巧遇 512

中午同同事去左 APM 食，
經過一間化妝品公司，
見到人山人海，
不過唔知咩事，
都係醫肚最實際。


先去 Food Court，
勁多人，
搵唔到位。
不過遠遠望到阿威同阿哥個同學兼波友，
睇個關係都知有幾唔熟，
所以都冇打招呼。


之後上三樓，
去返上次個間。
途中迎面見到個化「行」妝既吳日言，
不過同行既竟然冇一個認得出，
係佢地 Out，
定係我認錯呢？


去到上次個間，
都係好多人。
再上多兩層，
去到吉野家，
又係好多人。
結果落返兩層，
去到 KFC，
一入去就搵到位。
十五分鐘連買連食，
之後就離開。
途經之前個間化妝品公司，
見到有 Fans 舉牌同尖叫。
行埋一睇，
原來係 Twins，
呵呵呵……

---

今晚考日文，
係最淺既一次。
（雖然都係唔識）

尤其是 Listening。
Listening 既考法係老師讀一段對話出黎，
我地聽完再答一條問題。
d 對話通常都係 Fake 你幾下，
先有答案，
總共十段對話，
十條問題。
點解話淺呢，
講個例子就會明。
其中幾期係是非題，
咁「是」、「否」呢 d Keywords，
老師會讀得特別大聲，
特別明顯。
例如「否」係日文係讀成「eei」，
佢逐個音讀出黎「e」、「e」、「i」。
考完試，
上去交完留位費就走喇。

怪怪的晚餐

我一路都以為受難節朝早培浸有聚會，
我去左睇早場係非常不對。
後來問返 d 師弟，
原來今年改左做晚會，
咁都冇咁內疚。
（咪又係去左玩……）


Anyway，
今日過得很平淡。
火車公司個 Product 要等 Production 個邊整起。
今日主要都係 Check 下 d program 有冇問題，
同埋上網找有冇 Rack Mount Enclodure，
即係係 Yahoo 同 Google Search，
不過一百個 Results 都未必有一間中。
結果找到一間泰國公司、
一間英國公司有，
但尺吋唔係好對。
上個攝影 Forum 問下 d 網友，
好彩真係有人知，
佢地話深水步華輝會有，
咁打個電話去問啦，
真係有，
真係要多謝各位網友。

---

放工之後冇去跑步，
拿拿聲返屋企。
今晚晚餐係……er……，
點形容好呢？
類似你地食北京填鴨咁，
不過冇鴨片，
只有西芹絲、紅蘿蔔絲和瘦肉咁。

食完晚餐就開始作文同溫書。
我始終冇咩集中力，
過左成晚，
書又未溫晒，
文又未作晒……

放水

放假後第一個工作天，
就有新任務。
當我找完資料同老闆報告之後，
佢竟然覺得我 d 資料係錯既。
Well，份 BOMs 寫到明係個 Supplier 係邊個，
不過佢一口就否決，
咁我都冇說話好講。
最慘找其他 Suppliers 既資料又冇我地想要個隻顏色，
今次有排攪喇。


夜晚上日文堂，
今次係考試前最後一堂，
老師通常會講講 Tips。
唔知係呢位老師一路都係咁畀 Tips，
定係因為今次只得兩日時間溫書，
d Tips 都好畫公仔畫出腸 Feel。

份卷通常都有好多 Part，
第一部份係串生字。
以前姜老師好少係呢 Part 畀 Tips，
最多只是話我地知每一課會有幾多個生字考，
咁唔夠時間溫書個 d 就識得「重點出擊」。
但今次李老師卻係開晒七個生字畀我地。
以往既考試既串生字，
我都係豪晒 d 分出去，
今次就幾乎有底分咁滯。


其他個幾部份，
都係畀晒例子會點考，
其至乎連讀解同聽解都有 Tips，
咁今次想唔及格都幾難。

不過兩睇啦，
咁畀 Tips 法，
會唔會降低左我溫書既源動力呢？

今次既目標分數係八十，
希望得啦，
第一步係作好篇文先，
努力！奮鬥！

染髮

今朝同媽媽去左飲茶，
之後落左澳海城。
都唔明自己點解會去，
想睇既戲一早睇晒，
其他既連睇碟都冇乜興趣。
結果媽媽同 Auntie 買左見鬼 10 既飛，
我呢 d 膽小鬼梗係唔睇啦。


未開場，
行左間髮形用品鋪。
間鋪做緊七折，
好似好抵咁，
結果買左支染髮劑。


返到屋企，
就打機喇，
打 GBA 版既三國無雙，
等到媽媽睇完戲返黎，
就幫我染髮。
之後佢再出街，
我就食晚餐。
今晚有 KFC, 雲吞同炒年糕，
同兩樣係買返黎，
炒年糕就係工人炒既。
亦即話，
我今晚晚餐、明早早餐和明午午餐都會係炒年糕。


食完年糕，
就開始執 Anaheim d 相。
幫公司影左三十幾四十張，
選了其中十七張出黎，
明日要抄返公司，
至於自己個 d，
d Pano 好似全軍盡墨。
夜晚影個 d 炒就預左，
日頭影既都炒左一 Set，
仲有 Set 未整。
執相執到成點幾兩點，
好眼訓喔。

---

好攪笑，
人地復活節食復活蛋，
媽媽無啦啦去蒸蘿蔔糕……

---

出住六張相先。

一字長蛇拍烏蠅


ND4 的流水


有仗打？！


童真


樂游游


Pinky 學校旅行

慘敗

今朝一早起身返崇拜，
梁家慧帶左佢爸爸黎，
佢爸爸之前因病入左醫院，
現家逐漸康復中。
結果我成朝眼濕濕……


崇拜之後，
返屋企食午飯，
之後去左彩虹踢波。
今次慘敗五比一，
自己原全不在狀態，
打前鋒入唔到波不特止，
打後衛又成日漏波。
比賽完之後，
同街場 d 人踢，
好彩都叫做入左一球。

比賽尾段開始落雨，
愈落愈大。
結果被困冇得走，
等 d 雨細 d 之後，
我就打著傘子回家去。

返到屋企睇金像獎，
無線 Delay 轉播。
今屆頒獎典禮，
真係得啖笑。
之前話要消息封鎖，
唔畀早過無線公佈結果呢筆唔講。
每 Part 開頭都會有人講講中國電影百年史，
第一個係 DJ 森美，
講得幾好冇問題，
之後個 d 拿住貓紙不特止，
（拿貓紙都用細細張卡仔丫）
仲讀到錯晒。

d 頒獎嘉賓 d 對答又勁多 Dead Air，
講埋 d 唔好笑既笑話。
有個仲要連得獎人個名都唔識讀，
唉……

虎聚

昨日同大學同學出街，
今日到兒時玩伴。
中午落左新發同細牛食午餐，
之後上左去打機，
打新既 Winning Eleven。
半個至一個鐘之後，
黑洞都黎埋。
打三粒星既難度，
細牛話好難打，
但係我又唔多覺，
可能呢排屋企練習得多。
贏左世界盃之後，
就玩三國無雙 4。
打司馬懿傳，
我用司馬懿，
勁唔好用。
反而黑洞用甄姬就玩得好爽。


到阿力放工，
我地四個就左大家樂食飯餐。
焗豬扒飯、海南雞飯都唔駛等，
反而阿力叫那個蕃茄肉片飯要等，
真攪笑。


之後佢地三個同阿力表弟打麻雀，
而我就睇返 d 漫畫同打三國無雙。
唔知點解，
佢地好鍾意儲人，
即係用同一個人，
係同一個版圖不斷打儲經驗值升 Level。
我就唔係咁鍾意呢個玩法，
畀你有壓倒性實力玩秒殺邊好玩架。
刀仔割大樹先附合我既性格，
絕處逢生先有成功感。
不過係佢地眼中，
我呢 d 就叫做怪喇。

講返細個個時過復活節，
細牛話我地 14 歲個年復活節日日一齊玩，
我仲係其中一日講左一句：
「咁又一日喇。」
不過其他三個人都完全冇印象……

一日睇兩場戲

今日係受難節，
因為唔知幾點崇拜既關係，
（係 Forum 問都冇人答既……><）
我冇去到崇拜，
結果去左睇早場。

今朝係奧海城睇精武家庭，
馮德倫執導。
OK 好睇，
幾有趣，
我覺得好睇過大佬愛美麗。
例如黃秋生問自己徒手同人打架，
之後又唔知邊度變把關刀同櫻槍出黎打。
最抵死既係，
呢個矛盾處，
係戲院中唔少人睇得出，
我亦聽到隔離位有人細細聲講。
然之後，
戲中亦點出呢點……


睇完戲，
返屋企食飯，
休息左一陣，
又出過去。
約左班大學同學係朗豪坊睇哈爾移動城堡。
Manman 同艾利斯都話帶多個人黎，
都估到係邊個架喇，
果然係浩堅同馬姬。
我地九個人睇五點場，
（Dada, Roger, Manman, 浩堅, 艾利斯, 馬姬, 阿梁, 阿輝, 我）
約四點半等，
四點九打畀阿輝佢竟然仲係屋企，
結果佢開左場半個鐘先到。

入場後有件攪笑事發生左，
我地其中兩個位畀人坐左，
平時可能係坐錯位，
又或者入錯院（例如 2 院入左 1 院）。
但係佢地位又對，
院又入對，
但是拿住既係明日既飛！
唔知佢地包爆谷點處置呢？


睇完戲，
Manman 同浩堅走先，
其餘既人上左頂樓一間西式裝修，
但係食中餐既食店食野。
D 野食一般啦，
埋單每人 89 元，
以朗豪坊既消費指數算抵，
但以食物質素就……

---

係睇哈爾之前，
抽空去左做 Gym，
都成兩個月冇去，
今次只係做左三個動作，
但野野都好應

1. MTS High Row (鍛練背肌) 15/5+5kg, 10/15+15kg, 10/15+15kg, 10/17.5+17.5kg,
2. Standing Bicep Cable Curl (鍛練二頭肌) 15/35lb, 15/10lb, 10/25lb, 10/25lb
3. Triceps Pushdown - V-Bar Attachment (鍛練三頭肌) 15/10lb, 10/25lb, 10/25lb, 10/25lb,

初訪 APM

今日係復活節前最後一個工作天，
本來好想早 d 走，
結果都係要 OT 到七點幾。
最近收到張單，
要整件 Testing Equipment 畀火車鐵路公司。
我星期二已經叫個同事得閒攪掂 d Hardware，
好讓我 Debug 完個 Firmware 就可以試，
佢猛話得啦得啦，
幾分鐘工程之嘛。
結果我今日攪掂個 Firmware，
佢先開始攪 d Hardware，
仲一攪攪左兩個鐘，
之後仲有問題，
結果咪要 OT lor。


中午同幾個同事去左 APM 食野。
因為隔離公司 IT 部既人大部份都放假，
本來得三巨頭去食野，
唔知點解電子傑又叫埋 啡呢花啦 去，
結左就一行四人喇。
睇報紙話大部份鋪頭都係今日開，
去到又唔覺 wor，
三份一左右啦，
最後找左一大輪，
去左三樓一間日本野食。
由公司行去，
到搵食店，
到等埋位，
足足用左九個字。
講返 d 食物，
我係一個要求唔高既人，
所以乜都話好食架喇。


放左工，
畀個同事捉左去打牌，
話左八點要去上堂，
打個一個鐘都殺，
真係大癮。
因為打真錢既關係，
我冇係阿力度打得咁狼，
係咁趕糊。
反而吓吓做大牌，
做左三次十三么，
幾次青一色咁。
結果打一圈食左一次自摸青一色八番，
埋單都仲有九蚊袋。
（明明所有交易都係隻數，
唔知點解埋單係單數）

而我亦穿住返工套衫去上堂。
今日派左考試作文題目，
係講討厭既事，
我打算作係唔適當的地方打電話。
「適切ではない地方で電話をかける」

睇 AV

呢幾日早訓左，
不過好似訓得冇咁好。
以往十二點零一點訓，
一訓訓到第二朝七點。
呢兩日未夠十二點就訓，
反而夜晚醒左兩次。


今日發生左件好攪笑既事。
咁 Earphone 咪通常用耳綿既，
咁話說我個 Earphon 個耳綿近排經常甩，
咁今朝坐完小巴發覺右耳個 Earphone 甩左個耳綿。
返到公司入洗間，
洗完手係塊鏡到見到隻右耳點解黑左一達既？
一摸先發覺個耳綿留左係隻耳度。


夜晚本來想去練跑，
點知放工見到落大雨 Wor。
結果就返左屋企食飯，
食完飯行出奧海城，
一個人睇左戲，
彭浩翔套 AV，
套戲好好笑，
尤其是詹瑞文 Solo 個幾場。


有段幾攪笑，
話說佢地去申請青少年自雇基金，
咁就一個個輪住講佢地申請基金黎做咩。
個段真係笑死我。


忙左，
少左去睇戲，
除左上星期五同 Alex 睇左擊情之外，
都好耐冇入場。
黎近都有幾套想睇，
星期五同大學同學去睇「哈爾移動城堡」，
睇下幾時搵日去睇埋「精武家庭」。

決定外遊

夜晚上堂，
又係傳紙寫名既時間。
每逢每一期既最後幾堂，
又會傳張紙，
上面寫左下一期個班既資料，
如果你係打算繼續讀既，
咁就係上面寫返個名。
咁就大約可以預到夠唔夠人開班，
如果唔夠，
就會 Delay。
今次有八九個人寫左名，
換句話說，
唔計街外人，
都應該夠人開班。

好感恩，
下一期個時間按排得如此的好，
下一期的最後一堂，
亦即係考試個堂係 16/6，
剛好我 18 號應該係短周，
咁我就可以拿個長假去旅行。

最美妙既地方係，
再下一期叫做研究班，
日經係規定由日本人教，
咁即係一定要換老師。
即然換老師，
亦唔急於 21/6 即刻上堂。
我同毛同學講左話會等一個星期。

雖然等一個星期未必即刻再有班上，
但人總要有取捨的。
以前我會被上堂困死，
現在我學識時間的按排。
難得所有野都再次夾得咁完美，
我沒有理由浪費佢的，
不是嗎？

正式開始儲錢買機票，
爆氣！

---

今日見到馬智，
確定左佢係返黎長住。
佢地守七年守到了，
唔知我又係咪守得到呢？
唔經唔覺，
原來都兩年幾了……
不過好似仲有起碼七年幾……

有新單

呢個日記 Server 近排Down 左兩次，
每次幾日。
上次係星期六，
Save 唔到日記，
Delete 日記又冇事 Wor。
今日個日記 Server 叫做修理完畢，
我又可以 Upload 返早幾日既日記。
希望今次個 Server 可以用耐 dd 啦，
唔好成日 Down 啦。

今日三巨頭又要見老細，
話說隔離公司 Sales 接左單 Job，
咁我地就要做件 Engineering Sample 喇。
我同老細講四個星期左右起貨，
個客問兩個星期得唔得。
傻既咩，
又復活節又清明，
七除八扣之後得個幾個六七個 Working Days，
真係唔駛做，
變出黎咩。
四點半開會，
比我預料早開完，
五點半就甩難。

原本個 Product 好 Advance 吓，
不過原要呢 d Function 既客唔多。
結果呢度減下，
個度減下，
已經唔似原本個 Product……

---

今日有人話頭痛，
我叫佢休息多 d，
結果我自己大昏迷。
七點放工返到屋企，
食完飯，
睇完電視劇，
九點就上床訓覺。
一般我第二朝都係七點零起身，
即係將會訓十個鐘。

夜照青馬

因為太累太累既關係，
訓到十一點幾先醒，
本來想打電話既行動亦因此擱置。
點零鐘出左尖沙咀，
原本想上天文台開放日，
不過一黎都幾多人排隊，
二黎班影友又唔黎，
所以都冇上到去。
係東英行左一陣，
收到影友電話話出旺角，
咁我就坐車落去 Join 佢地。
臨上車先發覺唔記得帶 Octopus。

落到旺角，
原來佢地有人想買 O2 Mini，
不過行晒成條西洋菜南街咁多間電器鋪都冇現貨。
跟住佢地話上青馬影相，
但係我又冇帶腳架 Wor，
結果我就返屋企拿腳架，
再去青衣城 Join 佢地。

係青衣城坐巴士上長宏村，
沿寮肚路向上行，
係路尾開始入山，
跟住行上青欣山。
四點幾五點上到去，
係青欣山山頂影完一輪相，
跟住再去其他點影。
總共去左三個點，
有之前既山頂，
有冇路落去既山咀，
有穿過鐵絲網，
行到最近青馬大橋既崖頂。

一路影到八點幾九點先走，
返落青衣城之後，
係大家樂食我既晚餐，
最後十一點先返到屋企。
唉，
又冇時間執 Anaheim d 相喇。


返到屋企，
一開門就激死我，
隻狗咬爛左我個污衣袋，
好彩 d 衫褲冇咬爛。

SOC AGM

今日一放工，
就急急腳趕去荃灣。
本來話兩點到既，
不過最後三點先可以到目的地。
其實觀塘去荃灣個程小巴好快，
我兩點前已經到，
不過要再轉一程小巴上芙蓉山。
呢架小巴就耐 lo，
我足足等左九個字先有車。

上到芙蓉山，
裝完香就撒退喇。
落到荃灣地鐵，
我估唔到佢地係地鐵站都可以攪咁耐，
逐間店鋪行入去，
差唔多攪成個鐘，
結果我等到咁上下都係走先。

夜晚約左個網友交收，
上左佢影樓試支鏡。
係上緊去既同時，
收到劉 Sir 電話，
話 AGM 唔夠人，
叫我盡趕。

咁我試完鏡，
就拿拿臨飛的士落去機鐵站，
再坐東涌線啦。

原來根本唔係唔夠人。
個 AGM 七點開始，
我八點跑到去，
個 AGM 都差唔多完喇，
結果我去到好似係為左食茶點咁。
大佬，
你唔係唔夠人就咪鬼急 Call 我趕黎丫，
激死我。

十一點幾上左細牛到睇波，
不過因為太眼訓，
下半場訓左幾次……

睇戲定講戲？

今日放工返左屋企食飯，
之後出左奧海城睇戲。
睇既係「擊情」（Million Dollar Baby），
奇連伊士活(Clint Eastwood)自導自演之作。
套戲係第七十七屆奧斯卡贏左四個獎，
分別係最佳電影、
最佳女主角希拉莉詩韻(Hilary Swank)、
最佳導演奇連伊士活及
最佳男配角摩根費曼(Morgan Freeman)。
不過我就覺得套戲一般喇，
唔係話唔好睇，
不過就唔覺得係好睇到足以贏最佳電影 lor。


今次睇戲冇人傾電話，
不過都係睇得唔係好開心。
事關坐我個行有位女士，
成日複述 d 劇情，
仲做埋分析 tim。
例如：「其實佢想拿走張凳架，
不過拿唔切……」


睇完戲返到屋企，
先知冇帶鎖匙。
按左兩次門鈴冇人應之後，
打電話畀媽媽，
原來佢係下面食緊野，
咁落去找佢啦。
係我入 Lift 既時候，
我聽到開門聲……


落到去，
少不免要食「少少」野。
原來媽媽今晚都係奧海城睇戲，
不過佢係 6 院睇「變相怪 B」，
我係 1 院睇。

去到食野，
先知阿媽幾咁「了解」我。
話說 Auntie 問我食唔食乜乜，
我話我夠喇，唔要喇。
跟住 Auntie 就話：「係 Wor，你阿媽話過你唔食酸野架 Wor」
Well……

---

攝影之路真係無底深潭，
一個鐘唔夠既時間，
又用左 5K 敗左支 11-22mm。
唔知個筆 20K 既非經常性收益，
（即係培訓基金）
幾時到手呢？
都好幾個月喇……

預料之外的年假

唔明點解 d 人係都唔認錯。
一開始一定係瞞，
左瞞右瞞。
到被人篤爆左喇，
就開始賴。
到賴唔到喇，
就發惡………


話說係美國買左四包手信，
一包牛肉乾畀家姐，
一包朱古力畀 Auntie，
最後兩包畀同事們。
咁星期一我拿左兩包返公司，
餘下兩包係家，
星期二放工已經唔見左個兩包。
我以為放好左啦，
點知原來有人星期一拿晒兩包畀 Auntie。
咁做錯咪做錯 lor，
賴乜鬼野姐，
仲要賴我話兩包都係畀 Auntie。
我明明個日拿晒兩包問佢邊包畀 Auntie，
邊包畀家姐。
最後決定朱古力畀 Auntie，
97% Fat Free 牛肉乾既畀家姐，
咁都可以屈我……

最扯火就係佢話求其拿包屋企有既畀家姐做手信。
畀錯左人咪畀錯左人 lor，
做乜求其拿包野就當手信 wor。

---

因為公幹期間有假期，
所以可以拿返一日補假。
不過只係有做野那個星期日有，
坐飛機那個星期六冇得拿返。
咁順手問我仲有幾多日假啦，
原本我都以為我 d 假用得七七八八架喇，
點知原來仲有 9.9 日。
一 Chack 先知，
原來我係到做第三年喇！
第三年有咩特別呢，
就係多左一個 Work Week 既年假喇。
原本得兩個 Work Weeks，
現在有三個 Work Weeks。
真開心。

定向練習

LCD 既問題今朝就要解決了，
經過三個 Engineer 商討之後，
又打左過電話上大陸間廠，
終於有左結論。
結果我用返我個方法……汗
只係個 Layout 要改一改。

解決左呢過問題，
我就返去繼續 Debug，
估唔到有突破性既進展。
雖然仲未完全 Debug 到，
但個 Bug 既範圍有四千幾行縮窄到幾十行。
相信呢一兩日可以起到貨。

下午又開會，
今次係傾返 Exhibition d 野，
睇吓有 d 咩要跟進。
原本係約四點半開會，
不過上手四點八先放間房畀我地，
結果一開就開到六點。
我就開完喇，
不過另一個同事就六點被佢叫左入去傾第二樣野，
係咪痴線架，
仲有三個字放工都叫人去開會，
好彩我唔洗姐。

放左工去練跑，
估唔到今日個個都遲。
七點半先換完衫，
做完熱身差唔多八點。
首先跑十五分鐘慢跑，
今次改左個圈，
真係圍住公園跑，
繞少左路，
比以前短左少少。
一個圈跑左九分幾，
跑得好盡吓，
如果跑三個圈未必 Keep 到，
希望做到四十分鐘四個圈。

之後有個公園定向，
發揮得唔係好好，
跑十一分零七秒。
阿健話最快那個十一分頭，
唔會係我掛。

睇黎我地就快出到第二個女子精英賽員。
佢好有興趣跑，
每次跑完都會重溫，
仲會問人應該點跑，
不過好似熱心過龍。

冗長會議

下午連環開左兩次會，
第一次係單對單同老闆，
傾改 Product For 某個 Customer。
應承左兩個星期起貨，
都唔知得唔得 Tim 架。
其實單野係個 Sales 找返黎，
係佢上報老闆之前，
其實我都做了唔少野，
例如 Prepare 左份 Product Spec。
不過老細好似唔知道我出既力，
我既功勞好似畀左個 Sale，
唔緊要啦。

第二個會係三個 Engineers 同老闆開，
傾新個 Product 既野。
最麻煩係個 LCD，
我原本以為傾好晒，
連 PO 都 Send 埋出去，
點知現在先黎話要再改。

傾到差唔多七點，
都未有結論，
結果老闆叫我地三個傾掂先，
明天先畀結論佢。
離開老闆間房，
拿拿聲大撒退啦，
返到屋企成七點幾八點。


換左衫食完飯就出去上堂喇。
走左兩堂總共三個鐘，
以為會 Miss 好多。
點知佢冇想像中教得咁快，
我用左十數分鐘已經追得返，
可以做練習喇。
不過 d 生字就麻煩少少，
平時已經弱架喇，
今次仲要讀都冇讀過……


上完堂本來想早 d 訓，
不過差唔多十二點時收到林小姐電話，
話要借地席。
商討點樣交收時，
先知原來馬智返左黎，
仲係觀塘返工 tim。
唔知佢係長駐香港定係會再返去呢。
佢地快 d 結婚就好喇，
咁我每年就會多兩封利是，
呵呵呵

時差

今日係返黎香港之後既第一個工作天，
因為 jet lag 既關係，
中午食完飯已經開始眼訓。
兩點既時候，
同事已經見我雙眼滿佈紅根。
帶左兩份手信，
牛肉乾畀 Workshop 班女工，
朱古力就放茶水間。

過美國之前，
託過網友係韓國訂條相機頸帶。
其實上星期三已經到貨，
不過我當時係美國，
咁返到黎自然聯絡佢取貨啦。
約左佢七點係旺角等，
點知佢六點九打黎話佢要遲少少，
咁我就上旺電行下先。
七點三交收完，
我就行返屋企。

Check 下 d 未接來電，
原來迪哥中午打過電話黎，
問接力賽佢個隊應該叫咩名。
因為找唔到我，
佢就寫左青蛙二隊落去。
咪一早話左佢知叫 Frog 1，
同我爭二隊個名都唔緊要，
都睇清楚張 Form丫，
人地叫你填英文隊名，
你唔係填中文呀？
真係激死。

返到屋企，
媽媽話過 Auntie 到打邊爐，
問我去唔去。
我本來都想去，
不過咁眼訓，
都係唔過去喇。
早 d 食完飯，
早 d 訓覺好過啦。

大昏迷

今朝五點半就返到香港機場，
我一路都以為我班機已經好早，
原來仲有一班機早過我地。
過完關後，
等左好耐先有行李。
講起出行李，
LA 好服務好多。
佢地有專人係出行李個口度，
扶正 d 行李，
方便旅客拿。
香港那個就自動化得多，
佢甚至 detect 到輸送帶近行李出口有其他行李，
就唔再出住，
當然總有出錯既時候啦。


去到接機大堂，
媽媽仲未到，
咁我就去餐廳等佢，
順手煲吓粥先。
等到六點九，
媽媽先到。
同佢食完早餐，
佢就返工，
我就坐 E 車返屋企。
八點返到屋企，
沖過涼，
拆返大半行李之後，
就去冬眠喇。

原本六點至八點有波踢，
結果我係訓到七點九，
吃過晚飯，
睇完獎門人，
我又再去訓覺喇……
坐一次長途機，
真係好累呢！
原本今朝有場定向比賽係髻山攪，
我應承左幫手，
結果都累到有去，
希望冇咩差錯啦。

煲碟

新年頭三日都係訓醒就出行，
返到屋企就訓，
都冇係屋企食飯。
原本昨晚打算係架，
不過臨時被 Alex 叫左去。

今日同先前幾日好唔同，
基乎成日係屋企，
上陣網，打陣機，
煲陣碟。
套浪族闊少爺我仲久兩隻碟未睇，
臨到結局，
畀我好深既體會。
話說主角蔣傑贏左個設計比賽，
獎品係國際知名公司既一份僱傭合約，
要去東加群島唔知做幾年野咁。
但係蔣傑因為香港有個女朋友施敏，
選擇唔去東加。
而施敏就為左佢好，
唔會第時後悔，
就同蔣傑分手。
之後就……要換碟，
仲欠一隻未睇 ><


睇淨一隻，
就換衫出左去永安買袋。
個袋用黎裝西裝，
但行晒成間永安都找唔到。
返到屋企上佢間 online shop，
又找到 wor ><
激死。


係屋企食完飯，
就睇殘酷一叮，
又係李克勤同梁榮忠做主持，
呵呵呵。

其實我覺得佢同America's Next Idol 唔同，
仲好笑 d tim。
例如今集有紅白藍膠袋（件衫真係紅白藍膠袋黎架）唱 Twins 既女人味，
有人唱美少女戰士等等。
我就成集冇停過咁笑喇。