特訓

距離決賽仲有兩日，
話唔緊張就騙你既。
仲有兩日，
拿拿臨加操，
操熟副 Deck 啦。
係觀塘特訓，
壓力比真係比賽仲大。
因為左中右後既 Friend 係咁指指點點，
稍稍做錯少少都受萬民指責。

不過咁特訓都有佢既好處，
一黎真係可以只點樣 Improve，
二黎如果可以係呢度都保持到心如止水，
比賽就唔驚啦。

打到咁上下，
收到艾文電話，
話上阿力到睇波 Wor。
坐小巴係佐敦會合艾文後，
去新森林食晚餐。

自細好鍾意食焗飯，
可能受先父影響掛。
細個同佢落茶餐廳，
總是叫焗豬扒飯。
大過之後，
就好鍾意食焗野，
尤其是焗豬扒飯。

不過今晚唔係食焗豬扒飯，
而係食羊脾扒拼薯蓉焗田螺。
雖然個侍應話唔好祈望個焗田螺會好大，
不過都估唔到會咁細，
大約係牛記公司蓮花杯咁上下大。

食完之後，
去左惠康入貨，
買左成 $120 零食上阿力家。
同三五知己，
一路食野，
一路睇波，
一路打牌，
一樂也。