千幾張相。
同我咁上下日子返到香港，
d 相已經沖晒好，
我真係慚愧。

七一

又到七一，
每年七一，
民陣總會攪遊行。
今年適逢特首換了人，
而且又沒有迫切議題，
人少了是可預料的。

前年七一，
廿三條立法，
五十萬人上街。
我約了一班大學同學，
一起參與其中。
上午踢完波，
下午去遊行。

上年七一，
班大同話唔去。
結果我自己一個去。
上午去完白石橋 Train 定向，
下午去遊行。

今年，
我也沒有去遊行了，
上午去了睇頭文字 D 早場。
下午留係屋企休息休息。

講返套戲，
OK 啦，
不過不失。
百零分鐘既電影，
要講既野有好多，
話晒漫畫都出左三十幾集。
講幾場賽車戲，
講吓減情線。
最美中不足就係拓海首戰唔夠震撼。

睇完戲，
返到屋企，
收到 Edmond 電話。
有得旅行浸溫泉，
真好。

Farewell

一個人係世界既地位，
係佢死左之後會好清楚。
古時帝皇死號會有諡號，
其他一些人也會被追封為乜乜公、乜乜王。

一個人係公司既地位，
看佢離職之後既對待，
同樣一清二楚。

公司前前後後走過幾個人，
有乜都冇發生過既，
有得到一餐幾個人既 Farewell 午餐既。
今日係某 Director 既 Last Day，
公司為佢攪左餐 Farewell Lunch。
被要求出席既，
唔單止寫字樓個邊既幾個人，
仲包括 Workshop 既女工。

一行十四人，
浩浩蕩蕩去飲茶。
唔單止咁，
佢都收到一份禮物。
地位、貢獻顯而易見。

---

近排既作息時間好怪，
返到屋企，
飯都唔食就會訓覺。
由八點訓到十二點先起身，
跟住就開始整飯食喇。
食完打陣機，
上陣網，
等下人 Online，
四點到又會訓過。
六點幾七點起身開熱水爐，
之後再訓過。
八點起身沖涼，
食完早餐返工。

平凡人與高材生

高材生中學畢業後留學外國，
平凡人中學畢業後滯留香港。

高材生成績名列前茅，
平凡人成績名落孫山。

高材生兩文三語瓣瓣精，
平凡人英文國語半桶水。

高材生未畢業月薪萬八，
平凡人畢左業月薪萬五。

高材生家底豐厚，
平凡人僅夠糊口。

高材生銀行儲蓄美金九萬，
平凡人銀行儲蓄港幣三萬。

高材生自駕私家車出入，
平凡人逼公共交通工具。

其實呢 d 級別上的差異重要嗎？
重要的是高材生和平凡人都覺得不重要。
可能平凡人在高材生心中先係高材生，
平凡人高材生，
高材生平凡人，
分得咁清為乜？

---

夜晚去了跑步，
例牌遲大到。
人地跑 Y 特訓，
我跑個 30 分鐘 LSD。
跑左三分二就開始落雨，
愈落愈大，
結果濕晒做左落湯雞。

之後連開兩個會議，
一個係黎緊一期賽員集訓計劃。
一個係黎緊星期日既作戰會議，
我負責油尖旺區，
要記熟晒 d 交通和地標位置。

人地拍拖好麻煩

今晚放工走左去打籃球，
又係同 PSP Group 班人打，
不過今次係街場，
通州街球場，
深水步地鐵站向南昌站方向行十數個街口。

呢個球場，
位於深水步站、南昌站、奧運站中間。
好聽 d 講就係交通方便，
難聽 d 講就係兩頭唔到岸。

或者真係太耐冇做運動，
打打下又想抽筋，
仲要係小腿同腳趾抽筋？！

亦因為體能唔夠，
射波亂晒龍。
打完波十一點幾，
食埋糖水，
返到屋企都成十二點幾。
食少少野，
沖埋涼都兩點點幾。
再打吓機，
結果四點先訓。

---

睇完人地日記，
點解拍拖會咁麻煩？
有時真係好似追連續劇咁，
幕幕高潮。
三兩日就會有個小風波，
四五日就會開鋪大既。

磨擦總會有既，
Even 係 d 就黎結婚，
又或者已經結婚，
但係呢對好似特別多。
其實究竟係當事人既問題，
定係每對情侶都會發生既必經階段？

有時覺得自己好幸運。
可能係因為識左好耐，
或者係少見面既原因，
又可能係性格既原故。
總之，
感謝主。

標準對答

今日 Report Duty，
背了個大背囊，
當中有做信差既花旗蔘茶包，
有手信，
有水杯（拿了過去做漱口杯），
Lunch Box 等等。

返到公司，
最常聽到既對答就係：
「好唔好玩呀？」
「好。」

講真，
又點會唔好玩？
Even 就算唔好玩，
咁多日，
總會 Tune 到好玩既。
尤其是我係自遊行，
跟團既就難 d，
不過都應該得。
去咁多日，
日日都唔好玩，
貼錢買難受，
我唔會咁做 lor。


其次就係
「貴唔貴呀？」
「我就唔捨得畀咁多錢喇。」
搵得黎就洗得去，
唔洗係旅行到，
總會洗係其他地方，
問題係洗得值唔值姐。


返到香港，
其實都仲未好慣。
Jet lag 有少少啦，
不過平時返工都係咁上下時間眼訓。

訓醒覺張開眼時見唔到 d 想見到既野，
呢個先係最唔慣既事。

---

夜晚 Edmond 打過畀我。
佢完本叫我幫佢買 99% 可可既朱古力。
我同佢講，
九十幾同一百都有，
係無九十九。
佢竟然反口話要九十幾，
唔係九十九，
咁都得……

仲有收到消息，
細牛今日打左幾次畀佢，
當頭心都涼晒。

完結

十日的旅程終於完結，
係波士頓機場等候上機的時候寫日記。
其實開頭幾日的日記一早寫好，
例如 17 同 18 兩日既日記，
係 JFK 既時候已經寫好。
不過 Saved 左係部 PDA，
我又找唔到方法 Connect 部 PDA 上網，
所以一路 Keep 到返屋企 先 Upload 到。
同一時間，
我又要補返之前玩個幾日既日記，
都幾多野做。

同上次 LA 返香港一樣，
呢兩日既日記係幾難寫，
甚至係有過之而冇不及。
點解咁講呢？
我係波士頓時間 25 號中午十二時左右起飛，
（即香港時間 26 號半夜十二時）
返到香港，
已經係香港時間夜晚八點左右。
一日咁就冇左喇。
25 號有十二個鐘係波士頓，
26 號則只有四個鐘係香港。

不過比起係美國玩既時間，
又唔係過得好快。
玩既時候，
尤其係佛羅里達，
真係話咁快又一日，
話咁快又玩完一個 Park。

我話就話要賴 Edmond，
不過都唔係賴得好應姐，
都係打左三四次電話之嘛，
次次排緊隊入場既時候就想打電話喇。
期待細牛既接力。
呵呵呵。

細牛話會係帝國大廈頂樓打畀佢，
唔知會點呢？

我在波士頓旅行的最後一天

最後一日係波士頓，
應該話係最後一朝才對。
飛機十二點起飛，
我八點左右就起身，
梳洗完畢，
就上網喇。
首先上 Newsgroup 睇下 Dada 佢地有冇出Post，
之後睇下網頁，
睇下新聞。
原來香港六月幾乎日日都落雨，
仲要係落勁大個隻。
昨日仲要出埋紅雨警告 Tim。

仲有山洪瀑發，
呢 d 唔知係咪叫「貴人出左門招風雨」呢？

Anyway,
去左 IHOP 食早餐，
呢間連鎖店專食 Pancake 架。
食完早餐，
就坐車去 Boston 機場喇，
拍好車，
拿完 Boarding Pass，
見過 Gate 目視可見，
就四圍行下先。

過機場保安，
今次要做 Second Pass Check。
個 Check 要開袋搜，
話佢好嚴謹咩？
又唔係，
佢都冇開晒 d Pockets。
話佢唔嚴謹咩，
又唔係，
至少佢眼見既件件都玩下。
佢攪左我個 Hand made 電池箱好耐，
部相機佢又拿出黎睇下，
鏡頭又攪下咁。
我呢 d 良好市民梗係順利過晒 D Checks 啦。

上到飛機，
發覺個位畀人坐左。
原本坐我隔離個男人想同佢個女一齊坐，
我當然冇問題啦。
結果由窗口位既 4C，
調左去路位既 7B。

今程機個機倉服務員係位男黑人，
A so funny man，
我覺得佢幾敬業樂業 Tim，
總之氣氛良好。
12 點 03 分，
飛機離開 Boston 機場，
正式踏上歸家既路途。
先飛四十分鐘去紐約 JFK，
再轉機返香港。

自由之路

今日係自由行加購物團。
上午係自由行，
行 Boston Freedom Trail，
由中心公園出發，
沿地上紅色的線行。
終點係 Beacon Hill。
見到唔少早期美國獨立戰爭時期的文化遺蹟。
自然影左唔少相啦。

其中由一段要過河（Charles River），
條橋好特別，
係上面向下望，
係可以望穿條橋，
見到條河。
所以係好驚好驚。

之後返 Quincy Market 食午餐。
食左個包包湯，
一個大麵包，
中間有龍蝦湯。
食一個已經好飽，
更何況 0.5 + 0.5 > 1 呢？

之後 Shoping，
先幫同事買棒球褸。
去到 Fenway Park（Boston Red Sox 主場）都找唔到。
之後去 Outlet，
買左兩對鞋（其中一對係媽媽既）同一條褲。
講到我自己對鞋既價錢，
我 d 手信仲貴過佢……

去中式場市幫同事買花旗蔘茶，
同某人要入貨。
係港式茶餐廳食晚飯，
之後就回程。

訓覺之前，
點都要整返部電腦。
（我既第一號功能）
好彩都攪得掂。

飛波士頓恐懼症

訓得三個幾鐘，
又要彈起身。
因為今朝七點幾機，
四點半就要坐車去機場。

唔講唔知，
原來某人患左「波士頓恐懼症」
正確 d 講，
應該係「飛波士頓恐懼症」。
每次飛波士頓，
佢都會又暈又嘔。

幸運地，
我有藥係身。
返到波士頓，
發覺架車唔見左。
原來泊車那度只可以泊廿四小時，
多過就會被人拖走。
幾經辛苦，
終於找得返架車。

運到屋企，
見某人唔夠訓，
又病，
又嚇一嚇黎。
Cancel 晒下午既活動，
係廳煲 DVD 同訓覺。
睇睇下，
我都訓埋。

其實我追求既，
都係呢種悠閒既生活之麻。
「平淡是福」始終係我的目標。

夜晚同阿姨去左食西人中式自助餐。
人地阿姨移居 Boston 多年，
今次係我第一次見佢。
講返 d 野食，
不過不失啦。
十樣有八樣都係 Chicken，
煎炒煮炸乜都有。

Universal Studios

今日唔再去 Disney，
而去左 Universial Studios。

Universial Studios 多層有蓋停車場，
我覺得比 Disney 日曬雨淋既露天停車場好。
不過個 Ticket System 就唔係好好，
網上買左飛，
去到拿飛部機話冇資料。
排隊問，
都有幾多人有問題。
到幫我地 Check，
個職員要 Check 幾部電腦先找到我地既資料，
乜 d 電腦唔係應該連線既咩？

之後入場，
睇左 Shrek 4-D，
一套要載 3D 眼鏡睇。
呢幾日睇左五套，
個個 Park 都有：
Muppet Vision 3-D、
Mickey's PhilharMagic、
Honey, I Shrunk The Audience、
Shrek 4-D、
Terminator 2: 3D, Battle Across Time。

最終意都係 Shrek 4-D。

之後玩機動遊戲，
好多都唔畀帶袋，
要借佢 d Locker。

Mummy、MIB、Back to the Future 等都唔錯。
係 MIB，
我終於成功扳回一仗，
多分過佢。
不過我地係分開玩，
因為我地排 Single Pass，
條隊快 d。

咩係 Single Pass 呢？
好多時呢 d 車都坐四個人、
五個人咁。
咁如果個 Party 得三個人，
咁咪會有個空位 lor。
佢地就會放個 Single Pass 既人去，
唔好浪費個位。

之後睇 Break Dance，
中左頭獎咁畀人捉埋出去玩，
我都唔識跳既，
仲要有 Solo Time……
不過都玩得幾開心。

之後又落雨，
某人把口真厲害。
「我覺得我地玩完呢個出黎會落雨」
果然……

之後睇 Fear Factor Live，
超正。

到睇 Make-up Show，
講 Hollywood's make-up special effect。
今次輪到某人中頭獎，
仲影埋相先，
張相當然唔係我到啦。

食完又再落 Disney Downtown。
昨日行左兩間 Shop，
今日有充足時間行晒成個 Downtown。
之後就要返酒店訓覺。

Epcot

終於到最後一日既 Disney，
今日去 Epcot。
呢個 Park 係某人既 Favourite，
個 Park 分成兩半，
頭半係玩既 Future World，
後半係依唔同國家既特色建做既 World Showcase。

有個新 Game，
叫 Soarin，
虛擬的滑翔翼遊覽。
展身空中，
遊覽唔同既景色，
個感覺宜係好正。

之後睇溫室。
食完午飯繼續玩。
先玩 Mission: SPACE Advanced Training Lab，
一個扮坐太空船既遊戲。
之後係 Test Track，
拿左 Fast Pass，
不過係五點幾，
所以先行 World Showcase。

講返 Fast Pass，
Disney 好多要排隊既設施都有 Fast Pass。
通常會有兩條隊，
一條係平時 Walk in 既，
一條係 Fast Pass。
Fast Pass 就好似預約咁，
你係適當既時候返黎，
就可以排條短 d 既隊。

行完 World Showcast，
我叫佢係 Mexio 等我，
我自己一個玩 Test Track。
似係模擬試車，
最後一 Part 係 Speed，
開到 60 Mph，
我覺得冇乜野。

係德國食完自助晚餐，
就睇煙花。
呢個煙花比起昨日近好多，
感受到個股熱，
澎澎聲直打入心。

睇完見時間尚早，
就落左 Downtown。
個度有間 Lego 店，
門外有好多 Lego 砌既野。

結果買左份 Lego 手信，
同埋一條高飛狗既四角褲。
做唔到我第一條四角褲，
就係畀左高飛……

Magic Kingdom

今日係旅程中的旅程玩既第二日，
地點係 Magic Kingdom。
Magic Kingdom 可以話係 Disney 既膽，
因為個個 Disney 都一定有，
分別只係大定細。

同 LA 既那個一樣，
Florida 那個一樣有 Tomorrowland、
Frontierland、Fantasyland等等。

泊好架車，
就坐 monorail 去 Magic Kingdom。
為免同人迫，
我地採取逆時針玩。

玩巴斯光年，
今次慘敗。
過完第一關，
人地廿萬分，
我得過幾千。
最後埋單，
佢四十萬，
我得廿萬……><

玩 Space Mountain，
黑暗中既過山車，
成日驚撞頭。

玩鬼屋，
入到去唔知做乜。

玩 Big Thunder Mountain Railroad，
後面坐左一對小妹妹，
由開車叫到落車，
仲要係好刺耳個隻，
坐佢前面真係活受罪。

係 Magic Kingdom，
見到有唔少香港既 Trainees。
可能文法唔同，
佢地唔係好識笑。
如果我係遊客，
見到佢地會好冇癮 lor。

唔知講錯咩，
有時個氣氛好僵。
不過好彩好快無事。

Anyway，
有了昨日既經驗。
今日將部相機留係架車度，
亦都將腰包換成背包，
放了件風褸。
所以行行下就算落雨，
都冇昨日咁狼狽。

夜晚我返車拿相機，
返到黎個巡遊已經開始。
完左之後，
我要係人堆中找返佢，
好彩都被我找到，
一齊睇埋煙花之後就返酒店休息了。

MGM Studio

今日去玩，
經過一晚既研究，
決定先去 MGM Studio 先。
因為撞正有 Star Wars Weekend，
有 d Special 既 Program。
個 Park 未開我地就到左。

係排隊入場既同時，
梗係時候賴人啦。
打到去 Edmond，
佢話佢刷緊牙 Wor。
同佢講緊電話既同時，
被佢聽到我隔離仲有人。
我唔話佢知係邊個，
佢話問下欣欣（譯音）就知。
究竟佢講緊邊個呢？
頌欣？沈石欣？定係杜葉錫恩？
好似冇個同我熟，
佢講 d 野真係令人費解。

一入到去，
首先被人捉左去玩跳樓機，
之後玩過山車，
架車超快，
我危些兒帽都甩。
之後都冇乜機動遊戲玩，
Show 就睇左幾個，
一個係飛車，
一個係奪寶奇兵。
共通點係都係有玩火，
原本已經熱，
結果更加熱。

話明 Star Wars Weekend，
梗係唔少 Star Wars 野啦。
除左有 Star Wars 人物影相相之外，
仲有 Star Wars 巡遊，
Star Wars 百萬富翁等等……

夜晚個餐係食火雞腿，
好大隻。
係等緊睇煙花既同時，
開始落雨。
因為冇帶雨具既關係，
雖然排到好前，
係 d 雨愈落愈大既情況下，
都要迫住撒退。
真係有少少遺憾，
不過保得住部相機，
同埋畀四虎 d 手信，
總算不幸中之大幸。

飛完再飛

昨日飛完，
今日又飛，
今日既目的地係佛羅里達。
不過因為係夜機既關係，
朝早去左哈佛。

十一點幾洗完衫，
首先去食野。
餃子、粢飯、北京醬肉套餐、
蔥油餅加蛋。
一餐當兩餐食。

之後週圍行，
首先入到一間紀念品店，
見到有 d 好精美既六面 Dice。
最衰我好耐冇玩 AD&D，
不過買黎當手信都係一個唔錯的選擇。

不過基於一陣要上飛機，
都係返黎先再買。
（按：結果最後都係冇買到架……><）

之後行書店，
買左本 Star Wars, The New Jedi Order，
講既係電影之後既故仔。

去車車到拿返 d 行李，
就坐鐵路去機場。

Boston 係一個幾舊既城市，
d 路爛之餘，
發展得好冇系統。
例如 d 鐵路，
好似蜘蛛網咁，
站到站之間既距離，
可以近到只有三個街口。

等上飛機既同時，
本來想打畀 Edmund，
不過我份人好厚道，
冇理由一早嘈醒人，
晚一點先啦。

今次坐 Song 既機，
同國泰一樣，
每位乘客有自己既電視，
仲要係 Touch Screen Tim！

去到酒店已經好夜，
差唔多成十點幾 lu。
早 d 訓覺，
明天去玩。

長途機

打呢篇日記時，
係身處紐約 JFK 機場，
往波士頓的候機室。
二十個小時之前，
即是香港時間六月十七日早上八點，
我正在屋企附近的巴士站等巴士。
去到機場，
登記埋寄倉行李，
已經係九點，
Edmond 呢個冇膽匪女，
已經熄左電話了。

食個早餐，
施施然行去過關，
之後坐佢架鐵路去 Gate 33，
幾乎係最後一個上機咁滯。
上到去就有個好消息，
架機唔爆，
我隔離個位冇人，
呵呵。

細牛係佢日記話，
坐過飛機都 Pro D，
我同意架。
尤其是一個人坐長途機，
甚至照顧人一齊坐飛機。
因為要 Handle 既都唔少。

講坐飛機既經驗，
我唔係有好多，
不過都唔係話冇個隻。
雖然十隻手指數得晒，
但大部份都係長途機。

今次係第一次自己一個人坐飛機，
重要係最麻煩個隻：
長途機去美國仲要轉機。

由定時間，
買機票，
執行李，
買保險，
到出發，
都係自己攪掂，
經此一役，
真係成長不少呀！

飛機經過大西北，
應該係西伯利亞才對，
十六個鐘之後終於到達 JFK。

有香港旅行團既地方，
總會好噪吵。
今次去程冇旅行團，
但有 d 遊學團，
又或者生活體驗團。
成程機周不時 we wa 鬼叫。

兩點落機，
要轉個班開六點九。
好似好充足既時間，
其實唔係架。

首先過海關，
係都要我答個地址，
我話邊間 Hotel 未定都唔得，
結果佢求其幫我作一個。

之後等行李，
拿完都三點幾。
之後就開始行迷宮。
首先係找邊度坐 Train，
係 Terminal 8/9 呢個站落車之後，
找路行，
係 Terminal 8，
又找路去 Terminal 9 。
九曲十三彎之後，
終於去到保安檢查。
過左之後又要再找路。
去到 American Eagle 都已經四點咁滯。

如果唔係我係香港已經拿定 Boarding Pass，
仲要再晚 d 先到呀。
係 Gate 40E 坐低，
打陣 PSP，
寫陣日記，
時間都幾快過。

同之前個程好唔同，
香港飛紐約，
大半係華人，
紐約去波士頓，
三大個。

再坐多兩個鐘飛機，
就到波士頓。
第一個感覺係：
好肚餓。
對上一餐，
已經係機上十一點左右既早餐，
之後成九個鐘冇野落肚，
唔餓有鬼喇。

去左 China Town 食野，
叫左一個肉窩，一個海鮮窩。
食晒 d 肉，
d 海鮮都未黎。
我仲話會唔會捉緊蝦，
點之黎到個窩係……
真係冇蝦既。

最後的……

終捱到最得一日喇，
我聽日就會離開香港。
基本上之前要做既野，
都做左大半，
行李執左九成；
篇文作左，
不過唔知有冇解錯題；
叉電叉晒電等等。

欠既，
就只係今晚個考試。
今晚個考試，
亦係呢個老師教我既最後一堂。
再上就會係研究班，
由日本人教返。
而呢班對左兩期既同學，
亦應該會各散東西。

所以今晚約左一齊食飯。
因為老師要上堂，
又有兩位同學仔唔黎，
結果只有 10 個同學仔出席。
去左跑台街附近既譚仔米線食，
咁近我屋企，
當然順手返屋企換件衫啦。

食完米線，
去到學校，
首先係對埋 d 複習題，
九點先開始考試。

份卷唔算淺啦，
係冇溫書唔識姐。
考完試，
就返屋企執埋 d 行李，
準備明天去玩喇。

YeahYeahYeah！

Edmond，
唔好以為避上大陸就得，
等被我「賴」啦！

---

中午被屈請食飯，
不過有人仍然以為我唔做，
今日佢地係同我 Farewell，
er……

抽後算帳

上個星期我申請左上網報稅既 Password，
佢話會寄畀我。
幾日之後收到稅局既信，
唔係 Password，
而係另一張報稅表。
我以為係崔我交表，
所都冇理住。

今朝填報稅表，
先發覺兩張表係唔同既。
之前個張，
係正常既 04/05 年度既報稅表。
早幾日收個封，
係 03/04 年度既報稅表！
要找返兩年前既資料出黎，
今係有 d 難度。
好彩最後都完成任務。
不過原本昨晚做既 Task，
延到今朝先做，
結果今日將會好多野做…… ><

---

呢 d 先係高效率架嘛。
話說國泰 d 機位，
四十八小時前就可以 Login 劃位。
我星期五飛十點幾，
今朝十一點 Login，
佢話冇紀錄 wor。
咁得三個可能既姐，
一係就我其實被人騙了財，
冇買到機票；
一係就買機票既時候冇 Submit 到 Asiamiles 既會員 Number；
一係就有其他人幫我登記左。

因為今次我自己一個去，
冇理由有其他人幫我登記。
至於個 Agent，
佢係 Moly d 舊同事，
都應該信得過。
Anyway，
我十二點九 Send 左過查詢畀國泰，
一點三已經收到佢地既回覆，
之後已經可以劃位，
只係我唔記得個護照 Number 劃唔到。
咁既工作效率，
抵妳今年係全球排第一既航空公司。

---

兩日咋，
兩日咋！

雪上加霜

今日體驗到咩叫雪上加霜。

今朝返工，
已經遲好多架喇。
好衰唔衰，
唔知火燭定咩啦，
公司樓下條街幾架消防車，
雲梯都出埋。
最慘係封左條街，
攪到我要繞路，
行後巷先返到公司。

放工坐 14 號返屋企，
平時半個鐘車程，
今日塞左成個鐘都未返到。
咩事呢？

原來佐敦道近上海街整路，
封左外線。
中線又撞車，
封埋，
得返一條內線，
三條線既車都爭呢條唯一既通道，
唔塞就假喇。

---

仲有三日。

看見細牛開始早準備，
我就乜都冇攪咁。
行李未執，
旅遊書冇睇。
真係慚愧。

呢幾日訓得好少，
又冇心機做野。

正面 d 想，
可以話仲有幾日就可以放假差電。

但換一個角度，
會唔會因為要放假，
先攪到訓得少呢？

再想遠少少，
如果我平時做定晒 d 野，
咁放唔放假都影響唔到我架 wor。

重要會面

今日秘書姐姐同我講，
下個星期安排左兩個 Appointments。
即係話，
我要執返套西裝落行李箱先。
同埋要操下英文，
我驚到時會溝通唔到。

---

發覺出發之前仲有好多野做。
首先係執行李啦；
其次係出發之前個晚仲要考試，
要溫書啦；
要交日文作文啦；
又要將三百張相入相簿 wor；
又要找卡數；
又要報稅；
又要填返 d 續會表格等等。
得果三晚半，
邊做得晒？

今晚食完飯，
就開始入相喇。
三百幾張相都係好多，
疊起係厚過一本牛津高階兩解字典。
d 膠啜住又難入，
最慘入入吓發覺中間漏左幾頁，
又要抽返出黎再入。
結果攪到三點幾先入晒，
想做多樣工作都唔得。

講返本相簿，
兩本加埋可以入三百張 4R 相。
我晒左 293 張，
好似可以入得晒咁，
但係仲有 8 張 Index，
結果 Total 係 301 張……

---

911 之後，
去美國麻煩左好多。
例如 d 寄倉行李唔可以上鎖，
方便佢地 Check。
如果係拉鍊個隻拖箱，
可以用個行山扣扣住，
咁就唔驚搬運途中唔覺意開左。
但係我個行李拖箱係冇拉鍊個隻硬箱，
結果放工走去買左條行李箱索帶，
叫做解決左問題。

---

二三四五，
仲有四日。

週年研究會

今朝又係一早要起身。
但係唔知點解，
呢排成日記錯時間。
不過呢家記錯唔緊要，
唔好星期五記錯。

今朝去週年教練研討會，
九點要到，
但我八點八先上巴士，
入到沙田都九點四，
九點半入到會議室。
原來，
個研討會九點半先開始。

今日第一 Part 講 Trial-O。
講真，
d Present 好唔得 lor。
Show d 相出黎，
問邊個係正確答案。
實地係 3D，
D 相係 2D，
點睇？

「其實實地係點點點，所以正確答係乜乜」
好心就執下 D 相先 Show 出黎啦，
攪到成個上午都唔知做乜。

下午上牛寮有實習，
實地體驗，
真係有 d 難道。

不過有 d Pount 就幾有爭議性。

Anyway，
完左之後，
同迪哥去左旺角 Sony，
終於成功偷到蕃薯。

不過未買保護套，
未買保護貼。

我個部唔係一部完美既機，
但正如人一樣，
好難有完美，
自己接受到咪得 lor。
有人一定要買部完美既機，
結果去幾次都買唔到，
我寧願早買早享受。

---

仲有五日

版聚行大運

今日一朝就行大運。
約左人九點鐘打波，
七點幾就起身，
八點半就到球場。

一路等到九點二，
發覺唔係好對路，
因為球場入面 d 人打緊羽毛球，
其他人又唔見黎。
結果返屋企。
由樂華村行返落淘大，
再坐 14 號返屋企。

返到去上網一睇，
咦？
發覺原來約左今晚九點……

之後等艾力斯起身，
約去睇戲。
三點幾四點又出返淘大 -_-;

最攪笑係我上左小巴等緊開，
艾力斯打黎話佢係屋企樓下等緊小巴。
到我由佐敦去到淘大，
佢都仲係屋企樓下等緊小巴。

回合左，
就先去 Game 鋪睇下有冇 PSP 賣，
有行貨，
要跟一隻 Game。
四選一，
不過都冇興趣。
打消念頭。

就去買飛，
用信用卡有九折，
即係四十一元，
但用學生證只係四十元。

今次睇套 Mr & Mrs Smith，
好正，
不過正如我同事所講，
找間音響正 d 既好爽好多。

睇完戲食完飯，
就同艾力斯上返球場 Join PSP Group 班人打波。
唔單止耐冇打波，
運動都少左做。
結果好多籃底 Fake 晒都射唔入，
之後仲要抽筋 Tim ><

打完波好夜，
我冇 Join 佢地宵夜就走左了。

鬼鬼祟祟偷蕃薯

今日中午食飯去左偷蕃薯。
咁其實咩係蕃薯呢？
簡單 d 黎講，
就係買東西。

話說係我去開個網，
如果你靜靜雞唔出聲去買鏡頭呀、相機呀，
就會被人稱為鬼鬼祟祟偷蕃薯。
講講下，
一切買東西，
尤其是一些特別的東西，
就會叫做偷蕃薯。

不過可惜，
今次偷蕃薯行動係失敗既。

中午 Lunch Break，
我就坐地鐵落樂富吉之島。
就埋去櫃枱，
佢竟然話賣晒 wor。
明明昨日打電話去都話有十幾廿部……

係 Wor，
都未講舊蕃薯係咩添，
咪就係 PSP lor。

係 Pokka Cafe 食左個蛋包飯午餐，
應該係庵列飯。
同台灣食個次有少少分別，
我覺得台灣好食 d。

之後再坐返地鐵返觀塘。
係車箱中，
見到五個身穿制服的執法人員。
佢地唔係警察，
而係地鐵附例執行組。
五個人，
兩個手持藍色袋，
三個持寫字板，
都唔知咁多人做乜？
警察都係一個或兩個巡邏，
佢地五個人，
預左打大交？
怪哉怪哉。

---

講返少少昨日野，
話說前年旅行 d 相晒左出黎，
畀媽媽睇，
結果換黎既係一句痴線。

「痴線架你地，
影三百幾張相，
得果幾張係影人，
其他係影景。」

要找時間入返 d 相落相簿了。

另謀高就？

本來今日冇咁早寫日記，
不過中午食飯有段爆笑對話，
唔現在寫驚唔記得。

「你走喇？」

「係呀。」

「幾時走呀？」

「下個星期五。」

「都係好事黎既。」

（又關你事？）

「去邊呀？」

「美國。」

「咁你飛過去 in 呀」

「係呀。」

「嘩，咁你拿一年個 d 簽證呀。」

「唔係呀，十年個 d。」

「工作簽證有十年架咩？」

「我都唔係拿工作簽證。」（我去旅行，拿工作簽證做乜？）

「咁唔可以係個邊做野架wor。」

「係呀。」（都冇想過係個邊做野？）

「過到去先算？過到去人生路不熟 wor。」

「係呀，不過我識人係個邊。」

「哦，有 friend 係個邊，咁又唔同」


（後按：
佢以為我唔做，
真係笑鬼死我。）

---

尋晚做到兩點幾，
今朝七點就起左身。
結果順利地 KO 埋餘下個 d。

Foul 走影得太差，
又或者同一個景影三四張個 d。
再加埋某人影個 d，
總共約三百張。
中午食完飯，
走左去觀塘廣場晒，
乜都冇問就畀左隻 CD-rw 佢，
落訂個時先問價錢，
原來晒咁多都要一蚊張，
唔知有冇野送呢？

以為要第二日先有得拿，
結果一陣放工就有喇。

信差

唔知點解，
我明明係去旅行，
又或者叫做探「親」，
但係結果就變成一個人肉信差。

買手信返黎係指定動作，
幫人係個邊買 d 野返黎都好正常，
但係結果連去個程都要帶 d 野個去。

先講講有咩要買返黎，
早幾個月已經有同事託我買件棒球外套，
今日又有同事託我買花旗蔘茶，
仲有媽媽要買個 d 乜乜丸、物物丸。

今晚出左永安，
原本係媽媽拿件不合身的外套去換，
結果就變左購物團。
佢老人家買左兩件衫畀自己，
又買左件畀遠洋既佢，
佢仲申請埋同 VIP tim，
但係個牌子好似係 Sell 年青人既。

可以想像下，
一班上左年紀既女士，
一齊穿住件米老鼠，
又或者 Flex the Cat 會係點既樣。

買完野，
就去食野，
食完野，
就去左飛髮。
今次黎過大變身，
看看我 ICQ Nickname，
就大約會估到飛左個咩頭。
簡單 d 講，
就係一頭亂髮啦。

---

仲有九日，
今日仲將兩個月既日記，
由 Showhappy 搬左去 Blogspot。
亦都 Ko 左 140 張相，
仲有 70 張左右咋。

做好準備

下個星期五就起行，
發覺原來有好多野未預備好。
未曬上次旅行 d 相，
「上次」既意思，
係指 2003 年 12 月，
真係動作慢。

不過係曬之前，
我係應該揀相先，
三百幾張相，
現在先睇到 #100，
幾時先攪掂？

Anyway，
我鐵定星期四拿去曬相鋪，
執唔切就曬晒佢啦。

其次，
要買定 d 裝備，
不過得返一個 Weekend，
攪唔攪得掂呢？

仲有打發時間既玩意，
原本以為有 PSP 打，
不過現在未必買得切。
咁我今日就係部 Pocket PC 裝了三集 Games，
到時拿兩三本書，
（我書櫃大把書買左未睇）
儲定幾集卡通係部 Pocket PC 度，
廿個鐘既旅程應該過得到掛？

呢排係咪興做舅父？
繼阿力真係做左舅父之後，
細牛係佢日記又話就黎做人舅父。
而我家姐亦都好似有左。
四虎中有三個做人舅父，
Edmond 你慢慢等啦，
呵呵呵

不過，
我好似幾歲既時候已經係人地舅父仔，
不過係關係好疏堂個隻。

---

昨日倒數錯誤，
應該今日先係仲有十日就考試，
仲有十一日先起行。

滿漢全席

Edmond 昨日做節，
所以係力王家只係玩一個下午。
今日輪到我家做節喇。
媽媽話訂左枱七點半，
我為免因要開會而遲到，
決定先發制人。
四點鐘就衝入老闆房傾，
睇怕四點傾完，
佢唔會六點又話要開會掛。

六點半離開公司，
先過 APM 間吉之島，
我開頭以為係十蚊店，
點知原來係超級市場，
攪到我買唔到想買既野。

禍不單行，
之後仲要送車尾……><
準時七點半去到酒店個中菜廳，
點知只係得姐夫係度，
媽媽又話未夠七點半佢就會到……

原來佢同家姐去左睇中醫，
結果八點幾先等齊人食飯。
除左我地一家，
仲叫埋左世交 Auntie 同 Uncle。

我亦收到今年第一份生日禮物，
原本以為有得即刻玩 PSP，
點知原來係折現。
最慘既係，
行貨原來斷晒貨，
六月中、尾先有，
仲要 Waiting List 已經四、五百人。
即係冇得係飛機上玩啦。

Anyway，
講返 d 野食，
不過實有人話我又引佢。
今次食滿漢全席第三篇，
好多野食，
樣樣都好好食。
不過七個人食八人餐又真係難左 d，
結果拿左三盒返屋企……

---

開始倒數，
仲有十日。

有招出招

激死我，
今朝訓,醒，
見到隻狗訓係我床邊。
望望下佢，
覺得有 d 唔妥，
如來佢咬緊我手提電話個叉電器！
現緊用電線膠紙貼住，
但點都危險，
希望買到 Replacement。

去完崇拜返到屋企，
就收到 Edmond 電話，
話出阿力度玩。
我地四個一個月點都會聚一次以上，
不過通常都係打機同打牌。

今次打機除了 Winning Eleven 同筋肉人之外，
仲玩左個新 Game 沙灘排球。
我開頭以為係街機個隻，
點知唔係，
我仲唔係好識打 tim。
結果被細牛同 Edmond 個隊打到落花流水。

最攪笑係 Edmond 有時開波落網或出界，
細牛就會話：「開入場區得架喇。」
但通講完呢句，
就輪到細牛打落網。

無記有個「有招出招」既節目，
上個星期係要求參賽者 60秒內砌好 d 麻雀成井宇形。
今日我地都試下，
不過細牛同 Edmond 都失敗左。
輪到阿力，
佢四十五秒已經攪掂。
真厲害！

至於我？
沒有試呀，
都係保留實力好，
冇謂開晒底牌啦。

一如以往，
我地四個打牌係唔打錢既。
（其實係因為就我）
以掌上壓代錢。
打到南圈，
因為 Edmond 做節要早走關係，
所以要腰斬。
最後一鋪，
有感於大家叮噹馬頭，
我地決定加大注碼，
將最後一鋪乘五。

結果由細牛自摸六翻，
我地三個要做三十幾下。

雀聖

中午放左工橫風橫雨，
同個 Electronic Engineer 出左旺角睇戲。
睇既係雀聖。
呢套王晶既新戲，
唔會 expect 佢好有深度，
純粹為左笑下姐。

套戲開 14:10，
13:45 出到去。
原本以為冇乜人睇，
點知都幾 Full，
結果要坐第二行。
但因為第一行同瑩幕有一段距離，
其實又唔係睇得好辛苦。
但係間院就係新加上去，
乘完扶手電梯，
仲要行多兩層，
好高。
間院亦都好細。

套戲畀我有八、九十年代既 Feel，
成套戲好似八、九十年代咁，
當然個景係現代啦。
其中有個景，
係我公司對面間茶餐廳 tim，
我星期四先去食完黎。

睇完戲，
係旺角行左陣，
收到媽媽個電話。
佢話佢就去到佐敦
十分鐘就到中醫處。
我有旺角行落佐敦，
行左半個鐘左右啦，
點知都係早過媽媽到。
媽媽講 d 野，
真係唔好信到十足。

之後過超級市場，
撞正個度到有新樓盤。
個百地產經紀係度，
幾經辛苦，
先打過木人巷，
入到超級市場。

健身單車

今日放左工，
坐 11x 去黃埔。
因為約左阿兆去黃埔加記 Gym 上踏單車班。

七點十分去到黃埔加記，
呢間分店開左一年左右，
所以個感覺好新。
同旺角唔到，
旺角個間係三層，
呢度係一層過。

呢度有唔少新款既機，
例如有部夾胸既，
我就未見過。
部 Leg Extension 個放腳位都改左。

Changing Room 亦都唔錯，
係有少少迫姐。

個班七點半開始，
其實係 For 中級，
我呢 d 初學者其實唔適宜參加。
不過一黎佢 d 初班少，
二黎又夾唔到時間，
所以焗住黎呢個。

正式開始，
有少少跟唔到我都預左。
其實最主要係唔明點較佢 d resistance。

講返個班，
一路播音樂，
一路配合節奉踏。

時快時慢。
有時甚至配合埋歌詞 tim。
例如播太極首「紅色跑車」，
當去到副歌：
Let's to highway 閃出眼淚 像鑽石茫茫然抹去憂慮
Let's to highway Baby 留下這打火機在車裡

就要 Double Speed 咁去踏。
可惜對腳唔生性，
可能 Resistance 既問題，
好快就積左好多乳酸。
心肺仲有大把，
但隻腳上唔到。

Burn Fat 可能好有用，
但就對 Training 幫助不大。

等待？

原來係不適當既時候，
做不適當事係好難既。
例如我想係六月買張聖誕卡，
找左兩個星期都找唔到。
如果你地見到邊度有，
麻煩講聲我知。

---

看見細牛將會完成了十八個月的等待，
真係好羨慕。

我仲要等幾耐呢？
唔知。
等到之後又點呢？
唔知。
畢業之後又點呢？
回流定留係個度呢？
都係唔知。

人生好多時就係充滿咁多「唔知」，
如果劇本已經一早預備好，
「演員」既責任只係依照劇本去做，
咁又有乜意義呢？

仲要等幾多年，
等完之後點，
咁快寫定劇本做乜？
當然，
有份大綱總會好 d。
如其花精神時間去想十年八年後既野，
倒不如想下黎緊呢幾個星期做 d 咩咪仲好。

我唔知十年八年後會點，
但我知道，
如無意外的話，
十五日後，
我就會身處三萬五千尺既高空，
去放我好耐冇放過既長假期。

每月理財回顧

六月一日，
又到一個月 Review 既日子。
筆非經常性收入終於到入。

買機票洗左唔少，
呢筆非經常性收入總算可以幫補下。

非經常性開支方面，
唔計機票，
沒有超支。
原本打算買 Ram，
結果都係唔合心水價，
未買住。
個 Speaker 上個星期壞左，
現在用緊個普通貨。
沒有低音，
沒有音量控制，
唔係幾慣。
不過應該唔買住，
因為買左都未必有時間用。
費時放個新 Speaker 係度封塵啦。


而經常性開支方面，
僅僅 Meet 到 Requirement。
不過好多時都係因為有定向比賽，
所以可以鬆動返少少。
今個月一場定向比賽都冇，
再加上要去美國成個幾星期。
一日三十呢個計劃似乎都幾難實行。


今個月開始，
我會做返十一奉獻。
一直以來，
都係隨心所欲，
現在打算有系統 d 奉獻。

不過要睇吓我幾時返崇拜，
應該今個星期既，
我既第一次十一奉獻。
不過首先要入返錢落支票戶口。

攪盡腦汁的裝修

搬左新屋，
當然要裝修吓啦。
唔知叫做 Flexable d，
定叫麻煩 d 啦。

係 Showhappy，
淨係可以改 Javascript。
當然以我既 Javascript 造藝，
改得 Javascript 即係可以改晒所有野。
我連 Popup window 既 bacjkground 改到，
心情圖示改到，
甚至連佢 d 廣告都改到埋。

至於 BlogSpot，
佢改既唔單止係 Javascript，
而係成個 Template 咁改。
有玩過 Php Forum 個 d 應該會接觸過，
改左個 Template 之後，
冇論你個 Content 係乜，
都可以 Show 到你想要個樣出黎。

BlogSpot 提供左十數款 Template 畀你選，
基本上唔駛點改都得。
但我當然唔甘於就咁啦，
更可況我唯一一個鍾意那個 Template 係有 Bug。

係裝修之前，
其實仲有 d 麻煩野。
咁我話畀人知我有個新地方啦，
點知 Feedback 話只有空白一片既 Blank Page。
點解呢？
原來 BlogSpot 可以選 UTF-8 做 Encoding，
佢用 IE 唔識認 UTF-8，
結果就出 Blank Page。

但係我見其他人，
例如 Lapson 同細牛那個都 Show 到。
花左半日既研究，
最後發覺原來個 Title 第一個 Character 係中文就會炒，
咁我將「新家鄉小炒」改做「@新家鄉小炒@」就冇事喇。

正式開始裝修，
整整吓，
發覺個 Template 本身有 Bug，
其中一個 Background 應該唔會 Repeat，
但就出左兩次。

後來發現 Owners Description 個段有問題，
現家個「自我介紹」係我自己砌出來，
雖然都仲有少少分別，
但都九成似架。

唔知你地對我新居既裝修有咩意見呢？
交流下，
等我再改好 d 丫。

終於完工

明天有件貨要 Ship 走，
今日繼續趕工。
Software 攪掂，
Firmware 攪掂，
係欠 d fiber 未 Secure 好。
想好耐都想唔到解決方法，
用左 Cable Ties，
但老閣都驚唔夠 Secure。

最後係五金鋪買左 d Adhesive Back Mounting Bases，
貼在電路板，
再固定條 Cable Tie。

邊個去五金鋪買 Mounting Bases，
唔係我，
唔係另外個 Engineer，
竟然係全公司最「大粒」個兩個。
兩個 Directors 走去買野，
係咪資源錯配呢？

---

最近玩緊個幾得意既 PC Game，
叫做 LEGO Star Wars: The Video Game

成個 Game d 野都幾乎係用 Lego 砌成，
好鬼得意架。

個 Game 係由前傳一玩到前傳三，
除了故事模式外，
仲有得 Free Play。
不單要完成指定既 Tasks，
每關仲要搵齊十件 Lego Parts，
砌成一件野，
例如 Jedi Fighter、Emergency Ship 等等，
已呢 d Lego 玩具係現實生活都買得到架。

如果每一關既分數都達到一定標準，
仲有神秒關玩 tim。

當然唔係就咁打打打啦，
有 d parts 要考考 IQ 先拿得到。
有時仲要用唔同角色合作先得。

學推胸

今日冇去崇拜，
因為有堂要上。
約左十一點半，
教練叫我地早 d 去就可以早 d 上堂。
點知我臨出門口時，
有兩個不速之客。

唔知佢地係咩教會，
只知道我清楚表明我已經做左基督徒十幾年，
個個星期返崇拜，
佢地都係不斷咁黎。
唔通基督徒真係有樣睇？
我個樣唔似基督徒？

Anyway，
十一點十五分去到旺角一座商業大廈一間 Private Gym 到，
有一個 Free Weight 技術改進工作坊。
今次講既係推胸，
溫故知新，
學左幾多野。

返到屋企，
見到艾利斯係網上。
問佢幾時去做 Gym，
佢話今日，
結果我剛剛由旺角返，
食完午飯後又出返旺角。
不過因為我遲左半個鐘，
結果成五點半先 Check in。
攪到完既時候艾利斯好趕咁走。

返到屋企洗落米，
等左一陣，
媽媽就返喇。
但媽媽今日又跌親，
剛剛好返，
又傷過......

---

今日係 Gym 只係推胸。

1. Barbell Incline Bench Press (鍛練上胸) 12/0lbs, 8/5lbs, 8/10lbs, 8/10lbs
2. Machine fly (鍛練中胸) Drop Set 12/70lbs, 10/60lbs, 10/50lbs, 8/40lbs, 6/30lbs; 12/50lbs, 6/40lbs, 6/30lbs, 6/20lbs, 6/10lbs
3. Decline Barbell Bench Press (鍛練下胸) 12/10lbs, 12/10lbs, 12/10lbs
4. Decline Dumbbell Flyes (鍛練下胸) Drop Set 10/10lbs, 10/8lbs, 10/5lbs; 10/10lbs, 10/8lbs, 10/5lbs
5. Isolation Chect Press (鍛練中胸) 10/10lbs, 10/10lbs, 10/10lbs

新地方！

唔知係咪我好容易冇左戒心呢？
定係當愈接近終點，
就會愈放鬆呢？

點解每次臨到 Deadline，
總會有好多鑊爆出黎呢？

本來今日係短周，
不過結果我都左返公司。
原因就係昨日爆完鑊，
未攪得掂，
結果今日要去執手尾。

辛勞一朝既結果係，
似乎病情受到控制。
當然係我作出讓步之後發生既事啦。
話說要將某 d data 寫落 flash 到，
但個 data 同 code 係寫落同一粒 flash 到。
其實一直我都係唔可以完全地好好控制粒 flash，
不過見佢冇鑊爆就唔理佢。

結果呢幾日完全唔得，
讓步既結果係唔寫落 flash，
寫落 RAM。
咁 RAM 有個特性，
就係一斷電就會冇晒 d 野。
好彩既係，
原本 Design 已經要放一粒鈕形電落去，
做過實驗計過，
唔插濕電可以保存資料 2.5 年，
但個 Device 一般黎講都會插住外置電，
亦即係話，
理論上可以儲無限耐。

---

以往用開既 Showhappy 成日 Down 站，
試試轉去呢度。

日記會兩邊都出，
試用一個月再作打算。

---

原來唔經唔覺，
仲有二十日咋！

運動心理工作坊

臨放工既時候，
原本天朗氣清，
特然下起雷雨來。
攪到大家都好狼狽，
雖然我帶左把縮骨傘，
公司更長期放了把長傘，
但仍然濕晒咁滯。

我差不多七點半先去到長沙灣，
但係個工作坊其實七點正就開始。
講返個工作坊，
係定向總會攪既，
題目係「運動心理學」。
內容其實係以前上教練班，
又或者技術改良班都聽過，
都係個 d 「正面思想」呀，
「Performance 式既 Target」呀，
所以得著其實不大。

不過最尾那些關於催眠既就幾得意。
最尾那個嘗試深層睡眠，
其實有冇人真係得呢？

因為試緊既途中，
鬧鐘響了。
其實係有人電話響。

都唔明，
點解到現在 d 人都係唔會熄手機。
無論係戲院，
開緊會，
崇拜中，
上緊堂，
甚至係考緊試，
都聽過電話響。
就算唔熄機，
都熄左聲，
又或者攪震機丫。

其實佢地係唔知咁會影響人丫，
定真係以為自己大晒？

灰姑娘

同一層有三個姊妹，
兩個家姐擴張既同時，
細妹卻不斷萎縮。
咦，咁似灰姑娘既故事既？

不過，
灰姑娘冇受到後母唔好既對待，
相反只係灰姑娘自己唔爭氣而已。

無論點都好，
我都希望「神仙」會出現。
灰姑娘會換上美麗的衣裳，
穿上玻璃高跟鞋，
乘坐南瓜馬車，
最後嫁給王子，
快快樂槳咁生活。

係神仙出現之前，
加油呀炒炒。

---

今日返到屋企，
枱面既係兩盒飯盒。
原本應該五六點返黎既工人，
七點幾先返黎。
結果 d 餸係媽媽煮，
而 d 飯盒係中午媽媽飲茶時淨低既。

由昨日開始，
媽媽開始對工人有不滿。
起因係昨日工人病左，
媽媽叫佢去健康院睇醫生，
佢好似唔多願去咁。
後來媽媽叫佢睇完打畀佢，
結果又冇左件事。

之後有人打電話黎搵工人，
媽媽話佢病左 sleep 左。
d 電話仍然不停咁響。
最後媽媽一怒之下 Enable 左「請勿打擾」功能。

選舉

立法會在今天五時半通過了《 行 政 長 官 選 舉 （ 修 訂 ） （ 行 政 長 官 的 任 期 ） 條 例 》，
在同一日，
擔任了七十五日署理特首的曾蔭權正式宣佈參選特首，
並辭去政務司長職位。

七時半，
我返到屋企，
媽媽正睇緊電視。
播播下劇集，
特然 Stop 左，
播特別新閒報導，
原來就係曾蔭權既記者會。

我既當時既感覺係，
終於宣佈參選了，
好似了解左件心事咁。

記得董建華競選連任時，
一口氣取逾700個提名。
因選委會只有八百人，
所以沒有其他人可以取得夠數既100個提名。
以至董建華沒有競爭既情況之下順利當選。

雖然選委會只有八百人，
但講到尾特首服務既係全港市民。
第二屆選舉時，
佢有冇交過 d 咩政綱，
有冇接觸過市民呢？
我完全冇印像佢做過。

其實有競爭都係一件好事，
起碼會鞭策你做得好 d。

讀 U 個時，
我個屆係至零五年為止，
最後一屆有多過一個內閣。
我個屆之後，
全部都係得一個內閣參選。
我唔敢話我個屆做得好好，
但眼見有幾屆既師弟師妹，
可能因為冇對手，
宣傳期做既野正程唔及格。
唔覆會員既問題；
冇預算；
冇詳盡計劃等。
咩都見過。

希望「歷史」唔會重演又重演。

---

今日原本應該練跑，
不過去到見到得只三個人，
房門鎖左，SOC 開緊會又費時打擾佢地，
自己又有些少唔舒服，
結果衫都冇換就走左。

Credits

昨日終於收到那筆「非經常性」收入，
幫補到今次旅行，
甚至仲有餘數 tim。

不過，
要困成年。
如果唔係，
就要回返一半出黎，
即係差不多白做一個月。
更甚者，
如果係想即走，
就即係嘔返兩個月出黎。

不過對於我呢 d 「平穩是福」主義者黎講，
呢個機會微乎其微。

---

今日係大虎第二日返新工，
亦係佢生日。
佢好慘，
要一個人過生日，
原因係公司派左佢上大陸，
仲要 stay 過夜。
冇得係香港過生日，
不過我今年都係。

其實係邊過生日，
有冇生日禮物收，
對一 d 人黎講，
可能好重要。
但對於我黎講，
真係 「Don't Care」

十萬八千人同我慶祝，
又係咁過。
得兩個人，
又係咁過。
甚至乎得一個人，
都係咁過。
又有咩分別呢？

假設有 10 個 Credits，
如果要係生日用晒呢 10 個 Credits，
我寧願分 10 日，
每日用 1 個 Credit。

---

係網頁見到有心理測驗，
貪得意又做左。

第一個係求愛膽量大測試

膽小如鼠
你的求愛膽量非常細，
同鍾意的人一齊，
你會全日都面紅耳熱，
唔知講乜好，
仲可能會漏口添。
雖則係咁，
你起碼都唔會成日避開鍾意的人，
更加唔會因為心急而亂講說話，
嚇親人仲令人誤會。
不過如果對方唔做主動，
你應該一世都唔會開口表白示愛

第二個係對愛情既野夠唔夠敏感
甜你條尾
你個人樣樣o野粗枝大葉，
細眉細眼o野你梗係唔掂。
何況係愛情呢樣咁微妙o既o野？
你o既感情硬繃繃，
都係要配合返一樣咁硬朗o既人至玩得長久。

"He will take care you"

昨日比完賽，
去左睇星戰前傳三。
原本係得我、阿迪同阿健三個去睇，
點知大同艾利斯打電話來，
結果就四個人去睇。
四點四十分先開場，
我地三點到青衣城，
結果逛左成個幾鐘先有得入場。
坐 H 行，
唔算好前，
算係幾適中啦。

今集講 Anakin 入魔既過程，
其實睇左星戰四（即係第一套），
多多少少都估到（知道）劇情發展。
今集唔係 So far 六集中最出色的一集，
但到唔錯。

不過都有 d 唔係好合邏輯既野。

例如一個斷手斷腳，
被熔岩燒既既可以救得返。
好人好姐因為生存意志唔強，
所以幾高科技都救唔到。

又例如班 Jedi Masters，
好似好勁咁，
結果係不堪一擊。

套戲都有 d 好好笑既地方。
例如 Yoda 講親野都將句子次序前後調轉。
"I don't think he will die"
講成
"He will die" 停一秒 "I don't think"

仲有一個中文翻譯先有既。
話說 Sith 安撫個班分離派，
話會派佢個徒弟去。
英文對白係：「He will take care you」
但中文對白就將 "take care" 譯成 "料理"
即係"殺" 啦，
完全講唔通。


睇完戲，
我同阿健都要返屋企食飯，
阿迪係冇人陪食飯既情況下，
都要返屋企。
Alex？
落葵芳掛。

煞科

今日係賽季最後一場公開賽，
係青衣攪既色級賽第五場。
係青衣今年攪左三場比賽，
一場童軍練習賽，
一場學界賽，
同埋今場。
三場我都有出現，
頭尾兩場係做賽員，
中間個場係做工作人員。


講返今日場比賽，
天氣非常嚴熱，
天文台錄得 34 度攝氏。
我以為賽程短，
所以冇帶水袋，
點知咁就高估左自己喇。

全程移動得極慢，
因為體力不繼，
犯左大錯 tim。

話說由三號 Point 去四號，
原本沿等高線去冇行題，
點知行行下打算爬過個山咀會快 d 啦，
點知一爬就爬左方向，
結果呢段用左七分幾鐘，
最快那個用了一分鐘咋。


賽程 3.5 公里，
攀高 150 米，
總共 22 個控制點。
以為冇大 Long Leg 會利我，
點知大錯特錯。
結果用了接近個半鐘先完成，
平均 24 分 7 秒先跑到一公里。
時間比第一那個慢 33 分 47 秒，
只得第六，
真係慚愧。

Tone or Frequency?

今朝返工，
原來個 Project 我一路都有 d 野誤解。
其中一個 Freature 係 Tone Detection，
但係我就當左係 Frequency Measurment 咁做。
Tone Detection 同 Frequency Measurment 咪差唔多，
乜有分別既咩？

開頭我都係咁想，
點知原來唔係。
Frequency Measurment 就係度到咩 Frequency，
就 Display 咩出黎。
例如度到 270Hz 就出 270Hz，
2KHz 就出 2KHz。
咁當然會有誤差啦，
咁我現家既做法係，
度到 300Hz 都當 270Hz，
1499Hz 都當 2KHz。
咁如果大過 Hardware Limit 咁會點呢？
出 Overflow lor。

Tone Detection 就唔係咁 Display 喇，
設個 Threshold 係 10%，
咁 243Hz ~ 297Hz 都當係有 270Hz 呢個 Tone，
300Hz 就即係冇 Tone，
係冇 Display 既。
Overflow 個 case 亦都一樣，
係 Display 冇 Tone，
而唔係 Display Overall。

---

放工之後，
個同事問我食唔食飯，
咁咪一齊食 Lor。
去左紅螞蟻食，
d 野食黎得好慢，
杯餐飲一早黎左。
但係幾乎飲晒杯野，
d 食物都未到，
有冇攪錯？


食完飯，
去睇中醫。
醫生都係話我唔夠訓，
肝虛 Wor。

Solution Provider

我成日都話自己唔係普通 IT 人，
而係 Solution Provider，
並且名不虛傳，
今日又有一實例。

話說部 Call 機形能量計幾乎去到最後階段，
不過就有個幾棘手既問題，
就係 Detect 到 Tone 就熄唔到機，
熄唔到機就 Detect 到 Tone 。

點解會咁呢？
話說所謂既熄機，
其實自係粒 MCU 進入 Sleep Mode，
Cut 埋其他 Chips 既電。
當某幾條 Pin 是旦一條係 Logic Low 既時候，
粒 MCU 就會醒返。
其中一條 Pin 駁了 On/Off 制，
問題唔係出係呢度。
另一條 Pin 係駁了 Tone Detection 既 Input，
而個 Input 係黎自粒 Op-amp 既。
當粒 Op-amp 斷電，
就會係 Logic Low，
咁粒 MCU 自然會醒，
即係熄唔到啦。

個 Electronic Engineer 試過唔同方法，
甚麼 Pull-high、
加個 Buffer 呀咁，
都係唔得。

最後我講左句，
即然斷電既時候佢出 Logic Low，
加個 Inverter 轉去做 Logic High 咪得 Lor，
咁就 Solve 左個 Problem。
仲要由個唔識電子既 Solve 到，
我都覺得自己好勁。
讀 U 時呢科我 Retake 左一次，
Retake 時我第一次 Final 都係唔及格，
要補考先過關。

本來老闆話明天要 Demo 畀佢地，
我今日已經攪掂晒畀佢，
如果唔係上面講那個 Problem 出現，
可能 Demo 得更加完美。

原本話要用一日寫既那個 Tone Detection，
我用左十五分鐘就寫完，
成日淨返既時間，
就係讓個 Electronic Engineer Solve 那個 Problem。

---

細牛都開始寫 Blog 了，
我又有故事追，
真好。
佢唔講我都唔知，
個位寫 Blog 寫到懶有意境既大虎，
原來停左差不多成年，
我都年幾冇去睇過了。

別人的 Blog

有 d 鐘意睇人地 d Blog。
昨日係個中學師兄（佢都好似上黎留言）個 Newsgroup 處，
見到佢話 Poly 請人，
問有冇人有興趣。
個 Post 係唔知乜乜 Assistant，
但係要識 Nework Programming 同 Graphic Programming。
咁我一想就想起大學同學 Lapson，
Send 左個 Message 問佢有冇興趣之後，
順手就睇下佢個 ICQ Info。
意外地發現原來佢都有寫 Blog。
咁呢兩日就追晒佢 d Blog，
由 2000 年 11 月，
一路睇到 2005 年 5 月，
足足睇左過去四年半既事。

好彩佢唔係日日寫，
如果唔係真係有排睇。
頭個一兩年既，
其實仲係大學時期，
一路睇，
都想返起以前既野。
例如我第一份，
亦都係唯一一份要抄既 Program 功課，
其實本來都係一路當 Reference，
一路自己改，
順手幫份 Source Debug。
點知到 Deadline 前一個鐘，
個 Program 炒左，
結果都係硬住頭皮拿份 Source 交，
最後都被人發現，
扣晒分咁滯。

亦都想起在 Product Development Project 個 Lab 既野，
成班 i.2000 打 Street Frighter；
通頂趕 Projects；
一個人做兩個人一組既 Project；
圍埋一齊溫書；
睇住其他人 Plan 歐遊，
自己又冇得去等等。
往事如煙，
現在想返起，
其實都幾懷念。
大學生活，
其實都係一個幾重要既經驗。


Lapson 既 Blog，
有幾多都係講長跑比賽。
大路之王、
渣打馬拉松、
步步創高峰、
水塘杯、
越野跑等。
說來慚愧，
我成日話要練跑、
話要參加比賽，
結果呢？
人地跑到一季十幾廿場比賽，
渣打馬拉松都跑過兩次。
我呢？
一次 10km 都未跑過，
仲要係可唔可以完成到都冇信心。

講講下，
除了眼中的淚水，
心中團火都出埋黎了。

態度

臨收工又被老細捉左去開會，
以為又要七點先走得啦，
出奇地佢好似想趕我地走咁，
呢樣又話唔駛傾住，
個樣又話茶餘飯後想想先。
結果六點半到就開完會，
出到黎，
去一去厠所，
出到黎老細已經走左。
原來趕住走，
怪唔之得咁早放啦。


七點半先出到 SOC，
阿棟同阿迪已經帶左隊落去。
我換完衫落到去，
佢地話跑三十分鐘，
不過我熱完身、拉完筋，
佢地都跑左大半，
結果我只係跑左一個圈。
跑左幾耐呢？
唔知，
因為今日唔記得帶心跳錶……


之後有個 Shadowing 既定向，
我地三個舊人跟三個新人，
至於個小朋友就唔理佢。

其實如果佢係跑得慢，
技術唔好唔緊要，
邊個未試過丫？

最唔滿意係佢既態度，
返到黎唔認真，
明明跑得到，
都要係到行，
咁仲有乜計丫？

佢直情拖慢晒 d 進度，
所以我地決定，
d 訓練唔會專登就佢。

跑完返到會，
見到一班教練埋頭苦幹。
原來又到一年一度續牌時間，
要填返教過咩班，
有咩個人進修，
又係時候搵返 d 資料了。

真理愈辯愈明？

人真係一種複雜的生物，
只要有多個一個人的存在，
就有機會有爭執。
可能係為了大是大非，
乜有可能係為了芝麻綠豆的事。

旁觀者看在眼裡，
有時會唔明佢地為咩爭論。
但係當事人呢？
佢地會覺得爭論得理所當然。

有人話：「真理愈辯愈明」
如果處於心平氣和下的討論，
呢句可能係對的。
但係程度好容易會升級，
愈論愈燥，
愈論愈火，
最後有討論變成爭論。
由初初的意見分歧，
演變到勢不兩立。

一個人可能真係會少 d 爭執，
但人始終是群居的，
一個人避世，
又談可容易？

退一步海闊天，
如其爭執到一發不可收拾的局面，
倒不如自己先退一步。
呢到講既退一步，
唔係話走左去個種退一步，
而是退後一步，
View angle wide d，
看得廣 D 多 D，
綜觀全局。

最近在幾個 Forum，
分別有幾篇討論。
結果都係其中一方發晒爛渣。
有 d 爆粗，
最尾幾篇只是問候人地家人。
有 d 開始語無論次，
風馬牛不相及。
有 d 就表現出心灰意冷，
聲稱不再出現在該 Forum 云云。

放假的一天

今朝十二點出左深水步，
同 OMUser 班網友去機鋪打機。
佢地打賽車多，
但我原全唔識玩，
結果都係打 KOF。
點零鐘去食野，
食完佢地話出旺角唱 K，
不過我冇去到，
因為今日 Plan 左上黃金買 Ram。
行晒三層黃金高登，
格完價，
個價位唔合心水，
結果冇買到。


之後過鴨寮街行，
係華輝撞到大衛黃同學。
陪佢係買零件，
我亦自己睇下野。
買左把卡尺玩，
祖國牌既膠制卡尺，
九蚊一把，
幾抵玩。


行到累，
過左西九龍飲杯野。
原本打算去 Cafe，
不過路過仙踪林，
就入左去。

不過呢間野 d Service 唔係好得，
坐低左成十分鐘都冇人理我地。
叫個 Waiter 過黎，
佢都仲呆頭呆腦唔知做乜，
要叫佢執枱畀 Menu 先識做。

叫左杯藍梅珍珠，
味道一般啦，
唔係話特別好飲。
飲完野，
就坐車返屋企了。

例牌

昨晚比完賽一點幾先返到屋企，
沖埋涼都成兩點幾。
三點鐘先有得訓，
今朝又要起身返崇拜。
結果遲大到，
十一點先返到培正，
足足遲左半個鐘。


返完崇拜，
返左屋企食飯。
之後幫部電腦 Upgrade 上 SP2，
無驚無險 Upgrade 成功。
不過 PhotoShop CS2 個食 Ram 怪既問題都係解決唔到，
後來睇下 Forum，
有人話原來係中文 Font 的禍，
只要 Disable 左 Font Preview 就得，
試左，
好似好 d。

四點鐘過阿力到玩，
因為媽媽上左大陸，
所以要餵左布丁先。


去到阿力度，
例牌打下機，
打聖鬥士星矢同勝利十一；
同埋睇 Exam。
話說大虎同細牛都睇小新，
仲成日爭小新睇。
咁最新個期小新阿力換左地方放，
本來打算臨走時，
大虎問細牛睇左小新未，
之後係打開個櫃，
拿本小新落自己個袋。
點知細牛好醒，
黎到第一句就問大虎睇左小新未，
大虎奸計未得得得逞。


六點幾細牛溫完書過黎，
我地就開始打牌。
之後食完飯繼續打。
總共打八圈，
每四圈埋一次數。
兩次都係要做十零下掌上壓。

機票到手

今日雖然係短週，
不過好忙碌。
九點幾就同媽媽去銀行保險箱，
加埋我個名落去。
個銀行職員好煩，
係咁 Sell 我買儲蓄保險。
都話冇興趣，
仲係咁 Sell。


之後十點半去睇中醫，
睇完坐地鐵過海，
上 OA 拿返上次取消比賽張地圖。
之後落灣仔，
行 298 同電腦城，
買左個可以戴起手臂既 MP3 袋，
以後跑步就可以方便 D。
不過唔知幾時先會用到呢。

之後坐電車落上環，
先上 Agent 度拿機票，
不過剛剛一點，
佢地去左食飯，
咁我就過去好世界買條相機手帶先。
之後去左大家樂食午餐，
叫左個唔知乜乜雞扒，
以後都係食返焗豬扒食穩陣 d。


坐船返到屋企，
即刻執野預備今晚比賽。
六點出到荃灣，
先上百佳買電，
之後過大快活食飯。
用左十五分鐘，
食坐一碟飯，
一碗羅宋湯，
一杯綠茶，
同埋一杯水。


之後坐旅遊巴上牛寮比賽，
今晚好大霧，
發揮亦有少少失準。
和阿健係男子雙人奪分式取得第十三，
排頭三分一，
都算係咁啦。
不過應該可以做得再好 d。

錯體

Yeha，yeah，yeah
返埋今日工又有三日假。

---

呢個世界真係咩都有錯體，
連 DVD+rw 都有錯體。
話說買左部 DVD 錄影機，
呢部錄影機只支援 +r 同 +rw。
咁我今日放工，
就去左觀塘廣場買返兩隻 DVD+rw。
上到三樓，
求求其其選兩隻，
睇清楚係 +rw，
就畀錢走人。

返到屋企食完飯，
放隻碟入去試下啦。
敝，
部機 read 唔到隻碟既？
攪左好耐都唔得，
拿入房部電腦試下啦，
開 Nero 一睇，
竟然唔係 DVD+rw，
而係 DVD-rw。
拿返隻碟出黎睇，
碟面明明係 +rw 架 wor，
個盒又係寫住 +rw，
偏偏隻碟係 -rw，
真係玩死。


試埋另一隻碟啦，
又正正常常冇問題 wor，
又會攪笑成咁。

---

跟住教媽媽用部機，
又係激死。

節錄其中一段：
「睇完點回帶？」
（VHS 錄影機要回帶先可以 Overwrite 咁錄影）
「DVD 碟黎架，有得回帶」
「係呀，即係點回帶？」
「都話唔駛回帶，睇完唔要 Delete 左佢咪得 lor」
「我知呀，點樣回帶？」
……

日文班

今日日記講既都同今晚上日文堂有關。

首先係我覺得好攪笑既。
話說教緊一個文法，
講講和以前學的另外一個文法有咩分別。
老師話：
「我見到佢好凍，
咁就要用文法 A。」

之後佢指住個窗，
打開個口，
跟住呆左咁定左兩秒。
成班當堂係咁笑。

之後老師先繼續講書：
「我見到佢打緊冷震，
推測天氣好凍，
就要用文法 B。」


根住係我覺得激死既。
話說上一堂派左功課，
咁照常理都係做完下堂對答案丫。
點知今堂老師話因為所有同學都未做，
所以唔對住，
留返下堂先對。
激死我，
趕頭趕命做起份功課先返學，
攪到遲到，
佢竟然唔對。


之後就係唔開心既。
呢排好多人病病，
首先係我咳啦。
老師又傷風 Wor，
呢兩堂都成卷廁紙拿上枱面用。
今日又有另一個同學仔唔舒服，
上堂上左十幾分鐘已經頂唔順，
要早退返屋企。

希望大家都早日康復，
少 D 病痛啦。

x 特訓

放工出左 SOC 練跑，
今日個訓練都幾甘。
首先係 X 特訓，
咩係 X 特訓呢？
其實以前都講過，
X 特訓係變速跑既其中一種，

變速跑就是在快跑一陣後，
再慢跑一陣，
然後快跑及慢跑交替進行。
當慢跑時，
肌肉活動不很激烈，
運動所需能量靠吸入的氧氣進行有氧代謝就可以滿足肌肉活動所需。
當快跑時，
肌肉所需能量大大增加，
單靠有氧代謝不能滿足運動對氧的需求，
所以需借助無氧代謝來供給肌肉所需能量。
這種跑步方式的好處是不但能夠有效提高肌肉有氧代謝能力
(耐力的訓練)，
而且改善肌肉進行無氧代謝的能力
(肌力及速度的訓練)。

而 X 特訓就係靠數步來決定何時快、何時慢。
先跑五十步快，之後二十步慢、二十步快、二十步慢，
升級一百步快，之後二十步慢、二十步快、二十步慢，
之後百五步快，之後二十步慢、二十步快、二十步慢，
再上二百步快，之後二十步慢、二十步快、二十步慢，
繼續二百五步快，之後二十步慢、二十步快、二十步慢，
升至三百步快，之後二十步慢、二十步快、二十步慢，
再依次降至二百五、二百、百五、一百、五十。
限時係三十五分鐘，
不過我聽錯左係三十分鐘，
原本可以上埋三百五……


之後有個公園定向，
二十三個 Points。
第五個出發，
個 Flow 都算順，
不過都仲有唔少既錯，
可以再改好 d。


愈黎愈擔心佢地既身體狀況，
一個係媽媽，
一個係某人。

久病未癒

唔知點解，
我一係耐一耐都唔病下，
一係就病親都大大大鑊。
好似 d 咳咁，
咳左成兩個星期都唔好。
由寒咳變熱咳，
由白痰變黃痰。
醫生又睇過，
西藥又食過，
連民間療方都試過，
都係唔好，
原全唔知點解。

---

今日收到個 Agent 電話，
張機票出左喇，
Yeah yeah yeah。
係 e-ticket 黎，
原本佢可以 fax 張 confirm letter 黎，
不過我公司部 fax 機係收唔到 fax 既，
所有 incomming fax 都會變成 e-mail 去我同事個戶口。
所以我唯有趁星期六短週過去拿。


不過我上午要睇中醫，
下午過海拿，
順手過埋 298 買 d 野，
之後又要趕係六點前入到荃灣。
食完 dinna 之後上七點車去牛寮，
因為當晚有場黑夜定向賽。
就醫睇 d 時間，
都好似幾趕。

---

ICQ 改左 Nickname 做凡事感恩，
今日又有需要感恩既事。
話說呢排有驟雨，
今朝返工幾大雨。
上左小巴，
一路去到舊機場附近愈落愈大，
大到係幾乎睇唔到出面。
如果落車都咁大雨，
有大傘都濕身啦。

感謝主，
落車既時候，
雨細了，
甚至乎停埋呢！
哈利路亞！感謝主。

東隧加價

東隧加了價都成個星期有多了。
一路都話好多「將會」唔用東隧轉用紅隧，
紅隧將會大塞車云云。
我原本好驚架，
我住佐敦，
公司在觀塘，
每日返工都要經加士居道和漆咸道。
其中一個入紅隧的路段，
就係漆咸道轉上康莊道橋面，
係加士居道天橋黎既車，
如果想入紅隧，
就要由最右線切過去最左線，
所以繁忙時間呢度都會幾塞車。
但係呢幾日返工，
冇塞不特止，
仲幾暢順 tim。

新聞話東隧流量整個星期下跌了二十二個百份點，
而紅隧及西隧卻只有少量贈福。
三條隧道的總流量卻下跌 6%，
減少了一千五百二十二架次。
五一黃金週剛過去，
繼續吹風話今日會大塞車，
結果呢？
返工亦然好暢順。


原來，
只要市民肯配合，
係會有效率好多既。
只要大家多 d 用公共交通工具，
唔好「一人一車」，
路面自然少了車，
交通亦會暢順很多。
紅隧也可以冇咁塞的。

咁其實，
東隧加價，
係壞事一件，
定其實是造福社會呢？

母親節

今日係母親節，
首先祝所有母親母親節快樂。
原本今日有場色級比賽，
比賽地點係寶馬山。
今年賽季每場比場都跑得唔好，
呢場色級賽，
同月尾場色級賽都以訓練為目的，
好讓自己可以再次掌握比賽的節奏。
所以今場比賽故意報低兩個組別，
希望係較易既賽程中，
專心做好每條 Leg 既 Flow，
唔會因為難既賽段而分心。


昨晚天氣報告話有驟雨，
都預左會水戰。
今朝八點左右食完早餐，
見到出面已經開始落大雨。
上天文台網頁一 Check，
雷暴警告現正生效，
Oh no，
即係話賽事會取消。
轉個頭，
已經到今日做工作人員既阿健電話，
Confirm 左取消既事實。
後來仲有黃雨警告 tim。


原本想返崇拜，
不過家姐九點當完幾通宵更想同媽媽飲茶。
Well，唯有有所取捨啦。

因為去左飲茶，
我得到左關於生日禮物既消息，
就係有部 PSP 喇，
Yeah yeah yeah。


飲完茶，
冇帶傘冒雨返到屋企，
幫媽媽安裝部 DVD Rcorder。
之後訓午睡，
原本打算訓一陣之後去做 Gym，
點知一訓訓到黃昏。
應承左媽媽陪佢睇「早熟」，
所以都冇去做 Gym。
點知佢買十點場，
早知就做埋 Gym 先啦。
十點鐘，
係戲院門口 Join 埋媽媽同 Auntie。
媽媽 d 誇張句又黎，
我已經係門口等緊，
佢打黎問我做乜未到，
佢已經到左。
攪到我以為我去錯戲院，
原來佢仲係樓下未上黎……


好憎 d 人睇戲傾計，
有時講返套戲都可以諒解，
不過無啦啦同我講，
「咳就唔好飲凍水」
………


講返套戲，
原來差 d 走雞。
開頭見演員有房祖明，
有少少反感唔想去，
不過睇完又覺得套戲唔錯，
尤其是個兩對父母，
曾志偉、毛舜均、黃秋生同余安安。

睇完戲，
又火起。
話說因為夜，
想坐的士。
未行到路口已經伸手截，
我同佢講話方向不對。
點知行到路口，
佢失憶症又發作，
又伸手截的士。
究竟係我人微言輕，
定係我思覺失調，
冇講過都以為自己講左？

追星

買左支 11-22mm 既 Wide 鏡好耐，
但一直都冇為佢加添一塊用左保護既 UV Filter。
主要原因係佢咪有機會出動，
所以亦懶得去買。
為下個月既旅行煩左好耐，
究竟帶邊（幾）支鏡頭去好呢？
當然可以帶晒去，
不過一黎重，
二黎帶亦都未必用得晒。
係 Forum 問過意見後，
決定帶一定 Wide zoom(11-22)，
一支 Tele zoom(50-200)，
支 kit lens(14-45)唔帶。
亦即係話，
要幫支鏡買返塊 Filter。
趁今日下晝有野做，
不如出尖沙咀買啦。


得知原來三點係中港城有星追，
咁就帶埋相機同支 50-200 返工。
放工先去追星，
追完再去買 Filter。

中港城個場幾細，
而且因為嘉賓包括 Cookies 既 Stephy 同 Theresa，
自然吸引好多瘋狂 Fans。
有時都覺得呢 d Fans 好冇禮貌，
司儀講緊野，
佢地係咁大叫偶像個名，
聲浪蓋過司儀用咪把聲，
相點 Wor……

By the way，
其實今日主角唔係頭先提個兩個，
而係做司儀既 Purple 姐姐。
點解咁講呢？
因為佢兩個人只係合唱一首歌，
Purple 姐姐一個人獨唱了兩首歌！

---

今日班「高層」開會，
我呢 d 「小薯仔」冇份開，
繼續攪我部微形 Power Meter。
不過班「高層」用左成朝都未有 Solution，
我十分鐘已經攪掂。
有時開 d 冇謂會，
都幾影響效率。
你講左幾既要求，
我畀個解決方法你，
攪掂。
點都好過成班人坐係會議室，
幾個鐘都攪唔掂。

開會點都應該一早通知定議程，
每個人做定功課，
咁既會議先順暢，
咁既會議先高率嘛。
臨急開會，
考急才咩？

加最多人工那個請食飯

昨日畀完錢，
今朝先話我知報錯價，
漏左 Weekend 附加費每程 $300，
即係 Total $600，
真係激死。

---

八到其他人加幾多人工。
唔係我問架，
係有人八完話返我知咋。
Workshop 個 d 原來唔係加好多，
反而出面個 d 加多 d。
其中有個加左 10%，
被我地屈左請食 Tea。
不過講下講下開始驚，
驚被其他人知，
從而變成聽者有份。
三間公司加埋成三十幾四十人，
每人廿蚊都真係幾甘。
結果縮沙，
想淨係請兩個 Lunch 算數。
本來今日請，
不過我帶左飯。
下個星期頭三日佢又請左假，
結果定係下星期四。
呵呵呵。

---

夜晚為旅行又買左一件裝備，
一個 30G 既數碼相簿。
咁旅行時影相就唔駛就住就住啦。

---

媽媽昨日跌親，
叫極佢昨日即刻去睇醫生都唔肯。
結果今日都有去，
照左三張 X 光。
醫生話 D 骨有斷到，
但係媽媽就話胸口痛。
醫生畀左四日假佢，
四日後覆診，
希望冇事啦。

回帶

今日上日文堂發生左幾件趣事，
第一件係關於對答案。
話說我地對答案係採用每位同學輪流讀一題既方式，
咁一來對到答案，
二來又可以練到會話。
咁到其中一個男仔，
佢竟讀返上一題。
咁一次半次的話，
都可以話佢係唔覺意。
但係輪左一個圈之後，
佢又係讀返之前個人個題，
當場全場爆笑。


同學仔中有幾個係中六、七學生，
咁中文其中一 Part 係課外讀物，
估唔到咁多年都係要睇文化苦旅。
有個女仔 A 小姐週圍問其他同學仔讀邊間 u 咩系，
原來我地呢班有兩個中大、
兩個港大同一個科大。
中大另外一個都係讀 Engine。

A 小姐問其中一個女仔 B 小姐係咪仲讀緊書，
B 小姐答佢畢左業好耐。
之後就 A 小姐好直接咁問 B 小姐，
「你畢左業幾耐？」
咁同直接問佢幾多歲有咩分別呢？
年齡一般都係女人既秘密，
當堂攪到 B 小姐唔知答唔答佢好。


放左學，
去左櫃員機過數畀個 Travel Agent。
嗚嗚嗚，
戶口咁就冇左萬幾蚊。
紅簿仔數仔直線下滑，
跌破十七個月黎新低位，
再次得返四位數字。
唔制呀，
個筆「非經常性」收入幾時先到手？

監視？

昨日發生左件好攪笑既事唔記得講。
話說我放工返到屋企樓下，
見到有個男人按緊大厦部對講機。
咁大厦個大閘唔係用鎖匙既，
一係就按某樓某號等開門畀你，
一係就入密碼。
咁我見佢入幾次密碼都開唔到門，
梗係有少少唔耐煩，
望住佢睇下係唔係白撞，
睇下佢想入到幾時啦。
咁跟住佢突然發爛渣，
講左句：「你按埋佢喇。」
就走左去。
咁我話知佢按密碼入去啦。


到我食完飯出門口返學事，
係大閘見到看更，
咁個看更同我都幾熟既。
佢同我講話那個人頭先向佢投訴，
話我係度監視佢 wor……

---

講返今晚，
返左 SOC 練跑。
不過因為夜收工關係，
去到都成七點九，
佢地已經跑完 2.4km 個測試。
咁結果我只是跑了衝山的接力跑，
2 個人一組，
每人跑七轉，
跑完好辛苦，
所以之後個「捉」我都冇參與。


返到屋企收到機票張 Invoice，
不過去程個轉機點都之前唔同既。
之前話經 New York，
等四個鐘就有機坐。
張 Invoice 寫既係經 LA，
要等八個鐘，
仲要發行時間都長左，
第二日六點先到。
幾大都唔制啦，
聽日打電話同佢講先。

五月的財政預算

又到月頭做 Review，
今個月洗少左錢，
不過筆「額外收入」都仲未到手。


非經常性開支方面，
因為出錢買左部 DVD 錄影機畀媽媽做母親節禮物和生日禮物，
總共洗左 $4698，
比預算洗多左 $698。
今個月暫時預算買一個相機袋（其實已經買左），
一部 Digital Wallet，
一條 Ram。
都係有二千蚊預算。


今個月的每日開支控制得非常好，
膳食、交通和娛樂三方面只用左一千多 d，
除開每日都唔夠四十蚊。
比原定每日五十，
假期加五十，
比賽再加五十為低。
睇黎今個月可以將目標再訂低 d，
一於就每日三十，
非上班日加三十，
比賽再加三十。
今個月九個非上班日，
三場比賽，
即係預算為 $1290。


因為拿左兩萬畀媽媽買股票，
所以紅薄仔個數字跌左好多。
如果計返動產與不動產，
都應該有正增長既。

不過因為筆「額外收入」都仲未到手，
所以亦然係未追得返個儲錢步伐。
加上都係時候畀機票錢，
所以雖然經常性收入多左，
所以預計今個月錄得虧損既機會比較大。

新袋

今朝一早去左奧海城睇「三岔口」，
個故事開頭幾好，
不過個尾唔係埋得好好，
個兇手好似太容易被發現。


本來有另外一套戲叫「早熟」既揀，
不過一黎唔想睇房祖名，
二黎對薜凱琪冇乜興趣，
所以冇睇到，
不過聽講「早熟」票房好 d。


睇完之後，
係馬拉松買杉，
另名買左八對船襪，
都唔知買咁多襪做乜。


之後去左威哥到打機，
玩三國無雙 4。
打足一個下午，
爆左兩個人物。


之後出返旺角買相機袋，
早兩日係 Forum 見到有個香港出既雙倉式相機袋，
又可以做側袋，
又可以做背囊。
臨畀錢先發覺帶唔夠錢，
拿拿臨落街提款。


返到屋企試裝器材，
發覺個內籠矮左少少，
支 50-200mm 唔可以打直放入去，
勉勉強強都放得到一機三鏡一閃既。
不過拿晒近乎 3Kg 既器材，
我想我只會帶兩支鏡頭去，
不過就係未選到帶邊兩支。

參考書

今朝返崇拜，
撞到威哥。
係禮拜堂見到威堂，
一年都唔知有沒有一次，
有時佢星期日早上返工，
有時我星期日早上比賽。


返完崇拜，
返左屋企。
之後兩點鐘再出返旺角，
會合艾力斯上左雅蘭間大家樂食午餐。
叫左個甚麼健康午餐，
栗子焗唔知乜野配紅米飯，
味道就好「一般」，
即係唔會再食個隻。
之後打左陣機，
就去做 Gym 喇。
唔記得 Mark 返低做幾重同做幾多下，
只係仲記得做左咩動作。

1. Iso-Lateral Incline Press (鍛練上胸)
2. Iso-Lateral Decline Press (鍛練下胸)
3. Iso-Lateral Chest Press (鍛練中胸)
4. EZ-Bar Curl (鍛練二頭肌)
5. Dip Machine (鍛練三頭肌)
6. Hyperextensions (鍛練下背)

之後本來想焗桑拿，
點知壞左……


之後行左陣朗豪坊，
想係馬拉松買杉，
不過冇睇中。
係仙跡岩 Tea 一 Tea，
之後各自歸家，
我上左中華買參考書，
本來想買本旅遊書，
點知佢冇波士頓，
激鬼死。
最後買左兩本，
一本係股票入門，
一本講職場上位。

嚴重 Out Dated 既朱東

今日係短週，
不過都係好早就起身。
因為今日鍾 Sir 教班中一、二既新力軍 OI 既野，
咁我就返去睇下。
有師弟唔明點解我山長水遠都要入去，
或者呢 d 就叫做歸屬感，
雖然畢左業都成六年，
但係一得閒我都想返吓去。
呢個亦係點解早兩年某人返香港，
有一日返去探老師，
我請假都要返一返培正既原因。

係 Break 既時候，
鍾 Sir 問左 d 好攪笑問題。
朱：「你同你朋友點呀？」
炒：「幾好丫。」（其實我未明佢問緊咩既）
朱：「都仲係好朋友？」
炒：「係呀。」
朱：「最好最好既朋友？」
炒：「係呀。」
朱：「之前見你地係日記鬧交鬧得好厲害架。」
炒：「……」

中午和班中六、七的師弟係莉莎食午餐，
我竟然帶唔夠錢，
問卡妮師弟借左三蚊，
之後就返屋企。

四點幾，
會合埋聽完激光矯視講座的艾文和陳溢康，
坐細牛車入沙田艾文家燒野食。
未燒之前，
我們打左陣機，
打左陣牌。
今次左牌輸左既要做掌上壓。
燒完野食之後打左八圈，
最後結數我要做三下，
力王唔駛做，
其他人都係做十下以內。
點幾兩點係艾文屋企離開，
雖然坐細牛車返去，
但返到去都好夜了。

七個百份點

今日好似打仗咁，
兩點左右出發去個客度，
今朝又要 Debug，
又要做 Calibration，
又要燒 CD，
又要 Pack 箱……

兩點鐘部 Labtop 先 Free 到畀我，
拿拿聲試下隻 Installation Disc。
裝完先發覺個 Desktop Software 有問題，
要再燒過第二隻。
攪到兩點四先出到發。

坐 Taxi 落荃灣有料電視總部，
上最高個層，
入左間好簡陋的會議室。
要用私伙投影機，
私伙拖板……
老闆見我帶夠裝備，
讚我細心呢！

首先係老闆 Present，
之後我做 Demo。
原來佢地唔係咁想用我地個 GUI，
反而要求我地提供 Command Set 畀佢地。
自己 Delopment 既 Product 有個優勢，
就係個客覺得有咩唔適合既地方，
我地可以改到適合為止。
例如今次個客就提出左幾點，
例如要 Query 到個 Device 既 S/N，
個 Device 問個 Radius Server 拿 Username 同 Password 咁，
亦即係話，
仲有好多手尾跟。


五點幾返到公司，
Check 返 d E-mail。
原來老闆兩點 Send 過一封 E-mail 黎，
提及今年有七個百份點既增長。
我想起星戰的一句對白：
「能力愈大，責任愈大。」

朝九晚十二

2003 年 5 月，
公司由九龍灣搬到觀塘，
個日係新寫字樓執野執到夜晚十點幾。
估唔到呢個公司最夜收工紀綠，
會係今日打破。

話說明天要做 Demo，
咁今日要試埋未試既 Functions，
確保 Everythings works well。
我一直都覺得應該冇咩問題出現，
有都之前幾日攪掂左。

點知係五點幾試到 SNMP 時就出事。
首先用 7.x 既 Compiler compile，
做唔到 remote login。
之後試用 8.x 既 Compiler compile，
個 Device 極之唔 Stable，
間唔中會 Hang 機，
仲要係幾密 tim。
不過都未係最大問題，
再大問題 d 都有。
用個 Software remote login 個 Device，
入完 SNMP 條 Key 之後，
Read queries 冇問題，
Read 到 Power、Clock 呀咁。
但係 d Operations 呢，
就全部 Fail。

一路試呀，
Debug 呀，
去到八點半我都未知幾時走得，
當然係返唔到學 tim 啦。
到老闆九點鐘走喇，
我都仲未得，
咁佢就買左份公司三文治，
一杯熱檸茶畀我，
同埋畀埋公司鎖匙我就走喇。


到十點鐘，
我開始由頭睇多次上手為部 Device 寫個本 User manual，
睇吓有冇 Steps 我係 Miss 左。
最後發覺，
原來我入錯左條 SNMP 既 Key，
所以 Read queries 冇事，
Operations 就因為 Security reason 而 Block 晒。
最後就係要解決不穩定既問題。

解決方法係……
用上手部電腦 Compile。
我想呢個係因為 Compiler setting 既問題，
又或者係 SNMP 個 Library 唔同有關。

Anyway,
總算係十一點四十五分攪掂左 99% 既野，
餘下個少少手尾，
聽朝先攪 lu，
總算趕得切坐尾班巴士返屋企。

係 OT 緊既時候，
收到某人係公司 Send 黎既 ICQ Message，
不過我個時太忙，
冇時間安慰佢呢……

流鼻血

個病都好得七七八八，
今日冇再發燒，
亦都冇喉嚨痛，
不過 d 咳仍然未好。

唔知點解，
咳親都好長首尾，
試過食左三支咳藥水，
都係未好返。
唔知係咪身子弱左，
抵抗力差呢？

今日臨放工個時，
冇啦啦流鼻血。
講起流鼻血，
我上一次流鼻血，
應該講到小學。
換句話說，
即係成十幾年冇流鼻血，
今日真係唔知做乜事會流鼻血。


夜晚又買左件器材，
今次係 Power Battery Holder HLD-3。
有左佢，
一黎可以入多粒電，
可以影長時間 D；
二黎打直部相機影相時，
有多粒快門制用，
唔駛屈隻手；
三黎仲可以駁快門

人肉 Debuger

昨日請左一日病假，
原本累積的工作量唔係好多。
不過有料電視要求個 Demo Unit，
原本係兩個星期交貨，
不過改左今個星期五，
所以工作量激增。

原本個 Product 已經 Developed 好，
咁 Build 一隻出黎唔係咩大問題。
不過我發覺上手留低左唔少 Bugs，
個客要求既仲係一隻 Full Features 既 Unit，
所以我要試晒所有野係咪 Work，
都咪話 Workload 唔大。

昨日又下巴輕輕話 omuser 改個 d 新 features 好易姐，
結果都順利完成。
呵呵呵

話咁快就改完。
之前個長老話唔得，
只係佢冇 update 到 database 個 table 而已。
我 update 返個 database，
即刻冇晒個 d SQL Error。

夜晚返學，
因為上堂已經講晒文法，
今堂係練會話和閱讀理解。

---

大小姐部電腦燒左火牛，
隻牛年半就報燒，
照計冇理由咁快架 wor，
咩原因呢。

---

個 Agent suggest 左另一條 Route 畀我，
坐 BA 經倫敦去波士頓。
去程夜晚十二點半起飛，
我晚我考日文考到九點幾，
去到剛剛好。

不過回程就濕滯少少，
星期日上機就趕唔切星期一返工，
星期五同星期六上機，
都冇晒倫敦返香港個程機位……

請病假

今朝都仲有少少燒，
但係個喉嚨就勁痛。
本來都仲想返工，
不過媽媽話唔好小病變大病，
叫我請一日假去睇醫生。

睇開那個醫生年紀漸大，
所以媽媽介紹左另一個醫生畀我。
Make 左 Appointment 十二點四十五分，
咁我 Send 左封 E-mail 畀老闆話請假之後，
就再休息左陣。

十二點四十分去到，
首先係畀 d 個人資料登記先，
之後等左大約三、四個人之後就論到我。
經診斷之後，
醫生話我係感冒引玫輕微上呼吸道感染，
所以會發燒、咳嗽同喉嚨痛，
條頸仲腫左 tim。
因為喉嚨痛都幾嚴重，
所以醫生仲特登開左 d 止痛藥畀我。


埋單 $220，
四日藥同一張一日假紙，
總共有五種藥丸、
一種喉痛、
一支咳水。


返到屋企，
食左藥就大覺訓。
六點半左右起身，
換衫出去旺角開會。
話說去開那個網站 omuser.com，
一直都係借友好 Forum 既 server 用。
因為只係借一年到今年年中，
所以要傾下添置自己既 Server 既事。
我既工作，
就係提供網頁 Upgrade 既技術支援。

戰勝睡魔

星期日，
懶洋洋的一天。
身體非常不適，
曾掙扎唔返崇拜，
喜幸靠主的名，
終戰勝魔鬼，
感謝主。

去到禮拜堂的時候，
正在唱詩，
當我找到座位時，
隔離的竟是中學同學。
不過學校教會，
碰到同學又有何出奇？

崇拜完了之後，
一路慢慢行返屋企。
返到屋企，
食過原本是早餐的午餐，
一碗乾晒水的螺絲粉，
就係梳化睡午覺。

原本約了 Alex 做 Gym 的，
不過以我的狀能，
為安全起見，
都係唔做隱陣。
咁就只是約佢夜晚睇戲。

而個見少陣都會死既 Alex ，
就即刻去搵馬姬喇。

本來約左 Alex 六點九係尖咀等，
點知佢六點就打黎話已經到左佐敦，
咁我就拿拿聲換衫出門口啦。
會合佢之後落港威。
買完飛之後，
打左陣機就入場。


原本仲打算我以收返農曆年條數，
點知佢唔夠錢……

講返套戲，
叫叛譯者。
動作場面唔多，
單夠文戲都做到緊張刺激，
唔錯唔錯。

拿唔到簽名會的飛

（29/4/2005 按）
今個星期忙到好似打仗咁，
今日終於有返少少時間開始補返 d 日記。

---

今日返返下工，
收到阿包既 Message，
話佢家姐部電腦好慢，
睇下係咩問題 wor。


咁有個人做傳聲筒，
不如直接同佢家姐傾仲方便。
十一點打過電話過去，
點知佢訓緊覺，
真係唔好意思喇。


初步診斷，
開機冇咩響聲，
應該唔係 Ram 同 CPU 既問題。
不時好慢，
但係入 Safe Mode 好少少，
都係慢慢，
應該係 Windows 問題？
難道要重灌 Windows？


放工即刻趕過去 APM，
一去到客戶服務處，
已經有個牌寫住 CD 同簽名會的飛派晒。
冇計啦，
整定某人得唔到簽名 CD。


之後去左睇中醫，
落左天祥睇背包，
竟然讓我碰到個中學師弟霆鋒，
呢個世界真係細。

貴價晚餐

今日收到個消息，
不過呢個消息會唔會知得太遲呢？
放工落左旺角睇背包，
有一兩個合心意，
不過都仲未找到個100 巴仙滿意既。

之後過左信和，
落左地庫唱片鋪，
又上左閣樓唱片鋪，
不過都好似找唔到我想要既野。
睇黎要明日去一趟 APM，
又或者星期日齋影冇簽名。


之後落左佐敦，
上左力王屋企。
今次仲多左個舊同學，
就係陳溢康喇。
晚餐係叫比薩乞外賣。
不過好後悔讓大虎負責打電話。

首先持有某信用卡可以買一大批送一大批。
佢冇用到呢個優惠。
其次係如果叫兩個餐，
會係 $330 ，
有兩個大批，
六盒意粉小食，
四罐可樂。

今次埋單 $352，
只得兩個大批，
三盒意粉小食，
一支可樂。
都唔知佢點叫既……

---

「能者多勞」？
我怕係「過度操勞」……

研發的同時，
都要做 Production。
要改 Firmware for Customer Design，
又要加新 Features 落新產品。
個訂單仲話講緊五隻，
Help me！

病

炒炒病左了，
好暈好熱好辛苦。
最慘又唔食得西藥，
唔通要等佢自己好？

六點幾，
執緊野打算走，
老闆係呢個時間先打黎話傾下個 Project，
一傾就傾到差唔多七點。
佢攪笑係臨收線佢仲話唔想阻我太多時間，
哈哈哈。


坐巴士返屋企，
過左土瓜灣之後訓著。
醒返既時候，
間車已經去到中港城。
落左車之後，
要行餐蒙咁返屋企。
結果八點先入門口，
拿拿聲扒兩啖飯，
又要趕返出去上堂……

---

IDD 又開始減價戰，
月費四十蚊唔洗，
就可以任打。

不過都係老問題，
我忙時佢仲忙。
日日都三四份 Project 呀 Paper 呀等住交，
邊忍心阻住佢 d 做功課時間丫。

---

Moly 個邊都報埋價，
10K 都唔洗。
看來最平係佢，
希望係真既就好喇。

研發

繼續做 Trouble Shoot，
一早就麻煩 Workshop 既同事幫我上返頭，
我就係隔離學下，
偷下師咁。
不過要等佢地得閒 d 先，
以Ready 既時候已經係下午。
試完証實係個 Filter 壞，
暫時係死症，
因為冇後備存貨。


之後做返研發的工作，
今次個目標是一件小形光能測量器。
個 LCD Sample 早兩日到左，
我同事幫我測試完，
我現在接手返寫 Firmware。
第一件事係定 Flow Chart，
幾時早 d 乜野，
個 Routine 應該係 Main Loop 行，
定係放佢入 Interrupt。


跟住就係計 Timing。
因為用 I2C interface 同 LCD, ADC 和 EEPROM 溝通，
要有一定既 Waiting Time。
簡單黎講，
即係 Instruction 同 Instruction 之間要有幾多個空指令。

---

夜晚出九龍公園練跑，
首先係三十分鐘追龍。
所有人排一條隊一齊慢跑，
排頭既帶路，
跑去邊都得，
排尾既就要追上去。
因為有個 Miss 比較慢既關係，
結果成條龍都好慢，
不過原來跑得慢係辛苦過跑得快既。
你要 Keep 住跑既姿勢，
但係速度同行路差唔多，
係好辛苦既。

之後有個三個個 Points 既奪分式，
限時三十分鐘，
我二十分鐘打晒返終點，
不過又放錯 Points，
又圈錯圖，
自己又有少少犯錯，
浪費了唔少時間。
正常既話，
應該十五分鐘打晒。

最後幫手收 Points，
兩個人收，
一人收十五個，
但係我時間仲慢過之前打三十個……><

被人激親

大小姐被人激親，
其實把口係人個度，
佢點講咪由佢 lor，
唔駛勞氣。

講開脾氣，
其實我都幾大脾氣，
好易起火 tim。
不過來得快時去得更快，
五至十分鐘已經「下晒火」。
唔知呢個係優點定決點呢？

---

火車公司個 Product Pack 好晒，
現在係等個客個邊覆。
好似要徵用埋我去做 Demo，
希望攪得掂啦。

之後 Trouble Shoot 件 Demo Unit，
話說件 Unit Ship 去美國做展覽，
係 Anaheim 一拆箱已經發現壞左。
同行既幾件 Units 都出問題，
大部份我都 Fix 左，
係呢一件攪唔掂。
開箱睇，
似係係其中一條 Fiber 斷左。
今日用儀器駁返，
但都係唔 Work。
之後就係唔同寶物去試，
攪到六點幾都未攪掂，
似乎係個 Filter 壞左。
明天上返頭再試過。

---

今晚上堂，
派左張新指引。
由六月開始，
考試唔及格唔畀升班。
可以選擇補考或半價重讀，
話要確保質素 wor，
以後冇得偷雞了……

頭像簽名

今朝六點就起身去左跑步，
狀態唔係好好，
跑左兩個圈就收工。
時間亦都唔理想，
跑成二十幾分鐘。
返左屋企沖過涼就返工。

本來帶左炒飯，
不過中午班同事話去飲茶，
結果盒炒飯就留到明天。

---

雖然小人無處不在，
間間公司都會有。
不過不時唔覺唔覺就冇乜野，
但當你意識到佢發揮緊「功用」既時候，
點都有 d 驚。

---

放工去左觀塘廣場行左轉，
去左康泰格價，
平個另一個 Agent 一千元左右。
順手買左筒 DVD+R，
返屋企裝埋部 DVD Burner，
即刻燒返兩三隻碟，
Free 返 d Harddisk Space 出黎。
不過唔知點解，
攪極都 Enable 唔到個 Drive 既 DMA。

---

其實一直都想係 d 相到加返個特別既簽名檔，
以前只係用字，
"Photo by 炒炒" 咁，
好單調。
今日畫左幾個，
都唔係好滿意……

春回大地人像攝影活動

今日中午點半去左荔枝角公園，
因為影會有人像活動。
正式地點叫嶺南之風，
嶺南之風座落荔枝角公園第三期，
佔地約一萬二千五百平方米的，
園林內有溪流、橋廊、小丘和建築獨特的亭台樓閣，
是一個具備古典嶺南風格的公園。
全園共有十個景區，
全部與整體設計融合。
十個景區包括「有鳳來儀」、
「群星邀月」、「橋廊畫舫」、
「月起薰來」、「觀雲遂月」、
「奕亭殘局」、「溪流影月」、
「北門茵綠」、「健康去屣」及「泰然自若」。


今天有三個 Model，
分別是思琳、Jenny Kwan 和 Yuki Lau。
我地分成三組，
每組影一個 Model，
半個鐘一節。
休息十五分鐘，
之後換 Model，
總共影三節。


我係 B 組，
首先影既係 Yuki，
第二節影 Jenny，
最後一節影思琳。

第一次影人像，
有 d 雞手鴨腳。
不過好好玩，
尤其是係同其他影友傾返部相機既問題，
應該點樣 Set，
點樣影。
雖然 d 相亦然難登大雅之堂，
但唔影又點會進步呢？
Practice makes Perfect ^_^
經此一役，
我對部機又了解多左。


唔知幾時，
我可以同佢影一輯相，
影得漂漂亮亮呢？

今日 Total 影左 3G 相，
返到屋企，
惡夢黎喇，
個 Harddisk 滿左，
我只係過左其中 2G 而已，
仲要冇 Space 執相，
聽日拿拿聲買 d DVD 碟返黎，
燒咁 d 野，
Free 返 d Space 出黎先。

DVD Writer

今日好忙碌，
朝早唔駛返工，
係屋企上緊網，
收到公司地震既消息。

之後大衛黃同學問我去唔去睇展覽，
話說有個春季電子產品展覽。
咁我兩點幾就坐佢順風車過灣仔喇。
個場館幾大，
四五個展館左右啦，
黃同學好似幾多得著，
不過我就找唔到我想要既資料。

之後四點幾我又要趕返佐敦，
同媽媽去睇中醫，
我亦順手睇下。
不過都幾貴，
七日藥，
早晚各一次飽肚沖水飲，
再加敷面，
要成易發發。

之後同媽媽和 Auntie 去左 Suppermarket，
見到 d 好恐怖既野，
佢地買左八百幾蚊野，
其中六百幾係狗糧！

之後落左旺角，
係金酒井食放題。
不過 d 野出得好慢，
阿媽又係咁係到鵝仲乜未出，
好煩。


去完 Broadway 睇 DVD 錄影機後，
差唔多十點，
我即刻衝上旺電，
因為趕係收鋪之前買張 CF 卡，
係聽日影會個Function 度用。
七成鋪頭都關了門，
結果係三樓買，
貴左幾十元，
無法啦咁夜。
順手買埋個 DVD Writer，
如果佢有埋 Controller 卡賣，
我唔排除我會買埋，
好彩我個張比較偏門，
佢冇得賣，
省回一大筆。

度身訂造

火車公司個 Project 終於埋尾，
萬事俱備，
只是欠將 Setup 檔燒碟，
同埋 Print & 釘裝份 User Manual。
因為今日想盡時 d 走，
所以好早就入去同老闆傾 Projects d 野，
費時佢又六點幾先召見我。


話說收費電視又想買，
不過又係有 d Special Reqiuments，
今次仲怪，
想 Run run 下轉 Wavelength。
得唔係話唔得，
解決方法我亦都想左，
不過又要用唔少 Men power 去改。

唔知點解，
原裝既好難賣得出，
個個客都話要改野。


盡時六點幾我就收工喇，
而係同一時候，
老闆召見第三個 Engineer 做 Performance Review。

我臨走前，
開著左火車公司個 Product，
打算煲過夜。
上左車之後，
先醒起聽日係短周，
即係一煲就煲兩日三夜，
希望冇事啦……

---

今晚返到屋企又係即刻換衫去練跑，
終於可以三十分鐘內完作三個圈。
不過最尾個圈都去得幾盡，
我想如果跑多個，
四十分鐘應該完作唔到。
跑完返屋企先至沖涼食飯，
開胃左，
呵呵呵……

醜婦終需見家翁

今日終於做到 Performance Appraisal，
六時十五分，
老闆叫左我入佢房。
（夠鐘放工先捉我入去）

一開始就叫我講下有咩不滿，
有咩意見。
咁我就表達左管理層 Decision 定得慢，
開幾次會都冇 decision，
咁我地班 Engineer 又做唔到野。

跟住又問我興趣係邊方面，
定位想係點。
唔通我話佢知我想 Supervise 咩，
咪又係答返 d 大路野。
興趣係 Coding，
但係唔想焗限係 Coding，
所以 Undergrad 同 Master 有意不選 Computer Science 咁。


之後就論到佢講返我既 Performance，
第一句係：「今年你既分高左。」
第二句係：「唔好睇 d 分咁重。」
如果唔應該睇重，
咁你又提我 d 分做乜？


份 Appraisal 主要係話，
我開會少講野；
新 Project Initial 既時間長，
但 Hands On 左又會做得快；
睇野應該睇闊 d；
應該進修下語文。


至於 Adjustment，
佢話要開完會先決定到。


出到黎，
椅都未坐暖，
又捉我我入 Lab 傾 Setup 個 地方 For 長期 Demo，
結果傾傾下，
又七點先收得工……

>>2005年04月15日 Fri 15:27:58 (

使用者手冊

又有新日記睇，
真開心，
呵呵呵……


已經有同事做左 Performance Review，
不過仲未論到我，
老闆上個星期四已經話第二日同我做，
結果一日又一日，
一個星期後都仲未做。
同事做完出黎，
話老細冇講有冇人工加，
淨係話要睇埋其他同事既 Review，
先知有冇薪金上既調整。
留意個用詞係「調整」，
即係可加可減。


昨日交左份 User Manual，
老闆 Review 完之後，
結果大部份圖都要改咁濟。
原因係打錯左 Product 名，
漏左個 "Opical"，
結果 d Screen Capture 要再 Cap 過，
d 相就人手改（呢樣老闆做左）。


Program 方面，
又發現左個 Logical 既問題，
同老闆傾完之後，
問題應該不大。


攪完份 User Manual 已經七點幾，
見老闆仲同另一個同事開緊會，
咁我都唔等佢同我做 Performance Review 就走了。

見落緊雨，
又咁晚，
冇出到九龍公園練跑，
係旺角一路沿彌敦道返屋企。
返到屋企，
d 飯夠今晚食就唔夠聽日帶飯，
夠聽日帶飯就唔夠今晚食……

---

d 股票賣左，
賺了兩百蚊。
不過之後繼續升，
媽媽話賺少左幾千蚊，
之後就開始賴個朋友嚇佢會跌喇，
哈，真攪笑。

股票

天氣又凍返了，
朝早都有廿七、八度攝氏，
夜晚得返廿度。

同老闆講左今日會完成份「使用者手冊」，
當然做完先走啦，
係做既時候，
發現左 D 係 Boundary Case 會 Fail 既 Bug，
當然同老闆 Report 啦，
亦即係話，
明天又要改 Program 喇。

傾完出黎成七點幾，
都係返唔切屋企換衫喇，
結果就上左商務一陣，
之後就返學。
好彩帶左書出黎，
不過就唔記得帶筆袋，
好彩都有支三合一筆傍身。


上完堂，
過銀行過錢畀媽媽，
不過唔記得媽媽個戶口號碼，
結果過唔到。
同毛理去左翠華食個好豪既晚餐，
結果係拿苦黎辛。
個 Main Course 係朱仔骨，
比牛仔骨難切好多，
仲要逐條骨食，
好彩個焗薯都幾多食。


食完飯，
媽媽打電話黎講返個戶口號碼畀我知，
我又要行返出去過數，
好凍喔。

講返點解過錢畀媽媽先，
因為媽媽幫我入左股票，
要找數。
但係好攪笑，
問媽媽有冇止蝕位，
佢又講唔出，
咁就我定啦，
不過呢……

如果未跌到止蝕位，
佢話佢見到會跌，
會賣，
咁都仲好正常。

不過如果跌穿左止蝕位，
佢又話蝕得多，
當然唔賣啦……

我當堂呆晒……

Training

真係激死，
星期六影個 d Product 相，
昨晚辛辛苦苦執晒，
去埋底 tim，
攪左幾粒鐘，
今朝竟然唔記得帶返工！


放左工就返屋企，
冇即刻食飯，
而係換左衫去九龍公園。
昨日既失敗，
激發起我的鬥志，
雖然多數都係一日貨仔。
用左三十三分鐘，
跑左三個新大圈。
三個圈時間分別是：
1. 十分鐘多
2. 十一分鐘多
3. 十二分鐘多

對比上次既時間，
明顯弱了很多。
大約用多了分零鐘，
唔知要 Train 幾耐，
先可以 Train 返好 d 呢？

返屋企睇返 Training Log，
原來係 Anahiem 返黎之後，
有成兩個星期空白期，
唔怪之後差了這麼多啦。
係入今日既訓練紀綠時，
上了一陣網，
發現有個長跑班，
不過時間撞晒，
佢都係逢二、四…… ><


今晚十點鐘就訓，
好似好健康喔。

接力賽

今日係一年一度既體育節接力比賽，
地點係香港仔水塘。
今年換左隊友，
配阿健同阿棟。
我坐頭班 971 ，
八點左右到左賽事中心。
換衫熱身後就睇示範。


今日場比賽由 DGS 攪，
以兩個 F6 既帶，
算係攪得唔錯，
不過仲有進步既空間。

至於個示範，
一如以往，
都係唔係好知佢做緊乜。
有個同往年唔係好同既地方，
就係成個示範好多英文……


我跑第一棒，
十點十五分出發，
要拿 16 分（每個控制點 1 至 4 分不等）。
一開始就計錯數，
原本 3+2+3+2+2+4 = 16 剛剛好，
點知有個 3 分 睇錯左得 2 分，
咁一開始就繞去打多 2 分，
其實我可以唔駛打既。
之後一路走，
成程都唔係好見其他賽員，
（當然啦，我條路線咁「另類」……）
跑到一半發現打多左兩分，
咁有一個要上 20米既就特登唔打。
之後就出事了，
有一個控制點我找唔到……><
那個位置好明顯，
我冇理由錯既，
可能被人拿走左。
（今朝施 Sir 話有 d 鐵柱被人拿了）
結果經過 Radio Point 唔入得，
要繞路打多過 Point 先，
要上 30 米呀……><


返到終點同 Controller 報告唔見左個 Point 既事，
最後證實原來放錯 Points ><
幾組成績要取消，
不過獎因為做左所以照頒。
但最後都係頒唔到獎，
因為資料處理錯誤，
出唔到成績。

講返時間，
我負責短途，
成績係 49 分鐘，
阿棟跑長途，
成績係 48 分鐘。
我真係羞家。

不過最近幾場比賽都冇乜狀態，
投入唔到咁，
成日犯錯，
成績好差……><

賣二手鏡頭失敗記

屋企附近多左間中藥鋪，
有黎自中大既教授贈醫。
媽媽今日佢睇過，
仲幫我約左下個星期六。
不過同時收到個壞消息，
醫生話媽媽個心臟可能有事，
叫佢小心 d，
有 d 擔心 tim。


中午放工後，
出左旺角同五光班舊同學既食午餐，
（我係五年級時係讀善班既……）
我叫左個 $30 既乜乜焗意粉，
不過上菜既時候去錯左威哥到，
結我我食左原本佢叫既物物焗意粉，
貴 $12，
哈哈。


食完飯，
同佢地係旺角行左陣，
之後落左新之城打機。
不過一行四人（其他都走晒），
得 Hardway 一個人打 KOF。
其他三個都係得個睇字。


之後我拿拿臨落尖咀，
因為約左個網友。
話說我買左新相機後，
舊個部就想放，
咁就約左個網友睇貨，
得既話就即刻交收。
不過原來我其中一支有霉，
另一支佢又唔係太滿意，
結果兩支都冇買，
我就睇住張一千蚊紙飛走左……><

賣唔到都唔緊要既，
我可以留返部機粗用既……

訂機票

火車公司件野今日砌埋個殼，
六點半畀老闆捉左入 Lab 砌，
攪左好耐，
d Fiber 好麻煩，
圍圈個圈又唔可以太細，
角度又唔好以太 Sharp。
結果安置晒 d Fiber 之後，
老闆竟然話：
「今日做到呢度先啦，
d 手尾留返聽日先做，
我唔想阻你太多時間……」

結果我八點就可以係公司走喇。

---

要開始訂機票喇，
早一個星期係航空公司個網有經 New York 返香港既機，
係 +1 既機（即係今日上機，第二日落機），
連稅都只係 10k 多少少。
今日找已經冇晒，
得 +1 經 SF，
不過票價係 20k。

同個 Agent 傾，
佢有 11k 既機，
不過係 +2 經 LA……

呢 d 都唔係重點，
都係拿假仲要 d。
臨走遞假紙，
一拿拿 6 日半，
老闆好驚訝咁問 6 日半呀之外，
都冇話唔批。
呵呵，
又過一關。

媽媽個關，
一早過左。
不過佢叫我幫佢係美國買 d 野返黎，
不過個 d 係加拿大出產……

派卷

今朝返公司，
開始整理過去一年做左 d 咩工作。
Check E_mail、
Check Outlook 個行事曆。
抄下抄下，
原來都做左幾多野，
足足有一頁紙。
夜晚等同老細開會，
等到成七點先到我。
結果做唔切 Performance Appraisal，
不過好似係老闆預備晒，
唔洗我填？
咁我今朝找得咁辛苦為乜？


好夜先係公司走，
返到屋企飯都食唔切又要出返去上堂。
今晚開新班，
因為讀滿了六期既關係，
有一百元既學費減免，
本來仲有新年個五十元的年玉（利是），
不過我係屋企遍尋不獲，
咁就少減五十元喇……


第一堂會派卷，
因為份卷淺既關係，
高分左係意料之內，
不過都比我 Expect 既低左少少。
原本我希望有 9 字頭，
結果只得 89 分。
我第一次比毛理同學高分呢！


今期有新同學，
原本坐開個位被人坐左，
結果又要坐返第一行。
記得第一期一開始讀又係坐第一行，
後尾被同學仔話我地高阻住佢地，
結果愈坐愈後。
之後又愈坐愈前，
現家返回起點。

---

有人睇完艾力斯個日記之後，
有個咁既結論：
「原來個個男仔都有同一個功用.....
就係幫女友屋企整電腦，
同教女友個細佬做電腦功課....」

er.............

禁食

今日都係幫 KCRC 個 Program 埋尾，
星期一晚做到八點幾個問題，
今朝竟然冇事，
激鬼死我。
仲要係我自己試既時候都係唔得，
要個同事入黎幫手，
就即刻得………

之後老闆下午返到黎，
即刻捉住佢 Demo，
一如以往，
第一次總係仲有 d 野未改好。
最慘係原來上手留低左好多 Bugs，
我現家先發現……><

第二輪改完，
老闆開緊會，
唯有等等啦。
一等就等到六點半，
做完 Demo 就已經七點幾。
仲要傾 d 技術上既問題，
暫未有結論。
昨日日記講過 Performance Appraisal，
今日老闆就話想呢兩日做左佢，
唉，
醜婦終需見家翁。


七點半離開公司。
出到佐敦已經八點，
換衫落九龍公園，
剛剛開始了 2.4 km 測試。
之後做公園定向，
我 Shadow 個新人。
新個四個四員好有潛質，
假以時日必可發光發亮。

不過我今日既訓練量係零……><

---

發生左見幾攪笑既野。
話說阿包問我一 d 信仰問題，
關於禁食。
話說聖經舊約（例如申命記、利未記）之中，
有不少禁食某些食物，
例如，章魚、墨魚、蝦、蟹、貝類等等。
那基督徒係咪要禁食呢？
當我搵到答案時，
除了解答左阿包既問題之外，
仲令到一個為食既傻婆安心。
因為佢驚我唔食，
佢都冇得食呢！

Appraisal

前晚攪公司野，
攪到四點幾先有得訓。
因為今日清明放假關係，
昨晚決定大覺訓。
一訓訓到今日中午十二點幾，
因為媽媽昨晚同 Auntie 返左大陸，
工人今日又放假，
得我一個自己顧自己。


食左個麵包，
叮翻熱 d 飯餸食，
之後就係度無聊。
首先係改左個 ICQ Nickname，
之後就係咁打機，
近排玩個滑版 Game，
網址係呢個 http://global.asdfgame.com
Download 完，
Setup 左就可以玩。
呢個係一個 Online Game，
係網上面同人揀「板」，
都 OK 好玩，
不過就食左不少 CPU Resource。

---

昨日係公司臨走，
有個同事問我係 Word 到點改 d Line Spacing，
係幫佢既同時，
我發現佢打緊 Appraisal。
係 Wor，
又係時候做 Appraisal。
公司每年四月會做 Review，
人工調整一般都係呢個月做，
我想係 Match 返課稅年度掛。
據聞 Workshop 班人有人工加，
我想係為左按撫佢地啦，
辛苦左成年冇雙糧都幾傷，
仲有兩個 Resign 左，
點都要平息民忿。
唔知我地出面呢班 Engineer 點呢，
我唔望加人工，
唔駛炒又或者減人工已經好好，
當然有得加就最好啦。
雖然現在係 Under-pay，
不過公司冇利潤，
我今年既 Input 又少，
都係冇望喇……

趕 Project

話說我公司有三個老闆，
會返工既有兩個，
另外一個係美國。
通常都係一個返正常時間，
另一個就下午先返，
好夜先走。
當正常時間那個有事唔返，
例如去左開會咁，
下午更那個老闆就會改返上午。
而返下午更那個正正就係我頂頭，
今日佢返上午，
就捉左我地傾 19" Rack 既事。
收到報價單，
不過佢就係到捉錯處咁：
又或冇寫面板有冇紋，
係咪橫紋；
個 Handle 係鋁定係鐵；
個箱係鋁定係鐵等等……


臨 Lunch Break，
被佢捉住問火車公司個 Project 做成點，
結論係今個禮拜尾要寄，
因為份使用者手冊都要改，
所以呢幾日要起貨。
我講左話欠 d 咩咪攪掂，
佢以為仲要攪好耐，
當我話今日攪得起時，
佢好出奇呢！


結果今日全日都係做呢個 Project，
做到 Deployment 呢個 Step。
將個 Setup 檔抄去 Lab 部機，
一 Run 就出呢個 Error Message：
"This advertised application will not be installed
because it might be unsafe. Contact your administrator
to change the installation user interface option
of the package to basic."

攪到八點都攪唔完，
仲攪到 Hang 機 tim，
（好似係你想打機時 Hang 機……）
結果放棄，
之後收工。

Sell 保險

第三場色級比賽，
地點係南丫島。
以往南丫島比賽，
通常係榕樹灣那邊做 Event Center，
不過今年改了係索罟灣那邊。
咁既改變唔係咁好，
首先係索罟灣既船期比較疏，
好似我十一點先出發，
都要坐八點幾那班船。


第二點係 Event Center 距碼頭遠，
起點距 Event Center 又係遠，
終點返 Event Center 又係遠……


第三點就係冇左主場之利，
榕樹灣一出碼頭望到既第一間屋，
係某位阿 Sir 既。
以往我地都係係呢度掛上我地會既 Banner，
d 賽員望到我地既 Banner 先，
之後先到賽會既，
攪到好似我地攪比賽咁……


講返個比賽，
今日發揮得唔係咁好，
一出發就上錯路，
之後三號 Point 又入左密林，
被果當中，
損失了大約十分鐘。
之後有幾個 Point 又傻下傻下，
最慘臨尾抽筋，
係山腳望住山腰個 Point 上唔到……><


最後成績係一個鐘頭二十四分鐘，
如果發揮得好 d，
應該可以一個鐘頭內，
不過就點都做唔到冠軍既四十六分鐘。


頒完獎之後，
我地去左食阿婆豆腐花，
之後去左打邊爐。
d 趕去榕樹灣坐船，
又或者剛落船既，
會見到一班人係度打邊爐。
五點幾開始打，
其實我地咁先係剛剛開始食我地既午餐。


出返尖咀之後，
約左個大學舊同學，
佢現家做左 Financial Planner，
原本話畀半個鐘佢，
結果浪費左我三個鐘。
講黎講去都係三幅被，
講一段理由，
我話點解唔得，
佢又係講返講段野。
好似佢最後叫我寫幾個 Friend 既電話 No 畀佢，
我話呢 d 係個人私人資料，
唔可以隨便畀第三者。
佢就話佢唔會打擾到佢，
只係會好 Nice 咁介紹 Financial Planning 畀佢佑。
我話唔關打唔打擾事，
而係 Privacy 既問題。
佢又隻字不改講返同一段野，
如是者反反覆覆數次。

個感覺就好似你同緊部錄音機傾計；
又或者係打電話去電腦 Hotline，
按唔對 Key 會 Repeat 返之前個段；
又或者係打 RPG Game，
你做 d Game Designer 冇 Defined 既野，
個 NPC 唔識 Response 咁……

畀佢攪一攪，
攪到我好夜先有得做公司 d 野，
四點幾先有得訓。
本來傾下都冇乜問題，
前提係如果我有時間既話。
現話就話用一餐飯既時間，
但係平時我食一餐飯只需十五分鐘，
現在用多左 12 倍既時間！
個客咪仲反感，
點會幫趁你？
係會 Model Answer 既同時，
我覺得執生仲緊要……

三月的理財 Review

三月剛過去，
早兩日埋數。
因為買左一支二手 Wide Zoom 鏡、
兌左四千幾元港幣既美金、
買左套新西裝、皮鞋同行李箱，
今個月不單儲唔到錢，
仲洗突左幾千蚊。
上個月總支出直迫兩萬。

不過呢，
呢個只係紅簿仔帳面上既數字。
如果計返手頭個筆美金，
其實都只係突左千幾蚊左右。
上個月有復活節假，
所以膳食同娛樂既開支都大左，
今個月謹慎些少，
應該可以省回近千元。


至於非經常性開支，
今個月只會買一部 DVD Writer 、一張 CF 卡同埋交學費，
Total 大約係 $4000。
而現金流都會嚴格控制，
上班日每日最多洗費 $50，
非上班日加 $50，
定向日再加 $50。
四月有二十一個工作天，
兩場定向比賽，
即係可容許支出係 $2050

加上培訓基金那筆「額外收入」，
相信今個月應該追返儲錢步伐。
不過仲未機票錢。

短週的星期六，
係休閒的一天。
成日都冇出個街，
洗費係零。
呵呵呵

---

真係大頭蝦，
唔知幾時已經改左 ICQ 個 Nickname，
不過我可以做既似乎係零……

恩恩怨怨

激死我！激死我！
咪關於火車公司個 Project lor，
個 Sales 之前問我幾耐做得起，
我話四個星期。
昨天同我講，
話一定要下個星期做起，
話應承左個客，
都痴線既，
一早話左你知要四個星期架啦，
你要話畀個客知兩個星期起貨係你既事，
Push 我都冇用。
趕起畀你係人情，
趕唔起我都冇錯，
我一於話之去。

另一方面，
收到張日本黎既訂單，
要 19" Rack Mount 既 Version，
結果我昨日下午出左深口步買，
買到返黎，
始終差少少。

結果都係要畀個手辦師傅做。
不過個手辦師傅唔見左我地個 AutoCad file，
問我地有冇。
結果我係個 Project 既上手部腦到，
找到一幅 Screen Capture，
記載個 File 係離左職既 PM 部電腦。
而個 Hard Disk 呢，
就係封印左係 Server 房。
取得老闆既授權之後，
我係個 Hard Disk 抄左 d File 出黎。
不過都只係得面板，
缺少左其他野，
結果都係將僅存個 Enclosure 畀個手辦師傅照住整，
希望得啦。

---

有樣野冇同大家講過，
我阿媽同舅父反左面。
咁昨晚媽媽去左舅父屋企食飯。
事緣舅父星期日去拜阿婆，
咁順手拜姑婆，
咁姑婆個骨灰位就好近我爸個骨灰位，
咁就發現左喇。
咁舅父就內疚，
打左畀阿媽，
算係道左歉咁啦。


講返點解反面，
其中一件事，
就係舅父冇去家姐結婚親酒。
舅父昨日話，
佢個日請左假，
一家三口換晒新衫坐係個廳到，
只要家姐一個電話打黎，
就即刻去。


乜擺酒仲要個日逐個人打電話去咩？
唔係畀左帖，
之前 Confirm 左就得既咩？
假設擺廿圍，
每圍十二人，
咁咪打二百四十個電話？
每個電話兩分鐘，
即係四百八十分鐘，
八個鐘，
咪即係返一日工？


上一代 d 恩恩怨怨真古怪。

---

夜晚做 Gym，
撞到阿兆。

1. Butterfly (鍛練胸肌) 20/7lbs, 12/21lbs, 12/21lbs, 10/21lbs
2. Incline Machine Bench Press (鍛練上胸肌) 20/5+5kg, 8/15+15kg, 12/10+10kg, 12/10+10kg
3. Machine Bench Press (鍛練胸肌) 12/10+10lbs, 12/10+10lbs, 12/10+10lbs, 12/10+10lbs
4. EZ Bar Curl (鍛練二頭肌) 15/25lbs, 15/25lbs, 8/35lbs, 10/25lbs
5. Concentration Curls (鍛練二頭肌) 12/25lbs, 12/25lbs, 12/25lbs, 12/25lbs
6. Triceps Pushdown (鍛練三頭肌) 15/10lb, 10/25lb, 10/25lb, 10/25lb
7. Ab Crunch Machine (鍛練腹肌) 15/35kg, 15/35kg, 15/35kg, 15/35kg