與新成員拍照

原本應承了小師妹 PC Easter 個 Camp 幫佢地放 Points，
不過 Poon Sir 話唔好咁早放，
驚被人偷左去，
話個朝先放。
之但係個日係廿九號，
剛剛放完 Easter，
唔係紅日，
所以我都幫佢唔到喇。

---

久未露面的某人終於覆我 Messages 了，
不過佢覆我比唔覆我更令人擔心。
炒炒既想法真奇怪。

---

今晚同 Coco 影左相，
Post 上 Omuser，
佢地話佢 Cool wor，
都唔笑既。
同部相機又開始玩多 d 野，
不過都現在都仲係用 Auto White Blance，
下次試下自己 set 先。

搵地方 Upload d 相，
攪到我頭都大。
以前用開那個，
一路都係無限 Upload 次數，
只係限 File Size，
但係今次 Up 左一半就唔畀我 Up。
另外一個今個月爆左 Quota，
同埋我找唔返個 Direct Link。
結果我 Up 上 Sina，
不過 Sina 好似 Block 左 Direct Link，
結果要我出埋 d 旁門左道先出到相，
明天要找過個地方先。

定向外挑戰賽

今日係渣打馬拉松，
年年都撞時間，
今年都唔例外，
我去 AYP 個定向外挑戰賽。

差唔多成九點先出門口，
坐 K16 去南昌，
轉西鐵去荃灣西。
一出地鐵站就已經見到傾盆大雨。
坐 51 號巴士上到牛寮，
先知天文台出左雷暴警告。
雖知道有雷暴警告，
比賽係唔可以舉行既。
一路等呀等，
十一點幾時，
終於收到消話順延三十分鐘，
即刻換衫熱身。

十二點出發，
之前有一分鐘睇圖時間，
一開始，
已經唔行大圍方向。
先打孤立係地圖西北既四個 Points，
之後順時針走，
當時只得三個人走呢個方向，
阿棟、KK 楊同我。
我當然唔夠氣跑，
漸漸被佢地放甩。
去到差不多最南，
我做了個錯既決定，
就係落埋最南，
結果遲了八分鐘返終點，
總共打了十六個 Points，
得 350 分，
被罰 80 分，
結果得 270 分。

---

下個星期去那個地方既資料都幾難找，
我行個四五間書局既，
找旅遊書都找唔到。
最近既係加州同 LA，
一係就提都冇提，
一係就只講迪士尼，
最多個本，
都係得五六頁。
但係我冇理由為左 D 五六頁，
買本五六百頁既書家嘛。

---

因為大衛同學既疑問，
我先知道原來有幾日既日記，
都畀佢食左一段出唔到。
受影響既日期包括 2 月 17,20,23 和 24 日，
其中有一段都幾重要。
一查之下，
發覺原來 HTML 錯左 TAG，
現家改返了。

洗牙

今日係短週，
難得可以訓到十二點。
不過九點鐘起過一次身，
食左個碗預備左既即食麵。
十二點起身，
第一件事就係打畀牙約時間洗牙，
約左三點。
之後就拆利是，
今年比上年更加少拜年，
收入比上年少左一百三十蚊。
呢筆錢，
仲要係我個袋唔夠四個鐘 ><


三點去洗牙，
仲補左三隻牙。
之後埋單，
用晒 d 利是錢之餘，
仲要補多一百元，
真肉赤。


之後同媽媽、Anutie Yip 去左旺角先施，
我大出血喇，
買左一個 26" 行李拉箱，
一對皮鞋，
一套西裝。
想碌卡月尾找數都唔得，
媽媽話要換電飯煲，
由佢碌 wor。


出完血，
佢同 Anutie Yip 去鑽石山睇超人特工隊，
我就一個人拉住個箱返屋企。


返到屋企，
執拾定明天比賽既野，
就去訓了。

計錯數

今晚放工出左黃金買參考書，
第一站係地庫那間簡體字書店。
行晒成間書店，
終於讓我找到昨日講個本書。
除此之外，
仲買左一本純講接口既，
同埋一本教用 PowerLogic、PowerPCB 既書。
PowerLogic、PowerPCB 呢兩個 Software，
係用黎整線路版既，
線路版就例如你打開電腦機箱，
睇到那塊 Motherbroad 咁，
你見唔到電線飛來飛去，
全部都係藏在底板度。

本來仲有一本講 Software Development 既書想買，
不過我較想買同系列另外一本講 Research & Development，
可惜找唔到。

到畀錢時，
三本書分別係 $40, $49 和 $43。
我畀左 $130 之後係度等。
我未畀夠錢但係就係度等找錢，
跟住收銀那個話就咁 $130 啦，
我仲以為佢收貴我，
點知其實係我畀少左。

之後繼續行，
買左 Print CD 既 Label。
$30 得 20 張，
$95 有 200 張，
當然買 200 張啦。

之後上埋二樓，
幾經掙扎，
結果都係冇買 DVD Burner，
雖則 $545 又幾吸引。


返到屋企，
收到我本護照喇，
有成十年簽證，
呵呵呵

新聞兩則

節錄今日生果日報兩段新聞

一場入冬以來最大的暴風雪， 周六（前日）由加拿大南下美國中西部， 再席捲整個東北地區， 受影響地區廣及十二個州， 造成陸空交通大混亂， 有逾三千班航機要取消， 數以百萬人生活受阻， 多處有停電報告。 在麻省和俄亥俄州北部地區， 積雪達七十六厘米（三十吋）。 氣象局預計， 周日天氣會進一步惡化， 一股潮濕暖流從大西洋吹至， 跟冷鋒相撞， 在東北部製造更大的暴風雪， 預料波士頓積雪會達一米（三呎）。 多個州先後發出暴雪警告， 麻省和新澤西州更宣布進入緊急狀態， 麻省還要求國民警軍協助。 市民都湧往便利店或超市搶購糧食。

天氣好凍，
戶外又危險。
如果唔係好醒咁買定 d 食物，
咁就慘 lor。
呢個情景，
亦令我想起 The Day After Tomorrow。

由女藝人薛家燕任代言人的日本OTO牌一款足部按摩機昨日發生罕見「夾腳」意外。 一名婦人在上環一間百貨公司試用其中一款新推出的足部按摩機， 可是十多分鐘後疑按摩機發生故障， 導致女事主左腳遭按摩機緊夾， 職員多番拯救， 甚至拔掉電源仍無法將她救出， 最後由消防員拆散按摩機將其腳拔出送院。 該按摩機採足桶式設計， 以七十二粒滾珠及八塊氣墊為賣點， 聲稱可作三百六十度全方位按摩腳部， 刺激腳底穴位， 促進腳部血液循環。

曾經想過買呢部機，
去改善長期穿高踭跟鞋已有既靜脈曲張。
不過因為咁大部，
好難寄，
所以一直都未成事，
現在想返真係好好彩。

煲耳機

最近買左對 Earphone，
上網望一望 d 資料，
先知道原來想 Earphon 用得耐 d 聲會愈黎愈好，
如果想快 d 進入最佳狀態，
就要煲佢。

Quote 一段黎自漫步者既解譯：
就像新購買的汽車需要經過一個磨合期才進入狀態一樣，
音箱同樣需要經過一段時期的使用才會進入到最佳狀態。
音箱中的揚聲器單元會作出許多類似發動機的衝程運動，
要讓衝程運動更順暢，
就是適當的讓磨合加速，
另外揚聲器的振膜以及抑環也會影響音箱的狀態。
播放各種音樂能夠達到磨合的目的，
但效率相對較低，
使用漫步者煲箱工具可以更快的讓音箱進入最佳狀態。

咁我就 Download 左佢個 Tools，
早兩日煲左三個鐘。
煲完聽返，
唔知係咪心理作用呢，
係好左 Wor。

講返個 Earphone，
有個外置音量調節，
$50 的確抵玩。

---

好巧合，
上網 Search d 參考書，
找到本「Designing Embedded Hardware」，
問大衛同學有冇啦，
點知正正就係佢星期日買左個本。
昨晚放工出旺角買，
簡體版找唔到，
繁體版都冇，
明天落黃金找過。

---

收到媽媽電話，
佢話返返工見暈返左屋企，
真令人擔心。

拿美國簽證

今朝無返工，
拿了公假去申請簽證。
昨日 Make 左 Appointment 係 8:45am，
咁我八點七八已經去到附近，
不過係唔識上去，
結果攪到差唔多九點先去到。
去到閘口，
首先被人搜一次袋，
跟住係條蛇餅到排隊交 Form。
帶左好多文件，
不過最後只收左我份 Form 同公司信，
問大會拿既邀請信都冇收到。

交完 Form，
就要再排隊入大堂。
係門口搜多次袋，
放低所有電子儀器，
過晒機先入去。

入到去，
首先 Record 我左右手食指既指模，
之後再等 Interview，
係等既其間，
就要填張 Form 畀 HongKongPost。
現在改左例，
以前拿簽證係即日下午返去拿，
現在就係寄返畀你。

填完 Form ，
到 Interview 喇，
開頭以為係入間房，
點知原來就咁係 5 號窗。
去之前其實好驚，
不過行到埋佢就冇乜野。
其實都係核對返填既資料，
去個邊做乜，
父母係邊，
父母職業係咩咁。
最攪笑係佢問有邊 d 公司係我間公司既客，
我答左 CSL（現在改左做 HK Telecom），
哈哈哈。

佢又問我媽媽做 d 乜，
我唔記得佢個 Job Title，
就話佢係 Airport 做關於 Tourism 既野，
差唔多姐。

最尾佢話應該冇乜問題，
我估拿到掛。

成個 Interview 唔過十分鐘，
但之前排隊排左兩個鐘 ><

---

今晚練跑，
因為天雨關係，
跑左一個訓練就收工。
四十分鐘大圈，
佢地跑左四個圈，
我只跑左三又四份一個圈。
第一個圈都係十分鐘內既，
之後就跟唔到喇。

---

又有新朋友黎呢個日記，
歡迎歡迎。
不過請恕我唔可以答你呢條問題喇，
其實睇日記主簡介那段，
都大約估到啦。

小數後兩個位

老闆一句話想做到少數後兩個位，
就攪左我一整日。
首先就係個 ADC（Analog to Digital Converter），
現在用既 MCU（Microcontrollers）係 build in 左 12 bit 既 ADC，
即係話我以將個 Range 分成 2 的 12 次方咁多份。
2 的 12 次方即係 4096份，
如果要做小數點後兩個位，
我係需要至少 6500 份。
即係我要外置一粒 ADC，
咁一連串問題就黎喇。

呢個係用電芯手提裝置，
加多粒 ADC 即係用既電多左，
夠唔夠長時間用呢？
Design 既時候係用鈕電，
結果後來改左做 AAA。

個 ADC 點同 MCU 溝涌呢？
會唔會唔夠 I/O（Input/output）Pin 呢？
唔夠既話就要轉 MCU，
咁又找唔找到低用電量，
低成本既 MCU 呢？
轉 MCU 既話，
個 Program 係咪要由頭寫過呢？
個 Development 成本又點計呢？

好彩最後都讓我找到 16-bit 既 ADC，
用 I²C bus 溝通。
I²C 係 Philips 80 年代初 Developed 既 Communication Link Standard，
好處係只用兩條 Pin（一條 Clock，一條 Data），
同時 Connect 一大串 Device。
我現在個 Project，
就係用 I²C 同時 Connect LCD Driver、EEPROM（External Memory）和 ADC。
而個 Cost 只係比現在多兩蚊美金。

不過 I²C 我都係新手，
雖則剛剛先同大衛同學爭論完普通一粒 MCU 做唔做到 I²C。
最大難題係我啦 MCU 好麻煩，
D I/O Pin 全部單一方向，
原本齋駁 LCD Driver 都唔係一個問題，
因為齋寫唔駛讀，
不過現駁埋 EEPROM 同 ADC，
就要 Read，
點解決呢，
忌到我頭都大埋……@.@

找唔到卡數？

中午食完飯，
去左大新銀行交簽證費。
去銀行之前，
要去提款機拿錢。


咁順手 Check 埋過 Account Balance。
發覺個 Credit Card Account 仲係負好多。
話說上個月 Set 左二月十六日自動係 Saving 過錢去找卡數，
我 19 號 Check 過一次，
發覺冇過到數，
咁過左最後還款日，
咪即刻 Login E-Banking Check Check 左，
點知佢 Show 出黎話係三月十六日。
咁我就即刻選 Transfer Now 啦。


今日 Check 都未過到數，
有冇攪錯？
返到屋企上 E-Banking 睇睇，
佢寫我 Saving 既錢已經減左，
但係就冇加落 Credit 個邊。
唔通我過錯左落阿媽家用個邊？


打電話問媽鎷啦，
飛左去留言信箱，
咁唯有講低等佢覆啦。
之後為左保險，
係 Saving 過多次錢落 Credit。
佢寫話要一個工作天 Process，
今次未減我錢，
只係 Avialable Balance 個度少左。


二月二十二日後記：
第二朝訓醒，
第一時間上 E-Banking 睇睇。
發覺過左兩次錢落 Credit，
嚇得我丫………

零五年返第一個崇拜

今朝八點就起左身預備返崇拜，
返到學校見到好多人，
原來除左崇拜之外，
仲有個唔知咁簡介會係禮堂舉行。

不過崇拜都有好多人，
宗教館係爆左，
我要坐係副堂。

今日係基督少年軍立願禮，
培浸成立左基督少年軍都成三年了。
今日除了基督少年軍班小朋友出席之外，
仲有佢地既家長。
如果個個星期都有咁多人就好喇。

上到去簽到既時候先發覺，
原來我今年都未返過崇拜，
對上一次應該係聖誕日個浸禮。

返完崇拜，
行落紅磡拿相，
之後找野食，
一路行到落土瓜灣，
結果又係食大家樂。
之後去左觀塘踢友賽，
打得唔係幾好，
我入左一粒同一個助攻，
好彩最尾都迫和 6 比 6。
之後去左食 Tea 同行觀塘 d 開倉。

---

夜晚終於睇埋浪族闊少爺最後一隻碟，
算係了左件心事。

---

試過去改善，
不過似乎成效不大。
我現家都冇信心補救到

娛樂大亨

時間愈來愈迫切，
昨晚收到 OFC 個邊封 Invitation letter，
跟住就可以攪簽證。
中午放工返到屋企，
先知道唔記得影相，
屋企附近又冇乜地方有證件相影，
結果落左紅磡影。
順道約左袁生睇戲，
睇既係娛樂大亨 The Aviator，
馬田史高西斯執導，
里奧納度狄卡比奧主演。


原本袁生話想睇超人特攻隊（粵語版），
不過佢打黎既時候我話我睇「左」英語版，
佢錯左我話我睇英語版，
以為我唔睇粵語版，
結果就買左呢場。


套戲都幾長，
成 170 分鐘，
不過唔悶，
我都冇睇過錶咁淨。

始終都係有唔少人唔熄電話，
同埋講電話，
真係淚鬼死。
其實入場熄一熄電話好難為佢地咩？

講返套戲內容，
好多野都冇點交待，
仲 Sudden End tim。
最唔明係發生左意外之後，
醫生話佢七成皮膚燒傷，
腳骨「碎」左（唔係斷咁簡單），
但下個 Shot，
佢已經好似一個正常人咁行，
除左塊面有少少疤痕之外，
睇唔出佢係好似醫生講咁傷。

運吉行大運入貨記

今日放工黎過運吉大遊行。
首先坐地鐵去深水步，
係黃金高登行左個零鐘，
買左對漫步者 Earphone。
之後過對面沿鴨記行到落南昌街。
轉返過去長沙灣道，
落到太子駁彌敦道。


一直殺到落旺角，
入萬成繞左兩個圈。
之後過星際，
係二樓買左兩本雜誌，
其中一本係迪派影像，
封面專題二十頁講 E-300 同 E System。
之後過返旺電，
格晒價之後，
最尾係二樓入左張 1G 既 Ridata SD Card Pro。
張卡真係好攪笑，
上去官方網頁竟然冇呢張卡個資料。

之後撒退，
沿菜街落油麻地。
途中又撞到舊同學何先生同陳先生，
仲約定下次聚會找埋我。


返到屋企成九點半，
張 d Files 由舊既 SD Card 抄去新個張到，
再 Fill 左八隻 CD 既 MP3 落去，
包括克勤、達明一派、黃子華等等。

到我食飯既時候，
差不多十一點了，
呢個時候，
我先發覺有套我想睇既戲係明珠台播緊…… ><
套戲係 Remember the Titans，
其實係戲院睇過一次，
不過套戲咁正，
冇理由唔睇多次，
不過冇左大半……

拍拖真的要日日見？

好傷心，
部 MP3 機個 Earphone 本身已經壞壞地，
時得時唔得。
今朝返工時，
部 MP3 機仲跌埋落地下，
入電舊膠個位爛左。
現在聽聽粒電會甩出黎，
哇哇哇……><


睇黎部 MP3 機都係壽終正寢，
要想既係，
究竟買個部 MP3 機好，
定係買張 1G 既 SD Memory Card，
用部 Pocket PC 聽好。

講音質，
我相信 Pocket PC 同 MP3 機冇得比，
但係講靈活性，
當然 Pocket PC 好 d 啦。
因為張 Memory Card 除了可以放歌之外，
仲可以用黎放 Pocket PC 既 Software，
甚至放晒一套戲落去。

而且睇價錢，
一張 1G 既 SD Card 都只係八百元左右，
如果用八百元買部雞雞 MP3 機，well……
不過用 Pocket PC 有另一個壞處，
就係以後冇得聽收音機喇……

---

上個星期，
有個日日都見女朋友既人，
問我點解可以忍到咁耐唔見面，
可以忍到咁耐唔講電話。

其實兩面睇啦，
係好辛苦架喇，
不過卻因為咁學識珍惜。
再者，
我忙佢仲忙，
如其傾一個鐘頭電話，
倒不如畀佢訓多一個鐘啦。

---

果然唔係事事順利，
Commitment 再添變數。

天氣反常

今日唔係好提得起勁做野呢，
好累好累。
昨晚都已經唔算夜訓，
十二點就走左上床，
但今朝一醒已經八點半。

中午同公司同事去左食午飯。
一入門口已經見到有另外四個同事坐左係度。
到我地有位時，
隔離枱又有四個同事，
差唔多成三份一間公司去左呢間，
好攪笑。


下午唔知點解隻腳特然好痛，
行好企好都痛，
唔知咩事。


天氣好反常，
今日熱返，
但 Weekend 又凍返 wor。
好彩我冇報到比賽姐，
如果唔係凍死都似。
講開溫度，
今日 Check 過 California 既氣溫，
十二、三度，
唔算好凍，
我都仲夠衫穿。
跟手 Check 埋 Massachusetts，
Well ，三度，
當堂呆左。


沉迷左係 BeJeweled 2 度，
呢 d 小品遊戲，
絕對係 Kill Time 良品。

呢幾日都係執野，
Forwarder 18 號黎 Take 野走，
希望唔會漏。
其實都幾趕，
我仲未拿簽證，
仲未改機票……

主的安排

既然一早有個 Commitment，
咁點都要有兌現既一刻。
今個月因為之前既家事，
兌現唔到 Commitment，
但下個月機會又黎喇。

如果今個月兌現 Ccommitment，
付出的是萬多元。
下個月兌現的話，
付出的相信只是五千多元，
加上兩堂日文，
再加上放棄替一個比賽做工作人員。

雖然未知因素依然有好多，
不過我相信成功的機會很大。
因為一直既安排都是朝呢個方向。

主係會安排最好既野畀你，
我今次再深深體會到。
上個月阿梁話可以找到人內部認購古巨基演唱會，
最後因為該人坐地起價而作罷。
古巨基演唱會舉行的日期，
正正就是三月第二個星期，
即公幹的那個星期。
今年有三場色級比賽，
第二場比賽日期，
是公幹中的星期日。
本來一早報了名，
不過第一場過了截止日期，
張報名表彈返轉頭，
所以第二場都未報。
還有就是日文班，
開頭因為唔夠學生，
所以 Delay 了一個星期，
如果冇 Delay，
一返黎就要考試。

所以話，
主待我們每個都好好。
雖然有時會有一時的失意，
但更好的會在後頭。
願我們每人都有凡事感恩的心。

---

今日屋企多左個新成員，
遲下 Post 佢 d 相出黎。

吃不到的葡萄是酸的？

係 Newsgroup 睇到幾篇文章，
好激氣。
話說有人係 Newsgroup Post 左篇文，
投訴有一班持某牌子某形號 DSLR 既人去追星（影明星）。
話佢地非常早到，
咁佢遲黎既就冇好位，
影唔到相云云。

跟住又有班好事之徒幫手鬧，
不過鬧人既又唔係現場，
鬧既又唔係事實……

我唔係被投訴既其中一個，
只係識得佢地，
亦同佢地出過黎幾次影相。
亦都識得當日在場既其他幾個人，
問晒之後都對事情有一定掌握。

我結論係「食不到的葡萄是酸的」
唔夠人早霸好位就發窮惡。
當然，
某 d 事上佢地的而且確係有少少做錯左，
不過當日錯既唔止佢地幾個，
佢地只係佔少數。
但係只係標籤佢地幾個，
追住個品牌黎鬧，
（冇錯，佢地係對品牌唔對事既）
就有點兒那個。

---

今日雖然係情人節，
不過對我黎講冇乜特別野要做，
又一樣 OT 左成粒鐘，
之後同屋企人食飯。
家姐話借個箱畀我裝野出差，
個箱仲可以放西裝。
不過佢係最大個款，
我邊有咁多野放呀？

食完飯食甜品又係驚死我，
話左阿媽好多次，
唔食就唔好叫咁多，
唔好浪費食物，
佢係到唔聽。
六個人食飯，
兩個唔食糖水，
佢都叫人拿六碗糖水黎。
話佢又扮到好委屈，
好心唔得好報云云。
佢話我鍾意食紅豆沙，
叫多碗我食。
不過呢，
我冇食幾碗紅豆沙好耐，
同埋今日，
我食西米露 wor。
上個星期食團年飯已經叫左佢唔好，
七日之後又係咁，
都唔知係我唔了解佢，
定佢唔了解我。

初五教班

年初五竟然要教班，
點解我個時會應承架？
晨早九點去到金山集合，
我八點幾就到，
幾乎係最早那個，
等到九點半先開始。

例牌一開始帶 Map Walk，
不過張圖就唔係好得，
明明係半空曠地，
就畫左空曠地，
攪到我成日話 Show 空曠地畀佢地睇下都唔得。
張圖又舊，
成三四年前畫既，
d 植披又唔同左樣。

Anyway，
行到十一點去到白林個亭到，
同佢地玩左兩個小遊戲。
第一個係提示符號接力卡，
第二個係指南針導向。
講開指南針就激死我，
教左好多次點拿指南針都唔聽。
咁佢地要跟住指南針個箭咀行，
咁個指南針就梗係要放係正前方，
指住前面架啦。
佢地唔係既，
個指南針打橫指，
你估現在扮蟹咩。

之後去燒烤區，
玩左個唔知點解叫星形定向既 Short Course。
（明明玩緊既都唔係星形定向……@.@）
之後有兩個幾鐘午餐時間！
（都未試過咁耐既）
有人坐的士落返深水步食野，
而我地教練係……燒野食。
今年第三次喇。

食完之後就到體驗賽。
金山真係唔適宜攪定向，
太多猴子，
其中一個 Point 就係附近佈滿猴子。

原本 Plan 係五點解散，
但有兩個學員走失左，
結果六點先走得。
我坐順風車落沙田，
行左西田成個鐘，
都係找唔到我想買既野…… ><

超人特攻隊

今日又係訓醒之後就出街，
今日下午約左紐版踢波，
地點係灣仔公園。
呢個場好耐之前都同大衛、馬神去過，
唔錯架。

今日我只係入左兩球，
有 d 少，
不過嘗試過助攻，
可惜次次都係差少少。

今完之後，
去左大快活食下午茶。
收到 Alex 電話約我出街，
我話我係灣仔，
咁橋佢係銅鑼灣。
佢係機鋪打緊機未夠鐘，
（個間係段時間收費而唔係逐鋪收費）
我就行落銅鑼灣，
上左 Sogo，
買左個 70L 既大背囊。
本來上買個 spoon，
不過行晒都淨係得金屬做既。
之後又想行埋十蚊店，
不過 Alex 打黎話到左，
咁我唯有離開 Sogo。

Alex 話去睇戲 wor，
不過銅鑼灣點會仲有飛賣。
結果我地出到電影中心，
都係得頭二行咋。
買完飛，
去左一間想試好耐既餐廳 -- 蒜頭屋。
叫左個二人餐，
幾好食，
而且幾多野，
未必食得晒。

之後入場睇超人特攻隊英語版，
好好睇、好好笑。
完場出字幕時，
我以為得我兩個睇晒 d Credit 啦，
（其實 Alex 係等我）
點知原來都唔少人睇埋先走。

初二夜，煙花夜。

每年既年初二都有煙花匯演，
今年都唔例外。
舊年既年初二，
我問 Alex 借左支腳架出左去影煙花，
地點係銅鑼灣避風塘條長堤。
今年我都有出去影，
亦都係同 omuser 班影友。
但今年個地點改左係九龍，
西隧出口附近片爛地。


今日都係點幾鐘起身，
之後拿拿聲出西隧口條行人天橋回合其他影友，
之後就行去爛地。
其實咁早出發，
主要就係要霸位，
其次就係驚警察會封路入唔到。
不過其實個度唔係咁多人知，
所以唔駛咁早都得。


到達目的地時好早，
只係四點幾，
煙花匯演八點先開始，
成四個幾鐘做咩好呢。

我地結果玩狐狸先生幾多點，
不過太耐冇玩呢 d Game，
攪到我輸左。
之後又有玩何濟公，
一個人捉十幾人，
的確係幾難。
之後加多個人，
兩個人捉就好玩 d，
不過我一次都未試過被人捉到呢！

煙花未到八點就開始，
電台新聞都未播，
歷時廿幾分鐘。
我係咁按快門，
係爆光期間就可以欣賞煙花。
因為我用十秒慢快門，
連埋相機做 NR 個十秒，
每影一張就廿秒。

對今年 d 煙花有少少失望，
好似冇舊年咁正咁。

係奧海城食完晚餐，
就返左屋企執相。
今日 d 相都係影得唔好，
不過已經好過上一年。

#1


#2


#3


#4


#5


#6


#7


#8


#9

花車巡遊

大年初一，
恭喜發財，
祝各位萬事如意，
學業進步，身體健康。

我其實感覺唔到咩新年氣氛，
最應節咪屋企好多糕 lor，
五六底左右啦。
唔知我要食幾多日呢？

今朝起身都兩點幾，
（其實都唔應該講今朝）
拿拿聲整野食，
冇錯，就係昨日淨既半碗飯，
少少餸，同埋最重要 d 糕。

之後就即刻拿齊裝備出門口，
咁趕去邊？
咪就係過海影花車 lor。
以往花車巡遊都係大白天，
今年就係夜晚。
但係都要早早去霸位，
冇得睇巴西對香港。
係我 Set 緊腳架既時候，
有人訪問我 wor，
不過唔知係邊份報紙喇。

企左成三個鐘左右，
先見到 d 花車黎。

如果要比較日頭花車同夜晚花車，
夜晚花車就好睇 d，
不過就難影 d ，
我炒左好多相，
好彩係用數碼唔係菲林姐。

今年 d 團隊都有唔同種類，
有可愛小朋友、Hip Hop、銀樂隊、
海浪公園、迪士尼、國泰、警察、
日本暴走、加納比海、性感啦啦隊等。

遠左之後，
十點幾去左茶餐廳食野，
不過如行去後巷，
再上樓梯，
一路行，
我地一路話似無間道，
上到去，
真係有張無間道海報。


#1 開始之前


#2 米奇與米妮


#3 高高在上


#4 低炒之高處不勝寒


#5 花車中的普通車


#6 鼓舞飛揚


#7 快樂的小雞


#8 香港花車


#9


#10


#11


#12


#13


#14


#15


#16

年三十

今日係年三十晚，
開頭以為班同事會去食餐好架啦，
所以唔帶飯，
點知唔係 wor，
結果去左食麥記。
我第一次食個 d 烤我餅，
味道一般啦，
都係豬柳蛋漢堡好食 d 。

公司照舊四點話走得，
不過我個 Turbo 剛剛開到盡，
結果做到五先執野，
五點半先離開公司。

其實早走遲走冇乜分別，
今晚都係得我自己一個人食飯，
叫做有團年飯既咁啦。

食完飯，
上下網、打下機咁。
有人叫我去行花市，
不過落雨，
結果冇去到。

---

份禮物昨日拿了去郵局寄，
應該星期四五收到掛，
唔知佢會唔會鍾意裡面既野呢？

---

昨晚食飯勁攪笑，
咁家姐約初七食飯，
咁但係我初七要返學。
唔記得邊個話初六，
姐夫話好呀，
跟住家姐就好大聲問：「咩話？」

補充少少啦，
農曆乙酉年正月初六，
正正就是二月十四日。
家姐咁大反應，
可以理解既。
我就冇乜所謂，
反正都冇特別野做，
係做少日 Gym 姐。

團年飯，遲大到。

唔知幾時開始，
當我係最後一個人離開，
要負責鎖門的時候，
我就會有莫名的恐懼。
我會懼怕沒有關門，
我會懼怕沒有鎖穩。

每次我都會來來回回檢查數次，
由屋企行了十數分鐘後，
跑回家再檢查多次。
即使檢查了多次，
依然會心掛掛。

今天又是這樣了。
不過今次不是鎖屋企道門，
而是公司道門。
因為要預備展覽會展出的展品，
我要重拾一件放低左幾個月既 Program，
要再次 Debug。

上次因為已經去到樽頸位，
加上又有新 Project，
所以暫時放低。

今天第一樣要做的，
是重拾這個 Program 既 Structure，
還有就是咁多個 Version 有甚麼分別丟等等。

結果做到差不多八點，
公司最後一個走，
要熄燈鎖門。
今日略有少成，
好似多月來 De 唔到既 Bug，
逐漸露出曙光。
雖然仲未攪掂，
但希望明天可以攪掂。

之後就趕出佐敦食團年飯，
其實約左七點，
不過我八點半先到，
真係有 d 唔好意思。

追星新利器

終於有一個星期唔駛攪定向，
可以去影相相。
中午同媽媽去左飲茶，
之後坐 2E 落奧海城。
兩點去到，
見二期有無記宣傳活動，
停低影返幾張先。
之後先係重頭戲，
出露天廣場影 2R。
之前手多多較左強制熄閃光燈，
攪到好多張相都 Under 左…… ><
好彩今日影 Raw，
返到屋企可以推返爆光補相。


由於有新利器，
今次影相可以高人一等，
唔驚畀人擋住，
呵呵呵。


不過發現一張 Memory 卡唔係好夠用，
一張 1G 影到 72 張左右，
我今日兩個鐘影兩個 Function 已經唔夠用了。


之後行返屋企，
就黎返到既時候，
先發覺留左把梯係奧海城，
拿拿聲跑返去，
好彩都仲拿得返。


之後執相出相，
雖然影得差，
但都有一兩張畀人讚，
呵呵呵。
貼出黎畀你地睇下先。



Plan C 都完成埋，
不過一樣好肉酸…… ><
夜晚攪 Plan C 既同時，
KO 埋隻李克勤 x 容祖兒，
聽日終於可以寄了。

試跑？甩底

今日放左工要趕入元朗，
因為三月個練習賽要睇 Site，
之後會有聯誼活動。
佢地約兩點係朗屏站，
不過我自然趕唔切啦。

買左個唔好食既麥記招財包餐係巴士上食，
入到去都成三點。
開頭以為好多人，
點知原來計埋我得四個人，
其中一個負責試跑，
其他三個就 Check 下 Tape。


其實咁少人黎真係有 d 失望。
起點冇人黎，
終點冇人黎，
黎既得賽區同 EO，
唉……


四點左右試跑完，
就一行四人行左去南生圍燒野食，
坐完橫水渡，
就接到 Elma 電話話佢冇帶鎖匙。
Well，
我呢樹係元朗，
仲要叫天不應叫地不聞，
想幫都幫唔到。


我地差唔多五點開始燒，
到七點幾八點黃 Sir 先加入。
一路燒到九點幾。

之後坐返橫水渡，
再行返出朗屏。
我就坐紅色小巴返屋企。
原來夜晚既紅 Van 係繞路繞得更加厲害，
我以後都係坐西鐵好 d 喇。


Plan A 終於完成，
不過好肉酸…… ><

冇雙糧

今日有 d 唔開心，
原本呢一刻，
我應該係一架飛往紐約既航班上面，
繼續扮演花木蘭，
不過現在，唉……

---

今朝返工遲大到。
話說架小巴過左歐化，
見到有個警察揸住架電單車，
咁架小巴就駛左入橫街，
等左好耐先出返黎。
結果我就遲左半個鐘有多喇。

---

今日做 Document 做到成七點，
放工之後，
首先去左觀塘廣場，
買左 903 拉闊李克勤 x 容祖兒。
真係想起都興奮。
之後行玩具鋪，
差 d 就買多七隻 Pinky，
好彩我冇咁多現金姐。
之後坐車出旺角，
行左旺電格價，
之後個實惠買左把鋁梯，
以後追星就可以高人一等了，
呵呵呵。

返到屋企，
收到某人找到工作既好消息，
恭喜恭喜。
不過會唔會難拿假呢？

早兩年，
年尾總有份禮物，
就係年終雙糧，
又或姐花紅。
不過今年冇呢支歌仔唱 lu，
今日老闆出左通告，
話今年唔發雙糧，
希望唔駛減人工啦。
Moly 有成五萬 Bonus，
真係令人既羨且妒。

個半鐘的日文堂

今晚要返日文，
不過臨出門口肚痛，
結果遲左十五分鐘……><


現家個半鐘一堂，
其實好似幾好咁，
當然係指利用得好既時候。
以前上兩個鐘，
直正集中時候既可能一個鐘都冇，
現家就分分鐘都在狀態，
或者可能心態唔同左啦。


講開讀日文既心態，
今日老師講開話佢教既另外一班 d 大學生好鬼懶，
攪到我都唔敢畀佢地知我 Master 都拿埋既學歷 tim。
今日返唔齊人，
但結果個課至靜左好多。
唔通嘈既源頭就係佢地？


走既時候見到以前個老師係度教緊第二班，
本來想等佢落堂寒喧幾句，
不過醒起佢係上到唔願落堂個隻，
結果都係放棄了。


持續進修個度，
我仲未收到接受我申請既確信，
不過我就知道左已經申請成功。
下午收到個邊電話，
原來我寫錯左屋企地址，
封信打回頭，
哈哈哈。


因為昨晚太眼訓既關係，
所以冇做勞作，
結果今晚上完日文課之後，
要開夜車。


多謝大衛同學提醒我 Deadline 就到既事。
不過咁，
件勞作唔係呈交畀香港既 Prof. 咁簡單，
所以嚴格來說，
係已經過左 Deadline。
不過聽講今次份 Assignment 遲交係唔扣分既，
呵呵呵。

懷才不遇？

畀人讚我叻
真係有 d 唔好意思喇。

---

公司上唔到 ICQ，
連 www.icq.com 都去唔到。
結果今朝我係屋企抽低 login.icq.com 個 ip address，
返到公司硬入個 ip 入去，
咁就攪掂。
跟住發覺 MSN 都入唔到，
又係硬入 ip address，
Mission Completed。

---

返工最怕懷才不遇，
現在有人賞識，
有上位既機會。
不過個 Stoper，
竟然會係自己度，
係自己唔敢去馬。

應該驚既係冇單黎，
我驚既反而轉調，
驚有人落單……

---

夜晚出左 SOC 練跑，
今次個訓練內容係二十七個 Points 既奪分式。
限時三十分鐘，
我用左二十分鐘打晒，
第一個返黎。
阿棟中段漏了一個沒打，
要走返轉頭。

講返 d Points，
每個都有條簡單四則運算數式，
要寫下答案。
我竟然計錯 22-6，
我寫左 14，
真失敗。

團購

今晚好趕，
幫奧林派攪團購，
今晚係旺角提貨。
約左佢地七點，
結果最遲那個七點半先到，
我行到返屋企都成八點，
食飯食到一半就趕住出門口。

去到日經已經八點七，
不過老師之前個堂仲未落堂，
即係我唔算遲到啦。
個班房得個小貓三四隻。

到正式開始上堂，
都唔夠一半人到左。
一路上堂，
一路有人遲入黎。


今堂頭半個鐘都係對答案，
除了聽解，
我做晒其他個 d，
係咪好叻呢？


餘下半個鐘教文法，
只係講左第一點，
就夠鐘落堂。

Moly 話呢班教得比以前兩個鐘一堂快。
不過我就唔係咁慣喇。
以前肯定兩堂一課，
第一堂教生字和文法，
第二堂主要會話和聽解，
好有系統咁。
而且對答案會係教完書先對，
唔會點影響教學進度。

但係現在呢？
我覺得對答案用左太多時間喇，
而且時間控制都唔係咁好，
就好似今堂咁，
文法教得個少少，
好似兩頭唔到岸咁。

---

返到屋企繼續做花木蘭，
開頭打自通頂攪掂佢，
結果都係太眼訓頂唔順。

進度係餘下 Plan A 既三分一中既三分一，
Plan C 未有寸進。