胡思亂想

有時我會想：「如果人人係有咩事既時候都可以一五一十講清楚佢，咁呢個世界會變成點呢？」


我係一個鍾意胡思亂想既人。
有好多野我都會想到好遠好遠，例如一拍拖我就已經想到十年後會點，
有咩野要準備；有咩野問題將會遇到，要點樣解決等等。


我求知慾好強，我唔介意人地話我八，
任何事都要攪到清清楚楚，明明白白才肯罷休。
遇到有野我唔明白，又再沒方法去找答案既時候，
我就會自己去想，假設很多很多既野，然後估過答案出黎。


我唔係一個蠢人，所以好多時我都估中。
好似考試既時候，明明唔識，但係都可以估到個大概答案出黎。

但是我有時更係一個聰明過頭既人。
俗語說：「聰明反被聰明誤」
我就係活生生既例子。
有時個答案可能好顯淺，但係我會估到很深入，甚至深入過頭。

我又係一個頗敏感既人，少少既蛛絲馬跡都好容易會被我察覺到，
結果呢少少既蛛絲馬跡又會成為我的思考課題。


所以我其實都有少少神經質（簡單黎講即係有精神病，俗稱「癡線」）


但係其實我好怕猜度。
我怕我估錯，有時更怕我估對。


有時我會諗，如果我係阿呆而唔係杞人，
無憂無慮，日子會唔會過得好 d 呢？
又或者，其實呢個係度身訂做畀我既考驗呢？


唔好意思，周期性精神病發作。
悲觀人格浮現左出黎，
呢幾日都寫左 d 咁灰既野出黎 tim。