去飲

今朝一早過左海踢波，
牛兄話九點半互 Call，
點知佢熄我電話，
可惡！

十點幾係天后食完早餐，
就出發去球場。
地點由維園改到摩頓台，
再改去寶馬山配水庫。

打左兩場，
一勝一負我冇波入。
機會唔係冇，
一球失位快腳挑高過左守門員，
不過中眉。
一球扭入禁區（我都扭得波，可見對面實力），
不過踢得冇力及大正中。

之後趕返屋企裝身，
再趕去粉嶺。
去到既時候，
已經三點十五分。
（呢個係點解我坐得咁後咁邊既原因），
程序去到新娘剛剛入了教堂。

教堂行禮既內容唔多講了，
反正個個係教堂行禮都係咁上下程序。

想講既係夜晚個餐。
派左個新仔黎 Serve 我地，
新仔唔係問題，
最慘係佢未滿師。

呢間食店係會將每道菜分好晒先畀我地，
一般侍應係用個大勺，
好似執藥咁執晒落個勺度，
然後落碟。

有 d 唔係好夠經驗既，
可能會分兩次。
即係每碟一勺細既先，
到每碟都有喇，
再分餘下個 d。

不過我地個枱既就……
逐「舊」夾落碟，
即係每碟有一棵西蘭花後，
再分第二棵西蘭花，
之後第三棵……

基本上係隔離枱食完，
我地都未分完。
結果我地叫個侍應唔駛分，
我地自己黎。

分翅又係攪笑，
每碗分到半碗後，
佢就開始派畀我地，
餘下個 d 翅唔知佢想點……

飯（鴛鴦炒飯）麵（水餃）個 Part 仲攪笑。
一般十二個碗，
會係一半飯，一半麵咁。
我地只有十個人，
結果，
四碗係白色飯，
四碗係紅色飯，
餘下兩碗係只有汁……