定向與我 II

我在四月十三日的日記曾經說過，我玩了野外定向都已經有十多年。
最開心時加入了童軍訓練隊之後兩三年的時間。
因為每次都有一班熟識的戰友一起去。


尤其是中六攪學校的野外定向會那年。
整個幹事會，超過一半都有玩野外定向。
每次比賽，都會約齊一大班人，浩浩蕩蕩咁出發。
比完賽後，又會一大班人去吃飯，多麼熱鬧！


雖然我性格比較內向，但極嚮往一大班人熱熱鬧鬧的活動。
但為越多人，我需要發言既時間就相對地少。
一個內向喜愛熱鬧，是否很矛盾呢？


同是中六那年，我入了香港野外定向集訓隊，
集訓時間係逄星期四黃昏，撞正放學之後要集會。
以我每星期放集會後都要趕快入沙田體院訓練。
其實都唔算係「集」訓，隨了做熱身時會見到其他人，
大部分時間都係自己一個人跑，跑完後教練又不會和你分析而求進步，
這和我自己一個到公園跑有甚麼分別？
所以後來都沒有再去，只有星期三晚跟童軍定向隊練。
現在就算想再入香港隊也沒有能力了。


說回中學既定向會，雖然好歹都算風光過。
但隨著一眾主力畢業離學後，已開始沒落……
很多年沒有見到母校的人在野外定向比賽出現過，
隨左一個，一個畢業了四年仍然厚著面皮用中學的身份跑野外定向的人。
（那個係邊個？你睇緊個既日記丫？）


其實早年都仲有一個既，一個次次跑比賽都有三甲既人。
（唔好以為佢好勁，成組得三個人參加而已 ）

現在佢都冇玩喇。


講番自己，出年升班挑戰更高水平的比賽。
我預計至少需要兩小時內跑十五公理的體能及速度，同時腦部還有知覺。
是比正常跑步的速度慢，因為跑野外定向不是純跑，我們還要用腦的。


現在，我大約可以保持知覺用四十分鐘跑五點一公里。
每星期做兩次訓練，每星期均會比上星期跑多五分鐘。
如果有恆心的話，十六個星期後，即是大約在七月尾就會做到時間上的要求。
接著是速度上的提升，同樣是每期均跑快些少。
希望在十月賽季開鑼的時候，我有挑戰列強的能力。
請代禱。

---

ps. 今年母校多了師弟師妹跑野外定向，據悉有人入了少年發展隊！
希望他們可以保持對野外定向的熱誠。

---

再 ps. To 76264 的 小BOY：

多謝讚賞，不過點解你抄我的 javascript code 都唔出聲呀？
唔得，我要去你處賣賣廣告！

---

再再 ps. 剛由電視新聞得知台灣政府剛取消了香港人到台的落地簽，
希望唔會影響我到台灣旅行的計劃啦！

充實的星期一

今個星期，是很「充實」的一個星期。


四月第一個星期那堂日文班因為非典型肺炎既關係而停課。
老師決定了在前天（星期二）補課，揭開了今次「充實」一周的序幕。


我上日文班那處，教完生字之後那個星期，就會默書。
平時都會有整整一個星期溫書，但今次就只有五日溫習。
但中間又有四日復活節假期 wor，
咁又出左去玩幾日，
咁就更加唔夠時間溫習。
好彩，最後默既時候都識晒，只是大意而錯少少。


之後日文家課
平時有一星期嘛，今次只有兩日；
平時只有一張工紙，今次有三張。


再加上我星期三白天要上班，
晚上要上大學，
時間就更加不足。
只好每晚少睡一小時，
對於我這個貪睡的小朋友來說，
是多麼痛苦的事啊！


星期五要交大學的功課，
星期六要考 JAVA， （不知道只有 15% 的知識，有沒有機會及格呢？）
如果一天有四十八小時用就好了！


雖然好忙，但仍然會玩 icq、newsgroup、傾電話、和看別人日記。
我的日記右手面既交換日記連絡，
每一個我每天都至少去兩次呢！

最近發覺某中同既日記寫得愈來愈玄，
假若你看到的話，可唔可以遷就一下中文不及格的小弟，
寫得淺白一點呢？




ps. To kaman

你留言問我問題，但又唔留下聯絡方法（個 e-mail 假的 ）
你叫我點教你呢？

避難所

阿芷你說得對，我竟然忘記了神是我的避難所。


或者是我太自大了…
有事時，只在想要如何解決。
忘記了神在我身邊；
忘記了向神禱告；
忘記了求神的幫助；
我想我是時候反省反省一下了。


或者是我衝動了…
我很多時未有深思熟慮就會衝口而出。
傷害了人之餘又會傷害了自己。
又會害了人要擔心自己。
點解我成日都係咁？
點解我唔可以係每次講野之前都想多兩次？
點解我唔可以先顧慮別人的感愛？
我想我是時候反省反省一下了。


又或者是我幼稚無知…
好多事以為過到自己個關，就可以過到人地個關。
唔識得多角度看事物。
只識「律人嚴，待己寬」而唔識「律己嚴，待人寬」
我想我是時候反省反省一下了。


太多太多事情需要學習。
而今日學懂的課題是「反省」
希望可以學以致用。
希望我可以「知錯能改」
希望我可以成為別人有事時的分享對象。
希望我可以成為某人的避難所。
希望我可以成為某人的信心保證。
希望我可以……
希望我可以……
很多很多的希望，希望可以達成。


最後，和大家分享一首英文詩歌和一首中文詩歌。
願當我們有困難時，都會記起神是我們的避難所。
原來神無時無刻都會守護我們，引領我們走過一個又個難關。

You Are My Hiding Place You are my hiding place You always fill my heart With songs of deliverance Whenever I am afraid I will trust in You I will trust in You. Let the weak say, "I am strong in the strength of my Lord." You are my hiding place You always fill my heart With songs of deliverance Whenever I am afraid I will trust in You I will trust in You

心靈的迴響 天空裡散聚雲片片 無奈月明星不閃 莫流淚悲歡合離是難免 祈求上主恩每一刻能抹淚面 世途裡恩怨恨愛定會現 心靈中多少困倦與掛牽 向前去不怕浪裡多風險 熱誠共創真美善 願主愛常記念 求恩主引導每一天 願真愛傳世上 永生福共享百萬年

擔子

真的很疲倦，很辛苦。
肩膀上實在有太多的擔子。
太多功課要完成：
太多課堂要溫習；
太多事情要處理；
太多問題要思索；
太多感受要顧慮。
我真的怕我負擔不起。


很想很想可以唔聲唔聲走左去。
找處沒有人認識我，甚至沒有人既地方隱居。
一個人靜下，不問世事，專心思索一下人生的意義。


究竟我正在做甚麼？
究竟我應該做甚麼？
究竟我將會做甚麼？
我唔知，我真係唔知。
有冇人可以話畀我知？


唔想呼次則來，揮之則去。
但是，我又可以點？
「忍一時風平浪靜；退一步海闊天空。」
係咪真係咁易忍呢？
我唔知，但我會嘗試。

又，究竟是誰寫這段文字？
是炒炒？是 Joey？定或是第三個人，第三個人格？
我怕，我怕我終有一日會患上思覺失調。


（對不起，心情不佳，，「野外定向篇 II」再延數天）

我的教會

我的教會（培正道浸信會）每年都會有兩次浸禮，
一次在復活節，一次在聖誕節。
感謝神，今次有兩位弟兄姊妹受浸。
人數雖然不多（小弟參加的第一屆浸禮有十多個弟兄姊妹）
但是積少成多，一傳十，十傳百，將福音傳開去。

浸禮象徵和主耶穌同死、同埋葬、同復活。
求神都保守他們，讓他們成為活生生的見證。

安息日將盡，七日的頭一日，天快亮的時候，抹大拉的馬利亞和那個馬利亞來看墳墓。 忽然，地大震動；因為有主的使者從天上下來，把石頭輥開，坐在上面。 他的像貌如同閃電，衣服潔白如雪。 看守的人就因他嚇得渾身亂戰，甚至和死人一樣。 天使對婦女說：不要害怕！我知道你們是尋找那釘十字架的耶穌。 他不在這裡，照他所說的，已經復活了。你們來看安放主的地方。 快去告訴他的門徒，說他從死裡復活了，並且在你們以先往加利利去，在那裡你們要見他。看哪，我已經告訴你們了。 婦女們就急忙離開墳墓，又害怕，又大大的歡喜，跑去要報給他的門徒。（馬太福音第二十八章 1-8 節）

因著耶穌基督的復活，才有今天的基督徒。
祂勝過死亡，生死之權，都操在神的手中。
耶穌說：「復活在我，生命也在我。（約翰福音第十一章 25 節）」
永生是我們擁有的禮物，原因是耶穌把我們緊緊的握在祂手中。
但同時，我們也有責任將救贖既傳開去。
在萬民心中播下種子。


回應非典型肺炎在社區蔓延，我的教會作出措施妁保障會眾安康。
除主日崇拜、週六崇拜、週三祈禱會外，所有活動暫停舉行。
除此之外，亦要求會眾帶上口罩。
唱詩改為詩歌默想。
唱祝褔詩歌時的握手問安乜改為拱手示意。
崇拜得的茶眾取消。
今天守主餐時也全體戴上膠手套。


香港現正經歷前所未有的嚴峻時刻，以勒基金會發起「百萬小時萬民禱告運動」
每小時每分鐘，都會有基督徒為香港禱告。
祈望看到這段的你，也能出一分力，每日都為香港禱告，
同心合意向神呼求，求主施恩憐憫香港。

西貢海鮮

昨日再有十二名患上非典型肺炎的病人死亡，更是單日新高！
請大家為香港祈禱，為病人祈禱，為醫護人員祈禱。


入正題，西貢海鮮，果然名不虛傳，非常美名。
但是在食之前，又再一次考驗了小弟的耐力。
事原昨天是公眾假期，很多人去郊外遊玩。
結果回程時人多車少，加上大塞車。
小弟準時六時半到達西頁碼頭，而我的同事們，八時許才能由黃石乘巴士回到西頁碼頭。

Joey：在這個多小時，炒炒如何打發時間呢？

小弟就是一面收聽電台廣播，一面溫習 Java。

八時多，我們一行八人浩浩蕩蕩前往開餐。
近日，由於非典型肺炎既效應，連平日車水馬龍的旺角街頭也人煙稀少，
但西貢各餐館卻門庭若市，需於路邊加桌子呢！


我們唔想浪費精神想吃甚麼，所以叫了一個套餐再加一個窩麵就算。

首先來的是生炒骨（一件骨都沒有，明明係生炒肉片…… ）

吉烈炸鮮魷（很美味但也很熱氣，少食為妙）

再來椒鹽瀨尿蝦（原本是小蝦的，但因為太好生意，售清了。小弟即席表現了用牙隨殼法呢！）

接著來的是班球窩麵（佢又騙我了，明明是班片窩麵）

還有蟹和芝士焗龍蝦（說來慚愧，我到食完才知是龍蝦。我一直以為是芝士焗蟹呢！）

唐生菜（今餐至愛，夠健康！）

蒜茸粉絲蒸勝子（即係帶子，但是長條形的，也是推介之一 ）

清蒸海上鮮（個人不是太喜愛吃魚）

最後，當然唔少得特大碟的海鮮炒飯（夠我食三餐，但我同事獨力吃了大半碟？！）


吃完豐富的海鮮晚餐後還去一間頗為出名的甜品佔吃甜品呢！
我吃了紅豆沙溝綠豆沙，也很美味呢！

昨天最後一項活動，就是乘坐亡命小巴，挑戰最快出旺角時間。
架小巴真的超速得很厲害，逢車過車。
我坐在窗口位，開大了窗，涼風撲面，感覺得爽呢！
（不過在此奉勸各位駕駛者，超速駕駛是很危險的 ）
廿分鐘左右已由西頁市中心去到油麻地好景中心。


ps. 由於有特發事件需記述，「野外定向篇 II」順延一天。

多事發生的一天

今日和媽媽去了金太郎吃壽司。
但估不到，沒有去這樣久，還是沒有改進。
同樣是不好食（還是我食野挑剔，要求高左呢？）


我今日早上，我的同事去了西貢行山。由海下去灣仔半島再黃石。
我晚上會到西貢會合他們吃海鮮，和其中一位同事慶祝生日。
希望那兒的食物好味道啦！


放假之前，我替自己定下了工作計劃，我要溫習 Java。
因為我下星期六就要考 SCJP（SUN CERTIFIED PROGRAMMER FOR JAVA 2 PLATFORM）
但休息了兩日，溫習進度不佳。只是做了日文功課，看了數頁 Java 筆記。
看來我要加把勁了。請代禱。


今天很開心，爸爸給了我五百元的零用錢。
自升上了中五，爸爸都沒有再給我零用錢。
今日他借我的手提電話落注賭馬贏了，所以給了我獎勵。

在此再說一次，我不喜歡賭博。正確點來說，是討厭賭博。
所以你們若有賭局，不要預我會到。


最後，和路人甲和102454的小蠻兩位講聲，不要當我這兒是討論區。
間唔中一篇半篇都沒有所謂，多就冇謂啦。再有野傾就麻煩四四六六私下傾掂佢。
再唔係就回去兩位的日記處傾（若有的話 ）

我在這處寫日記，沒有大事宣揚。
所以入來睇既人，都是有心人。
閱讀後還有感想、分享給我的人，更是感激不盡。
多謝你們。


To 102454的小蠻：很羨慕你男月友可以做廿幾三十下引體上升。
我現在都有一個星期做兩次健身，不過以心肺功能的鍛鍊為主。
因我跑野外定向比賽時嚴重缺乏體能。
一個一小時三十分的比賽，我只有頭三十分鐘有氣有力，其餘時間都是慢如蝸牛。
今年的目標，係可以全程以跑的方式完成比賽。

具體關於定向比賽的事，明天續談。

工作經驗

Happy Good Friday!
今天係受難節，信徒會紀念耶穌基督為我們釘死在十字架上。
以寶血為我們贖罪，三天之後勝過了死亡而復活。


今天想延續前天的話題，談一談我的工作經驗。
說起我過往的工作，真的五花八門，甚麼也試過。

第一份工，是中四升中五暑假係一間非常出名既平民書店賣教科書。
有幾出名？
排隊買書人需要在對面街排隊等候個多小時以上。
而我，當時是負責跟刻客人交來的書單，收拾一套教科書。

可能當時我還年輕，又或因為我是外人（他們是家族生意）
所以我只是按單收拾教科書，然後等其他人負責收錢。
但係因為我手腳快，在我收拾第三單教科書時，
第一張都還未收錢。所以時常有客人有怨言，說我未做好一單就接第二、第三單。

除此之外，我有時又需要到各大出版社取貨。
地點包括：天后、土瓜灣、油塘、大埔等等。
從此我對港九新界都加深認識，不用做路盲。

這份工讓我學懂了如何做事如何又快又好


第二份工，是中五會考之後在 Pizza Hut 做暑期工。
不要誤會，不是當服務生，而是在廚房當廚子。
原來做廚子有很多東西要預備。
十一時開始營業，八時正就要回去預備。
要煮意粉啦、要將麵粉弄成薄底啦、要預備薄餅餡料啦、煮飯啦等等。
每天忙了三小時，才預備好所有材料，可以開始營業。
尤幸我上班的那只做外賣生意，所以那不是很忙。
而且是輪更制，下午約三四時就可以下班。

但最慘就是有時要「追更」。
「追更」的意思是今天上夜更，明天上早更。
晚上十一時多才下班，步行回到家時已經十二時多。
一時多才可上床睡覺，只睡五小時，就要起床預備上班。

這份工讓我學懂了如何按本子辦事


第三份，係大一升大二那時在寬頻公司當控制員。
控制員即是在寫字樓聽電話。不是聽客戶的投訴電話，
而是當負責安裝的師傅向我報告已經安裝完。
是否看似很高級呢？

這份工是我目前為止，上班時間最長的一份工。
一星期返七日，每日返朝九晚十一。
雖然時間長，但亦係最舒服的一份工。
點解呢？基本上我係冇甚麼東西做。
成日都是在等，只是間中見沒有人回報，要主動打電話去問。

尤其是每日五時後，寫字樓的同事都已經收工，整間公司都沒有人。
我就可以聽收意機、上網、看漫畫等等。
然後等到十時多，開始打電話去各師傅問問工作進度。
接著就可以收工回家。

這份工讓我學懂了如何「等」


第四份工是幫政府某部門寫網頁。
我完完全全體會到公務員的工作流。
早上回到公司，首先吃早餐，閒談一會兒後才開始工作。
午飯回來後，又是閱報，閒談才開始工作。
而且多數可以準時收工（準時的定義，是當秒針去到零的位置）
當然，勤力的我當然是由朝做到晚啦！

我上司又時常改變主意。
平均一日五次左右啦。
我寫好這頁，唔他滿意，要改。
再寫，再滿意，再改。
但最後是改到和第一次一模一樣。
然後他說：「今次這樣寫得好，一早應該這樣寫……（玩我？我第一次已經是這樣… ）」

這份工讓我學懂了如何靠自己下主意

除了以上所說，我還當過：研究助理、野外定向教練、程式編寫導師等等。
還差點兒當上護衛員（因為他致電給我說請我時己經是八月中，所以我回答他說已經沒有興趣。）

是否真是多采多姿呢？

Joey 與我

昨日講完我的志願，好應該講講我以前打工既事。
但是有好多人問我邊個係 Joey。
有透過「路人留言」啦、有透過電子郵件啦、亦有透過 ICQ 問啦。

所以小弟決定今日首先介紹邊個係 Joey 先。
明天才說我打工既事。


要說誰是 Joey ，有一首歌好適合。
就係陳奕迅既「與我常在」。
大家首先閱讀歌詞。

與我常在 曲:林健華 of Black Box 詞:林夕 編:Lom Leber 監製: Jim Lee 在一起看每齣戲 在一起嘆每口氣 再細常 同偕到老的況味 分鐘也抱緊你 沒有一秒共你別離 還攜手看著生與死 坐著臥著都分享 日日也為彼此設想 站著望著都分享 就在夢內發掘這真相 除非你是我 才可與我常在 一個人 從鏡內發展恩愛 除非你是我 才可畫夜同在 戀不來 從厭倦裡面偷取恨愛 在一起與你工作 在一起與你摸索 兩個人 同時佔有的快樂 每分鐘與你揮霍 沒有一秒沒我在旁 還攜手看著天空黑與光 在一起 會有多美 在一起也會不美 一個人 同偕到老不靠運氣

這首歌一矢中的地描述了我同佢既關係。

我同 Joey 由細玩到大，可算是青梅竹馬。
我有咩心事都會同佢講。
所以佢理論上是最了解我既人。

佢可算是現在同我最親既人，
對我最重要，影響我最深遠既人。
（當然有個最有前途新人力追緊上黎啦 ）


都呼之欲出係邊個了。
其實識得我有番三五七年既人。
都應該意識到佢既存在。
可能只是唔知道佢就係 Joey 而已。

我的志願

頭先做 listening 練習。
一分五一秒既錄音，我起碼聽左半個鐘先做起，睇黎要加把勁兒才行。

今日既題目係「我的志願」。
話說細細個小學第一次作文，通常題目都會係「我的志願」。
咁我地就要用我地有限既知識，去幻想自己大過想做 d 乜。
而其後每年，都仲會有起碼一篇作文既題目係「我的志願」。
（都唔明係咁多篇「我的志願」做乜）

咁究竟我寫甚麼是「我的志願」呢？
答案就係：警察、消防員、郵差、醫生、飛機師、清道夫……（下刪數百字）

基本上本「社會」課本教到邊，個期既「我的志願」就會寫乜野。
所以我篇篇「我的志願」既主題都係唔同既。

Joey：作文個 d 都係交功課而已，咁其實炒炒你既志願係乜？

個百幾個職業我都仲有點心水既。

第一個想做既職業係醫生。我覺得醫生好偉大架！毫不間斷咁拯救每一個人性命。
可惜，基於兩點，我打消了念頭。
我會考化學只係得 E10 ，所以中六時寧可選考 D 既數都唔選考 E 既化學。
但最重要既係，細膽如鼠既炒炒係好驚好驚血既。
所以見到餐廳見到生牛肉我會面色都變埋。


第二個想做既職業係警察。維持治安，除暴安良，責任多重大。
所以自細我都好鍾意睇關於警察既戲。
如：新紮師兄、傲氣雄鷹、飛虎、新紮師妹……
不過我知道我一定考唔到。
因為……因為……小弟一下引體上升都做唔到


第三個想做既職業係教師。自從小五時開始，我己經想做老師，將自己既知識傳授出去。
不過我係一個沒有耐性既人，教得兩教你都唔識唔明既話，我就火都黎埋。
一個人企係講台對住一班人講野既時候，我唔係講得結結巴巴，就係機關槍咁連射 d 字出黎。
咁既人，都係唔識合做教師。
（好彩假假地都係個註冊 Level 1 定向教練，有空都可以教吓人


有時 d 野往往都係出人意表。我大學選科時選 Information Egineering 而唔選 Computer Science，
很大原因就係唔想畢業做 Programmer。
誰料，小弟現在份工既 Job Title 就係 Software Engineer，即係寫 Program。
鬼叫自己細個時唔好好讀書，攪到冇一技傍身咩！

非典

我正式宣佈，我已經邏輯上轉左學校。
由科技大學轉了去公開大學。
公開大學既特色是甚麼？冇錯，就係遙距教學。
我昨日講過，星期三仍然有 lecture 上。
但今日收到 Program Director 既 e-mail，佢話：
「所有課堂改由網上發放…會有兩節 Q&A Session。」
簡單講句，就係改為遙距教學。
我要睇 Prof A 那段唔知佢做緊乜既教學錄象。
（雖然平時面對面上堂都已經唔知佢做緊乜，但係碼知佢教緊邊段。）
同聽 Prof B 既教學錄音。
冇計啦，唯有自修啦（本來仲打算一改以前既惡習，現在上多 d 堂 tim ）


非典型肺炎（疾病正名為「嚴重急性呼吸道症候群」，英文為Severe Acute Respiratory Syndrome， 簡稱為SARS）。
係香港爆發左一個月有多，政府都還未有效控制到。
原本 SARS 距離我好遠好遠，縱然德褔、淘大、牛頭角都有人受感染，而我又正正係九龍灣國展覽及貿易中心上班。
我都覺得距離我好遠，直到今日收到言個不幸既消息……

前幾日，我講過我心目中既一個好領袖應該怎樣怎樣。
可惜我如何努力也不能在政府身上找到。
港大公布最新民意調查，董特首竟然有四十一點二百分比既人支持佢，都唔知係唔係篤數…

近來發覺自己愈來愈唔識做人，得罪人多而稱呼人少。
都係做返以前既自己，做點點點人而少開口為妙。

以前沒有負擔，說話可以想到邊句就講邊句。
現在唔得，說一句，行一步都要算過度過。
有時驚講者冇心，聽者有意，會唔覺意串親人；
有時驚聽那個只是聽到表面既野，聽唔出內裡我真正想講既意思。

例如現在我唔敢同人講我食左 d 乜野好食既東西。
原本我食到好好食既東西，只係想同人分享喜樂。
但就會被理解為：「你有得食，我冇得食。你講畀我知有幾好食，即係串我冇得食啦！」
所以現在食到有甚麼好食既東西，就只會收埋係心入面自私地自己回味算數。

由細到大，我都將自己收到好埋好埋。
唔係我唔想開放 d，而係我真係唔識點表達。
所以識得我耐既人都會見個我兩個面（沒錯，我係雙子座既。就黎六月，大家識做啦）
一個係自閉仔既樣，坐係會坐死角位，野係唔會多講。
另一個樣係亦都可以玩到大癲大肺。

唔知你見得我最多既係邊個樣呢？

停課

由於屋企今朝電力供應出現問題，我唔知今晚整好未，所以趁現在有電腦係手就打左今日篇日記先。

首先回報下昨天戰況，昨天西貢塔門很熱鬧。經過一輪戰，小弟個隊係男子高級組只得一席第四。
賽後有足球聯誼會，小弟個隊輕鬆大勝（入廿幾球，包括倒掛，只失一球）拿回尾彩。

由於非典型肺炎影響，各大小學被下令停課。
一個星期後的今天，中小學都仍然停課，但其中七間大學都己經復課。
原本以為今日有得上堂，點之今朝收到 prof 封 e-mail，佢話：
「We will stop face-to-face instructions and we will try to use Web-based broadcast as much as possible as the means of instruction for the remaining part of this course」
即係話今晚冇堂上啦，原本按排左今堂要做 present。
你早 d 話取消，我唔駛浪費咁多時間預備丫！
畀成四萬幾蚊，你現在同叫我 self study 冇分別 wor。
個 WebCT （Web-based broadcast 個系統名）d 質素又差wor，
仲要安排係星期四播，邊有時間睇呢？（我星期四上日文班）
講開星期四，都唔知點解個 prof 咁鍾意安排 d 野係星期四做。
上次 midterm 考試又係咁。頭我以為唔夠時間教書（佢真係教得好慢）
個 prof 唔想用左一堂既時間黎考試，所以星期一用番黎教書，星期四考試。
點知考試之前個星期，佢話：「因為星期四考試，所以星期一放假」
prof 你玩我咩？星期一你唔教書，你仲乜安排星期四先考試？累到我上少一堂日文……

打打下日記，又收到個 prof 既 e-mail，閱畢後令小弟有衝動去消委會投訴佢欺詐。
e-mail 內容節錄如下：
1.由今天起打後既 face-to-face lecture 取消，改用 WebCT。
2.網上課堂逢星期一及四播出（又係星期四？！好愛都仲有星期一我選）。
3.Assignment 2 取消 present 部份，只需交 PowerPoint 既 softcopy。但要做多一陪 slides。
4.Final Exam 取消，改做交 group project report。又 group project？如果我 partner…咁咪…
5.份 report 既 format基本上同寫一篇論文差不多，不過只需寫十頁紙。

係呢個時候，收到另外一個 course 既 prof 既 e-mail，佢話：
「星期三照上堂，但要帶田罩同埋唔好坐咁近其同學仔」

點解兩個 prof 可以相差咁遠？
d 頂心頂肺既野唔講咁多喇，講下其他關於學東西既野先。
其實我想學車已經很久，身邊也有不少同學朋友已經考了牌。
我好想考晒一、二、三牌（私家車、輕型貨車、電單車），
不過當屋企人知道我想考三牌，就極力反對。
加上我又抽唔到時間上堂，結果就「想」學車「想」左四年……
唔得，要盡快的起心肝去學車先。

俗語說：「福無雙至，禍不單行」如來係真架！激死我，打打下今日篇日記輪到公司跳保險制。
千幾字冇左，要由頭打過…

ps. 李克勤又由新歌派上台喇，好好聽！

愛一個人 作曲：陳輝陽 作詞：林夕 主唱：李克勤、陳慧琳 李：她間中吻下去便沉睡 　 她也許不只一個伴侶 　 我受氣不駁嘴也被懷疑在騙她眼淚 陳：他口中有夢想不去追 　 他最懂得努力吃喝後尋睡 　 橫蠻但卻恐懼被閒話 合：我們變登對 陳：但眼見你責怪她的眼神　 合：流露笑容　對不對 合：當真正願意愛一個人　沒法再愛更需要恨 　 要奮不顧身繼續遺憾　誰計較有沒有開過心 　 當不計代價愛一個人　大概我也免不了私心 　 痛苦使我興奮　連錯愛都吸引　亦顯得我神聖犧牲作陪襯 　 曾開了一半口　去問我受夠沒有　然後卻不信還可更難受 　 曾經我伸過手　卻又毫無力氣走　怎能夠　愛過了之後　連恨也不夠 李：不愛她說下去亦無味 　 肯愛她不太需要道理 陳：愛下去不怕死放任其實亦也因自卑 合：當真正願意愛一個人沒法再愛更需要恨 　 要奮不顧身繼續遺憾　誰有錯　錯極也不扣分 　 當不計代價愛一個人　大概我也免不了私心 　 痛苦使我興奮　連錯愛都吸引　亦顯得我神聖犧牲作陪襯 李：曾開了一半口　卻又怕未算受夠　然後　期待著然後 陳：誰知我鬆了手　縱是毫無力氣走　不用怕　再愛過之後　 合：太多記憶太少淚要流

日程

各位好，小女子 Joey 有禮。

可能你會話：「咪住先，呢個日記唔係炒炒既咩？點解會係 Joey 既？」

查實材材今朝一早去左西貢跑野外定向。大好機會，小女子當然第一時間出黎爆料啦！

「咁有咩野爆呀？」

見炒炒早兩日講睇戲，就講樣先啦！你地唔好睇炒炒平時好似硬硬淨淨，唔多出聲好鬼 cool 咁。
其實佢好眼淺架！好易哭，大家唔多見佢哭都係因為佢死撐而已。
舉個例，兩三年前，佢同埋佢大學系會班同學去睇福音電影 -- 陳松伶主演既「生命因愛動聽」。
原本佢拿了包紙巾出黎諗住遞畀同學。結果？?係有同學遞紙巾畀佢 lor！（呵呵呵呵 ）

再講個近 d 既例子，早幾日佢同兩個中同，和中同既大同去看浸大劇社周年公演既「刺蝟哭了」
睇到中段己經有人眼濕濕。（呵呵呵呵 ）


除此之外，但凡所有恐怖片、驚嚇片、鬼片，非常超越細膽既炒炒都係唔會入場睇既。
佢真係好細膽架，基本上海洋公園既所有機動遊戲，除了摩天輪，佢都係唔敢玩既。
係咪細膽得可憐呢？（呵呵呵呵 ）


又由於佢沒拖拍
（呢度沒拖拍，係狹義既沒拖拍，而唔係廣義既沒拖拍。
至於狹義同廣義既沒拖拍既分別，麻煩拜讀愛因斯坦相對論篇論文）
所以心寧非常空虛。
小女子唔係無的放矢架，心理學家話：一個人如果感到空虛，咁佢就會鍾意食甜既食物。
炒炒佢近排好鍾意食朱古力甜筒，一星期食兩支左右啦。

又因為炒炒空虛 wor，所以佢將自己個 schedule 排得滿滿的。
有幾滿？我列出黎畀大家睇：
星期一至五：朝九晚六返工（理論上，IT人邊會有得準時放工？）
星期一及星期三：晚七至十返學讀 Master（一個唔鍾意讀書既人走去讀書，仲唔係有 d 野？）
星期二及星期五：晚七至十去做 Gym
星期四：晚八至十讀日文（兩文三語都未講得掂……）
星期六：朝九午一返工（又係理論上）
星期六：間中返中文大學幫手攪 HKOI 香港集訓隊既訓練
星期日：一係返崇拜，一係去左跑野外定向
其他時間：溫書，除了溫 Master 同日文既野之外，炒炒又報了考 SCJP（Sun Java Certification Exam）
　　　　　訓覺，平時訓得少，所以要補返。


講開訓覺，炒炒已經練成隨時隨地都訓得到。
坐巴士有得坐自然可以訓；連乘地鐵冇位坐，企係度都訓得到，厲害！厲害！

今次講到呢度。下次有時間，我再偷出黎同大家報料。（呵呵呵呵 ）

定向與我

數數手指，唔經唔覺都玩左野外定向十幾年了。

第一次接觸野外定向是讀中一那年，當時時為了考取童軍野外定向專章。說來慚愧，做了童軍這麼久也只考了這個專章。既然為了考章而學，成功考取後自然就放棄再玩了（因小弟是個三分鐘熱度既人）。中四那年，唔覺意咁入左童軍定向代表隊，接受正規訓練之後，漸漸愛上了這個運動，一玩就玩到現在。

點解我喜歡玩野外定向呢？
1. 野外定向是個人既比賽運動，跑定向時只得我自己一個人。我不是一個善於溝通既人，甚至於吝惜發言，吝惜表達自己意見既人。所以我讀書時最不喜歡要做 group project，寧願自己辛苦一點一個人做算數。跑定向對於我而言既好處之一係不用和人溝通。
2. 野外定向比賽既最大敵人不是別人，正是自己。跑一百公尺，我地可以看到對手點跑，但係野外定向呢？由於沒有既定的比賽路線，大多路線都係得自己一個。你要挑戰既，唔再係跑得快過某某，而係盡量減少錯誤，跑一場無錯誤既場事。滿遺憾是，十幾年都沒有成功過，盼望不久既將來，我可以成功跑一場無錯誤既場事。
3. 野外定向顧名思義，多數係野外進行。隨了可欣賞風景外，更重要既係可呼吸新鮮空氣。新鮮空氣對現代人黎講真的很寶貴。
4. 小弟自小身子弱，玩野外定向可以促進身體健康。又要上山，又要落澗，次次都需要超過一小時，都幾辛苦架。

今年賽季即將完結（每年九月至翌年四五月），今天是小弟本賽季年度最後一場比賽，於西貢塔門出戰第四十六屆體育節野外定向接力賽，希望挑戰自己成功啦。
講開今年既野外定向比賽，雖然儲夠分數可以來年升班參加錦標聯賽，但整季表演皆未如理想。經常犯下不才錯誤，最經常犯既係受人影響：明明計劃好向左行，見到有人向右行，自己又開始猶疑。希望明年可以改善到這個缺點。
正正因為時犯錯，今年年終排名只得梗頸四，和第三名只相差二十分（大既相差一兩分鐘左右）。幸好在無國界野外定向比賽2003男子四人高級組勇奪冠軍，在野外定向挑戰盾 H21A 組奪季軍，不致於全季食白果。

指揮官

今日做完 Gym，同轉轉去左睇電影，睇完回到家已經零時四十五分，趁自己記憶力還未衰退之前急急寫下感想。

首先講下 Backgroud information
片名：地心浩劫(The Core)
導演：莊艾美爾(Jon Amiel)
主演： 希拉莉絲韻(Hilary Swank), 艾朗伊克(Aaron Eckhart), 德萊連杜(Delroy Lindo), 史丹利杜茲(Stanley Tucci)
片種：驚慄
級別： IIB

內容：又係陳腔濫調既一班勇者拯救全人類避過一場災難既故事。

太空探險既故事大家可能己經看過唔少，比較經典既有星空奇遇記既企業號。今次有新意地不再是對抗外太空既危機，而係應付地球內部（地球核心）既問題。

體裁是比較新，但內容仍然脫不出一些既的公式：
1. 探險隊由精英組成。有危機時，永遠只會在最後一秒才解決到。亦會在適當時候犯錯。
2. 只要某一角色有超過一分鐘既獨白，即係佢即將陣亡。
3. 縱然各有同伴全部陣亡，男女主角一定沒事。



以前細個睇卡通片，d 交通工具若能在地底行駛，必定有一個或以上既圓錐形鑽係前面。今次就用「高科技」。
至於艘鑽地船…噢！用錯量詞，應該係一列鑽地船先對，係由一節一節車卡組成。（講到這兒，聰明的你應該已經知道該列鑽地船必須在戲中分體）




戲中提到：
1. 一個指揮官，必須為自己既決定負責，無論係對既決定，還是錯既決定。
但是，點解現實既問責官員唔係咁既？

2. 佢地既決定很果斷，例如當第一個城市遭殃之後，佢地即刻下決定。
但是，點解我地既政府政策朝令夕改，下指令既速度又多數慢半拍呢？

3. 探險隊做事多數都有兩手準備。兩手準備既意思係佢地會有幾個方案，一個方案失敗既時候，後備方案已可立時補上。

我希望大家，尤其係我地既政府，可以成為一個合格既指揮官。
1. 負責
2. 果斷
3. 兩手準備

新店開張

大家好！新鋪開張，首先舉行剪綵儀式，有情老闆兼大廚炒炒……

不知大家如何來到小店，可能你是我的中同（中學同學也）、大同（不用解釋吧！）、仔仔女女（喊一喊口號先：Model 鍾！Model 鍾！）、i.2000 戰友、網友、甚至三九唔識七，故意或唔覺意撞到入黎既網民，歡迎歡迎！
どうぞ よろしく お願いします

正所謂過門都係客，你睇看我既日記就可以多些了解小弟，也請你們留言。支持鼓勵小弟也好；回應小弟日記內容也好；好讓小弟也認識認識大家。

最後，多謝大家光臨，令本店生色不少。若有招呼不周既地方，還請見諒。請再三光臨，謝謝。

後記：
因為當初一個承諾，
我開始寫日記，
其實主要都係寫畀某人睇。
估唔到一寫就寫左兩年幾，
寫得仲密過某人。
呵呵呵

炒炒（2005 年 6 月 1 日添加）